Ioane 20,19-23 Färii

Tāpati 31 no Tiunu 2020.

ÔROÀ PENETETŌTE

Färii

Ômuaraa.

Te tätarahapa nei mätou, mätou i ìmi i te moni i nià i te täpaò no to òe aroha e to òe here ia mätou, mätou e pühapa noa nei i te fenua ta òe i ho mai ei vauvau no mätou e ta mätou hui tama, mai te tau a uìuì  mai e a muri noa atu.

Te tätarahapa nei mätou, mätou i haafaufaa òre e i vahavaha i te reo ta òe i ho mai no mätou, mätou i manaò e, to mätou hanahana e to mätou tura, tei te tïpeeraa ia i te reo o te nünaa e haavï noa nei e të haafaufaa òre noa nei ia mätou. Ua tärahu mätou ia òe, mätou i färii e i vai iho noa ia faaìno-noa-hia na to mätou reo e te feiä tei òre i here e tei òre i tiàturi ia òe, mätou i araa i te reo faatupu pohe, e i taahi i te reo faatupu ora. Faaòre mai i ta mätou tärahu, e a aroha mai ia mätou e te Atua Metua e. Âmene.

Himene.

Taramo 104

1 E haamaitaì i te Fatu, e ta ù värua E ta ù Atua, e te Fatu, òe tei rahi roa Ua vehihia òe i te hanahana e te mana, 2 i te faaàhuraa ia òe iho i te märamarama mai te àhu ra, e te hohoraraa i te mau raì ra mai te päruru; 3 i te vauvauraa i to na ra mau piha i te pape. E te raveraa i te mau ata ei pereoo no na, i te hahaereraa nä nià i te pererau ra o te mataì, 4 i te faariroraa i te mau merahi no na mai te mataì ra, e te mau tävini no na mai te auahi ura ra 5 Na òe i haamau i te tumu o te fenua, ia òre roa ia âueue. 6 Ua täpoì hoì òe ia na i te àputo, mai te àhu ra, te teitei ra te pape i te mau mouà. 7 Ia aòhia e òe ra, maùe atu ra; i te haruru o to pätiri ra, ua haapeepee atu ra i te haere 8 Ua aè rätou i te mau mouà, ua pou rätou i te mau peho, i te vähi i haapaòhia e òe no rätou ra. 9 E ôtià tei haapaòhia e òe, e òre ia e maìri ia rätou, e òre e hoì faahou mai e haanïnä i te fenua. 10 Ua tuu mai o ia i te pape pihaa ei vai matätia, o tei tahe haere nä roto i te ärea o te mau mouà ra: 11 i reira te mau puaa o te fenua nei i te inuraa, e te mau âtini ôviri i te haamäharaa i to rätou hiaai. 12 I pïhaì iho te mau manu o te reva i te pärahiraa o tei òto i roto i te mau âmaa rii. 13 Te faararirari nei o ia i te âivi rii no roto i to na ra mau piha; e te î nei te fenua i ta òe i faahotu mai.

Himene.

14 Te faatupu nei o ia i te àihere na te mau puaa, e te räau rii na te taata. E te roaa nei te mäa ia na no roto i te fenua: 15 e te uaina e òaòa ai te âau o te taata nei e te monoì i hinuhinu ai to na mata, e te päne e itoito ai te âau taata nei. 16 Te mau räau a te Fatu ra, ua paari ia, te mau âreti i Repanona ra, ta na i tanu ra, 17 e tei ôfaahia e te mau manu ra. Te mau peruti ra to te hetite ra ùtuafare.18 Te mau mouà teitei ra, no te puaaniho ôviri ia; e te mau mato ra, e haapüraa ia no te täfana. 19 Ua hämani o ia i te märama no te mau tau i haapaòhia ra, ua ìte hoì te mahana i to na maìriraa. 20 Na òe i hopoi mai i te pöuri, e ua ruì iho ra, ei reira te mau taehae o te ururäau ra e haere ai, 21 te mau riona âpï i te ûâ-haere-raa i te mäa, i te ìmiraa i te mäa i te Atua ra. 22 Ua hiti anaè te mahana ra, ua hoì rätou, e ua taòto faahou i roto i to rätou mau âpoo. 23 Ua haere iho ra te taata i te òhipa na na, ta na i rave ra, e ahiahi atu.  24 Aita te huru rau o ta òe ra òhipa, e te Fatu. E mau räveà paari anaè ä ta òe. Ua î te fenua nei i ta òe ra taoà. 25 E tënä na hoì miti rahi e te âano, tei reira te mau mea e nee haere, eita e hope ia taiò: te mau mea rii ra e te mea rarahi atoà ra. 26 Tei reira te mau pahï i te tere-haere-raa; tei reira te Reviatana ta òe i hämani i te haùti haereà. 27 Te tiaì anaè ra te reira ia òe ra, ia noaa ta rätou mäa i te taime mau ra. 28 O ta òe i horoà ra, o ta rätou ia i rave; ua heheu òe i to rima ra, ua îî anaè ia rätou i te maitaì. 29 Ua püroù òe i to mata ra, e àti ia to rätou. Ua rave mai òe i to rätou aho, ua pohe ia rätou, e ua hoì faahou i to rätou ra repo. 30 Ua tono mai ra òe i to värua, ua hämanihia rätou. E ua rave faahou òe i te aroä o te fenua. 31 E vai ä te hanahana o te Fatu e a muri noa atu.

Te òaòa nei te Fatu i ta na iho ra òhipa.

32 Ua hiò anaè o ia i te fenua, ua rürü ia; ua faatiàià anaè o ia i te mau mouà ra, ua pee te auahi i nià. 33 Te ora nei au ra, e himene ä vau i te Fatu; te vai nei au ra, e himene au ei haamaitaì i ta ù Atua. 34 E mauruüru ä to ù manaòraa ia na; e òaòa hoì au i te Fatu. 35 Te feiä rave hara ra, e mou ia i te fenua nei; e te feiä parau ìno ra, e òre roa ia. E haamaitaì i te Fatu, e ta ù värua e Hareruia.  

Himene

Òhipa 2.1-11

Te haereà mai o te Värua Maitaì

1 E tae mau atu ra i te mahana Penetetöte, ua taìruru mäite aè ra rätou atoà i te vähi hoê mä te hinaaro hoê. 2 E aore i mähia, o te haruru mai ra no nià mai i te raì mai te mataì rahi ûàna ra, î roa aè ra te fare i pärahihia e rätou ra. 3 Ua fä mai ra te arero mäa ia rätou ra mai te ahi ra te huru, e faaea iho ra i nià iho ia rätou atoà ra, 4 e î aè ra rätou atoà i te Värua Maitaì, ua parau iho ra i te parau èê, i ta te Värua i horoà mai i te parau ia rätou ra. 5 E te pärahi ra te taata âti-Iüta paieti i Ierutarëma, no te mau fenua atoà i raro aè i teie nei raì. 6 E parare atu ra taua roo ra, ua ruru mai ra te taata atoà, e mäere iho ra, no te mea i faaroo atu ra taua mau taata atoà ra i ta rätou iho parau mau i te parau-raa-hia mai ra. 7 Faahiahia atu ra rätou atoà mä te pöpou, nä ô iho ra rätou, rätou iho: Inaha, eere änei rätou e parau nei i to Tarirea anaè? 8 E aha rä hoì teie i ìte ai tätou atoà nei i to tätou iho reo mau i te parau-raa-hia mai? 9 To Paretia, e te âti-Mëtai, e te âti-Èrama, e te feiä e pärahi i Metopotamia, e Iutea, e te Tapatotia, e to Ponoto, e to Àtia, 10 e to Ferutia, e to Pamafuria, to Àifiti, e to Rupi i te pae i àti mai i Turene ra, e te taata èê hoì no Röma, te âti-Iüta, e te peroteruto, 11 to Tereta, e to Âräpia, i te faarooraa atu tätou ia rätou i te parauraa mai i te peu taa ê a te Atua i ta tätou iho nei mau parau mau.

