Ruta èv. 17.5-10. Ahiri.

 

Tāpati 2 Âtopa 2022.

ÔROÀ

Ahiri.

Taramo 95

1 Tätou e himene i te Fatu, e himene hua tätou i te mato e ora ai tätou nei.

2 E haere tätou i mua i ta na aro mä te haamaitaì, e mä te taramo e himene hua atu ai ia na.

3 E Atua rahi hoì te Fatu. E arii rahi i nià i te mau atua atoà ra.

4 Tei ta na rima te vähi hohonu o te fenua nei, e te teiteiraa o te mau mouà ra, no na ia.

5 Na na te tai, na na hoì i hämani, e na ta na rima i hämani i te repo marô.

6 E haere mai tätou, e haamori mä te piò i raro, e tuu i to tätou turi i te aro o tei hämani ia tätou nei, i te Fatu.

7 O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima. Ia tià ia òutou, i teie nei mahana i te faaroo i ta na reo:

8 «Eiaha e faaètaèta i to òutou âau mai tei Meripa ra, e mai tei te mahana i Mata, i te mëtëpara ra,

9 i ta to òutou mau metua i faaoôo mai ia ù ra, e ua àa mai ia ù, ìte noa ai rätou i ta ù ra mau òhipa.

10 A maha aè ra àhururaa o ù mätahiti i te oôoraa i te reira uì, e ua nä ô aè ra vau: E feiä âau hapa rätou, e aore i haapaò i ta ù ra parau,

11 o tei tapuhia e au i ta ù ririraa ra, e eiaha roa rätou ia ö i to ù ra faaearaa.»

Hapatuta 1.2-3

Te tïtauraa

2 Te mäoro, e te Fatu, o ta ù tiàororaa, e aore òe i faaroo mai te mäoro o ta ù pii-hua-raa atu ia òe, e hämani ìno teie e vai nei, e aita òe i faaora.

3 E aha rä hoì òe i faaìte mai ai i te ìno, e ia hiò hoì au i te òto ra? Te vai nei hoì te haru e te rave aroha òre i mua ia ù nei: e te vai nei hoì te feiä e faatupu i te märô e te tamaì.

2.2-4

Te pähonoraa a te Atua: i tei rave i te parau tià e te ìno

2 Ua parau mai ra te Fatu ia ù, nä ô mai ra, A päpaì na i te ôrama ia ìteä-noa-hia i nià i te mau päpaìraa ra, ia horo noa te taata ia taiò ra.

3 No te taime i haapaòhia ra taua ôrama nei, ia tae rä i te hopeà ra e faaìte päpü mai ai e òre e haavare: e ia mäoro iti noa, e tiaì atu ä; e tae mau mai ia, e òre e haamäoro hua.

4 Inaha, o te teòteò ra aore ia i tià to na âau i roto ia na ra; o tei tiàhia ra i te faaroo ra, e ora ia.

2 Timoteo 1.6-14.

6 E teie nei, e parau atu ai au ia òe ia manaò òe, e e faaaraara òe i tei roto ia òe i horoà-noa-hia mai e te Atua i te tuuraa ta ù rima i nià ia òe na.

7 Eere hoì i te âau taiä ta te Atua i horoà mai no tätou, i te âau itoito rä, e te aroha, e te haapaò maitaì.

8 Eiaha òe e haamä i te parau o to tätou Fatu, e eiaha atoà e haamä ia ù i to na taata i täpeàhia nei. E färii atoà rä òe i te pohe o te Èvaneria nei, i te itoito a te Atua ra:

9 o tei faaora ia tätou nei, e ua parau ia tätou i te parauraa moà ra, eiaha no ta tätou òhipa, no to na iho rä hinaaro, e te aroha mau i horoàhia mai i te Metia ra ia Ietu no tätou, hou teie nei ao ra.

10 Ua faaìte-hua-hia mai rä i teie nei i te färaa mai o to tätou ora o Ietu Metia, o tei faaòre i te pohe nei, e ua faaìte päpü mai i te ora mure òre i te Èvaneria nei ra;

11 i haapaòhia ai au nei ei aò, e ei âpotetoro, e ei òrometua na te Ètene ra.

12 I roohia mai ai au i taua mau mea ìino nei; aita rä vau i haamä; ua ìte hoì au i ta ù i faaroo aè nei, e ua ìte au e, e tià ia na ia tiaì i ta ù i tuu atu ia na ra, e tae noa atu i taua mahana rahi ra.

13 E täpeà maitaì i te hiroà parau mau ta òe i ìte ia ù nei ra, mä te faaroo e te hinaaro i te Metia ra ia Ietu.

14 Taua parau maitaì i tuuhia atu ia òe ra, e mau maitaì iho ia i te Värua Maitaì e pärahi i roto ia tätou nei ra.

Ruta èv. 17.5-10.

Te faaroo

5 Ua parau mai ra te mau âpotetoro ra i te Fatu: «E faarahi mai i to mätou faaroo.

6 Ua parau atu ra te Fatu: «Ahiri e faaroo to òutou e mai te huero tïnapi noa iho ä te rahi, e parau noa atu ia òutou i teie nei tütämino: «Ia mahiti tumu òe, e ia tänuhia òe i raro i te tai, na na ia e faaroo mai.»

Te täviniraa

7 «O vai to òutou e tävini to na te ârote ra, e te faaàmu ra i te mämoe, e hoì mai ra mai roto mai i te âua, e parau vave atu: «A haere òe, a taòto i te àmuraa mäa «?

8 E òre änei e parau atu e: «A faanahonaho i te àmuraa mäa na ù, a tätua na ia òe, a rave mai i te mäa ia àmu vau e ia inu hoì; e i muri aè, a àmu ai òe e a inu ai hoì «?

9 E parau änei o ia, e hämani maitaì hau to taua tävini ra ia na, o ia i rave i tei faauehia atu ia na ra? Te manaò nei au, e òre.

10 Oia atoà òutou, ia ravehia e òutou te mau mea atoà i faauehia atu ia òutou na, e nä ô òutou: «Aita a mätou faufaa, a to mau tävini nei i hopoi atu; o tei au mau ia mätou ra, o ta mätou ia i rave iho nei, tirärä.»

Manaò.

