No te pureraa o te hoêraa. Hoê ā tino, hoê hoì Vārua, mai ia òutou hoì i parauhia i te tiaìraa hoê o to òutou parauraa ra (Efētia 4/4).

 

Te papa haamori

No te pureraa o te hoêraa.

 

Tumu parau: « Te èà o te faataa-ê-raa

e te faatiàmāraa… »

 

Taiòraa papa : Hoê ā tino, hoê hoì Vārua, mai ia òutou hoì i parauhia i te tiaìraa hoê o to òutou parauraa ra (Efētia 4/4).

 

Te faaineineraa :

 

         E te mau tamarii a te Tumu Nui e, e te mau tamarii a Māòhi Nui e, e tere haamori to tātou i te marae nei, e òre te Tumu Nui e o Māòhi Nui e vare. Ia tura e ia faaturahia teie taime no te mea, Te Vai nei te Tumu Nui, e Te Vai nei o Māòhi Nui, to tātou nā Metua here. Nā Metua here teie no teie tau, no teie mahana, no teie fenua, e ua ineine hope roa rāua i te faatupu i te faataa-ê-raa e te faatiàmāraa o te nūnaa Māòhi. Te anihia nei tātou ia haapae i to tātou mau manaò rii rau no te mea, mai ta te Tumu Nui iho e haapāpū mai nei, eere to tātou ra manaò i to na ra manaò ; eere hoì to tātou ra mau haereà i to na ra mau haereà. Mai te raì nei hoì, e teitei rahi to na i to te fenua ; òia atoà te mau haereà o te Tumu Nui, e teitei ia i to tātou ra mau haereà, e to na ra mau manaò, e teitei ia i to tātou ra mau manaò. Ei hau, ei hau i to tātou âau, i to tātou manaò, e i to tātou vārua e hope roa. Ei hau, e faahau, e faafāite.

 

Te taùraa :

 

         E to mātou Metua tāne i te raì tuatinitini e, ia moà to òe ra iòa. Ia tae mai to òe ra Hau, ia haapaòhia to òe hinaaro i te fenua nei mai tei te raì atoà na. Hō mai i te māa e au ia mātou i teie nei mahana. A faaòre mai i ta mātou tārahu, mai ia mātou e faaòre nei i ta tei àitārahu mai ia mātou nei. Eiaha e arataì ia mātou i roto i te tāmataraa ; e faaora rā ia mātou i te ìno. No òe hoì te Hau, e te Mana, e te Hanahana, e a tau a hiti noa atu. Amene.

 

         Pehe :

 

Te faataa-ê-raa :

 

E fāìraa na te pāpaì pehepehe e nā ô ra e: Eiaha e mataù i te faataa-ê-raa. No te mea i faaruè i te tumu, i tupu mai ai te haari âpī. No te mea i faaruè i te rima metua, i pāpū ai te tuuraa âvae o te tama. No te tamahine i faaruè i te fare metua, i haapeu ai òe i te parauraa e, e vahine ta òe. No te tamaiti i faaātea i nā metua, i tānehia ai ta òe e terā pōtii. No te taa-ê-raa i te pūfenua, i pū mai ai te tama.

 

         E te Tumu Nui e, te tumu o te faataa-ê-raa, òia te tumu o to mātou ora, e te ora o teie nei ao. Te faataa-ê-raa, ta òe ia ôpuaraa faaora i te nūnaa Māòhi, e i te mau nūnaa atoà o te ao nei. Mai ia òe i faataa ê i te ano i te matahurahura o teie nei ao, i ìtehia ai te tupuraa hanahana o te ora, e mai ia òe i faataa ê i te pōuri, i ìtehia ai te tupuraa hanahana o te māramarama ; a haere atoà mai na òe e faataa ê i te anoano rahi i roto i to mātou nei oraraa, ia hiti faahouhia to mātou fenua iti i te māramarama ora o ta òe parau faataa ê. Te faahaèhaa atu nei mātou i mua i to òe Moà e to òe Tura, o mātou i tiàturi e i faatiàturihia, e pohe mātou ia fārii i ta òe ôpuaraa faaora nā roto i te faataa-ê-raa hinaarohia e òe na. A faaòre mai i ta mātou hapa, e a faaòre mai i ta mātou tārahu. Mai ia òe i faatupu i te faataa-ê-raa o te nūnaa Iteraèra mai roto mai i te ano o te faatereraa faatītī a te Hau Aifiti ; a haere atoà mai na òe e faatupu i te faataa-ê-raa o te nūnaa Māòhi, mai roto mai i te ano o te faatereraa faatītī o te māmū e te haamāmū. A tahitià mai i ta mātou ùpu, a fārii aroha mai i ta mātou pure. No òe hoì te Hau e te Tumu Nui i Māòhi Nui nei, mai teie nei e a tau a hiti noa atu.

 

         Pehe :

 

Te faatiàmāraa :

 

         E fāìraa na te pāpaì pehepehe e nā ô ra e : Tiàmā, tiàmā, tiàmāraa. E reo monamona i te vaha o te tahi, e reo maramara i te vaha o te tahi ; te ùputa o te ora i te hiòraa a te tahi, te ùputa o te pohe i te manaò o te tahi. Te Atua, te Fatu o te raì e te fenua, eere òe. Te tiàmāraa, te faufaa moà ia a te Māòhi, E horoà na te Atua, e faatau aroha na te fenua. Eiaha e àro i te fenua, eiaha e àa i te Atua. Tei here i te fenua ra, ua here ia i to na tiàmāraa.

 

         E te Tumu Nui e, te tumu o te tiàmāraa e te faatiàmāraa, òia te tumu o to mātou ora, e te ora o teie nei ao. Te faatiàmāraa, ta òe ia ôpuaraa faaora i te nūnaa Māòhi, e i te mau nūnaa atoà o te ao nei. Mai ia òe i faatiàmā i te ano i te matahurahura o teie nei ao, i ìtehia ai te tupuraa hanahana o te ora, e mai ia òe i faatiàmā i te pōuri i ìtehia ai te tupuraa hanahana o te māramarama ; a haere atoà mai na òe e faatiàmā i te anoano rahi i roto i to mātou nei oraraa, ia hiti faahouhia to mātou fenua iti i te māramarama ora o ta òe parau faatiàmā. Te faahaèhaa atu nei mātou i mua i to òe Moà e to òe Tura, o mātou i tiàturi e i faatiàturihia, e pohe mātou ia fārii i ta òe ôpuaraa faaora nā roto i te faatiàmāraa hinaarohia e òe na. A faaòre mai i ta mātou hapa, e a faaòre mai i ta mātou tārahu. Mai ia òe i faatupu i te faatiàmāraa o te nūnaa Iteraèra mai roto mai i te ano e te faatereraa faatītī a te Hau Aifiti, a haere atoà mai na òe e faatupu i te faatiàmāraa o te nūnaa Māòhi mai roto mai i te ano o te faatereraa faatītī o te māmū e te haamāmū. A tahitià mai i ta mātou ùpu, a fārii aroha mai i ta mātou pure. No òe hoì te Hau e te Tumu Nui i Māòhi Nui nei, mai teie nei e a tau a hiti noa atu.

