mercredi 15 juillet 2020

Mātaio 13.24-43 E VAIIHO NOA

Tapati 19 no Tiunu 2020.

E  VAIIHO  NOA 

Taramo 86

1 E pure na Tävita. A färiu mai i to tarià, e te Fatu, a faaroo mai ia ù, ua haèhaa vau e te faufaa òre. 2 E faaora hoì òe i ta ù värua, te arohahia mai nei hoì au e òe ia ora, e ta ù Atua, to tävini e tiàturi ia òe nei. 3 E aroha mai òe ia ù, e te Fatu, te tiàoro nei au ia òe, aita e mahana tuua. 4 E faaòaòa mai i te värua o to tävini, te faaàraàra atu nei au i ta ù värua ia òe, e te Fatu e. 5 Te maitaì ra hoì òe, e te Fatu, e ua tià ia òe te faaòre mai i te hara nei e te aroha rahi i te feiä atoà e tiàoro atu ia òe ra. 6 E faaroo mai, e te Fatu, i ta ù pure, e haapaò mai i ta ù e ani nei.7 Ia tae i te mahana e àti ai au ra, ua tiàoro vau ia òe ra, e faaroo mai hoì òe ia ù nei. 8 Aore o òe e fäito, e te Fatu, i roto i te mau atua atoà ra, aore hoì e òhipa e au i ta òe ra òhipa. 9 Te mau fenua atoà i hämanihia e òe ra, e tae atoà mai e haamori i mua ia òe, e te Fatu, a faateitei ai i to òe ra iòa. 10 E Atua rahi hoì òe, e te òhipa taa ê ta òe e rave ra O òe anaè ra te Atua mau 11 E haapii mai òe, e te Fatu, i to òe ra èà, e haapaò vau i ta òe ra parau mau: ia rötahi mäite hoì ta ù âau i te mataùraa i to iòa na. 12 E haamaitaì ä vau ia òe, e te Fatu, e ta ù Atua, mä ta ù âau atoà ra; e faarahi tämau ä vau i to òe ra iòa. 13 Ua rahi hoì to òe aroha ia ù, ua faaora hoì òe ia ù i häte i raro roa ra. 14 Te feiä teòteò tei tià mai, e te Atua, e märô mai ia ù; e te âmuiraa o te feiä àito ra, tei tïtau mai ia ù ia pohe: aore hoì rätou i tuu ia òe i mua ia rätou ra. 15 O òe rä, e te Fatu, e Atua hämani maitaì òe, e te aroha, e te faaòromaìraa roa, e te rahi hoì i te faaherehere, e te parau mau. 16 E haapaò mai ä òe ia ù, e hämani maitaì mai; hö mai na i to òe ra itoito i to tävini nei, e faaora hoì te tamaiti a to tävini vahine. 17 E faaìte mai ia ù i te tahi täpaò maitaì, ia ìte mai te feiä i riri mai ia ù nei a haamä atu ai, ia tauturu mai òe, e te Fatu, e ia haamähanahana mai ia ù.

Ìtaia 44.6-8

6 Te nä ô mai ra te Arii o Ìteraèra ra, o te Fatu e to na ora, o te Fatu manahope ra: O vau te mätamua, e o vau hoì te faahopeà, e aita atu Atua mäori rä o vau. 7 O vai tei faaìte mai i te parau, tei faaìte ätea noa, e ua faatupu i taua parau ra mai ia ù nei, mai te ànotau mai ä i faatupu ai au i taua feiä tahito ra? i te mau parau e tupu nei i teie nei, e te tupu a muri aè, e faaìte rätou ia rätou nei. 8 Eiaha òutou e mataù, eiaha òutou e taiä; eere au tei faaìte ia òutou mai te mätamua mai ä? E ua faaìte ätea noa hoì au, e o òutou to ù ìte. Te taa atu ra änei te Atua eiaha atu ä vau? Aore ia, aita ä atu e pare haapüraa; aore roa i ìteä atu e au.

Rōma 8.26-27

26 Te turu atoà mai nei hoì te Värua i to tätou nei paruparu, aore hoì tätou i ìte maitaì i te mea au ia pure tätou; na te Värua iho i ani i ta tätou mä te ûuru e òre e tià ia parau ra. 27 Ua ìte rä o ia o tei päheru i te âau ra i to te Värua hinaaro, o tei ani i ta te feiä moà ra, i tei au i to te Atua ra hinaaro.