Te Atua Nui Tumu Tahi, e Atua tei färiihia e te mau Atua tei faatumu i te mau ora atoà i roto i te aru, tei faaìte i te puai mai roto mai i te mau faanahoraa ta te fenua e mau ra. Tei faatupu i te mau huru räau atoà tei faaheùrihia i roto i te vao aore ra te mau faa ta te mau àihere e faahaumäru noa ra. E riro ai ei vahi nohoraa no te mau manu o te reva, no te mau puaa taetaevao, tei haapata i te mau huero maa rau ta te mau tumu maa hotu e horoà ra. Te mau ohi e ôteo ra mai roto mai i te mau tumu feì, te mau tumu âpe, te mau tumu tiare rau, e tià ai, ia tätou i te parau e, e metua faatupu ora te aru i te mea  te rima o te Atua tera e òhipa ra. Teie mau faufaa e mauhia nei e te fenua, tei türama ia i te haafänauraa ìnaì a te Moana Nui A Hiva  tei âpeehia e te mau tiàrama o te pö, i te mea te fenua te vairaa puna, tei faatià i te märamarama e tià e täutai i ta te ôpape taahiraa i roto, e te faahoìraa e parau teie no te mamarï i te haapataraa huero ïà, ta te mau âpoo mataì e faaäu ra e täpiri aau änei, e aore ra e pätë te tutau i tua, e aore ia täàoào te mataì. O teie te tahi mau täpura òhipa ia ära-noa-hia na e te mau Hui-Aito i mua ra, i te äraraa i nià i te aru, ia ruperupe noa, o te maitaì ia te reira no te oraraa vaamataèinaa o te nünaa. Te Hui-Aito, e mau taata rätou e pärahi tämau nei i nià i te ôuma o te Atua, te Hui e mau taata teie tei ìte i te faaroo te piiraa a te aru, te reo, te ôriò mata, te pütarià ia o te Atua. Te Aito e tiàraa teie no te paruru i te aru a te Atua, ia òre ia huenanehia, ia òre ia viivii, i parauhia ai to te Hui-Aito. Ta rätou parauraa i te Atua, Taaroa Nui Tumu Tahi. I te taime ra a viivii ai te marae i te toto taata, i faatea ai te Hui-Aito, moè atoà atu ra tei iòa o Taaroa Nui Tumu Tahi, vai mai nei o Taaroa. I tupu ai te tohu a te tahuà ra o Vaitä, Te ìte nei au, i mua ia ù nei te auraa o teie mau peu maere rahi. Tenä mai te fänauà ùnaùna a te Tumu, e haere mai e hiò i teie uru räau i Taputapuätea nei. E tino ê to rätou, e tino ê to tätou, hoê anaè rä huru, no te Tumu mai. E riro teie nei fenua ia rätou, e mou teie haapaòraa tahito nei, e e tae mai hoì te mau manu moà o te moana i te fenua nei, e haere mai e taìhaa i ta teie räau i motu e haapii nei.(Teuira HENRY, Tahiti i e pö, àpi 16). E au ra e, e piti pupu taata teie e tohuhia nei e Vaitä, te fanauà ùnaùna a te tumu, no te haere mai e hiò te vahi haamoriraa i Taputapuätea, te mau manu moà o te moana, e haere mai e òtohaa i nià i te  òhipa i tupu. Teie mau òhipa i tupu i te faaìteraa a te tuatua, e tià ia parauhia e täpura òhipa teie tei haamatahia mai i te taime i hoì mai te faatereraa a te Ètärëtia a te Metia i roto i te mau tamarii Mäòhi, e tià ia parauhia e 66 mätahiti te Totaiete Faatupuraa Parau no Ronetona faatereraa tei parauhia Ètärëtia Porotetani no Tahiti, 100 mätahiti te Totaiete Faatupuraa Parau no Pari faatereraa, tei Parauhia Ètärëtia Porotetani no Ôtiania. I te mahana mätamua no te märama no Tetepa Tauatini e iva hänere e ono àhuru mä toru i faataa-ê-hia ai tätou i te faatereraa a te mau mitionare, i parauhia te Ètärëtia Èvaneria no/i Porinetia Färani e i te piti tauatini maha ra Ètärëtia Porotetani Mäòhi e tae mai i teie nei. Teie mau huru parauraa no te faahau ia tätou i to tätou tuatua, e to tätou Atua, i te parauraa a te mau Hui-Aito, Taaroa Nui Tumu Tahi, i te  taiòraa Taramo no teie  mahana te faahitihia nei teie parau, 3 E Atua rahi hoì te Fatu. E arii rahi i nià i te mau atua atoà ra, te faaitoito noa mai teie huru faahitiraa manaò, a mau tuatau i to tätou faaroo Mäòhi mau, teie tahi haapotoraa no ta tätou mau taiòraa no teie mahana :      

-Taramo 95, 4 Tei ta na rima te vähi hohonu o te fenua nei, e te teiteiraa o te mau mouà ra, no na ia.

-Hapatuta 2, 4 Inaha, o te teòteò ra aore ia i tià to na âau i roto ia na ra; o tei tiàhia ra i te faaroo ra, e ora ia.

-2 Timoteo 1, 13 E täpeà maitaì i te hiroà parau mau ta òe i ìte ia ù nei ra, mä te faaroo e te hinaaro i te Metia ra ia Ietu.

-Ruta èv. 17, 6 Ua parau atu ra te Fatu: «Ahiri e faaroo to òutou e mai te huero tïnapi noa iho ä te rahi, e parau noa atu ia òutou i teie nei tütämino: «Ia mahiti tumu òe, e ia tänuhia òe i raro i te tai, na na ia e faaroo mai.»