Himene.

1 Torinetia 12.3-13

3 E teie nei, e faaìte atu vau ia òutou, aore roa e taata na te Värua o te Atua ta na parau, e parau ia Ietu e: Ua ànatemahia, aore roa e taata e tià ia parau e: o Ietu te Fatu, maori rä o tei parau i ta te Värua Maitaì ra. 4 E rave rahi te huru o te mau mea i horoàhia, hoê rä Värua. 5 E rave rahi ä hoì te töroà, hoê rä Fatu. 6 E rave rahi ä hoì te òhipa, hoê rä Atua e òhipa i te mau mea atoà i roto i te taata atoà. 7 Ua horoàhia ta te Värua faaìte i te taata atoà, ia maitaì päatoà. 8 I horoàhia mai te parau paari e te Värua, i te hoê ra; e i horoàhia mai e taua Värua ra te parau e noaa ai te ìte, i te hoê. 9 Ta te tahi ra, o te faaroo ia, na taua Värua ra; ta te tahi ra, o te ìte ia i te faaora maì na taua Värua ra. 10 Ta te tahi ra, o te rave täpaò ia; ta te tahi ra, o te tohu ia; ta te tahi ra, o te ìte värua ia; ta te tahi ra, o te parau èê ia; ta te tahi ra, o te faaìte parau èê ia. 11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra.

Hoê tino e te mero e rave rahi

12 Mai te tino hoì hoê nei, e rave rahi to na mero, e te mau mero atoà no taua tino hoê ra, rahi noa ä rätou, hoê ä ia tino, oia atoà hoì te tino o te Metia. 13 I päpetitohia hoì tätou e te Värua hoê i roto i te tino hoê ra, te âti-Iüta e te Herëni, te tävini e te tiàmä, e ua faainuhia tätou i ta te Värua hoê ra.

Himene.

Ioane 20.19-23

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou: Ia ora na òutou. 20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. 21 Ua parau faahou mai ra Ietu ia rätou: Ia ora na òutou, Mai ta ù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì 23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia.

Himene.

Manaò.

I teie täpati e faahanahana ai tätou i te parau o te Värua Maitaì, te Värua Maitaì te puai ia no te tupu maitaìraa te märamarama te märamarama ra te ora te reira no te taata tiàma, o ta te fenua i faatiàma e teie taata na te fenua o ia e haava, e na te fenua atoà o ia e faahapa. Faaroo mai na te haapotoraa o na taiòraa e maha i haapaòhia no teie mahana.

-Taramo 104, 14 Te faatupu nei te àihere, te räau rii. E roaa te mäa no roto i te fenua.

-Òhipa 2, 5 E te pärahi ra te taata, no te mau fenua atoà i raro aè i te raì.

-I Torinetia 12, 13 I päpetitohia i te Värua hoê te tävini e te tiàmä.

-Ioane 20, 22 Ua haapüaì i te aho i nià ia rätou, e a färii i te Värua Maitaì.

Ei manaò tatara.

E rave rahi te mau parau tei faahitihia mai e Ietu i ta na mau pipi, i roto i teie nei mau manaò, te hinaaro nei o Ietu ia riro mau te mau pipi ei mau taata taa ê, tei tämähia e tei haamoàhia. No te horoà i te hoê âau âpï èi mono i te âau ôfaì. E ia färii rätou i te Varua Maitaì i roto i te mau veà e tonohia nei, e i ta na Ètärëtia.

I raro aè i te faufaa tahito, e ôroà ia no te mau hepetoma èi haapäpüraa i te hopeà o te àhune tïtona. E haapaòhia taua ôroà ra i te 50- raa o te mahana i muri aè i te pata âti-Iüta (Etoto 23 : 14 – 16).

I te tau ra o Ietu e haapaòhia teie ôroà hoê a taime e te ôroà no te horoàraa a te Atua i te ture.

I muri mai ra i to Ietu tiàfaahouraa, te faatià nei o Ietu i te hoê ôroà Penetetote âpï, tei faanavaì i te mau òhipa i roto i teie ôroà, eita atu ra ei faaìte-noa-raa i te hopeà no te àhune tïtona, eita atoà ra ei faaìte-noa-raa i te ôroà no te pätiaraa tiàhapa, eita atoà ra ei faaìte-noa-raa i te mähutiraa mai, mai te vahi tïtïraa ra.

E òhipa âpï ra tei faaìte i te auraa mau no te päpetitoraa. Te mau âpotetoro i roto i te fare ua vai hiroà òre noa rätou, ua faaea noa rätou mai te mau taata varua òre te huru, i to Ietu poheraa, ua pohe atoà rätou. E i te tiàfaahouraa o te Metia, te faaära nei O ia i to rätou Varua e tià, te täpaò ia teie no te päpetitoraa Teretetiano.

Te turaì nei teie, faaäraraa na Ietu i te mau âpotetoro ia hiò i mua i te vahi tei reira te òhipa. Eiaha e faaea faahou, ua oti te taime faaearaa i roto i na ruì e toru tei maìri. I teie nei ra te vai nei te tonoraa, te tonoraa i te mau vahi e färiihia ai te Varua Maitaì o ta te Atua i haapüaì i roto i te taata. Te huru ia no teie ôroà Penetetote ta Ietu e faaâpï nei, eita no te haamanaòraa i te mau òhipa tei maìri, e tonoraa ra, i to na mau tävini ia haere e ôpere i te maitaì ta te Varua Moà e faatupu.

UA HAAPUAÌ MAI RA I TE AHO I NIÀ IA  RÄTOU, E UA PARAU MAI RA : A FÄRII I TE VARUA MAITAÌ.

I teie Täpati, e mahana Penetetote, o te papaì Èvaneria Ioane teie e parau mai nei ia tätou. Te parau ta na i hinaaro i te faaìte mai, maori ra, o te parau ia no te horoà a te Varua Maitaì. No reira, i teie taime nei, a faaroo tätou i to na mau manaò no nià i te Varua Maitaì.

Te Varua Maitaì e varua ia tei hämani.

Ua hiò maitaì anei tätou e mea nahea to Ietu horoàraa i te Varua Maitaì ? Ua haapüaì o ia i te reira i nià i ta na mau pipi ma te parau e, A FÄRII I TE VARUA MAITAÌ. Ia hiò maitaì tätou, mai te mea ra e, o teie anaè te ìrava tei faahiti e, te Varua Maitaì, mea haapüaìhia ia. I roto i te tahi atu mau parau, te parauhia nei, te Varua Maitaì e mea horoàhia, e aore ia, te Varua Maitaì e mea tonohia, e aore ia, te Varua Maitaì e mea ôperehia. Àreà i ô nei, mea taa ê rii ia e mea haapüaìhia. I te mahana no to te Atua hämaniraa i te taata nei, ua ìte tätou i reira i te parau no te aho o te Atua tei horoà i te ora. I roto i te Tenete i te pene 2 i te ìrava 7, teie te parau tei faahitihia i reira, A HAMANI AI TE ATUA RA I TE TAATA I TE REPO FENUA NEI, UA HAAPÜAÌ IHO RA O IA I TO NA AHO ORA I ROTO I TO NA ÀPOO IHU, RIRO MAI NEI TE TAATA EI TAATA ORA.

