Ruta èv. 2, 41-52. Tià-Mata-ara.

 

Mahana piti 31 no Tema/Titema 2024.

 

PURERAA PŌ MATAHITI ÂPĪ

 

Tià-Mata-ara.

 

I teie pö mätahiti, te faahaèhaa nei tätou i mua i te Atua Metua, ta na ärataìraa ia tätou i te roaraa no teie mätahiti, i te täuturu e te haamaitaìraa a te Atua Nui Tumu Tahi, te haamanaò noa mai ra te reira ia tätou te parau no to tätou Päpetitoraa, i teie reo no Ietu e naò ra e, èi pïhaì iho atoà vau ia òutou e tae noa atu i te hopeà o te fenua.

To tätou mau ùtuafare te fëtii tamarii tei ateä tei    

Taiòraa.

Taramo 136

1 E haamaitaì i te Fatu, e maitaì hoì to na, e tià hoì to na aroha i te vai-mäite-raa.

2 E haamaitaì i te Atua no te mau atua ra, e tià hoì to na aroha i te vai-mäite-raa.

3 E haamaitaì i te Fatu o te mau fatu ra, e tià hoì to na aroha i te vai-mäite-raa.

4 Ia na na ana anaè te mau räveà taa ê ra, e tià hoì to na aroha i te vai-mäite-raa.

5 Ia na o tei hämani i te mau raì i to na ra paari, e tià hoì to na aroha i te vai-mäite-raa.

6 O tei hohora i te fenua nä nià i te moana, e tià hoì to na aroha i te vai-mäite-raa.

7 O tei hämani i nä tiàrama rarahi ra, e tià hoì to na aroha i te vai-mäite-raa.

8 I te mahana ei tävana i te ao ra, e tià hoì to na aroha i te vai-mäite-raa.

9 I te marama e te mau fetià ei tävana i te pö, e tià hoì to na aroha i te vai-mäite-raa.

10 O tei täìri i te mau mätahiapo i Àifiti ra, e tià hoì to na aroha i te vai-mäite-raa.

11Ua ärataì mai ra ia Ìteraèra mai roto ia rätou, e tià hoì to na aroha i te vai-mäite-raa.

12 Mä te rima püai e te rima faatorohia, e tià hoì to na aroha i te vai-mäite-raa.

13 O tei vähi piti noa i te miti ùteùte ra, e tià hoì to na aroha i te vai-mäite-raa.

14 E ua ärataì ia Ìteraèra nä roto ra, e tià hoì to na aroha i te vai-mäite-raa.

15 Ua rave pohe roa rä ia Faraò e ta na ra nuu i taua miti ùteùte ra, e tià hoì to na aroha i te vai-mäite-raa.

16 O tei ärataì i to na ra mau taata nä roto i te mētepara, e tià hoì to na aroha i te vai-mäite-raa.

17 O tei täparahi i te mau arii mana ra, e tià hoì to na aroha i te vai-mäite-raa.

18 E ua rave pohe roa i te hui-arii rarahi ra, e tià hoì to na aroha i te vai-mäite-raa.

19 Ia Tihona, arii no te Àmori, e tià hoì to na aroha i te vai-mäite-raa.

20 E ia Ota, arii no Pätäna, e tià hoì to na aroha i te vai-mäite-raa.

21 E ua höroà i to rätou fenua èi tufaa, e tià hoì to na aroha i te vai-mäite-raa.

22 Ei tufaa no to na ra tävini no Ìteraèra, e tià hoì to na aroha i te vai-mäite-raa.

23 Ua manaò mai o ia ia tätou i to tätou haèhaaraa ra, e tià hoì to na aroha i te vai-mäite-raa.

24 E ua faaora ia tätou i to tätou mau ènemi, e tià hoì to na aroha i te vai-mäite-raa.

25 Na na i höroà mai i te mäa i te mau taata atoà nei, e tià hoì to na aroha i te vai-mäite-raa.

26 E haamaitaì i te Atua no te mau raì ra, e tià hoì to na aroha i te vai-mäite-raa.

Heuraa Manaò.

Oia mau, te Taramo 136 e himene haamaitaì, i te mau maitaì o te Atua Nui Tumu Tahi, e mau maitaì e haapii tämau noa nei ia tätou ia vai ära noa i te mau taime atoà no to tätou oraraa. I te mea e nünaa mäìtihia tätou e te Atua Metua, i teie ia parauraa e, Mäòhi Nui te Fenua, i Reohia ai tätou te Mäòhi, tei fauraòhia e te Areo, A E I O U, o ta te Mätaì e höroà nei i te aho ia navenave te taì, F H M N P R T V, e te K e te NG i parau ai te toa ra o Turo a RAAPOTO, te reo e fauraò no te Ìte, te Marämarama, e te Paari o te hoê nünaa. Te papa teie o to tätou reo, tei ärataì i roto i te ora, ia ora ai tätou i teie mahana, te tïtau ûànahia nei ia tätou, ia faateitei i to tätou upoo, ia ìte i te hiò i te mau tiàrama o te raì tuatinitini, e ia ìte i te heeuri o te mau tumu haari, mau tumu ùru, mau tumu meià e te vai atu ra. E ia faaroo i te pïhauhau no na âpoo maitaì hoê àhuru mä ono o na poro e ha o Mäòhi Nui, e te fetoìtoì no te Moana Nui a Hiva e fati tuatau noa ra i nià i te aau, e faaìte ra i te òhuraa o te mau ôpape. Teie mau faufaa tumu i roto i te aru te faaâpï tämau noa nei i roto i te tau ia ìte tätou e ia faahaèhaa tätou i mua i te aro o te Atua Metua. Te paruru teie a te Atua Metua i to teie nei ao, ia àtuàtuhia e tià ai. E ia ìte te taata i ta na iho höpoià i roto i teie faufaa tumu no te fenua, o to na te reira ora. Ta te taramo ia e haapinaì nei i roto i te tämau maiteraa i te faaìte i te aroha e te here tuatau o te Atua Metua.

Ua tühahia teie Taramo mai teie te huru :

1. Ârueraa i te Aroha e te Here Mure Òre o te Atua, ìrava 1 e tae i te 3.

2. Te ìteraa i te mau faufaa i rähuhia, ìrava 4 e tae i te 9.

3. Haamanaòraa i te mau òhipa faaora e te parururaa a te Atua i to na nünaa, ìrava 10 e tae i te 22.

4. Haamauruüraa i te höroà tämau a te Atua Metua, ìrava 23 e tae i te 26.

Te tahi ìrava tumu e tià ia faatumuhia, te ìrava 1 ia, 1 E haamaitaì i te Fatu, e maitaì hoì to na, e tià hoì to na aroha i te vai-mäite-raa.

Auraa hohonu no tätou teie ìrava i teie mahana no teie pö mätahiti 2024 a mätutu ai tätou te taata tätaìtahi i te mau taime a ìte ai tätou i te haamaitaìraa a te Atua Metua i te roaraa no teie mätahiti e te no te haamauruüru i taua mau maitaì ra. Te maitaì o te Atua o tätou te faatupu i te mea e ora teie o ta te Atua i faataa no tätou e no ta Na aru. Te mau parau faahoì ia e vai ra i roto i teie Taramo, e maitaì hoì to na, e tià hoì to na aroha i te vai-mäite-raa.

O te tumu mau teie no te Atua Metua tei haamanaò mai ia tätou i to na Maitaì aueue òre o ta Na i haamau i roto i te Rähu e to Na nünaa mäìtihia. E Aroha mure òre teie e faahitihia nei, e Aroha faaòre hara tei vai tämau i roto i te tau, te hanahana teie no te Atua Metua. Tei tïtau ia tätou i teie pö ia faaâpï i roto i teie parau no Aroha e te Here tuatau ta te Rähu e täuturu noa nei ia tätou i te mau taime atoà o to tätou oraraa.

