Ioane 8.1-11 Päpaì

 

Tāpati 3 Èperera 2022.

ÔROÀ

Päpaì

Taramo 126.

1 Tire a te Moruta. I te faaòre-raa-hia e te Fatu te tïtïraa o Tiona, e au tätou i te feiä moemoeähia.

2 Î aè ra to tätou vaha i te àta i reira, e to tätou mau arero i te òaòa. Ua nä ô aè ra to roto i te êtene ra: «E òhipa rahi ta te Fatu i rave ia rätou nei»

3 E òhipa rahi ta te Fatu i rave ia mätou nei, i òaòa ai mätou nei.

4 E faahoì mai ä, e te Fatu, i to mätou ra mau tïtï, mai ta òe ä i faahoì mai i te pape tahe i àpatoà ra.

5 O tei ueue mä te roimata ra, e ôoti ia mä te òaòa.

6 O tei haere hoì e ueue i te huero mä te òto ra, e hoì faahou mai ä ia mä te òaòa, e mä te hopoi atoà mai i ta na ra mau ruru.

Ìtaia 43.16-21

16 Te nä ô mai ra te Fatu manahope ra; o tei rave i te èà nä raro i te tai ra, e te haereà na te moana rahi ra;

17 o tei arataì mai i te puaahorofenua e te taata i nià iho, te nuu, e te papaupea rahi atoà ra; taòto anaè iho ra rätou, e pohe atu ra mai te vavai ra.

18 E aha e manaòhia tei a mütaa iho ra mau parau; e tei tahito ra mau peu, eiaha e haapaòhia atu.

19 Inaha, te rave nei au i te mea âpï; e teie nei hoì e tupu ai; e òre änei òutou e haapaò i te reira? Oia ia, ei èà tià tä ù e rave i te mëtëpara: e tuu hoì au i te pape tahe na te fenua marô ra.

20 Na te mau taehae o te aru e haamaitaì mai ia ù; te mau teni, e te mau tamähine o te ione ra; no te mea ua höroà vau i te pape i te vähi päpämarô, e te pape tahe i te mëtëpara ra, ei pape nä to ù ra mau taata, i tei haapaòhia e au ra.

21 Ua haapaòhia e au teie nei mau taata nö ù iho; nä rätou e haamaitaì mai ia ù.

Firipi 3.8-14

8 Oia mau ia e mea faufaa òre atoà te mau mea atoà nei ia ù, i te maitaì rahi ra i te ìte i te Metia i ta ù Fatu ra ia Ietu: e faaruè ai au i te mau mea atoà ra, e e àua ia ia ù, ia noaa ia ù te Metia.

9 Ia riro vau ei taata no na, eiaha mä te parau tià na ù iho i te ture ra, o tei noaa mai rä i te faaroo o te Metia ra, o te parau tià a te Atua i te faaroo ra:

10 ia ìte hoì au ia na, e te püai o to na tiàfaahouraa, e te âpiti-atoà-raa atu i to na mau àti, i te faaauraa atu i to na ra pohe;

11 ia roaa noa atu ä ia ù te tiàfaahouraa mai te pohe mai ra.

Te hororaa o te taata faaroo

12 Eita vau e parau e, ua noaa ia ù e ua oti nehenehe roa to ù hororaa i teie nei, te tïtau nei rä vau, peneiaè o te noaa ia ù te mea i roohia mau ai au nei e te Metia ra e Ietu.

13 E a ù mau taeaè, aore au i manaò ia ù iho nei, e ua noaa, hoê roa a ù mea e rave nei, i te haamoèraa i te mau mea i muri ra, e te tïtauraa atu hoì i tei mua,

14 te neneì tià atu nei au i te täpaò, ia noaa te perapeio i te parauraa a te Atua no nià mai ra i te Metia nei ia Ietu.

Ioane 8.1-11

Te vahine faaturi i faatiàmähia

1 Haere atu ra Ietu i te mouà ra i Òriveta.

2 E i te poìpoì roa ra, ua hoì faahou mai ra o ia i roto i te hiero ra, e ua haere atoà mai ra te taata ia na ra, pärahi iho ra o ia i raro, e haapii atu ra ia rätou ra.

