Te mau taiòraa : Taramo 22 / Mareto 11, 1-10.

 

Poroì no te täpati 24 no mäti 2024 Täpati o te mau âmaa

 

Te mau taiòraa :  Taramo 22 / Mareto 11, 1-10.

 

Poroì : « E tätara, e pütö mai (ir 02vh)… no te Fatu teie e tià ai (ir 03vh)… » (…détacher-le et amenez-le moi… Le Seigneur en a besoin…)

 

Te tahi mau manao ômuaraa… Mai te mau matahiti atoà…/, mai te tau e te tau / to te Etärëtia Porotetani Mäòhi / haamanaò-tämau-noa-raa i te mau ôroà tumu / teie tärenahia i roto i to na oraraa faaroo. 

 

E teie te tahi o taua mau ôroà ra / o ta tätou e ìriti nei i teie täpati / ta tätou e ora atu i roto i te roaraa o teie hepetoma. Te ôroà vaereà marae, mätau-noa- hia i te parau te hepetoma moà, ìriti i te täpati o te mau âmaa räau, e ôpani i te täpati no te tià faahouraa.

 

Ôroà haamanaòraa, e aha rä ia te tauturu ia tätou, te hui faaroo o teie ànotau / i roto i te 21raa o te tënëtere…/ ia itoito noa i roto i te haere-tämau-raa / ia tae i roto i te faaroo mau. 

 

Ei raro aè noa rä ia tätou i te marumaru o te hau o te Atua e vai ai / Ua maitaì roa ia to tätou haereà.

 

Aroharaa… No reira / e ia òutou atoà na e to te hui faaroo tei pürara haere / i roto i nä poro e toru o teie ao mäohi / I te mau faatere o te mau tuhaa / te mau Ùtuafare Òrometua / Tiàtono / Tauturu Tiàtono / Haapii Parau Maitaì / te mau tauaro / to tätou tei faaturahia / mau âmuiraa / te mau tià i roto i te mau âmaa ohipa / te feiä paari, te feiä âpï, ta tätou mau tamarii, tätou e hope roa aè. Färii mai i te täpaò no te aroha / mai roto atu i te Faatereraa o ta tätou Etärëtia Porotetani Mäòh, i to tätou färereiraa i teie mahana. Ia ora na...

 

Ia ora na / eiaha noa i roto i terä manaò mätau-noa-hia e tätou i te parau e / ia maitaì i teie mahana / I roto rä i terä manaò ta te auraa o te taò e türama ra ia tätou / Ei ia òutou atoà na te ora / e aore ra / ei ia òutou atoà na te Atua / te tumu o te ora / Ta mätou te reira mänaònaòraa e to mätou atoà hinaaro / Ia Atua faahou te Atua i roto i te taata…/ Ua maitaì roa ia i reira.

 

Ei ômuaraa…Teie tätou i mua i te hoê o te mau päpaìraa a Märeto i te pene

11, nä te ìrava 01 e moti tià atu i te ìrava 10, e faatià ra i te parau no to Ietu tomoraa i roto i Iërütarëma.  E parau raaraa noa teie, e parau itehia e tätou, e hoì noa atoà mai ra i te mau matahiti atoà, ia tae ihoä rä i teie mau ärea rii : Te tomoraa i roto te mau àti o te Fatu…, to na poheraa…, e to na tiàfaahouraa… E aha rä ia to te Atua hinaaro, e aore ra, ta te Atua tïtauraa ia tätou, te ui no teie mahana.

 

Manaò tauturu…Te parau i tuuhia mai i mua ia tätou, tei te mau ìrava rii mätämua ia… Terä maa vähi iti e faahiti ra i te parau no to te Fatu tonoraa i nä pipi e toopiti, e tii i te hoê pinia âtini, aore ä i pärahihia e te taata…  «… e tätara, e pütö mai….» (ir.02vh). « E ia parau noa mai te hoê taata ia ôrua. E aha ôrua i rave ai. E parau atu, no te Fatu teie e tià ai, e nä na ia e tuu noa mai i reira ra». (ir.03).  

 

Ia haamaitaihia rä te Atua no teie maa parau iti, tei tae mai ia tätou ra i teie mahana. E täpura òhipa teie ta te Fatu i faaue i nä pipi, e tae roa mai ia tätou atoà i teie ànotau. E tii…, e tätara…, e pütö mai… Aita te Fatu i mäìti i te âtini, no te mea, te tävini ra o ia i to na fatu, oia hoì, ua riro ei rave òhipa nä te fatu o taua ânïmara ra. Te auraa, e fatu to teie ânïmara, o tei riro ei tavini nö na, mai te utaraa i te tauihaa, e aore ra, te utaraa i te taata, etv… 

 

Te hinaaro o te Fatu mäoti rä, te fanauà ia o te âtini, no te mea, aita o ia i tävini atu ra i te taata…, o ta te Fatu i faariro ei rave òhipa nä na…, no te amoraa ia na i nià i to na tua no te tomoraa i Iërütarëma.