E Atua Metua, to tätou te reira haapüraa, i roto i te tau, teie tau ta tätou e fatata nei i te âvari. Te mau mouà te âivi i te vai-mäite-raa tei ärataì noa nei ia tätou te fänau noa nei te aru tei faaheeùri i te mau faa, te mua vao, parururaa i te mau manu, te mau puaa taetae vao, te moa taetae vao, i te vai-mäite-raa. Te huru teie no te Atua Metua i te vai-mäite-raa mai i Mäòhi Nui nei, i te mea o tätou te tahi i mäìtihia i roto i teie ao no te Hau Atua, mai mua mai e tae mai i teie taime ta tätou e faahanahana nei tei Rähu, tei parau e Te Vai nei Au O Vau e Vai nei, ta te parau ia e faahoì noa mai nei, e maitaì hoì to na, e tià hoì to na aroha i te vai-mäite-raa. Te vai mau ra te Atua, mai mua mai e Atua Metua e a muri noa atu. O tätou nei rä te taata, te tïtauhia nei ia tätou ia ìte faahou e repo fenua tätou no teie fenua no Mäòhi Nui, e te mau taata atoà tei here i teie fenua, e tei faariro èi Metua Faaora i parau ai teie reo ïti e, A hoì, e te tamarii a te taata na. Hoê täutani noa atu i te mätahiti e au i te mahana hoê i mahemo ra, e mai te äraraa hoê i te ruì ra. Te riro nei tätou mai te riro päpe puè ra, e mai te väreà täòto ra tätou, a tià mai a ära. I te poìpoì e ìte ai tätou i te hanahana no te aru, te àihere e to na tupüraa, te mau tiare i te ôteuraa e ua ahiahi anaè ra, ua täpühia e ua ôriorio. Te faaìte noa mai ra teie mau faanahoraa no te aru, e maitaì to tätou tere i teie mätahiti, e ôtohe te mau faanahoraa e tià e faaäpïäpï, te tupu mäiteraa, te marämarama tei türama i to tätou èà i teie tau âpï, e tau faatupu ora. I to te tau faaìte-noa-raa e, e maitaì hoì to na, e tià hoì to na aroha i te vai-mäite-raa. Te mea ra e tià ia tätou i te rave, te haapiiraa ia, i te taiò i te mau maitaì a te Atua Metua, ia riro to tätou âau èi âau haapaò maitaì, ia färiu tämu i nià i te Atua Metua ia mau tätou i te höpoià no te täviniraa. E faaòaòa te reira ia tätou e ia fäito i te mau mahana i àti ai tätou ra, e te mau mätahiti i faaòromaì ai mätou i te ìno ra. E faaìte mai te reira ia tätou te òhipa no te täviniraa, te hanahana te reira no te itoito i te Atua Metua. Ia vai mai ä te here o to tätou nei Atua, o te Fatu, i nià ia tätou nei, e te òhipa a to tätou nei rima, ta te Atua e haamau, oia ia, o te òhipa a to tätou rima ta òe i rave no te haapäpü. I te tupüraa te hanahana Metua i te fenua nei, i Mäòhi Nui nei.

Ruta èv. 2, 41-52.

Te mau parau mätamua a Ietu i roto i te hiero.

41 E haere ä nä metua no na ra i Ierutarëma i te ôroà ra i te Päta, aore e matahiti i tuua.

42 E tae aè ra i te àhuru mä piti i to na matahiti, haere atu ra rätou i Ierutarëma i te haapaòraa i te peu i taua ôroà ra.

43 E hope aè ra taua puè mahana ra, hoì mai ra räua, pärahi atu ra rä te tamaiti o Ietu i muri i Ierutarëma, aore Iotëfa e ta na metua vahine i ìte.

44 Haere mai ra räua e ruì hoê mai ra i te haereà, parau aè ra räua tei roto o ia i taua tïàa ra, ìmi atu ra räua ia na i roto i to rätou iho fëtii e i te mau taata-tupu ra.

45 E aore aè ra o ia i ìteä, hoì atu ra räua i Ierutarëma i te mäìmiraa ia na.

46 E ruì toru aè ra, ìte atu ra räua ia na i roto i te hiero ra, te pärahi ra i röpü i te mau òrometua, te faaroo atu ra e te ui atu ra ia rätou.

47 Maere anaè iho ra te feiä atoà i faaroo ia na ra, i to na ìte e ta na parau.

48 E ìte atu ra räua ia na, hitimaùe atu ra räua. Ua parau atu ra ta na metua vahine ia na : «E ta ù tamaiti, e aha òe i nä reira mai ai ia mäua ? Ìnaha, i ìmi noa na mäua o to metua täne ia òe mä te òto.

49 Ua parau mai ra o Ia ia räua : «E aha òrua i ìmi ai ia ù? Aita òrua i ìte, e ia haapaò vau i ta ta ù metua e tià ai ?

50 Àita rä räua i ìte i te parau ta na i parau mai ia räua ra.

51 Hoì mai ra räua e o ia atoà ra i Nätareta, faaroo atu ra ia räua ; vaiiho mäite iho ra rä ta na metua vahine i taua mau mea atoà ra i roto i to na âau.

52 Tupu atu ra Ietu i te rahi e te paari, e te herehia mai e te Atua e te taata atoà.

Heuraa Manaò.

Oia mau, te Ruta èv. Pene 2, i te mau ìrava 41 e tae i te ìrava 52, te faatiàhia ra i te faufaa no te parau o Ietu i te àhuru-mä-piti-raa o to na mätahiti. I to na pärahiraa i Ierutarëma i te ōtiraa te ôroà pata e tupu nei i te mau mätahiti atoà. Ua moiàhia i na metua, e te toru o te mahana i te moèraa, ua mäìmi raua i roto i te mau taata, te mau fëtii, e tae roa atu ra i Ierutarëma, tei roto i te fare o to na Metua, te àparauraa i te mau òrometua. Ua mäere te mau òrometua i te ìte, te marämarama, te paari, o teie tamaiti, te päpü te mau parau, e te mau faatiàraa, te huru teie no te tamarii fänau Atua, ua tupu te mäere o na metua, âreà te metua vahine ra ua paraparau to na värua ma te parau e, E ta ù tamaiti, e aha òe i nä reira mai ai ia mäua, Ìnaha, i ìmi noa na mäua o to metua täne ia òe mä te òto. Te òto o na metua te ìte ra raua i te höpoià ta raua e mau ra no te äupururaa, e te àtuàturaa i teie tamaiti. Ua parau mai ra o Ia ia räua, E aha òrua i ìmi ai ia ù. Aita òrua i ìte, e ia haapaò vau i ta ta ù metua e tià ai. I teie reo ua türama i te metua vahine, i te parau i tae i roto ia na i te ôpuaraa a te Atua Metua no teie tamaiti. Tupu atu ra o Ietu, i te ìte te paari e te maitaì i mua i te aro o te Atua Metua.

Te ìrava e tià ia faatumu te ìrava 49 ia, E aha òrua i ìmi ai ia ù. Aita òrua i ìte, e ia haapaò vau i ta ta ù metua e tià ai.

Teie ìrava te türama nei e toru mau vahi faufaa :

1. Te faatura o Ietu, Tamaiti Here na te Atua Metua, ua faaìte o Ia i to na faatura i to na na metua no te hoì i Nätareta i te vahi i reira o ia e paari ai.

2. Te òhipa a Ietu, i te âpïraa ra ua faaòhipa o ia i to na tiàraa haapii, uiui, färerei i te feiä paari, te faaìte nei o Ietu i to na iho tumu, e taata no te òhipa Atua.

3. Tupüraa o Ietu, te haapäpü ra te ìrava 52, Tupu atu ra Ietu i te rahi e te paari, e te herehia mai e te Atua e te taata atoà. Tupüraa taata, e tupüraa Atua.

 

Heuraa ìrava.

Taramo 136, 1 E haamaitaì i te Fatu, e maitaì hoì to na, e tià hoì to na aroha i te vai-mäite-raa.