3 Ua arataì mai ra te mau päpaì parau e te mau Färitea ia na ra i te hoê vahine i roohia i te rave-raa-hia ra, ua tuu atu ra rätou ia na i röpü.

4 Ua parau mai ra rätou ia na: «E Rapi, roohia atu ra teie nei vahine te rave-mau-hia ra.

5 I parau mai hoì Möte i roto i te ture ra e, e pëhi i te reira i te ôfaì. E aha rä ta òe na parau?

6 I nä reira mai ra rätou i te rämäraa mai ia na, ia noaa ta rätou pariraa mai ia na. Ua piò iho ra Ietu i raro, ua päpaì iho ra ta na rima i te parau i nià i te repo.

7 Ua tämau mäite mai ra rätou i te uiraa mai ia na, ua tià aè ra o ia i nià, ua parau atu ra ia rätou ra: «Na te taata hara òre i roto ia òutou na e täora atu na i te ôfaì mätamua ia na.

8 Ua piò faahou iho ra o ia i raro, päpaì faahou iho ra i nià i te repo.

9 E ìte aè ra rätou i taua parau ra, faahapahia iho ra e to rätou iho âau, ua unuhi tätaìtahi noa atu ra rätou, o te taata paari tei nä mua na e tae noa atu ra i te taata hopeà, toe iho ra o Ietu anaè ra e taua vahine ra i te tià-noa-raa i röpü.

10 Ua tià aè ra Ietu i nià, e ìte atu ra aore roa e taata, maori rä o taua vahine anaè rä, ua parau atu ra o ia ia na: «E teie nei vahine, tei hea te feiä i pari mai ia òe nei? Aore roa e taata i faautuà mai ia òe na?

11 Ua parau mai ra o ia: «Aore roa, e ta ù Fatu. Ua parau atu ra Ietu ia na: «Eita atoà vau e faautuà atu ia òe. A haere, eiaha rä ia hara faahou.

Manaò.

I teie tau te ueue ra te reira i ta na huero i te mau vahi e topahia atu i te ärataìraa a te mataì, te vai puè, te ôpape, tei mau atu i nià i te mau fenua i haapaòhia. Ia topa i roto i te aru a te Atua Nui Tumu tahi, e rave te aru i ta na tuhaa i te haamaitaìraa ma te òre e uiui i te ìno e te maitaì te tupu âpitipiti nei ma te òre e faataa i te huru tupuraa o te reira e te reira räau, te reira àihere e te mau ànimara e ora ra, tei parauhia te mau ànimara taetaevao, e ta tetahi pae parauraa ànimara ôviri te fänaò nei i te  höroà a te aru. Te parau nei ia tätou te taata teie huru tupuraa òhipa ma te hiò na roto i te mata tei faataaê te tahi i te tahi tei maìti i te vahi e maitaì ai ta na mau ôpuaraa no to na oraraa. Teie mau tumu räau, mau àihere, tei matara mai, mai roto mai i te fenua te färii noa ra i teie maitaì, te vahi faahiahia, e tumu räau noa, te tumu räau, e àihere noa te àihere, e ànimara noa te ànimara, haapaò noa te reira i to na huru e to na hotu, oia hoì te huero o te tumu räau ia topa i nià i te fenua, e faaea tumu räau noa, te huero o te àihere e faaea àihere noa, hoê ätoà te pinia ânimara, tupu noa hotu noa ai i roto i te aru. Te noho òaòa noa nei te aru ma te hau, i ta te fenua faatupuraa, ia ueue te taata i ta na ueueraa, ia paì te taata ta na paìraa, ia ùtaru te taata i ta na ùtaruraa, e maitaì te huero i te mea ua faaineinehia te fenua. Te fenua ra te päpä ia te reira tei täma i te viivii o te taata, ia marae te marae e maitaì ai te haamoriraa i te Atua Nui Tumu Tahi.

Ia faaroo tätou i na tumu parau e maha e tià ia tauturu i ta tätou haamoriraa no teie mahana ma teie to na huru tupuraa :       

-Taramo 126, 6 O tei haere hoì e ueue i te huero mä te òto ra, e hoì faahou mai ä ia mä te òaòa, e mä te hopoi atoà mai i ta na ra mau ruru.

