Täpati 13 no Taaoa 2025
Faatoaraa
Taiòraa :
Papa Ati-Iuta : Ruta 19, 28 -40
Papa Mäòhi : Hape huru hape (Turo a Raapoto)
Ta òe i huna, e òre ia e vai mai
Ta òe i mämü, e òre ia e parauhia
Ta òe i haamä, e òre ia e faaìtehia
A ara, o te haamä atoà to òe fenua ia òe.
Te reo, e mana ia ta te Atua i horoà i te taata
Te èà e tae ai te taata i roto i te ìteraa i te Atua
Inaha i parau te Atua, i ìtehia ai e, te vai ra te Atua
A parau, ia ìtehia e, te vai ra òe.
Ua mämü òe i to òe parau, tahi ia hape
Aita to vaha i fäì i to reo, tahi ä ia hape
Ua haapeu òe i roto i te hiroà o te tahi, a tini ia hape
Aita òe i here ia òe, ua mano tini te hape ta òe i rave.
A tirë i te haavare noa i te parauraa e:
E reo to ù, e fenua to ù, e peu ta ù
Te hea reo, te hea fenua, te hea peu
Haamä òre òe i te taiòraa i te mea ta òe i haapae.
O vai òe, inaha aita òe i hinaaro i te ìte ia òe
Ua pohe te tumu ra, ei te auahi ia vai ai
Te toe nei rä te huero e te ohi rii hou
Na rätou e faateniteni i teie fenua.
Te nünaa o te Atua i Mäòhi Nui nei, ia ora na maitaì tätou i te färereiraa i teie Täpati
e ìriti ai tätou i teie Hepetoma no te Vaereà Marae o ta tätou i mätau noa na i te parau
e, Hepetoma Moà. Aita ä paha te pae rahi o tätou i märamarama maitaì atu ra i teie
parauraa mäòhi ta tätou no teie hepetoma, o tei tauàtihia i te tahi ôroà tumu a te Mäòhi
i mua ra, oia te vaereà marae. E huru ê ihoä te manaò ia faahitihia te parau o te marae,
no te mea ua èreère roa te reira parau i roto i to tätou feruriraa ia au i te mau haapiiraa
a te mau mitionare e te mau päpaìraa a te mau papâa, mea ìno te marae, e vähi
taparahiraa taata.
E inaha, i roto i te hiroà o te Mäòhi, te haamataraa o te parau o te marae, eere ia terä
âpaparaa ôfaì tei riro na ei vähi haamoriraa na to tätou mau Tupuna. Te marae na mua
roa, to te taata ia rae, o ia te feruriraa. I pataù ai te mau tahuà e: Ei tere pure to taata
e tae ai i te marae ; mai te peu e, e tere ê, eita te Atua e vare. Te auraa, mea tämä na
mua te rae, te feruriraa, te àau, aita e mea ê atu i roto i e taata, no te mea te tomo ra o
ia i roto i te ai o te Atua, e te ao o te Atua, mea moà, mea mä. Ia au te tahi reo to te
Atua i te nünaa Iteraera : Ia moà òutou, mai ia ù e Moà nei ; ia mä òutou, mai ia ù e
mä nei. Te auraa, te parau o te vaereà marae, eere i te paparaa ôfaì te haere e tämä na
mua, oia te vähi haamoriraa, terä rä âpaparaa ôfaì i roto i to tätou feruriraa, to tätou
àau, te reira te tämä na mua roa, hou haere atu ai e tämä te marae.
Hoê ä ia no teie hepatoma o ta tätou e parau nei e, hepetoma moà, te taime te reira ia
au i te faanahoraa ta teie haapaòraa âpï ta tätou e ora nei i teie mahana, e haamanaò
ai tätou i te mau mauiui, te mau àti, te pohe e te tiàfaahouraa o to tätou Fatu. E terä
òhipa i amohia e to tätou Fatu, no te tämä ia i te hara, te ìno e te viivii o te ao täatoà,
mai ta na i haapäpü i te taime a haamau ai o ia i ta na ôroà : A rave a àmu o taù tino
tenä, a rave a inu, o taù toto tenä, te toto o te faaauraa âpï, tei haamaniihia no te hara
e rave rahi a to te ao. Te parau päpü, ua rave te Fatu i ta na tuhaa, oia te tämäraa i te
hara a to te ao, te mea atoà ia e tïtauhia ra ia tätou i teie mahana, e i te roaraa o teie
hepetoma, te tämäraa ia tätou iho, ia tià mä atu tätou i mua i to tätou Atua, ei nünaa
faaâpïhia i te here e te aroha o te Atua, ia tià ia tätou ia hiemäteòa i te haamaitaìraa i
te Atua i te mau mahana atoà.
Mai teie nahoà rahi taata tei âpee i te Fatu i nià i te èà no te tomoraa i roto i te òire no
Ierutarema, tei vauvau i to rätou àhu, te âmaa räau ei peu faaìteraa na teie nünaa Ati-
Iuta e arii teie e tomo nei i Ierutarema, e te täpaò faaìte i te reira, te fanauà àteni ia. Ia
au i tei pehehia e te perofeta Tetaria 9, 9 : ‘A òaòa hua e te tamahine a Tiona e, a pii
hua na e te tamahine a Ierutarema e ; inaha, te haere mai ra to arii ia òe ra, e parau tià
ta na, e o te ora hoì o ia, haèhaa to na, i te pärahiraa i nià i te àtini e te pinia, te fänauà
o te àtini.’
Te òaòa ra te nünaa e te mau pipi i te färiiraa i to rätou arii, areà te mau faatere o te
faaroo aita roa ia e tüàti ra i teie huru tupuraa òhipa. E inaha, to na tanoraa mau, e
tomo atoà rätou i roto i teie färiiraa i te Fatu. O rätou to na tanoraa mau, te feiä
matamua e ìte i te auraa o teie peu ta te Fatu e rave nei, no te mea e feiä taiò pïpïria
anaè rätou atoà, inaha te feiä taa òre roa atu ia. Ua pü-mahana-hia i te pärahi-noa-raa
e te taiò-noa-raa i te pïpïria, no te faatià ia rätou iho. Te tumu ia rätou i ani ai ia Ietu
e haamämü i teie nahoà rahi, no te mea te aoaoa ra to rätou tarià i te hürö a te nünaa.
E hape huru hape to teie mau taata i te parauraa atu i te Fatu e haamämü i teie nahoà
rahi, ua faanuu faahou atu Ietu i te parau i nià i to na vairaa mau mä te parau atu ia
rätou e: Ia mämü rätou, e parau mai te mau ôfaì. Maa ôfaì päpü mau teie ta Ietu i
taora atu i nià i teie mau faatere faaroo. E aha te auraa no teie reo o te Fatu, teie.
