Vaù o te pō : Tāpati 13 no Tetepa 2020 E te nūnaa Māòhi, a ora mā te Hau.

 

Vaù o te pō :

Tāpati 13 no Tetepa 2020

 

Tumu Parau :

E te nūnaa Māòhi, a ora mā te Hau.

 

Pehepehe :

 

E TENĀ TAATA ÂPĪ E, EI HAU 

Uiui noa ai òe i nià i te aratià
O to oraraa e, o vai rā vau nei
Taamino noa ai òe i roto i te àrepu o te tau
Hurihuri noa ai to manava i te rau o te ui maere
E aha teie e àhure nei i to ù hīroà tumu.
E te taureàreà Māòhi e, ei hau.

A rere e tenā na tama Māòhi.

Na te mataì o te Hau Metua

E tū i te raì hāmama noa

E faahaumāru noa ia òe

I te tau hepohepo nei

Roo-iti-noa-hia aè òe e te taèro

Tūmā i to parau, ia mau ta òe parau mau

Na te rima haumārū o to māmā

E roromi ia òe, ia Hau to tere.

 

A haamanaò rii noa rā òe

I te mato Māòhi i paohia mai ai òe

Ia òre to hīroà e to iho tumu ia haruhia

E te hotu pāinu o te ài nūnaa.

Inaha, òe iti noa aè te ôriò mata

E te pū tarià o te Tumu Nui.

 

E te taureàreà Māòhi e,

Moemoe-noa-hia mai ā òe

Ferafera-noa-hia mai ā òe

E te vārua ài mānava, ài tiàturiraa

A haamanaò e, tei to pae noa iho

To uruaìraa, to tūruìraa e òre ai òe e hià

I te ûàna o te àre fati mure o te aau

Ei hau, ei hau, a tau a hiti noa atu.

 

Taiòraa : Mātaio 18, 21 - 35

 

21 Ua haere mai ra Pētero ia na ra, nā ô mai ra : E te Fatu, ia tuatāpapa taù taeaè i tē hāmani ìno mai ia ù, ia hia a ù faaòreraa atu i ta na hara ? Ia hitu ānei ?  22 Ua parau atu ra Ietu ia na : Aore au i parau atu ia òe e ia hitu, ia hitu rā àhuru i te hituraa. 23 E au hoì te pātireia o te ao ra i te hōê arii o tei manaò i tē faaau i te parau i to na ra mau tāvini. 24 E ia tāmata o ia i tē faaau, i arataìhia mai te hōê ia na ra, hōê a ana àhuru te tautani i te tārēni aore i hoona. 25 No te mea rā aita ana ei hoo mai, ua faaue atu ra ta na fatu ia hoohia o ia e ta na vahine e te mau tamarii, e ta na atoà ra taoà, a hoo mai ai. 26 Ua tīpapa iho ra taua tāvini ra i raro, tāhopu mai ra ia na, nā ô mai ra : «E taù fatu, eiaha na òe e rū ia ù, na ù e faahoì atu i te hoo ia òe na e hope roa aè !» 27 Ua aroha mai ra te fatu o taua tāvini ra ia na, faaòre mai ra i taua tārahu ra, tuu noa atu ra ia na. 28 Haere atu ra rā taua tāvini ra i rāpae àu, e ìte atu ra i te hōê taetaeaè tāvini no na, e àmutārahu na na hōê hānere moni veo. Haru atu ra i ta na àrapoà, nā ô atu ra : « E hoo mai òe i taù tārahu ia òe na ! » 29 Ua tīpapa iho ra taua taetaeaè tāvini no na ra i raro i ta na pae âvae, ua tāparu aè ra ia na, nā ô aè ra : Eiaha na òe e rū ia ù, e na ù e faahoì atu i te hoo ia òe na e hope roa aè !» 30 E aita aè ra i tià ia na ; tii atu ra rā ia na, huri atu ra i roto i te tāpeàraa, e ia hoona ia na taua tārahu ra. 31 Ìte aè ra rā te mau taetaeaè tāvini no na ra i te reira, aroha roa atu ra rātou, haere atu ra, faaìte pāpū atu ra i taua mau mea atoà ra i to rātou fatu. 32 Ua faaue atu ra ta na fatu e tii ia na, e ua nā ô atu ra : « E teie nei tāvini ìno e ! Faaòre atoà atu ra vau i taù tārahu ia òe ra, o òe i parau mai ia ù ra ; 33 eiaha òe e aroha atoà atu i to taetaeaè tāvini mai ia ù i aroha atu ia òe na ? » 34 Riri aè ra ta na fatu ia na, tuu atu ra ia na i te feiā tāpeà ra, e ia hoona roa ta na tārahu ra ia na. 35 E nā reira atoà mai taù Metua i te ao ra ia òutou atoà na, ia òre òutou ia faaòre mā te âau atoà i te hapa a to na taeaè.