 

         Pehe :

 

Te mau haereà o te Tumu Nui :

 

         E fāìraa na te Tumu Nui e nā ô ra e : Eere hoì to ù ra manaò i to òutou ra manaò ; eere hoì to òutou ra haereà i to ù ra haereà, te nā reira mai ra te Tumu Nui. Mai te raì nei hoì, e teitei rahi to na i to te fenua ; òia atoà to ù ra haereà, e teitei ia i to òutou haereà, e to ù ra mau manaò i to òutou ra mau manaò. Te mau haereà o te Tumu Nui, o te aroha ia e te parau mau, i te feiā o ta na i faaau i te parau, e o ta na i faaìte mai. O te aroha e te parau mau, ua fārerei ia rāua ; o te parau tià e te hau, ua hohoì rāua. E tupu mai te parau mau no roto i te fenua, e hiò mai hoì te parau tià mai te raì mai.

 

         E te Tumu Nui e, te tumu o te èà o te faataa-ê-raa e te faatiàmāraa o te nūnaa Māòhi, e te mau nūnaa atoà o te ao nei. Mai ia òe i faaìte mai i te èà o te faataa-ê-raa e te faatiàmāraa i te matahurahura o teie nei ao, tei riro ta òe Rahu ei tupuraa hanahana ; a haere mai na òe e arataì faahou ia mātou nā nià i te èà o te faataa-ê-raa e te faatiàmāraa hinaarohia e òe na, te mea anaè ia e hoì faahou mai ai te hau, te maitaì, e te òaòa i nià i to mātou fenua iti, e i roto i to mātou nūnaa iti. Te faahaèhaa atu nei mātou i mua i to òe Tura e to òe Moà, o mātou i tiàturi e i faatiàturihia i te reo mona o te tāvaimanino, e pohe mātou ia haere nā nià i te èà o te faataa-ê-raa e te faatiàmāraa hinaarohia e òe na. O mātou atoà rā i òre i tiàturi i to òe reo Metua e nā ô ra e : To ù ra mau haereà, o te aroha ia e te parau mau. A faaòre mai i ta mātou hapa, e a faaòre mai i ta mātou tārahu. Mai ia òe i māìti i nā maehaa Iteraèra no te arataì i te nūnaa Iteraèra nā nià i te èà o te faataa-ê-raa e te faatiàmāraa hinaarohia e òe na, a tono atoà mai na òe i nā maehaa Māòhi no te arataì i te nūnaa Māòhi nā nià i te èà o te faataa-ê-raa e te faatiàmāraa hinaarohia e òe na, ia tupu ta òe ôpuaraa faaora i te nūnaa Māòhi i teie mahana. No òe hoì te Hau e te Tumu Nui i Māòhi Nui nei, mai teie nei e a tau a hiti noa atu.

 

         Pehe :

 

Te taiòraa papa :

 

Pehe :

 

Te faaitoitoraa :

 

Te pure :

 

         Pehe :

 

Te ôroà a te Fatu :

 

         Pehe :

 

Te parau faaara :

 

         Pehe :

 

Te poroì :

 

E te Tumu Nui e, e mauruuru rahi to mātou ia òe, òe i faaìte faahou mai ia mātou i ta òe ôpuaraa faaora i te nūnaa Māòhi. Mai to Vārua i faaârepurepu i te Vai i te matahurahura o teie nei ao, i matara ai te ùputa o te māramarama e te ora ; ia faaârepurepu atoà to òe Vārua i to mātou âau, i to mātou manaò, i to mātou vārua e hope roa, ia uruhia mātou i te vārua o te èà o te faataa-ê-raa e te faatiàmāraa hinaarohia e òe na. 

 

E te mau tamarii a te Tumu Nui, e te mau tamarii a Māòhi Nui, teie te poroì ia tātou i teie mahana : Ia Atua te Atua, ia Fenua te Fenua, ia Taata te Taata. Ua maitaì roa. Māuruuru. 

 

Te mahana matamua

Tāpati 04/01/26

 

Tumu parau : « Te taata tāpeàhia ra… »

(Efētia 4, 1).

 

Te mau taiòraa

 

-Efētia 4, 1 : E i teie nei, te aò atu nei au, te taata i tāpeàhia i te fatu nei, ia òutou, ia au to òutou haereà i te parauraa i parauhia mai ai òutou na.

 

-Māreto 3, 13-15 : E i muri aè ra, haere atu ra o ia i nià i te hoê mouà, e ua parau atu ra i ta na i hinaaro ra, ua haere mai ra rātou ia na ra. Ua faataa atu ra o ia i te tino àhuru mā piti, ei pihaì iho rātou ia na, e ia tono hoì o ia ia rātou e poro haere i te pātireia, ua haamana atu ra ia rātou ia faaora i te mau maì e ia tiàvaru i te mau temoni.

 

Faatoaraa :

 

I teie hepetoma pure no te hoêraa o te mau nūnaa atoà o te ao nei, e mai ta tātou i ora mai i te hepetoma pure tau o te matahiti âpī êtārētia ra, (hopeà o âtete e te ômuaraa o te âvaè tetepa ra), e arataì ā teie èà o nā maehaa nei, oia te faataa-ê-raa e te faaatiàmāraa ia tātou i te roaraa o teie hepetoma haamoriraa o te hoêraa. E i te tanoraa mau, e toro noa ā teie èà to te Atua i te roaraa o teie matahiti, e i te mau puè mahana atoà o to tātou nei oraraa. Mai te ìte maitaì atoà e, te vaiiho tiàmā noa ra te Atua i te taata i roto i ta na faaotiraa hope, te tuu e te òre e tuu i te âvaè i nià i te èà o teie nā maehaa.

 

Ia rave mai tātou i te êfētia, e parau ìtehia e tātou e, te taata i tāpeàhia i te fare àuri, e taata te reira aita to na e tiàmāraa no te rave, e no te ora faahou i te mau mea mātauhia e ana hou te faautuàraa a topa mai ai i nià ia na, ua mau to na mau haereà, mau ta na mau ôpuaraa atoà. E inaha, ia au i teie Efētia, aita roa e mea e faaapiapi ra i te taata o te fatu tei tāpeàhia i roto i te tahi faanahoraa e te tahi vāhi tāòtiàhia e te ture taata nei, i te pūòiraa i te ture o te èà o te faataa-ê-raa e te faatiàmāraa ia au i te hinaaro o te Atua. Riro noa ai e taata teie tei tāpeàhia, e au ra e ùputa matara noa atoà o ia iho no te faatupuraa i te ôpuaraa faaora a te Atua, eiaha no te taata tāpeàhia e te feiā atoà tei tāpeàhia i te fare tāpeàraa, no te feiā rā i rāpae aè i te fare àuri, mai te mea atu ra ia, te reira te feiā mau roa aè i te àuri o te faatītīraa, ia au i te ture o te oraraa o ta tātou e ora nei.

 

No tātou nei tei òre i tae i te reira vāhi, oia hoì i roto i te fare tāpeàraa, e ia au i te oraraa ta tātou i faanaho ei oraraa no tātou i teie mahana tei papahia i nià i te hoo, e au mau atu ra tātou i te feiā tei mau, e tei tāpeàhia e ta tātou iho mau faanahoraa. E reo pinepine tē faaroohia i teie mahana e, ua fifi to mātou oraraa, aita e toata faahou, teimaha roa te mau tute, ûàna roa te maì, nā reira te mau àroraa e tupu noa nei e aita e mahana tuua, e te vai noa atu ra. A fea rā tātou e ìte ai e, nā tātou iho i faanaho e nā tātou iho i faaoti ia riro tātou ei vaa uta hara, oia hoì ei mau taata uta hopoià. A fea ia tātou e àraàra ai i te mata ia ìte, te vai noa ra ta te Atua faataa-ê-raa e ta na faatiàmāraa, ia ìte te taata i te auraa mau o te òaòa, te maitaì e te hau hinaarohia e te Atua ei oraraa no te taata. Nā tātou i rave i te faaotiraa ia riro tātou ei mau taata tei mau, tei tāpeàhia e tei tuuhia i raro aè i te tuto o te faatītīraa, nā tātou atoà ia e rave i te faaotiraa e haere nā nià i te èà o te faataa-ê-raa e te faatiàmāraa, aore ra faaea noa i roto i te autā.