Terä ta te nünaa e hiemätòa ra, eere te taata noa terä e òaòa ra i te färiiraa ia Ietu, te
Arii o teie nei ao e tomo nei i roto i te òire no Ierutarema. Ua âmui atoà te rahu a te
Atua i roto i teie färiiraa i teie Tamaiti arii, òre noa atu ai ia to rätou reo e faaroohia
mai tei pehepehehia e te Taramo 19, 4 e na ô ra e : ‘Te parau hua nei te mau raì i te
hanhana o te Atua, e te faaìte nei te reva i te òhipa a ta na rima ; te haapii nei te tahi
ao i te tahi i te parau, e te faaìte nei te tahi ruì i te tahi i te ìte. Aore e ôrero, aore e
parau, aore to rätou reo i ìtea, ua tae rä to rätou haruru i te mau fenua atoà, e ta rä
faaìteraa i te ôtià o teie nei ao.’ Ua âmui atoà te rahu i roto i teie färiiraa, i te mea e,
ua ineine hope roa Ietu i te faatupu i te hinaaro o to na Metua, te tumu o ia i tonohia
mai ai o ia i te ao nei.
Te ìte noa atoà ra tätou i to tätou faufaa òre i mua i te rahi e te hanahana o te Atua. Ia
mämü rätou, e parau mai te mau ôfaì. Te auraa, òre noa atu tätou te taata e ârue, e
faaìte, e faahanahana i te Atua, te paaìna noa te ra te pehe a te rahu i te haamaitaìraa
i te Atua. Mai te mau àre o te miti e fati mute òre noa nei i nià i te aau, te taì òtooto o
te mau manu rau, te àhehe o te uru räau, e àhehe o te tahora pape, e rau noa atu ä.
Teie topara reo to te Fatu, ia mämü rätou, e parau mai te mau ôfaì, aita ia i ätea atu i
ta Ioane parauraa i taua pupu taata nei ä i te hiti pape Ioritana no to rätou fäìraa e, e
mau tamarii rätou na Aperahama: E tià noa i te Atua i te faariro i teie mau ôfaì ei mau
tamarii na Aperahama. Auê te haamä e, i te parau-hänoa-raa i to te tahi metua, e
metua atoà no rätou. To tätou mau atoà terä huru te Mäòhi i teie mahana, te faariroraa
ia Faräni ei mämä no tätou, te hau metua. Ua pü mahana roa atoà hia tätou mai terä
mau faatere faaroo i roto i ta tätou taiòraa no teie mahana, i te mau-noa-raa i nià i te
mea i päpaìhia i roto i te puta, e te òreraa e ìte e e färii e, terä i päpaìhia i roto i te
puta, terä ia vai i rapae, oia te rahu a te Atua. Te reo atoà ia o te Fatu i te tahi mahana
i te parauraa i te mau faatere faaroo e : ‘Te ìmi nei òutou i te parau i päpaìhia ra, no
te mea te manaò òutou e roaa te ora mure òre i reira ; o te faaìte ia ia ù o taua mau
parau ra. Eita rä òutouòutou e haere mai ia ù nei i te ora hoì no òutou.’ (Ioane 5, 39).
Te auraa, terä i päpaìhia, terä ia e vai ra i rapae ta tätou e fänaò noa ra i te mau mahana
atoà e ta tätou atoà e haamere noa nei i teie mahana, te òreraa tätou e ìte faahou ia
tätou e mau tamarii na Mäòhi Nui, to tätou Metua vahine faatupu ora. Teie ia reo
faaitoito o to tätou taeaè o Turo i roto i ta na pehepehe e: Hape huru hape.
Ta òe i huna, e òre ia e vai mai
Ta òe i mämü, e òre ia e parauhia
Ta òe i haamä, e òre ia e faaìtehia
A ara, o te haamä atoà to òe fenua ia òe.
Te reo, e mana ia ta te Atua i horoà i te taata
Te èà e tae ai te taata i roto i te ìteraa i te Atua
Inaha i parau te Atua, i ìtehia ai e, te vai ra te Atua
A parau, ia ìtehia e, te vai ra òe.
Ua mämü òe i to òe parau, tahi ia hape
Aita to vaha i fäì i to reo, tahi ä ia hape
Ua haapeu òe i roto i te hiroà o te tahi, a tini ia hape
Aita òe i here ia òe, ua mano tini te hape ta òe i rave.
A tirë i te haavare noa i te parauraa e:
E reo to ù, e fenua to ù, e peu ta ù
Te hea reo, te hea fenua, te hea peu
Haamä òre òe i te taiòraa i te mea ta òe i haapae.
O vai òe, inaha aita òe i hinaaro i te ìte ia òe
Ua pohe te tumu ra, ei te auahi ia vai ai
Te toe nei rä te huero e te ohi rii hou
Na rätou e faateniteni i teie fenua.
No reira, eiaha tätou e haamä e e mämü faahou i to tätou parau, no te mea to tätou
reo, e mana ia ta te Atua i horoà i te Mäòhi, te èà e tae ai te Mäòhi i roto i te ìteraa i
te Atua. Eiaha e mämü faahou, mea haamä e na te ôfaì e parau i to tätou parau. E ia
òre hoì tätou e ìte faahou i to tätou, ua ineine te rahu i te tauturu ia tätou, ia au i te reo
o Iopa 12, 7 – 9 : ‘A ui atu i te mau puaa, e na rätou e haapii mai, e te mau manu o te
reva nei, e na rätou e haapii mai ia òe. E aore ra, a ui na i te fenua, e na na e parau
mai ; a ui atu i te ià o te moana, e na rätou e parau mai ia òe. O vai tei òre i ìte e, na
te parau a te Atua teie i faatupu mai.’
Ia maitaì tätou i teie hepetoma vaereà marae. Ia ora na.
Tahiarii, Opura a Pihaatae Òrometua.
Monire 14 no Eperera 2025
Taiòraa : Ruta 22.63-71
63 E te mau taata i täpeà ia Ietu ra, tähitohito mai ra ïa, e taìri mai ra ia na. 64 E oti
aè ra to na mata i te täpoìhia e rätou, ua moto mai ra i ta na mata, ua ui mai ra, na ô
mai ra, A faaìte mai na i tei moto ia òe na. 65 E rave rahi ä ta rätou parau faaìno i
parau mai ia na. 66 E tei te aoraa ra, ua putuputu mai ra te feiä paari, e te mau tahuà
rarahi, e te mau päpaì parau, ua arataì mai ra ia na i roto i taua âpooraa na rätou ra,
na ô atu ra, 67 O te Metia òe ra, a faaìte mai ia mätou. Ua na ô atu ra o ia ia rätou,
Faaìte noa vau ia òutou, e òre òutou e faaroo; 68 e ia ui atoà atu vau ia òutou, e òre
òutou e parau mai ia ù, e e òre hoì e tuu ia ù. 69 Teie a parahi te Tamaiti a te taata
nei i te rima àtau o te Atua mana ra. 70 Ua na ô tahi mai ra rätou, O te Tamaiti mäori
òe na te Atua? Ua na ô atu ra o ia, E parau mau ta òutou e parau na, o vau ia. 71 Ua
na ô ìho ra rätou, E aha atu ä to tätou ìte? tei ìte hua tätou i to na ìho vaha.
Ia haamaitaìhia te Atua i to tätou färereiraa i teie hepetoma haamanaòraa te tupu hope
roa te ôpuaraa faaora a to tätou Atua, nä roto i ta na Tamaiti fänau Tahi, to tätou Fatu,
tei horoà hope roa i to na ora no teie nünaa herehia e a na. Haamauruuru i to tätou
Atua, no to na here e to na aroha, tei àti noa i to tätou oraraa i te mau mahana atoà, e
tei horoà mai ia tätou i te haereraa nä nià te éà o te ORA, tei faatoro hope roa e to
tätou Fatu i nià i te tätauro, nä roto i to na pohe e to na tiàfaahouraa, e tei arataì ia
tätou i te mau taime atoà o to tätou oraraa.