Ruta èv. 2, 49 Ua parau mai ra o Ia ia räua : «E aha òrua i ìmi ai ia ù? Aita òrua i ìte, e ia haapaò vau i ta ta ù metua e tià ai ?  

Faaitoitoraa.

E hoa here mä,

I teie pö mätahiti, mea maitaì ia tätou ia pärahi i roto i te pure, i te mea ua fänaò tätou i te mau maitaì höroà noa a te Atua Metua. I teie tau e pïtaataa nei to tätou oraraa, te âueueraa fenua, te miti faaî, te mataì huri fenua, te ahi mouà, te mau tamaì, te mau maì e ûàna noa nei, mau faatereraa fenua e täuiui noa nei, te mau òna o te ao nei e faatupu nei i te mau faahemaraa e rave rahi, te tupu nei teie mau faanahoraa i roto i to tätou fenua ia Mäòhi Nui, e ia Moana Nui a/o Hiva. I mua i teie mau faanahoraa, te faaìte nei te Taramo 136, e maitaì hoì to na, e tià hoì to na aroha i te vai-mäite-raa.

I mua i teie reo, te tïtauhia nei tätou i te haapäpü i to tätou tiàturiraa i te Atua Metua, i te mea ua puai aè te maitaì e te aroha o te Atua i teie mau òhipa e tupu nei. Ta Ietu tamaiti e parau nei ia tätou i teie pö, E aha òrua i ìmi ai ia ù. Aita òrua i ìte, e ia haapaò vau i ta ta ù metua e tià ai. Te piihia nei tätou ia haapaò i te hinaaro o te Atua Metua, ia ôtohe te mau faaäpiäpiraa a te taata, ia tupu noa te maitaì a te Atua ta te Rähu e höroà noa ra na roto i te aru. Te tïtauhia nei ia tätou ia ìte i te haapaò te maitaì a te Atua, i teie mätahiti âpï ta tätou e âvari nei, e metua âpï no te hoê tau âpï.

 

E te mau metua here e,

No tätou te parau i teie pö hou tätou a färii ai teie Metua âpï te mätahiti âpï 2025 oia hoì, a fatata ai tätou i te hopeà o teie mätahiti, e rave na tätou i te hoê taime no te fëruri i nià i ta tätou mau höpoià e te mau metua. Ua riro te täureàreàraa èi taime no te täuiraa, no te tupüraa e no te ìteraa, i te mau òhipa e àua haaàti i roto i teie tau. I roto i ta tätou ìrava no teie pö Ruta èv. Pene 2 ìrava 49, te ìte nei tätou ia Ietu, i te àhuru ma pitiraa o to na mätahiti, ua ìte aè na o Ia i ta Na òhipa hanahana i roto i te mau metua o te faaroo, e to Na Metua i te Ao ra. I teie taime i roto i to na oraraa, te haamanaò mai nei te reira ia tätou i te faufaa no te ärataìraa i ta tätou mau tamarii na roto i te here, te faaòromaì e te haèhaa.

Te faaíte mai nei teie huru no Ietu ia tätou e, e peu mätarohia e te feiä âpï ia ìmi i to rätou iho èà e ia ui i te mau uiraa no nià i to rätou tiàraa e ta rätou mau mäìmiraa i roto i te ao nei. E te mau metua, ta tätou höpoià o te pätururaa ia ia rätou, te faaitoitoraa ia rätou e te höroàraa ia rätou i te hoê vahi i reira rätou e paari ai ma te peàpeà òre.

I teie puè tau faafaaearaa, e rave na tätou i te taime no te haamauruüru i te Atua Metua no ta tätou mau tamarii e ia fafauhia ia riro èi hiòraa no te faaroo, no te aroha e no te höpoià. Ia î teie mätahiti âpï i te hau, te òaòa e te mau haamaitaìraa no to tätou mau ùtuafare.

Chers parents,

Alors que nous approchons de la fin de cette année, prenons un moment pour réfléchir à nos responsabilités en tant que parents. L'adolescence est une période de transition, de croissance et de découverte. Dans Luc chapitre 2 versets 49, nous voyons Jésus, à l'âge de douze ans, déjà conscient de sa mission divine et de son rôle dans les affaires de son Père céleste. Cette période de sa vie nous rappelle l'importance de guider nos enfants avec amour, patience et compréhension.

L'adolescence de Jésus nous montre qu'il est normal pour les jeunes de chercher leur propre chemin et de poser des questions sur leur identité et leur place dans le monde. En tant que parents, notre rôle est de les soutenir, de les encourager et de leur offrir un environnement où ils peuvent grandir en toute sécurité.

En cette période de fêtes, prenons le temps de remercier Dieu pour nos enfants et de nous engager à être des modèles de foi, de compassion et de responsabilité. Que cette nouvelle année soit remplie de paix, de joie et de bénédictions pour nos familles.

Bonne année à tous.

 

Pehepehe

Tià-Mata-ara.

 

I roto i te àua o te oraraa, i reira te mau èà e haere ai,

E fetià te vai ra te hoê fetià o te òre roa e moè.

Te tiaì nei o ia i to tätou mau tāahiraa âvae,

Ma te ata e te marämarama, ma te ärataì ia tätou ma te paari,

Ma te faaätea ê ia tätou i te mau marei o te mau ano.

 

Te mau metua, te mau tiaì no te mau moemoeä e te mau tiàturiraa,

E mau tiaì anaè tätou,

E ara noa tätou i te maororaa pö.

E tüpaìpaì to tätou mäfatu i te ôtuìtuìraa o te mau haapeàpeàraa,

Oia atoà rä i te òaòa, te àta i te päpüraa.

 

Te täureàreàraa, te hoê tere i roto i te vahi ìte-òre-hia,

I reira te mau mäìtiraa atoà

E riro ai èi òhipa färii-maitaì-hia.

Ma te äraraa, te hoê mori i te pö,

Te türama ra i te èà, ma te here hope òre.

 

Tià-Mata-Ara noa tätou,

Ia î atoà rä tätou i te tiàturiraa,

No te mea ua riro te mahana tätaìtahi èi räveà, èi òriraa âpï.

Na roto i te here e te faaòromaì, E faaruru tätou i te mau vero,

E ìte tätou i te hau, na roto i te mau räveà haìhaì roa.

 

Poème.

À nos parents et à nos adolescents

 

Dans le jardin de la vie, où les fleurs éclosent,

Les parents veillent, leurs cœurs en osmose.

L'adolescence, une saison de changement,

Où l'enfant devient grand, un moment émouvant.

Les parents, guides dans cette traversée,

Offrent amour, conseils et sérénité.

L'adolescent, en quête de son identité,

Cherche sa voie, avec curiosité.

 

Les jours de doute, les nuits d'incertitude,

Sont illuminés par la gratitude.

Pour ces parents, piliers de sagesse,

Qui accompagnent avec tendresse.

 

L'adolescence, un voyage vers l'inconnu,

Où chaque pas est une aventure bienvenue.

Les parents, phares dans la nuit,

Éclairent le chemin, avec amour infini.

 

Maitaì tätou i te mätahiti âpï 2025.

 

Teraì òr. Faatura

     

    

        



 

 

Ruta èv 2.40-52. Faaroo, Here, Tävini.

 

Tāpati 29 no Tema/Titema 2024.

Faaroo, Here, Tävini.

Faatau Aroha.

Teie te tahi mau manaò èi faatau aroha, hou tätou a vaiiho mai ai teie mätahiti, ia au i te ärataìraa a na taiòraa e maha no te ìritiraa i teie mätahiti âpï ta tätou e fatata nei i te tomo, teie te tahi parau tumu ia au i na taiòraa e maha èi àvariraa na tätou teie Metua e ärataì faaora ia tätou, E mata na tätou i te here i te Rähu a te Atua, ia pure ma te faaroo, ia ora èi mau tamarii na te Atua, e ia rave faaoti i ta tätou Täviniraa hanahana.

 

Mau Taiòraa papa.