Te Ahiri te faaìte noa mai ra te rahi o te òhipa e rave, e naeàhia ai i te rahi o te huero tïnapi, e huero maa teie mea rahi noa ae i te huà one o te pae tähatai, e tià ia faaäuhia i te huero pota te feiä tänu maa e ìte rätou i te haìhaì o teie huero. Te reo o Ietu i nià i te faaueraa a te mau âpotetoro, E faarahi mai i to mätou faaroo, te ìriti nei o Ietu i te hoê täpura òhipa ta na e höroà nei te hohoà o te huero e te tumu räau ta te taiòraa e faahiti ra i te tütämino. I reira to Ietu parauraa i te huru o te fatu òhipa, e to na tävini na te tävini e rave te taatoàraa o te òhipa, te faaapu, te faaamu i te mau puaa, ia oti ia hoì i te fare o te fatu, tunu te maa, faanaho te àiraa maa, ia tämaa to na fatu, âreà te tävini ra oia te hopeà. Ia au i teie huru faanahoraa te hinaaro nei o Ietu ia ìtehia te àifaitoraa te taata i te taata. I te mea i roto i te taata to te Atua faatumuraa i to na aroha e to na here, o te mea ia e tià i te tauturu i te taata i te àtuàturaa i te haìhaì o to na faaroo. E au atu ra te faaroo tei roto i te märu, te faatura, te haehaa, e huero ai i reira e tupu ai te mau faanahoraa no te taäa e aore ra täìhitumu ia matara te aa e faaäpiäpi ra te tupu maitaìraa te ora i roto i te âau o te taata. I te parauraa ra a Ietu te vai nei te tahi tiaìtururaa, Ia mahiti tumu òe, e ia tänuhia òe i raro i te tai, na na ia e faaroo mai. E täui te vahi o teie tumu räau i nià i te fenua, i roto i te tai, to na auraa ra te faaroo no te ora e farerei te fenua i te tai. Teie nei ra te vai nei te nünaa Paùmotu e parau nei te tai no te faahiti ia tei roto i te fare no te haere i rapae, oia hoì haere i tai, no te faaìte noa ia i te faufaa o te reo Mäòhi. I roto ra i ta tätou ìrava te tai e faahitihia ra e miti, te mea päpü ra te Faarooraa no te faatupu ia i te ora. Te haapiiraa e höroàhia nei e Ietu i roto i teie mau parau e faahitihia nei, te huero tïnapi, te tutamino, te fatu, e to na tävini, ia àifaïto te tuharaa òhipa, e òhipa ta te fenua, e òhipa ta te miti, e òhipa ta te taata, e maitaì ai te oraraa vaamataèinaa o te nünaa. Èi reira noa e rahi ai te faaroo, a hiò na tätou i te aru tupu âmui noa rätou ma te hau, tiare noa, àhune noa, hotu noa, ia au te huru o te reira àihere, tumu räau, te ôfaì, tei pehehia e te mau âpoo mataì, tei türamahia e te mau tiàrama, ma te faaea-noa i roto i te ineine no te färii i te taata e no te faaroo i te reo o te taata, ia pii, i reira e faahoì ai te reo ia pïnaì. Naò noa ia tätou i te parauraa e, e mau faaueraa teie ta te Ietu e parau mai nei ia tätou ia haapaò te taata i ta na tuhaa, ma te ìte o te aroha mau teie e te here o te Atua Nui Tumu Tahi ta te aru e faaìte noa ra. Teie te reo o Ietu i te ìrava 10 Oia atoà òutou, ia ravehia e òutou te mau mea atoà i faauehia atu ia òutou na, e nä ô òutou: «Aita a mätou faufaa, a to mau tävini nei i hopoi atu; o tei au mau ia mätou ra, o ta mätou ia i rave iho nei, tïrärä.» Te tïrärä no te faaìte ia i te faufaa no te parau i faahitihia i roto anei i te hoê rata, i roto i te âpooraa, ia faatupuhia te parau èi òhipa ìtehia i roto i te mau faaueraa, tei hohoà mai ia au i te faaotiraa. Ei faaìteraa te mana o te parau i roto i te faaroo te mauhia e te ora, te ora rä te mori turäma ia i te ôrama i te haafänauraa a te pö. Ia na reira anaè tätou i te haere e haapii noa mai te àhiri, i te faufaa o te òhipa e toe i te rave ia tae i nià i te fäito i èrehia. I parau mai ai o Ietu ia tätou i teie mahana : «Ahiri e faaroo to òutou e mai te huero tïnapi noa iho ä te rahi, e parau noa atu ia òutou i teie nei tütämino: «Ia mahiti tumu òe, e ia tänuhia òe i raro i te tai, na na ia e faaroo mai.»

 

Teraì òr. Faatura.

     

 

Ruta èv. 16.19-31 Ärea

 

Tāpati 25 no Tetepa 2022.

Ärea

Taramo 146

1 E haamaitaì i te Fatu A haamaitaì i te Fatu, e ta ù värua.

2 E haamaitaì au i te Fatu, òi vai aè to ù ora; e himene au i ta ù Atua, òi vai aè au nei.

3 Eiaha e tiàturi i te hui arii, e te taata atoà, aita hoì o na e ora.

4 Te reva nei hoì to na värua, te hoì nei o ia i to na ra repo, mou roa atu ra ta na i ôpua i taua mahana ra.

5 E ao to na tei te Atua o Iatöpa te tauturu ia na, e tei to na Atua, tei i te Fatu to na tiàturiraa.

6 O tei hämani i te mau raì e te fenua, te tai e te mau mea atoà i roto ra; o tei haapaò i te parau mau na na e a muri noa atu.

7 O tei faatià mai i te feiä i hämani-ìno-hia, e ua horoà mai i te mäa na tei poìa ra. O te Fatu tei tätara i tei täpeàhia ra,

8 o te Fatu tei faaaraara i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau tià ra.

9 Te faaora nei te Fatu i te mau taata èê ra, te tauturu nei o ia i te ôtare e te vahine ìvi ra âreà te haereà o te paieti-òre ra, e huri-ê-hia ia.

10 E vai arii mai ä te Fatu e a muri noa atu. O to Atua, e Tiona, e tae noa atu i te mau uì atoà ra.

Hareruia.

Àmota 6.1-7

I te taiàta o te mau ärataì

1 E pohe to tei pärahi noa i Tiona ra, tei tiàturi i te mouà i Tämäria ra; o tei maìrihia i te iòa o te feiä rarahi o te fenua ra; te haere nei te ùtuafare o Ìteraèra i reira.

2 E haere atu òutou i Taräne, e hiò; e mai reira hoì a haere tià atu ai i Hamata rahi ra: e haere hoì i raro i Tata o te Firiteti: te hau ra änei ia i teie nei mau pätireia ? E rahi ra änei to rätou ôtià i to òutou ra ôtià?

3 E pohe to te feiä i tute ê atu i te mahana ìno ra, o tei tïtau i te pärahiraa o te rave ûàna ra:

4 o tei taòto i nià i te roì-tena, a tïtoo ai ia rätou iho i nià i te roì-hopohopoi ra; o tei àmu i te fanauà no roto i te nana ra, e te täfa no roto i te faaàmuraa ra;

5 o tei pehe i te òto o te näpara, e mai ia Tävita ua ìmi i te mau mea faaòtohia ra no rätou iho;

6 o tei täâuà rahi ia inu i te uaina, e ua faatävai ia rätou iho i te monoì maitaì ra; aita rä i roto i te pohe o Iotëfa.

7 E teie nei, o rätou te reva na ei tïtï i te feiä atoà e reva ei tïtï ra, e te àmuraa i tïtoo ia rätou iho ra, e faaòrehia ia.

1Timoteo 6.11-16

Te mau poroìraa hopeà

11 Âreà òe, e te taata o te Atua na, e maùe ê òe i te reira, e tapi rä i te parau tià, i te paieti, i te faaroo, i te hinaaro, i te faaòromaì, e te marü.

12 Rohi hua òe i te rohiraa maitaì ra i te faaroo; e haru i te ora mure òre, i parauhia ai hoì òe na, e ua fäì hoì i te fäìraa parau maitaì i mua i te aro o te ìte e rave rahi ra.