 

 

I te vāhi i manaòhia ai e ua mau te taata e ua mau atoà te òhipa no reira te âpotetoro i tītauhia ai ei rima tauturu i te Atua, te haamanaò mai ra te âpotetoro e, tei nià ê na òutou i te èà, e aore ra, ua tuu-ê-hia atu na te parau a te Atua i roto i to òutou âau, ta na e faaau ra i te haereà, oia hoì te èà, terā ia maa parau ta na e nā ô ra e : ia au to òutou haereà i te parauraa i parauhia mai ai òutou na…, e au ra hoì, ua haere ê mai na tātou nā nià i te èà o teie nā maehaa, e au atoà ra rā, nā tātou iho i faaoti e faaātea mai ia tātou i taua èà nei.

 

Te haereà, te vāhi ia i reira te taata e tuu ai i to na âvaè e tae atu ai i te vāhi ta na e tītau ra. I roto i ta teie taata tāpeàhia, te haamanaò noa mai ra o ia e : ua ìte òutou i te âano, e te maoro, e te hōhonu, e te teitei ; ia ìte i te aroha o te Metia…(êfētia 3,18-19), te piti ia o to tātou taiòraa papa. Ua ìte tātou, aita atu e haapiiraa tumu ta te tamaiti i haapii ia tātou ia ìte, te èà ia o te here e te aroha o te Atua ia tātou. Te reira atoà rā te èà ta te tamaiti e faaau ra i te ture no te here o te taata i te taata e i to na Atua. Te auraa, tāamu faahou ia tātou e i to tātou nūnaa. Tāamu faahou ia tātou e i to tātou Atua, hoi faahou i te tumu o to tātou ora, e teie hoì hoìraa i te Atua ra, eere noa te vārua anaè, te âau, te manaò, te vārua e hope roa. Te rāveà noa iho ia e ìte ai tātou i to tātou i roto i te rauraa o to tātou mau maì. E te maì hoì, e aha noa atu ā to na tupuraa, te mea mau atoà te reira e tāpeà nei i te taata, tāpeà nei i te ôpuaraa a te taata, faatopa nei i te taata i roto i te paruparu e te mātaetae o te manaò.

 

Aita te tamaiti a te taata nei i tāòtià i ta na tonoraa i te taata, ua tono ihoā paha o ia i nā pipi, e feiā tono-atoà-hia rā tātou no te tatara i to tātou nūnaa i rāpae i te mea e tāpeà ra ia na i roto i te teimaha o te hopoià. Haamanaò noa tātou e, te tumu hoê roa o te eà no te faataa-ê-raa e te faatiàmaraa, o te Atua iho ia, teie Atua tei tuu hope roa i to na tiàturiraa i nià ia tātou, ma to na tāatoàraa, ma to na vārua, ma to na âau e ma to na manaò e hope roa. Te toro noa ra te èà o nā maehaa nei i mua ia tātou, te taata i to na manaò e ta na faaotiraa. 

 

Pure : Haamaitaì mātou ia òe, e te Atua Nui Tumu Tahi e, te Tumu i Māòhi ai mātou, te Tumu o to mātou parau e te Tumu atoà o te èà o te faataa-ê-raa e te faatiàmāraa, te mea ia i òhu noa ai te ora âpī, te ora tūatau, ei ora no te taata tātaì tahi e no te mau nūnaa atoà. Tatarahapa nei rā mātou i mua i to òe moà, o mātou i manaò e, ta mātou i faaoti ua au atoà ia i to òe manaò, ta mātou e rave nei, ua au atoà ia i to òe hinaaro, e te èà ta mātou e taahi, ua au atoà ia i to òe ra haereà e inaha, e ārea rahi te mea e faataa ê ra i to mātou manaò i to òe ra manaò, e to mātou haereà i to òe ra haereà. Faaòre mai i ta mātou mau hapa. Ani atoà rā mātou ia òe, faahoì mai na i te haèhaa, te marū e te faaòromaì, ia ìte mātou i te auraa e te vārua o te faatura ia òe, e i to mātou metua vahine faatupu ora. Amene.  

Te piti o te mahana

Mōnire 05 no Tenuare 2026

 

« Te faaòromaìraa te tahi i te tahi

mā te aroha » (Èfetia 4, 2)

 

Parau papa 1 : Taramo 25, 6-10 : « ìr 10 Te mau haereà o Iehova ra, o te aroha ia e te parau-mau ».

 

Parau papa 2 : Èv Ruta 10, 25-37 : « ìr 37 Ua parau atu ra Ietu ia na : E haere òe, e nā reira atoà. »

 

Te faaitoitoraa : 

 

Te tumu parau e arataì ia tātou i teie ahiahi ei tauturu ā ia tātou i roto i teie hepetoma pureraa nā tātou, teie ia : E faaòromaì te tahi i te tahi mā te aroha. Ia au teie reo no Pauro e na ô ra e : … Mā te âau haèhaa, e te marū, mā te haamahuraa roa, i te faaòromaìraa te tahi i te tahi mā te aroha (Èfetia 4, 2). 

 

I to Pauro tūrâmâraa i te ètārētia no Èfetia i te hinaaro o te Atua, ua faaitoito o ia ia rātou, ia ora i to rātou faaroo i roto i te nūnaa. Ia faaòromaì te tahi i te tahi, mā te aroha, te marū, te haamahuraa roa e mā te haèhaa o te âau. E tītauraa tā na i te mau taata tātaìtahi ia hiò faahou i te huru o tō rātou tūàtiraa te tahi e te tahi e te faaòhiparaa i te mau faauêraa a te Fatu, e maitaì roa ai tō rātou oraraa âmui.

 

Te tiàoro atoà ra teie parau ia tātou i teie tau, ia ora hope atoà i tō tātou faaroo i roto i teie nūnaa i Māòhi Nui nei. E tano ai terā parauraa e : E faaòromaìraa roa tō te aroha. E ìmi i te maitaì no te tahi, e òre rā e manaò ìno ia vetahi ê. E òaòa i te parau mau, e òre rā e òaòa i te parau tià òre. E faaòre  i te mau ìno atoà, e tiàturi i te mau mea atoà e e haamahu i te mau mea atoà.

 

Te riro atoà nei te reo o te pāpaì Taramo e tauturu i te taata i te ìteraa i te mau tāpaò no te oraraa âmui o te tahi nūnaa. Ìnaha, te na ô ra te reo e : Te mau haereà o te Tumu Nui, o te aroha ia e te parau mau, i te feiā i haapaò i tā na parau i faaau, e tā na i faaìte mai. (Taramo 25,10). Aita te Atua i huna noa aè i tō na hinaaro i te taata, ua haapāpū roa mai o ia i te tāpaò : te aroha e te parau mau. I te mau vāhi atoà e i te mau tau atoà e ìtehia ai te tupuraa o te aroha e te parau mau i te fenua nei, te faaìte mai ra te reira i te èà e tae ai te taata i te ora. Mai te peu, te hinaaro nei tātou e ora i te hoêraa, e faaitoito anaè ia i te tanu e te faatupu i te aroha e te parau mau i nià i tō tātou fenua ia Māòhi Nui. E tano ai terā fāìraa e : O te aroha e te parau mau, ua fārerei rāua, o te parau tià e te hau, ua hōhoì rāua.

