Röma 12.1-3 Na te Aho e te Faaroo

 

Faraite 01 Tënuare 2021

Ôroà Pureraa Mätahiti Âpï Tïvira

Na te Aho e te Faaroo

Taiòraa.

Taramo 150

1 E haamaitaì i te Fatu. E haamaitaì i te Atua i to na iho ra moà, e haamaitaì ia na i te reva mana na na ra. 2 E haamaitaì ia na i ta na ra mau räveà mana, e haamaitaì ia na i to na mana rahi maitaì ra. 3 E haamaitaì ia na mä te òto o te pü ra, e haamaitaì ia na mä te näpara e te tïnura; 4 E haamaitaì ia na mä te tofe e te mehura; e haamaitaì ia na i te mea aho e te ôtepa. 5 E haamaitaì ia na mä te tümëparo òto marü; e haamaitaì ia na mä te tümëparo òto teitei. 6 O tei huti i te aho ra ia haamaitaì anaè ia i te Fatu. Hareruia.

Röma 12.1-3

Te oraraa i roto i te Metia

1 E teie nei, e a ù mau taeaè ra, te aò atu nei au ia òutou mä te aroha rahi o te Atua, e ia püpü atu òutou i to òutou mau tino ei tütia ora, e te moà, e te au hoì i te Atua ra, o te haamori au ia òutou. 2 E eiaha e faaau atu i teie nei ao; ei huru ê rä to òutou i te faahouraa i to òutou âau, ia ìte òutou i taua hinaaro tià o te Atua ra, e te au, e te maitaì hoì. 3 Teie ta ù parau ia òutou atoà e àti noa aè, i te maitaì i horoàhia mai ia ù nei, eiaha ia hau te manaò ia na iho, i tei au ia na ia manaò ra: e haapaò mäite rä i te manaò, ia au i te huru o te faaroo i tufahia e te Atua i te taata atoà ra.

Manaò.

Te Rata a Pauro i to Röma, ua päpaìhia ia no te faaineine i te tere o Pauro tä na i täpaò no te haere e färerei i te ètärëtia i Röma. Ta na ôpuaraa, o te òhiparaa ia i rotopü i te mau maru-metia e noho i reira no te tahi maa taime, e i muri iho, na roto i ta rätou mau tauturu, no te haere roa atu i te fenua Päniöra. Ua päpaì o ia i teie rata no te tätara i ta na märamaramaraa i te faaroo maru-metia e to na mau faaòhiparaa i roto i te oraraa o te mau maru-metia. Te faaìte nei teie rata i te tumu mau no te mau poroì a Pauro.

I muri aè i ta na aroha i te mau taata o te ètärëtia i Röma e te faaìteraa ia rätou no ta na mau pure no rätou, ua haapäpü o Pauro i te tumu o teie rata: Tei reira hoì te parau tià a te Atua i te faaroo i te faaìte-raa-hia mai ei faarooraa, mai tei päpaìhia ra e: Te feiä parau tià i te faaroo ra, e ora ia.

I muri mai, ua faaravaì o ia i teie tumu parau. Te täatoàraa o te taata, mai te âti-Iüta e tae noa atu i te êtene, mea tïtauhia ia tiàhia i mua i te aro o te Atua, no te mea tei raro aè te täatoà i te mana o te hara. E tiàhia te taata i mua i te Atua na roto i te faaroo ia Ietu Metia. I muri mai, te tätara ra Pauro i te parau no te ora âpï na roto i te tüàtiraa i te Metua, o të faatupu i te tahi tüàtiraa âpï e te Atua. E roaa i te taata faaroo te hau e te Atua, na roto i to na faatiàmäraahia e te Värua o te Atua i te mana o te hara e te pohe. I te pene 5 e tae i te pene 8, e täuàparau atoà ra Pauro i te fä no te Ture a te Atua e te mana no te Värua o te Atua i roto i te oraraa o te taata faaroo. I muri mai, te àro atoà ra te âpotetoro i nià i terä uiraa, e mea nä hea to te mau âti-Iüta e te mau êtene öraa i roto i te ôpuaraa a te Atua no teie nei ao. E te püòhu atoà ra o ia i roto i terä manaò e, ua riro te faaruèraa a te nünaa âti-Iüta i te Metia ei tuhaa no te ôpuaraa a te Atua no te âmui i te täatoà o teie nei ao i roto i te tupuraa no te aroha o te Atua i roto ia Ietu Metia. E te tiàturi ra o ia e, eita te âti-Iüta e pätoì noa ia Ietu. I te pae hopeà, ua päpaì o Pauro no te faaìte, e mea ora i te oraraa maru-metia, na roto i te hereraa i te tahi. Ua faahiti atoà rä i te tahi mau tumu, mai te täviniraa i te Atua, te tuhaa a te maru-metia i mua i te mau mana fenua e te tahi pae, e te parau no te hïroà o te taata. Ua faahope o ia i teie rata na roto i te tahi mau poroì taa-ê e te mau parau haamaitaì i te Atua. Te reo ta na e faahiti nei i te ìrava 3 Teie ta ù parau ia òutou atoà e àti noa aè, i te maitaì i horoàhia mai ia ù nei, eiaha ia hau te manaò ia na iho, i tei au ia na ia manaò ra: e haapaò mäite rä i te manaò, ia au i te huru o te faaroo i tufahia e te Atua i te taata atoà ra.

Oia atoà te parau no te Taramo i te ìrava 6 O tei huti i te aho ra ia haamaitaì anaè ia i te Fatu. Hareruia.

Te faaitoito nei ta tätou parau ia tätou te mau maru metia no teie mätahiti âpï 2021 ei haamata no te faanaho ia au tei papahia i nià i teie parau no te huti i te aho haamaitaì o te faaroo i tufahia e te Atua i te taata. E naò ia tätou i te parauraa e, e reo teie no te Atua Metua i nià ia tätou o te tià e ärataì ia tätou i te taatoàraa no teie mätahiti, tei höroà tämau i te puai ia tätou ia huti i te aho haamaitaì o te faaroo. Na te Aho e te Faaroo e tauturu ia tätou ia pärahi fatata noa i pïhaìiho i te Atua Metua i te mea mau tamarii tätou na te Atua o Ia to tätou Metua. No to tätou mauruüru rahi i te Atua i te mau maitaì atoà ta te Atua Metua i höroà ia tätou, e no te fenua faahiahia tei tuuhia mai èi vauvau no tätou, ua hinaaro tätou ia roohia te Atua Metua na roto i te aho i faanaòhia e tätou e ta na parau ia ûàna ia ìtehia e te mau taata atoà. Ia àmu tätou i ta tätou maa, ia rave i ta tätou peu, ia parau hoì i te reo o te Atua i höroà no tätou, ia àtuàtu e ia poihere i te vauvau ta te Atua i faaineine no tätou, e ia faariro tätou i te aroha e te here èi ture tumu no te oraraa, èi aho no te faaroo, te roo o te Atua Metua te reira tätou e amo. Ia riro to tätou aho e to tätou faaroo, mai te tiare Maurua tei ùaa noa i te mau taime atoà noa atu te vero, te vai puè, te miti faaî, e te puai o te viivii o te mau maì, e òre to tätou Aho e mure, e to tätou Faaroo e òre e paruparu. To tätou tiàturiraa ia uruaì i nià i te Atua Metua, te tumu o to tätou Aho e te itoito o to tätou Faaroo.