13 Te tuu atu nei au i te parau ia òe i mua i te aro o te Atua o tei faaora i te mau mea atoà nei, e to te Metia ra o to Ietu, o tei fäì i te fäìraa parau maitaì i te aro o Ponotio Pirato ra;

14 e e tämau mäite òe i taua parau nei, eiaha ei vähi ìno, eiaha ei hapa, e tae noa atu i te färaa mai o to tätou Fatu o Ietu Metia ra:

15 o ta na e faaìte mai ia tae i to na ra tau, ta tei Maitaì e tei ia na anaè te Mana ra, o te Arii o te hui arii, e te Fatu o te mau fatu ra;

16 tei ia na anaè te pohe òre, e te pärahi ra hoì i roto i te märamarama taeà-òre-hia e te taata atoà; o tei òre roa i hiòhia e te taata atoà, e eita roa hoì e tià ia hiò. Ei ia na te tura e te hau e a muri noa atu. Âmene.  

Ruta èv. 16.19-31

Te taata taoà rahi e o Rätaro

19 «I pärahi na te hoê taata taoà rahi, e àhu ùra e te àhu maitaì ta na e àhu, e àmuraa mäa rahi nehenehe ta na i te mau mahana atoà.

20 E te hoê taata taoà òre hoì o Rätaro te iòa, i vaiihohia i to na ra ùputa, ua àti roa i te maì.

21 Ua ani atu ra i te huà rii mäa i maìri no nià i te àmuraa mäa a taua taata taoà ra: e ua haere mai ra te mau ùrï ua mitimiti i te mau maì no na ra.

22 E pohe iho ra taua taata taoà òre ra, hopoihia atu ra o ia e te mau merahi i nià roa iho i te ôuma o Âperahäma. E pohe iho ra hoì taua taata taoà rahi ra, e tänuhia iho ra.

23 E àti atu ra o ia i te mäuiui rahi i häte, ua nänä aè ra i ta na mata i nià, ìte atu ra ia Âperahäma i te ätea ê, e ia Rätaro i nià iho i to na ôuma.

24 Ua pii atu ra o ia, nä ô atu ra: «E päìno, e Âperahäma e, e aroha mai òe ia ù, e tono mai òe ia Rätaro ia uhi o ia i ta na àuru rima i te pape, ei faatoètoè i ta ù arero nei; ua àti roa vau i te mäuiui rahi i teie nei auahi ura.»

25 Ua parau mai ra Âperahäma: «E ta ù tamaiti, a haamanaò na, e maitaì to òe i to oraraa ra, e e ìno hoì to Rätaro. I teie nei rä, ua faaîhia o ia i te òaòa, e ua àti òe i te mäuiui rahi.

26 E e ärea rahi hoì tei tuuhia i röpü ia tätou, e òre to ô nei e tae atu io òutou na ia haere atu; e òre atoà to ô na e tae mai i ô nei io mätou nei.»

27 Ua parau atu ra o ia: «Teie maori ta ù parau ia òe, e päìno:»E tono òe ia na i te fare o ta ù metua ra;

28 toopae hoì o ù taeaè, e aò atu o ia ia rätou, o te tae atoà mai rätou i roto i teie vähi mäuiui rahi.

29 Ua parau mai ra Âperahäma ia na: «Tei ia rätou Möte e te mau perofeta, a faaroo rätou i te reira.»

30 Ua parau atu ra o ia: «Eiaha, e päìno, e Âperahäma, ia haere atu rä te hoê taata ia rätou mai te pohe atu, e tätarahapa ia rätou.»

31 Ua parau mai ra o ia: «Ia òre rätou ia faaroo ia Möte e te mau perofeta ra, tià noa ä te hoê taata mai te pohe atu, e òre ä rätou e faaroo i te aò.»

Manaò.

Ärea, ua âano roa i teie nei i roto i to tätou oraraa, vaamataèinaa, poritita, ètärëtia, tei faatupu i te rauraa o te mau èà i faatorohia i roto i te mau faanahoraa tei faaätea te nünaa i te tumu no te ora ta te fenua e tïtau noa nei ia na ia faatura. I parauhia ai tätou e tamarii na te fenua, i te haereraa mai to tätou Fatu o Ietu Metia i te ao nei, e ua haere mai o ia i o na iho èi tamarii fänau püfenua ia faaroo e ia tiàturi te mau taata atoà e to te ao atoà nei te Tämaïti fänau tahi teie a te Atua Nui Tumu Tahi. I tae roa ai o Ietu i te ui e, O vai au te Tamaiti a te taata i ta te taata nei parauraa, e te ui-atoà-raa i te feiä faatere, O vai rä vau nei i ta òutou na parauraa. Teie na uiraa, no te haapäpü ia i to Ietu hinaaroraa e faatumu i te ôpuaraa faaora a te Atua i pïhaì iho i te taata tei firihia i te fenu maha, te here, te aroha, te parau mau, te parau tià. Ia ìte e ia färii te taata i teie tiàraa to Ietu ei Tamaiti na te taata, ua marua e ua faufaa òre te mau patu atoà e faataa ê nei i te taata i te Atua. Te haapäpü noa mai ra teie iòa i te tiàraa ärai o Ietu. Te mea ia i ètaèta ai to na reo i nià i te mau Päpaì parau e te mau Färitea ia nä ô mai ai o ia e : Aue òutou e te mau Päpaì parau e te mau Färitea, e haavare òutou. Te ôpani nei òutou i te ùputa o te pätireia o te ao i te taata nei, e òre òutou iho e tomo, e te feiä e tomo ra, te täpeà nei òutou (Mätaio 23, 13). No te mea te faaìte noa nei te fenua i te Atua, e tano ai tätou e parau e, ta te taata märamaramaraa i te parau o te Atua, ua haamäramarama atoà mai ia i ta na huru hiòraa i te parau o te fenua ; te huru auraa hoì e faanaho ra i te oraraa o te taata e to na fenua, te horoà atoà mai ra ia i te tahi türamaraa i nià i te mau auraa e täamu ra i te taata i to na Atua. Rau noa atu ai ta te mau nünaa hiòraa i teie parau, eita te parau o te taata e tano ia faataa-ê-hia i to te fenua e to te Atua. Te auraa, ia färii hope roa te taata i te fenua e te Atua, e märamarama ai o ia i to na parau ei taata ; te mea atoà rä te reira e horoà i te auraa i to na oraraa. Te faaìte noa mai ra teie manaò, te Atua e te fenua, hoê ä ia. Teie rä Parau i pü mai ai te fenua, eere ia i te tahi noa âmuiraa taò e faanaho ra i te tahi manaò, o te Atua iho rä te reira e òhipa ra, oia hoì to na te reira mana òhipa, e te mea hoì ta te reira parau i faatupu, ua riro ia ei ìte e ei faaìte i te Atua. Te märamarama noa ra tätou e, eita te parau o te fenua e hope noa i nià ia na iho, eere te fenua te haamataraa e te faahopeàraa o to na iho parau, eita te parau o te fenua e hope ia òre te reira parau ia riro ei fäìraa i te Atua, ei faaìteraa hoì i ta na ôpuaraa faaora. Te parau o te fenua, eere ia i te tahi parau hope, e parau rä i roto i to na tupuraa. E tïtauraa ta te Atua i te fenua, e tïtauraa atoà rä ta na i te taata ta na i haapärahi i nià i taua fenua ra. Te mea päpü ra te fenua e te èà e faatorohia i nià iho, no te faaïti ia i te ärea, e taua ïti ra te ìteraa ia te taata i to na täuaro tei haafärerei, tei hoìhoì, i te hauà no te monoì tiare Maurua. A faaroo na ra tätou i te haapotoraa no mau taiòraa i haapaòhia no teie mahana haamaitaìraa e haamoriraa na tätou : 