 

Ia tūtonu anaè tātou i nià i teie faaìteraa a Ruta, te hōroà nei te Fatu i teie haapii ture i te rāveà e noaa ai ia na te ora mure òre. Ìnaha, te pāhono nei Ietu : E hinaaro òe i tō Atua, mā tō âau atoà e mā tō vārua atoà, e mā tō pūai atoà, e mā tō manaò atoà ia hope ; e aroha hoì òe i tō tauaro mai te aroha ia òe iho na. Te haapāpū nei Ietu i teie taata i te tāviri e matara ai te ùputa o te ora, oia hoì, i te aroha anaè. E te tītauraa a te Fatu i te pāe hōpeà : E haere òe, e nā reira atoà (Ruta Èv 10, 37 v.h.). Ia maraa ia na i te faatupu i te aroha i te tahi, mai tā na e aroha nei ia na iho. Te riro nei o ia ei hiòraa e ei fāito maitaì roa no te tupuraa o te aroha.

 

Te haapii mai ra teie parau ia tātou, ia faatupu i te aroha i te tahi mai tā tātou e aroha nei ia tātou iho. E tano ai terā pehepehe e :

 

E mata no te here te mata o te aroha

E reo tāmahanahana te reo o te aroha

E rima ìmi ora te rima o te aroha

No te taata nei hoì i hōhoà ai te aroha.

 

E tano tātou e hiò i te manaò faufaa o tā tātou e tāpeà mai ei tautururaa ia tātou i te ora i tā tātou parau i teie tau. No te faatupu i te hoêraa o te huifaaroo e te oraraa i te faataa-ê-raa e te faatiàmāraa, te faatoro noa nei te Atua i te taata i te èà e tae ai i nià i te tāpaò. E tano hoì e haapāpū e, aita te ora i te ātea ê ia tātou. Ua tuu mai te Atua i te reira i pihaì iho ia tātou, e tei roto roa i tō tātou âau, tō tātou ôpū.

 

E haamanaò tāmau tātou e, i te mau taime atoà e i te mau vāhi atoà e faatupu ai tātou i te aroha e te parau mau i te fenua nei, te maitaì noa ra ia tō tātou faaroo. E faaitoito hoì tātou i te aroha i te tauaro, mai tā tātou e aroha nei ia tātou iho. E mata atoà rā tātou i te faaòromaì te tahi i te tahi mā te aroha, ua maitaì roa. Māuruuru.

 

Pure : 

 

Haamaitaì mātou ia òe e te Atua Metua, o òe i faatoro i te èà no te faataa-ê-raa e te faatàmāraa e tei pii ia mātou ia ora i te hoêraa i nià i te fenua nei. Ua faaau òe ia mātou i te tāpaò e tae ai mātou i te ora o tā òe i fafau nō mātou. Māuruuru ia òe tei tuu mai i te reira tāpaò i roto i tō mātou âau, tō mātou ôpū. A tauturu ia mātou i te ora hope i te aroha te tahi i te tahi mai tā mātou e aroha nei ia mātou iho. A haapii ia mātou i te hiò faahou i tō mātou tūàtiraa te tahi i te tahi e maitaì roa ai tō mātou oraraa âmui e tō mātou faaroo.

Ia riro noa te māramarama o tā òe e tūrâmâ noa ra i nià i tō mātou mau èà, e arataì ia mātou i te faatupuraa i te hoêraa i rotopū ia mātou e te mau nūnaa atoà o te ao nei.

E te Atua Metua e, a faarahi i roto ia mātou te faaòromaì e te marū, e a hōroà ā ia mātou i te haèhaa o te âau. Âmene. 

Te toru o te māhana

Mahana piti 06 no Tenuare 2026

 

Ta tātou tumu parau :

« Te faahau raa e te hau »

 

Te mau parau papa :

 

Ioane 14/27-31 :  Te faahau raa e te Hau

Itaia 11/6-9 :   Te vārua tamarii e te Hau    Taramo 86/8-13 : Te Atua te Hau

Mānaò tauturu :

         E tau ihoa paha teie no te māramarama, e tau ātoà rā, e titau hia ai, te hoê raa, èi papa no te hoê ora raa Hau.

         Eaha rā ia mānaò, òia ia, e inaha, māramarama noa atu ai te ārataì raa, toe noa, te faahoì raa, i te vāhi no reira mai te mau Aere ātoà, i te haa mata raa, òia hoì, i roto i te paari o  te parau tià e te parau mau, te auraa, e hoì i te ATUA ra.

         Te faahau raa e te Hau, o na parau e piti, e tuu hia mai nei, èi ārataì i teie tūtahi raa no tātou, tūtahi ia tupu i tā te Atua, e ta te Atua anaè, te auraa, e tamā i tō rae ia mā, ia tomo mā i roto i te māramarama raa o te parau, i roto  i te tauturu a te Atua, e nā na, e nā na anaè e faa tomo ia tātou i roto i te HAU raa o te parau.

         Faahau, ia hau vau e o vau iho na muā roa, i mua i te Atua, faahau atu ai ia tāua, ia tātou, e àti tià na poro e toru o Moana nui o Hiva, Ātea atu ai.

         Te faahau raa e te Hau, ua faa ìte hia te reira e te tamaiti, ua haapii hia e ana, e no te TUTAHI raa, aita atu e taura nati  i te faatupu raa i te reira, te faahau raa.

         E tumu faufaa mau te Faahau raa ia tupu te Hau, inaha, te riro nei te Hau èi hotu no te here Atua, e ārataì te Hau i te ìte raa i te Tiàraa Mētua o te Atua, te au raa, i te ora. 

E tau māramarama teie, te faahau raa, parau taa noa, tei mua noa i te ihu i te vairaa, aita e faufaa e tūrama faahou, no te mea, ua taa tōna parau.

         Òia nei, ua taa tōna parau, te tahi noa maa ui ra iti, àhani na, èita ihoa ia e nōaa i teie māramarama, i te faatupu i te tūtahi raa, èaha e fifi noa ai, e àore ia, èaha e ûàna noa  ai te fifi, te àti, e Tuatau roa atu ai, te maì o te Paura Atomi, te àvaàva tāèro, te Ice, te fifi utuāfare, te fifi o te ora raa, e tae roa atu i te fifi, i roto i te Etaretia iho.

         Ia hiò hia, aita e vāhi aita e fifi, e inaha, e haafaufaa hoì te hau i te nati raa terā e terā Etaretia, noa atu i te taaê raa o te hiò raa, o te Atua ihoa te tumu e te faa-hōpeà, e tauturu te Hau i te ārataì māramarama ra, i te ora raa taatoà, ia òre ia hahī i te èà o te ora.

         Hoa here mā, Tāmata na tātou i te fāriu i nià i te ômuā raa o te TUTAHI raa, te FAAHAU RAA, òia hoì, tō tātou mētua vāhine faatupu ora, aita òia e taui i tāna māramarama raa, aita i âpee i te tupu raa o te tau, aita tōna e haa peàpeà raa hau atu, i te ora o te mau tamarii, èita òia e faa ātea iana i te hinaaro o te mētua, no te mea hoì te vai nei òia, te vai nei ia te Mētua i te raì, o vau hoì te tahi o tā rāua mau tamarii, te tano raa mau, èita vau e ère i te ora i teie māhana, èita vau e ère i te FAAHAU RAA a te Mētua, èita ātoà vau e ère i te HAU Atua.