 

Manaò tātara :

 

I teie mahana, e hope ai teie pureraa matahiti o te nūnaa Māòhi. To na tanoraa mau, i teie atoà mahana e haere ai tātou nā nià i te êà o te hau. Ei tere hau aè to tātou nā nià i te êà o te oraraa nei, ia au i te auraa o ta teie parau tumu e tītau mai ra ia tātou i teie hopetoma. « Ia ora hau noa te nūnaa i nià i to na fenua ». Nā hea rā ia te reira parau e tupu ai ia tātou. Nā hea te nūnaa Māòhi e ìte faahou ai i te oraraa hau i nià i to na fenua, i roto i teie tau tei àhurea te mau mea atoà.

 

Rave rii noa mai na tātou i teie parau ta Mātaio i taiòhia iho nei i mua ia tātou. Ua riro te parau no te faatupuraa i te hau e mānaònaòraa na Petero. Oia tei haere atu e  ani ia Ietu i te tahi tauturu. Eiaha mai te mea, aita o ia i ìte i te rāveà, aore rā i te êà o tē tano o ia e rave. To na noa fifi, tei nià i te fāito, oia te nūmera, tupu atu ai te faaòreraa i te hapa, ora atu ai o ia e to na tauaro i roto i te hau. Âreà Ietu, ua ìte ia o ia e ua fārii i te rāveà o tē ravehia ra e Pētero. Ta na noa i faanavaì atu o te fāito ia o ta na e hapāpū ra e, aita e fāito to te faaòreraa hapa a te tauaro ia tātou nei.

 

E tano tātou e parau e, te faahauraa, aore ia te faafāiteraa, eere ia i te tahi òhipa oti noa i te tahi noa taime, tīârā atu ai. Te auraa, ia parau anaè tātou i teie mahana e, « ia ora  hau noa te nūnaa i nià i to na fenua », o te faaitoitoraa ia i te nūnaa Māòhi i te ìmiraa i te rāveà ia òre te fenua ia riro ei tumu no te papararīraa o te mau ôpū fētii o to tātou nūnaa.

 

Ua ìte maitaì tātou e te nūnaa Māòhi, aita to tātou metua vahine e fifi no na iho. Aita roa atu o ia i faatupu aè nei i te peàpeà i roto ia na e o tātou. E māmā iti hau roa teie e tē ìte maitaì i ta na mau tamarii. Na tātou nei rā i vāvāhi ia na, i àitau ia na, i haaviivii ia na, e na tātou hoì i hoo roa atu ia na. Aita roa atu ra o ia i fifi i mua i ta tātou huru rave ia na. O tātou nei rā teie e fifi nei, e autā nei, e māuiui nei. O tātou teie ôtare nei, e ôvere nei i roto i te ôtaa o te oraraa mau òre. O to tātou mau ôpū fētii tei papararī roa i ta tātou iho raveraa. No reira, te faufaa o teie piiraa ta tātou ia tātou iho, ia ora hau noa tātou i nià i to tātou iho fenua.

 

Ua ìte tātou e, aita e òhipa ta te Atua i ani mai nei i te taata e rave, o tei òre o ia i nā mua i tē rave. Aita atoà e òhipa o ta na e ani mai nei ia tātou tei òre o ia e ìte e, e maraa ia tātou ia rave. Te faatupuraa i te hau, tahi atoà teie huru tumu to tāua e te Māòhi. No reira teie aniraa ta Ietu ia Pētero, e ôhie tāua i tē faatupu e i tē faariro faahou ei oraraa tumu no tātou.

 

Haamanaò noa tātou i teie reo faaitoito o te metua i nià i te tama ta te pehepehe e faatara ra, ia haere te tama ma te hau nā nià i te taìara o te oraraa nei. Te hau o te metua tāne e tae noa atu i te hau o te metua vahine. Na te reira Hau e tāhei noa i te amoamoraa e te tuutuuraa âvae o te tama, ia òre hoì o ia ia pahee noa i roto i te ôtaro fifi o te oraraa ânoì o te tau hou nei.

 

I roto i te âpaparaa o te tau ta te ôpū tamarii e haapii noa mai nei ia tātou, e au ra, ia tae tātou i te tau no te hina ua haamata te toto i te ânoì. No tē haapāpū noa mai ia tātou e, ua tupu ê na te ânoìraa o te oraraa o te nūnaa Māòhi. E te reira hoì ânoìraa, ua nā roto roa i te tāatoàraa o te mau ôrapa o to tātou nei oraraa. No reira, i teie mahana, tē faaitoito mai nei te tau no te hinapaarae i to na mau tāvini, ia faaitoito i tē amo i ta tātou tuhaa, ia au i te hinaaro o te Atua.