-Taramo 146, 8 o te Fatu tei faaaraara i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau tià ra.

-Amota 6, 6 o tei täâuà rahi ia inu i te uaina, e ua faatävai ia rätou iho i te monoì maitaì ra; aita rä i roto i te pohe o Iotëfa.

-1Timoteo 6 12 Rohi hua òe i te rohiraa maitaì ra i te faaroo; e haru i te ora mure òre, i parauhia ai hoì òe na, e ua fäì hoì i te fäìraa parau maitaì i mua i te aro o te ìte e rave rahi ra.

-Ruta èv. 16, 26 E e ärea rahi hoì tei tuuhia i röpü ia tätou, e òre to ô nei e tae atu io òutou na ia haere atu; e òre atoà to ô na e tae mai i ô nei io mätou nei.»

Te faaìte noa nei te Parau Maitaì no teie mahana te huru oraraa e tupu nei i teie mahana te ärea i faatupuhia e te taata ia au i te mau faufaa i faanaòhia e ana tei tuu ia na i nià i te hoê fäito, tei haamoè te tahi pae no to na täuaro. Te faaìte atoà nei o Ietu i roto i ta tätou parau no teie mahana i te tahi huru oraraa i ô mai i te fenua, e òre roa ra te hoê e tià e hoì mai, mai reira mai. Te raveà ta Ietu e höroà nei i roto i teie huru faatiàraa ia tià i te taata i te faaroo teie ia, «Ia òre rätou ia faaroo ia Möte e te mau perofeta ra, tià noa ä te hoê taata mai te pohe atu, e òre ä rätou e faaroo i te aò. Oia hoì, te faahoì ra o Ietu i te taata i roto i te parau, te parau ra o te Atua te tumu, oia hoì te fenua. I te fenua nei e faatupu hope roa ai te Aroha e te Here i to na täuaro. E piti vahi te tupuraa ta tätou parau no teie mahana : te vahi mätamua te oraraa no teie na taata, te taata taoà rahi, e oraraa fänaò e te maitaì tei tämaa noa i te mau mahana atoà î noa to na vaha i te maa, ta na mau ùrï tei àmu ia i te huà rii maa e maìri mai, mai nià i àiraa maa. Ua hopoihia mai ra te hoê taata maì tei î to na tino i te tutuà i te pae ùputa hoê-ä vahi to na e te ùrï, te aniraa a Rätaro ia àmu o ia te huà rii maa e maìri mai, mai nià i te àiraa maa, âreà te mau ùrï ua ìte e taata maì teie ua mitimiti i te vahi tei reira te maì o teie taata, naò ia tätou i te parauraa e, te hoa o Rätaro te mau ùrï ia, e ua ìte e taata teie mai to na fatu atoà. Te òhipa e ravehia nei e teie mau ùrï te faaära i to na fatu, e taata teie e hinaaro nei i te tauturu mea tià ia rapaauhia àita i tupu te âparauraa i roto ia Rätaro e teie taata taoà  e tae noa atu ai i te taime i hopoihia ai te tino o Rätaro i nià i te ôuma o Âperahäma. Pohe mai nei te taata taoà tänuhia atu ra : i teie vahi te tupuraa te piti o te tuhaa, o Hate teie vahi ia au i te taiòraa, no ta tätou parau i teie mahana, ua na rotohia teie taata i te ôpu o te fenua i te faafänau-faahou-raa-hia e ua tae i hate, te vahi àuàuraa niho tei pïhaì iho i te ahi ura, i te tuöraa atu ia Âperahäma e päìno e ta ù metua here e, a tono mai ia Rätaro ia haere mai e faarari i to ù ìri ùtu i te päpe, no te mea e area rahi e faataaê ra ia Rätaro ia Âperahäma, ua onoöno teie taata taoà rahi i te ìmiraa i te mau raveà atoà, no na e no to na mau taeaè, te parau a Âperahäma tei ia rätou o Möte, e te mau perofeta a faaroo ia rätou, e òre to ô nei e tae atu ia òe na, e òre atoà to reira e tae mai i ù nei. Ua manaò teie taata taoà i hate e tià ia na ia faaue ia tono ia Rätaro, no te tauturu ia na e to na mau taeaè pae. I teie huru parauraa na Âperahäma te höroà nei i teie taata taoà i to na tiàmaraa ia faaea noa i pïhaì iho i te ahi ura ia poìhä noa i te päpe, e aore ia vai iho i te ahi ia täma i to na viivii. Te parau ra no Rätaro mea päpü te pärahi ra i nià i te ôuma o Âperahäma. A hoì mai na ra tätou i te fenua nei, i roto i to tätou ao nehenehe tei parauhia o Mäòhi Nui, tupu noa te mau tumu maa, hiti noa te mahana, topa noa te ua, puhi hau noa te mataì, fati tautau te miti i nià i te aau, topa noa te ìnaa, te ature, e te vai atu ra… no te faaìte ia e mau taata taoà rahi tätou i Mäòhi Nui nei, te nahe nei ra ta tätou tiàauraa teie mau faufaa, te ìte nei ra tätou e no mai i Te Atua Nui Tumu Tahi ra teie mau maitaì, ia fäì tätou e o to tätou ora teie ta te fenua e haafänau noa nei no te faaâpï i to tätou faaroo. Ia faahau ia, ia tätou i to tätou fenua ia Mäòhi Nui. Ia tupu te faahauraa i te fenua o te Atua iho tera e haafänau ra ia tätou e Tamarii no te fenua, e Tamarii na e Atua, te ìteraa a tätou èi Mäòhi, mai te fäì atoà ra e, e òhipa na te Atua te reira mäòhiraa to tätou, e huru atoà hoì te reira ta na i hinaaro èi huru no tätou. Te tumu ia te reira iòa i noaa ai ia tätou. Te reira te iòa ta te Atua i topa no tätou, e te taura täamu atoà te reira ia tätou i te Atua. Eiaha atoà rä ia moèhia ia tätou e, nä roto i to tätou parauraa ia tätou e, e tamarii na te Atua, te haapäpü atoà ra tätou e, ua herehia tätou, aita tätou i vai-iho-hia i roto i te ère, e te òereraa, te fänaò nei ra tätou i te mau maitaì ta to na here i höroà noa èi maitaì e èi ora no tätou. No reira tätou i parau ai i te Atua, e Päìno Metua no te Here. Eere no te mahana hoê nei te Atua i Metua ai, eere atoà no te mau taime òaòa anaè. Ua riro rä to na metuaraa èi haapäpüraa mai ia tätou e, tei pïhaì noa o Na ia tätou i to tätou mau tuuraa âvae atoà, e o te ora anaè ta na i hinaaro no tätou. Ua höroà mai te Atua i te reo, te peu tumu, te mäa e au ia tätou, te fenua nehenehe e te ruperupe tei riro èi nounouraa na te rätere, ua höroà atoà mai te Atua i te Faaroo Mäòhi tei niuhia i nià i te Aroha e te Here.   

