Māreto 7.31-37 Ia àmaha

 

Tāpati 5 no Tetepa 2021.

ÔROÀ

Ia àmaha

Taramo 146

Te Fatu

1 E haamaitaì i te Fatu A haamaitaì i te Fatu, e ta ù värua 2 E haamaitaì au i te Fatu, òi vai aè to ù ora; e himene au i ta ù Atua, òi vai aè au nei. 3 Eiaha e tiàturi i te hui-arii, e te taata atoà, aita hoì o na e ora. 4 Te reva nei hoì to na värua, te hoì nei o ia i to na ra repo, mou roa atu ra ta na i ôpua i taua mahana ra. 5 E ao to na tei te Atua o Iatöpa te tauturu ia na, e tei to na Atua, tei te Fatu to na tiàturiraa 6 O tei hämani i te mau raì e te fenua, te tai e te mau mea atoà i roto ra; o tei haapaò i te parau mau na na e a muri noa atu. 7 O tei faatià mai i te feiä i hämani-ìno-hia, e ua horoà mai i te mäa na tei poìa ra. O te Fatu tei tätara i tei täpeàhia ra, 8 o te Fatu tei faaàraàra i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau tià ra. 9 Te faaora nei te Fatu i te mau taata èê ra, te tauturu nei o ia i te ôtare e te vahine ìvi ra âreà te haereà o te paieti-òre ra, e huri-ê-hia ia. 10 E vai arii mai ä te Fatu e a muri noa atu. O to Atua, e Tiona, e tae noa atu i te mau uì atoà ra. Hareruia.

Ìtaia 35.4-7

Èi reira.

4 E parau atu òutou i te âau taiä, Ia itoito òutou; eiaha e mataù; inaha hoì to òutou Atua. E faaìtehia mai ä te riri; te tähoo a te Atua ra: o ia iho te haere hua mai e faaora ia òutou. 5 Ei reira e faaàraarahia ai te mata o te matapö ra, e àmaha hoì e te tarià o te feiä tarià turi ra: 6 ei reira te piriòì e ôuàuà noa ai mai te àiri, e himene mai hoì te vaha o te taata vävä ra: e pupü mai hoì te päpe na te mëtëpara, e te päpe tahe i te fenua marô ra. 7 E riro te one veàveà ra ei pape hopuna, e te repo marô ra ei päpe pihaa anaè: e ei te pärahiraa o te teni ra e tupu ai te âretu, e te âèho, e te tima ra.

Iatöpo 2.1-5

E paetahi

1 E a ù mau taeaè ra, eiaha òutou e mau i te parau a to tätou Fatu ra a Ietu Metia, te Fatu o te hanahana ra, mä te haapaò i te huru o te taata. 2 Ia haere mai hoì te hoê taata i roto i to òutou tunato, mä te täpeà àuro i te rima e te àhu ùnaùna ra; a tomo atoà mai ai te hoê taata taoà òre mä te àhu ìno ra: 3 ìte atu ra òutou i tei àhu i te àhu ùnaùna ra, e ua parau atu ra ia na e: «E pärahi òe i ô nei i te vähi maitaì», a parau atu ai i te taata taoà òre ra: «Tià noa atu òe i ô atu, e aore ia, e pärahi i ô nei i ta ù tïroaroaraa âvae nei». 4 Eere änei ua faahuru ê òutou, e ua riro ei feruri manaò ìno ra? 5 A faaroo mai na, e a ù mau taeaè here e: eere änei o te feiä taoà òre o teie nei ao ta te Atua i mäìti ei feiä taoà i te faaroo ra, e ei feiä âià i te Pätireia ta na i parau e horoà mai i te feiä e hinaaro ia na ra?