 

Ua tae i te tau, ia faaea tātou e te mau tāvini o te Atua, i te tāôtià i ta tātou òhipa i roto noa i te mau piha âpooraa no tē rave i te mau faaotiraa o tē òre hoì e maraa ia tātou iho i tē amo. Âreà te àti o te nūnaa, tē haere noa atu ra ia i te rahi e te teimaha. Tāmata noa na tātou i tē rave mai te huru o te raatira pupu òri Māòhi, aita teie taata e mau i nià i te tahua, tei mua, tei muri, tei rōpū, tei te àoào atoà hoì. I nā reira ai hoì o ia, no tē faaoraora e tē faaièiè i te pupu. Ia nā reira atoà tātou i te faaièièraa ia tātou iho, ia maitaì e ia hau noa to tātou haereà i roto i teie tau âpī ta tātou e haere atu nei, Ia ora na !

 

Pure :

 

Mai ta Ietu hoì, to mātou Faaora e ani ra, fārii òe ia mātou ia àti ia na, ia riro e, na te tāpau ora o ta na Parau e faaora ia mātou, e ia hotu ùmu noa to mātou māòhiraa i te māa e au i to òe hanahana. Tahitià mai ia mātou e te Fatu o te raì e te fenua, tahitià mai, mau i to mātou mau fenua rii e to mātou nūnaa i roto i to òe àpu rima metua, e a arataì ia mātou i nià i te êà o te ora.

 

No òe te Hau, e te Mana, e te Hanahana, mai teie nei e a muri noa atu.

 

Mätaio 16, 21-27 Tätauro

 

Tāpati 30 no Tetepa 2020.

Tätauro.

Taramo 63

1 E Taramo na Tävita, ia na i pärahi i te mëtëpara i Iüta ra. 2 E te Atua, o òe hoì ta ù Atua, e ìmi vave au ia òe, te poìhä nei ta ù värua ia òe. Te feàa nei ta ù tino ia òe, mai te fenua marô nei, e te poìhä, e te pape òre. 3 Ia ìte au i to òe ra mana e te hanahana mai ta ù ä hoì i ìte ia òe i te vähi moà ra, 4 e maitaì rahi tei to hämani maitaì i tei te ora. E teie nei, e haamaitaì ta ù vaha ia òe. 5 E nä reira vau i te haamaitaì ia òe i to ù nei oraraa; e hopoi au i o ù puè rima i to òe ra iòa. 6 E mäha hoì ta ù värua mai tei te töâhua e te meî ra. E haamaitaì hoì ta ù vaha ia òe mä te òaòa. 7 Ia manaò vau ia òe i nià i ta ù roì, e ia ìmi ia òe i te mau äraraa ra. 8 O òe hoì tei tauturu mai ia ù ra. E teie nei, e òaòa vau i roto i te maru o to pererau ra. 9 Te àti atu nei ta ù värua ia òe, e te mauhia nei au e to rima àtau ra. 10 O te feiä rä i tïtau mai ia ù ia pohe ra, e reva ia rätou i raro roa i te fenua ra. 11 E maìri rätou i te òè, e riro rätou ei tufaa na te ârope. 12 E òaòa rä te arii i te Atua. E te feiä atoà i tapu ia na ra, e òaòa ia E te vaha o te haavare ra, e ôpanihia ia.  

Ieremia 20.7-9

E türaì te Fatu ia rätou i roto i te tamaì, 7 Ua faatïaniani mai òe ia ù, e te Fatu, e ua vare iho ra vau;  ua faaitoito mai òe ia ù, e o ta òe atu rä tei tupu; ua riro vau ei àtaraa i te mau mahana atoà nei; e ua tähitohitohia vau e rätou atoà e àti noa aè. 8 E ia parau anaè au ra, ia pii noa vau i te rave ûàna, e ia parau i te haru ra, ua ruri-ê-hia te parau a te Fatu ia ù ei faaìnoraa e ei tähitohitoraa, eita e faaea. 9 Ia parau rä vau ra, e òre au e parau i te reira, e òre au e parau faahou i to na ra iòa; riro atu ra taua parau ra mai te auahi àma i roto i ta ù âau ra, ua ôpanihia i roto i to ù ra mau ivi; rohirohi aè ra vau i te faaòromaì-noa-raa, e aita atu ra e tià ia mämü.

Rōma 12.1-2

Te oraraa i roto i te Metia

1 E teie nei, e a ù mau taeaè ra, te aò atu nei au ia òutou mä te aroha rahi o te Atua, e ia püpü atu òutou i to òutou mau tino ei tütia ora, e te moà, e te au hoì i te Atua ra, o te haamori au ia ia òutou. 2 E eiaha e faaau atu i teie nei ao; ei huru ê rä to òutou i te faahouraa i to òutou âau, ia ìte òutou i taua hinaaro tià o te Atua ra, e te au, e te maitaì hoì.