Mātaio 13.24-43

Te tïtänia

24 Ua tuu atu ra o ia i te tahi ä parapore ia rätou, nä ô atu ra: E au te Hau o te raì i te hoê taata i ueue i te huero maitaì i roto i ta na ra âua/faaapu. 25 I te taime te taòto ra te taata, ua haere mai ra to na ènemi, ueue iho ra i te tïtänia i roto i te tïtona, e haere ê atu ra. 26 Ia tupu te mau räau rii e ia faahotu mai i te mäa, ìteä-atoà-hia iho ra te tïtänia. 27 Ua haere mai ra te mau tävini o te fatu fare, ua parau mai ra ia na: E te Fatu, eere änei i te huero maitaì ta òe i ueue i roto i ta òe âua: no hea iho nei hoì te tïtänia? 28 Ua pähono atu ra o ia ia rätou: Na te ènemi te reira i rave. Ua parau mai ra te mau tävini ia na: E tii änei mätou e hutihuti/hühuti? 29 Ua parau atu ra o ia: Eiaha, o te taäa atoà òutou i te tïtona ia hutihuti òutou i te tïtänia. 30 E vaiiho noa ia tupu âpipiti noa na e tae noa atu i te ôotiraa tïtona; e ia tae i te tau ôotiraa ra, na ù ia e parau atu i te feiä ôoti: E mata na nä mua roa i hutihuti i te tïtänia e a ruru ai ia täninahia i te auahi, âreà te tïtona, e haaputu ia i roto i ta ù fare vairaa tïtona.

Te huero tïnapi

(Mär 4.30-32; Rut 13.18-19)

31 Ua tuu faahou atu ra o ia i te tahi ä parapore ia rätou, nä ô atu ra: E au te Hau o te raì i te hoê huero tïnapi ta te hoê taata i rave e tä na i tanu i roto i ta na âua/faaapu; 32 o te huero iti roa ia i te mau huero atoà nei, ia tupu rä e rahi roa ia i te mau räau tupu atoà, e e riro mai ei tumu räau, e e tau mai te mau manu o te reva no te hämani i to rätou ôfaaraa i nià i to na mau âmaa.

Te faahöpue

(Rut 13.20-21)

33 Ua parau atu ra o ia i te tahi ä parapore ia rätou: E au te Hau o te raì i te faahöpue tei ravehia e te hoê vahine e tei ânoìhia i roto i nä fäito färaoa ota e toru, e höpue atu ra te täatoà o taua färaoa ra.

No te aha Ietu i parau parapore ai

(Mär 4.33-34)

34 Taua mau parau atoà ra, ua parau-parapore-hia ia e Ietu i te tiàaa rahi; aore roa e parau tä na i parau atu ia rätou tei òre i na-roto-hia i te parapore, 35 ei faatupuraa i tei parauhia e te perofeta: E hämama ta ù vaha no te parau i te parapore, e poro vau i te mau òhipa i hunahia mai te mauraa mai o teie nei ao.

Te tätararaa o te tïtänia

36 Vaiiho iho ra Ietu i te tiàa rahi, e tomo atu ra i roto i te fare. Ua haere mai ra ta na mau pipi, nä ô mai ra ia na: A tätara mai na ia mätou i te parapore o te tïtänia i roto i te âua/faaapu. 37 Ua pähono atu ra Ietu ia rätou: O tei ueue i te huero maitaì ra, o te Tamaiti ia a te taata. 38 Te âua ra, o teie nei ao ia; te huero maitaì ra, o te mau tamarii ia o te Hau; e te tïtänia ra, o te mau tamarii ia a te värua ìno/hämani ìno. 39 Te ènemi i ueue i te tïtänia ra, o te tiàporo ia; te ôotiraa tïtona ra, o te hopeà ia o teie nei ao; te feiä ôoti ra, o te mau merahi ia. 40 E mai te tïtänia i haaputuhia e i tähuhia i te auahi ra, òia atoà ia i te hopeà o teie nei ao. 41 E tono mai te Tamaiti a te taata i ta na mau merahi, e na rätou e hutihuti o ia i te mau tumu atoà e turori ai e te feiä e faatupu i te ìno, mai roto atu i to na Hau; 42 a huri atu ai ia rätou i roto i te umu auahi; tei reira te òto e te àuàuraa niho. 43 Ei reira te feiä parau tià e ànaana mai ai mai te mahana ra, i roto i te Hau o to rätou Metua. E tarià tö na ra, ia faaroo ia.

Manaò

Taramo 86, 10 E Atua rahi hoì òe, e te òhipa taa ê ta òe e rave ra O òe anaè ra te Atua mau.