Māreto 7.31-37

Te turi-vävä

31 Faaruè iho ra o ia i te ôtià i Turia e Titona, hoì atu ra i te roto i Tarirea ra, nä roto i te fenua ra o Tetapori. 32 Ua arataì mai ra rätou i te hoê taata turi e te vävä ia na ra. Ua parau maitaì mai ra ia na ia tuu o ia i ta na rima i nià iho. 33 Ua rave atu ra Ietu ia na ôpapaì aè ra i te hiti, tuu atu ra i ta na rima i roto i to na tarià, ua tufa iho ra o ia i te huare, e ua faatiàià atu ra i to na arero. 34 Ua hiò atu ra i nià i te raì, òto iho ra, e ua nä ô atu ra ia na: «Êfäta o te faaauraa ra: «Ia àmaha » 35 Àmaha iho ra ta na tarià, matara aè ra to na arero, maitaì mai ra ta na parau i reira ra. 36 Ua aò atu ra o ia ia rätou, e eiaha roa rätou e faaìte i te taata, e ia rahi ta na aòraa atu ia rätou e eiaha, rahi roa atu ra ta rätou faaìte haere; 37 mäere roa atu ra rätou aita e fäito, e ua nä ô aè ra: «E mea tià roa te mau mea atoà ta na e rave nei. Te faaroo nei te turi e te parau nei te vävä ia na.

Manaò.

I teie tau hepohepo rahi ta tätou e faaruru nei, i te rave a teie maì e haaviivii nei i to tätou oraraa, ua pärahi tätou i roto i te mataù, te riàrià, te mehameha, ua ânoì te mau mea atoà i roto i te oraraa. Te tupu nei te mau uiuiraa e rave rau, te tupu nei te mau parau tei òre roa e tià ia faahitihia, no to tätou nei paruparu i te faaroo i te mau parau faaära, e aore ra no to tätou òreraa e haapaò. Ua peàpeà roà te tahi mau ùtuafare i te rave a teie maì e haaviivii nei i te vaamataèinaa, tei roto te tahi pae i te òto i to rätou tei faaruè-roa-mai i te ùtuafare. Te tahi pae no tätou tei roto i te mau ìmiraa raveà na roto i te mau hotu o te fenua, tei haafatata ia tätou i te parau tumu no te Fenua i parauhia ai to te Atua te Tumu Nui no te mea e tupu no roto i te papa o te fenua. Ua tae roa te tahi pae na roto i teie maì viivii e haùti i te tumu o te fenua e te hooraa i te parauraa e no te paruru i te huiraatira, e te hooraa fenua e noaa te òhipa a te taata.

I mua i teie mau parau tei àtutu te vai ra nei te tahi maa vahi ïti no te faatura i te fenua e te taata i ta tätou òhipa e rave nei. No reira tätou i hinaaro ai i te Atua, ia òre hoì tätou ia riàrià i te ìno, te parau-tià-òre, te haavare, te manaò ìno, aore ia e vai iho noa tätou ia tupu ruperupe noa na taua mau ìno atoà ra, ia òre hoì tätou ia horoà i to tätou püai no te haapaò i te reira mau mea atoà e nahea ia te Atua e riro faahou ai, ei Atua no tätou, e nahea ia tätou e riro mau ai ei tamarii atoà nä na. E nahea ta na parau e riro ai ei parau maitaì no te arataì ia tätou i nià i te èà e tupu ai te hau, te maitaì e te ora. Teie rä, te huru o te tupuraa o te mau òhipa i roto i to tätou fenua, te faanaho pae tahihia nei te nünaa ua haapurarahia te fëruriraa o te taata, tei faateimaha te oraraa. Ma te faaära atoà mai e, tei te hea vähi to tätou âau i te vairaa, a haamanaò mai ai teie mau ìrava e maha no na taiòraa e maha no teie mahana.

-Taramo 146, 8 o te Fatu tei faaàraàra i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau tià ra.

-Ìtaia 35, 5 Ei reira e faaàraàrahia ai te mata o te matapö ra, e àmaha hoì e te tarià o te feiä tarià turi ra:

-Iatöpo 2, 5 A faaroo mai na, e a ù mau taeaè here e: eere änei o te feiä taoà òre o teie nei ao ta te Atua i mäìti ei feiä taoà i te faaroo ra, e ei feiä âià i te Pätireia ta na i parau e horoà mai i te feiä e hinaaro ia na ra?