Ta tätou parau no teie mahana, ua haruhia Ietu, ua hamani-ìno-hia e te haavähia ra.
Ua haere mai Ietu i teie nei ao, no te horoà i te tahi ora âpï i te taata no teie tau. Ua
haere mai oia no te faatupu i te hinaaro o to na Metua. Ua haere mai e faahoì i te
parau a te Atua i nià i to na vairaa, noa atu mai nä roto i te mäuiui e te pohe, ua haere
mai te Fatu ia ORA te taata o te mau tau atoà i roto i te Hau o te Atua. E o ta tätou e
ìte ra i roto i ta tätou parau te huru rave-raa-hia i nià i teie Faaora o tei haere mai i
teie nei ao. Tei òre teie mau taata e hamani ìno ra ia na e horoà i te faaroo e te tiàturiraa
i to na haereraa mai i teie nei ao, no te faatià-faahou-raa i te nünaa. Te òhipa i tupu i
tera rä tau, oia atoà i teie mahana. Te òre tätou e horoà i to tätou taatoàraa i roto i te
Atua, o tei haere roa mai i rotopü ia tätou no te tautururaa ia tätou i te faataaraa i te
mea maitaì no to tätou oraraa, o te huru ia e ìtehia i nià i teie mau taata, e i ta rätou
huru-rave-raa ia Ietu, faariroraa ia na ei òhipa haùti na rätou, inaha te faaìte nei, Ruta
i te ìrava 69 :”Teie a parahi te Tamaiti a te taata nei i te rima àtau o te Atua mana ra.”
Te faaìteraa Ietu, e Tamaiti mau oia na te Atua e te òhipa o ta na e haere mai nei i te
ao nei, o ta te perofeta Taniera 7.13-14, e nä ô ra: “Hiò ìho ra vau i taua òrama i te ruì
ra, e inaha, te hoê mai te Tamaiti a te taata ra i te haereà mai nä roto i te mau äta o te
raì ra; e ua haafatata atu ra oia i to te mau mahana tähito ra, e tuuhia ìhora i pihaì ìho
ia na.
E ua horoàhia mai ra te mana e te hinuhinu, e te pätireiä no na, ia auraro mai te taata
atoà, e te mau fenua atoà, e te reo atoà ia na; to na mana, e mana mure òre ia, e òre ia
e mou, e to na pätireiä, e òre ia e pau.”
Aita te Fatu e haavare nei, te faaìte noa ra te parau mau, i mua te haaväraa a te feiä
paari, te mau päpaì parau e te mau tahuà rarahi, oia te mau faatere no te hiero, e o
rätou te mau tià no te nünaa o te Atua, tei òre i ìte oia te Metia o tei haere mai e no te
faatupuraa i te mau parau atoà no teie nei ao. Oia, no te faatià-faahou-raa i teie nünaa
to tätou e te mau nünaa atoà.
Te òhipa e tupu ra i roto i ta tätou parau no teie mahana, te huru oraraa atoà o ta tätou
e ora ra, te ìmi-haere-raa te ORA i vahi ê, ua tae roa mai te ORA io tätou nei, o tei
faatoro ra te èà o te ORA, o tätou noa terä e toë ra, no te tomoraa i roto i te Hau o to
tätou Atua, oia hoì, ua tiàfaahou mai te Tamaiti a te taata nei, eiaha no te faahoìraa i
te òhipa ta te taata e rave i nià ia na, ua haere mai ra i teie nei ao no te faaìte i te parau
mau e te parau tià a te Atua ORA no to na HAU. Aita te Fatu i tiàfaahou mai roto mai
te pohe, no te haavä e te faahapa ia tätou, ua haere mai ra ia tià tätou nä roto ia na, ia
roaa te ORA MURE. Ia ora na.
Tereva òrometua, Paroita Ioritana, Tuhaa Hitu
HEPETOMA MOÀ
(Mahana Piti 15 no Eperera 2025)
Taiòraa : Ruta 23/1-12
Te piti teie o te pö, e âpee ai tätou i te Fatu i roto i te mau àti ta na i färerei, ta na hoì
i färii ; tei faaòromaì i te haamä, te mau pariraa, te ìno o te taata. Ua haamanaò na o
ia i ta na mau pipi i te tahi taime, te tupuraa no teie mau òhipa : E tuuhia o ia i te rima
o te taata, e rahi o ia i te hämani-ìno-hia i Ierutarema. Teie taua mahana ra, te tupu ra
te parau, te tupu ra te mau tohu, teie Ietu i roto i te rima o te taata, teie hoì e tià nei i
mua i te pariraa, e te faahaparaa a te taata.
I roto i ta tätou taiòraa, aita te òhipa e tupu nei i ätea roa atu, i teie e ìtehia nei i roto i
te mau haaväraa. Te tià mai ra te haavä i to na pae, te feiä pari i to rätou pae, e te taata
e haavähia ra i to na pae. E mai tei ìtehia i roto i te mau haaväraa atoà, tïtauhia i te
feiä pari ia âfaì mai i te mau parau e faatano ra ia rätou, no te taata ta rätou e pari ra.
Mai tei ìte-atoà-hia rä i roto i te mau haaväraa atoà, te òhipa a te haavä, te ìmiraa ia i
te räveà ia ìtea te parau mau, e te parau tià.
I ô nei, i roto i ta tätou taiòraa, mai te mea ra e, o Pirato te haavä ; te feiä pari, o te
mau arataì ia o te faaroo ; e te taata e naeàhia nei i te pariraa, o Ietu ia. I terä mahana,
ua rave te mau arataì faaroo ia Ietu, e tuu i mua ia Pirato ; ia hiò Pirato i to na parau,
e ia rave i te faaotiraa no te faautuà ia na. E aha rä te òhipa ìno ta Ietu i rave ? E aha
ta na hara, e tano ai e faautuà ia na ? E toru parau ta rätou i tuu atu i mua ia Pirato, ei
faaìteraa i te hara, e te òhipa ìno ta Ietu i rave.
A tahi : Ua ìte rätou ia na i te haapiòraa i te fenua ; oia hoì, te ôrureraa i te Hau.
A piti : To na ia faaòreraa i te taoà àufau a Taitara.
A toru : To na ia parauraa ia na iho e, o te Arii o ia o te Metia.
Ahiri mau e, e taata ôrure Hau Ietu, mai teie ta rätou e pari nei ia na, ua tano i te
tuuraa ia na i te rima o Pirato. Aita rä Ietu i rave aè nei i teie huru òhipa, aita ä i ôrure
aè nei i te Hau ; aita ä hoì i faaòre aè nei i te taoà àufau a Taitara. Teie rä mau arataì
faaroo tei hiò ia Ietu mai te tahi taata, tei haere mai e ôrure i te Hau, e faahuru ê i ta
rätou faatereraa. Te mea ia rätou i ìmi ai i te hara, te mea e nä mua mai, ei räveà e
naeàhia ai Ietu i te faahapa.