         Aita ātoà vau e parau ra e, e mea hape te tupu raa o te māramarama i teie tau, te tahi noa mānaònaò raa, e tano ānei, ia faa òhipa hia te reira, no te tupu o te HAU, ia nōaa mai te tahi ārataì raa no te  FAAHAU RAA, èita ānei e tano ia faa òhipa hia, no te faa òre raa i te fifi o te Atomi, te fifi utuāfare, te fifi àvaàva tāèro, te fifi Ice, te fifi tūàti òre i roto i te Etaretia, èita ānei e tano, mānaò tauturu noa.

         Eita rā teie mānaònaò raa e riro èi  haa fifi i te titau raa i te faahau raa, no te mea no roto roa mai te reira i te vāhi tià o te faaroo mau.

         Hoa here mā, iaù mau Maehaa, mānaò noa atu ai tō tātou, teie tōù, te FAAHAU RAA, e ārataì te reira ia tāua i roto i te HAU.

         E raì tōù, e Fēnua tōù, e parau tōù, e HAU tōù, o te HAU ATUA, ia ora na.

Haamaitaì raa :

         Te Mētua e, i teie tau àpī, ta mātou e ineine nei i te tomo, tau no te māramarama, tau no te ôhie, te haèhaa atu nei mātou i mua i tō mana Mētua faatupu ora.

         E te tamaiti e, o òe te Tià o te hau, a faatià faahou mai na, i te papa o te faahau raa, i roto ia mātou, ia nōaa ia mātou i te Hau, teie Hau e mau hia nei e òe.

         I roto i teie tau no te māramarama, te tau no te faa àpī raa, te tau no te hina paarae, te mānaònaò nei e te uiui noa nei, èaha teie èaha rā hoì teie, tei hea te vāhi i hahī ai, i topa ai vau i roto i teie here pata no te fifi rahi.

         I roto i teie ao fifi mau, e te ûàna noa atura, i nià i te fēnua, i roto i te reva, i roto i te Moana e i roto roa i tō mātou òpū, aita e vāhi e aita e fifi, i faa tupu hia e te māramarama taata nei, e òhu aè teie ao.

         Te ani atu nei mātou, a ìte mai ia mātou, a tahi tià mai, a tahi tià mai e a tau a hiti noa atu.

         Ia ora na. 

Te maha o te mahana

Mahana toru 07 no Tenuare 2026

 

« Ia tūtahi te Nūnaa e tià ai »

Taiòraa papa 1 :

Efetia 4/4 : « Ia hoê ā tino, hoê hoì Vārua, mai ia òutou hoì i parauhia i te tiaìraa hoê o to òutou parauraa ra. »

Taiòraa papa 2 :

Pehepehe no te hinapaarae :

E aù nūnaa iti e, no òe teie parau
Tei roto òe i te tau faaâpīhia e te Tumu Nui
A tuu te tohe i raro e, a feruri
Faaineine ia òe, ua maa te êà
Ei haereà âpī to òe i te tau hou nei. 

Hope te tau no te ài ū,

ua tae i te tau àiraa māa
Ua reva te tau àimama, enā atu te tau àitū
Ua hope te tau àihamu, eie te tau māa tumu
Ua tae i te tau e ora hope ai òe i to tiàmāraa
Tē tīaì mai ra te Tumu Nui ia òe. 

Te hinapaarae, no òe anaè ia parau
E faaâpīraa uì teie na te Tumu Nui.
Aita atu ta òe, tomo i roto i ta na.
Mai te manu e mārere na te tāhuhu o te raì
Ia nā reira atoà òe i te ìteraa

i te hau o to fenua iti 

Mai te pape nei e faaruè i te puna pihaa
No tē faararirari e faahaumārū i te fenua
E na te raì e faahoì faahou ia na i te puna ra
Ia nā reira atoà òe i te tahe-rii-māite-raa
E tae noa atu i te muriāvai o te tau hou nei. 

Haamanaò, na te Tumu Nui te hinapaarae.
E tupu mau ā Ta Na, eita e mau ia tāua.
Na te mataì e arataì te toparaa o te rau
E aha ta òe e mataù ra i te faataa-ê-raa
Na te Atua Nui Tumu Tahi e arataì

i to haereà âpī.

Faatoaraa :

E tau no te hinapaarae, e tau faaâpīraa manaò, e tau no te haapāpū faahou i te fāìraa faaroo, e tūtahi ānei no te tahi pupu taata noa e aore ia no te Nūnaa. Te manaò ia o Pauro i to Èfetia, te manaò atoà ia o te mau hoa no te Fenua Aramea, i roto i te mau ârepurepuraa a te mau Faatere Hau e Fenua. Mai ia Pauro i tià no te haamanaò i te papa o te hoêraa e aore ra te tūtahiraa i to Èfetia, oia atoà te mau hoa i to Aramea.

Ta te pehepehe atoà e haamanaò nei, ua tae i te tau, e haere na nià i te èà o te faatiàmāraa, èita ihoā rā te reira e tupu hope roa, ia òre te Nūnaa ia manaò atoà i te maehaa o Faatiàmāraa, oia hoì ia Faataa-ê-raa. Ua hope te tau o te àimama, ua tae te tau no te àitu, ia òre te Nūnaa ia tià no te Ora, ia òre ia haapāpū e, tei ia na te tāviri no te faaòhu i te Ora, e Nūnaa ia i raro i te faatereraa taata.

Eiaha e mataù, te haapāpū nei Pauro, riro atoà atu ai èi fāìraa na te mau hoa no Aramea, na Haehaa, na Marū, na Aroha e tauturu i te Nūnaa i te haereraa na nià i te èà o maehaa mā, e tae atu ai i raro aè i ta te Atua faatereraa.

Ia hiòhia, e au ra, ua ineine teie mau Aito, Pauro e tae noa atu teie mau hoa i te haapāpū e, ua ineine rātou i te tuu i te rima faatītī, e te haapāpū nei i to rātou taahiraa na nià i te èà o maehaa mā. Ia tūtahi te Nūnaa e tià ai. Ia ora na.

Pure :

Te taamino noa nei te manaò o te Nūnaa, i roto i te ôpape a te faatereraa taata. E te Tumu Tahi e, ia roaa i te Nūnaa i te pāari no te tītīà i te mea maitaì no na. Ia tiàmā o ia i te parauraa e, e Atua to na, mataāra i to na parau. Ia toahia o ia i te pātoìraa i te mau reo mona tei faatopa ia na i roto i te fifi. E Faatereraa Ora ta òe i faanaho mai raro mai e tae roa mai, no te Nūnaa Ora. Ia Nūnaa faahouhia to òe. Amene

Te pae o te mahana 

Mahana maha 08/01/26 

Tumu parau : « Hoê fatu, hoê faaroo,

hoê pāpetitoraa » (êfētia 4/5).