No reira, na roto i te aho no te Atua ora, ua riro te taata ei mea ora. Te mahana no te Pata, tei riro ei mahana mätamua no te hoê ao âpï, ua haapüaì te Atua, na roto i ta na Tamaiti i to na aho ora, te Varua Maitaì i nià i ta na mau Âpotetoro. Mai teie atu nei, e riro te taata nei ei taata âpï, i roto i te Metia, e òre te mau mea tahito, e riro te mau mea atoà  nei ei mea âpï.

Na Ietu, tei tiàfaahou i horoà i te Varua Maitaì

Ua ìte maitaì tätou, ua tupu teie nei parau i te ahiahi no te mahana o te Pata, te mahana mätamua no te hoê ao âpï. I roto i te tuhaa rahi no ta na Èvaneria, e mea pinepine to Ioane parauraa e, e horoàhia te Varua Maitaì i te taime o Ietu e faahanahanahia ai, oia hoì, i muri aè i to Ietu poheraa i nià i te tätauro e i muri aè i to na Tiàfaahouraa.

Te mahana hopeà no te ôroà pätiaraa tiàhapa tei faahitihia e Ioane i te pene 7 i te ìrava 39, UA TIÀ IETU I ROTO I TE HIERO, E UA PII MA TE REO E : TE  FEIA ATOÀ  I HIAAÌ, E HAERE MAI IA Ù NEI A INU AI, E O TEI TIÀTURI MAI  IA Ù RA, E TAHE MAI IA TE PAPE ORA MAI ROTO ATU IA Ù

I to Ietu faahitiraa i teie parau, te parau nei ia o ia no te Varua Maitaì, o tei òre a i horoàhia no te mea aita a o Ietu i faateiteihia. Teie ra, i te mahana no te ôroà Pata, ua faateiteihia o Ietu. I te taime hou to na poheraa, ua horoà o ia i to na Varua i roto i te rima no to na Metua, e i to na tiàfaahouraa mai, ua haapüaì i to na aho i nià i ta na mau pipi. I te mea a pärahi ai o Ietu i rotopü i ta na mau  pipi, ua riro o ia ei faaaò no rätou i teie nei ra ua faateiteihia o ia, te horoà nei o ia i te hoê faaaò âpï, te Varua Parau mau (Ioane 14 : 16).

Te Varua, o te Varua Moà ia.

Te parauraa e na Ietu i horoà mai i te Varua Moà, o te haapäpüraa ia e, te taata o tei färii i taua Varua Moà ra o te taata ia o tei òre i tuàti faahou to na oraraa i te oraraa ta na i mätau. O te Varua tumu teie no te haamoàraa, oia hoì, na na e horoà i te mau pipi i te puai no te oraraa i roto i te haamoàraa, no te faatupu i ta te haamoàraa e tïtau nei. E parau rii huru fifi i roto i to tätou mau feruriraa, e parau huru rave àtä atoà i rotopü i te mau pipi iho na Ietu, noa atu ra te reira, a faaroo na tätou i te parau tei parauhia e Pauro i roto i te I Torinetia 12, 13 I päpetitohia i te Värua hoê te tävini e te tiàmä.

Mai roto atu i te vaha no Ietu te noaaraa mai te tahi mau parau nehenehe, mau haapiiraa hohonu, e mai roto mai i to na vaha te haereraa mai te Varua Moà a tano atu ai ia tätou ia òhipa i ta na mau haapiiraa.

Ua horoàhia te Varua Maitaì i te mau pipi täatoà.

I te ahiahi no te ôroà Pata, ua haapüaì Ietu i to na Varua i nià i ta na mau Âpotetoro. Te auraa mau no teie parau, e ère ia ua haapaòhia te Varua Moà no te tahi pae taata, no te tahi noa pae huifaaroo, ìnaha, te parau fäfau no te täatoà ia, no tätou, no òutou, no ta tätou mau tamarii, no te feia atoà i te atea ê, e no te feia atoà ta te Fatu i tïtau. Ua tono te Atua i ta na Tämaïti e i te mahana no to na päpetitoraahia, ua horoàhia ia na te Varua Maitaì. Ua tono te Fatu i ta na mau Âpotetoro, e ua haapüaì i to na Varua i nià ia rätou. Ua tonohia te mau Âpotetoro i muri aè no te horoà i te Varua Maitaì i te tahi pae. Tera mau te auraa no te Penetetote,  te horoàraa i te Varua Maitaì i te feia atoà o tei faaroo.

Eiaha tätou e manaò e, ua horoàhia te Varua Maitaì i te hoê noa pae no te huifaaroo. Ua horoà-atoà-hia ra ia tätou i teie nei mahana. E nahea e tano ai ? No teie nei uiraa, a faaroo tätou i ta Ietu pähonoraa i roto i te Ruta i te pene 11 i te mau ìrava 11 e tae i te 13, « o vai ia metua i o òutou nei e hopoi atu i te ôfaì na te tamaiti ia ani mai o ia i te pane ? E ia ani mai i te ià, e hopoi atu anei i te òfi ? E ia ani mai hoi te huero moà, e hopoi atu anei i te pata ? E te na  na, te ìte nei òutou i te horoà i te mea maitaì na te òutou mau tamarii, ìno noa aè òutou na, e rahi atu ia to òutou Metua i te ao ra i te horoà i te Varua Maitaì i te feia atoà i ani atu ia na ra ? » Teie  Taua parau moè ra.

Eita paha e òre, aita a tätou i ani aè nei i te Varua Maitaì. Ua taiä anei tätou ? Eita anei hoì te Atua e arataì nei ia tätou i te hoê vahi atea roa.

E hoa here ma, na vai paì ia e taahi i te taahiraa mätamua no te faaroo, o vai te tano e parau atu i te Fatu e, E te Fatu a horoà mai òe ia ù i te Varua Maitaì. Te taata o tei ani, e noaa ia ia na te Varua Maitaì ia au mai tei noaa i te mau Âpotetoro no roto mai i te vaha no Ietu e, «a färii i te Varua Maitaì » O ta Ietu atoà e parau nei ia tätou i teie mahana, «a färii i te Varua Maitaì »

IA maitaì i teie ôroà no te Varua Moà.

Himene.

Pure

Haamaitaì mätou ia òe e te Atua Metua, te tumu o te tiàmäraa, e te tumu o te tiàmäraa o te nünaa Mäòhi. Aita atu hoì e hinaaro to òe e te Tumu Nui ia mätou maori rä, ia TIÀ MÄÒHI atu mätou i mua i to òe TIÀMÄRAA, o te mea tià ia ia òe ; ia anoenoe mätou i te aroha, o te mea tià ia i to òe TIÀMÄRAA ; e ia haere mätou mai te haèhaa e òe atoà na i roto i te oraraa nei, o te mea ia e TIÀHIA ai mätou i to òe TIÀMÄRAA. A tià mai òe e te Atua Nui tahi Tumu i nià i te ômii o te ià nui nei, a faatere òe i to mätou fenua iti, ei tere hau, ei tere ora, ei tere TIÀMÄ. Amene

Himene.

