Ioane 20.19-31 Faanä

Tāpati 19 no Èperera 2020.

Faanä

Ômuaraa.

I teie ä täpati ua muhu te mau oe no te mau fare pureraa a te Ètärëtia Porotetani Mäòhi, no te faaära ia tätou e, e òhipa taaê teie e tupu nei i roto ia Mäòhi Nui e i roto i te oraraa o te faaroo. Te faaìte nei  tätou i ù nei i te hoê hohoà no te âmui tähiraa no te mau puai ia noho tätou i roto i to tätou mau ùtuafare ma te pure. Te tumu hoê roa ia no te tama teie maì viivii e tupu nei, i Mäòhi Nui nei, e i teie ao. Te ärai hoê roa no teie taime, to te taata tätaì tahi ia haapaòraa i ta na hopoià i mua i teie maì e haaviivii nei i to tätou oraraa. Na to tätou ära tämauraa i te mau vahi e haerehia e tätou, ma te paruru ia tätou ia au i te mau faaueraa i faanahohia, te riro nei ia tätou èi taata faatupu ora no  te maitaì o te täatoà, tei parauhia te âmui tähiraa o te mau puai.

Himene

Taramo 118.15-29

15 Te reo òaòa e te ora tei roto i te mau tiàhapa o te feiä parau tià ra. E räveà itoito tei te rima àtau o te Fatu,

16 e teitei to te rima àtau o te Fatu, e räveà itoito tei te rima àtau o te Fatu. 17 E òre au e pohe, e ora mau ä vau, e parau faahou ä vau i te òhipa a te Fatu. 18 Ua aò hua mai ä hoì o ia ia ù nei, aita rä o ia i faaruè noa ia ù no te pohe.19 A ìriti na ia ù i te mau ùputa parau tià ra, e tomo vau nä reira mä te haamaitaì i te Fatu ra. 20 O te ùputa teie na te Fatu, e nä reira te feiä parau tià i te tomo. 21 E haamaitaì au ia òe, ua faaroo mai hoì òe ia ù, e ua riro ei ora no ù. 22 Te ôfaì i faaruèhia e te feiä i patu ra, tei riro iho nei ei ôfaì tihi. 23 O ta te Fatu teie i rave. E mea maerehia hoì i mua i to tätou nei mata. 24 O te mahana teie i faaäuhia e te Fatu;  e òaòa tätou, e e fänaò i teie nei mahana 25 Ia ora i teie nei, e te Fatu, te ani atu nei au, ia ora i teie nei, te ani atu nei au. E haamaitaì mai ia mätou i teie nei, e te Fatu e 26 Ia ora o ia o tei haere mai mä te iòa o te Fatu Te faaora atu nei mätou ia òutou mai roto atu i te fare o te Fatu. 27 O te Atua mau ra o te Fatu ia, o te haamäramarama mai ia tätou nei. A ruuruu na i te tütia àmu i te taura i nià i te mau tara o te fata nei. 28 O ta ù Atua òe, e haamaitaì ä vau ia òe, o ta ù Atua òe, e faateitei ä vau ia òe. 29 E haamaitaì i te Fatu, e maitaì hoì to na, e tià hoì to na aroha i te vai-mäite-raa.

Himene

Òhipa 2.42-47

42 Mau päpü mäite atu ra rätou i ta te mau âpotetoro i haapii ra, e te âmui-mäite-raa, e te vähiraa i te päne, e te pureraa hoì.

Te oraraa i rotopü i te huifaaroo

43 E roohia iho ra rätou atoà e te mataù, e rave rahi te temeio te täpaò i ravehia e te mau âpotetoro ra. 44 Ruru aè ra taua feiä atoà i faaroo ra i te vähi hoê, e âmui noa aè ra hoì i ta rätou taoà. 45 Ua hoo atu ra i to rätou fenua e te taoà, e tufa iho ra hoì na rätou atoà, e au päatoà aè ra. 46 E tià rätou atoà i roto i te hiero i te mau mahana atoà mä te hinaaro hoê, e te vähiraa i te päne i tërä fare, i tërä fare, àmu iho ra hoì rätou i ta rätou mäa mä te òaòa, e mä te rötahi noa te âau, 47 i te haamaitaìraa i te Atua, e mä te ìtehia mai hoì e te taata atoà. E te feiä i faaorahia ra, ua âmuihia ia e te Fatu i te Ètärëtia ra, aita e mahana i tuua.