-Ìtaia 43, 20 Na te mau taehae o te aru e haamaitaì mai ia ù; te mau teni, e te mau tamähine o te ione ra; no te mea ua höroà vau i te pape i te vähi päpämarô, e te pape tahe i te mëtëpara ra, ei pape nä to ù ra mau taata, i tei haapaòhia e au ra.

-Firipi 3, 9 Ia riro vau ei taata no na, eiaha mä te parau tià na ù iho i te ture ra, o tei noaa mai rä i te faaroo o te Metia ra, o te parau tià a te Atua i te faaroo ra:

-Ioane 8, 8 Ua piò faahou iho ra o ia i raro, päpaì faahou iho ra i nià i te repo.

-Te piò mätamuaraa o Ietu i raro, ua päpaì iho ra ta na rima i te parau i nià i te repo, tià aè ra, hiò atu ra i te feiä e pari ra i teie vahine, Na te taata hara òre i roto ia òutou na e täora atu na i te ôfaì mätamua ia na.

-Te piti o te piòraa i nià i te fenua, päpaì faahou iho ra i nià i te repo, tià aè rae, to na reo i nià i te vahine «E teie nei vahine, tei hea te feiä i pari mai ia òe nei, Aore roa e taata i faautuà mai ia òe na, Aore roa, e ta ù Fatu. Ua parau atu ra Ietu ia na: «Eita atoà vau e faautuà atu ia òe. A haere, eiaha rä ia hara faahou.

Teie huru faatupuraa òhipa i roto i ta tätou mau taiòraa te faaìte noa mai ra te reira i te puai no te here o Ietu i te taata, te haapäpü noa ra te reira te tiàraa Tämaïti a te Taata o ta Na iho i faahiti i to na täamuraa i te fenua, ua piò, ua päpaì, to rima i nià i te repo, no te faaìte i te faufaa o te here i te taata.