 

Teraì òr. Faatura.

Ruta èv. 16.1-13 Paari

 

Tāpati 18 no Tetepa 2022.

Paari

Taramo 113

1 E haamaitaì i te Fatu E haamaitaì, e te mau tävini o te Fatu, e haamaitaì i te iòa o te Fatu.

2 Ia haamaitaìhia te iòa o te Fatu, i teie nei e a muri noa atu.

3 Mai te hitiraa mai o te mahana e tae noa atu i to na maìriraa, ia haamaitaìhia te iòa o te Fatu.

4 E teitei to te Fatu i to te mau fenua atoà. E ua hau to na hanahana i te teitei i to te mau raì atoà ra.

5 O vai tei au i to tätou Atua i te Fatu, o tei teitei e ua pärahi i te raì teitei?

6 Te tuu haèhaa nei rä o ia i te hiòraa mai i raro i nià i te mau raì, e i nià atoà i te fenua.

7 Te faateitei nei o ia i tei haèhaa ra no raro mai i te repo ra, e ua faateitei i tei àti no raro i te tiriäpera ra,

8 i te faanohoraa o ia ia na i roto i te feiä rarahi ra, i roto i te feiä rarahi ra i to na iho ra pupu taata.

9 O tei haapärahi i te vahine fänautama òre i te ùtuafare ra, ei metua vahine òaòa i ta na ra mau tamarii.

Hareruia.

Àmota 8.4-7

Te taehae o te feiä hoohoo

4 E faaroo mai i teie, e te feiä i horomii noa i tei àti ra, i te faaòre i te taata rii i nià i te fenua nei,

5 i te nä-ô-raa e, Â hea ra e òre ai te märama âpï nei, ia hoo tätou i te mäa? E te täpati, ia faaìteìte tätou i te tïtona? E te faaitiraa i te êfä, e te tëtera ia rahi, e te faahaparaa i te mau fäito i te haavare;

6 e te hooraa i tei àti ra i te ârio, e tei ère i nä tämaa e piti ra; e te hooraa i te tïtona i faaruèhia ra.

7 Ua tapu te Fatu i te maitaì rahi o Iatöpa, E òre roa e moè ia ù ta rätou atoà ra mau parau.

1 Timoteo 2.1-8

Aroharaa

1 Pauro, e âpotetoro na Ietu Metia, i haapaòhia e te Atua to tätou ora, e to tätou Fatu o Ietu Metia, to tätou tiàturiraa,

2 ia Timoteo, ta ù tamaiti mau i te faaroo ra. Ei ia òe te aroha mau, e te hämani maitaì, e te hau no ô mai i te Atua i to tätou Metua ra, e no te Metia ra no Ietu to tätou Fatu nei ra.

E ara i te mau haapiiraa haavare

3 I poroì mäite atu ra vau ia òe ia ù i haere i Mätetönia ra, e pärahi ä òe i Èfetia ra, ia aò atu òe i te tahi pae eiaha rätou e haapii i te parau èê.

4 E eiaha e haapaò i te fäpura, e te àufau fänauraa hopeà òre e tupu ai te märô ra, aore te itoito a te Atua i te faaroo nei.

5 E te hopeà o taua poroì nei o te aroha ia no roto i te âau viivii òre ra, e te âau maitaì, e te faaroo haavare òre;

6 o tei òre i haapaòhia e te tahi pae ra, e ua òhipa ê aè nei i te parau maamaa ra;

7 i hinaaro e ei haapii-ture rätou; aita rä i ìte i ta rätou iho e parau ra, e te mau mea i märöhia e rätou ra.

8 Ua ìte rä tätou e, e mea maitaì te ture, ia au ta te taata raveraa i taua ture ra.

Ruta èv. 16.1-13

Te parapore o te tävini haapaò maitaì.

1 Ua parau atoà atu ra Ietu i ta na ra mau pipi: «E tïàau to te hoê taata taoà rahi ra, e i fäìhia mai o ia e ua pau ta na taoà i taua tïàau ra.

2 Ua parau atu ra o ia ia na, nä ô atu ra: «E aha teie roo ia òe ta ù e faaroo nei? A faaìte mai i te parau i to òe na töroà, a tirë roa òe i te tïàau.»

3 Ua nä ô noa iho ra taua tïàau ra i roto ia na iho: «E aha rä vau? Te hopoi ê nei ta ù fatu i te töroà tïàau ia ù nei: eita e tià ia ù ia faaàpu, e haamä hoì au ia ani haere.

4 E nä ô vau  Ia färiihia mai au e rätou i roto i to rätou mau fare, ia faaèrehia vau i te töroà tïàau ra »

5 Ua tii atu ra o ia i te mau àmutärahu atoà a taua fatu no na ra, ua ui atu ra o ia i te hoê: «E hia a ta ù fatu taoà ia òe aore i hoo na?»

6 Ua parau mai ra o ia: «Hoê hänere pato monoì. «Ua parau atu ra taua tïàau ra ia na: «A rave i te pëpa na òe, a pärahi i raro i tënä na, a päpaì ai e, e pae àhuru.»

7 Ua ui atu ra o ia i te tahi: «E hia a òe taoà aore i hoo na? «Ua nä ô mai ra o ia: «Hoê hänere tora tïtona. «Ua parau atu ra o ia ia na: «A rave i te pëpa na òe, a päpaì ai e, e vaù àhuru.»

8 Haamaitaì atu ra te fatu i te räveà a taua tïàau parau tià òre ra; e paari rahi hoì to te tamarii o teie nei ao i ta rätou ra mau peu, i to te tamarii o te märamarama.

