Tāpati 28 no Fëpuare 2021. Papa Haamori Tämau

 

Tāpati 28 no Fëpuare 2021.

Papa Haamori

Tämau

Färiiraa.

Na te parau a te Taramo e ärataì ia tätou i roto i to tätou haamoriraa i teie mahana, i te mea e pure teie e faaìte ra te puai o te faaroo i te faahitiraa a te taata Taramo. Teie ta na pure, e ta tätou atoà,

Taramo 116

1 E hinaaro rahi to ù i te Fatu, o tei faaroo mai i ta ù reo e i ta ù i ani atu. 2 No te mea ua färiu mai o ia i ta na tarià ia ù nei, e tiàoro ä vau ia na e mure noa atu to ù nei aho. 3 I haapunihia vau e te märei ra o te pohe; i haaàtihia vau e te ahoaho o häte; i roohia vau e te àti e te mäuiui. 4 Ua tiàoro iho ra vau i te iòa o te Fatu, te pure nei au ia òe: E te Fatu e, e faaora na òe i ta ù värua nei. 5 O te hämani maitaì e te parau tià ta te Fatu, oia ia, ua î to tätou Atua i te aroha. 6 E tiaì mai te Fatu i te feiä haavare òre; i tuu-haèhaa-hia vau, e ua faaora o ia ia ù. 7 E hoì, e ta ù värua, i to òe ra faaearaa, ua hämani maitaì mai te Fatu ia òe. 8 Ua faaora òe i ta ù värua i te pohe, e ta ù mata i te òto, e ta ù âvae ia òre ia hià. 9 E hahaere ä vau i mua i te Fatu i te fenua o te feiä e ora nei.10 Ua tiàturi au i te Fatu i parau ai au: Ua rahi roa iho nei to ù pohe 11 E ua parau hoì au i ta ù rüraa ra: E haavare anaè to te taata atoà nei 12 E aha rä ta ù ia hopoi atu na te Fatu, i te mau hämani maitaì no na ia ù nei? 13 E rave au i te âuà ora e hopoi i nià a tiàoro ai i te iòa o te Fatu. 14 E faatupu vau i ta ù i èuhe i te Fatu, i teie nei i mua i te aro o to na atoà ra mau taata. 15 E mea taoà i te aro o te Fatu te pohe o to na ra mau tävini moà. 16 Oia mau, e te Fatu, no te mea o vau to òe tävini, to tävini e te tamaiti a to tävini vahine Ua matara ia òe to ù nei mau täpeà. 17 E hopoi au i te tahi tütia haamaitaì ia òe, a tiàoro ai au i te iòa o te Fatu. 18 E faatupu vau i ta ù i èuhe i te Fatu, i teie nei i mua i te aro o to na atoà ra mau taata, 19 i roto i te mau àumoa i te fare o te Fatu ra, i rotopü ia òe, e Ierutarëma e. Hareruia.

Haamaitaì tätou i te Atua i te hoê reo himene,  e tià mai tätou.

 

Himene.

Pärahi tätou.

 

Faaroo mai ra tätou i te parau no to Âperahäma tämata-raa-hia e te Atua; to na faaroo i te höroàraa ia Itaata.