Taiòraa papa :

-Efētia 4, 5-6 : Hoê hoì fatu, hoê faaroo, hoê pāpetitoraa, hoê Atua, o te Metua o te taata atoà ra, e tei nià iho hoì i te taata atoà, e tei pihaì iho i te taata atoà, e tei roto hoì ia òutou atoà…

-Mātaio 28,16-20 : Haere atu ra te mau pipi tino àhuru ma hoê ra i Tarirea, i te hoê mouà ta Ietu i parau mai ia rātou ra. E ìte aè ra rātou ia na, ua tāhopu atu ra ; i maere noa na rā te tahi pae ; ua haafātata mai ra Ietu, nā ô mai ra ia rātou : O te mana atoà i te raì e te ao atoà nei, ua pūpūhia mai tei ia ù anaè. E i teie nei, e haere òutou e faariro i te mau fenua atoà ei pipi, a pāpetito atu ai ia rātou i roto i te iòa o te Metua, e no te Tamaiti, e no te Vārua Maitaì ; ma te haapii atu ia rātou i te haapaò i te mau mea atoà ta ù i parau atu ia òutou na. E inaha, tei pihaì atoà iho ia vau ia òutou, e tae noa atu i te hopeà o teie nei ao. Âmene…

Faatoaraa :

E toru teie nā parau e arataì ra ia tātou nā nià i te Vārua o te èà o nā maehaa, Hoê fatu, Hoê faaroo, hoê pāpetitoraa. E te parau e tāamu ra i nā huà ìrava atoà, teie ia parau o te hoê. Na te âpotetoro ihoā paha teie fāìraa, no te âpotetoro ihoā paha te manaò, te vai atoà ra rā to te Atua iho manaò i mua i teie mau parau, e tē riro noa te tamaiti ei rima faatoro, aore ra ei reo tauturu i te taata te māramaramaraa i te manaò o te Atua.

Ia rave mai tātou i teie parau hoê, mai te ìte atoà tātou e, te vai atoà ra te hoêraa, e te vai atoà ra te taa-ê-raa i roto i te hoê e te hoêraa, e tano rā tātou e haapoto i te arataìraa manaò o te hoê, nā ô ia tātou te parauraa e, hoê Atua, ua rau rā te haapaòraa, ua rau te êtārētia, ua rau te taata, ua rau te nūnaa. Te tanoraa mau, eita te rau e haafifi i te hoê, eita hoì te hoê e haafifi i te rau, no te mea no roto mai te rau i teie Atua hoê, e te parau-atoà-hia mai ra i te Māòhi, te hoê ia i roto i te rauraa o te nūnaa o te ao nei : hoê fatu, hoê faaroo, hoê pāpetitoraa.

-Hoê fatu : E fāìraa nā tātou e, o Ietu to tātou fatu, e te fatu hoê roa e aita atu, te tano noa ra ia fāìraa. E i roto hoì te haapotoraa i te auraa o teie parau fatu, aita atu ia, ta na anaè te parau o ta tātou e faaroo e ta tātou e òhipa atu. Oia mau ra ānei hoì ? Mai te reira ānei hoì te manaò ia parau tātou e, e pure tātou i te pure a te fatu i haapii i ta na mau pipi e ia tātou atoà i teie mahana, te faaìte noa ra ānei tātou i to tātou ineine i te faariiraa ia na ei fatu atoà no tātou, te reira atoà ānei to tātou ineine te faaroo i ta na mau haapiiraa e ta na mau aòraa ia tātou ? Eita e tano ia haapae i teie mau uiuiraa. Ia faaroo rā tātou i te fāìraa a te tamaiti, E haamaitaì au ia òe e taù Metua, e te Fatu o te raì e te fenua… (Mātaio 11, 25). Te auraa, i te mau taime atoà e fāì ai tātou ia Ietu ei fatu, e mea maitaì ia haamanaò tāmau tātou e, tei mua tātou i te fatu o te raì e te fenua, tei mua tātou i te Atua i hāmani ia tātou, te Atua hoì no na tātou i Māòhi ai e tei riro taua Māòhiraa ei haamanaò-tāmau-raa ia tātou i te  vārua o te èà o nā maehaa nei, oia te faataa-ê-raa e te faatiàmāraa. No reira, e mea tītauhia ia ia tātou, te faatura i to na hanahana e to na moà, ia òre te parau a teie fatu ia tano atoà mai i nià ia tātou : e haavare òutou (Mātaio 23, 13).

-Hoê faaroo : Ei tautururaa ia tātou, haamanaò na tātou i te reo o Ietu i nià i te vahine âti Tanaana : E teie nei vahine e, e faaroo rahi to òe ; ta òe i hinaaro ra, ia nā reirahia òe. Ora atu ra ta na tamahine i reira ra (Mātaio 15, 28). I roto i te ora o te tamahine a teie vahine âti Tanaana, e tuhaa ihoā paha ta Ietu, tei roto rā te tuhaa rahi i te rima, i te ôpū e te tiàturiraa o teie vahine i te Atua. E nā ô ia tātou e, na te faaroo o teie vahine i ìriti i te mea i vai piri noa ai te ora ta na i hinaaro ra, na Ietu rā i tatara roa i te ùputa o te ora. No te mea hoê anaè vāhi i haerehia e te tiàturiraa o teie vahine, te òhipa ia o ta te Atua i tiaì ia na ia rave. Te auraa, te faaroo no tātou, e haamata ia nā nià i te tuhaa ta te taata tātaì tahi i tiàturi e i faaitoito i te rave no na iho nā mua roa, a riro atu ai ta na i rave ei faaòhie i te tupuraa o te ora o te tahi. Eere ānei hoì te reira te vārua o te èà o nā maehaa nei ? 

-Hoê pāpetitoraa : Ia rave mai tātou i teie Mātaio, te uiraa e matara mai, e aha mau na te auraa o te mea ta te tamaiti e parau ra e, A pāpetito atu ai ia rātou i roto i te iòa o te Metua, e no te tamaiti e no te Vārua maitaì. Ei tautururaa ia tātou, rave mai na tātou i te òhipa i tupu i te mahana Ietu i pāpetitohia ai e Ioane. Te reo mai ra no te raì mai i te nā ôraa mai e : Taù Tamaiti here teie, ua mauruuru roa vau ia na (Mātaio 3, 17). E aha te mea i mauruuru ai te Atua Metua ia Ietu, e i pou roa mai ai te Vārua o te Atua i nià ia na, no to na noa ānei fāriiraa i te pāpetito a Ioane, aore ra no te tahi tumu ê atu. Te mea pāpū, e fāìraa ta Ietu e hinaaro nei i te rave, e te haamanaò noa mai ra Ietu ia tātou e, te tāatoàraa o te ôpuaraa ora a te Atua, no roto i te vai i te ìritiraahia mai, oia hoì no roto i te vai te faataa-ê-raahia e te faatiàmāraahia mai, e tāpaò faaìte nā Ietu i te Atua i to na fārii i te tāatoàraa o te ôpuaraa ora a te Atua. Te auraa, e fāìraa faaroo teie ta Ietu e rave nei, oia to na ìteraa i te Atua ei Fatu no te raì e te fenua, e to na hoì ìteraa i te vai ei puna no te ora, eita ia tātou e maere ia tià mai te Atua e to na Vārua no te faaìte i to rāua mauruuru rahi i te fāìraa ta Ietu i rave. 

Te mea mau atoà ia ta Ietu e parau nei, papetito atu ai ia rātou i roto i te iòa o te Metua, e no te tamaiti e no te Vārua maitaì, oia hoì, e tāumi i te taata i roto i te māramarama o te òhipa o ta te Atua i rave, oia to na ìritiraa mai i te ora mai roto mai i te vai i te matahurahura o te ao nei, e ta te tamaiti hoì i iriti atoà i ta na pūòiraa òhipa na roto atoà i te vai, e tei riro te vārua maitaì ei ìte no te òhipa a te metua e ta te tamaiti.