-Märeto 7, 34 Ua hiò atu ra i nià i te raì, òto iho ra, e ua nä ô atu ra ia na: «Êfäta o te faaauraa ra: «Ia àmaha »

Teie mau faaäraraa ia tätou e te nünaa no teie ànotau, e aha mau na ta te Atua Nui Tumu Tahi e hinaaro nei, ia rave tätou e ia ora hoì tätou e ia matara tätou i räpae i teie ôpape no teie maì viivii. Eiaha no te mea aita te nünaa e ìte ra, no te mea rä aita e tüàtiraa e ìtehia atu ra i roto i to rätou oraraa e te òhipa e tïtauhia ra ia rave o ta rätou e rave-tämau-noa ra. Inaha, te mea e ìtehia ra, faanaho noa ai tätou, te upootià noa ra ihoä to te taata hinaaro tià-òre. E au ra e, e èà ê ta te faanahoraa e faatoro ra i te mau faatere ia rave, e èà ê o teie e tämau-noa-hia nei i te rave, te èà e òre ai e ìtehia, te haehaa o te âau, te èà e òre ai e tupu ai te hau, te èà e òre ai e tupu ai te tüàtiàtiraa no te haamaitaìraa i te täviniraa i to na täuaro.

Ia faaroo tätou i ta Ìtaia parauraa ia tätou i teie mahana, e reo faatupu ora, e reo tiaìtururaa i roto i te ora,  ta ù i tuu te tumu i Èi reira. 4 E parau atu òutou i te âau taiä, Ia itoito òutou; eiaha e mataù; inaha hoì to òutou Atua. E faaìtehia mai ä te riri; te tähoo a te Atua ra: o ia iho te haere hua mai e faaora ia òutou. 5 Ei reira e faaàraàrahia ai te mata o te matapö ra, e àmaha hoì e te tarià o te feiä tarià turi ra: 6 ei reira te piriòì e ôuàuà noa ai mai te àiri, e himene mai hoì te vaha o te taata vävä ra: e pupü mai hoì te päpe na te mëtëpara, e te päpe tahe i te fenua marô ra. 7 E riro te one veàveà ra ei pape hopuna, e te repo marô ra ei päpe pihaa anaè: e ei te pärahiraa o te teni ra e tupu ai te âretu, e te âèho, e te tima ra.

Ia hinaaro tätou ia tupu teie mau faaueraa a te Atua nui Tumu Tahi, teie ä te manaò o Ìtaia i te parau no te haapaeraa mäa hinaarohia e te Atua:

Teie hoì te haapaeraa ta te Atua e tiaì mai ra i to na mau tävini ia faatupu:

- Ia tatara i te ruru o te ìno,

- Ia haamämä i te hopoià a te taata,

- Ia tuuhia tei neneìhia e te hämani-ìno-hia

- Ia ôfatihia e òutou te tuto e haamauiui nei i te taata,

- Ia tufa ta òe mäa i te feiä e poia ra,

- Ia arataì te taata rii ati ra i to ùtuafare,

- Ia ìte òe i te veve ra, ia faaàhu atu òe ia na,

Teie huru parauraa, oia atoà te òhipa i ravehia e Ietu i nià i te turi vava, 34 Ua hiò atu ra i nià i te raì, òto iho ra, e ua nä ô atu ra ia na: «Êfäta o te faaauraa ra: «Ia àmaha »

Te òhipa mätamua paha ia e rave i roto i teie haapaeraa mäa ia räpaau atoà o Ietu i to tätou tärià e to tätou arero 33 Ua rave atu ra Ietu ia na ôpapaì aè ra i te hiti, tuu atu ra i ta na rima i roto i to na tarià, ua tufa iho ra o ia i te huare, e ua faatiàià atu ra i to na arero.

Te piti o te òhipa e rave, Maoti rä, o te hiòraa ia tätou i te värua e te auraa o te taò : Haapae, e i muri aè i te reira mäìmiraa, e märamarama atoà ai tätou e, e aha te auraa e te puai ta te taò e faaìte mai ra. Ia haamanaò noa hoì tätou e, te ìmiraa i te märamarama o te parau, e riro te reira ei tautururaa ia tätou i te haafatataraa atu i te hinaaro o te Atua tei riro atoà ei tumu no te reo.

Te taò: HAAPAE  e taò hämani teie, e piti tuhaa i roto i teie taò.

a- HAA: e òhipa te ravehia ia tupu te mea e hinaarohia ra, aore ia, ia naeaèhia te vähi e tïtauhia ra.

e- PAE : teie te tahi mau faaòhiparaa ; - e numera 5 (pae), pae tähatai, pae mouà, pae miti, pae fenua, pae àui, pae àtau, pae i nià, pae i raro, pae ama, piri pae, pae o te mämä, pae o te päpä.