 

Ia ora na i teie mätahiti âpï 2021 Tivira.

 

Teraì òr. Faatura.

Elvis Presley - Green Green Grass Of Home (best video)

Taramo 46 HAU

 

Mahana maha 31 no Titema 2020.

PURERAA PÖ MATAHITI

 

HAU

 

Taiòraa.

Taramo 46

1 Na te Mënätehe, na te tamarii a Tora. E himene nä nià i Àramota. 2 O te Atua to mätou haapüraa e to mätou ètaèta, e tauturu fätata ia roohia e te àti ra.3 E òre ai mätou e mataù ai, ia àrori te fenua, e ia hurihia te mouà i raro i te tai, 4 ia haruru te miti e avaäva aè ra, e ia âueue te mau mouà i to na àru. Tera. 5 E pape ta mätou te vai nei e na to na tahe rii e faaòaòa i te ôire o te Atua, te pärahiraa moà i te tiàhapa o Tei Teitei ra. 6 O te Atua tei roto ia na ra, e òre ia e âueue; na te Atua ia e tauturu ètaèta mai. 7 A tiàrepu te mau êtene, a âueue ai te mau pätireia, o te reo anaè iho ra to na, te tärapape noa ra te fenua. 8 Tei ia mätou te Fatu manahope ra, te Atua o Iatöpa to mätou haapüraa. Tera. 9 A haere mai na, a hiò i ta te Fatu i rave, te pau ta na i rave i te fenua nei. 10 Ua faaòre o ia i te tamaì e tae roa aè nei i te hopeà fenua, ua ôfati o ia i te fana, e ua täpüpü i te mähae, e ua tähuhia te mau pereoo tamaì ra i te auahi. 11 A faatupua na, ia ìte mai e, o vau te Atua. E faateiteihia vau io te mau êtene, e faateiteihia vau i te fenua nei. 12 Tei ia mätou te Fatu manahope ra, e to mätou haapüraa, o te Atua ia no Iatöpa. Tera.

Manaò.

E pö hopeà teie no te mätahiti 2020, ua ìte tätou i to na huru to na faanahoraa, tei paò i roto i to tätou oraraa, teie maì tei haaviivii i te tupuraa o te mau òhipa i roto i to tätou fenua. Tei haaparuparu te mau färereiraa te mau âmuiraa mätauhia e tätou, e te mau fetii, te mau aroharaa tei faatäui tei auhia e tätou. Faaea noa te tahi pae i  roto i te mätaù, te ahoaho, e te peàpeà i te huru tupuraa no teie maì viivii. E tano tätou e parau e, te mätahiti ta tätou e vaiiho nei i teie pö, e parau ia tätou e ao tei òre i mure i teie maì viivii, tei òre i paremo i roto i te ûàna no to na puai, te auraa o te tahi ia mätahiti taaê mau ta tätou i ora mai. Te vai nei to tätou mau taata paari tei taòto, i te rave a teie maì viivii, no te rahi hoì o te pohe, i rahi atoà ia tätou i te faatupu i te ora, i ôfa mai ai te Atua Metua i to na aro i nià ia tätou, e te nünaa Mäòhi i Mäòhi Nui nei.

Te taata pohe ra, ua fati ia i aro aè i te mana, aore ra te puai o tei mea tei haavï ia na, tei täumi ia na, tei ìriti hoì ia na i te hiroà o te mau mea faufaa roa no te haamahorahora i to na âau. Ta tätou tautooraa ia atea tämau te pohe ia tätou, na toto i te mau mäìmiraa faatupu ora ta te mau àihere o te fenua e faaìte noa mai ra ia tätou, i te mea ua î te fenua o Mäòhi Nui i te here o te Atua Nui Tumu Tahi  

Te taata ora ra, ua matara ê mai ia i te manaò o te mea i  haavï noa na ia na, aore ra, ua roaa ia na te püai no te türaìraa atu i te mau mea e täumiumi noa na ia na. E au te taata tei noaa ia na te ora i te hoê tiare tei mähorahora to na mau raurau i nià i te mau hihi o te rä, e tei tähiria e te mataì puvaìvaì. No te mea, te ora o te fänaòraa ia i te mau maitaì atoà ta te Atua i hinaaro, mai te tau a uìuì mai ä, ia riro ei tuhaa âià na tätou. Ua horoà mai te Atua Nui Tumu Tahi i te mau maitaì atoà e au ia tätou ta na mau tamarii nei, aore te hoê mea i toe, ua hope roa ia i te püpühia mai e to na aroha Metua.

Te mau pohe ta tätou e faaruru nei i teie mahana, no to tätou ia vahavaharaa i taua mau maitaì ra, to tätou haapaeraa i te mea ta na i faataa na tätou, no te tïtau i ta te tahi. Te ora ta te Atua Metua e hinaaro nei no tätou, eere ia no te taime noa e tomo atu ai i roto i te ao mure òre. Te hinaaro nei te Atua ia matara te täatoàraa o to tätou mau fifi, ia fänaò hoì tätou i te mau maitaì atoà ta na i faataa no tätou, e ia ore roa te mau hepoheporaa e täumiumi noa nei ia tätou i roto i te haapaòraa òre. Te hinaaro nei te Atua e faaora ia tätou, te hinaaro ia, ia tätou ta na mau tamarii ia färii i ta na ora, no te mea i reira anaè tätou e ora ai.

