Mahana pae 25 no Titema 2020.

ÔROÀ FĀNAU

Ôuma

Mau taiòraa.

Taramo 98

1 Taramo. E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na.2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra.3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua.4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu.7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

Ìtaia 52.7-10

7 Te nehenehe o te âvae o te veà i nià i te mouà, o tei hopoi mai i te parau maitaì ra, o tei faaìte hua mai i te parau hau ra, o tei hopoi mai i te parau òaòa e te maitaì ra, o tei faaìte hua mai i te ora ra, o tei parau mai ia Tiona, Tei to Atua ra te hau ; 8 E faateitei to mau faèhau i to rätou reo; e ûmere päatoà noa atu to rätou reo; e hiò hoì rätou, te mata e te mata, i to te Fatu faahoìraa mai ia Tiona. 9 Ia püroro noa atu te òaòa; ia ûmere päatoà, e te mau vähi pararï i Ierutarëma, ua haamähanahana hoì te Fatu i to na taata; ua faaora oia ia Ierutarëma. 10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua.

Hepera 1.1-6

Te parauraa mai te Atua nä roto i ta na Tamaiti 1 O te Atua, o tei parau riirii mai i mütaa iho, e rave rahi te huru o te parauraa mai i te feiä tupuna i te mau perofeta, 2 o tei parau mai ia ia tätou i teie nei ànotau hopeà i te Tamaiti, o tei haapaòhia e ana ei Fatu no te mau mea atoà nei, e ua hämani hoì o ia i nä ao atoà nei ia na. 3 O te ànaana hoì o ia o to na ra hanahana, e o te hohoà mau ia no na iho, e te mauraa hoì i te mau mea atoà nei i ta na ra parau mana, oti aè ra ta tätou hara i te tämähia e ana ia na iho ra, pärahi iho ra i raro i te rima àtau o te Mana i te vähi teitei ra.

Te Tamaiti tei hau i te mau merahi

4 E maitaì hau ê hoì to na i to te mau merahi, mai te iòa i noaa ia na i hau ê i te maitaì i to rätou ra. 5 O vai hoì to taua mau merahi ra ta te Atua i parau noa atu mai tahito mai ä e: O ta ù Tamaiti òe, i naùanei òe i fänauhia ai e au. E ta na hoì i nä ô ra e: «Ei Metua vau no na, e ei Tamaiti o ia na ù. 6 E ia na hoì i faahoì faahou mai i te mätahiapo i te ao nei, nä ô aè ra o ia: Ia haamori te mau merahi atoà a te Atua ia na.

Ioane 1.1-18

I VAI na te Roto i te mätamua ra, i te Atua ra hoì te Roto, e o te Atua hoì te Roto.

2 I te Atua ra hoi o ia i te mätamua ra.

3 Na na i hämani te mau mea atoà nei, aore roa e, e ère o ia i te hoê mea i hämanihia.

4 Tei roto ia na te ora, e taua ora ra to te taata ia märamarama.

5 I ànaana mai na te märamarama i te pöuri, aita rä te pöuri i färii atu.

6 I tonohia mai te hoê taata mai ô mai i te Atua ra, o Ioane te iòa.

7 I haere mai taua taata ra èi ìte, e faaìte i taua märamarama ra, ia faaroo te taata atoà ia na.

8 E ère rä o ia iho i taua märamarama ra, i haere mai rä e faaìte i taua märamarama ra.

9 O ia te märamarama mau, o te haamäramarama mai i te taata atoà i to na haereà mai i te ao nei.

10 I te ao nei o ia, e na na i hämani teie nei ao ; e àita to te ao i ìte atu ia na.

11 I haere mai nei o ia i ó na iho ra, e aore to na iho ra taata i ìte atu ia na.

12 Te feiä atoà rä i ìte atu ia na i te faarooraa i to na ra iòa, hömai ra o ia i te mana ra ia rätou èi tamarii na te Atua.