Te värua teie e te puai o te reo Mäòhi.

Te manaò e ìtehia nei i roto i teie mau faaòhiparaa, teie ia :

Te tahi vähi tei taa-ê-atu i te tahi. E ìtehia te taa-ê-raa i roto i te tahi e te tahi. Aita atoà e tüàtiraa i roto i te tahi pae e te tahi atu pae. Eita hoì te hiòraa no te parau o te mouà, e ìtehia i roto i te parau no te pae tähatai. Mai te peu, e hinaaro te tahi taata e hiò i te parau o te mouà, e haere ia te reira taata e hiò i te vähi tei reira te tupuraa no te parau o te mouà. Eita rä te parau o te mouà e ìtehia i roto i te parau o te miti. Ia hinaaro anaè tätou e hiò i te parau o te ora, e haere ia i te vähi tei reira to na parau e ìtehia ai. Aita anaè i päpü te reira hiòraa, e riro o ia i te paeinu.

E ìte-atoà-hia rä te manaò no te haapäpüraa, e te mäìti i te mea e hinaarohia ra. Aita anaè, eita e taahia e no tei hea pupu taata o ia, o ia hoì no tei hea pae o ia. Te reira mau te tïtauraa ta te haapaeraa e faaìte mai ra ia tätou, o ia hoì to te taata haapäpü faahouraa ia na i roto i ta te Atua ôpuaraa.

Ia päpü atoà ia na e aita atu ta te Atua ôpuaraa, maoti rä, ia fänaò te taata i te hau, te maitaì, te ora. No reira, aita anaè te hau, te maitaì e ìte faahou-hia ra, täpaò faaìte ia e, ua atea ia taata i te vähi tei reira to te Atua tiaìraa mai ia na.

Ia riro ia te òhipa ta tätou e rave nei ei òhipa tei au i te tïtauraa e te faaìteraa a te taò HAAPAE, o ia hoì, te haafatata-faahou-raa i te ora, e haapäpü faahou e, no te pae tätou o te Atua, e rave ia i te òhipa e mauruüru ai te Atua i to na mau tävini.

Ia òre hoì te taata ia färii e no to na ätearaa i te hinaaro o te Atua, i ère ai o ia i te ora, te hau, te maitaì, ia òre hoì te taata ia färii e, e haapae atoà o ia i te tahi huru tei faatupu noa i to na hinaaro e ia upootià noa o ia, e tae noa atu i te haapaò-noa-raa ia na iho, mä te here òre i te taata. E riro mau ia te haapaeraa mäa ta tätou e rave nei mai te tahi haamauruüru-noa-raa ia tätou iho. No te mea atoà hoì aita te auraa o te taò o ta tätou faaòhipa ra e tae ra i nià i te mea e hinaarohia mai ra e te Atua Nui Tumu Tahi. Haamanaò na tätou i te pure a te färitea (Ruta 18/12), tei riro hoì te haapaeraa mäa mai te tahi noa haamauruüruraa ia na iho, e no te faataa ê ia na i te tahi pae taata. Aita rä te auraa o te haapaeraa o ta na e tïtau ra e haapaòhia ra. Te auraa e ère o to tätou hinaaro te ìmi ia tupu e ia ìtehia, e ère atoà hoì no te haamauruüru noa ia tätou e ta tätou faanahoraa, i haapae ai tätou no te mea ia, aita mau to tätou e ora i rapae àu i te aroha e te here o te Atua. E ère noa atu ra ia te mäa e te päpe të haapae, e haapae atoà rä i te ìno ta te âau o te taata e faatupu òhie nei i roto i to na oraraa, tei riro hoì te reira ei faataupupü i te mau tüàtiraa atoà e hinaarohia mai ra ia tupu.

Inaha hoì, o te mau manaò ìno te haafifi rahi nei i te tupu maitaìraa o te ora. No reira, ia òre anaè te ora, te hau e te maitaì e ruperupe faahou i roto i te oraraa, täpaò faaìte ia e, ua rahi aè te mau mea e faarumaruma i te tupuraa o te ora, te hau e te maitaì, tei riro ei ôpuaraa nä te Atua.