Mātaio 16.21-27

To Ietu faaararaa i to na Àti e to na tiàfaahouraa

(Mär 8.31-33; Rut 9.22)

21 Mai te reira mai taime, ua haamata iho ra Ietu i te faaìte i ta na mau pipi: ia haere ihoä o ia i Ierutarëma e e ia rahi ta te feiä paari, ta te mau tahuà rarahi, ta te mau päpaì parau haamauiui ia na, e e täparahi-pohe-roa-hia o ia, e e tiàfaahouhia rä ia tae i te ruì toru/toru o te mahana. 22 Ua rave mai ra Pëtero ia na, ôpaì aè ra i te hiti, e ua aò atu ra, nä ô atu ra: Ia päruru mai te Atua ia òe, e te Fatu, Eiaha roa òe ia nä-reira-hia mai. 23 Ua färiu mai ra Ietu, nä ô mai ra ia Pëtero: E haere ê atu òe, i muri mai òe ia ù, e Tätani  E türoriraa òe na ù, tënä mau manaò to òe, eere i to te Atua, no te taata rä.

Te mau tïtauraa no te peeraa ia Ietu

(Mär 8.34-9.1; Rut 9.23-27)

24 Ua parau atu ra Ietu i ta na mau pipi: Ia hinaaro te taata i te pee mai ia ù, e faaruè o ia ia na iho, a rave ai i ta na tätauro, a pee mai ai ia ù. 25 O tei hinaaro hoì i te täpeà i to na ora, e ère ia i te ora; e o tei tuu i to na ora no ù nei, e roaa ia ia na te ora. 26 E aha ta te taata nei faufaa, ia noaa noa atu ia na te täatoà o te taoà o teie nei ao, ia pohe o ia e ia ère o ia i te ora? E e aha ta te taata nei e höroà ei hoo i to na iho ora? 27 E haere mai te Tamaiti a te taata mä ta na ra mau merahi atoà, i roto i te hanahana o to na ra Metua, ei reira o ia e utuà ai i te mau taata atoà ia au i ta rätou ra òhipa.

Manaò.

Mau parau e turu nei i ta tätou parau no teie mahana haamoriraa na tätou, teie ia

-Taramo 63, 12 E òaòa rä te arii i te Atua. E te feiä atoà i tapu ia na ra, e òaòa ia E te vaha o te haavare ra, e ôpanihia ia.  

-Ieremia 20, 7 Ua faatïaniani mai òe ia ù, e te Fatu, e ua vare iho ra vau;  ua faaitoito mai òe ia ù, e o ta òe atu rä tei tupu; ua riro vau ei àtaraa i te mau mahana atoà nei; e ua tähitohitohia vau e rätou atoà e àti noa aè.

-Roma 12, 2 E eiaha e faaau atu i teie nei ao; ei huru ê rä to òutou i te ìte faahouraa i to òutou âau, ia ìte òutou i taua hinaaro tià o te Atua ra, e te au, e te maitaì hoì.

-Mätaio 16, 24 Ua parau atu ra Ietu i ta na mau pipi: Ia hinaaro te taata i te pee mai ia ù, e faaruè o ia ia na iho, a rave ai i ta na tätauro, a pee mai ai ia ù. 

Ei manaò tatara.

Teie reo o Ietu ia tätou i teie mahana i te naòraa e, Mataio 16:24  O TE  TAATA  E HINAARO  E PEE  MAI  IA Ù E  FAARUE O IA IA NA IHO, A RAVE  AI  I TA NA  TÄTAURO A PEE MAI  AI  IA  Ù.

Te parau e faahitihia ra i roto i ta tätou taiòraa, te faaìteraa ia o Ietu i te àti ta na e farerei i Ierutarëma. Hoê àti riàrià mau, e ìmihia te mau raveà atoà no te haafifi i te tereraa òhipa a te Atua. E te mau tià e faatere nei i te oraraa o te taata. E ö o Ietu i roto i teie mau faanahoraa tià òre e faaineinehia no na. Èita ra o Ietu e ôtohe i mua i teie mau òhipa, o ta na e ìte ôrama nei, noa atu  te pohe ta na e ìte ra i mua ia na, èita te reira e haaparuparu i te ora a te Atua.

Ta tätou ra ìrava ua tupu ia i muri ïti noa aè i to Petero hinaaroraa e faaturori ia Ietu, no te òhipa e tupu, ia tae rätou i Ierutarëma. Te manaò o Petero eiaha rätou ia haere i reira, i te mea e hämani-ìno-hia, te Metia, e täparahi pohe-roa-hia, te reira te parau faufaa tei mau maitaì ia Petero, aita o ia i faaroo i te tahi atu mau parau ta te Metia i faahiti no te pohe e te tiàfaahouraa, ua morohi te reira i roto i te tiàturiraa no Petero. Aita atoà o Petero i hape roa i nià i teie manaò ta na e horoà nei i nià i te Metia, e aita atoà e òre e no te paruru i te Metia i faahiti ai o ia i teie manaò. Te manaò ra o Ietu i nià ia Petero, e manaò teiaha roa ia, E HAERE  Ê  ATU  ÒE, E TE NA NA  ENEMI, E TURORIRAA  ÒE  NA Ù, AORE  HOÌ  ÒE  I AU  I TA TE ATUA  RA,O TA  TE  TAATA RA  TA OE  I  AU.