I roto i te ao mure òre o te Atua, e aha te auraa o te ora maoti, te fänaò-hope-roa-raa-raa ia tätou i te mau maitaì atoà o to tätou Atua, mai te noaa atoà rä ia tätou te haapäpüraa e, aita e mana e aita e pohe faahou e faaruma i to tätou haereà i te hau vairoìroì no na ra, oia hoì ua manino roa.

I to tätou faarooraa i tätou taiòraa no teie pö hopeà i te faaìteraa a te Taramo 46 e himene teie na te mau tamarii a Tora tei âpeehia e te mauhaa ùpaùpa teie te paraparau o teie himene

 

O te Atua to mätou haapüraa e to mätou ètaèta.

E tauturu fätata ia roohia e te àti ra.

E òre ai mätou e mataù, ia àrori te fenua.

E ia hurihia te mouà i raro i te tai.

 

Ia haruru te miti e avaäva aè ra.

E ia âueue te mau mouà i to na àru.

E pape ta mätou te vai nei

E na to na tahe rii e faaòaòa i te ôire o te Atua.

 

Te pärahiraa moà i te tiàhapa o Tei Teitei ra.

O te Atua tei roto ia na ra, e òre ia e âueue.

Na te Atua ia e tauturu ètaèta mai.

A tiàrepu te mau êtene, a âueue ai te mau pätireia.

 

O te reo anaè iho ra to na, te tärapape noa ra te fenua.

Tei ia mätou te Fatu manahope ra.

Te Atua o Iatöpa to mätou haapüraa

A haere mai na, a hiò i ta te Fatu i rave.

 

Te pau ta na i rave i te fenua nei.

Ua faaòre o ia i te tamaì

E tae roa aè nei i te hopeà fenua.

Ua ôfati o ia i te fana.

 

E ua täpüpü te mähae.

E ua tähuhia te mau pereoo tamaì i te auahi.

A faatupua na, ia ìte mai e, o vau te Atua.

E faateiteihia vau io te mau êtene.

 

E faateiteihia vau i te fenua nei.

Tei ia mätou te Fatu manahope ra.

E to mätou haapüraa, o te Atua ia no Iatöpa.

E aha ta teie himene e faaòto nei ia tävevo to na aveave i roto i te mätahiti âpï ta tätou e fatata nei te ìriti i to na ùputa, e maha tumu, Te Hau, Te Ora, Te Hanahana, Te Òaòa. Naò ia  tätou i te parauraa e teie te Ao hinaarohia nei no tätou i roto i teie mätahiti 2021. E vaiiho rä ia tätou ia ärataìhia e na parau ôrapa e maha nei, o ta na e heheu mai nei ia tätou ia riro tätou èi rima faatupu i to na mau hinaaro i te fenua nei no te hanahana o to na iòa.

 

Ia ora na i te mätahiti âpï tivira.

 

Teraì òr. Faatura.

Culte de l'Eglise Protestante Mäòhi

Ruta èv 2.22-40 ÈPARAA TAMARII.

 

Tāpati 27 no Titema 2020.

ÈPARAA TAMARII.

Taramo 105

(Ìr. 1-15; hiò Parareipomeno 16.8-22)

1 E ârue i te Fatu, e tiàoro i to na iòa, e faaìte i ta na i rave i rotopü i te taata atoà ra. 2 E himene ia na, e himene ia na mä te taramo e paraparau faahou i te mau òhipa taa ê na na ra.3 E fänaò òutou o to na ra taata i to na ra iòa moà, ia òaòa te âau o te feiä i ìmi i te Fatu ra.4 E ìmi i te Fatu, e to na ra püai, e ìmi tämau i to na mata.5 E tämau ä i te manaò i te òhipa taa ê na na ra, ta na òhipa taa ê, e te utuà no roto i to na ra vaha; 6 e te mau huaai o ta na tävini ra, o Âperahäma; e te mau tamarii a Iatöpa hinaarohia e ana ra 7 O ia to tätou Atua, o te Fatu, ua ìteä ta na parau au i te fenua atoà ra. 8 E tämau o ia i to na manaò i ta na ra faufaa, i te parau ta na i tuu mai e tautani noa atu i te uì ra: 9 te faufaa ta na i fäfau ia Âperahäma; e te tapu ta na i tapu ia Ìtaata ra; 10 ta na i haamau ia Iatöpa, ei ture; e ia Ìteraèra, ei faufaa vaiiho tämau; 11 a nä ô ai ra e: E horoà atu vau i te fenua ra o Tanaana ia òe, ei tufaa na òutou, ei terero.12 I to rätou ïtiraa ra, aore reà ia taiò ra, te varavara ra, e te taata èê hoì i reira. 13 To rätou haereraa ra mai te tahi mataèinaa e tae atu ra i te tahi mataèinaa, e mai te tahi pätireia e tae atu ra i te tahi pae taata ê; 14 aore o ia i horoà noa atu ia rätou ia hämani-ìno-hia e te taata ra; e e hui-arii hoì tei aòhia mai e ana ia rätou. 15 nä ô mai ra: Eiaha e tiàià noa atu i tei faatähinuhia e au ra, e eiaha e hämani ìno i ta ù ra mau perofeta. 16 Ia na i hopoi mai i te oè i nià i te fenua ra, e ua faaòre atu ra i te mau mäa atoà ra. 17 Ua tono-ê-hia na te hoê taata i mua ia rätou i Àifiti o Iotëfa, ua hoohia ia ei tävini. 18 I mäuiui to na âvae i te täpeà, ua mau hoì o ia i te âuri; 19 e tupu aè ra ta na parau i faaìte-ätea-hia mai ra e ua tämatahia o ia i te parau a te Fatu. 20 Ua tono aè ra te arii i te veà e tätara ia na, te tävana o te mau taata ra, tei tuu ia na. 21 Ua faariro atu ra o ia ia na ei raatira i to na ra ùtuafare, e ei ia na anaè ra te parau i ta na atoà ra mau taoà, 22 ia täpeà o ia i to na ra hui-arii ia hinaaro ra, e ia haapii i ta na feiä moimoi i te parau paari. 23 Reva atu ra Ìteraèra i Àifiti, e ua pärahi Iatöpa i te fenua o Hama ra. 24 I reira te Atua i te faarahi-roa-raa i to na taata, e püai atu ra rätou i to rätou mau ènemi. 25 Tïoi atu ra to rätou âau i te ririraa i to na ra mau taata, e i te haavare i to na mau tävini. 26 Ua tono aè ra o ia i ta na tävini ia Möte, e ia Àarona i mäìtihia e ana. 27 Na räua i faaìte i ta na mau täpaò i roto ia rätou, e ta na mau räveà taa ê i te fenua o Hama ra. 28 Ua tuu atu ra o ia i te pöuri, e mahora aè ra i nià ia rätou; e aore rätou i märô noa mai i ta na parau. 29 Ua faariro o ia i ta rätou mau pape ei toto, e pau iho ra ta rätou mau ià i te pohe. 30 Î roa aè ra to rätou fenua i te rana, e roto roa i te mau piha o te hui-arii ra. 31 Ua faaue aè ra o ia, e ua haere mai ra te popoti, e te ùtu e àti aè ra to rätou fenua. 32 Ua faariro aè ra o ia i ta rätou ua ei ua-paari, e te ànaparaa uira e àti noa aè to rätou fenua. 33 Ua täìri atu ra i ta rätou mau vine e te mau tute, e ua ôfati aè ra i te mau räau o to rätou ra fenua. 34 Ua parau o ia e ua haere mai ra te àrape, e te hë, eita e hope ia taiò; 35 o tei àmu pau roa i te mau räau rii o to rätou ra fenua, e pau roa aè ra te mau mäa atoà io rätou ra.36 Ua täìri hoì o ia i te mau mätahiapo o to rätou fenua, te mätamehaì o to rätou ra püai. 37 Ua arataì mai o ia i to na ra mau taata mä te ârio e te àuro; e aore roa te hoê i paruparu i to rätou atoà ra mau ôpü. 38 Ua òaòa hoì Àifiti i to rätou revaraa, ua roohia hoì rätou i te mataù ia rätou. 39 Ua hohora o ia i te hoê ata ei tämarü ia rätou e te hoê auahi ei haamäramarama ia rätou i te pö.40 Ua ani mai rätou, e ua hopoi mai o ia i te taru, e ua paìa rätou ia na i te mäa o te raì.41 Ua vähi o ia i te mato, e ua manii mai ra te pape, e ua tahe haere noa atu ra nä te mau vähi marô atoà ra.42 Te manaò ra hoì o ia i ta na parau moà, i parauhia e ana i ta na tävini ia Âperahäma: 43 i arataì mai ai o ia i to na taata mä te òaòa, e tei mäìtihia e ana mä te himene ûmere ra. 44 Ua horoà mai ra o ia i te mau fenua o te mau êtene no rätou, e ua riro mai ra ia rätou ta te mau taata ra i òhipa; 45 ia haapaò rätou i ta na ra mau peu, e ia faaroo i ta na mau ture. Hareruia.