I mua i teie mau pariraa e maìri nei i nià ia na, te ui ra Pirato : O te Arii maori òe o te
Ati Iuta ? Mai te mau uiraa atoà, te vai ra ihoä te tïtauraa i te märamarama, e aore ra
te tatararaa ; te auraa, e uiraa teie e tiaì ra i te pähonoraa. E aha ta Ietu pähonoraa ?
Aita Ietu i pähono e, Ê, e aore ra Aita ; ta Ietu pähonoraa :
E parau mau ta òe. Te auraa, aita o Pirato e haavare ra, aita e pari ra, terä fäìraa ta na
ia Ietu ei Arii no te Ati Iuta, noa atu e, mea nä roto i te uiraa, e parau mau ta na e
parau ra.
Te mea ia o ia i tià mai ai, e parau i te mau arataì faaroo, e te mau taata atoà i reira :
Aore roa e hara i ìtea e au i teie nei taata. Te auraa, aita hoê mea ta na e ìte ra, e tià ai
ia na e faautuà ia Ietu. Te faarooraa rätou i teie reo, rahi roa atu to rätou ìnoìno, e to
rätou riri ia na. Te faaìte noa mai ra teie parau ia tätou e, te taata tei î to na âau i te
ìno e te riri, e piri to na tarià, e eita e färii i te parau mau ; inaha, e parau mau ta Pirato
e parau ra ia rätou : Aore roa e hara i ìtea e au i teie nei taata. E tano e parau e, ua
pöirihia to rätou mata, òre ai rätou i ìte i te hau, òre ai hoì i färii i te ora ta te Fatu no
te hau e te ora, e faaìte nei ia rätou.
No te ìtea òre ia Pirato te hara a Ietu, manaò aè ra e tuu i to na parau i roto i te rima o
Herota, te tià o te Hau Röma i Tarirea. Inaha, ia au i te mau faatiàraa, mai te mea ra
e, e taata Tarirea Ietu. E hau roa atu, tei Ierutarema Herota i taua mau mahana ra. Ua
òaòa Herota i te färereiraa ia na, faaroo noa na o ia i te parau o Ietu, hinaaro noa na o
ia e ìte, no te hiò ia na ia rave i te mau temeio, aita roa rä Ietu i faatupu i te temeio i
mua ia na.
Haamata iho ra i te uiui ia na, aita atoà Ietu i parau noa atu. E inaha, e taata ìtehia Ietu
no to na huru täpeà òre i te parau ; i mua i te uiraa a te taata, eita Ietu e mämü noa ; i
mua hoì i te hape o te taata, eita Ietu e faaherehere ; e te maere nei tätou i te ìteraa ia
na i ô nei, i mua i te uiuiraa a Herota, aita e reo, aita e parau. I mua i te reira huru to
te Fatu, ua tähitohito mai ra Herota, faaàhu iho ra ia na i te àhu ànaàna, faahoì faahou
atu ra ia na ia Pirato ra. Nä roto mai nei hoì o ia i te rima o Pirato, teie Herota e faahoì
faahou nei ia na ia Pirato ra.
Teie faahoìhoìraa ia Ietu i roto ia rätou iho, te haamanaò noa mai ra ia i to rätou taa
òre, nä hea rätou ia rave i te faaotiraa, e o vai të rave i te faaotiraa, no te faautuà ia
Ietu. Teie hoì nä taata (Pirato e o Herota), tei riro na ei ènemi i mua ra ; mai te mea
ra i teie nei, ua hau, ua piri faahou, teie rä piriraa to räua, no te âmui ia i to räua ìte,
to räua märamarama, no te faahià ia Ietu.
Te ìte ra tätou, te mau ènemi o te Fatu, eere ia i te taata no räpae, o te mau arataì iho
rä o te nünaa. No reira, eiaha tätou ia riro ei ènemi no te Fatu, eiaha hoì e faariro i to
tätou âau ei vähi haapüraa no te ìno e te riri ; ia riro rä ei haapüraa no te hau, no te
parau tià, no te parau mau, e te faaòreraa hara. Ia ora na.
Firipa Manuura a TEOROI Òrometua
FAAITOITITO RAA NO TE HEPETOMA MOÀ
Mahana Toru 16/04/2025
Taiòraa : Ruta 23/13-25
Na nià i te ioà o te faatere raa o te Ètarëtia Porotetani Mäòhi, te ioà o te tuhaa hitu na
paroita e pae farii mai i to matou tapaò aroha ia outou atoà na. Ia ora na.
E hoa here ma, tei roto tätou i te tau no te âpeeraa i te mau mauiui o letu tei haamata hia
mai i te tapati ra, e hope i te tapati i muri nei. I teie ra mahana, ua tapaò hia mai ta tätou
taiòraa i roto i te Evaneria a Ruta i te pene 23 haamata mai te irava 13 e moti i te irava
25 aita e ìrava tumu i tapaò hia mai. Ua hiò âmui hia mai ra te tahi manaò, ia au i te
taiòaa o teie ahiahi.
Te manaò tumu e vai ra i roto i teie taiòraa te faautuà raa hia letu. Ia au i te ìrava ahuru
ma toru, ua âmui mai te mau arataì faaroo, te mau arataì fenua e te nunaa no te hiò e no
te faaroo i te faautuàraa ta Pirato e rave no letu. E haava maitaì roa Pirato , ua hiòpoà
mai te oia i te hororaa ta te mau arataì faaroo e ta te nunaa i pari ia letu. E aita roa e
hapa ta na i ìte. A faaroo na i to na reo i roto i te ìrava 14 o tei na ô mai e : I arataì mai
nei òutou i teie nei taata ia'u nei mai te mea e, e orure hau, e inaha i haava iho nei au
ia na i mua i to òutou aro e aore roa ana e hara i itea e au i te mau mea atoà ta outou, e
pari nei ia na. Te parau atoà ra Pirato ua haava atoà Herota e aita atoà e hara i itea ia na.
Te auraa ra teie na arataì fenua e piti tei faataa hia tei tiàturi hia e te nunaa no te rave i
te faautuà raa ia Ietu, ua hoê to raua manaò no te papaì ia letu, a tuu atu ai ia'na.
I teie nei, eaha te manaò o te nunaa, ia hiò hia aita te manaò o te nunaa e tuàti ra, i to
teie na arataì fenua. Ia au i te irava 18 e faaruê atu i te nana, o Parapa ta oe e tuu mai.
E teie hoì taata ta te nunaa e ani ra e tuu mai e taata orure hau e e taparahi taata atoà.
E piti teie manaò e vai nei, e mea taaê te tahi i te tahi. To Pirato manaò e faatiàma ia
letu i te mea aita e hara ta na i rave. To te nunaa ra manaò e faautuà ia, e e faatatauro
ia’na. Ua tamata Pirato i te ìmi i te raveà no letu ia ora oia ua rahi roa atu ra ta te
nünaa pii raa e e faatatauro atu ia’na, e faatatauro.
Ua faatupu Pirato i te hau e ua tuu atura ia Ietu, i te rima o te nünaa ia rave te nünaa i
ta na i hinaaro. Te uiraa te Atua i roto i teie huru tupuraa òhipa, eaha to na manaò. E
tei teihea pae oia, tei te pae o te nünaa e aore ra tei te pae o Pirato.