9 E teie nei, e parau atu vau ia òutou: e faatauà atu òutou i te tauà no òutou i te taoà haavare nei, e ia tuua-ê-hia òutou ra, ia färiihia òutou e rätou i roto i te fare tähuti òre ra.

10 O tei haapaò maitaì i te mea iti ra, ua haapaò maitaì atoà i te mea rahi; e o tei òre i haapaò i te mea iti ra, aore atoà ia i haapaò i te mea rahi.

11 E teie nei, aore òutou i haapaò i te taoà haavare ra, nä vai e tuu atu ia òutou i te taoà mau?

12 E aore òutou i haapaò i te raveraa i ta vëtahi ê ra, nä vai e tuu atu ia òutou i te rave i ta òutou iho?

13 Aore e tävini e tià ia faaroo atu i te fatu piti: e riro o ia i te òre i te au atu i te tahi, e te au atu i te tahi; e aore ia, e riro i te haapaò atu i te tahi e te faaruè täùe atu i te tahi. O òutou nei hoì e òre e tià ia faaroo i te Atua e te Mämona.

Manaò.

Pae àhuru toma i nià i te hänere, vaù àhuru toma i nià i te hänere, teie tahi huru täpihooraa e täpihaaraa e vare-noa-hia nei e te mau taata i roto i to tätou oraraa, e mau faanahoraa teie no te haahepohepo i te oraraa vaamataèinaa. Mai teie te huru te paparaahia te oraraa i teie mahana, tei faatomahia i nià i te mau faufaa e faanaòhia nei e tätou, i nià i te maa e mea toma tei maraa, i nià i te fenua, i nià i te mau täuihaa, e te vai atu ra… teie mau faataninitoraa i to tätou oraraa no te faataahuri i to tätou oraraa i roto i te pau e te peàpeà, mau ti ra te rähu a te Atua Nui Tumu Tahi e vai noa i roto i to na huru tuatau, e òre e vare i te mau peu a te taata, ua ùaa noa te tiare Maurua no te taata ora e no te taata pohe no te faaìte ia te paari e mauhia ra e te fenua, te fenua Mäòhi, e no te mau taata atoà tei here ia Mäòhi Nui. Te mätamua o te paari te mataùraa i te Atua faatupu ora, tei here e tei aroha, ua ìte maitaì tätou i te reira, Ia rau hoì te taata, e rau atoà ia ta tätou hiòraa i te Atua, e rau hoì te iòa ta tätou e horoà no te Atua, aita rä te reira e haafifi ra i te hoêraa o te Atua, inaha e tupuraa te reira no to na hinaaro. Nä ô noa na tätou, te hereraa ia na iho, eere ia te òreraa e ìte, te òreraa hoì e färii i te tahi i roto i to na taa-ê-raa, to òe rä te reira haapäpüraa e, te mea e au no òe, e au atoà ia no te tahi ; e te mea hoì të òre e au no òe ra, eita atoà ia e au no te tahi. Mai te peu e tano òe e maìri i te iòa o te Atua, no te aha te tahi atu nünaa e òre ai e tano e nä reira atoà ; na vai i horoà ia òe i te parau faatià i te täpeàraa i te tiàmäraa ta te Atua i horoà no te taata. Ia taa ê ta te tahi hiòraa i te Atua, e aha to reira fifi, inaha nä roto noa i to òe maìriraa i te iòa o te Atua, ua taa ê atoà ta òe hiòraa i te Atua. Ahiri, ta vai te hiòraa i taa ê, ta òe aore ra ta rätou. Te parau hoì o te fenua, eere änei e, te parau atoà ia o te taata mä to na reo, to na hiroà, ta na peu, to na paari e ta na huru faanahoraa i te oraraa. E maere änei ia tätou ia taa ê ta te tahi hiòraa i te oraraa i ta te tahi, ia taa ê hoì ta na märamaramaraa i te auraa e täamu ra ia na i te Atua i ta te tahi atu nünaa. Te reira te auraa o te parau o te hoê i roto i te paari. No reira, ta tätou faahaparaa i te tahi mau nünaa, no te mea noa te taa ê ra ta rätou hiòraa i te mau parau e rave rahi, ua riro ia ei faahaparaa i te Atua. Ua ìte tätou i te mea maitaì, e nä ô noa ia tätou i te parau te Atua i te taata ta na i hämani. Aita e faufaa e faarahi i te tatararaa, te faahororaa manaò, e tano ia parauhia e, ua hope roa te mau mea atoà i te parauhia i roto i te mau puè taò, ua ìte tätou i te mea maitaì. Te auraa, ua ìte tätou i te mea ta te Atua e hinaaro ra ia rave tätou. E òhipa teie i roto ia tätou e to tätou Atua Nui Tumu Tahi. Tano maitaì ai teie mau reo i roto i te mau taiòraa no teie mahana, teie te haapotoraa :

-Taramo 113, 7 Te faateitei nei o ia i tei haèhaa ra no raro mai i te repo ra, e ua faateitei i tei àti no raro i te tiriäpera ra,

-Amota 8, 7 Ua tapu te Fatu i te maitaì rahi o Iatöpa, E òre roa e moè ia ù ta rätou atoà ra mau parau.

-1 Timoteo 2, 8 Ua ìte rä tätou e, e mea maitaì te ture, ia au ta te taata raveraa i taua ture ra.

-Ruta èv.16, 8 Haamaitaì atu ra te fatu i te räveà a taua tïàau parau tià òre ra; e paari rahi hoì to te tamarii o teie nei ao i ta rätou ra mau peu, i to te tamarii o te märamarama.