I roto i te here, ua tähitihia te mau fifi atoà, eiaha no te mea ua òre te reira, aita rä to na e parau faahou. No te mea e here te Atua, te mea të òre e tupu i te taata, e tupu i te Atua. Ia ìte atoà rä tätou e, eita te parau o te here o te Atua e tano ia faataa-ê-hia i te faaroo o te taata e ta na täviniraa. Ta te taata te reira pähonoraa i te here o te Atua, te mea hoì e matara ai te mau ùputa atoà : i te vähi aita e ùputa, e riro e, te vai ra te tomoraa ; i te vähi aita e pape, e riro te reira i te puroro mai nä roto i te mato, e te pihaa mai nä raro i te fenua.  Ei tautururaa i to tätou manaò i te faahohoàraa i te huero tïnapi, e faaau tätou i te reira i te tahi huero miri, ta Ietu e haapäpü ra e, terä noa aè te rahi o to tätou faaroo, aita e mea eita e tià ia tätou i te rave, e taea noa atu i te faaöraa i te tahi tämera nä roto i te âpoo au. Te vähi taa ê rä, te mea ia e, aita te Fatu e tïtau nei i te faaroo o te tämera no te tomoraa nä roto i te âpoo au, no te mea eere te reira fifi no te tämera. I te hiòraa i te mau parau ta tätou i faahitihiti mai na, e tano ia parauhia e, na te taata noa ihoä e faaapiapi noa nei i te ùputa hoìraa i te Atua ra. Te vähi te taata i fifi roa ai, tei teie ia parau no te hoìraa ta na e hiò ra mai te tahi vähi ätea e te päpü òre to na parau, e tahi ihoä rä vähi e tano ia faaauhia i te tahi haereraa i muri, aore ra te tahi toparaa i raro ; e no te mea te vai rii ra te mataùtaù o te taata ia haere i te tahi vähi ta na i òre i mätau, manaò atu ra o ia e, mea maitaì aè te pärahi noa i te vähi tei reira o ia i te tiàraa. Te tano-mau-raa rä, eere teie i te vähi ìte-òre-hia e te taata, hau roa atu, ua ìte o ia i te èà, ua moèhia rä ia na, e aita o ia e haamanaò faahou ra. E ia parau hoì o Ietu e, A haere, eiaha rä ia hara faahou, te hinaaro noa nei o Ietu e faaìte i te èà e tiàma ai te taata i to na haereà. E au te oraraa ta tätou e ora nei i te tahi uru räau tei faaapiapi i to tätou märamarama, òre atu ai tätou e ìte i te èà e tae ai i te fare metua. Eere rä ia, i te hinaaro o te Atua, te faaruè ia tätou ia moè roa atu i roto i teie uru räau. E taoà rii atoà ihoä paha ta tätou i faatopatopa i nià i te èà o to tätou oraraa, te vai ra ta te mau metua i tuu mai no tätou e ta tätou e tämata nei i te pee, te vai ra hoì ta tätou iho e tuu nei no ta tätou mau tamarii. I te rahiraa o te taime, te hinaaro nei tätou i te tamarii ia pee i teie mau taoà rii ei räveà e fänaò ai rätou i te oraraa maitaì e te moni, ia riro rätou ei feiä ìtehia, te tura, e te mana ; e ia òre noa atu hoì ra, ia òaòa ia rätou i roto i te oraraa. No te rahi rä, te rau, e te piripiri te ôfaì i nià i te èà, eita atu ra te tamarii e ìte faahou e, te hea ôfaì të pee, faaea noa atu ra te tahi pae, ua haere hänoa te tahi pae mai te haapeàpeà òre te manaò i te vähi rätou e täpae atu ai. Ua tono roa mai te Atua Nui Tumu Tahi i te tahi taata no te tautururaa ia tätou ia òre ia hape te ôfaì e täora, o ia atoà iho të tiaì mai ra ia tätou i te fare metua. Ia ìte atoà rä tätou e, aita i taaau te èà e faahoì ia tätou i te fare metua, tano atu ai tätou e mäìti i tei au i to tätou manaò, e aita te mau ôfaì, te mau täpaò ta tätou e pee i faanahohia i roto i te aore, tei nià mau rä i te fenua i päpaì ai o Ietu i nià i te repo, i te vähi i reira to te Atua haaparahiraa ia tätou. E tano ia parauhia e, i te vähi tei reira te taata, tei reira te èà, tei reira te ôfaì, e tei reira te ùputa, oia te tomoraa. E ara atoà rä ia tätou, no te mea e rave rahi të tià mai i te parauraa e : teie te èà mau, teie te èà mau … E rave rahi të hema. Ia ìte mai tätou e, no te mea no roto mai te rahu i te Parau a te Atua, aita atu hoì ta te rahu tïtauraa maoti rä, te hanahana o te Atua e te faateniteniraa i to na iòa moà, eita ia te rahu e haavare. Te päpü atoà ra ia tätou e, eita te Tamaiti e tano e arataì i te taata nä nià i te tahi èà ê atu i ta te Metua i faaìte mai, e te mau täpaò hoì ta te Metua i tuu haere nä nià i te èà e faahoì ia tätou i te Atua ra, ta te Tamaiti atoà ia i rave, e ua tae roa