Pure a te Fatu

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

Taramo 104, 14 Te faatupu nei te àihere, te räau rii. E roaa te mäa no roto i te fenua.

Terai or. Faatura. 

Ioane 17,1-11 Hiemateòa

Tāpati 24 no Më 2020.

Hiemateòa

Ômuaraa.

Te tätarahapa nei mätou, mätou i haafaufaa òre e i vahavaha i te reo ta òe i ho mai no mätou ia òe, mätou i manaò e, to mätou hanahana e to mätou tura, tei te tïpeeraa ia i te reo o te nünaa e haavï noa nei e të haafaufaa òre noa nei ia mätou. Ua tärahu mätou ia òe, mätou i färii e i vai iho noa ia faaìno-noa-hia na to mätou reo e te feiä tei òre i here e tei òre i tiàturi ia òe, mätou i araa i te reo faatupu pohe, e i taahi i te reo faatupu ora. Faaòre mai i ta mätou tärahu, e a aroha mai ia mätou e te Atua Metua e.

Himene.

Na te Taramo 27, e täuturu mai ia tätou i roto i te haamoriraa i teie nei mahana.1 Taramo na Tävita. O te Fatu to ù märamarama e to ù ora: o vai hoì ta ù e mataù atu? O te Fatu të tiaì ia ù: e mataù hoì au ia vai. 2 I te haereà mai o te mau taata ìino ra, to ù ra mau ènemi e tei riri mai ia ù, i te tiiraa mai ia ù ra e rave e àmu, ua turori iho ra rätou iho, hià iho ra. 3 Pätia noa mai ä te nuu atoà ra i te pühapa ia ù nei, e òre ta ù âau e mataù. E ia tupu noa mai ä te tamaì ia ù nei, e tiàturiraa ia to ù i reira. 4 Hoê a ù mea hinaaro i te Fatu ra, e o ta ù ia e tïtau hua nei; ia pärahi ä vau i roto i te fare o te Fatu e hope roa aè o ù puè mahana, ia ìte vau i te maitaì o te Fatu, e ia ui mäite au i roto i to na nao. 5 Ia roohia hoì e te àti ra e huna ai o ia ia ù i roto i to na tiàhapa; e faatäpuni o ia ia ù i roto i te vähi moè i to na ra fare, a tuu ai ia ù i te vähi teitei ra. 6 Ei teie nei o ia e faateitei ai i ta ù upoo, i to ù atoà nei mau ènemi e àti noa aè, ia hopoi au, i to na ra tëtene, i te tütia òaòa, e himene hoì au e e himene haamaitaì hoì i te Fatu. 7 E haapaò mai, e te Fatu, i ta ù reo, ia tiàoro atu vau ra, e aroha mai, e faaroo mai ia ù. 8 Ia parau mai òe e: E ìmi mai òutou i ta ù mata, E ìmi ia vau i to mata, e te Fatu. 9 Eiaha òe e huna ê atu i to mata ia ù nei, eiaha to tävini e haapae-riri-noa-hia: ua tauturu mai hoì òe ia ù, eiaha vau e faaruè-ê-hia, eiaha òe e täiva ia ù, e ta ù Atua, e ta ù Ora. 10 Faaruè noa ä ta ù metua täne e ta ù metua vahine ia ù, ei reira te Fatu e rave mai ai ia ù. 11 E haapii mai òe, e te Fatu, i to òe ra èà, e arataì ia ù nä te èà manina, no to ù nei mau ènemi. 12 Eiaha òe e horoà ia ù i te hinaaro o ta ù mau ènemi; ìte haavare anaè tei tià mai e märô ia ù, e te ûàna mai ra to rätou riri ia ù. 13 Te manaò nei rä vau, e noaa ia ù te maitaì o te Fatu i te fenua o te taata nei. 14 Tiaì i te Fatu; e faaitoito; e na na e faaitoito mai i to âau ra, e tënä na, e tiaì ä òe i te Fatu.

Himene.

Òhipa 1.12-14

Te mono o Iüta

12 Hoì mai ra rätou i Ierutarëma, mai te mouà mai i parauhia ra o Òriveta, tei pïhaì iho i Ierutarëma, mai te vähi haerehia i te täpati nei te huru. 13 E tae mai ra rätou i roto i te ôire, tomo atu ra rätou i roto i te hoê piha i nià, e ruru atoà ai Pëtero mä ra, e Iatöpo, e Ioane, e Àneterea, e Firipa, e Toma, e Paretoromea, e Mätaio, e Iatöpo a Àrefaia ra, e Timona Terote, e te taeaè hoì o Iatöpo ra o Iüta. 14 Tämau mäite atu ra rätou atoà i te pure e te aniraa mä te âau hoê, e te mau vahine atoà, e o Märia hoì te metua vahine o Ietu ra, e to na atoà ra fëtii.

1 Pētero 4.13-16

13 E òaòa rä, i te mea te rave atoà ra òutou i te mau pohe o te Metia; e ia faaìtehia mai to na hanahana, ia hiemateòa òutou mä te òaòa rahi. 14 E ia faaìnohia òutou i te iòa o te Metia ra, e ao to òutou, no te mea te faaea ra te Värua hanahana, te Värua o te Atua i nià iho ia òutou: ua faaìnohia o ia e rätou, ua haamaitaìhia rä e òutou. 15 Eiaha roa rä to òutou pohe i te pohe täparahi taata, e te èiä, e te rave parau ìno, e te haapeàpeà ia vëtahi ê ra. 16 Ei pohe teretetiano to na ra, eiaha o ia e haamä; e haamaitaì rä o ia i te Atua i te reira.

Himene.

Ioane 17.1-11

Te pure tahuà a te Metia

1 Ia faaoti aè ra Ietu i teie nei parauraa, ua nänä aè ra o ia i ta na mata i nià i te raì, nä ô atu ra: E ta ù Metua, ua tae i te hora. A haamaitaì i to Tamaiti ia haamaitaì atoà hoì to Tamaiti ia òe. 2 Ua horoà mai hoì òe i te mana no na i te taata atoà nei, ia horoà atu o ia i te ora-mure-òre i te feiä atoà ta òe i horoà mai no na ra. 3 Teie hoì te ora-mure-òre, ia ìte rätou ia òe i te Atua mau ra, e ia Ietu i te Metia i ta òe i tono mai. 4 Ua haamaitaì au ia òe i te ao nei, ua oti ia ù te òhipa ta òe i hö mai na ù e rave ra. 5 E teie nei, e ta ù Metua, e haamaitaì mai òe ia ù i mua i to aro na i te maitaì no ù ia òe hou teie nei ao ra. 6 Ua faaìte atu vau i to iòa i te mau taata o teie nei ao ta òe i hö mai no ù ra. No òe na hoì rätou; e na òe hoì rätou i hö mai no ù, e ua haapaò rätou i ta òe parau. 7 E te mau mea atoà ta òe i hö mai ia ù ra, ua ìte rätou i teie nei e, no ô na mai ia òe na; 8 e na òe i tuu mai ia ù i te parau ta ù i tuu aè ia rätou nei ra, e ua färii rätou i taua parau ra, e ua ìte mau hoì e mai ô na mai au ia òe na, e ua faaroo hoì rätou e, na òe au i tono mai. 9 O rätou ta ù e pure nei. Aore au i pure i to teie nei ao, o te feiä rä ta òe i hö mai no ù ra, no òe hoì rätou. 10 E to ù atoà ra, no òe ia; e to òe ra, no ù ia; e ua maitaì hoì au ia rätou. 11 Ua òre au e pärahi i teie nei ao; e tià rä rätou i teie nei ao, e te haere atu nei au ia òe na. E ta ù Metua Moà ra e, e tiaì òe ia rätou i ta òe i hö mai no ù i to iòa na, ia hoê aè rätou mai ia täua atoà nei ä.