Tenete 15.1-6

Te fafauraa faufaa a te Atua ia Âperäma

1 E muri aè i te reira, o te reo mai ra o te Fatu ia Âperäma i te ôrama ra, i te nä-ô-raa mai e, Eiaha e mataù e Âperäma, o vau to òe päruru; e ta òe utuà rahi roa. 2 Ua parau atu ra Âperäma, E te Fatu, e te Fatu, e aha ta òe e hö mai no ù, teie hoì au a pohe ma te tamarii òre, e te tiàau no to ù nei ùtuafare, o Erietera nei ia no Tämäteto ra. 3 E ua nä ô atu ra Âperäma, Inaha hoì au, aita o ù e huaai hö-mai-hia mai e òe, e inaha, e riro te hoê tamaiti i fänau i to ù nei ùtuafare ei taata âià no ù. 4 E inaha, o te reo mai ra o te Fatu ia na, nä ô mai ra, E òre teie taata e riro ei taata âià no òe, e riro rä te hoê taata no roto i to òe iho ôpü ei taata âià no òe. 5 Ua arataì aè ra o ia ia na i te vähi ätea, nä ô mai ra, A hiò na to mata i nià i te raì, a taiò na i te mau fetià, i te tiàraa ia òe ia taiò. E ua nä ô mai ra o ia ia na, Oia atoà to òe na huaai. 6 Ua faaroo atu ra Âperäma i te Fatu; e ua faariro atu ra o ia i te reira ei parau-tià na na.

Tenete 21.1-3

Te fänauraa o Itaata: o Hätara räua o Itemaèra i te tono-ê-raa-hia.

1 Ua haere mai ra te Fatu ia Tara i ta na i parau mai ra; e ua faatupu te Fatu i ta na i faaìte mai ia Tara ra. 2 Ua tö iho ra hoì Tara, e e tamaiti ta na i fänau na Âperahäma i to na ruhiruhiäraa ra, i te tau ta te Atua i faaìte mai ia na ra. 3 Maìri iho ra Âperahäma i te iòa o ta na tamaiti i fänau ra, (ta Tara i fänau na na ra,) o Itaata.

Hëpera 11.8-19

8 No te faaroo i haapaò ai Âperahäma, a parauhia mai ai o ia e, e haere i te hoê vähi e noaa mai ia na a muri atu ei âià; e haere atu ra o ia mä te ìte òre i taua fenua i haerehia e ana ra. 9 No te faaroo i purutia noa ai o ia i taua fenua i parauhia mai ra, mai te mea e, e fenua ê ra; i te pärahi-noa-raa i roto i te tiàhapa ra, rätou atoà o Ìtaata, e o Iatöpa; o nä taata âià atoà ia e o ia atoà i tei parauhia mai ra. 10 Te tïtau ra hoì o ia i taua ôire niu mau ra, o te Atua te faaau e te faatià ra. 11 No te faaroo atoà i noaa ai ia Tara iho te maitaì i tö ai ra, e fänau mai ra ta na tamaiti, hope noa ai to na tau mau ra, no te mea i manaò o ia e e parau mau ta na ta tei parau mai ra. 12 I fänau mai ai ta te taata hoê ra, e mai te taata pohe hoì te huru, mai te fetià o te raì ra te rahi, e mai te one tähatai eita e hope ia tataù ra. 13 I pohe anaè atu ra taua feiä ra mä te faaroo, aita i noaa tei parauhia mai ra, ua hiò rä rätou i taua mau mea ra i te ätea ê, e ua faaroo päpü e ua färii mäite, e ua fäì hua e, e taata èê rätou e te purutia i teie nei ao. 14 O te feiä hoì i nä reira mai, ua faaìte hua ia e, te ìmi ra rätou i te fenua mau. 15 Ahiri hoì rätou i nounou i taua fenua no reira mai rätou ra, e tià noa ia ia rätou ia hoì. 16 Ua hinaaro rä rätou i te fenua maitaì roa ra, oia hoì te ao ra: i òre ai te Atua i haamä ai ia rätou ia parauhia o ia e e Atua no rätou; ua haapaò hoì o ia i te hoê ôire no rätou. 17 No te faaroo i püpü ai Âperahäma ia Ìtaata, a tämatahia ai o ia ra; e te taata i noaa ia na te parau i parauhia mai ra, ua püpü ia i ta na tamaiti fänau tahi, 18 no na te parau i parauhia ra e: Ei ia Ìtaata to òe ra huaai e noaa ai. 19 I parau hoì o ia e, e tià i te Atua ia faatià faahou mai ia na mai te pohe mai ra; e mai te mea hoì e mai te pohe mai ra te noaa-faahou-raa ia na.