Te ìte nei o Ietu ua turori  te faaroo o Petero, i mua i te mau òhipa e tupu i Ierutarëma, ua haapaò noa o ia i te parau no te pohe, aita to na tiàturiraa i nià  i te  parau  no te  tiàfaahouraa. O vai ia taata e tià e horo noa i roto  i te pohe e ìnaha, ua ìte o ia e pohe te ra äè i mua ia na. No Petero ua pöuri roa  o ia i teie parau ta Ietu, mai te mau taata e rave rahi, tei òre roa i tiàturi  i ta Ietu e haapii nei na roto i  te èvaneria ora a te Atua. No Ietu  teie  pohe e teie tiàfaahouraa  e parau ia no te ìritiraa  i te hoê ùputa âpï no te hoê  tiàturiraa, i te  mea èita tei pohe te parau hopeà, tei te mana ra no te tiàfaahouraa. Teie te manaò päpu o Ietu, i hinaaro ai o ia ia märamarama ta na mau pipi, i te òhipa ta na e faatupu nei ia mama te hopoià a te feiä tei teimaha, o teie hopoià, o te hara ia  a te feiä tei faatea-è i te Atua. I reira e ìtehia ai te faufaa òre o te feiä, tei noaa ia na te taoà atoà o teie nei ao, ia ère  o ia i te ora a te Atua, e aha ia ta na e horoà na te Atua o ia tei ère i to na ora?

Aita o Ietu e faafaufaa òre nei i to tätou oraraa, te haamaitaì nei ra ma te horoà i teie parau nehenehe roa, o te taata i hinaaro i te pee mai ia ù e faaruè ia na iho, a rave ai i ta na tätauro, a pee mai ai ia ù. Aita o Ietu e faaturori nei i te mau manaò o te taata, te ìriti nei ra o Ietu i te tahi èà âpï no te oraraa o te mau taata e ora ra i roto i te Metia. Teie reo no Ietu, te manaò mätamua tei mätauhia e tätou i te märamarama tei roto ia i tera feruriraa, faahepo òre .Te piti ra o te manaò tei roto ia i tera faanahoraa e, ia faatupuhia te paari o te Atua i roto i te mau faaueraa ta te Metia e tïtau mai nei i te mau taata atoà e faaroo nei i teie reo. Te hinaaro o ta Ietu e faahiti nei i roto i ta tätou ìrava, e reo  tïtau ia no te Fatu  ia rave te mau taata tätaìtahi i te tätauro i püpühia  i roto ia na èi faatupuraa i te ao o te Atua i te fenua nei. Èita ihoä ra i te mea òhie i te amoraa i to na iho tätauro, mea òhie äè ra  na vëtahi-ê e amo. Mai ta te Metia i amo no te mau hara  atoà  a te mau taata.

E aha ia ta te tätauro e parau mai nei? Te parau mai nei ia teie te ora o te feiä tei tiàturi  i te Atua, tei ìte i te aroha faaòreraa hara. Oia ia, o te faatïanianiraa a te Atua i to na tävini  perofeta  ia Ieremia, i te pene 20 i te ìrava 7 e tae i te ìrava 9. Ua faatïaniani mai òe ia ù e te Atua Nui Tumu Tahi, e ua vare o Ieremia, ma te faaitoito i te raveraa i te òhipa a te Atua, i roto i te hoê taime àrepurepu, e i roto i te hoê taime aita te taata e faaroo faahou nei i te parau a te Atua. E ua tae roa atoà i te taata i te faatanoraa i to na hape, i mua i te Atua, ma te faahape i te parau tià a te Atua. Tei teie  taime teimaha mau to Ieremia amoraa i to na tätauro, na roto i te faaòromaì i te huru o te nunaa tei òre i tiàturi faahou i te Atua. No te itoito ra te tiàturiraa o Ieremia i te Atua Nui Tumu Tahi i òre ai  o ia e paruparu i te amoraa i to na tätauro, i te mea to na ora tei roto ia i te Atua te vairaa. I òre ai to na tätauro e teiaha. Te ora o te feiä tei tiàturi i te Atua, e ora ia tei faatupu te marämaraa te mau òhipa atoà, eiaha te òhipa a te Atua ia riro ei hopoià, ia riro ra èi òaòaraa na te mau taata atoà, ua riro änaè ei hopoià, i reira te tätauro e teiaha ai, ua teiaha änaè, i reira te mau manaò tià òre e ö mai ai, na te reira e haaparuparu, ia paruparu änaè i reira te tätauro e pitaataa ai mai te pahï tei pë, âvivi noa atu ra i nià i te àre miti ia tere i mua. Hoê-ä-atoà ia te faaroo ia paruparu, e âvivi atoà te tätauro, e, e tae roa  to na tävevo i roto i te nunaa. Ia òre ra e mama rahi to te tätauro mai te vavai ra te huru, i te mea na te itoito e amo ra ma te âpeehia e te faaòromaì. I reira ra ua vaiiho ia taua taata faaroo ra ia na ia faaterehia o ia i te hinaaro o te Atua, i te mea ua faaruè o ia ia na iho na te ôpuaraa faaora a te Atua e faanaho ia na, no te peeraa i te Metia. Teie to na reo i te ìrava 27 E haere mai te Tamaiti a te taata mä ta na ra mau merahi atoà, i roto i te hanahana o to na ra Metua, ei reira o ia e utuà ai i te mau taata atoà ia au i ta rätou ra òhipa.