Himene.

Manaò.

Te mau parau ta tätou e farerei nei i roto i teie mau taiòraa o te tüàtiraa ia, i te mau haamaitaìraa e tïtauhia nei e te feia paieti. Ei faaìteraa i te mau àti e färereihia i te iòa o te Metia. Te faaravaìhia nei teie mau manaò, ma te faaära, ia tupu noa atu taua mau mea ra, ia haamanaò ia rätou e, ua faaìte-atea-hia e Ietu. I muri aè i to na faaitoitoraa i ta na mau pipi. E pohe to òutou i teie nei ao, e faaitoito ra, ua riro te rë o teie nei ao ia ù. E te parau e faahitihia nei e te Taramo 27 E ta ù Atua, e ta ù Ora. Ia faaroo tätou i te haapotoraa o te mau taiòraa te ärataì nei i to tätou âau ia noaa te itoito.

-Taramo 27, 14  Na na e faaitoito  i to âau ra, e tënä na, e tiaì ä òe i te Fatu.

-Òhipa 1, 14 Tämau mäite i te pure e te aniraa mä te âau hoê, e to na ra fëtii.

-I Petero 4, 13 E ia faaìtehia to na hanahana, ia hiemateòa òutou mä te òaòa rahi.

-Ioane 17, 11 E ta ù Metua Moà ra, e tiaì òe ia rätou i to iòa, ia hoê mai ia täua atoà nei.

Ia faaroo tätou i te pure, e purehia nei e Ietu e rave rahi mau Ìrava tumu : ìrava 3 vm TEIE HOÌ TE ORA MURE ÒRE, IA ÌTE RÄTOU IA OE I TE ATUA MAU RA. E te niu o te parau teie ia : ìrava 1 vr E TA Ù METUA UA TAE I TE HORA, A HAAMAITAÌ MAI, e te ìrava 11 vr E TA Ù METUA MOÀ RA E, IA TIÀ IA OE. Te tumu òhipa i teie mahana : to tätou ia faaitoitoraa i te paruru ia tätou ia òre o Mäòhi Nui ia viivii i teie maì piri fee e àtutu nei. E tià ia parauhia e, ua patuhia ta tätou taiòraa i nia i te hanahana o te Metua, e to na anaè te hanahana ia ìtehia.

Te pene 17.

O te hoê ia pene taa ê no te Èvaneria a Ioane. Na te hoê taata faaroo no te 16 no te tënetere i maìri i te iòa no teie nei pene parau i te pure tahuà. E na teie pure i òpani i te färereiraa hopeà no Ietu e ta na mau pipi, hou e täìrihia ai te Tiaì mämoe e a purara atu ai te nana. Te òhipa  e ravehia nei e Ietu i teie taime te haapäpüraa ia i te niu no te faaroo o te mau pipi ia òre ia àueue i mua i te mau peu o teie nei ao.

Ua tano roa te parauraahia teie nei pure i te PURE TAHUÀ, no te mea, o te Tahuà Nui no te Faaäuraa Àpi teie e pure nei. Te pure nei O ia no to na mau taata tei päpaìhia to rätou iòa i roto i to na âau, mai te Tahuà Nui no te faaäuraa mätamua tei pure no na ôpu 12, ma to rätou mau iòa i päpaìhia  i nià i to na täpoì ôuma (Etoto 28 : 29 ). Ma te rave atoà i te pupuraa tutia täraèhara, e oia iho te Arenio, tei hopoì ê i te hara a to te ao nei. Na te èpitetore i te mau Hepera i tatara nehenehe maitaì i te òhipa a te Metia tei riro i te taime hoê, ei Tahuà e ei täraèhara, i te pene 4, 5, 7 e tae i te 10.

Te taiòraa.

Ìrava 1 e faaea i te 11.

E tià roa ia parauhia te vai nei e piti tuhaa i roto i teie mau ìrava.

1) Te pure nei o Ietu no na iho ìrava 1 e tae i te 5.

 I roto i teie tuhaa ta tätou i te haapäpüraahia e, ua oti ia Ietu te òhipa ta te Metua i höroà mai na na e rave. Ia tià i te Atua, ia päpaì roa  O ia i teie parau, na roto i to na  Varua Maitaì, i roto i to tätou âau, ia ìte päpü tätou ia faaroo e ia tiàturi e, ua oti mau ia Ietu te òhipa no te feia hara i te ao nei. Eiaha tätou ia faariro i te mau òhipa ta tätou e rave nei ei mea faufaa, i te mea àuaa tätou i tupu ai te òhipa a te Atua. Mai te ani òre i to tätou manaò, mai te tïtau òre, e mai te ani òre i ta tätou täuturu, ua faatupu te Atua i ta na òhipa i raro nei na roto i ta na Tämaïti.

E aha teie òhipa ta na e parau nei e, UA OTI ? Taua òhipa ra, teie ia, ua haamaitaì au i to iòa i te ao nei. E òhipa rahi taua òhipa ra, e òhipa  oti òre i te taata. Ua haamaitaì Ietu i te iòa o to na Metua na roto i to na haapaeraa i to na vahi Moà, no te haere mai i roto i teie nei ao na roto i te huru o te taata. I te mau tuuraa àvae atoà no na, i te mau mahana tätaì tahi, e tae noa atu i to na aho hopeà, ua faaìte noa O ia i nià i te fenua nei, i te Atua ìte-òre-hia e te mata, ìtehia na roto i te rähu, faaroohia na roto i te Parau te marämarama ia o te taata. Hou O ia a àmu ai i te hoê tapu färaoa, ua faateitei i to na mata i nià no te haamaitaì i te Atua. E ua ànaana noa i te mau mahana atoà na roto ia Ietu, te hanahana no te Atua i rotopü i te mau taata o te ao nei. I te mau vahi atoà, ua haamaitaì O ia i te iòa o te Atua Nui Tumu Tahi, i rotopü i te mau matapö, te mau piriòì, te mau rëpera, te feia taoà e te feia veve e i rotopü hoì i te feia pohe. I roto i teie nei ao tei maìri i roto i te hara, tei täpoìhia e te pöuri e te ìte òre, teie nei ao tei täpeàhia i roto i te manaò òre e te täiroiro i te Atua, teie nei ao tei òre i faaèa i te faaìno e i te haaviivii i te iòa o te Atua, ua haamaitaì e ua haamoà Ietu i te iòa o te Metua, e ua haapii mai ia tätou e, e naò òutou ia pure, E to mätou Metua i te ao ra, ia raa to Òe iòa………… Ua haamaitaì Ietu i te iòa o te Atua na roto i te haapaòraa i ta na mau faaueraa tei òre i maaraa i te taata i te haapaò, e ua faatura O ia i to na hinaaro na roto i te auraro-maite-raa e tae noa atu ra i te pohe tätauro. Ua na reira O ia ia noaa ia tätou te ora mure òre. I teie nei ra, ua oti taua òhipa ra, te tià nei  O ia i mua i te Atua mai te hoê tävini te huru, e te parau nei ‘’ Ua haamaitaì au i to iòa i te ao nei, ua oti ia ù te òhipa ta òe i ho mai na ù e rave.’’ 