Ruta èv 2.22-40

Te faaìte-raa-hia o Ietu i roto i te hiero

22 E hope aè ra o na puè mahana tämäraa i haapaòhia i te ture a Möte ra, hopoi atu ra rätou ia na i Ierutarëma e püpü atu i te aro o te Fatu ra. 23 Mai tei päpaìhia hoì i te ture a te Fatu ra e: O te mau tamaroa mätahiapo atoà a te metua vahine ra, ua moà ia no te Fatu. 24 E e hopoi atu hoì i te tütia mai tei parauhia i te ture a te Fatu ra: E piti ûupa, e aore ra, e piti ûuàiraò fanauà. 25 E inaha, tei Ierutarëma te hoê taata o Timeona te iòa, e taata parau tià e te haapaò maitaì, te tiaì ra i te haamähanahana no Ìteraèra, e tei ia na te Värua Maitaì. 26 E i faaìtehia mai o ia e te Värua Maitaì e eita o ia e pohe vave ia ìte rä o ia i te Metia o te Fatu ra. 27 E i ärataìhia o ia e te Värua i roto i te hiero; te hopoi mai ra nä metua i te tamaiti ra ia Ietu i roto, e rave i ta te ture ra ia na, 28 ua rave atu ra o ia ia na, ua hii iho ra, haamaitaì atu ra i te Atua, nä ô atu ra: 29 E te Fatu, e tuu òe i to tävini i teie nei mä te hau, ua au hoì i ta òe parau. 30 Ua ìte aè nei hoì ta ù mata i te Ora na òe, 31 i haapaòhia e òe i mua i te mata o te taata atoà nei; 32 e tiàrama ei haamäramarama i te Ètene, e ei hanahana no to òe ra taata no Ìteraèra.

Te tohu a Timeona

33 Mäere iho ra Iotëfa e te metua vahine o Ietu i taua mau parau i parauhia e ana ra. 34 Ua faaora atu ra Timeona ia räua, nä ô atu ra i te metua vahine ia Märia: Inaha, ua haapaòhia teie nei tamaiti ia hià to Ìteraèra e rave rahi e ia tiàfaahou mai to Ìteraèra e rave rahi; ei täpaò e märöhia 35 e e putapupü atoà to òe iho âau mai te puta hoto ra, ia ìteä te manaò no te âau taata e rave rahi.

Te perofeta vahine ra o Àna

36 E te hoê perofeta vahine ra o Àna, e tamahine na Fänuera, no te ôpü o Àtera. Ua ruhiruhiä o ia, e hitu o na mätahiti i te taòtoraa i te täne, ta na i faaipoipo i te pötiiraa ra: 37 ua ìvi ra o ia a varu aè ra àhururaa o na mätahiti e maha tiàhapa, aore roa o ia i faaruè i te hiero, e tià rä i te haamoriraa i te Atua mä te pure e te haapaeraa mäa i te ruì e te ao. 38 E o ia i tomo mai i roto i reira ra, haamaitaì atoà atu ra i te Fatu, e ua parau iho ra ia na i te feiä atoà i haapapa i te ora i Ierutarëma ra.

Te hoìraa i Nätareta

39 E oti aè ra ia räua tei parauhia mai i roto i te ture a te Fatu ra, hoì atu ra räua i Tarirea i to räua iho ôire mau i Nätareta. 40 Tupu atu ra taua tamaiti ra, e itoito atu ra te âau, î aè ra hoì i te paari, e te vai ra te maitaì a te Atua i nià ia na.

 

Manaò.

To tätou taiòraa i te mau parau i haapaòhia no teie mahana haamoriraa na tätou, te ìte nei tätou i to te Atua Nui Tumu Tahi ärataìraa i to na mau tävini i roto i ta na mau faanahoraa e au no te faatupu i to na mau hinaaro i te taata ia tiàturi i to na aroha e te to na here. Te tono nei te Atua i to na tävini no te faaineine i te hoê vahi e färii ai i to na nünaa ta na i mäìti, te faahiò nei te nehenehe o te mau fetià, te faaìte i te nehenehe o te one tähatai, te haapäpü noa mai ra te Atua i to na òaòa i te taata. Eiaha ra ia moèhia ia tätou e tei roto noa ä tätou i teie maì e haaviivii noa ra to tätou oraraa i Mäòhi Nui nei, e faataupupü nei te mau faanahoraa no te oraraa vaamataèinaa, e te vahi òhiparaa a te nünaa, ua topa roa te tahi mau ùtuafare i roto i te ère. E taime tano teie no tätou ia pärahi e ia taiò teie mau parau i faataahia no teie mahana haamoriraa i tei mua atoà te reira ia tätou, èi parau faaitoitoraa ia tätou teie to na haapotoraa.     

-Taramo 105, 43 i arataì mai ai o ia i to na taata mä te òaòa, e tei mäìtihia e ana mä te himene ûmere ra.

-Tenete 15, 5 Ua arataì aè ra o ia ia na i te vähi ätea, nä ô mai ra, A hiò na to mata i nià i te raì, a taiò na i te mau fetià, i te tiàraa ia òe ia taiò. E ua nä ô mai ra o ia ia na, Oia atoà to òe na huaai.

-Hepera 11, 16 Ua hinaaro rä rätou i te fenua maitaì roa ra, oia hoì te ao ra: i òre ai te Atua i haamä ai ia rätou ia parauhia o ia e e Atua no rätou; ua haapaò hoì o ia i te hoê ôire no rätou.

-Ruta èv 2, 40 Tupu atu ra taua tamaiti ra, e itoito atu ra te âau, î aè ra hoì i te paari, e te vai ra te maitaì a te Atua i nià ia na.

E parau tiàma ta tätou e färerei nei i teie mahana, na tätou iho e faatumu i to tätou manaò, teie ra te tahi mau manaò turu i ta tätou parau.