Taramo 84

1 Na te Mënätehe i nià i te Titita. E Taramo na te tamarii a Tora.

2 E mea pöpou rahi to òe ra mau tiàhapa, e te Fatu manahope.

3 Te hinaaro nei ta ù âau, te nounou nei, i te mau hëtere o te Fatu. Te òaòa nei ta ù âau e ta ù tino atoà

i te Atua ora ra.

4 Ua noaa hoì i te tefura te fare no na e i te ôpeà te ôfaaraa no na iho, èi fänauraa i to na ra pinia, ta òe ra mau fata, e te Fatu manahope, e ta ù arii, e ta ù Atua hoì.

5 E ao to te feiä i pärahi i to òe ra fare. E òre rätou e tuutuu i te haamaitaì ia òe. Tera.

6 E ao to te feiä o òe to rätou ètaèta ra, te manaò ra rätou i te mau èà tià ra.

7 Haere noa ä rätou nä te peho o Pata, e ö rä rätou i te pape pihaa i reira; e na te ua hoì e faaî i te mau âpoo ra.

8 E haere ä hoì rätou mä te ètaèta e ia noaa atu ä te ètaèta, e tae noa atu rätou atoà ra i te aro o te Atua i Tiona.

9 E te Atua manahope, e te Fatu, e faaroo mai i ta ù pure, e faaroo mai ia ù, e te Atua o Iatöpa e. Tera.

10 E te Atua to mätou päruru ra, a hiò mai na, a haapaò mai i tei Faatähinuhia e òe ra.

11 E maitaì rahi to te mahana hoê i roto i te mau hëtere no òe ra, i te mahana atoà e tautani noa atu i te tahi vähi ê E hinaaro rahi to ù i te tiaì i te ùputa i te fare o ta ù Atua, i te pärahi i te mau tiàhapa o te paieti-òre ra.

12 E mahana hoì e te päruru te Atua ra o te Fatu; e horoà mai te Fatu i te maitaì e te hanahana. E aore roa a ana maitaì e täpeà i te feiä haereà piò-òre ra.

13 E te Fatu manahope e, e ao to te taata i tiàturi ia òe ra.

Heuraa Manaò.

Te Taramo 84 e himene e ârue i te faahinaaro i te fare o te Atua.

1. Ômuaraa ìrava 1 e te 2 : Te faaìte nei te päpaì Taramo i to na faahiahia no te nehenehe o te fare o te Atua.

2. Te hiaai i te vairaa mai o te Atua ìrava 3 e te 4 : E ìte te päpaì Taramo i te mau manu e hämani ra i to rätou ôfaaraa i pïhaì iho i te mau fata a te Atua.

3. Te mau haamaitaìraa no te feiä e pärahi i roto i te fare o te Atua ìrava 5 e tae i te 8 : E haamaitaìhia te feiä e pärahi i roto i te fare o te Atua e e ìtehia to rätou puai i roto ia Na.

4. Te pure no te ani i te pärururaa e te färii maitaì a te Atua ìrava 9 e te 10 : E ani te päpaì Taramo i te Atua ia hiò maitaì i to na nünaa.

5. Faaotiraa ìrava 11 e te 12 : Te haapäpü nei te päpaì Taramo e, e mea maitaì aè ia pärahi i te hoê mahana i mua i te aro o te Atua i te hoê tauatini i te tahi atu vahi.

Te ìrava 11 o te tià e faatumu i teie Taramo, E mea maitaì aè hoê aè mahana i to te tahi pae i te tahi vahi ê; E mea au aè na ù ia tià i te ùputa o te fare o to ù Atua, eiaha rä ia pärahi i roto i te mau tiàhapa o te ìno. Te tumu o teie parau, oia hoì te hinaaro ûàna i te vairaa mai o te Atua e te haamaitaìraa o te feiä e pärahi ra i roto i to Na fare, i ta Na i Rähu.

Taramo 84 ìrava 11, te na ô ra e, e maitaì aè te hoê mahana i to òe ra mau fare täpeàraa, i te hoê tautani noa atu i te tahi vahi ê; E mea au aè na ù ia tià i te ùputa o te fare o to ù Atua, eiaha rä ia pärahi i roto i te mau tiàhapa o te ìno,  e riro te reira èi mea faufaa no teie Täpati hopeà no te mätahiti. Teie te tähi mau manaò no te marämaramaraa i teie ìrava i roto i te faahitiraa :

1. Te fëruri-maite-raa i te mätahiti i maìri : Te ani nei teie ìrava ia tätou ia fëruri i te mau taime i pärahi ai tätou i mua i te aro o te Atua i roto i te roaraa o te mätahiti. Te haamanaò mai ra oia ia tätou e mea faufaa aè te hoê noa mahana i faataahia no te faatupu i te taairaa e te Atua i te hoê tautani mahana i te tahi atu vahi.

2. Te mau òhipa pae varua : A ôpani ai tätou i te mätahiti, te faaitoito nei teie ìrava ia tätou ia hiòpoà faahou i ta tätou mau òhipa mätamua. Te haamanaò mai nei te reira ia tätou i te faufaa rahi ia tuu i to tätou auraa e te Atua na nià atu i te tähi atu mau mea.

3. Tiàturiraa no te mätahiti i muri nei : E riro teie ìrava èi puna no te tiàturiraa e te faaitoitoraa no te mätahiti i muri nei. Te faaitoito mai nei o Ia ia tätou ia ìmi atu ä i te aro o te Atua e ia faariro i to Na fare èi fare värua no tätou.

4. Te taa-ê-raa i rotopü i te maitaì e te ìno : Te haapäpü nei teie ìrava i te taa-ê-raa i rotopü i te oraraa i mua i te aro o te Atua e te oraraa i roto i te ìno. Te faaitoito nei oia ia tätou ia mäìti i te maitaì e ia âpe i te mau èà no te ìno.

Na roto i te feruri-maite-raa i nià i teie ìrava, Te hoê taata e ìte i te faaüruraa hohonu no te faahope i te mätahiti ma te mauruüru e no te haamata i te mätahiti âpï ma te hoê âau färiu i nià i te Atua.

Mea faufaa roa te mau haapiiraa no nià i te maitaì e te ìno i roto e rave rahi mau taère e te mau haapiiraa firotofo.

1. Maitaì : E mea pinepine te maitaì i te tüàtihia i nià i te mau òhipa, te mau raveraa e te mau ôpuaraa tei faarirohia èi mea parau-tià i te pae no te faaitoitoraa, èi mea maitaì, e èi mea ora. Oia hoì te mau faufaa mai te here, te aroha, te haerea tià, te parau-tià, e te höroà maitaì. Te mau òhipa o te päturu i te maitaì ia vëtahi ê e o te faatura i te mau tiàraa e te tura o te mau taata, e faarirohia ia èi mau òhipa maitaì.

2. Te ìno: I te tahi aè pae, ua täaihia te ìno i te mau òhipa, te mau haerea, e te mau ôpuaraa o tei faarirohia èi mea ìno i te pae no te faaitoitoraa, te mea ìno, e mea pohe ia. Oia hoì te mau mea ìtehia, te riri, te aroha òre, te haerea tià òre, te parau-tià òre, e te miimii. I te rahiraa o te taime, e faarirohia te mau òhipa o te faaìno ia vëtahi ê, o te ôfati i to rätou mau tiàraa, aore ra o te faaìno i to rätou tura èi mea ìno.

Teie mau manaò e täui ia au i te mau ìrava täpiri i te pae taère, i te faaroo e te here. Èi hiòraa, i roto i te tahi mau parau tütuu no te faaroo, e pinepine te maitaì i te tuea e te hinaaro o te Atua, areà te ìno ra, te pätoì ra ia i taua hinaaro ra.

Ia fëruri tätou i teie mau manaò, mea faufaa ia hiòpoà i te mau faufaa e te mau faaueraa tumu o te ärataì i ta tätou mau òhipa e faaotiraa. E aha te mau mea faufaa roa aè e no òe i roto i to òe oraraa i te mau mahana atoà.