2) Te pure nei o Ietu no te mau pipi. (Ìrava 6 e faaèa i te 11.)

Teie tuhaa e moti ia i te ìrava 19, ua faataahia ra no teie tuatapaparaa e faaoti i te ìrava 11, i te mea tei teie mau ìrava to Ietu haapuaìraa i te faaìte i to na hinaaro i te Metua no te mau pipi e no tätou i teie mahana.

I te ômuaraa i ta na òhipa i te fenua nei, ua tïtau Ietu i te hoê mau taata ia pee mai ia na. Ua faaruè rätou i te mau mea atoà e ua âmui mai ia na. I roto i teie nei mau pipi tätaì tahi tei pee mai ia na te ìte ra o Ietu i te reira mai te hoê höroà no o mai i te Metua ra. Aita Ietu e tiàturi nei e ua roaa mai rätou  ia na, na roto i ta na iho tïtauraa, no te Atua ra rätou, e na na i horoà mai ia rätou no na. I teie taime, 11 noa iho rätou, ua reva ê te tahi. I ta tätou hiòraa, e mea ïti roa. Àreà Ietu te haamaitaì nei O ia i te Atua no taua âmuiraa ïti, oia hoì te tano ia parauhia, te ôteo nei te hoê faaroo âpï tei parauhia te ÈTÄRËTIA niuhia i nià i te TIAFAAHOURAA E TE ORA MURE ÒRE. Ua ìte O ia e, te päpü nei ta na òhipa i teie nei, no te mea, na te Atua Nui Tumu Tahi rätou i höroà mai no na. I te vahi tei reira hoê noa taata, tei vehihia ra i te mana o te Atua, e noaa i taua taata ra te mano tiniraa te taata e tiàturi i te Atua.

No te aha o Ietu i pure ai mai teie te huru ?

Ia ìtehia te Atua Nui Tumu Tahi, te feia atoà e ìte no te Atua e noaa ia rätou te ora mure òre. O ta Ietu e haapäpü nei i te ìrava 3, TEIE HOÌ TE ORA MURE ÒRE, IA ÌTE RÄTOU IA ÒE I TE ATUA MAU RA, E IA IETU I TE METIA I TA ÒE I TONO MAI. Te manaò atoà ia i faahitihia na e Ieremia i te pene 31 i te ìrava 34 vh. Ia ìte hoì òutou i te Atua Nui Tumu Tahi, e ìte paatoà hoì rätou ia ù o tei haehaa e o tei rahi, te parau mai ra te Atua Nui Tumu Tahi ; e faaòre hoì au i ta rätou hara, e òre au e manaò faahou i ta rätou ìno. E parau hiemateòa teie no tätou i teie mahana, oia hoì e òaòa o tià òre o ta Ietu e faatupu ra i ta na parauraa e, 11 Ua òre au e pärahi i teie nei ao; e tià rä rätou i teie nei ao, e te haere atu nei au ia òe na. E ta ù Metua Moà ra e, e tiaì òe ia rätou i ta òe i hö mai no ù i to iòa na, ia hoê aè rätou mai ia täua atoà nei ä. Ia ora na.

Himene.

Pure

E te Tumu Nui e, ua hämani òe ia mätou i te repo o teie fenua, o mätou ia i Mäòhi ai. Nä roto i to mätou fenua, te haapii mai nei òe ia mätou i te ora, ua haafaufaa òre rä mätou i te hiroà  ta na i faauru i roto ia mätou, e aore i färii i to mätou iho tumu, e inaha e horoà te reira na òe, e täpaò no to òe aroha e to òe here ia mätou. Tähiti ê atu i teie teòteò e haapöiri noa nei i to mätou âau. Ia ìte mätou e ia färii hope roa i to mätou iho tumu mäòhi, to òe ia iòa ta mätou e faahanahana ra. Âmene.

Himene.

Pure a te Fatu.

G F#m G A            (F#m) (G) (B)   (D)     (B) D         G                         D E to mätou Metua i te raì ra G                    D                     A Ia raa to òe iòa Ia tae to òe ra hau D                    G              D                   Ia haapaòhia To òe hinaaro G             D                   A I te fenua nei  Mai te  raì atoà ra               D            G                          D Ho mai i te maa  e au ia mätou G                     D                               A i teie nei mahana faaòre mai ta mätou hara                         G                                                                             mai ia mätou atoà e faaòre i te hara

A           G                  ia mätou nei  eiaha e faaruè ia mätou                                     A ia roohia noa hia e te àti G                 A                    D e faaora ra ia mätou i te ìno G                   D    G                     D no òe hoì te hau no òe hoì te mana                                    A     G              A      D no òe hoì te hanahana  e a muri noa atu Âmene. Terai or. Faatura.

Ioane 14, 15-21 Faaaò

Tāpati 17 no Më 2020.

Faaaò

Ômuaraa.

Te faateitei nei tätou i te Atua Nui Tumu Tahi, no teie taime faufaa no te haamoriraa, te haamaitaìraa, e te ârueraa, no te ora e faanaò-noa-hia nei e tätou, maite te uì a uìuì mai ä. Te puhi nei te mau âpoo maitaì no te fenua nei, o Mäòhi Nui tei faatähirihiri i te mau àru mai te òto ùpaùpa ra ia tävevo i roto i te mau vao o te mau mouà, e tei haavarovaro te mau niàu o te mau tumu haari. Èi faaìte e ua haumärü te fenua ua tae mai te mataì âpï, ta te hupe i  faararirari i te mau ùaa tiare o te fenua.

Himene.

Taramo 66.