E nahea rä tätou i teie nei i mua i te tïtauraa ta te haapaeraa e hinaaro mai ra. E ère hoì te haapaeraa i te peu noa, aore ia i te tahi noa faanahoraa o ta tätou e faaòromaì noa, o te tahi rä teie haapäpüraa no te huru o te oraraa o ta tätou e mäìti i teie nei, no te haapäpü atoà e no tei hea pae tätou.

No reira, te mea te anihia nei ia tätou ia rave, o te haapaeraa ia i te mau mea tei riro i te faaère ia tätou i te ora, te hau e te maitaì. Ia rave mai tätou i te hiòraa no te hoê uru meià, ia òre ia tämähia, ia òre hoì te mau pehu ia ìritihia, tei faaapiapi i to na tupu maitaìraa e horoà mai ihoä o ia i te mäa, e ère rä i te mea faahiàhià roa no te mea, aita te hihi o te mahana e tae roa i nià i to na taatoàraa, ua apiapi roa i te pehu. Te reira atoà te tïtauraa rahi ta te haapaeraa, o ia hoì, te äraraa tätou e aita to te ora e parau, mai te peu eita atoà tätou i to tätou pae e rave aore ia e faatupu i te hinaaro o te Atua. Ia hitihia to tätou oraraa e te hihi aroha e te here o te Atua Nui Tumu Tahi.

No reira e faahoì te haapaeraa ia tätou i te ìteraa i te hinaaro o te Atua, te faatupuraa i te tauturu, te aroha, te here e te haamämäraa te àti o te taata, o ia hoì, te räveà teie e tupu ai te parautià, te paraumau. Mai te peu hoì o te reira te òhipa ta tätou e rave i teie nei, teie ia te tïtauraa e vai nei, e faaineine ia ia tätou, faaineine i to tätou oraraa, faaàfaro i te mau vähi e puupuu ra, te mau vähi âpoopoo e faaî, e haamaitaì faahou i te tüàtiàtiraa, ia faahope te püai, te manaò, te värua no te ìmi i te tupuraa no te hinaaro o te Atua, te värua o to tätou fenua o Mäòhi Nui te mau taata atoà tei here i teie fenua e piihia rätou te Mäòhi, o rätou teie e parauhia nei te Òhi Mä. Teie atoà te tahi manaò faufaa o te tià roa ia tätou ia täpeà mai maoti rä, teie huru parauraa e haapae i te mäa, te parau-atoà-hia nei, e haamoà i te mäa. Teie te auraa o te reira manaò. Ia au i te huru maì e iri mai i nià i te hoê taata, ia itoito o ia i te tuu i te hiti i te mau mäa atoà të òre e tano i nià i to na maì, te mau mäa hoì të riro i te haafifi-roa-atu ä i te ora e vai ra i roto ia na. Te ìte ra tätou e, te haapae, aore ia te haamoàraa i te mäa, hoê manaò tumu e ìtehia maoti rä, te faaätearaa i te mau mea atoà të riro i te faatupu mai i te fifi. No te mea te parau nei tätou e, e mea moà te Atua, teie rä, e ère-roa-atu i nià i ta tätou parauraa, o ia hoì, ta tätou haamoàraa e moà ai te Atua. E ère nä tätou e horoà i te moàraa o te Atua. Ta tätou rä te reira òhipa, e te moà e hinaarohia mai ra, o te faaìte-raa ia i roto i to tätou oraraa, te moà o te Atua. No reira, i mua i to tätou iho parau, te tïtauhia mai ra ia haapae tätou i roto i to tätou oraraa te mau mea atoà o ta tätou e ìte ra e, e riro mau te reira i te faaìno e te haaviivii i te iòa o te Atua ta tätou e tävini nei. Te huru e tïtauhia mai ra ia rave hoì tätou i to tätou pae, ei oraraa no tätou, te riàriàraa ia i te ìno.