13 Te feiä e ère i to te toto i fänau ai ra, e ère hoì i to te hinaaro o te tino, e ère hoì i to te hinaaro o te taata, no te Atua rä.

14 I riro mai nei te Roto èi taata e ua tià hapa mai i ó tätou nei, (e ua ìte mätou i to na hanahana, mai te hanahana e au i te Tamaiti fänau tahi a te Metua ra,) ua î i te maitaì e te parau mau.

15 No na ta Ioane i faaìte mai, ia na i pii ra, i te naòraa e, O ia teie ta ù i parau ra e, O te haere mai i muri iho ia ù nei, ua riro ia i mua ia ù, o mua ä hoì o ia ia ù.

16 Ua noaa ia tätou atoà nei te maitaì e au atoà i to na ra maitaì, no to na ra î.

17 Na Mote hoì i tuu mai i te ture, areà te maitaì e te parau mau, na Ietu Metia ia.

18 Aore e taata i ìte i te Atua ; o te Tamaiti fänau tahi ra i nià i te ôuma o te Metua ra, o ia te faaìte mai ia na.

Manaò.

Te haamanaò nei tätou i te ôroà fänau no te Tämaïti a te Atua, ia au te mau taiòraa i faanahohia no teie mahana, tei faaìte i te huru tupuraa no te tau ta tätou e ora nei i te âpeeraa a te rähu. I te mea te rähu o to tätou ia ärataì i te mau taime atoà o to tätou oraraa, tei pärahi fatata noa i pïhaìiho i to tätou haereà i te  fenua nei. E i ta te fenua tautururaa i fänaò ai tätou i to na mau maitaì atoà tei höroà ia tätou i te puai e te itoito i te ora a te Atua Nui Tumu Tahi. Ta te mau taiòraa ia e faaìtehia nei ia tätou, teie te haapotoraa.

-Taramo 98, 8 Ia paìpaì te mau pape i to rätou rima, e ia ûmere tahi te mau mouà atoà,

-Ìtaia 52. 10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua.

-Hepera 1, 5 O ta ù Tamaiti òe, i naùanei òe i fänauhia ai e au. E ta na hoì i nä ô ra e: Ei Metua vau no na, e ei Tamaiti o ia na ù.

-Ioane 1, 18 Aore e taata i ìte i te Atua ; o te Tamaiti fänau tahi ra i nià i te ôuma o te Metua ra, o ia te faaìte mai ia na.

Tätararaa.

Te parau tei haamanaòhia èi faaitoitoraa na tätou, I teie faahanahanaraa na tätou i te Tämaïti a te Atua ta na i faafänau mai roto mai i te taata tei te ìrava 18 ia tei naò mai e, 18 Aore e taata i ìte i te Atua; o te Tamaiti fänau tahi ra i nià i te ôuma o te Metua ra, o ia te faaìte mai ia na.

Ia ora na tätou atoà I teie mahana haamanaòraa na tätou i te fänauraa o Ietu Metia, to tätou Fatu, e to tätou Faaora

I mua i teie mau reo faateniteni, teie mau reo ârue i te parau no te Tämaïti a te Atua ta tätou e faahanahana nei na roto i teie ôroà Fänau, te hiti rä te tahi mau manaò faufaa roa o te tià roa ia tätou ia feruri e ia haapaò.

Te manaò mätamua, tei nià ia i te ìteraa e, aita te ôpuaraa ora a te Atua i täòtiàhia i roto noa i te hoê ärea tau e i te tahi noa vahi. Èita atoà e roaa ia tätou ia ôpanipani i te òhipa faaoraraa a te Atua i roto i te hoê noa mahana, mä te parau e, i teie ôroà haamanaòraa i to te Fatu te Metia fänauraa, e tano ai tätou e parau, I aroha mai te Atua i to te ao e ua tae roa i te tono mai i ta na Tämaïti fänau tahi ia òre ia pohe ia na te faaroo, ia noaa ra ia tätou te ora mure òre,  e o ta tätou ia e faahanahana nei i teie mahana.