1 Tämuera 1.20-28

20 E tö iho ra Hana, e tae aè ra i te tau mau ra, ua fänau iho ra o ia e tamäroa, maìri iho ra i to na iòa, o Tämuera, ua nä ô aè ra hoì o ia, e mea anihia o ia e au i te Fatu ra.

21 Haere atu ra taua taata ra o Êrïtana e ta na fëtii atoà i nià e hopoi i te tütia mätahiti, e tä na i èuhe ra.

22 Aita aè ra rä hana i tae; ua nä ô aè ra hoì o ia i ta na täne, Ia maìri aè na te ü i te tamaiti nei, e hopoi ai au ia na i nià i mua i te aro o te Fatu, a pärahi mau Atua ai o ia i reira.

23 Ua parau mai ra ta na täne ra Êrïtana ia na, Tei ia òe tei to òe hinaaro; a pärahi e ia haamaìrihia e òe te ü ia na; ia faatupu rä te Fatu i ta na parau. Pärahi iho ra taua vahine ra, faaòte iho ra i ta na tamaiti e maìri noa atu ra te ü.

24 E ia haamaìrihia e ana te ü ra, ua hopoi atu ra o ia ia na i nià i Tiro, e nä puaatoro oni hoì e toru, e te faraoa hoê êfa, e te hoê färii uaina, e ua hopoi atu ra ia na i te fare o te Fatu i Tiro: e tamaiti âpï roa taua tamaiti ra.

25 ua täparahi iho ra rätou i te hoê puaatoro oni, e ua hopoi aè ra rätou i taua tamaiti ra ia Èri;

26 e ua nä ô atu ra o ia, E ta ù Fatu, te ora ra òe, e ta ù Fatu, o vau te vahine i tià noa i pïhaì iho ia òe ra, a pure ai au i te Fatu ra.

27 i pure hoì au i teie nei tamaiti; e ua höroà mai te Fatu i ta ù i ani atu ia na ra;

28 no reira vau i höroà atu ai ia na i te Fatu; no te Fatu ia o ia e ia hope roa o na puè mahana i te oraraa nei. Ua haamori iho ra o ia i te Fatu i reira ra.

Heuraa Manaò.

Te faatià nei te Tämuera 1 i te pene 1 i te mau ìrava 20 e tae i te ìrava 28 i te àamu no te fänauraa o Tämuera e to na püpü-raa-hia i te Atua na roto i to na metua vahine, o Hana.

1. Fänauraa o Tämuera ìrava 20 : I muri aè i to Hana pureraa ma te ûàna no te hoê tamarii, ua fänau mai o Hana ia Tämuera e ua ìte o ia e na te Atua i pähono i ta na pure.

2. Iòa o Tämuera ìrava 20 : Ua topa Hana i te iòa o ta na tamaiti o Tämuera, oia hoì,  ua faaroo te Atua, èi fäìraa i te pähonoraa a te Atua i ta na pure.

3. Te püpüraa ia Tämuera ìrava 21 e tae i te 23 : Ua faaoti Hana eiaha e haere i Tiro no te mau tutia mätahiti e tae roa atu i te taime e te topa ai te ü a Tämuera, no te haamoà hope roa ia na i te Atua.

4. Haere tià atu i Tiro ìrava 24 e te 25 : I te taime topa ai te ü a Tämuera, ua haere o Hana e to na ùtuafare i Tiro ma te püpü i te tutia no te haamoà ia Tämuera i te Atua.

5. Te aòraa a Tämuera ia Eri ìrava 26 e tae i te 28 : Te haamanaò nei Hana ia Eri e, o oia te vahine tei pure no te hoê tamarii e i teie nei te haamoà nei oia ia Tämuera i te Atua no to na oraraa täatoà.

Te ìrava tumu, o te ìrava 27 ia, te na ô ra e,  i na reira vau i te pure, e ua pähono mai te Fatu i ta ù pure ia na. Te haapäpü ra teie ìrava i te faaroo o Hana e te haapaò maitaì o te Atua i te pähonoraa i ta na mau pure.

Te haapii mai nei teie ìrava ia tätou i te faufaa no te pure ûàna, te haamauruüruraa i te Atua no ta Na mau haamaitaìraa, e te püpüraa hope ia na iho i te Atua. A fatata ai te mätahiti i te hope, i reira tätou e faauruhia ai no te faaâpï i ta tätou fafauraa i te Atua e ia ìte i ta Na mau pähonoraa i ta tätou mau pure.

Ìrava 27 no te Tämuera 1 pene1, te na ò ra e, I pure na hoì au no teie nei tamaiti, e ua pähono mai ra o Iehova i ta ù pure ia na, i reira e riro ai èi mea faufaa roa no teie täpati hopeà o te mätahiti.

1. Te färiiraa i te mau haamaitaìraa : Te haamanaò mai nei teie ìrava ia tätou i te faufaa rahi ia ìte e ia haamauruüru i te Atua no te mau haamaitaìraa e te mau pähonoraa i ta tätou mau pure i roto i te roaraa o te mätahiti. E taime ia no te faaìte i to tätou mauruüru no te mea ta te Atua i rave i roto i to tätou oraraa.

2. Te faaroo e te täpeà-maite-raa : Ua pure o Hana ma te faaroo e te tuutuu òre no te hoê tamarii, e ua pähono te Atua i ta na pure. Te faaitoito nei teie ìrava ia tätou ia tämau noa i te pure ma te faaroo, noa atu e taere roa te mau pähonoraa, e tämau noa i te pure.

3. Te püpüraa ia na iho i te Atua : Ua püpü Hana ia Tämuera i te Atua èi haamauruüruraa no ta na pähonoraa i ta na pure. A fatata ai i te mätahiti i te hope, tätou e fëruri e nafea tätou e püpü ai i to tätou oraraa e ta tätou mau hopoià i te Atua èi täpaò no te mauruüru e te faaroo.

4. Tiaìraa no ànanahi : Te horoà mai nei teie ìrava i te tiàturiraa no te mätahiti i muri nei, ma te haamanaò ia tätou e, te faaroo mai nei te Atua i ta tätou mau pure e te pähono nei o Ia mai te au i to Na hinaaro. E aniraa manihini teie ia tomo i roto i te mätahiti âpï ma te tiàturi e te faaroo i te haapaò maitaì o te Atua.

Na roto i te fëruri-maite-raa i nià i teie ìrava, e ìte tätou i te hoê puna no te faaüruraa e te faaâpïraa i te pae värua no te faahope i teie mätahiti ma te âau mauruüru e no te haamata i te mätahiti âpï ma te faaroo âpï.

1 Ioane 3.1-24

Te mau tamarii a te Atua

1 A hiò na i te huru o to te Metua aroha ia tätou nei, o tätou i maìrihia mai e, e tamarii na te Atua: i òre ai to teie nei ao i ìte ai ia tätou, no te mea aore atoà i ìte ia na.

2 E a ù mau here e, e tamarii tätou na te Atua i teie nei, e aita ä i ìteä to tätou huru a muri atu. Ua ìte rä tätou e, ia fä mai o ia ra, e riro tätou mai ia na atoà te huru; e ìte hoì tätou ia na i to na ra huru mau.

3 E te taata atoà tei ia na taua tiaìraa atu ia na ra, te haamaitaì ra ia ia na iho, mai ia na atoà e maitaì ra.

4 O tei rave i te hara ra, ua faahapa ia i te ture; o të faahapa hoì i te ture ra, o të hara ia.

5 E ua ìte hoì òutou e, i faaìtehia mai o ia èi faaòre i ta tätou hara; e aore roa e hara o roto ia na.

6 O tei àti ia na ra, aore ia i rave i te hara: o tei rave i te hara ra, aore ia i hiò ia na, aore hoì i ìte ia na.

7 E a ù mau tamarii ra, eiaha roa òutou e vare i te taata O tei rave i te parau-tià ra, e taata parau-tià ia, mai te Metia taata parau-tià ra.