Tenete 22.1-18

1 E muri aè i te reira, ua tämata mai ra te Atua ia Âperahäma, nä ô mai ra ia na, E Âperahäma e. Ua nä ô atu ra o ia, Teie au. 2 Ua parau mai ra o ia, A rave i to tamaiti i tënä na, i to tamaiti hoê ra ia Itaata, ta òe e here na, a haere ai i te fenua ra o Moria, püpü mai ai ia na i reira ei tütia täauahi i nià i te hoê mouà na ù e faaìte atu ia òe. 3 Ua tià aè ra Âperahäma i nià i te poìpoì roa ra, tuu atu ra i te pärahiraa i nià i te âtini na na ra, papaì iho ra i te vahie no taua tütia täauahi ra, arataì atoà atu ra i e toopiti puè taata âpï no na ra, e ta na tamaiti atoà ia Itaata, haere atu ra i te vähi i ta te Atua i parau mai ia na ra. 4 E tae aè ra i te toru o te mahana ra, ua nana aè ra Âperahäma i ta na mata i nià, ìte atu ra i taua vähi ra tei te ätea ê. 5 Ua parau mai ra Âperahäma i nä taata âpï toopiti no na ra, E pärahi ôrua io nei, e te âtini; e haere mäua e te tamaiti nei io aè ra e haamori i te Atua; a hoì mai ai ia ôrua nei. 6 Ua rave iho ra Âperahäma i te vahie no taua tütia täauahi ra, ua tuu atu ra i nià i ta na tamaiti ia Itaata; ua rave iho ra i te auahi e te tipi i ta na rima; haere atu ra räua atoà. 7 Ua parau mai ra Itaata i ta na metua ia Âperahäma, na o mai ra, E ta ù metua. Ua nä ô atu ra o ia, Teie au, e ta ù tamaiti. Ua nä ô mai ra o ia, Inaha te auahi e te vahie: tei hea rä te pinia mämoe ei tütia täauahi ra? 8 Ua parau atu ra Âperahäma, E ta ù tamaiti, na te Atua iho e ìmi i te hoê pinia mämoe ei tütia täauahi. Haere noa atu ra räua atoà. 9 E tae atu ra räua i taua vähi i faaìtehia mai e te Atua ia na ra. Ua patu iho ra Âperahäma i te hoê fata i reira, e ua fata mäite iho ra i te vahie, ua ruuruu atu ra i te tamaiti ia Itaata, ua tuu atu ra ia na i nià i taua fata ra, i nià iho i te vahie ra. 10 Ua faatoro atu ra Âperahäma i ta na rima, ua rave atu ra i te tipi e täparahi i ta na tamaiti; 11 ua tiàoro mai ra te merahi a te Fatu i nià i te raì ia na ra, nä ô mai ra, E Âperahäma, e Âperahäma Ua parau atu ra o ia, Teie au. 12 Ua parau mai ra o ia, Eiaha to rima e rave noa atu i te tamaiti na, eiaha roa o ia e haùti-noa-hia atu e òe: ua ìte atu ra hoì au i teie nei, e e mataù to òe i te Atua, o òe aore i pipiri i to tamaiti, i to tamaiti hoê roa ra, ia ù. 13 Ua nänä aè ra to Âperahäma mata i nià, hiò atu ra, e inaha, e mämoe oni tei roto i te aru, ua fifi te tara; ua tii atu ra Âperahäma i taua mämoe oni ra, ua püpü atu ra ei tütia täauahi ei ono aè i taua tämaïti na na ra. 14 Maìri iho ra Âperahäma i te iòa i taua vähi ra, o te Fatu-Irae; o ia tei parauhia ra i teie nei e, Ei te mouà te Fatu e ìteä ai. 15 Ua tiàoro faahou mai ra te merahi a te Fatu i nià i te raì, o te piti ia òte piiraa mai ia Âperahäma, 16 nä ô mai ra, Te parau nei te Fatu, Ua tapu vau ia ù iho, no te mea ua nä reira mai òe, e aita aè nei òe i pipiri to tämaïti, i to tämaïti hoê roa ra; 17 e haamaitaì rahi roa vau ia òe na, e faarahi au i to huaai; mai te fetià o te raì ra, e mai te one tähatai ra: e e noaa te ùputa ôire o to rätou mau ènemi i to òe ra huaai; 18 e e maitaì te mau fenua atoà o te ao nei i to òe na huaai; o òe i faaroo mai i ta ù reo nei. Âmene.

 

Himene tätarahapa.

 

E aha rä ta ù ia hopoi atu na te Fatu, i te mau hämani maitaì no na ia ù nei.

Haamaitaì tätou no teie mau parau e tià ai.

 

Himene òaòa.

 

Teie te aroha o te Atua i te faaìteraa a Pauro ia tätou,

Röma 8.31-34

31 E nä hea hoì tätou i teie nei mau parau? No tätou te Atua ra, e tià ia vai ia märô mai? 32 O tei òre i faaherehere i ta na iho Tämaïti, o tei tuu noa mai rä ia na no tätou atoà nei, e aha hoì o ia e òre e horoà atoà mai ai i te mau mea atoà no tätou? 33 Nä vai e tuu mai i te pariraa i tei mäìtihia e te Atua ra? Na te Atua änei na tei faatià mai? 34 Nä vai e faahapa mai? Na te Metia änei na tei haapohe; e ua tiàfaahou aè nei i nià, e tei te rima àtau o te Atua ra, te tià ra ia tätou? Âmene.

Pärahi tätou.

Haamaitaì tätou i te Atua i te hoê reo himene.

 

Himene.

Pure.

Pure tätou i te Atua, i mua i te Parau Maitaì no ta Òe Tämaïti o ta mätou e taiò e e faaroo, höroà Òe ia mätou i te ìteraa te mau vahi i òre i naeàhia i to mätou marämarama i te mea parau faufaa roa teie e tupu nei i roto i te taiòraa i faataahia no mätou i teie mahana a tauturu mai ia mätou. Âmene.

