Mātaio 24.37-44. ÄRA.

 

Tāpati 27 no Novema 2022.

TĪAÌRAA HŌÊ

ÄRA.

Mau taiòraa.

Taramo 122.

1 Tire a te Moruta, a Tävita. Òaòa aè ra vau e te feiä atoà i parau mai ia ù e: «Tätou i nià i te fare o te Fatu»

2 Te tià nei to mätou âvae i teie nei i roto i to mau ùputa, e Ierutarëma e.

3 I patuhia Ierutarëma mai te ôire täàtiàti-hua-hia te mau fare ra.

4 I reira te mau ôpü ia paìùma ra, te mau ôpü a te Fatu, ei faaìteraa ia no Ìteraèra, e haamaitaì i te iòa o te Fatu.

5 I reira te mau teröno haavä ra i te haamau-raa-hia, te mau teröno o te ùtuafare o Tävita.

6 E pure ia Ierutarëma ia hau: «E maitaì to te feiä i hinaaro ia òe ra.

7 Ei hau to roto i to òe ra mau patu, e ei maitaì to roto i to òe ra mau fare arii ra.

8 No to ù ra mau taeaè e te mau hoa i parau ai au i teie nei: «Ei hau to roto ia òe ra.»

9 No te fare o to tätou Atua ra o te Fatu e tämau ai au i te ìmi i te maitaì no òe ra.

Ìtaia 2.1-5.

1 Te parau i faaìtehia mai ia Ìtaia a Âmota ra, ia Iüta e ia Ierutarëma E taìruru te mau êtene atoà i Ierutarëma

2 E riro ia tae i te mau mahana hopeà ra, e faatiàhia e te mouà ra o te fare o te Fatu i nià i te tupuaì mouà,  e faateiteihia ia i nià aè i te mau âivi; e taìruru atoà mai te mau êtene atoà ra i reira.

3 E rave rahi te taata e haere mä te parau e, E haere mai, e haere tätou i nià i te mouà o te Fatu, i te fare o te Atua o Iatöpa; e na na e haapii mai i ta na haapaòraa, e haere tätou nä te èà tä na e faaìte mai ra. I nä Tiona atu hoì te ture i te revaraa atu, e te parau a te Fatu, i nä Ierutarëma atu ia.

4 Na na e haavä i roto i te mau êtene, e e faataa i te parau i te taata atoà e rave rahi; e tiàpaì rätou i ta rätou òè ei âuri ârote, e ta rätou mau mähae ei tipi tope räau; e òre te hoê fenua e àa mai i te tahi fenua i te òè, e òre hoì rätou e haapii faahou i te tamaì.

5 E te ùtuafare o Iatopa nei, e haere mai òutou, e na te parau märamarama a te Fatu tätou i te haere.

Rōma 13.11-14.

Ia ineine no te haereà mai o te Metia

11 E nä reira hoì tätou, no te mea ua ìte tätou e ua tae roa i te hora äraraa to tätou taòto: ua fätata hoì to tätou ora i teie nei, i to tätou faarooraa ra.

12 Ua poto roa te ruì, ua fätata roa te ao: e teie nei, e haapae atu tätou i te mau òhipa o te pöuri, e àhu tätou i te àhu o te ao.

13 Ei haere nehenehe to tätou mai te haere ao ra, eiaha mä te hori ra e te faataèro ra, eiaha te parau faufau e te taiàta ra, eiaha te märô e te feìi ra.

14 E tuu rä òutou i ta te Fatu ra ta Ietu Metia i nià iho ia òutou, e eiaha e faaitoito i ta te tino, ia tupu to te tino hinaaro.

Mātaio 24.37-44.

Aore e taata i ìte i taua mahana ra. E ara.

(Mär 13.32, 35; Rut 17.26-27,34-35; 12.39-40)

36 «Âreà te reira mahana e te reira hora, e òre roa te hoê e ìte, e òre hoì te mau merahi o te raì, mäori rä o ta ù Metua anaè ra.

37 Mai tei te ànotau ra ia Noa ra, oia atoà te haereà mai o te Tamaiti a te taata nei.

38 Mai tei te ànotau i mua iho i te tiruvi ra, te àmu ra rätou i te mäa e te inu ra, te faaipoipo ra e te höroà ra ia faaïpoïpohia, e tae roa aè ra i te mahana i tomo ai Noa i roto i te poti;

39 aore roa i ìte, e roohia noa iho ra rätou e te tiruvi, pau roa atu ra rätou; oia atoà te haereà mai o te Tamaiti a te taata nei.