Mai te tau o te mau hui tupuna mai ä to te Atua faaìteraa i to na Aroha e to na here i te taata e te rahuraa. I te mau vahi atoà, i te mau mahana atoà, i te mau taime atoà e i te mau tau atoà, to te Atua òhipa-noa-raa no te ärataì, no te päruru, no te faaora i te taata. Aita e òtià to te aroha e te here o te Atua, ia au te faaìteraa a Ioane, I vai na O ia i te mätamua, e vai ä O ia e tae noa atu i te hopeà, O ia te Matamehaì e te Faahopeà no te mau mea atoà, e no te mau taata atoà.

No reira, i mua i teie manaò mätamua ta tätou i hiò mai, mai te peu e, te faahanahana nei tätou i te parau no te Fänauraa o te Tamaïti a te Atua, tei hopoi mai te hau e te ora i te taata e te rahuraa, eiaha ia ta tätou faahanahanaraa ia faaroohia i teie noa mahana, ia parauhia rä, ia faaìtehia rä te reira ânanahi, I te mau mahana atoà e tae noa atu i to tätou hopeàraa. Ia tävevo ä te reo faateniteni e ia rahi atu ä te mau pehepehe, te mau reo himene o te Atua i roto i teie tau âpï ta tätou e fatata nei i te tomo.

Te piti o te manaò e tano e täpeà mai i mua i te ìrava tei manaòhia èi parau no tätou, 18 Aore e taata i ìte i te Atua ; o te Tamaiti fänau tahi ra i nià i te ôuma o te Metua ra, o ia te faaìte mai ia na.

O tätou e ìte nei, e mea taa-ê, e mea maere mau ta te Atua huru faaìteraaa na roto i to na tävini, i to na hanahana e to na aroha i te taata e te rahuraa. Ua tiaì e ua ìmi te taata, e te tiaì noa nei ä, te ìmi noa nei ä te taata i te Atua i te tahi vahi e i roto i te hoê huru ta na e manaò rä e, e tano te Atua i roto i te huru arii, te Fatu mana, te Atua puai, te Metua o te mau mea atoà. Àreà te Atua o Fänauraa, ua rave ia i te paruparu o te hoê àiü fänau âpï  no te òha mai to na aro, i nià i te taata tei tätarahapa e te rahuraa. Ua rave te Atua Manahope i te huru haehaa o te taata no te faaìte mai i te rahi o to na hanahana. Te ìte mai ra änei hoì, e aore ia te färii ra änei hoì te taata i te rahi no teie òhipa ta te Atua i faaineine no na.

No tätou I teie mahana, I roto I te mau faaineineraa rau ta tätou e faanaho nei, e aore ia, i roto i te mau faatianianiraa rarahi e âpapahia ra i mua i to tätou mau aro, e o te poro-haere-hia ra na roto i te mau räveà taaê o teie tau, te î nei to tätou mau mata e to tätou mau àpoo tarià i te mau reo faateniteni e faahanahana ra I te parau no te Noera e no te tau âpï ta tätou e fatata roa ra i te tomo atu. I mua i taua mau faatianianiraa rä, I rotopü i taua mau taoà ànaana rä e te maniania, te haamanaò mai ra ta tätou ìrava, 18 Aore e taata i ìte i te Atua ; o te Tamaiti fänau tahi ra i nià i te ôuma o te Metua ra, o ia te faaìte mai ia na.

E hinaaro rahi atoà to te Atua te farerei ia tätou, i te vahi tei reira tätou i te tätarahaparaa. Ua ôpua na e te ôpua noa nei ä te Atua i te faaora ia tätou i roto i te mau ârepurepuraa rau e âuahaaati noa ra ia tätou. E te vahi mäere e te taaê hoì i roto i te faanahoraa a te Atua, aita atu e räveà tä na i mäìti, mäoti rä, te haehaa e te märu, e faahohoàhia ra i roto i te parau no te hoê àiü fänau âpï. 

 

Maitaì tätou i teie ôroà fänau, e te mätahiti âpï tivira.

Terai òr. Faatura;