 

Taiòraa

Märeto 9.2-10

Te faahuru-ê-raa-hia o Ietu

(Mät 17,1-13; Ruta èv 9,28-36; 2 Pët 1,17-18)

2 E ruì ono aè ra, ua arataì atu ra Ietu ia Pëtero, e ia Iatöpo, e ia Ioane, rätou anaè ra i nià iho i te hoê mouà teitei. E faahuru-ê-hia iho ra o ia i mua ia rätou. 3 Ànaàna roa aè ra to na àhu, e te teatea rahi mai te hiona ra, aore roa e tähupe àhu o te ao nei e noaa ai te teatea. 4 E ua fä mai ra hoì Èria räua o Möte, e te paraparau ra räua e o Ietu atoà hoì. 5 Ua parau mai ra Pëtero ia Ietu: E Rapi, e mea maitaì ia pärahi tätou i ô nei. E faatià mätou i te fare autä e toru aè, no òe e tahi, no Möte e tahi, no Èria e tahi. 6 Aore hoì o ia i ìte i ta na parau, e höriri rahi hoì to rätou. 7 E te hoê ata mai ra i te täpoìraa mai ia rätou, e te hoê reo mai ra hoì no roto i taua ata ra, nä ô mai ra: O ta ù Tamaiti here teie, a faaroo ia na 8 Ua nevaneva noa iho ra rätou i reira ra e aore roa e taata i ìteä ia rätou, maori rä o Ietu e o rätou iho hoì. 9 E tei to rätou pouraa mai mai nià mai i taua mouà ra, ua aò atu ra o ia ia rätou eiaha roa e faaìte noa atu i te hoê taata i ta rätou i ìte ra, e ia tià mai te Tämaïti a te taata mai te pohe mai ra. 10 Tämau mäite iho ra rätou i taua parau ra, e ua feruri iho ra rätou rätou iho, i te auraa i taua tiàfaahouraa mai te pohe mai ra.

Ia haamaitaì mai te Atua Nui Tumu Tahi i te parau i faaroohia e tätou.

Haamaitaì tätou i te Atua i te hoê reo himene e tià ai.

 

Himene.

Faaitoitoraa

Himene.

Parau faaära.

Himene püpüraa moni.

Pure Ärai.

E te Atua e, te tuu nei mätou i mua ia òe i to mätou parau, to mätou huru, to mätou oraraa täatoà, i roto ta òe Ètärëtia, e i roto teie nei paroita. Te faaìte noa mai ra ia mätou nä roto i te mau täpaò rahi no to òe mau maitaì, e aita mätou i riro ei mau àito no te hau. I mua to òe mau maitaì, eita e tià ia mätou ia faaätea ia mätou i räpae aè i ta òe i püpü ia mätou. Te ìte nei mätou, to mätou mau paruparu, to mätou òreraa e âmui faahou e to mätou mau taeaè, mau tuahine, ia hoê ta mätou haamoriraa ia òe e ta mätou pureraa ia òe i te mau taime atoà. Te pure nei mätou ia òe ia faaea roa, e ia faaòre roähia, te mau mea tià-òre o ta mätou e faatupu noa nei i roto ia mätou. Te mau peàpeà, te mau àti e haafifi nei te tupuraa o to òe hinaaro i nià iho i teie fenua, i roto i teie nei paroita. Aita atu e mea ta òe e tïtau nei ia mätou ia vai te HAU, ia ìteä te autaeaèraa e te HERE Metua no ô mai ia òe ra. No to mätou mau peàpeà fenua, tei riro atoà ei peàpeà tupuna, te mau peàpeà fëtii, te mau peàpeà poritita. Aita atu e mea e HAU ai mätou, ia faaâpï to òe here i te mau mea tahito i haafifi i ta mätou faaìteraa i ta òe parau, noaa ai ia mätou te ao âpï ta òe anaè e höroà nei ia mätou. A färii mai ia mätou i roto i te here o to Tämaïti, to mätou Fatu. Âmene.

Haamaitaì tätou i te Atua Nui Tumu Tahi hoê reo himene, e tià paatoà tätou.

 

Himene âmui.

 

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te parau faaitoitoraa

Faaitoitoraa.

12 E aha rä ta ù ia hopoi atu na te Fatu, i te mau hämani maitaì no na ia ù nei? 13 E rave au i te âuà ora e hopoi i nià a tiàoro ai i te iòa o te Fatu.

Haamaitaìraa.

17 e haamaitaì rahi roa vau ia òe na, e faarahi au i to huaai; mai te fetià o te raì ra, e mai te one tähatai ra: e e noaa te ùputa ôire o to rätou mau ènemi i to òe ra huaai; 18 e e maitaì te mau fenua atoà o te ao nei i to òe na huaai; o òe i faaroo mai i ta ù reo nei. Âmene.

 

Teraì òr. Faatura.