8 O tei rave i te hara ra, no te tiàporo ia, i rave na te tiàporo i te hara mai te mätamua mai ä. No reira i faaìtehia mai ai te Tamaiti a te Atua ra, ia haamou o ia i te òhipa a te tiàporo ra.

9 O ta te Atua i fänau ra, aore ia i rave i te hara; te vai ra hoì ta na huero i roto ia na: e e òre e tià ia na ia rave i te hara, no te mea ua haafänauhia mai o ia e te Atua.

10 O te mea teie e ìteä ai te tamarii a te Atua, e te tamarii a te tiàporo: o tei òre i rave i te parau-tià ra, è ère ia i to te Atua; è ère atoà tei òre i aroha i ta na taeaè.

Te aroharaa te tahi i te tahi.

11 Teie hoì te parau ta òutou i faaroo, mai te mätamua mai, ia aroha tätou ia tätou iho.

12 Eiaha mai ia Taina ra, no taua värua ìno ra o ia, e täparahi pohe roa atu ra i to na teina. E e aha o ia i täparahi ai ia na. No te mea, e parau ìino ta na iho, e e parau-tià ta ta na teina.

13 Eiaha òutou e mäere, e a ù mau taeaè, ia riri mai to teie nei ao ia òutou.

14 Ua ìte tätou e, mai te pohe mai tätou, e tei te ora mai nei, no te mea te aroha nei tätou i te mau taeaè. O tei òre e aroha i ta na taeaè ra, te vai rä ia i roto i te pohe.

15 O tei riri i ta na taeaè ra, e täparahi taata ia; ua ìte hoì òutou e, aore o te täparahi taata ra e ora mure òre e vai i roto ia na ra.

16 O te mea teie i ìte ai tätou i te aroha, o ia i horoà i to na iho ora no tätou: e ia horoà atoà tätou i to tätou ora no te mau taeaè e tià ai.

17 O te taata rä tei ia na te taoà o teie nei ao, e ìte atu ra o ia i ta na taeaè i te àtiraa, pipiri atu ra to na âau ia na, tei hea te hinaaro i te Atua i te pärahiraa i roto ia na?

18 E a ù mau tamarii ra, eiaha to tätou te aroha vaha anaè e te aroha arero, ei aroha rave rä, ei mea mau.

Te âau hau i mua i te Atua

19 O te mea teie e ìte ai tätou e, no te parau mau tätou, e e mahoru ai to tätou âau i mua ia na ra.

20 Ia faahapa mai hoì to tätou âau ia tätou, e rahi te Atua i to tätou âau, e ua ìte o ia i te mau mea atoà nei.

21 E a ù mau here e, ia òre to tätou âau ia faahapa mai ia tätou ra, aore o tätou taiäraa i reira i te Atua ra.

22 E ta tätou e ani atu ia na ra, e noaa ia ia tätou, no te mea, te haapaò nei tätou i ta na parau, e te rave nei i te mau ra o ia ia tätou, o te Värua ta na i horoà mai ia tätou nei.

Heuraa Manaò.

1 Ioane pene 3 i te mau ìrava 1 e tae i te 24 o te hoê ia mau  ìrava tei î i te mau haapiiraa no nià i te here o te Atua, to tätou tiàraa èi mau tamarii na te Atua, e te piiraa ia ora ma te parau-tià e te here.

1. To tätou tiàraa èi tamarii na te Atua ìrava 1 e tae i te ìrava 3 : E haamata o Ioane na roto i te haamanaòraa i te here rahi o te Atua tei hämani ia tätou ta na mau tamarii. Te haapäpü nei o ia e, àita ä to tätou tiàraa èi tamarii na te Atua i heheu-hope-hia mai, e riro rä tatou mai ia Na ra te huru ia fä mai te Metia.

2. Pii i te viivii òre ìrava 4 e tae i te 6 : Te aò nei o Ioane i te feiä tiàturi ia tämä ia rätou iho, no te mea, te feiä e tiàturi i te Metia, e tämä ia rätou ia rätou iho mai ia Na i mä. Te haamanaò mai nei o ia ia tätou e, te hara o te ôfatiraa ia i te ture e ua haere mai te Metia no te ìriti ê i ta tätou mau hara.

3. Te taa-ê-raa i rotopü i te mau tamarii a te Atua e te mau tamarii a te tiàporo ìrava 7 e tae i te 10 : Te faataa maitaì nei Ioane i te taa-ê-raa i rotopü i te feiä e rave nei i te parau-tià e te feiä e rave nei i te hara. E ìte te mau tamarii a te Atua ia rätou iho na roto i ta rätou raveraa i te parau-tià e te here. Te aò ra o ia i te feiä faaroo ia here eiaha noa na roto i te parau, na roto atoà rä i te òhipa e te parau mau.

4. Haapäpüraa i mua i te Atua ìrava 19 e tae i te 24 : E faaoti o Ioane na roto i te paraparauraa no nià i te päpüraa ta tätou e färii nei i mua i te Atua ia òre anaè to tätou âau e faahapa ia tätou. Te haapäpü nei o ia i te faufaa rahi no te haapaòraa i te mau faaueraa a te Atua e te tiàturiraa ia Ietu Metia.

Te ìrava 1 o te tähi ia ìrava o te tià e haafaufaa, o te na ò ra e, A hiò na i te hinaaro ta te Metua i faaìte mai ia tätou, ia parauhia tätou e tamarii na te Atua. E te na reira nei tätou. Mai te mea e, aita to te ao nei i ìte ia tätou, no te mea ia e, àita o ia i ìte i te reira. Te haapäpü ra teie ìrava i te here faahiahia mau o te Atua e to tätou iho taata èi tamarii na te Atua.

Te pii nei teie ìrava ia tätou ia ora ma te viivii-ore, te parau-tià e te here, ma te ìte i to tätou tiàraa taata i roto i te Metia e te peeraa i ta Na mau faaueraa. I te hopeà o teie mätahiti, ia faauruhia tätou ia faaâpï i ta tätou fafauraa ia ora mai te au i te mau faufaa ta te Èvaneria e faaìte nei.

Te ìrava tumu te na ò ra, A hiò na i te hinaaro ta te Metua i faaìte mai ia tätou, ia parauhia tätou e tamarii na te Atua. E te na reira nei tätou. Mai te mea e, àita to te ao nei i ìte ia tätou, àita ia rätou i ìte i te reira, e ia riro èi òhipa faufaa roa no te Täpati hopeà o te mätahiti. Teie te tahi mau manaò no te marämaramaraa i teie ìrava ia au i to na faanahoraa :

1. Te färiiraa i te Here o te Atua : Te haamanaò mai nei teie ìrava ia tätou i te here rahi ta te Atua i faaìte ia tätou na roto i te piiraa ia tätou ta Na mau tamarii. A fatata ai te mätahiti i te hope, ua riro te reira èi raveà no te fëruri e mea nafea teie here i te vairaa i roto i to tätou oraraa e no te haamauruüru i te Atua no to na haapaò maitaì.

2. Te tiàraa mau i roto i te Metia : Te haapäpü nei teie ìrava i to tätou tiàraa èi mau tamarii na te Atua. E taime teie no te haapäpü faahou i to tätou tiàraa i roto i te Metia e no te haamanaò ia tätou iho e, noa atu te mau tämataraa e te mau faahemaraa o te mätahiti i maìri, ua herehia e ua färiihia tätou e te Atua Metua.

3. Te tiàturiraa no ànanahi : Na roto i te ìteraa e àita to te ao nei i ìte ia tätou no te mea àita o ia i ìte i te Atua, ia ìte tätou i te tiàturiraa e te puai no te mätahiti i muri nei. Ua piihia tätou ia ora mai te au i te mau faufaa o te Èvaneria, noa atu e àita to te ao nei e marämarama nei i te reira.