1Pētero 1.3-9

Te tiaìtururaa ora

3 Ia haamaitaìhia te Atua te Metua o to tätou Fatu ra o Ietu Metia, o tei haafänau faahou ia tätou no te rahi o to na ra aroha, ia noaa te manaò ora i te tiàfaahouraa o Ietu Metia mai te pohe mai ra, 4 ia noaa te tufaa ìno òre ra, e te viivii òre, e te mäheàheà òre, o tei vaiihohia i nià i te raì no òutou. 5 O tei tiaì-pare-hia e te mana o te Atua i te faaroo, ia noaa te ora i ineine i te faaìtehia mai ia tae i te tau hopeà ra. 6 Ia rahi to òutou òaòa i te reira, taiä poto noa ä òutou i teie nei, no te mea tià ia, i te mau pohe èê ra. 7 Ia riro te tämataraa o to òutou faaroo, o tei rahi roa te maitaì i to te àuro moè noa nei, tämata noa ä i te auahi, ei haamaitaì, e ei tura, e ei maitaì, i te färaa mai o Ietu Metia ra. 8 O ta òutou i hinaaro na, òre noa ai te ìte ia na; o ta òutou e òaòa na i te òaòa eita e tià ia parau ra, e te î hoì i te maitaì, i te faarooraa atu, òre noa ai òutou i te hiò atu ia na i teie nei, 9 mä te noaa hoì te hopeà o to òutou faaroo, oia te ora o to òutou mau värua.

Himene

Ioane 20.19-31

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou: Ia ora na òutou, 20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. 21 Ua parau faahou mai ra Ietu ia rätou: Ia ora na òutou, Mai ta ù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì. 23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia.

To Toma ìte-roa-raa i te Fatu

24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra. 25 Ua parau atu ra te mau pipi ra ia na: Ua ìte aè nei mätou i te Fatu, Ua parau mai ra o ia ia rätou: I òre au i ìte i te puta âuri i ta na rima ra, e aore i tuu i ta ù rima i taua puta âuri ra, e aore hoì ta ù rima i tuu i ta na àoào ra, e òre roa ia vau e faaroo. 26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra: Ia ora na òutou. 27 Ua färiu mai ra ia Toma, ua parau mai ra: A faatoro mai na to rima, e a hiò mai na hoì i ta ù rima nei; e a faatoro mai na hoì i to rima e fäfä i ta ù àoào. Eiaha e faaroo taìàtä, e faaroo rä. 28 Ua parau atu ra Toma ia na, nä ô atu ra: E ta ù Fatu, e ta ù Atua, 29 Ua parau mai ra Ietu ia na: No te mea te hiò mai nei òe ia ù, e Toma, i faaroo ai òe? E ao to te feiä aore i ìte ia ù a faaroo mai ai.

Tei ia na te Tamaiti ra, tei ia na ia taua ora ra

30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Himene

Manaò.

Mai te pape hoì e faahoì i te ànaana o te mahana i nià i te raì, te vähi no reira mai taua märamarama ra, te faahoì atoà ra te fenua i te hanahana o te Atua ta na e mau ra, i te Atua ra, te tumu o te maitaì ta na e faaìte noa ra aita e mahana tuua. E tano ai i te parau e, te fenua teie e mau nei i te òhipa i tupu i te tiàfaahouraa o te Metia, tei faaharuru te fenua e tei faahoà te uira o te raì. To na auraa ua ìritihia te ùputa o te raì e te fenua, o ta Ietu ia e hinaaro nei i ta na mau pipi, eiaha ia mohi faahou i raro aè i te papa o te maru pohe. E repo fenua  tätou te taata nei, na teie hoì fenua o ta te Atua Nui Tumu Tahi i ìpopo a haapüaì i te aho ora i roto i riro mai ai tätou èi tumu òhipa i te ôpuaraa faaora o teie nei ao. E ia faaroo tätou te mau haapotoraa o na taiòraa e maha nei. 

-Taramo 118, 22 Te ôfaì i faaruèhia e te feiä i patu ra, tei riro iho nei ei ôfaì tihi.

-Òhipa 2, 46 E tià rätou i te mau mahana atoà mä te hinaaro hoê, te vähiraa i te päne.

- I Petero 1, 7 Ia riro te tämataraa i te faaroo, ei tura, ei maitaì, i te färaa mai o Ietu Metia.

-Ioane 20, 31 O teie rä tei päpaìhia, ia faaroo òutou ia Ietu te Metia te Tamaiti a te Atua.