Aita to na reo i faaroo hia ia hiò hia ra te tuàti ra oia i te manaò o te nünaa no te aha
no te faatupu i ta na ôpuaraa faaora ia au i te faatiàraa a Itaia i te pene 53 ìrava 10 Ua
ti'a ia Iehova i te haaparuparu ia'na i te pohe. Ia faariro hia ra oia ei tara'ehara e ite
oia i to'na huaai e maoro ho'i to'na pu'e mahana, e te hinaaro o lehova, e tupu ia i ta'na
rima.
Te uiraa hopeà e tano e ui : 0 vai tei manuia i roto i teie haavaraa
Mea papu o te Atua tei manuia. No tatou i teie mahana a vaiho na te Atua e rave i te
faaotiraa ia manuia tatou e ia maitaì ta tatou taviniraa ia na.
Ei irava opani Itaia 53 irava 5 i paruparu ra oia i ta tatou nei ùara, i ta'iri hia oia i to
tatou nei ino, e te a'o i hau hia ai i to tatou tei nià ia, ia na e no to na paruparu i ora ai i
tatou ia tia'i mai e ia tauturu mai te Atua ia tatou. AMENE
Varetau a PEAU òrometua
Mahana maha 17 no Eperera 2025
Taiòraa : Ruta 23.26-31
26 E tei te arataìraa atu rätou ia na, ua haru atu ra rätou i te hoê taata no Turene o
Timona te iòa, mai uta mai, ua tuu atu ra rätou i te Tätauro i nià ia na, ia höpoi o ia
nä muri atu ia Ietu. 27 E e tiàa rahi tei pee atu ia na, e te vahine atoà e rave rahi i te
òtoraa ia na. 28 Ua färiu mai ra rä Ietu ia rätou, na ô mai ra, E te mau tamahine i
Ierutarema nei, eiaha e òto ia ù, e òto rä ia òutou ìho, e ta òutou mau tamarii. 29 Inaha,
te fätata mai ra te ànotau e parauhia ai e, E ao to te uì, e te ôpu aore i fänau, e te ü
aore i òtehia. 30 Ei reira te taata e parau ai i te mouà, A mairi mai i nià ia mätou, e te
mau àivi ra, A täpoì mai ia mätou. 31 O te raveà hoì teie i te räau ota nei, e aha-hia ra
te raau märö?
Ia haamaitaìhia te Atua i to tätou färereiraa no teie mahana maha, hou to te Fatu
poheraa. O tei täpaòhia, i taua mahana maha ra, oia te haamanaòraa i te tamäaraa
hopeà o te Fatu e ta na mau pipi, e o ta tätou e haamanaò nei i te mau ôroà i te mau
avaè matamua atoà, e tae noa atu i te mau ôroà haamanaòraa i te mau tupuraa òhipa
e orahia ra e te Ètärëtia. Ua riro te tamäaraa hopeà a te Fatu e ta na mau pipi no tätou
i teie mahana, i to tätou àtiraa te tahi e te tahi i roto i te here e te aroha o to tätou Atua,
e to te Atua àtiraa ia tätou, oia te Atua o tei hamani i te mau raì e te mau fenua, e te
mau mea ORA atoà. Ia hau tätou i roto i te Hau o to tätou Atua.
I roto i ta tätou parau no teie mahana, tei nià Ietu i te èà o to na pohe i muri noa mai i
ta na haaväraa i mua ia Pirato, arataìhia atu ai o ia i Torotota, oia hoì te vairaa àpu
üpoo, no te tuuraa ia na i rapaè aè i te òire no Ierutarema, ua faariro rätou ia Ietu ei
taata hara, ua haavare o ia i to na tiàraa Tamaiti a te Atua. Ua mata ê rätou ia Ietu, no
rätou eere i te Tamaiti a te Atua, e tamaiti noa no Iotefa räua Maria. Te tumu ia i
arataì ia Ietu i rapae, te auraa ia pohe oia i rapae aè te òire ia au i te Revitito 24.14:
“A arataì mai nä i tauä faaìno ra i rapae aù mai i te puhapa, e te feiä atoà i faaroo i ta
na parau, e tuu rätou i to rätou mau rima i nià i ta na upoo, e na te âmuiraa atoà e tui
ia na i te ofaì.”
I roto i teie tere o te Fatu no to na mau taime hopeà o to na oraraa i to na tiàraa
taataraa, ua âpeehia o na e Timona, tahi teie taata, tei ravehia i roto i te nahoà rahi.
Te parauhia ra, o Timona no Turene, o tei âmui atoà mai no te ôroà pätä i Ierutarema,
e metua tane atoà no Aretanetero e no Rufo (Mareto 15.21). O Timona, o tei tauturu
i te Metia i te ämoraa te tätauro, tapaò faaìte ia tätou i te tiàraa o te Fatu, e Tamaiti na
te taata, te tumu tei ìtehia i to na paruparu, no to na mau àti, tei täparahi-ìno-roa-hia,
e Tamaiti atoà ra na te Atua, no te mea, ua haere mai o ia no te faahoì-faahou-raa mai
te HAU o te Atua i nià te fenua nei. E i roto i teie tere, te vai ra atoà te mau vahine e
te mau taata e rave rahi.
I roto i teie tere to te Fatu, te vai ra te mau vahine tei taì ra i nià ia na, e to ta te Fatu
e parau ia rätou i te ìrava 28: “E te mau tamahine i Ierutarema nei, eiaha e òto ia ù, e
òto rä ia òutou ìho, e ta òutou mau tamarii.”I mua i teie parau a te Fatu ia rätou, te
faaitoito nei ia rätou, eiaha rätou e haapeàpeà no na, no rätou ra, e te mau tamarii, ia
färii rätou e, ua haere mai te Metia i teie nei ao no te faaora ra ia rätou e to teie nei
ao. Ia färii rätou te tupu ra te ôpuaraa faaora a te Atua ora nä roto ia na. Ei mau vahine
terä, o tei ora i te tau täviniraa o Ietu e ta na mau pipi, ia au i te mau faatiàraa a Ruta,
oia te haapahi-noa-raa, te auraa, aita e òre, te faaìteraa ia tätou e, i terä rahiraa taime
to rätou i te peeraa ia Ietu e te faarooraa i ta na mau haapiiraa, mau faaoraraa maì e
te vai atu ra no te tautururaa ia rätou, aita rätou i märamarama noa aè, o vai mau na o
Ietu, e no te aha o ia i haere mai ai i teie nei ao. I to na tanoraa, tei nià rätou i te èà no
te faatupuraa i te ôpuaraa faaora a te Atua, oia te ìteraa i te arenio a te Atua e haere
ra i Torotota, no te faatiàmaraa ia rätou no ta rätou mau hara. Aita ra rätou e ìte mai
te reira.