atoà o ia i te parauraa e : A rave a àmu, o ta ù tino tenä ; a reva a inu, o ta ù toto tenä, no te mea o te räveà noa te reira e märamarama ai te taata, e ìte ai hoì i te èà ta te Atua i faaineine ia òhie to na hoìraa i te Atua ra, ta Ietu e parau nei e, a haere, eiaha rä ia hara faahou. Mai te peu i parau mai na tätou e, nä roto i te fenua e te Faufaa ora a te Atua ta na e mau ra, ua haafätata mai te Atua i te taata, nä roto i te Tamaiti a te taata, ua hinaaro te Atua e haapäpü faahou i te taata i to na hinaaro haafätata ia na. E tano ia parauhia e, nä roto ia Ietu, te Tamaiti a te taata, ua hinaaro te Atua e färerei roa i te taata, mata e mata, vaha e vaha, taata e taata, taata e te Atua. Nä roto ia Ietu, te ìte ra ia tätou e, e fänaò huru fänaò to tätou i te here o te Atua tei òre i hinaaro ia pohe tei faaroo i ta na Tamaiti, ia noaa rä ia na te ora mure òre. Mai te peu aita Ietu i mataù i te parauraa i te mau Päpaì parau e te mau Färitea, tei faariro ia rätou ei feiä tiaì ùputa e, e feiä haavare anaè, eiaha paha ia tätou e onoöno i te tihepu mai i te tahi feiä tiaì ùputa âpï. Mai te peu hoì nä roto i te Tamaiti a te taata, ua marua te mau patu i faataa ê noa mai na i te taata, eiaha atoà paha ia e faariro ei teòteòraa no tätou te haamauraa i te tahi mau patu âpï e ätea faahou ai te taata i te Atua. Ia tae tätou i reira, tätou iho të haafaufaa òre ra i te ôpuaraa faaora a te Atua. O tätou atoà te tahi feiä püai roa i te täpeà i te taata tei òre i auraro mai i ta tätou mau faanahoraa. I roto i ta tätou huru arataìraa i te parau o te Faaroo, e rave rahi roa te taime, aita ta te Atua e parau ia tätou, ua nä nià aè rä tätou i te Atua. E mea pinepine roa tätou i te òreraa e hinaaro ia tupu te hinaaro o te Atua, to tätou rä hinaaro ta tätou i ìmi i te räveà ia ìtehia e ia mataùhia e te taata. Ia hiòhia ta tätou mau peu e ta tätou mau faanahoraa, e tano maitaì atoà ia tätou te parau a te Fatu e nä ô ra e : Te tämöûû na òutou i te naonao, e te horomii noa na i te tämera (Mätaio 23, 24). Te auraa, mea ètaèta roa tätou i nià i te mau mea rii haapaòraa òre, te mau mea të òre e tauturu i te taata i te märamaramaraa i te hinaaro o te Atua, âreà te faatupuraa i te parau mau e te parau tià, nä reira hoì te aroha e te here, te mau mea e hanahana ai te iòa o te Atua, aita ia to tätou e manaò i reira. Eita tätou e faahiti faahou i te parau o te fenua ei ùputa no te raì, ua märamarama tätou i te reira vähi i teie nei. Te mea ta tätou e hiò mai, te parau ia o te taata e tomo nä roto i taua ùputa ra, no te mea aita e faufaa to te ùputa mai te peu aita e taata e tomo, aore ra mai te peu e haafifihia te taata ia tomo. No te aroha e te here o te Atua i te taata i tonohia mai ai Ietu. Te auraa, ua maoro roa te ùputa hoìraa i te Atua ra i te apiapi-noa-raa i te mau faatureraa e te mau faanahoraa a te taata, e tae noa atu i te huru e te hohoà o te Atua ta te mau arataì o te Faaroo i tuu i mua i te nünaa. Te ètaèta o te taata i nià i ta rätou mau faanahoraa, ua färerei atoà mai Ietu i te reira. Ua hinaaro rä o ia e haapäpü i te auraa o ta na òhipa : Eiaha e manaò e, i haere mai au e faaòre i te ture e te mau perofeta, aore au i haere mai e faaòre, e faatià rä (Mätaio 5, 17). I mua i teie taò faatià, e piti huru türamaraa e tano ia horoàhia. A tahi : ua haere mai Ietu e faahope i te parau, oia hoì e horoà i te tahi haamäramaramaraa hau atu i tei ìtehia ; a piti : ua haere mai o ia ia tupu te parau tià, oia hoì ua haere mai e faaìte i te hape, e tae noa atu i te mau vähi i rara ai ta te taata märamaramaraa i te parau a te Atua. Eiaha tätou e täora i te ôfaì i te âti Iuta, te Färitea, te Päpaì parau, e te mau Haapii ture. Te mau parau ta Ietu i parau i to na tau, te mau faahaparaa ta na i faatae i nià i te mau arataì o te Faaroo, e tano roa atoà ia parauhia no tätou i teie mahana. Noa atu ia e, a 225 mätahiti to tätou färiiraa i teie haapaòraa âpï, te reira atoà te roaraa o te tau to tätou horoàraa i te tahi hiòraa hape i nià i te Atua. Haere eiaha ia hara faahou.

 

Teraì òr. Faatura.