I roto i ta tätou taiòraa, te parau faufaa tei hiòhia mai e te manaò, o teie na färereiraa i roto pü i te ùtuafare o Ietu e teie na taata paari. Te taata mätamua o Timeona to na iòa, e taata parautià e te haapaò maitaì. E taata teie, i roto i te tiaìraa i te Faaora o te mau nunaa ätoà. Tei reira ta na manaònaòraa i roto i to na oraraa, ua vai noa tera manaò i roto ia na oia hoì ia ìte ia Ietu hou a pohe ätu ai. E tiaìraa mäoro tei ravehia e Timeona, e te tuutuu òre i to na parahiraa i roto i te fare o te Atua i te mau mahana ätoà no to na oraraa. Ia tae ra i te mahana e tià ai e hopoi i teie àiü i mua i te aro o te Atua ei haamaitaìraa, e tupu teie òhipa i te vaù no te mahana i muri äè te fänauraa. E faanahoraa teie na te âti-Iüta i te peritome i te mau tamarii tamaroa e ôroà tumu teie, e òaòaraa ätoà na na metua. E i roto i teie ôroà to Timeona ìteraa i teie àiü ta na i tiaì mäoro. Te vai àiü noa ra o Ietu, ua faatura teie taata paari ia na. Ua ìte ätoà teie taata paari e o Ietu teie te Tamaiti a te Atua. Te päpü ra ia tätou i te rahi o te òaòa o teie taata. Te òhipa o ta na i tiaì noa na, te ìte ra o ia i teie nei. Ia haamaitaìhia te Atua no te reira. A hio na tätou i te mau parau a teie taata paari i parau no Ietu.

-Te ora no te mau taata ätoà (ir 30-31).

-E tiàrama no te mau ètene, e no Ìteraèra (ir 32).

Te färereiraa i roto pü ia Àna e te ùtuafare o Ietu, e mea taaê rii. Aita e parau ta Ana i parau no Ietu. Te vahi noa ta te päpaì èvaneria Ruta e faaìte ra e perofeta o ia, e vahine tei haere pinepine i te hiero, e tei tämau i te pure e te haapaeraa maa i te ruì e te ao.

Teie na färereiraa, ua tupu ia i roto i te hiero no Ierutarëma. Ua haere o na metua i Ierutarëma no te pupu ia Ietu i mua i te aro o te Atua. E ua  tupu teie òhipa i roto i te hiero, o te tumu ia, i färerei ai rätou, Ua tano te haereraa o te ùtuafare o Ietu i te hiero e teie na taata paari. Ia haamaitaìhia te Atua tei faatupu i teie na färereiraa. E teie tau taata paari tei pärahi noa i roto i te tiaìraa e ia ìte i te Faaora o teie nei ao hou to raua poheraa. Ua faufaahia to raua tiaìraa, ua ìte raua ia Ietu.

No teie färereiraa, o Ruta èvaneria noa tei faatià i teie parau. Ua maìti o ia i te hiero o Ierutarëma ei pü no teie färereiraa. I roto i te oraraa o Ietu, ua riro te hiero no Ierutarëma ei vahi e haere pinepinehia e Ietu. Aita te hiero o Ierutarëma i riro noa ei vahi maitaì no Ietu. I roto i ta tätou taiòraa, ua riro teie vahi ei vahi färereiraa na Ietu i te Atua to na Metua, e ei vahi färereiraa i teie na taata paari. Te riro ätoà teie na taata paari ei ìte mätamua no Ietu. Na te mau parau a Timeona i parau no Ietu e haapäpü mai ia tätou i te rahi e te hohonu o te faaroo o teie taata, ei pure haamauruüruraa na na i te Atua, tei färii e haamäoro i to na pue mahana i te ao nei no te ìte ia Ietu.

O Timeona e o Àna e hohoà te reira no te mau tävini tei pärahi noa i roto i te faaòromaì, tei horoà päpü ia raua no te maitaì o te òhipa a te Atua. Aita raua i ìte i te mau òhipa ta Ietu i rave, oia hoì ta na mau òhipa faaora maì e ta na mau haapiiraa, i te reira vahi ra ua tuàti noa ia tätou. Ua mauruüru noa raua i te ìteraa ia Ietu àiü. Te haapii nei ra teie taiòraa i te faufaa e vai ra i roto i te färereiraa te feiä paari i te tamarii. Mai te tamarii e hiaai ra i te feia paari oia ätoà te feia paari i te tamarii. Ia tuàti maitaì raua e tià ai, e tià ätoà ia tätou ia parau, e ua ora o Timeona e o Àna i to raua faaroo i te ìte-noa-raa ia Ietu àiü. E ora ätoà tätou i to tätou faaroo.

I roto i te hioraa o ta tätou parau e tià ia parauhia e, e parau âpï òaòa teie e färereihia nei e tätou. Èi haapäpüraa no te taeraa mai te  tumu o te ora, tei hiihia e te taata i nià i ta na ôuma no te taata faaroo. E i roto i te ôroà no te peritomeraa, oia hoì tei parauhia te ôroà no te tämaraa, i te ìteraahia te faufaa ta te Atua i horoà mai i te ao nei. I reira te àti-Ìteraèra e ìte ai te hanahana o te Atua i te pouraa mai. I reira ätoà te hui-arii e tuu ai i to rätou mau turi i raro, no te faaìteraa e, teie te Arii tei rahi äè i te mau arii ätoà. Ua himenehia teie parau e te mau tamarii a Tora, ia au te faaìteraa a te Taramo 48. Inaha ua àmui te hui-arii, ua haere ätoà hoì rätou e rave. O te Atua nei ä hoì to mätou Atua e àmuri noa ätu, e ärataì tämau ä hoi O ia ia mätou e tae noa ätu i te pohe ra. E riro ätoà te parau no te taeraa mai o te Ora, ei faahiti mähutaraa i te taata taua tau ra, oia hoì te Färaa mai o te Tamaiti a te Atua.

Te òhipa i ravehia e Timeona e o Àna, o te òhipa ätoà ia i ravehia e to tätou mau hui tupuna i mua ra, tei parauhia te ÈPARAA TAMARII. E tupu teie faanahoraa no te mau tamarii mätahiapo tamaroa änaè, aita to te mau tamarii tamahine mätahiapo. Te taime te tö ra te metua vahine, e faaineine te feiä paari o te ùtuafare i te àhu no te püòhu i teie àiü, tei parauhia te PARIA o ta tätou e parau ra i teie mahana te tapa.