Te faaitoito nei te Fatu, i teie mau vahine, e ia tätou atoà, e ìmi i te mau raveà i mua
i ta na mau parau, mau haapiiraa, e ìmi i te färiu vahi ê, eiaha ta te manaò taata e
hinaaro i te märamarama, i te färiuraa ia tätou i te hinaaro o te Atua. Parau mau, eere
i te mea ohie tei roto anaè tätou i te mäuiui e te òto, e te märamarama òre no te mau
tupuraa òhipa, e haapäpü ra tätou i teie mahana, te tiàraa mau o to tätou Fatu, ei
Faaora no teie nei ao, eiaha e àpe faahou, e haapäpü ra, nä roto i te hiò-faahou-raa i
to tätou iho parau e e aha te hinaaro o to tätou Atua, i tae mai ai tätou i roto i te tau ta
te Atua i faanaho mai no tätou. E färii atoà nei tätou no te Atua tätou, na te Atua tätou.
Ia hiòhia i roto i teie parau nä tätou i teie pö, te tauturu maitaì ra ia tätou no teie tau,
ua haere mai te Fatu, oia te Metia no te faatià faahou ia tätou, ia parahi tätou i roto i
to na HAU, mai te mau uì atoà, tei ORA i te Here e te Aroha o to tätou Atua. Ia ora
na.
Tereva òrometua, Paroita Ioritana, Tuhaa Hitu
FARAITE POHERAA
(18 no Eperera 2025)
Taiòraa : 23/32-49
Manaò Tauturu : ìrava 35 « Ua faaora o ia ia vëtahi ê, o te Metia o ia te here a te Atua
ra, a faaora o ia ia na iho ».
Mauiui rahi fäito òre ta te Fatu e faaruru ra i teie taime. Mauiui hoì i mua i te pohe e
fätata mai nei. Mauiui atoà rä i te ìteraa e, aita to na e tauturu faahou, aita hoì e
haamahanahana. Inaha te feiä fätata, e rä roa ia i te ätea ê ; e te feiä hoì i te ätea ra, e
rä ia e hiò noa mai ra, mätaìtaì noa mai ai ia na. O ia anaè teie i roto i to na àti, faaruru
noa ai i te parau faaìno, e te tähitohito a te taata.
Tano tätou e parau e, te hinaaro o te taata teie e tupu nei. Ia hiò tätou ia rätou i te
arataìraa ia Ietu i Teränio, i reira e faatätauro ai, eere änei e tupuraa te reira no te
hinaaro o te taata ? Ia tuha terero rätou i to na àhu, e ia hopoi i te vineta na na, eere
änei i te hinaaro no te taata ? Ia päpaì hoì rätou i teie parau nià aè i tana upoo, te Arii
teie o te Ati Iuta, eere änei, e hinaaro no te taata ? Ta te taata anaè teie e tupu nei ;
rätou teie e heheu mai nei i to rätou ìno.
Mätaìtaì noa ai Ietu i teie mau taata e te òhipa ta rätou e rave ra, aita hoê parau ta na
ei faahaparaa na na ia rätou. Eita atoà ihoä e faufaahia te parau, no te mea no te taata
terä taime, e te ìte nei Ietu e, ua î te âau o te taata i te ìno. Te aroha nei rä o ia i teie
mau taata, i roto i te òhipa ta rätou e rave ra, no te mea aita rätou e taa ra, te faatupu
ra rätou i te ìno. Te marü, te haèhaa, te faaòromaì o te Fatu i te huru o te taata, te huru
o to rätou ìno, ua tià ia na i te ani i to na Metua, ia faaòre mai i ta rätou hara, aore hoì
rätou i ìte i ta rätou e rave ra.
E mai ta tätou e ìte ra, noa atu e, tei nià Ietu i te tätauro, aita ihoä rätou e faaea i te
tähitohito ia na. I terä mahana, ua hoê te manaò o te täatoà, ua haapäpü i te pae ta
rätou e tià ; mai te nünaa, te mau arataì faaroo, te mau tävana, te mau faèhau, tae noa
atu i te hoê o nä taata i faatätaurohia, ua hoê ia i taua mahana ra i te tähitohitoraa ia
na.
Te tià mai ra te mau tävana, e ta rätou tähitohitoraa, turuhia e te taata : Ua faaora o ia
ia vëtahi ê, o te Metia o ia te here a te Atua ra, a faaora o ia ia na iho. Te tià atoà mai
ra te mau faèhau i to rätou pae, e ta rätou atoà tähitohitoraa : O te Arii òe o te Ati Iuta
ra, a faaora ia òe iho. Te nä reira atoà mai ra hoì te hoê o nä taata i faatätaurohia : O
te Metia òe ra, a faaora ia tätou. Taa ê noa atu ai ta te tahi parauraa i ta te tahi, hoê ä
rä manaò, hoê ä hinaaro to rätou, ia faaora Ietu ia na iho.
E reo tähitohito ihoä paha teie to te taata, e reo atoà rä e tiaì ra i te tupuraa no te tahi
täpaò. Te tahi noa aè maa täpaò iti, päpü roa ai to rätou manaò i te parau o teie taata,
ta rätou e parau nei te Arii o te Ati Iuta. E no te mea ua ìtehia Ietu i te faaoraraa i te
taata i to rätou mau àti, i teie taime, o na terä i roto i te àti, faaora rä ia na i teie nei.
Te märamarama noa ra tätou, te täpaò ta te taata e tiaì nei, ia pou mai ia Ietu mai nià
mai i te tätauro. E inaha, fätata te hiroà o te Fatu i te moè, aita e òhipa i tupu, aita Ietu
i pou mai i raro i te tätauro, aita hoì to rätou hinaaro i te täpaò i pähonohia.
Ia hiòhia te mau taata i âmui i taua mahana ra, aita hoê taata huru maitaì aè. Te taata
huru maitaì noa, terä ia hoê taata i te pae ia Ietu, i nià i te tätauro. Te taata ia i ìte, ua
tano te faautuàraa i ravehia no na, e no to na hoa ; no te mea, e òhipa ìno ta räua i
rave. Eita rä teie faautuàraa e tano no Ietu, eita e tano e faatätauro ia na, no te mea
aita ta na e hara, aita hoì i rave i te òhipa ìno ; ua âpapa rä te taata i to na parau i roto
i te ânaìraa o te feiä òhipa ìno. Ia haamaitaìhia te Atua no terä hoê taata i faaìte i te
maitaì o te Fatu, e tei fäì i ta na hara.
I roto i teie taime hopeà no to na oraraa, mai te taheraa pape mau ra te tupuraa o te
mau òhipa atoà no te Fatu. I te roaraa o te mau mahana i haerehia mai, ua tupu rii au
noa te mau òhipa atoà ; i teie rä taime, e au ra e, ua piri nä hiti o te ânävai, ua oaoa te
taheraa o te pape, te horo püai nei te mau mea atoà, aita e òhipa e mau faahou.
Tei hea te Atua ? Ua faaruè änei o ia i ta na tamaiti ? Ia hiò tätou i te mau täpaò i tupu
i terä mahana hou to na poheraa ; te täpoìpoìraa te mahana, te haapöiriraa te fenua, te
mahaeraa nä röpü te päruru o te hiero ; ua haapäpü noa mai ia e, aita te Atua i faaruè,
ua âpiti atoà mai rä te Atua i ta na tamaiti, i roto i te àti ta na e amo ra.