Aita atu ia mea e tano ia parauhia, a haere, te maa noa ra te èà, a tomo te matara noa ra te ùputa o te ora.

Pure : Haamaitaì mātou ia òe e te Atua Metua no ta òe parau ta òe i tuu i mua ia mātou, tei faaìte ia matou i te rahi o to òe haèhaa, e te nehenehe hoì o to òe here. Nā roto i te Hoê, ua faaìte mai òe i te Rau, e ua faaìte atoà mai òe e, o òe terā e faatoro ra i te èà o nā maehaa nei i mua ia mātou, e ta òe e ani nei ia mātou ia haere tiàmā mātou. Tatarahapa atoà nei rā mātou i mua ia òe, o mātou i faarahi i te faaroo tāpetepete, e ta mātou hoì tārehu-noa-raa i to mātou mata, e to mātou âau, taiòhia te reira ei tārahu nā mātou. Faaòre mai i ta mātou hapa. Te ani atu nei mātou ia òe, ei faaroo Māòhi mau to mātou ia òe. No òe te Hau, te Mana, e te Hanahana. Amene. 

Te ono o te mahana

Mahana pae 09 no Tenuare 2026. 

« HOÊ ATUA O TE METUA »

Taiòraa :

-Efētia 4, 4 - 7

-Mātaio 5, 44 - 48

Faatoaraa :

Te mea faufaa no tātou i teie mahana, te ìmiraa ia i te èà e fārerei faahou ai tātou i te Atua, te oraraa i te hoê oraraa e pārahi mai ai te Atua i pihaì iho ia tātou. Eita rā tātou e fātata i te Atua, eita hoì te Atua e fātata mai ia tātou, mai te peu e, eita tātou e fārii, eita e fāì e, e tamarii tātou na te Atua, e o ia to tātou Metua.

Ia parau tātou e, e tamarii tātou na te Atua, te ìte ra ia tātou, e te fārii ra ia tātou ei Māòhi, mai te fāì atoà rā e, e òhipa na te Atua te reira Māòhiraa to tātou, e huru atoà hoì te reira ta na hinaaro, ei huru no tātou, e te reira iòa ta te Atua i topa no tātou, e te taura tāamu atoà te reira ia tātou i te Atua.

Eiaha atoà rā ia moèhia ia tātou, e na roto i to tātou parauraa ia tātou, e tamarii na te Atua. Te haapapū atoà ra ia tātou e, ua herehia tātou e te fānaò nei tātou i te mau maitaì ta to na here i hōroà noa mai ei maitaì, e ei ora no tātou.

No reira tātou i parau ai i te Atua e, e Metua. Eere hoì no te mahana hoê nei te Atua i Metua ai, ua riro rā to na Metuaraa, ei haapapūraa mai ia tātou e, tei pihaì iho noa o na ia tātou i to tātou mau tuuraa âvae atoà, e o te ora anaè ta na i hinaaro no tātou. Ta Pauro ia e faaìte nei i to Efētia, tei nià iho i te taata atoà, e tei roto ia òutou atoà.

Ua hōroà mai te Atua, i te reo, te peu tumu, te māa e au ia tātou, te fenua nehenehe e te ruperupe, tei riro ei nounouraa na te rātere. Ua hōroà atoà mai te Atua i te moana, ei âua înaì na tātou. Ua hōroà atoà mai te Atua i te faaroo Māòhi mau, tei niuhia i nià i te here e te aroha.

Ta Ietu atoà ia e parau ra i te mau pipi, ia au i ta Mātaio faaìteraa, E aroha atu i to òutou mau Enemi, e faaora atu, e hāmani maitaì, e pure, ia riro òutou ei tamarii na to òutou Metua i te ao ra. Te parau noa mai ra te Atua ia tātou, te haapeàpeà noa mai ra te Atua no tātou.

Aita i moèhia ia tātou, te èà e tae atu ai i te ùtuāfare o te hau e te òaòa. Ia ìte atoà rā tātou i to tātou tiàraa tamarii herehia, e te tiàraa Metua o to tātou Atua. No reira, ia ora fātata noa tātou i te Atua, e hoì faahou tātou i te Atua Metua ra, e hoi na nià i te èà, te fauraò, te fenua, te haapiiraa ta na i hōroà mai ia tāou, mai te faaitoito atoà rā i te tino, i te māa ta na i faaineine, ei māa na tātou, ei faahanahanaraa i te Atua Metua.

Pure tātarahapa :

E te Atua Metua e, to mātou haapūraa, to mātou ora. Te parau noa mai ra òe ia mātou, e te faaìte noa nei òe ia mātou, i to òe tiàraa Metua. No te arataì e te haapiiraa ia mātou i te èà e rave, e tāpae ai i te fare Metua. Te tātarahapa nei rā mātou, o mātou i òre e faaroo, e haapaò i ta òe parau e ta òe mau haapiiraa. A tauturu mai ia mātou ta òe mau tamarii, ia ora tāmau noa mātou i to mātou faaroo Māòhi mau, ia hanahana to òe iòa ia mātou. Te faahaehaa nei mātou i mua ia òe, no te rahi o to òe faaòromaì, i te mau ìno atoà e ravehia ra. E te ani nei mātou ia òe, e faaòre mai ta mātou tārahu. Amene.

Te hitu o te mahana

Mahana māa 10 no Tenuare 2026 

« Ia ora hope i te parau no te hoêraa »

Parau papa :

Ieremia 1/7 : Ua parau mai ra te Atua ia ù, “Eiaha e parau, e tamaiti iti au : o tei tonohia òe e au ra, o ta òe ia e haere ; e o ta ù e faaue ia òe ra, o ta òe ia e parau”.

Mataio 25/ 21 ; 23 : “Ua tià roa, e teie nei tāvini maitaì e te haavare òre, o òe i haapaò maitaì i tenā na taoà iti haìhaì, e faatiàau atu vau ia òe i nià iho o te mea rahi, e haere òe i roto i te ôroà òaòaraa a to Fatu”.

Faatoaraa :

Ua tae i te tau, teie te tau tei au i te Atua, e tei au atoà no tātou ia ora hope i te parau no te hoêraa. Ta tātou teie faaìteraa no teie ahiahi âpī. No reira, e piti parau papa tei tuuhia mai i mua ia tātou.

Te parau papa mātāmua, e reo ia no te Atua i nià i te perofeta Ieremia. E toru haapāpūraa parau ta te Atua ia Ieremia.

Te haapāpūraa mātāmua, teie, “eiaha (òe e Ieremia) e parau, e tamaiti iti au”, oia hoì, te ani noa ra te Atua ia Ieremia ia faaea o na i te manaò e ia hiò naìnaì ia na. Ia faaea o Ieremia i te haa-faufaa-òre e te hiò-faufaa-òre ia na, no te mea i te mata o te Atua e faufaa rahi to Ieremia, e e hinaaro to te Atua ia na. Ia haapotohia te manaò, e tāpura òhipa teie e vai nei, e ta te Atua e tiàturi hope nei ia Ieremia no te rave i te reira òhipa, oia hoì, ua māìti te Atua ia Ieremia ei rave òhipa na na. Te mea noa e toe nei ia Ieremia, maoti rā ia te tiàturiraa ia na iho. No te mea, ua pāpū te manaò e te tūhaa a te Atua, oia hoì te tauaroraa ia Ieremia i nià i te òhipa. E no te mea ua pāpū te manaò e te tūhaa a te Atua, aita ia ta Ieremia e ôtoheraa faahou. I te vāhi ta Ieremia e tià e e òhipa atu, tei reira atoà te Atua no te tauaro ia na. E parauhia te reira mea e tūtahiraa.