Te òhipa ia  ta Timeona i rave te taime o ia à hii ai ia Ietu àiü i roto ia na, to na auraa te èpa nei o ia i teie àiü i roto i to na âau. E na metua tane paari roa i roto i te fetii e rave i teie òhipa, e ma ta paraparau i nià iho. E ta Timeona mau parau no Ietu i nià i te metua vahine teie ia, inaha ua haapaòhia teie nei tamaiti ia hià to Ìteraèra e rave rahi e ia tià faahou to Ìteraèra e rave rahi ei täpaò e märöhia, e, e putapü ätoà to òe iho âau mai te puta hoto ra ia ìteä te manaò no te âau taata e rave rahi.

O teie te parau faaitoito a Timeona ia Ietu àiü, o tei parauhia e te reo o te paari, o ta na ätoà ia e faaitoito ra ia tätou i teie mahana, èi ia èpahia tätou i te Èvaneria ora a te Atua.

 

Ia ora na, ia maitaì tätou i teie ôroà Fänau, e te mätahiti âpï tivira.

 

Teraì òr. Faatura.



 

 

Mahana pae 25 no Titema 2020.

ÔROÀ FĀNAU

Ôuma

Mau taiòraa.

Taramo 98

1 Taramo. E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na.2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra.3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua.4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu.7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

Ìtaia 52.7-10

7 Te nehenehe o te âvae o te veà i nià i te mouà, o tei hopoi mai i te parau maitaì ra, o tei faaìte hua mai i te parau hau ra, o tei hopoi mai i te parau òaòa e te maitaì ra, o tei faaìte hua mai i te ora ra, o tei parau mai ia Tiona, Tei to Atua ra te hau ; 8 E faateitei to mau faèhau i to rätou reo; e ûmere päatoà noa atu to rätou reo; e hiò hoì rätou, te mata e te mata, i to te Fatu faahoìraa mai ia Tiona. 9 Ia püroro noa atu te òaòa; ia ûmere päatoà, e te mau vähi pararï i Ierutarëma, ua haamähanahana hoì te Fatu i to na taata; ua faaora oia ia Ierutarëma. 10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua.

Hepera 1.1-6

Te parauraa mai te Atua nä roto i ta na Tamaiti 1 O te Atua, o tei parau riirii mai i mütaa iho, e rave rahi te huru o te parauraa mai i te feiä tupuna i te mau perofeta, 2 o tei parau mai ia ia tätou i teie nei ànotau hopeà i te Tamaiti, o tei haapaòhia e ana ei Fatu no te mau mea atoà nei, e ua hämani hoì o ia i nä ao atoà nei ia na. 3 O te ànaana hoì o ia o to na ra hanahana, e o te hohoà mau ia no na iho, e te mauraa hoì i te mau mea atoà nei i ta na ra parau mana, oti aè ra ta tätou hara i te tämähia e ana ia na iho ra, pärahi iho ra i raro i te rima àtau o te Mana i te vähi teitei ra.

Te Tamaiti tei hau i te mau merahi

4 E maitaì hau ê hoì to na i to te mau merahi, mai te iòa i noaa ia na i hau ê i te maitaì i to rätou ra. 5 O vai hoì to taua mau merahi ra ta te Atua i parau noa atu mai tahito mai ä e: O ta ù Tamaiti òe, i naùanei òe i fänauhia ai e au. E ta na hoì i nä ô ra e: «Ei Metua vau no na, e ei Tamaiti o ia na ù. 6 E ia na hoì i faahoì faahou mai i te mätahiapo i te ao nei, nä ô aè ra o ia: Ia haamori te mau merahi atoà a te Atua ia na.

Ioane 1.1-18

I VAI na te Roto i te mätamua ra, i te Atua ra hoì te Roto, e o te Atua hoì te Roto.

2 I te Atua ra hoi o ia i te mätamua ra.

3 Na na i hämani te mau mea atoà nei, aore roa e, e ère o ia i te hoê mea i hämanihia.

4 Tei roto ia na te ora, e taua ora ra to te taata ia märamarama.

5 I ànaana mai na te märamarama i te pöuri, aita rä te pöuri i färii atu.

6 I tonohia mai te hoê taata mai ô mai i te Atua ra, o Ioane te iòa.

7 I haere mai taua taata ra èi ìte, e faaìte i taua märamarama ra, ia faaroo te taata atoà ia na.

8 E ère rä o ia iho i taua märamarama ra, i haere mai rä e faaìte i taua märamarama ra.

9 O ia te märamarama mau, o te haamäramarama mai i te taata atoà i to na haereà mai i te ao nei.

10 I te ao nei o ia, e na na i hämani teie nei ao ; e àita to te ao i ìte atu ia na.

11 I haere mai nei o ia i ó na iho ra, e aore to na iho ra taata i ìte atu ia na.

12 Te feiä atoà rä i ìte atu ia na i te faarooraa i to na ra iòa, hömai ra o ia i te mana ra ia rätou èi tamarii na te Atua.

13 Te feiä e ère i to te toto i fänau ai ra, e ère hoì i to te hinaaro o te tino, e ère hoì i to te hinaaro o te taata, no te Atua rä.

14 I riro mai nei te Roto èi taata e ua tià hapa mai i ó tätou nei, (e ua ìte mätou i to na hanahana, mai te hanahana e au i te Tamaiti fänau tahi a te Metua ra,) ua î i te maitaì e te parau mau.

15 No na ta Ioane i faaìte mai, ia na i pii ra, i te naòraa e, O ia teie ta ù i parau ra e, O te haere mai i muri iho ia ù nei, ua riro ia i mua ia ù, o mua ä hoì o ia ia ù.

16 Ua noaa ia tätou atoà nei te maitaì e au atoà i to na ra maitaì, no to na ra î.

17 Na Mote hoì i tuu mai i te ture, areà te maitaì e te parau mau, na Ietu Metia ia.

18 Aore e taata i ìte i te Atua ; o te Tamaiti fänau tahi ra i nià i te ôuma o te Metua ra, o ia te faaìte mai ia na.

Manaò.

Te haamanaò nei tätou i te ôroà fänau no te Tämaïti a te Atua, ia au te mau taiòraa i faanahohia no teie mahana, tei faaìte i te huru tupuraa no te tau ta tätou e ora nei i te âpeeraa a te rähu. I te mea te rähu o to tätou ia ärataì i te mau taime atoà o to tätou oraraa, tei pärahi fatata noa i pïhaìiho i to tätou haereà i te  fenua nei. E i ta te fenua tautururaa i fänaò ai tätou i to na mau maitaì atoà tei höroà ia tätou i te puai e te itoito i te ora a te Atua Nui Tumu Tahi. Ta te mau taiòraa ia e faaìtehia nei ia tätou, teie te haapotoraa.