Muri aè i te tupuraa o teie mau täpaò, ua pii Ietu i to na Metua, ta na atoà rä teie piiraa
hopeà. Ua faataa Ietu i ta na piiraa hopeà no te Atua, to na Metua. E piiraa püai, e
piiraa no roto roa mai i te ôpü, e piiraa hoì e faaìte ra i te rahi, e te teimaha o te mauiui
ta na e amo ra. Muri aè i ta na piiraa, tuu atu ra i to na Värua, pohe iho ra.
I teie mahana, ta tätou e parau nei e, te faraite poheraa, e aore ra, te mahana poheraa
o te Fatu ; eere roa atu ia i te tahi mahana, e faahanahana ai tätou i te parau o te pohe,
e aore ra te upootiàraa o te pohe ; e mahana rä teie e faahanahana ai tätou i te Fatu,
no te rahi o to na faaroo, tei òre i ôtohe i mua i te ìno, tei òre i mataù i te pohe, tei òre
i nounou i to na ora ; ua färii rä i te amo i te utuà o te hara a te taata, e tae roa atu ra i
nià i te tätauro, i te vähi i faataahia no te feiä òhipa ìno, e te feiä rave hara. Ia ora na.
Firipa Manuura TEOROI Òrometua
FAAITOITITO RAA NO TE HEPETOMA MOÀ
Mahana Mäà 19/04/2025
Taiòraa : Ruta23/50-56
Na roto i teie Epitetore, a farii mai i te here e te aroha o te Etaretia Porotetani, te
mau Orometua, te mau Tiàtono, te mau Haapii Parau Maitai to te Etaretia paatoà ia
outou i tei oroà pata. Ia ora na.
E hoa here ma, te tumu parau i tapaò hia mai no teie farerei raa no tatou maoti te oroâ
huna raa o Ietu. Te mea papu mea ê ta tätou mau hunaraa i ìte, e e ora nei, mea ê to Ietu.
I roto i teie hunaaraa to letu te ìte ra tätou i teie taata o Iotefa no Arimataio tei haere
mai e farerei ia Pirato ia horoà Pirato i te parau faatià no te rave i te tino o letu no te
huna i roto i to na menema. E taata parautià teie e e taata moni atoà.
Aita oia e farii ra i te tei òhipa i rave hia i nià ia letu. No te mea te tiaì atoà ra oia i te
Patireia o te Atua. Ua viri oia i te tino o letu i roto i te tahi ahu e ua tuu i roto i te
menema i paohia e ana i roto i te mato. E menema api aita e taata i tuu hia atura i roto.
Ia hiò hia, o teie mau te huru oraraa o Ietu, te atini ta na i rave no te tono i roto ia
lerutarema aita atoà i parahi hia e te taata. E tano atoà ia tätou ia parau e mea ru noa hia
teie òhipa i te rave raa hia. No te mea te fatata mai te Pata a te Ati luta No teie huna raa
maì, te mau vahine tei pee noa ia Ietu i roto i to na mau tere, ua âpee atoà rätou ia
Iotefa, i roto i teie hunaraa. Ua hiò maitaì i te vahi i huna hia e te huru o te vaiho raa
hia to na tino.
Aita te taata i rahi i to na huna a te tahi noa tau vahine no te Tarirea, tei hea roa te feia
ta na i faaora, tei hea roa te feia ta na i faatiàma e orometua hoì oia tei haapii i te taata
i te parau api oaoa. Tei hea roa ta na mau pipi tei apee ia'na, tei hea roa te feia ta na i
parau e, toù metua vahine, toù mau taeaè toù mau tuahine o tei haapaò i te hinaaro o taa
metua tei hea roa ratou ‘Mea aroha teie arii, teie orometua haapii, teie fatu i roto i to na
ôroà huna raa. Mea papu maitaì teie te huru huna raa ta te Atua i faanaho no ta'na
tamaiti. Te manaò i ô nei te tanu raa o Ietu i mua i te aro o te taata aita te reira e faufaa
o to na ra tono raa i roto i te pohe e tapaò maitaì te reira no te faatupu i te hinaaro o te
Atua.
Ua oti ta Ietu òhipa i nià i te Tatauro ia au i to na reo i te na ô raa e ua oti ta'upe
ihora i ta na upoo tuu atura i to na varua. I ô maira i te pohe e òhipa faahou a tana e
rave, no reira, òre noa atu e rahi te taata i to na huna raa, e mea maitaì e tano ia tätou
ia tapeà mai, maoti ua tono Ietu i roto i te pohe no te aro i te pouiri no te aro i te arii
o teie nei ao i te mea e ua horoà hia ia na te mana o teie nei ao, teie hoì to na reo i
roto i te Torinetia 1 i te pene 15 irava 55 e te pohe e tei hea to oe tara, e hate e, tei hea
to oe re. Na roto i te pohe o Ietu ua hoì faahou mai te mana i roto i to na rima i parau
ai oia e, te mana atoà i te raì e te ao atoà nei ua pupu hia mai tei iaù anaè.
Mataio 28 ìrava 18 E tano ia parau e aita letu i pohe, ua tanu hia ra oia no te mea e
tupu raa no te hinaaro o te Atua. Ua haapapu mai oia i te reira na roto i te vaha o te
Merahi i te naô raa e eaha outou i imi ai tei ora i te vai raa o te pohe. No reira te
pohe, te tanu raa o Ietu e tupu raa te reira no te hanahana o te Atua ia maitaì tätou e
ia oaoa i teie oroà pata. Amene
Varetau a PEAU òrometua
Täpati 8 no Paroro mua (tiunu) 2025
Te mau taiòraa : Ohipa 2/1-11 : Te Värua Moà
Röma 8/8-17 ; Ioane 14/15-26 ; Taramo 104
I mua i te òhipa e tupu ra i roto i teie taiòraa Puta Ohipa 2/2-11 teie te uiraa e tano
e ui : E aha rä hoì teie i ìte ai tätou atoà nei i to tätou iho reo mau i te parauraahia
mai ? (ìrava 8)
E aha rä teie ?
E reo teie no te taata i maere i mua i te hoê òhipa mätau-òre-hia, mai te hoê òhipa
i òre i faaroo-ê-hia na, aore ra i òre i ìte-ê-hia na. I te ôroà o te mahana penetetote,
i terä roa aè nei tau i te tenetere matamua o to tätou nei tau e te haamanaò nei ä
tatou, i teie reo ui maere.
E aha rä teie ?
Ua tià te mau pipi, ua fäì ia Ietu i faatataurohia, i pohe, i tiàfaahou e i faateiteihia
i te rima àtau o te Atua. Ua âmuimui te feiä atoà i faaroo ia Ietu, ua mau te Etärëtia
matamua.
E aha rä teie ?
Ua òre te haamä, ua òre te mataù, ua òre te taiä no te parau i mua i te mau huru
taata atoà. Ua maere te taata, ua feàa, ua tähitohito. Faahinaaro-atoà-hia atu ra te
âau ia òhipa te Värua Moà, i roto i ta ù Etärëtia, ia hitimaùe ta ù vaha i te ui
maereraa e, "E aha rä teie ?" A pähono mai ai o ia ia ù e: "Eiaha e maere, o te
òhipa teie a te Värua Moà, o mätou te ìte!