1 Na te Mënätehe. E Himene, e Taramo. E pii hua i te òaòa i te Atua, e te mau fenua e. 2 E himene ei haamaitaì i to na iòa, e faariro i to na hanahana ei haamaitaìraa ia na.3 E parau atu i te Atua: E mau räveà mataùtaù ta òe. No to òe ra mana rahi i auraro mai ai to mau ènemi ia òe ra. 4 E haamori te mau fenua atoà nei ia òe, e himene ia òe, e himene i to òe ra iòa. Tera. 5 E haere mai e hiò i te mau òhipa a te Atua. E mea mataùtaù ta na i rave i te taata nei. 6 Ua faariro o ia i te tai nei ei repo marô, ua nä raro noa rätou nä te moana i te haere, i reira to tätou òaòaraa ia na. 7 Te mana nei o ia i to na püai e a muri noa atu. Te tiàtonu ra to na mata i te mau êtene; eiaha tei haùti ra e faateitei ia rätou iho. Tera. 8 E haamaitaì i to tätou Atua, e te mau taata nei e. Ia ìteä hoì te reo i te haamaitaìraa ia na. 9 O o ia tei tiaì ia tätou e ora ai, e o tei faaitoito i to tätou âvae ia òre ia pähee.10 Ua tämata-mau-hia mätou e òe, e te Atua e. Ua tämä òe ia mätou mai te ârio i tämähia ra, 11 ua tuu òe ia mätou i roto i te märei, e ua tuu òe i te hopoià teiaha i nià i to mätou tauupu. 12 Na òe i faahoro i te taata nä nià i to mätou upoo, ua nä roto mätou i te auahi e te pape. Ua arataì rä òe ia mätou i te fenua taoà.13 E tomo vau i to fare mä te tütia-täauahi, e faatupu vau i ta ù mau èuhe ia òe ra, 14 tei parauhia e ta ù vaha, e na ta ù vaha i faaìte i ta ù àtiraa ra.15 Te tütia-täauahi poria ra ta ù e hopoi atu ia òe ra: te mämoe oni, e te mea noànoà atoà te puaatoro e te puaaniho ta ù e faatütia. Tera. 16 E haere mai, e faaroo, o òutou atoà e mataù i te Atua ra, e na ù e faaìte i ta na i rave i to ù nei värua.17 Ua pii atu ra ta ù vaha ia na, e ua faateitei ta ù arero ia na. 18 Àhiri rä te faatià ra ta ù âau i te ìno, e òre au e faaroohia mai e te Fatu. 19 Ua faaroo mau rä te Atua ia ù, e ua haapaò mai i ta ù i ani atu. 20 Ia haamaitaìhia hoì te Atua O ia aore i haapae i ta ù nei pure, e aore hoì i faahoì i to na aroharaa ia ù nei.

Himene.

Òhipa 8.5-17

5 Haere atu ra Firipa i te hoê ôire i Tämäria, parau atu ra ia rätou i te parau o te Metia. 6 E ia faaroo mai ra rätou, e ìte aè ra hoì i te mau täpaò ta na e rave ra, ua rötahi mäite mai ra te âau o te taata i te haapaòraa mai i te parau i parauhia atu e Firipa ra. 7 Ua pii hua mai ra hoì te reo o te mau värua ìno ra, e ua haere mai ra i räpae i te feiä i uruhia ra, e rave rahi hoì te häpepa e te piriòì i ora. 8 Òaòa roa aè ra to taua ôire ra. 9 O te hoê taata rä i pärahi i taua ôire ra, o Timona te iòa, e tahutahu na i mütaa iho, e te nä-ô-raa ia na iho e taata rahi roa, e mäere atu ra te taata o Tämäria ia na: 10 tïoi atu ra rätou atoà ia na, te taata rii e tae noa atu ra i te taata rarahi ra, nä ô aè ra: O te mana rahi o te Atua ra teie nei taata. 11 Haapaò atu ra rätou ia na, no te mea ua mäoro aè ra to rätou maereraa ia na i ta na ra peu tahutahu. 12 Ia faaroo rä rätou ia Firipa i te parauraa i te parau maitaì o te Pätireia o te Atua, e te iòa hoì o Ietu Metia, päpetitohia iho ra hoì rätou te täne e te vahine atoà. 13 E faaroo atoà mai ra hoì Timona, e ia päpetitohia o ia ra, ua àti mai ra o ia ia Firipa, e ûmere mai ra o ia i te hiòraa mai i te mau täpaò e te mau temeio rarahi e ravehia ra. 14 E ìte aè ra te mau âpotetoro e pärahi i Ierutarëma ra e, ua mau to Tämäria i te parau a te Atua, ua tono atu ra rätou ia Pëtero räua o Ioane ia rätou ra. 15 E tae atu ra räua i raro, ua pure iho ra ia horoàhia mai te Värua Maitaì ia rätou ra. 16 Aore ä hoì o ia i tau mai i nià iho ia rätou atoà ra, o te päpetito anaè ra to rätou i roto i te iòa o te Fatu ra o Ietu. 17 Ua tuu atu ra räua i to räua rima i nià iho ia rätou, noaa iho ra te Värua Maitaì ia rätou ra.

Himene.

1 Pētero 3.15-18

15 E faateitei rä òutou i te Fatu ra i te Metia i roto i to òutou âau: e ia vai ineine ä òutou ia parau atu i te taata atoà ia ui mai ia òutou i te tiàturi i roto ia òutou na, mä te marü e te auraro mäite atu. 16 Ei âau hapa-òre ä to òutou, e ta rätou i faaìno mai ia òutou na, mai te mea e, e feiä rave parau ìno ra, ia haamä rätou o tei pari haavare noa mai i ta òutou parau maitaì i te Metia ra. 17 E mea maitaì hoì, ia tià i te Atua, ia pohe òutou i te parau maitaì, eiaha i te parau ìno. 18 I pohe na hoì te Metia iho no te hara hoê poheraa, te taata parau tià no te feiä parau tià òre, ia tae tätou ia na i te Atua ra, i täparahi-pohe-mau-hia o ia i te tino ra, i faaorahia rä e te Värua.

Ioane 14.15-21

E tono mai te Fatu i to na Värua

15 Ua hinaaro òutou ia ù ra, e haapaò i ta ù parau. 16 Na ù hoì e ani atu i te Metua ra, e na na e horoà mai i te tahi Faaaò ia òutou, ia pärahi mau o ia e a muri noa atu io òutou nei. 17 O te Värua parau mau ra, o të òre e färiihia mai e te ao nei ra, no te mea aore i hiò ia na, aore hoì i ìte ia na. E ìte rä òutou ia na, e pärahi mau hoì o ia io òutou nei, e ei roto hoì ia òutou.18 Eita vau e vaiiho ôtare noa ia òutou, e hoì mai ä vau ia òutou nei. 19 E ia roovaù iti aè, e òre to te ao e hiò faahou mai ia ù; e hiò mai rä òutou ia ù, no te mea e ora vau, e ora atoà hoì òutou. 20 Ia tae i te reira mahana e ìte ai òutou e, tei roto hoì au i ta ù Metua, e tei roto hoì òutou ia ù e tei roto vau ia òutou. 21 Tei ia na ta ù ra parau e ua haapaò o ia i taua parau ra, o ia tei hinaaro mai ia ù. E tei hinaaro mai ia ù ra, e herehia mai o ia e ta ù Metua ra; e e here hoì au ia na, e e faaìte atu hoì au ia na ia ù iho.

Himene.

Manaò

Te värua o na taiòraa e maha, te faaìte nei ia i te òhipa e ravehia nei e te feiä paieti, ia hanahana te Atua, i ta na haapäpüraa i te mau ôpuaraa no te mau taata atoà. Te feiä atoà tei färii päpü i te parau mau a te Atua, tei roto ia i to na âau te Värua Maitaì te tiàrepuraa ia upootià te maitaì i nià i te ìno. Na teie e faahaùti nei te tiàturiraa o te taata i nià i ta te Värua Maitaì e arataì ra. Teie ra mea varavara roa to te taata ìteraa i te reira, i te mea aita to rätou âau e riro nei ei ùmete färii no te mau hinaaro o te Atua. Ua äpiäpi hoì te ùmete i te mau peu tià òre, aita atu ra i riro faahou èi pärahiraa no te Värua Maitaì, ua riro ra èi pärahiraa no te mau manaò taata. I reira te ìte, e ìte òre ai, te parau mau ei parau haavare. Ua poì te mata i te vare o te faahema, i òre ai e ìte faahou i ta te Värua Maitaì e faaìte nei. Teie te turu i to tätou tiàturi ia au te haapotoraa o na taiòraa e maha no teie mahana.