40 Toopiti puè taata i roto i te âua ra; e riro te tahi, e ora atu te tahi.

41 Toopiti puè vahine i te täviriraa i te mure; e riro te tahi, e ora atu te tahi.

42 E teie nei, e ara, aore hoì òutou i ìte i te hora e tae mai ai to òutou Fatu.

43 Ua ìte rä òutou e, àhiri te taata fare i ìte i te hora e tae mai ai te èiä, e riro o ia i te ara, e òre e vaiiho noa i to na fare ia vävähi-noa-hia na.

44 E teie nei, ia pärahi ineine noa òutou; ei te hora manaò-òre-hia e òutou na e tae mai ai te Tamaiti a te taata nei.

Manaò.

I teie mahana i Mäòhi Nui nei, te ora nei tätou i roto i te teimaha no te mau hopoià tei faatupu i te hepohepo i roto i te mau ùtuafare, e teie mau faanahoraa ua haapitaataa te oraraa vaamataèinaa. E täpaò faaìte teie te vai nei i roto ia tätou te raveà i te faarururaa i teie mau òhipa e tuuhia mai nei i mua ia tätou, èi ärairaa i to tätou mätaù, ia noaa te puai. I te mea tei roto tätou i te àua no te maitaì i te nohoraa tei âuahia i te hinaaro o te Atua nui Tumu Tahi te mau taiòraa no teie mahana te tïtau mai nei ia tätou i roto i teie tiaìraa mätamua, te haapäpüraa i ta te Atua ôpuaraa faaora tei haapärahi ia tätou i roto, ia tià ia tätou ia ìte i te hau o to na hanahana. Noa atu te mau haafifiraa rau tei haaparuparu ia tätou tei pïhaì iho noa te Atua ia tätou i te äraraa, teie äraraa èi haapäpü ia, ia tätou. I mua i te huru oraraa e tupu nei ia mau maite tätou i to tätou faaroo i te Metia tei turäma tämau i to tätou mau haereà i te fenua nei, te fenua ra to tätou tauturu fatata roa, te tupu noa ra te hotu noa ra, te ùaa noa ra te tiare, te àihere noa te àihere, te täfifi noa ra te pohue, i te mau tumu räau, no te faaìte noa ia, ia tätou e, te tupu ùmu noa nei te ora e mauhia ra e te fenua. O te mana tämau teie no te Atua Nui Tumu Tahi tei haamanaò ia tätou, tupu noa atu ai te òto, te peàpeà, te mihi, e te hëva, e tià i te mau tiàrama o te reva e haamähanahana i to tätou âau, tei faahauhia e te mau âpoo mataì tei faahaumaruhia e te mau töpata ua. Ia tae mai te mataù, haamanaò noa ia tätou tei pïhaì iho te Atua Metua ia tätou, o te taime te reira e faaea muhu no ai no te ìteraa i te Atua, e ia haapuai te tiàturiraa i te tauturu ta te Atua e faatupu i roto i to tätou paruparu, e faaruruhia nei e tätou. A faaroo mai na rä i teie mau ìrava i ìritihia mai, mai roto mai i na taiòraa e maha e tià e papa i tätou haamori i roto i teie tiaìraa mätamua èi haamanaòraa na tätou i te òhipa ta te Atua i faatupu :  

-Taramo 122, 9 No te fare o to tätou Atua ra o te Fatu e tämau ai au i te ìmi i te maitaì no òe ra.

-Ìtaia 2, 5 E te ùtuafare o Iatopa nei, e haere mai òutou, e na te parau märamarama a te Fatu tätou i te haere.

-Roma 13, 12 Ua poto roa te ruì, ua fätata roa te ao: e teie nei, e haapae atu tätou i te mau òhipa o te pöuri, e àhu tätou i te àhu o te ao.

-Mätaio 24, 44 E teie nei, ia pärahi ineine noa òutou; ei te hora manaò-òre-hia e òutou na e tae mai ai te Tamaiti a te taata nei.