-Taramo 98, 8 Ia paìpaì te mau pape i to rätou rima, e ia ûmere tahi te mau mouà atoà,

-Ìtaia 52. 10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua.

-Hepera 1, 5 O ta ù Tamaiti òe, i naùanei òe i fänauhia ai e au. E ta na hoì i nä ô ra e: Ei Metua vau no na, e ei Tamaiti o ia na ù.

-Ioane 1, 18 Aore e taata i ìte i te Atua ; o te Tamaiti fänau tahi ra i nià i te ôuma o te Metua ra, o ia te faaìte mai ia na.

Tätararaa.

Te parau tei haamanaòhia èi faaitoitoraa na tätou, I teie faahanahanaraa na tätou i te Tämaïti a te Atua ta na i faafänau mai roto mai i te taata tei te ìrava 18 ia tei naò mai e, 18 Aore e taata i ìte i te Atua; o te Tamaiti fänau tahi ra i nià i te ôuma o te Metua ra, o ia te faaìte mai ia na.

Ia ora na tätou atoà I teie mahana haamanaòraa na tätou i te fänauraa o Ietu Metia, to tätou Fatu, e to tätou Faaora

I mua i teie mau reo faateniteni, teie mau reo ârue i te parau no te Tämaïti a te Atua ta tätou e faahanahana nei na roto i teie ôroà Fänau, te hiti rä te tahi mau manaò faufaa roa o te tià roa ia tätou ia feruri e ia haapaò.

Te manaò mätamua, tei nià ia i te ìteraa e, aita te ôpuaraa ora a te Atua i täòtiàhia i roto noa i te hoê ärea tau e i te tahi noa vahi. Èita atoà e roaa ia tätou ia ôpanipani i te òhipa faaoraraa a te Atua i roto i te hoê noa mahana, mä te parau e, i teie ôroà haamanaòraa i to te Fatu te Metia fänauraa, e tano ai tätou e parau, I aroha mai te Atua i to te ao e ua tae roa i te tono mai i ta na Tämaïti fänau tahi ia òre ia pohe ia na te faaroo, ia noaa ra ia tätou te ora mure òre,  e o ta tätou ia e faahanahana nei i teie mahana.

Mai te tau o te mau hui tupuna mai ä to te Atua faaìteraa i to na Aroha e to na here i te taata e te rahuraa. I te mau vahi atoà, i te mau mahana atoà, i te mau taime atoà e i te mau tau atoà, to te Atua òhipa-noa-raa no te ärataì, no te päruru, no te faaora i te taata. Aita e òtià to te aroha e te here o te Atua, ia au te faaìteraa a Ioane, I vai na O ia i te mätamua, e vai ä O ia e tae noa atu i te hopeà, O ia te Matamehaì e te Faahopeà no te mau mea atoà, e no te mau taata atoà.

No reira, i mua i teie manaò mätamua ta tätou i hiò mai, mai te peu e, te faahanahana nei tätou i te parau no te Fänauraa o te Tamaïti a te Atua, tei hopoi mai te hau e te ora i te taata e te rahuraa, eiaha ia ta tätou faahanahanaraa ia faaroohia i teie noa mahana, ia parauhia rä, ia faaìtehia rä te reira ânanahi, I te mau mahana atoà e tae noa atu i to tätou hopeàraa. Ia tävevo ä te reo faateniteni e ia rahi atu ä te mau pehepehe, te mau reo himene o te Atua i roto i teie tau âpï ta tätou e fatata nei i te tomo.

Te piti o te manaò e tano e täpeà mai i mua i te ìrava tei manaòhia èi parau no tätou, 18 Aore e taata i ìte i te Atua ; o te Tamaiti fänau tahi ra i nià i te ôuma o te Metua ra, o ia te faaìte mai ia na.

O tätou e ìte nei, e mea taa-ê, e mea maere mau ta te Atua huru faaìteraaa na roto i to na tävini, i to na hanahana e to na aroha i te taata e te rahuraa. Ua tiaì e ua ìmi te taata, e te tiaì noa nei ä, te ìmi noa nei ä te taata i te Atua i te tahi vahi e i roto i te hoê huru ta na e manaò rä e, e tano te Atua i roto i te huru arii, te Fatu mana, te Atua puai, te Metua o te mau mea atoà. Àreà te Atua o Fänauraa, ua rave ia i te paruparu o te hoê àiü fänau âpï  no te òha mai to na aro, i nià i te taata tei tätarahapa e te rahuraa. Ua rave te Atua Manahope i te huru haehaa o te taata no te faaìte mai i te rahi o to na hanahana. Te ìte mai ra änei hoì, e aore ia te färii ra änei hoì te taata i te rahi no teie òhipa ta te Atua i faaineine no na.

No tätou I teie mahana, I roto I te mau faaineineraa rau ta tätou e faanaho nei, e aore ia, i roto i te mau faatianianiraa rarahi e âpapahia ra i mua i to tätou mau aro, e o te poro-haere-hia ra na roto i te mau räveà taaê o teie tau, te î nei to tätou mau mata e to tätou mau àpoo tarià i te mau reo faateniteni e faahanahana ra I te parau no te Noera e no te tau âpï ta tätou e fatata roa ra i te tomo atu. I mua i taua mau faatianianiraa rä, I rotopü i taua mau taoà ànaana rä e te maniania, te haamanaò mai ra ta tätou ìrava, 18 Aore e taata i ìte i te Atua ; o te Tamaiti fänau tahi ra i nià i te ôuma o te Metua ra, o ia te faaìte mai ia na.

E hinaaro rahi atoà to te Atua te farerei ia tätou, i te vahi tei reira tätou i te tätarahaparaa. Ua ôpua na e te ôpua noa nei ä te Atua i te faaora ia tätou i roto i te mau ârepurepuraa rau e âuahaaati noa ra ia tätou. E te vahi mäere e te taaê hoì i roto i te faanahoraa a te Atua, aita atu e räveà tä na i mäìti, mäoti rä, te haehaa e te märu, e faahohoàhia ra i roto i te parau no te hoê àiü fänau âpï. 

 

Maitaì tätou i teie ôroà fänau, e te mätahiti âpï tivira.

Terai òr. Faatura;