Ìtaia 44, 6 Te nä ô mai ra te Arii o Ìteraèra ra, o te Fatu e to na ora, o te Fatu manahope ra: O vau te mätamua, e o vau hoì te faahopeà, e aita atu Atua mäori rä o vau.

Roma 8, 27 Ua ìte rä o ia o tei päheru i te âau ra i to te Värua hinaaro, o tei ani i ta te feiä moà ra, i tei au i to te Atua ra hinaaro.

Mätaio 13, 30 E vaiiho noa ia tupu âpipiti noa na e tae noa atu i te ôotiraa tïtona; e ia tae i te tau ôotiraa ra, na ù ia e parau atu i te feiä ôoti: E mata na nä mua roa i hutihuti i te tïtänia e a ruru ai ia täninahia i te auahi, âreà te tïtona, e haaputu ia i roto i ta ù fare vairaa tïtona.

 

Ta tätou parau i teie poìpoì, te parau ia no te Parau Maitaì a Ietu päpaìhia e Mätaio i te pene 13, i te ìrava 23 e faaea i te ìrava 43. Te mea e faaìtehia nei to Ietu faatià paraporeraa i te parau no te hau o te Atua i teie ao, e aore ra te patireia o te ao. Ma te faaäu i nià i te parau no te huero maitaì i ueuehia, tupu mai nei te tïtona e te tïtänia. Te tïtona e maa maitaì, àreà te tïtänia e maa ìno ia, mea tià atoà ia parau i te tïtänia i te àihere ìno e faaäpiäpi i te tupu maitaìraa o te tïtona. Te huero tïnapi tei faaäuhia i te patireia o te ao, e tae noa atu i te faahöpue. E aha tei ìtehia ia au teie mau parapore ta Ietu e faatià nei, oia ia te tupu âpitipiti-noa-raa te parau no te maitaì e te ìno. Te reo o Ietu i te ìrava 30 vm, i te naò- raa e, E VAIIHO  NOA  IA TUPU ÂPITIPITI NOA  NA  E  IA  ÀUHUNE  NA Ù E PÄRAU ATU I TE FEIÄ ÒOTI. Te parau ia i haapaòhia no tätou, i teie hora paieti.

 

Èi manaò tatara.

E  VAIIHO  NOA  IA  TUPU  ÂPITIPITI  NOA  NA E  IA  ÀUHUNE  NA Ù E PÄRAU ATU I TE FEIÄ ÒOTI.

Ietu i roto i ta tätou taiòraa no teie mahana, Mataio pene 13, te ìrava 24 e tae i te 43, Teie tuhaa o te pene parau tei roto e piti tuhaa te faatiàraa, te tuhaa mätamua i te pae tähatai ìrava 24 e tae i te ìrava 34, te piti o te tuhaa tei roto i te fare ìrava 35 e tae i te ìrava 43, to Ietu faatià faahouraa i te parapore i mua i ta na mau pipi, i reira to na tätararaa te parau o te tïtänia e te tïtona te mau òhipa e tupu, ia au i na tuhaa e toru nei.

1)             Te parau no te huero maitaì.

2)             Te parau no te huero tïnapi.

3)             Te parau no te faahöpue.

 

Teie mau faahitiraa parau ua faaäuhia ia i nià i te hau o te Atua Nui Tumu Tahi. Tei tuuhia i mua i teie nahoà taata, ia ìte o tei òre i ìtehia e te mata ia hiò. Oia hoì, te taata faaapu ia ueue te haìhaì o te huero tïnapi, te faahöpue e ìtehia ia te reira, àreà ra te hau no te Atua o ta Ietu ia e tütava nei ia ìte to te ao i to na heeùri. I faatià ai  o Ietu i teie parau a te perofeta i te ìrava 35 ei faatupuraa i tei parauhia e te perofeta: E hämama ta ù vaha no te parau i te parapore, e poro vau i te mau òhipa i hunahia mai te mauraa mai o teie nei ao.

 

Te parau nei o Ietu i teie mau parapore ia färiu te mau taata atoà i nià i te òhipa ta te Atua i rave no teie nei ao. Ia vaiiho i te tïtona e te tïtänia ia tupu âpitipiti noa, i te mea tei roto i te faaapu a te Atua te tupuraa, na te àuhune o te maa e faaìte, e tïtona tera, e tïtänia tera. Teie haapiiraa ta Ietu te ärataì nei ia i te feiä faaroo, ia haamanaò i te huero tïnapi, te huero haìhaì äè i roto i te mau huero atoà, to na tupu mea òhie, e te rahi o te tumu e tauraa no te mau manu o te reva.