Te Paari, te Peu, te Märamarama, Nehenehe noa ai te parau, te vai atoà ra te fifi, o te manaò te taata e ta na i manaò ra, ua au ia i te Atua. No reira te faufaa ia haamanaò-noa-hia teie reo to te päpaì taramo e parau ra : E rämepa ta òe parau i to ù nei âvae, e tiàrama no to ù nei mau èà (Taramo 119, 105). Parau noa ai tätou e, ua ìte òe i te mea maitaì, ia ìte atoà tätou e, eita te taata e mono i te Atua, i te mau taime atoà rä, e hinaaro o ia i te tauturu ia òre ia rara to na mau manaò. I te reira vähi ra, aita ä o ia i haamata i te faanaho i to na manaò, ua ineine te tauturu, maoro noa ia na i te aniraa atu. Teie te tahi : A ui na i te mau puaa te mau ânimara, e na rätou e haapii mai ; e te mau manu o te reva, e na rätou e faaìte mai ia òe ; e aore ra, a ui i te fenua, e na na e parau mai ; e te ià atoà o te moana, e na rätou e faaìte mai ia òe Iöpa 12, 7. Teie atoà te tahi : Eere teie nei parau ta ù e parau atu ia òe i teie nei mahana i te mea ìteä òre e òe, eere hoì tei te ätea ê. Aore i nià i te raì, a parau ai òe e : O vai to tätou e haere i nià i te raì, e tii i taua parau ra e hopoi mai ia tätou nei, ia faaroo atu tätou e ia haapaò. Eere hoì tei te tahi pae moana mai, a parau ai òe e : O vai to tätou e fano i te moana, e tii i taua parau ra, e hopoi mai ia tätou nei, ia faaroo atu tätou e ia haapaò. Tei pïhaì iho rä taua parau nei ia òe, tei to vaha, e tei to âau, ia haapaò òe i te reira Teuteronomi 30, 11-14. Haamanaò noa na e, teie parau ta tätou e faahiti noa nei, te pïpïria, eita hoì e hope i roto i te reira puta. Eiaha ia moèhia ia tätou e, i te matahurahura o teie nei ao, i te parauraa te Atua, aita ta na parau i riro mai ei reta, ei taò, ei ìrava, ei puta. Ua riro mai rä ei märamarama, ei fenua, ei räau, ei manu, ei puaa, ei mahana, ei fetià, ei âvaè. Te nä ô ra te paari o te Mäòhi : E tarià to te mau mea atoà, to te fenua e te moana, to te mataì, to te vero, to te fafatatiri, to te püahiohio, to te ureuretiàmoana, e faaroo ; e tarià to te fetià, to te âvaè, to te rä, to te uira, to te tau mä te taiò, to te moana hauriuri, to te mau mautai, i faaroo anaè ia i te reo o te nuu atua (T. HENRY, 406). Ia parau mai hoì o Iöpa e, e ani i te puaa, te räau, te fenua, te manu, te ià, no te mea ia e tarià to rätou, ua ìte rätou i te parau, no te mea no roto mai rätou i te parau. Te nä ô ra o Ioane no Ietu : E rave rahi ä ta Ietu peu i rave, àhiri i hope atoà i te päpaìhia, te manaò nei au e òre e tià i to te ao atoà nei ia färii mai i taua mau puta ra, àhiri i päpaìhia Ioane 21, 25. A tae atu ai i te Atua Metua, e hope änei to na parau i roto i te tahi puta päpaìhia e te rima o te taata ta na iho i hämani. Te Atua iho të haapäpü ra e : Eere to ù manaò i to òutou ra manaò ; eere to òutou ra haereà i to ù ra haereà, te nä reira mai ra Te Atua Nui Tumu Tahi. Mai te raì nei, e teitei rahi to na i to te fenua, oia atoà to ù ra haereà, e teitei ia i to òutou haereà, e to ù ra mau manaò, i to òutou ra mau manaò Ìtaia 55, 8-9. Ua tae roa tätou i te tahi fäito e, aita tätou i ìte faahou e aha ta tätou e parau i nià i te Atua ia òre tätou ia faahiti i te tahi parau no roto i teie puta, te auraa, teie ta tätou e parau noa nei, eere na tätou, eere no roto i to tätou âau, mai te mea atu ra e Atua puta teie ta tätou e haamori nei. Te tiàturiraa ia o te tahi pae o tätou ia ueue i te pïpïria a parau ai e, teie te ora. Tätou i nä reira, aita änei tätou i haafaufaa òre i te Atua e ta na rahu. Mai te mea atu ra ia e, eita te parau a te Atua, e te mea i tupu mai no roto i ta na parau, e horoà i te ora, te ueueraa rä i te puta, òre noa atu ai e märamarama i te auraa o te mea i päpaìhia, te mea ia e horoà i te ora. No reira èita e tià e haafäito i te Atua i te moni o te mea ia e töpä tari ai te täpihooraa ia paèpaèhia ra i nià i te faufaa tumu o te fenua, mai teie e faahitihia nei i roto i ta tätou parau no teie mahana te monoì e te tïtona. Te ìteraa te fatu i te òhipa i tupu i te rave a te tiàau, te pee òre te mau tärahu a te taata i tärahu, ua riri te fatu ua tïtau i te tiàau no te faaära te tano òre te òhipa e tupu ra, ua tae te fatu i te tihati i te tiàau. Ua ìmi te tiàau i te mau raveà atoà ia faatopa tei tärahuhia, e ua faahiahia te fatu i teie raveà : 8 Haamaitaì atu ra te fatu i te räveà a taua tïàau parau tià òre ra; e paari rahi hoì to te tamarii o teie nei ao i ta rätou ra mau peu, i to te tamarii o te märamarama. E faanahoraa au teie no roto i te täpihooraa, e tuu te toma i nià i te hoo, e âpï te taata i tärahu, e âpï te fatu, e mau noa te tiàau i ta na òhipa. Te auraa ra te taata tera e hinaarohia ra, èita ra te moni, ia rahi te taata e rahi te moni, ia ïti te taata e ïti atoà te moni, ia papahia te täpihooraa i nià i te moni, topatari ia fatu òhipa. Ei hiòraa na tätou Makatea, e ra e tià noa mai ra, ua topatari te moni i te rave a te fenua 49 mätahiti i te heruraahia, päura âtömï 30 mätahiti, teie uira âtömï te hoohia ra i Färani, i Europa, e i te mau fenua atoà, e ra  Maururoa, Fangataufa, Tureia, Hao, e vai noa mai ra ua topatari te moni, e te mau tumu haari e tià noa mai ra. E Mäòhi, e te mau Mäòhi atoà o teie fenua, tei here ia Mäòhi Nui, a mau to tätou tiàraa no te mau tamarii o te märamarama, te mau taiete atoà e hinaaro e faatupu ta rätou ôpuaraa i te fenua nei, ia äni te mau fatu fenua 60 toma i nià i te hänere, e na te mau fatu fenua e faatere i te taiete, 40 toma i nià hänere na te taiete, no te mea tumu no te ôpuaraa te fenua tera e mau ra. Peneiaè e moemoeä teie, e moemoeä ra e tià i te tano ia tae i teie hoê tau, e na te tau e faaìte mai. Te piti o te hiòraa, ta tätou poe, te parauhia nei ua topatari, àita, te tiàauraa te faanaho-faahou i mua ra te haamataraa na te mau òna te haere mai i te fenua nei, te täuiraa te faanahoraa ua haere tätou i te mau òna ra, ua haere tätou i nià i ta rätou tahua täpihooraa i reira to tätou haamataraa i te hepohepo, to na tiàraa mau na te taata e haere i te fare toa, eiaha ra na te fare toa e haere i te taata ra. No reira e paari rahi to tätou e te mau tamarii Mäòhi e te mau Mäòhi atoà o teie nei ao i ta tätou mau peu, i te tamarii o te märamarama.

 

Teraì òr. Faatura.