Ua tae tätou i roto i te tau no te tiaìraa, teie täpati te tiaìraa mätamua ia, te haamanaò mai nei ta tätou Parau Maitaì i te päpaìraa a Mätaio i te pene 24, i te mau ìrava 43 e tae i te ìrava 47, i te mau parau e tupu i te mau tau a muri atu, te parau no te mahana, te hora, te ìte, te mau merahi, te raì, teie mau faanahoraa te Metua noa o Ietu tei ìte. I te ànotau o Noa i tupu na te hoê faanahoraa i te faaäraraa a te Atua hou te tiruvi, oia atoà te haereà mai o te Tamaiti a te taata nei, e ara te taata. Ia paremo ra te taata i roto i te àmu maa, te inuraa, te faaipoiporaa, e riro te hiroà i roto i te navenave faufaa òre, i reira tätou e roohia mai ai i te àti tuatau, e moèhia te mahana te hora no te faatupuraa i te ora, te fauraò i faataahia i te tau o Noa te pähi ia, pau atu ra te tahi pae, ora atu ra o Noa e to na ùtuafare, oia atoà ia te haereà mai o te Tamaiti a te taata nei. Oia atoà na taata toopiti i roto i te âua te rave noa ra i te òhipa, e riro te tahi, e ora atu te tahi. Na vahine toopiti te täviri ra i te mure; e riro te tahi, e ora atu te tahi. Ia au i teie mau parau i tupu, te faaära nei o Ietu, i te ìrava 44 E teie nei, ia pärahi ineine noa òutou; ei te hora manaò-òre-hia e òutou na e tae mai ai te Tamaiti a te taata nei. Ia ìte rä òutou e, àhiri te taata fare i ìte i te hora e tae mai ai te èiä, e riro o ia i te ara, e òre e vaiiho noa i to na fare ia vävähi-noa-hia na. E teie nei, ia pärahi ineine noa òutou; ei te hora manaò-òre-hia e òutou na e tae mai ai te Tamaiti a te taata nei. Teie te huru no ta tätou taiòraa no teie mahana, tei faaìte i te huru no te oraraa vaamataèinaa, te vaamataèinaa ra te vahi ia i reira te nünaa e fänaò ai te maitaì o te fenua tei faatumuhia i nià i te Aroha e te Here o te Atua Nui Tumu Tahi. Ei fenua i reira e tupu ai te faaineineraa i te hora manaò-òre-hia e tae mai ai te Tamaiti a te taata.