Te moà ia e hinaarohia mai ra ia tupu i roto i te oraraa o te taata i to na pae, o te faatanoraa ia i ta na òri i nià i te pehe ta te hinaaro o te Atua Nui Tumu Tahi e pehe noa nei i roto i te oraraa o te taata. Inaha, ua tauàti-atoà-hia te oraraa o te taata i nià i te Atua. Tätou hoì i te tahi pae e te Atua i to na pae, na te hinaaro hoì o te aroha te here e täàmu ra ia tätou. Mai te peu, e faatano te feiä e hoë ra i te vaa i ta rätou toparaa hoë, e tïtau-atoà-hia i to rätou pae ia haapae i te tahi huru, tei òre e au ia rätou ia rave i nià i teie vaa, no te mea e haafifi te reira i te tere maitaìraa o te vaa e tae atu ai i te tipaeraa. Te taata tei òre e hinaaro e haapae i te mau mea atoà e haafifi i te tupu maitaìraa o te hau, te maitaì e te ora hoì, tei òre i ineine i te färii e haapae i te mau mea atoà ta te moà o te Atua e tïtau mai ra, e aha ia te faufaa o te moà o te Atua i roto i te täviniraa i te Atua te parau mau e te parau tià.

Pure

Pure tätou i te Atua Nui Tumu Tahi,

I teie tau ta tätou e ora nei, ua ìte tätou i te rauraa e te ûànaraa o te fifi i roto i teie nei ao e i te fenua nei, e te reira i roto i te tahi manaò tumu, no to tätou ia huru i nià i te fenua. Ia parau hoì tätou e : “ Fenua ” ua ìte ia tätou e te ao ia tei reira tätou i te oraraa. No reira ia parau tätou i ô nei e “ Fenua ” ia päpü ia to tätou manaò e te parau ra tätou no te fenua e to na î, te tai e to na î, e te mataì ora o ta tätou e huti nei. Mai te òre e haamoè i te mau fifi rau e tupu ra i terä e i terä fenua e àti aè teie nei ao, e haamau mai tätou i to tätou manaò i nià i to tätou taa motu no Mäòhi Nui nei. I ö tätou nei, eita e tià ia parau i te rahi o te tauà òre te haafaufaa òre e te hämani ìno a te taata i to tätou mau motu rii, a riro mau ai te reira ei fifi no to tätou oraraa. Ia hiòhia i teie mahana, ua rau te mau hämani-ìno-raa e ravehia ra i nià i te fenua, te mau haaviiviiraa, te mau täpüraa repo, te mau tupitaraa e te vai atu ra. E hia atoà fenua to te Mäòhi i tävirihia e ua riro ia vëtahi ê, e hia fenua i hoohia no te nounou i te moni e i te mau mea materia, e aita e faaea ra, noa atu te mau faaäraraa, e au ra e, ua moè te hiroà o te Mäòhi i teie tau, aita o ia i ìte faahou e no hea mai te fenua ta na e pärahi ra, e o vai mau na te fatu. Aita o ia e ìte faahou ra i te faufaa o te fenua no to na oraraa. Aita o ia e ìte faahou ra, ia hämani-ìno-hia te fenua, e riro ia te reira e ìno no to na oraraa, e ia ère hoì o ia i te fenua e riro ia o ia e òvere. O te tumu ia no teie tuatäpaparaa, ia tià ia tätou ia ìte faahou i te parau o te fenua, ia ara i ta tätou faaòhiparaa i te reira, e ia ìmi i te räveà ia òre tätou ia topa roa atu i roto i te ìno. Mauti ra te hotu o te fenua àita i maìhia i teie maì e haaviivii nei i to tätou oraraa i teie mahana, te mäoa noa ra te ùru, te para noa ra te meià, te para noa ra te vï e tei tahi atu mau maa, e noa atu te tahi mau maa hotu e te mau ìnaì o te moana, e to te fenua. E te Atua Nui Tumu Tahi a aroha mai a here mai ia mätou te feiä hara nei. Âmene.

Pehepehe

Teie te tahi pehepehe no te Hei o te Rani i te Vaihi, te hono o te reva e te ànavai, ta te manaò e pii nei, HEIRANIEITEVAIHI.

 

HEIRANIEITEVAIHI.

Heiranie te hei no te reva.

Tuihia e te mau tiàrama.

Tiàrama i te pö.

Tiàrama i te ao.

 

Te papa o te mau ata.

Turaìhia e te mau mataì.

Tei faatörïrï i te ua.

Èi faahaumäru i te fenua.

 

Te anuanua täpaò no te hau.

Ia hau te nünaa o te fenua.

Te òaòa te reira o te nünaa.

Ia tä te ora i Mäòhi Nui

 

Heiranieitevaihi.

Te hono o te reva.

Te hono o te fenua.

I natihia i te aru.

E te mau ànavai.

 

Teraì òr. Faatura.