Te piti o te haapāpūraa, “o tei tonohia òe ra e au ra”, te auraa, e taata haere teie, e taata fārerei taata teie, oia hoì e taata tei rave i te òhipa ia au i te hinaaro o te fatu òhipa tei tono ia na. Aita atu e mea e tītauhia nei ia Ieremia, oia hoì, e tià no te Atua i mua i te aro o te mau arataì faaroo, te mau arataì nūnaa, e i mua i te aro o te nūnaa. E nā ô ia te manaò e, tīrā rā hinaaro to te Atua ia Ieremia, oia hoì, ia tūtahi o ia i te Atua, ia tià i nià, e ia haere e faaìte i te parau a te Atua i te vāhi ta te Atua i hinaaro.

Te toru o te haapāpūra, teie, “ta ù e faaue ia òe ra, ta òe ia e parau”. Ua pāpū roa i teie nei te tāpura òhipa a Ieremia i teie nei, oia hoì, e faaroo i te faaueraa a te Atua. Te auraa, aita atu e faaueraa ta Ieremia e faaroo, ta te Atua. Te riro nei o Ieremia ei àuvaha parau no te Atua.

Te piti o ta tātou parau papa, tei nā ô e, “Ua tià roa”. E tūhaa parapore teie na Ietu, ta na i faatià i ta na mau pipi no te tauturu i to rātou manaò i mua i te parau no te tāviniraa.

Ia au i teie tūhaa parapore, e reo òaòa e te māuruuru teie no te tahi Fatu òhipa i nià e piti rave òhipa i ta na, tei rave i te òhipa maitaì e te tià i mua i te aro o to rāua Fatu, oia hoì, te faahoturaa i nā tārēni tei tuuhia atu i roto i to rāua rima. No te tahi, e pae tārēni, e no te tahi e piti tārēni. Ua tātaìpiti ta rāua tārēni ia faahoì i roto i te rima o to rāua Fatu.

E toru rā rave òhipa tei tuuhia atu te tārēni i roto i te rima, e piti tei faahotu, âreà te tahi, ua tāhuna ia i ta na tārēni tei òre i hotu. Te auraa, aita o na i rave i te mea tià i mua i te aro o to na Fatu.

E aha te parau e te haapiiraa e tano tātou ia tāpeà mai i teie nei.

E ôpuaraa faaora ta te Atua no te nūnaa māòhi. Te hinaaro nei te Atua i te tiàau maitaì, e rave i te mea tià, oia hoì te faaìteraa e te faahoturaa i te parau no te Here e te Aroha. Te Here e te Aroha, te papa te reira no te hoêraa.

Ua tae i te tau, teie te tau tei au i te Atua, e tei au atoà no tātou ia ora hope i te parau no te hoêraa. Ta tātou teie faaìteraa no teie ahiahi âpī. Mauruuru.

Pure :

Haamaitaì mātou ia òe e to mātou Atua, Òe tei Here e tei Aroha ia mātou. Òe atoà rā tei tiàturi hope ia mātou no te rave i ta Òe òhipa. Ua ìte mātou i to mātou paruparu i te pāhono i to òe ra mau hinaaro, no reira te faahaèhaa nei mātou i mua i te Aroha rahi no Òe, no te ani e ia tauturu mai òe ia mātou. Ia riro atoà mātou mai ia Ieremia, ìnaha, noa atu ta na mau faaôtohetoheraa, ua tià i mua i te aro o te nūnaa no te àuvaha i ta òe parau. E aore ia, ia riro mau mātou mai terā nā tiàau e piti tei rave i te mea tià i mua ia Òe. Ia rave atoà mātou i te mea “TIÀ” i teie nei ā. Parau mau, e parau mau.

Te vaù o te mahana

Tāpati 11 no Tenuare 2026. 

« Te tiaì o te ùputa o te tūtahiraa »

Taiòraa raro 1 :

Èfetia 4/13 : « Ia riro tātou atoà nei èi taata pāari, i te faaroo hoê e te ìte hoê i te Tamaiti a te Atua, ia taeà te fāito ra i te î o te Metia i te rahi. »

Taiòraa papa 2 :

Pehepehe :

Tireo 

O Papa raro te vahine,

O Papa nià te tāne,

I te tooaraì a Tāne

I heua mai ai te mata o te fenua

Nānā noa ai te fenua i te mata o te raì.

O Tireo te pō, a tirē i te moe.

Ua ôvahinea te fenua i te muhumuhuaraì,

Te tatari nei i te rima faatupu ora.

A rave, a pātia, a tanu, a ueue,

Ia òre te fenua ia ôtānea i te rima tārere.

A faaitoito e tenā paè māòhi,

A paì, a huri, a ô i tenā na vahine.

Ta òe e tanu ra, ta na ia e fānau,

Parauhia ai òe, e tāne,

Ia fānau mai ta òe, e māa.

Nānā atu i te mata i te raì,

Toro atu i te tarià i te reo o Tireo :

E reo no te raì, e autā no te fenua,

Tāne a tanu, a tanu, a tanu ā,

Ia ora te huaai.

Faatoaraa :

E faaotiraa teie i ravehia na e te Tamaiti i te parau parauraa i te Tumu Tahi e : « Ia riro rātou atoà èi hoê ; mai ia òe, e ta ù Metua, i roto ia ù nei ra,… » oia hoì, aita te Tamaiti i tiaì i te faaotiraa a te tahi, ua rave o ia i to na tiàmāraa no te Ora o te Nūnaa.

Te tuu nei ā Pauro ia tātou i mua i te tahi parau, te tahi èà tei haamatahia i te tarai, e au ra rā, aita ā te taata i na nià i teie èà.  E no te mea hoì, e reo no Pauro i to Èfetia, e parau ia i to na tanoraa mau, ua oti i te tupu. E aha rā i hoì faahou mai ai, eere ānei no te mea, aita e taata i na nià faahou, vai noa mai ai te èà, èi èà moè.

E èà no te tūtahiraa, tūramahia e te pāari, e i te hōpeà o taua èà ra, te ùputa ia o te tūtahiraa. Aita Pauro e tītau nei i te taata taiò ia tarai o ia ia na mai ia Ietu ra, ia roaa atoà rā ia na i te mata i te hōhoà o te èà o ta na e haere ra. E èà tei tītau i te mau moihaa ta te Tumu Tahi i hōroà i roto ia òe e te taata, tei faaòhipahia na e Ietu e tei haamanaò faahouhia nei e Pauro. Ia hīroàroà faahou te taata, no te aha o ia i hamanihia ai e to na tiàraa i roto i ta te Tumu Tahi faatereraa.

Ta te pehepehe o Tireo e tauturu ra ia tātou, e piti ihoā na taata teie, e tuhaa taa maitaì ta te tahi i te tahi, ia tūtahi rā rāua, eere i te mea tano nei te raveraa a te Tumu ia tāua e te taata nei. E huru ê to te tahi i to te tahi, ia haere hoê rā na nià i te èà o te tūtahiraa, èita te ùputa e hapehia.

Pure :

E mata to te taata, e aha rā i pō ai. Te Tumu Tahi e, ua hape mātou i te tāpōraa i to mātou mata, a ìte mai i to mātou manaò tātarahapa. Ia roaa faahou rā ia mātou te pāari tei haamoèhia e mātou, ia haere faahou to òe Nūnaa, mātou na nià i te èà o te tūtahiraa e tae atu i te ùputa, Amene.