 

Teraì òr. Faatura.

Papa Haamori. Tāpati 30 no Âtete 2020.

 

Tāpati 30 no Âtete 2020.

Papa Haamori.

Färiiraa.

Mau taeaè, e te mau tuahine o te Atua Nui Tumu Tahi, tei ìte i te ôpuaraa faaora i teie poìpoì, i tae mai ai tätou no te haamori, e no te  faaroo i to na mau hinaaro, o ta tätou e ìte noa nei i te mau taime atoà. E tià mai tätou.

 

Pure.

E faaroo tätou i teie nei te pure a Tavita i te faaìteraa a te Taramo 63, 1 E Taramo na Tävita, ia na i pärahi i te mëtëpara i Iüta ra. 2 E te Atua, o òe hoì ta ù Atua, e ìmi vave au ia òe, te poìhä nei ta ù värua ia òe. Te feàa nei ta ù tino ia òe, mai te fenua marö nei, e te poìhä, e te pape òre. 3 Ia ìte au i to òe ra mana e te hanahana mai ta ù ä hoì i ìte ia òe i te vähi moà ra, 4 e maitaì rahi tei to hämani maitaì i tei te ora. E teie nei, e haamaitaì ta ù vaha ia òe. 5 E nä reira vau i te haamaitaì ia òe i to ù nei oraraa; e hopoi au i o ù puè rima i to òe ra iòa. 6 E mäha hoì ta ù värua mai tei te töâhua e te meî ra. E haamaitaì hoì ta ù vaha ia òe mä te òaòa. 7 Ia manaò vau ia òe i nià i ta ù roì, e ia ìmi ia òe i te mau äraraa ra. 8 O òe hoì tei tauturu mai ia ù ra. E teie nei, e òaòa vau i roto i te maru o to pererau ra. 9 Te àti atu nei ta ù värua ia òe, e te mauhia nei au e to rima àtau ra. 10 O te feiä rä i tïtau mai ia ù ia pohe ra, e reva ia rätou i raro roa i te fenua ra. 11 E maìri rätou i te òè, e riro rätou ei tufaa na te ârope. 12 E òaòa rä te arii i te Atua. E te feiä atoà i tapu ia na ra, e òaòa ia E te vaha o te haavare ra, e ôpanihia ia. Âmene.

 

Pärahi tätou, haamaitaì tätou i te Atua i te hoê reo himene.

Himene.

 

Faatïaniani.

Teie ta Ieremia faaìteraa i te Atua i te pene 20 i te mau ìrava 7 e faaèa i te ìrava 9, E türaì te Fatu ia rätou i roto i te tamaì, 7 Ua faatïaniani mai òe ia ù, e te Fatu, e ua vare iho ra vau;  ua faaitoito mai òe ia ù, e o ta òe atu rä tei tupu; ua riro vau ei àtaraa i te mau mahana atoà nei; e ua tähitohitohia vau e rätou atoà e àti noa aè. 8 E ia parau anaè au ra, ia pii noa vau i te rave ûàna, e ia parau i te haru ra, ua ruri-ê-hia te parau a te Fatu ia ù ei faaìnoraa e ei tähitohitoraa, eita e faaea. 9 Ia parau rä vau ra, e òre au e parau i te reira, e òre au e parau faahou i to na ra iòa; riro atu ra taua parau ra mai te auahi àma i roto i ta ù âau ra, ua ôpanihia i roto i to ù ra mau ivi; rohirohi aè ra vau i te faaòromaì-noa-raa, e aita atu ra e tià ia mämü. E te Atua Nui Tumu Tahi te faatïaniani mai nei òe ia mätou i teie mahana ia raa to òe iòa. Âmene.