4. Aniraa ia täui : Te ani manihini nei teie ìrava ia tätou ia ìte i te täuiraa tämau i roto i te Metia. A fatata ai te mätahiti i te hope, e ia feruri tätou i te mau tuhaa o to tätou oraraa i reira tätou e hinaaro ai e tupu e haafatata atu ä i te Atua.

Na roto i te fëruri-maite-raa i nià i teie ìrava, ta tätou e ìte nei i te hoê puna no te faaüruraa e te faaâpïraa i te pae varua no te faahope i te mätahiti ma te âau mauruüru e no te haamata i te mätahiti âpï na roto i te faaroo faaâpïhia e te hoê tiàraa hanahana èi mau Tamarii na te Atua.

Ruta èv 2.40-52

40 Tupu atu ra taua tamaiti ra, e itoito atu ra te âau, î aè ra hoì i te paari, e te vai ra te maitaì a te Atua i nià ia na.

Te mau parau mätamua a Ietu i roto i te hiero.

41 E haere ä nä metua no na ra i Ierutarëma i te ôroà ra i te Päta, aore e mätahiti i tuua.

42 E tae aè ra i te àhuru mä piti i to na mätahiti, haere atu ra rätou i Ierutarëma i te haapaòraa i te peu i taua ôroà ra.

43 E hope aè ra taua puè mahana ra, hoì mai ra räua, pärahi atu ra rä te tamaiti o Ietu i muri i Ierutarëma, aore Iotëfa e ta na metua vahine i ìte.

44 Haere mai ra räua e ruì hoê mai ra i te haereà, parau aè ra räua tei roto o ia i taua tïàa ra, ìmi atu ra räua ia na i roto i to rätou iho fëtii e i te mau taata-tupu ra.

45 E aore aè ra o ia i ìteä, hoì atu ra räua i Ierutarëma i te mäìmiraa ia na.

46 E ruì toru aè ra, ìte atu ra räua ia na i roto i te hiero ra, te pärahi ra i röpü i te mau òrometua, te faaroo atu ra e te ui atu ra ia rätou.

47 Maere anaè iho ra te feiä atoà i faaroo ia na ra, i to na ìte e ta na parau.

48 E ìte atu ra räua ia na, hitimaùe atu ra räua. Ua parau atu ra ta na metua vahine ia na: E ta ù tamaiti, e aha òe i nä reira mai ai ia mäua. Inaha, i ìmi noa na mäua o to metua täne ia òe mä te òto.

49 Ua parau mai ra o ia ia räua: E aha òrua i ìmi ai ia ù. Àita òrua i ìte, e ia haapaò vau i ta ta ù metua e tià ai?

50 Aita rä räua i ìte i te parau ta na i parau mai ia räua ra.

51 Hoì mai ra räua e o ia atoà ra i Nätareta, faaroo atu ra ia räua; vaiiho mäite iho ra rä ta na metua vahine i taua mau mea atoà ra i roto i to na âau.

52 Tupu atu ra Ietu i te rahi e te paari, e te herehia mai e te Atua e te taata atoà.

Heuraa Manaò.

Te faatià nei o Ruta èv. Pene  2 i te mau ìrava 40 e tae i te ìrava 52 i te àamu no Ietu i te àhuru mä pitiraa o to na mätahiti, a faaea ai o Ia i roto i te hiero i Ierutarëma i muri aè i te ôroà no te Pata.

1. Te àamu o Ietu ìrava 40 : Te faataa nei te ìrava 40 i te tupuraa pae tino, pae feruriraa e te pae varua o Ietu, ma te haapäpü e, ua î o Ia i te paari e tei nià ia Na te aroha o te Atua.

2. Te tere i Ierutarëma ìrava 41 e te 42 : I te mau mätahiti atoà, e tere na metua o Ietu, o Maria e o Iotëfa, i Ierutarëma no te ôroà o te Pata. I te àhuru mä pitiraa o to na rä mätahiti, ua âpee o Ietu ia rätou.

3. Ua faaea o Ietu i roto i te Hiero ìrava 43 e tae i te 45 : I muri aè i te ôroà, a hoì ai o Maria e o Iotëfa i te fare, ua ìte aè ra raua e àita o Ietu i pïhaì iho ia raua. Ua hoì rätou i Ierutarëma no te ìmi ia na.

4. Ietu i rotopü i te mau òrometua ìrava 46 e te 47) : I muri aè e toru mahana mäìmiraa, ua ìte atu ra rätou ia Ietu i roto i te hiero rä, te pärahi ra i rotopü i te mau òrometua, te faaroo atu ra e te ui atu ra ia rätou. Ua maere te feiä atoà i faaroo ia na i to na marämarama e ta na mau pähonoraa.

5. Te huru o Maria e o Iotëfa ìrava 48 e tae i te ìrava 50 : Ua maere o Maria e o Iotëfa i te ìteraa ia Ietu i roto i te hiero. Ua ui o Maria ia na no te aha o Ia i na reira ai ia rätou, e ua pähono o Ietu e, tei roto o Ia i te fare o to na Metua. Àita rätou i taa e aha ta  na e parau ra ia rätou.

6. Hoì i Nätareta ìrava 51 e te 52 : Ua hoì o Ietu na muri iho ia rätou i Nätareta e ua auraro ia rätou. Ua tämau noa o Ia i te tupu i te rahi i roto i te paari, te paari e te maitaì i mua i te Atua e i te taata.

Te na ô ra te ìrava i faatumuhia, E aha òe i ìmi mai ai ia ù. Àita anei òe i ìte e, e mea tià ia ù ia rave au i te òhipa a to ù Metua. Te haapäpü ra teie ìrava i te ìte-òiòi-raa o Ietu i ta na òhipa e to na iho taata èi Tamaiti a te Atua.

Te haapii mai nei teie ìrava ia tätou i te faufaa no te tupuraa, te paari e te marämaramaraa no ta tätou òhipa i roto i te täviniraa hanahana i te Atua Metua. A fatata ai te mätahiti i te hope,  o Ia e faauru ia tätou ia ìmi i te paari o te Atua e ia faaö i roto i te mau òhipa a te Atua ma te püpü ia tätou e te faaroo.

Ìrava 49 o te na ô ra e, E aha ôrua i ìmi mai ai ia ù Àita anei òe i ìte e, e mea tià ia ù ia haapaò i te mau òhipa a to ù Metua.

1. Te mau òhipa ärataìhia e te varua : Te haamanaò mai nei teie ìrava ia tätou i te faufaa ia tuu i te mau òhipa a te Atua i roto i to tätou oraraa. A fatata ai tätou i te faaoti, e aniraa manihini ia hiòpoà faahou i ta tätou mau òhipa mätamua e ia faatumu faahou i nià i to tätou auraa e te Atua.

2. Te òhipa a te taata iho : Ua ìte o Ietu, noa atu to na âpï, e ta Na òhipa haapii ia hanahana to na Metua. Te faaitoito nei teie ìrava ia tätou ia fëruri i nià i ta tätou iho täviniraa, e nahea e tià ai ia tätou ia tävini i te Atua i roto i to tatou oraraa i te mau mahana atoà.

3. Te ìmiraa i te paari : Tei roto o Ietu i te hiero, te faaroo ra e te uiui ra i te mau täote o te ture. Te haamanaò mai nei te reira ia tätou i te faufaa rahi no te ìmiraa i te paari e te ìte i te ärataìraa a te varua. A fatata ai te mätahiti i te hope,  e fäfau tätou e faahohonu atu ä i to tätou marämarama no nià i te faaroo.

4. Te tiàturiraa i te Atua : E faaìte te pähonoraa a Ietu i to na tiàturiraa i to Na tiàraa e i te hinaaro o te Atua. Ta tatou ia e tiàturi nei i nià i teie tiàturiraa no te haafatata atu i te mätahiti e haere mai nei ma te faaroo e te päpü, ma te ìte e e faanahoraa ta te Atua no tätou te taata tätaì tahi.