I to tätou faarooraa i te haapotoraa i na taiòraa e maha, te ìte ra ia tätou e, to tätou färii, aore ra to tätou färii òre i te Fatu e i te Atua Metua, e aore ra ua faaère ia tätou i te ora no roto mai i te aroha e te here o te Atua ; te ture hoì e faanaho ra i te parau o te fenua, te aroha ia e te here. Te reira atoà te ture e faanaho ra i te òhipa a Ietu, i tonohia ai o ia i roto i to na nünaa. Mai te Fatu e faatupu ra i te hinaaro o te Atua Metua, te faatupu atoà ra te fenua i te hinaaro o te Atua, e tià roa ai i te Fatu, mai te fenua atoà, ia haapii i te taata, oia hoì ia horoà i te taata i te märamarama i nià i te ôpuaraa ora a te Atua. To tätou fifi rahi, to tätou ia ìte òre e te hinaaro òre i te faaroo e te taiò i te haapiiraa ta te fenua e horoà noa nei. Te haapii nei te fenua i te faanahoraa o te ora e mauhia ra e te tai ; te haapii mai ra te tai i te taata i te paari ta na e mau ra e òre ai te taata e fifi i te haereraa i te vähi eere i to na ; te haapii mai ra te raì i te taata i te faanahoraa o te aru e te tai, e te haapäpü mai ra te täatoàraa i te rahi e te hanahana o te Atua i te faanahoraa i te mau mea atoà ei ora no te taata. Mai te Fatu i parau e, Ia ora na òutou, te faanä nei o Ietu i te mataù o te mau pipi tei panipani ia rätou i roto i te fare. Ua riro hoì te fenua ei èà ta Ietu i rave pinepine no te arataìraa i te taata i roto i te märamarama, oia hoì i roto i te ìteraa i te Atua Metua. Ua moèhia i te mau pipi te mau täpaò, o te fenua, to te reva, to te raì, o ta Ietu i faahiti tämau i roto i ta na mau haapiiraa. I parau faahou ai o Ietu i ta na mau pipi, Ia ora na òutou, ma te höroà i te òhipa e tià ia rätou ia rave, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì, ua hämani faahouhia te mau pipi e Ietu.

I te haereraa mai o Ietu, aita atu to na hinaaro maoti rä, ia ìte faahou te taata i te Atua e ia hoì i te Atua ra. Te vähi rä i moèhia i te mau pipi, te mea ia e, eita teie hoìraa e tupu ia òre ia nä roto i te fenua i te haere, no te tauturu ia rätou i roto i te täpura òhipa i höroàhia. I parau faahou ai o Ietu ia rätou  e ia Toma atoà i te piti o te hepetoma, Ia ora na òutou. No te faanä ia i te tiàturi òre o Toma, faatoro mai, e hiò mai a fäfä mai, eiaha e faaroo taìäta, E ao to te feiä aore i ìte ia ù a faaroo mai ai. Ua faanä o Ietu i te peàpeà o te âau o te mau pipi i roto i to rätou mataù.

Ia faanä o Ietu tei tiàfaahou i to tätou âau, e horuhoru nei, e peàpeà nei, e e mataù nei, no teie maì e haaviivii nei i to tätou oraraa vaamataeinaa. O te hoê taime faufaa roa teie no tätou i te färiuraa i nià i te ùnaùna o to tätou fenua  to na maitaì e te ora höroà noa. E taime atoà ra i te mätutu, eihia tumu maniota, tumu meià, tumu ùru, tumu haari, ta ù i tänu i roto i to ù oraraa. E aore ra te uiraa e, e aha ta ù i rave no to ù fenua ia Mäòhi Nui. Te ìrava  31, no ta tätou parau no teie mahana te tiaìtururaa i te faarooraa ia Ietu, O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa. Teie päpaìraa, ua päpaìhia i roto i te puta a te Atua Nui Tumu Tahi te Rähau, i reira te tupu mauraa to na Aroha e to na here ia tätou.

Pure

Haamaitaì mätou ia òe e te Atua Nui Tumu Tahi i te mea, te haamanaò mai nei òe ia mätou e, na roto i te parau no teie mahana, ua haere mai ta òe Tämaïti e faanä i to mätou peàpeà, no teie maì e haaviivii nei to mätou oraraa, i Mäòhi Nui nei e i te ao nei. Te haa nei te mau taata e mau ra i te mau hopoià no te ìmiraa i te räau e tià i te räpaau ia mä te viivii o teie maì. I teie taime te raveà hoê roa, tei te taata tätaìtahi i te pärururaa ia na ia òre teie viivii ia parare i nià i te tahi atu taata, ua tae mätou i nià i te parau no te âmuiraa tähiraa i te mau puai i te faataa-ê-raa ia mätou i te mau peu mätauhia e mätou, e te Atua Nui Tumu Tahi e, eiaha mätou ia riro èi mau taata tei faatïtïhia e teie maì, tei haaviivii i to òe nünaa. Ia tupu ra ta òe ôpuaraa faaora i te nünaa Mäòhi e i to te ao atoà e faaruru noa nei i te mau faatïtïraa rau i teie mahana. A faatiàmä ia mätou te faahaèhaa atu nei mätou i mua i te nui o to Òe here, e ta òe faaherehere ia mätou, a faanä ia mätou. E te ani atu nei mätou ia òe, ia arataì faahou Òe i to mätou nünaa ïti i te tähiti faahouraa i roto i te tau no te Hinapaarae. A tuu mai i ta òe faatereraa tiàmä i te feiä e faatere nei i to mätou fenua ïti, ia TIÀMÄ te faatereraa, e TIÀMÄ atoà te nünaa Mäòhi i mua te mau haafifiraa rau no to na oraraa. Tahi tià mai.

Himene.

Pure a te Fatu.

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Teraì òr. Faatura.