-Taramo 66, 4 E haamori te mau fenua i te Atua Nui Tumu Tahi, e himene, to na ra iòa.

-Òhipa 8, 17 Ua tuu i to räua rima i nià ia rätou, tau mai ra te Värua Maitaì.

-1 Petero 3, 17  Ia tià i te Atua, ia pohe òutou i te parau maitaì, eiaha i te parau ìno.

-Ioane 14, 15 Ua hinaaro òutou ia ù ra, e haapaò i ta ù parau.

Mau hinere teie mau taiòraa no te Parau Maitaì o Ietu i päpaìhia e Ioane i te pene 14 mai te ìrava 15 e faaea i te 21. I te mea te faaìte nei teie taiòraa e maha tumu òhipa o ta te taata faaroo e haapaò

1) Ia tiàturi te mau pipi ia Ietu.

2) E hoì mai te Fatu ei haapäpüraa e, e färii mai Ò ia i te mau Pure i faataehia ma to na iòa.

3) Eita te Fatu e faaruè i to na mau taata, e tono mai ra ò ia i te hoê Faaaò o te pärahi mai àmuri noa atu.

4) Eita o Ietu e vaiiho òtare noa i to na mau tävini.

Te faufaa o te taiòraa.

To  Ietu ia haamäramaramaraa i te mau pipi i te mau òhipa e tià ia haapaòhia.

1) Te parau nei o Ietu, a haapaò i ta ù mau parau, te mau haapiiraa, te mau aòraa, te mau ture, i reira e ìte maitaìhia ai te huru mau no te tävini.

2) Te ani Ò ia i te Metua, i te Faaaò, o ia te Paruru Parau tià, ia pärahi i roto ia rätou, e faaäuraa tià teie e au i te hoê Metua tei here i ta na mau tämarii.

3)E ara ra i te Värua Parau mau, e òre to te ao nei e färii, o òutou ra tei ìte e pärahi O ia i roto ia òutou, a tià atu ai ia faaìtehia.

4) Na te reira e haapäpü e, èita vau e faaruè òtare noa ia òutou, a tae atu ai te taime e hoì mai ai O ia ra, i te tau mau ra.

5) Ia tià ra i te mau pipi ia hiò i te Metia, i te mea èita to te ao nei e hiò faahou ia na, ia ìte ra te hiò päpu i nià i te ora, i te mea e ora te Metia, e ora atoà ia te mau pipi.

6) E mahana parau rahi to taua taime ra, te hora e ìte ai te mau pipi tei roto te Tamaiti i te Metua, te Metua i roto i te Tamaiti, ei faaìteraa i to raua hoêraa i roto i te òhipa no te ora o te taata.

7) Ia haapaò ia te taata i ta na mau parau Moà i reira te parau no te here e tupu ai, te here i te Metua ra, ua herehia ia e te Tamaiti Fänau tahi a te Atua, i reira te mata e matara ai, no te ìteraa i te mau òhipa taa ê a te Atua.

E aha te auraa o tei mau parau ?

To Ietu ia horoàraa i ta na mau pipi, e i te mau taata atoà e tiàturi nei, te hoê parau TUTUU ia haapaòhia i te mau taime atoà, e tae noa atu i  to na hoìraa mai. Oia hoì, te faariro nei o Ietu i te taata èi feiä tuhaa i roto i ta na faufaa. Teie te parau maere, e te faahiahia to te taata faataaraahia e Ietu èi puòiraa i ta na òhipa i te fenua nei, i te mea haere nei O ia i te Metua ra.

Te parau TUTUU, te faaineineraa ia a te taata ia na no te horoàraa, i te parau faturaa i te faufaa i nià i ta na mau tämarii, e aore i nià i te tahi taata ê mai te peu e aita ta na e huaai. E ravehia teie òhipa i mua i te notera, e i mua i na ìte e piti tei mäìtihia e te fatu faufaa, eiaha ra èi taata no roto i te ôpu fetii. Teie huru parau TUTUU, e parauhia te faaìteraa faufaa te taata e faafatuhia e ìte òia te parau atoà i faanahohia. Te vai atoà nei te parau TUTUU moè, na ìte noa te faaärahia, o vai ra te fatu, àreà te taata òia te faafatuhia èita roa e ìte, ia tae roa i te taime a pohe ai te fatu o te faufaa. Te tahi ia faanahoraa teie e ravehia nei e te taata i teie mahana.

Teie ra ta Ietu, te faafanaò nei O ia i te huru taata atoà, e taiò nei i teie parau, ma te faaìte atoà i te òhipa e rave, e ma te tuu atoà mai te hoê Paruru, ia òre te mau fatu no teie faufaa ia vai òtare noa. Ia riro mau ra èi mau ìte àueue òre no teie mau faufaa e hitu e faaìtehia nei i roto i ta tätou nei taiòraa.

Te tïtauraa.

Te hinaaro nei o Ietu, ia aahia to tätou faaroo i roto i te tahi faanahoraa, tei òre roa e mure e mou. Oia hoì e ia hotu i roto i te autaeaèraa te hau, na te reira e faariro ia tätou ei matamehaì no te aroha e te here o te Atua. Ei reira tätou e ìte ai ia tätou iho, i roto i te mata o te taata tupu, mai te hiò hipa ra te huru. E èi reira atoà te Atua, tei òre e ìtehia e te mata taata, e tauturu ai ia tätou i te ìteraa i te tahi, to tätou taeaè, to tätou tuahine e i te feiä atoà i roto i te ère e te veve.

E no reira, te tïtau mai nei teie parau TUTUU ia tätou ia faaitoito te huifaaroo i te ìmiraa i te mau raveà atoà, i te mau taime atoà ia àmui to na oraraa atoà i roto i te Atua no te mea o te puna te reira o to tätou ora. I roto i te manaò tumu no te âmuiraa atu i roto i te Atua, ia ìte atoà ia tätou e, e tufaa ta na i na pae e piti, te pae o te Atua e i te pae o te taata. I to na pae, ua ìmi pinepine te Atua i te mau raveà no te àtiraa mai Ia na i roto i te oraraa o te taata o ta Ietu e haamanaò mai nei ia tätou i te parauraa e, Eita vau e vai iho òtare noa ia òutou.

Himene.

Pure.

Haamaitaì mätou ia òe e te Atua Nui Tumu Tahi, no teie taime haamoriraa na mätou e i to mätou faarooraa i te mau parau no to òe aroha e no to òe here, tei faaìtehia i to mau tävini i mua ra, e ia mätou i teie nei mahana. Te höroà nei òe ia mätou te tiaìtururaa no te mau parau fäfau ia tupu ta òe ôpuaraa faaora i nià te mau taata atoà e tiàturi tämau nei ia òe. Te òhipa ia i ravehia e to mätou Fatu te Metia ta òe Tämaïti te faaora o teie nei ao. Te parau ia ta Na i faahiti i roto i te Parau Maitaì i teie mahana, Ua hinaaro òutou ia ù ra, e haapaò i ta ù parau, ia haapaò mätou e òre teie maì e haaviivii nei i Mäòhi Nui nei, e i teie ao. Aroha mai ia mätou te feiä hara nei. Âmene.

Himene

Pure a te Fatu.

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

15 Ua hinaaro òutou ia ù ra, e haapaò i ta ù parau.

Terai or. Faatura.