Na roto i te fëruri-maite-raa i nià i teie ìrava, e ìte tätou i te faaüruraa no te faahope i te mätahiti na roto i te färiuraa te âau i nià i te Atua e ia haamata i te mätahiti âpï na roto i te hoê fäfauraa âpï ia pee i to Na hinaaro.

Te hoê òhipa na roto ia tätou iho o te hoê ia fä aore rä te hoê haapäpüraa ta te hoê taata e haamau na roto i te oraraa, tei niu-pinepine-hia i nià i te mau faufaa no te maitaì, mau hiaairaa, e te mau täreni. E faaìteraa te reira no te mea ta te taata e hinaaro i te rave e e nahea rätou ia ora i to rätou oraraa.

1. Te mau faufaa : Teie te mau parau tumu faufaa rahi o te arataì i ta òutou mau òhipa e ta òutou mau faaotiraa. Èi hiòraa, te parau-tià, te aroha, te parau mau, e te vai atu ra.

2. Te mau manaò : Teie te mau òhipa e aore rä, te mau tumu o te faatupu i te ànaanatae e o te faaitoito ia òutou. Èi hiòraa, te tautururaa ia vëtahi ê, te hämaniraa i te òhipa rima î, te haapiiraa, e te vai atu ra.

3. Te mau täreni : Teie te mau àravihi e te mau àravihi taa-ê e vai ra ia òutou ra. Èi hiòraa, te haaparareraa manaò, te manaò âpï, te faaâfaroraa i te fifi, e te vai atu ra.

4. Te mau ôpuaraa : Teie te mau òhipa taa-ê ta òutou e hinaaro ia rave faaoti i roto i to òutou oraraa. Èi hiòraa, a riro mai èi ärataì i roto i ta òe tuhaa, ma te turu i te hoê tumu no te oraraa vaamataèinaa, e te vai atu ra. Te hoê òhipa e täui i te roaraa o te tau a tupu ai òutou i te rahi e a täui ai ta òutou mau òhipa mätamua. Ua riro te reira èi àveià no te ärataì i ta òutou mau mäìtiraa i te mau òhipa, no te täuturu ia òutou ia ora i te hoê oraraa e au i te faufaa mau ia hanahana te Atua Metua.

Heuraa Ìrava.

-Taramo 84, 11 E maitaì rahi to te mahana hoê i roto i te mau hëtere no òe ra, i te mahana atoà e tautani noa atu i te tahi vähi ê E hinaaro rahi to ù i te tiaì i te ùputa i te fare o ta ù Atua, i te pärahi i te mau tiàhapa o te paieti-òre ra.  

-1 Tämuera 1, 27 i pure hoì au i teie nei tamaiti; e ua höroà mai te Fatu i ta ù i ani atu ia na ra;

-1 Ioane 3, 1 A hiò na i te huru o to te Metua aroha ia tätou nei, o tätou i maìrihia mai e, e tamarii na te Atua: i òre ai to teie nei ao i ìte ai ia tätou, no te mea aore atoà i ìte ia na.

-Ruta èv. 2, 49 Ua parau mai ra o ia ia räua: E aha òrua i ìmi ai ia ù. Aita òrua i ìte, e ia haapaò vau i ta ta ù metua e tià ai?

Faaitoitoraa.

Oia mau, Teie te hoê poroì ia au i te faanahoraa a teie na ìrava e maha :

Taramo 84 ìrava 1: Te nehenehe o to oe pärahiraa, e te Fatu o te mau nuu.

1 Tämuera pene 1 ìrava 27 : I pure na hoì au no teie nei tamaiti, e ua faaroo mai te Fatu i ta ù pure ia na.

1 Ioane pene 3 ìrava 1 : A hiò na i te hinaaro ta te Metua i faaìte mai ia tätou, ia parauhia tätou e tamarii na te Atua. E te na reira nei tätou.

Ruta èv. pene 2 ìrava 49: Ua parau atu ra o Ia ia rätou, E aha òutou i ìmi mai ai ia ù. Àita anei òe i ìte e, e mea tià ia ù ia rave i te òhipa a to ù Metua.

Te haamanaò mai nei teie mau ìrava ia tätou i te nehenehe te pärahiraa moà o te faaearaa o te Atua, te faufaa o te pure e te faaroo, te here rahi o te Atua ia tätou no te piiraa mai ia tätou ta na mau tamarii, e te òhipa hanahana te tià ia tätou paatoà ia rave. Ia faaüru e ia haapuai teie mau parau ia òutou i roto i to òutou faaroo e to òutou tere i roto i te hau o te Atua Metua.

Te taahiraa i nià i te èà o te faaroo o te hoê ia tere no te taata iho e no te taata hoê e tae atu ai i te hoê tüàtiraa rahi aè i te tupuraa hanahana no te aroha e te here, te häroàroàraa ia na iho e te tupuraa o te tiàturiraa. E tere teie o te tïtau i te feruriraa hohonu, te pure, te fëruri-hohonu-raa, e te taio-pinepine-raa i te Pîpîria e te hiò-tämau-raa i te Rähu e àua haaàti ra ia na i roto i teie ao. Te vai atoà ra te täviniraa ia na iho i to na ùtuafare e ia vëtahi ê, te âpitiraa atu i roto i te faaroo, e te haapäpüraa i roto i te mau püpü faaroo.

Èi haapotoraa, te haereraa i roto i te reo tumu o te fenua, o te ìmiraa ia i te ora ia au i ta na mau faufaa tumu o te varua e te ìteraa i te hoê auraa hohonu aè i roto i te oraraa. E raveraa tämau teie o te tere na roto i te taime e te mau ìteraa o te oraraa.

Oia mau, Teie te hoê parau tumu e tïtau mai ra ia tätou ia au na ìrava e maha ta tätou i faahiti aè nei :

E mata na tätou i te here i te Rähu a te Atua, ia pure ma te faaroo, ia ora èi mau tamarii na te Atua, e ia rave faaoti i ta tätou täviniraa.

E ìtehia i roto i teie parau tumu te manaò tumu o te mau ìrava tätaìtahi, ma te haapäpü i te faufaa o te here i te fare o te Atua, te mana o te pure, to tätou tiàraa èi tamarii na te Atua, e ta tätou fäfauraa ia pee i te hinaaro o te Atua.

E aha ta oe e manaò nei.

Te hoê parau tumu i roto e toru taò tei faatupu i teie mau ìrava :

Faaroo, Here, Tävini.

Pehepehe.

E mata i te here i te òhipa a te Atua,

 

I raro aè i te mau raì haamaitaìhia,

 

E ìmi na tätou i te haapüraa, I roto i te fare moà,

I reira te here e matara ai, to tätou âau i roto i te pure,

To tätou värua i roto i te òaòa, ia here tätou i te vahi faaearaa o te Atua,

To tätou pare. E pure anaè tätou ma te faaroo,

 

I roto i te mau aho atoà,

 

E tià mai te hoê pure, ma te faaroo aueue òre,

E àma to tätou värua, e tüpaìpaì to tätou värua,

E täpiri tätou i te mata, e pure tätou ma te faaroo,

Faaâpïhia i te mau mahana atoà.

 

Ia ora na tätou èi mau tamarii na te Atua,

 

I roto i te marämarama hanahana, e haere âmui anaè tätou,

E te mau tamarii a te Atua, ma te hoêhia e te here,

Ma te âau mä e te värua parau-tià,

E mata na tätou i te ora èi tamarii na te Atua, ma te ôtià òre.

 

E mata na tätou i te rave faaoti i ta tätou òhipa hanahana,

 

Ma te ärataìhia e te aroha, e amo anaè tätou i te marämarama,

I roto i te mau òhipa atoà, te mau parau atoà, te mau òhipa atoà,

Te itoito e te here hope òre,

E mata na tätou i te rave faaoti i ta tätou òhipa hanahana, ma te itoito e te au maite.

 

Maitaì tätou i teie mätahiti âpï.

 

Teraì òr. Faatura.