Ia hiòhia ta tätou parau no teie mahana mea tià ia faaauhia i te feiä faaàpu, to rätou hinaaro rahi, ia òiòi ta rätou mäa i te tupu, ia òiòi te horoà mai i te mäa, ia òiòi i te para, ia òiòi te hoo na to rätou taime. I pinepine ai te hoì noa mai teie taò òiòi, no te mea ia te manaò ra te taata e, e taere roa ta te fenua. Te mea ia te taata i rahi ai te faaòhipa i te miti e rave rahi, ia tiàhia to na hinaaro faaòiòi, ia hoê aè ä hoturaa mai ta na mäa, ia hoê aè ä hoì paariraa mai. Mai te peu, nä roto i te fenua, te haapii noa nei te Atua i te taata i te ora, oia te mea e maitaì ai o ia i roto i to na oraraa, ia ìte atoà ia te taata i te tahi parau òhie roa i te märamarama, oia hoì, eere te fare haapiiraa, nä reira te òrometua të haere mai ia na ra, o ia rä të haere i te fare haapiiraa ra, fänaò atu ai o ia i te haapiiraa e horoàhia ra e te òrometua. Ia ìte atoà rä te taata e ia färii hoì, mai ta Ietu e haapii ra. Ua ìte tätou e, te haapii, te âfaìraa ia, te âpeeraa i te taata e haere ra i nià, ia òhie ta na tïtauraa i te ìte. Te ìte noa ra tätou e, eere na te taata e arataìhia e arataì i te taata na na te reira täpura òhipa. Aita rä e mea e ôpani ra i te taata i riro mai ei pipi, oia te taata i färii i te haapiiraa i horoàhia ia na, i te faaravaì, te haamaitaì, te faahohonu atu ä i te haapiiraa i horoàhia ia na, eiaha rä te faahuru-ê-raa i te värua o te haapiiraa i horoàhia ia na, ia au rii ihoä i te tahi manaò ta Ietu e parau ra : àhiri te taata fare i ìte i te hora e tae mai ai te èiä, e riro o ia i te ara, e òre e vaiiho noa i to na fare ia vävähi-noa-hia na. E nä ô ia tätou e, te taata e färii i te haapiiraa e horoàhia ra e te fenua, eita atoà ia taata e faaìno vave i te fenua. E taere rii ihoä paha ta te fenua, mea päpü rä, e e mea maitaì hoì. E ui na tätou : e tano änei te taata e mono i te fenua, te mataì, te mahana, te ua ; no te aha te taata e òre ai e vai iho i te fenua ia rave na i ta na tuhaa, oia te mea tei au i ta te Atua faanahoraa. Te mea e hinaarohia ra ia tätou, ia täpeà mai ia i te haapiiraa ta te fenua e horoà ra. Te mea ta teie reo o Ietu e parau nei ia ineine i te hora manaò-òre-hia, i te mea e tuhaa ta tätou i roto i te tupuraa, aore ra te òreraa te reira parau e tupu. Tei haamanaò noa mai e, i roto i te mau òhipa atoà ta te taata e rave, ia rave ihoä te taata tätaì tahi i ta na tuhaa nä mua roa, te mea noa ia e fätata ai o ia i te here o te Atua. E nä ô ia tätou e, na to tätou faaroo i ìriti i te mea i vai piri noa ai te ora , na Ietu rä i tatara roa i te ùputa. Te reira hoì manaò, aita ia i taa ê roa atu i te mea ta tätou i parau noa mai na e, te fenua, te ùputa ia o te raì, te auraa : to òe tiàturi i te fenua no te auraa o ta na horoà, ua ìriti ia ia òe i te ùputa o te raì. E ia rahi hoì te taata e tiàturi i te fenua, eere änei te hoêraa o te Atua ta rätou e faaìte ra, te mea mau hoì te reira e hanahana ai to na iòa, ia fäì te mau reo atoà i te aroha e te here o te Atua. I reira e faufaahia ai te faaineineraa i te hora manaò-òre-hia, teie reo èi faaìteraa i te parau no te âmuiraa o te feiä atoà tei riro ei fäìraa na rätou, te hora manaò-òre-hia e vai ra i roto ia rätou e te fenua. Te reira hoì hora, eere ia mai te tahi mea e vai tahaa noa mai ra i mua i te mata o te taata atoà, te tahi rä te reira e firi paari tei riro te fenua e to na î, te reo, te peu tumu, e te hiroà tumu, ei mau fenu tei anihia te taata e àtuàtu e e poihere maitaì. A tahi fenu i maìri, a paruparu te firi ; a piti fenu i maìri, a ìno roa teie firi. E hohoà firi noa ihoä te hohoà, aita rä e òhipa maitaì ta na e täpeà, e eita hoì e tano e tiàturi i te reira firi. I roto i te parauraa e, to ù fenua, aita te manaò i haamauhia i nià i te parau no te faturaa, no te faaìte noa rä e, aita e mama, aita e ärea e vai ra i roto i te taata e te fenua ; nä ô paì ia tätou e, aita e fenu e maìri ra i roto i te firi e täpeà ra i te taata i to na fenua. No reira, i nünaa ai te nünaa, eere no te tahi hiòraa räpae noa, eere no te mea e hiòraa maitaì to te tahi fenu, no te färiiraa rä te taata atoà, mai te faataa òre i te parau o te tahi i to te tahi, i te àtuàtu i te mau fenu atoà o teie firi tei parauhia e, nünaa. Teie hoì faufaa ta tätou e parau nei e : te fenua, te reo, te peu tumu, e te hiroà tumu, eere te reira i te faanehenehe noa, eita atoà o ia e rave i te huru tei au i te mata taata, te värua mau rä te reira o te pupu taata e ìte ra ia na ei nünaa, te täpau e horoà ra i te ora i roto i te tumu, te mau âmaa, e tae noa atu i te mau rauère rii. Te taata të òre teie värua e òhipa noa i roto ia na, te taata të òre e ìte, të òre hoì e färii i te reira värua, e ìmi ihoä o ia i te räveà faataa ê mai ia na ; e tei hau roa atu i te ìno, e ìmi o ia i te räveà faaìno i te tumu, oia hoì haapararï i te pupu taata ta te fenua i tähoê hou mai o ia, ta te fenua hoì e horoà noa ra i te täpau ora ia vai noa mai o ia i nià i te fenua. Ati tià aè te ao nei, ua hiò te taata i te fenua ei metua vahine no na, e o ia iho ra, ei tamarii ia na teie metua vahine. Aita e nünaa i hiò i te fenua ei metua täne no na. Mai te taura pito e täamu i te tamarii i to na metua vahine, mai te reira atoà te here i te täamuraa i te taata i to na fenua, te nünaa i to na fenua. Ia reira tätou i te faaineineraa i te hora manaò-òre-hia e tae mai ai te Tamaiti a te taata.

 

Teraì òr. Faatura.