 

Himene Tätarahapa.

I mua i te mau faatïanianiraa a te Atua Nui Tumu Tahi, te ìte nei tätou e ua aroha mai, e ua herehia mai tätou i riro ai tätou e mau tamarii faatävai i roto i ta na ôpuaraa faaora. Haamaitaì tätou i te Atua i te hoê reo himene e tià ai.

 

Himene òaòa.

Te parau nei o Pauro ia tätou i teie poìpoì, te parau no te oraraa i roto i te Metia, Rōma i te pene 12 i te mau ìrava 1 e tae i te ìrava 2, 1 E teie nei, e a ù mau taeaè ra, te aò atu nei au ia òutou mä te aroha rahi o te Atua, e ia püpü atu òutou i to òutou mau tino ei tütia ora, e te moà, e te au hoì i te Atua ra, o te haamori au ia òutou. 2 E eiaha e faaau atu i teie nei ao; ei huru ê rä to òutou i te faahouraa i to òutou âau, ia ìte òutou i taua hinaaro tià o te Atua ra, e te au, e te maitaì hoì. Âmene.

Pärahi tätou, Haamaitaì tätou i te Atua i te hoê reo himene.

 

Himene.

Pure

Pure tätou i te Atua, i mua i te mau parau o ta mätou e taiò, e ta mätou e faaroo, te vai nei to mätou ère i to òe mau hinaaro, te ani nei mätou ia Òe a türama mai Òe ia mätou i te ìteraa i to Aroha e to Here i te faaìteraa a to Tämaïti here ia mätou i teie mahana. Amene.

 

 

 

 

Taiòraa.

Mätaio 16.21-27

To Ietu faaararaa i to na Àti e to na tiàfaahouraa

21 Mai te reira mai taime, ua haamata iho ra Ietu i te faaìte i ta na mau pipi: ia haere ihoä o ia i Ierutarëma e e ia rahi ta te feiä paari, ta te mau tahuà rarahi, ta te mau päpaì parau haamauiui ia na, e e täparahi-pohe-roa-hia o ia, e e tiàfaahouhia rä ia tae i te ruì toru/toru o te mahana. 22 Ua rave mai ra Pëtero ia na, ôpaì aè ra i te hiti, e ua aò atu ra, nä ô atu ra: Ia päruru mai te Atua ia òe, e te Fatu, Eiaha roa òe ia nä-reira-hia mai. 23 Ua färiu mai ra Ietu, nä ô mai ra ia Pëtero: E haere ê atu òe, i muri mai òe ia ù, e Tätani  E türoriraa òe na ù, tënä mau manaò to òe, eere i to te Atua, no te taata rä.

Te mau tïtauraa no te peeraa ia Ietu

24 Ua parau atu ra Ietu i ta na mau pipi: Ia hinaaro te taata i te pee mai ia ù, e faaruè o ia ia na iho, a rave ai i ta na tätauro, a pee mai ai ia ù. 25 O tei hinaaro hoì i te täpeà i to na ora, e ère ia i te ora; e o tei tuu i to na ora no ù nei, e roaa ia ia na te ora. 26 E aha ta te taata nei faufaa, ia noaa noa atu ia na te täatoà o te taoà o teie nei ao, ia pohe o ia e ia ère o ia i te ora? E e aha ta te taata nei e höroà ei hoo i to na iho ora? 27 E haere mai te Tämaïti a te taata mä ta na ra mau merahi atoà, i roto i te hanahana o to na ra Metua, ei reira o ia e utuà ai i te mau taata atoà ia au i ta rätou ra òhipa.

Na te Atua e haamaitaì mai te täiòraahia ta na parau i mua ia tätou.

 

Pure

Pure tätou i te Atua, faaroo aè nei mätou i te mau parau a to Tämaïti here, teie faaìte ia mätou i ta mätou hopoià ta te tätauro e tïtau mai nei ia mätou, a faarahi mai to mätou faaroo. Âmene.

Haamaitaì tätou i te Atua i te hoê reo himene.

 

Himene.

 

Faaitoitoraa.

Himene.

Parau faaära

Himene püpüraa moni.

 

Pure Ärai

Pure tätou i te Atua.