 

Ta Ietu ra e faaäu nei i te hau o te Atua, eita ia i te rahi o te tumu, mauti ra te haìhaì o te huero o teie maa, fatata roa e òre e ìtehia e te mata ia hiò. O ta Ietu e parau nei e, e au i te hau o te Atua, e to na rahi eita ia e tià ia taiòhia. Oia atoà te parau no te faahöpue ta Ietu e parau nei. Teie ra te faaära nei o Ietu i te tahi mau taime, e ara i te faahöpue a te mau Faritea e te Tätutea, Mataio i te pene 16, ìrava 6. Oia ia atoà ia i te Mataio pene 8 i te ìrava 15. E ara i te faahöpue a te mau Faritea, e te faahöpue a Herota. Teie faahöpue no te faaìno i te oraraa o te taata, eiaha ra no te haamaitaì. E höpue teie e ôru, eita ra e mahaha, e purehu ra, maite mea eita e purehu e pee ia i nià mai te pauma ra te huru. Te höpue ra ta Ietu e faaäu nei i te hau o te Atua, no te faaìte ia i te maitaì no te mau òhipa ta te Atua e faatupu nei no te oraraa faanaò o te mau taata marü metia. Teie mau faaäuraa parau ta Ietu e òrero nei, ua tupu ia i roto i te ao ta te Atua i tuu te maitaì, no te taata. O te faanahoraa ia ta te Atua i ôpua, no te ora o te taata. Te vai nei ra ta te ennemi ànoìraa i roto i te maitaì a te Atua i ôpua no ta na faaapu. I parau ai o Ietu i ta na mau pipi e, E VAIIHO  NOA IA TUPU ÀPITIPITI NOA NA E IA ÀUHUNE NA Ù E PÄRAU ATU I TE FEIÄ ÒOTI.

E peàpeà i te rahi to te mau pipi i teie parau, aita e òre te uiui ra rätou e mea nahea te ènemi i te öraa i roto i te faaapu a te Atua, e aore ra no te aha eita e tano e huhuti i te tïtänia e faataaê.

Te haapäpü nei o Ietu i teie parau no te tïtänia i mua i ta na mau pipi, ua ueuehia te huero maitaì e te Tamaiti a te taata, oia hoì i roto i te faaapu a te Atua, taua faaapu rä o te ao nei ia. I tonohia mai ai te mau veà no teie òhipa. E faaapu teie, aita to na e ôtià, aita e pärururaa tomo noa i roto, aita hoê pätoìraa no te taata, oia hoì, e faaapu tiàma teie ta te Atua. Noa atu e mau ènemi no te Atua, i ö ai te ueueraa tïtänia. I ânoì ai te ìno, i roto i te maitaì. Eita ra e tano ia faataa-vave-hia te tïtona e te tïtänia e vaiiho ra ia tae i te tau ôotiraa. Ia tae i teie tau e tià ai te Atua no te haava, ia vai te hoê ärea i roto i te maitaì e te ìno, ia ua te faaìteraa a te ìrava 40, 41, 42. Te tïtänia e haaputuhia e tuuhia i roto i te auahi, na te merahi  e haaputu, o te hohoà ia teie no te paieti òre, no te feiä tei faatupu i te hapa, te ìno mai roto mai i te patireia o te ao. A tuu atu ai i roto i te auahi mure òre, tei reira te òto e te àuàuraa niho e te pohe. Areà ra te feiä parau tià e ànaana ia mai te mahana ra i roto i te patireia o te Metua. A riro atu ai èi mau tamarii no te patireia, no te faatupu i te parau fäfau a te Atua no te ao nei. I te mea o rätou tei ueuehia i te parau tei hämani faahou i te tiàturiraa, na roto i te Varua Moà i te päheruraa o te âau parau tià no te maitaì. 

 

E hoa here ma e,

Vaiiho noa, to na auraa e haapäpüraa teie no te òhipa e tupu ra, te tïtauhia nei te tiàmaraa o te taata i to na ìteraa i te faufaa ora ta te Atua i faataa no na, ta te Atua Nui Tumu Tahi e ora e te maitaì, ta te ènemi e pohe e te ìno. No te Atua tätou e to te paroita, e faaitoito tätou i te turu i te ôpuaraa faaora a te Atua, e na tätou atoà e faaitoito tei paruparu ia òre ia topa i roto i te faahaparaa a te Atua.