 

Aita hoì teie fäito ânïmara io tätou nei : e âtini… Pëneiaè te vai ra, aita atoà rä hoì vau i ìte mata roa atu ra. Te ìte nei rä hoì tätou i te reira nä roto i te mau räveà o teie mahana… E maa ânïmara iti ra ia i te huru ètaèta aita e faaauraa. Aita anaè e hinaaro i te haere i mua, e òhipa i te rave…, e nënevahia ia tae i to na taime, e täùe i te taata i raro…, e patu atoà…, e te faaroo òre i te parau a to na fatu. Mai te reira rii ra to na huru ia märamaramahia atu, ia au i te mau räveà paari o teie tau. E maa huru iti rä ia to teie ânïmara, aita atoà ihoä i ätea roa atu i te huru o te taata i te ètaèta e te faaroo ore i te parau a te Atua… No tätou paì ia i teie mahana… 

 

Ia manaò anaè òutou, të hinaaro mai ra te Fatu i te âtini ? Aita hoì e âtini io tätou nei. E hinaaro to te Fatu i te TAATA…  Te faahitiraa parau i ô nei…, no te TÏTAURAA ia…, e no te FAARIRORAA ei RAVE ÒHIPA nä na…

E hinaaro te Fatu i te taata…, no te amoraa…, no te utaraa…, e aore ra…, no te âfaìraa…, i te Parau TiA e te Parau MaU i te vähi e tïtauhia ra ia tae. « Aujourd’hui, le Seigneur a besoin d’une MULE ???, d’un TRANS-PORTEUR ??? ».  

E rave rahi ia te reira mau taata, tei täàmu ia rätou i nià i te mau peu e rave rahi, e aita e faaauraa…, te riroraa te mataù…, te taiä…, te faatau…, te ùtuafare…, te faanahoraa…, te mau ôtoheraa… etv…, ei tumu rau òhu hänoa ai. Te täpura òhipa atoà ia ta te Fatu e faaue atoà mai ra ia tätou te uì taata no teie ànotau, mai ia òe e o vau. E tii… e tätara… e pütö mai i ô nei. Te tuhaa ia a te taata i faauehia…, e e faaue-atoà-hia mai ra i teie mahana, e haere e rave…, no te hinaaro o te Fatu e tià ai. E aha te auraa, te taata e hinaaro i te tävini mau no te Atua, e tätara o ia ia na i te mau mea atoà i reira o ia i te täàmuraa ia na.

 

Te tïtauraa ia i ô nei a te Faatereraa o te Etärëtia Porotetani Mäòhi, i te uì taata o teie mahana. No te faaâpïraa i te mau rave òhipa i teie mahana no a nanahi i roto i te Etärëtia. Ei fauraò no te utaraa i te Parau TiA e te Parau MaU i mua i te aro o teie nei ao. Ua rave te âtini i ta na tuhaa, no te faatupuraa i te hinaaro o te Fatu, te utaraa i nià i to na tua, no te tomoraa i Iërütarëma. Aita te âtini i faaètaèta ia na…, ua pee noa rä o ia…, aita roa atu aè i nënevahia…, aita i täùe i te Fatu i raro…, aita atoà i patu i te taata…, ua vaiiho noa o ia ia na iho ia pütö-noa-hia na…, no te hinaaro o te Fatu.

 

I te feiä tiàturi Atua, eiaha e faaètaèta i to òutou âau i te tïtauraa a te Fatu ia òutou, ua ìte òutou i teie nei, e të hinaaro mai ra te Fatu ia òutou, aita atu ra ta òutou e pariraa. E teie nei taata tiàturi Atua, tei nià òe i tei hea tumu räau i te täàmuraa ia òe, e aore ra, i te täàmuàmuraa ia òe. Ua here òe i to òe Atua ??? mai te peu e, Ê, oia mau änei ??? No te aha òe i faaturi ai i to tarià i te tïtauraa a to òe Fatu. Tei mua atu ä ia to òe turituri i to te âtini ??? A tätara mai ia òe i tenä… Te hinaaro mai ra te Fatu ia òe, ei rave ohipa nä na i roto i ta na Etärëtia. « Détache-toi de ton arbre…, et estime-toi heureux, le Seigneur à besoin de toi…, l’Eglise du Seigneur Jésus Christ a besoin de toi… » Alleluia Amen…

 

➢ Ia Atua faahou te Atua i nià i to na tiàraa Atua

➢ Ia Atua faahou te Atua i roto i teie ao Mäòhi

➢ Ia Atua faahou te Atua i roto i te taata

I reira noa iho teie nunaa Mäòhi e maitaì ai. Ia òre…, e nä-mua-hia te âtini i te ö i te Pätireia o te Atua ia òe. 

 

Maitaì noa tätou i teie ôroà vaereà marae… E ia òutou atoà na te Atua. Pärahi anaè, e ia ora...

 

Rahiti a AUTAI-TERIIITI, òrometua