I mua i te mau òhipa taa ê e tupu ra i mua i to rätou mata, i mua i te mau peu
faahiahia a te Atua e faaroohia ra e rätou i roto i to rätou iho reo mau, te uiraa e
tano e ui teie ia, E aha rä teie ? E aha rä teie òhipa e tupu nei ?
E aha rä teie e faaroohia nei ?
Te mau ôroà teretetiano nä mua roa, o te hoê ia o te mau ôroà haamanaòraa i te
mau òhipa i tupu. I te ôroà fänau, te haamanaò nei tätou i te fänauraa o Ietu i roto
i te vairaa mäa a te puaa i Peterehema; i te Faraite Moà, te haamanaò nei i te
poheraa i nià i te tatauro; i te ôroà Päta, te haamanaò nei to na tià-faahou-raa mai
roto mai i te menema o Iotefa i Arimataio; i te ôroà Revaraa, te haamanaò nei to
na hoìraa i pihaì iho i to na Metua, te haamanaò nei to na horoàraa mai i to na
Värua i nià i te mau âpotetoro i roto i te piha teitei. Taua mau ôroà ra, e mau ôroà
taa ê rii ia, inaha hoì, ua fänauhia i nià i te fenua nei hoê noa taime, ua pohe o ia i
nià i te tatauro hoê noa taime. Ua tià faahou mai o ia mai te pohe mai, hoê noa
taime e ua paìùma hoì o ia i nià i te raì, hoê noa taime. No reira, te feiä atoà e ui
ra i teie nei uiraa; "E aha rä teie ?". Te hiò nei ia rätou i te hoê òhipa taa ê roa te
òre e tupu faahou mai teie e tupu nei i teie mahana.
Mai te peu te vai ra te feiä e haapäpü i to rätou faaroo i teie mahana, eiaha roa atu
rätou e feàa ia òre ia ìte i teie poìpoì i te mataì ùàna i te faaîraa i teie nei fare pure
e aore ia i te mäniania no te raì i te harururaa, e aore ia, i te auahi i te faaearaa i
nià ia rätou e i nià ia tätou. I tupu na taua mau òhipa taa ê ra hoê roa taime, e mai
taua Oroà Penetetote ra, aita ia teie nei mau òhipa taa ê i tupu faahou.
E mea faahiahia roa ihoä ahiri e parau te feiä atoà e haapäpü ra i to rätou
päpetitoraa i teie mahana, i te tahi reo ê atu. Teie rä, e aha te faufaa ia parauhia
teie nei reo i te vähi aita roa te hoê taata i ìte i teie nei reo ?
No reira, mai te peu, te haapaò nei tätou i te mau ôroà penetetote, ei haamanaòraa
ia na tätou i te mau òhipa faahiahia i faatupuhia e te Atua na roto i ta na Tamaiti
ia Ietu Metia, i haere mai na Ietu i rotopü ia tätou, oia o Emanuera; i pohe nä o ia
i nià i te tatauro; i tià faahou mai o ia mai te pohe mai, o ia teie e ora nei e a muri
noa atu; te pärahi nei o ia i te rima àtau o te Metua; te horoà nei o ia i te Värua
Moà, o ia te haamau nei i te Etärëtia.
"E aha te auraa o te mau òhipa taa ê i tupu i te Oroà Penetetote". Na mua roa, ua
âmui hoê te Etärëtia täatoà i te vähi hoê. E taua huru o te Etärëtia ra, aita i ìtefaahou-
hia i muri aè. Ua ani taua Etärëtia ra i to na Fatu i ta na i poroì ia na: te
Värua. I to te Värua pouraa mai, i âpeehia o ia e te hoê mau täpaò maere ra, e
auraa anaè ia to rätou.
Te haruru, te mataì, te auahi te haamanaò ra ia i te parau no te mouà Tinai i reira
to te Atua horoàraa i te Ture. E te Oroà Penetetote e ôroà mau ia no te Ture. I teie
mahana te parau nei te Atua ia tätou : "i roto i to òutou âau vau e päpaì ai i ta ù
Ture no te aroha, eiaha faahou ra i nià i te òfaì i reira hoì to ù päpaìraa i ta ù Ture
i mutaa iho, i roto rä ia òutou. E here òutou ia òutou iho mai ta ù i here ia òutou
na".
E te mau reo êê i parauhia e te mau pipi, te faaìte maitaì ra ia e, ua riro taua mahana
ra ei haamataraa no te hoê tau e faaroo ai te mau nünaa atoà o te ao nei i te mau
òhipa taa ê a te Atua i te parauraahia i roto i to rätou iho reo mau.
I teie mahana, e tià ia parauhia e, te tupu ra taua parau ra, inaha hoì, e tià ia taiò i
te mau òhipa taa ê a te Atua i roto i te mau reo e rave rahi atoà o te ao nei. Terä ta
te Oroà Penetetote e faaìte nei ia tätou. E aha rä teie ? E tae mai to te hitià o te rä
e to te tooà-o-te-rä, e pärahi rätou i te âmuiraa mäa i roto i te pätireia e o
Aperahama, o Itaata e o Iatopa.
No te feiä atoà e haapäpü i to rätou faaroo i teie nei mahana penetetote, ua riro
mau ia teie nei mahana ei mahana rahi, ei mahana òaòa.
Oia mau, te haamanaòraa i teie mau ôroà i faaìtehia atu eere ia i te haamanaò-noaraa
tirä rä atu ai. Ua tono mai Ietu i te Värua Moà i te mau âpotetoro ia noaa atoà
ia òutou te reira i teie mahana. E aha rä teie. Na hea e noaa ai ia ù te Värua Moà.
E na hea vau e ìte ai e ua noaa ia ù te Värua Moà. Te nä ô ra te pähonoraa : O òe
iho te ìte no te mea ua rau te huru o ta Ietu horoàraa i te Värua Moà i te taata.
No reira te feiä atoà e haapäpü i to rätou faaroo a muri nei, e rau atoà te huru o to
òutou ìteraa i te òhipa a te Värua Moà i roto ia òutou tätaì tahi.
I teie mahana e fäì ai te mau tamarii, taeaè, tuahine i to rätou faaroo teretetiano, e
mea faufaa roa ia noaa ia rätou te püai o te Värua no to rätou oraraa mero no te
Etärëtia. "A ani e e horoàhia mai te Värua ia òutou".
E riro te parau no te täviniraa no òe, no òutou, ei mea òaòa. Rau noa atu ai te huru
o to te Värua horoà-raa-hia i te taata, te ora nei tätou i to tätou faaroo na roto i te
manaò hau, te òaòa e te tiàturi i to tätou Fatu. O te taata tätaì tahi iho ra te ìte i te
reira no na iho, no te mea, o te hoê òhipa te reira e tupu ia na e to na Fatu, mai te
hoê òhipa moè i rotopü i te tahi e te tahi.
E reo to tätou, e reo mau to tätou te nünaa Mäòhi. A teòteò i to òe reo. A parau i
to òe reo. E fauraò te reira no te ìte e te paari ta te Atua i horoà mai no òe e te
nünaa mäòhi. A parau, e parau e faaroo atoà mai te Atua i to taua reo.
IA ORA NA.
Tehuiarii a PIFAO òrometua
Aucun commentaire:
Enregistrer un commentaire