Te ìte nei tätou i ù nei, aita hoê faahaparaa ta te Fatu i te mau ènemi o te Atua. Te faaäraraa rä te vai ra ia, no te faafariu i nià i te maitaì ta te Atua i vaiiho i te tiàmaraa i roto i tera taata, tera nunaa e tera Ètärëtia. Te mea ra e tïtauhia nei, ia ìtehia o te Atua te ômuaraa o te òhipa, e O ia atoà te faahopeà no te haava, e no te horoà i te faahaparaa e au. I pii ai te Taramo 82 i te ìrava 8, a tià, e te Atua e, e haava i to te ao, tei ia òe hoì te mana i te fenua atoà nei.

Oia mau, te òhipa ia e tupu nei i roto i ta tätou parau no teie mahana, Vaiiho ia tupu âpitipiti noa na, no te mea na te Atua te parau hopeà, no te faataa, no te auahi anei, no te pohe mure òre anei, e aore ra no te auahi o te mahana penetetöte tei faaâpï, no te ora mure òre.

Vaiiho ia tupu âpitipiti noa na, ia noaa te haapäpüraa, te ora mau rä te Atua na roto i te tururaa  a te Varua Moà. Te äniraa ia a te feiä Moà, ia tupu te päheruraa i te maitaì a te Atua.

No reira o tätou, tei roto i teie tupu âpitipitiraa, no te ìno e te maitaì, eita rä tei ia tätou i te faataaraa, tei a tätou rä i te faaäraraa. E te ora àmui nei tätou i te ao nei, no te tiaìraa, e ao no te aroha o te Atua, a taë atu ai i te tau ôotiraa, ia rahi äè te hotu o te huero maitaì i nià i te tïtänia, na roto i te tiàmaraa o te tiàturiraa na te reira e täui ta tätou hiòraa, te mau parau e te mau òhipa i fafauhia ia tätou.

Vaiiho ia tupu âpitipiti noa na, te tano te parau a Ietu i teie tau ta tätou e ora nei. I te mea te ora âpitipiti noa nei tätou i te tahi taime, i tïtauhia ai tätou ia haafatata i pïhaì iho i te teröno parau tià no te aroha e te here o te Atua.

Te tumu o Ietu i pähono ai mai teie te huru, èihea aè nei taime to te Atua huhutiraa i te tïtänia. I te tau o Noa e vaù anaè taata parau tià tei ìtehia, tïruvihia-iho-ra fenua, èihea tei pohepohe i teie faataaraa ta te Atua i rave. E te tau no Âperahäma, a tahi tumuhia ai o Totoma e o Tomora, ua täparu o Âperahäma i te Atua, ia faaorahia te ùtuafare o Rota, e ua nina-roa-hia teie na òire e to na nunaa. Ia tae mai ra i te tau no te mau perofeta, e i te tau no Ietu aita roa teie mau òhipa riàrià i tupu faahou. Ua vaiiho-noa-hia ia tupu âpitipiti noa na, i roto i te manaò e ia riro mai te tïtänia èi tïtona.

Teie te manaò o Ietu i te parauraa i teie manaò e vaiiho ia tupu âpitipiti noa, o te riro mai te mea ìno èi faufaa no te maitaì. Mai ia Pauro tei parauhia te àito no te mau veà tono a te Metia i Atia e i Atia ïti. O ia tei tuè i te tara i nià i te èà no Tamateto, ma te manaò e, e tara pohe teie. Puta-iho-ra o ia i taua tara ra, riro mai nei o ia èi veà tono èi faariroraa i te tïtänia èi tïtona.

Oia atoà tätou e tià atoà ia rave i te òhipa ma te tiàturi päpü i te Atua. No te mea te Atua i te ômuaraa i ta tätou mau òhipa, e O ia atoà i te faahopeàraa. O ta te Atua ia e faaära nei ia tätou i teie mahana, i te naòraa e,  O vau te mätamua, e Ò vau hoì te faahopeà, e aita atu e Atua maori ra Ò vau. Eiaha òutou e mataù, eiaha òutou e taiä, e ère au tei faaìte ia òutou mai te mätamua mai ia (Ìtaia 44, 6vh e te 8 vm).

 

Ia ora na.      

 

Teraì òr. Faatura.


Aucun commentaire:

Enregistrer un commentaire

Märeto 12.38-44 Ö a Te Vahine Ìvi.

  T ā pati 10 no Teeri/Novema 2024. Ö a Te Vahine Ìvi. Mau taiòraa Taramo 146 EIAHA TÄTOU E FAAEA I TE HAAMAITAÌ I TE ATUA.  1 ...