E te Here Nui e, Te Atua Nui Tumu Tahi i faaî i to mätou fenua, to mätou moana e te reva i to  òe aroha faaora i te nünaa Mäòhi. O  òe mau ä te Puna o te Here e te ora o te nünaa Mäòhi. Te parau i ìriti i te ùputa o teie nei ao. Te Metua i te raì hamama noa. Ârue, faateniteni mätou i to Òe iòa moà e te tura. Mai ta òe i faahei ia mätou i to tura e to hinuhinu, ia faahei atoà atu mätou ia òe, i ta mätou reo haamaitaì no roto i te ùpa, te himene e te  òreroraa atu ia òe nä roto i teie maa reo iti e. Haere mai rä, tomo mai rä i roto ia mätou nei. E te Atua Metua e, te òriò  mata e te pü tarià o te nünaa mäòhi, E tià  òe i mua i to mätou mau ùputa rii, aita rä mätou i täuà iti noa aè i ta  òe mau pätötöraa. Te pii noa mai ra to  òe reo, ua fëàa roa rä to mätou âau i te faaroo-noa-raa i te rauraa o te mau reo e täûu noa ra i te pae o to mätou nei oraraa. Ua hinaaro  òe ia ìriti mätou i te ôpani i tämaumauhia e mätou i roto i to mätou oraraa. To mätou tätauro ua haapaehia e mätou i te vahi èita e faatupu i te aroha e te here. Haapii faahou ra òe ia mätou ia nahea mätou te mau faahouraa i to mätou tätauro, ia riro èi òhipa faatupu ora i roto i teie mahana ahoaho no teie maì e haaviivii ra i to mätou oraraa, E te Atua Nui Tumu Tahi a tauturu mau ia mätou. Âmene.

 

Himene âmui.

 

Pure a te Fatu.

E to mätou Metua i te raì tua tinitini

Ia faateiteihia to òe iòa moà

Ia tae mai to òe hau

Ia haapaòhia to òe hinaaro i te fenua nei, mai tei te raì atoà na

Ho mai i te mäa na mätou i teie mahana

Faaòre mai i ta mätou tärahu,

mai ia mätou e faaòre nei i ta rätou i tärahu ia mätou nei

Eiaha e faaruè ia mätou ia fati i mua i te ènemi,

Faaora rä ia mätou i te ìno

No òe te hau, te mana, e te hanahana

E a tau e a hiti noa atu, amene.

Faaitoitoraa.

24 Ua parau atu ra Ietu i ta na mau pipi: Ia hinaaro te taata i te pee mai ia ù, e faaruè o ia ia na iho, a rave ai i ta na tätauro, a pee mai ai ia ù. 25 O tei hinaaro hoì i te täpeà i to na ora, e ère ia i te ora; e o tei tuu i to na ora no ù nei, e roaa ia ia na te ora. 

Haamaitaìraa.

 26 E aha ta te taata nei faufaa, ia noaa noa atu ia na te täatoà o te taoà o teie nei ao, ia pohe o ia e ia ère o ia i te ora? E e aha ta te taata nei e höroà ei hoo i to na iho ora?

Teraì òr. Faatura.

Mātaio 16.13-20 Täviri.

 

Tāpati 23 no Âtete 2020.

Täviri.

Taramo 138

1 Na Tävita. E haamaitaì au ia òe, e te Fatu, mä ta ù âau atoà nei, e himene au ei haamaitaì ia òe, i mua i te aro o te mau atua. 2 E haamori tià atu vau i to nao moà ra, a haamaitaì atu ai i to òe iòa, e te Fatu no to òe aroha e ta òe ra parau mau: ua faarahi hoì òe i ta òe parau ia hau atu i to iòa atoà ra. 3 I  te mahana i tiàoro atu ai au ra, ua parau mai òe ia ù; e ua horoà mai i te itoito i ta ù värua. 4 E hope te mau arii atoà o te fenua nei i te haamaitaì ia òe, e te Fatu, ia ìte rätou i te parau a to vaha 5 E himene rätou i te mau parau a te Fatu: E hanahana rahi hoì to te Fatu. 6 Teitei noa ä te Fatu, e haapaò mai ä o ia i tei haèhaa, âreà tei teòteò, ei te ätea ê o ia e hiò mai ai.7 Ia haere noa vau nä roto i te àti ra, e faaànaànaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù. 8 Na te Fatu e nä reira mai ia ù, e tià to òe aroha, e te Fatu, i te vai-mäite-raa; eiaha na òe e faaruè i te òhipa a to rima.

Ìtaia 22.19-23

19 E tïahi ê atu vau ia òe i to òe ra vähi; e tuu-faahaèhaa-hia òe e au i raro. 20 Ei te reira mahana vau e parau atu ai i ta ù tävini, i ü Êriätima a Hiritia. 21 E faaàhu vau ia na i te àhu no òe, e faaètaèta vau ia na i te tätua no òe ra; e to òe ra hau ta ù e tuu atu i to na rima; e riro hoì o ia ei metua nä to Ierutarëma, e na te ùtuafare o Iüta: 22 e na ù e tuu i te täviri o te ùtuafare o Tävita i nià i ta na täpono, e nä na e ìriti, e e òre e ôpanihia, e nä na e ôpani, e e òre roa e ìritihia. 23 E nä ù o ia e haamau mai te âuri i te vähi ètaèta ra; e riro hoì o ia ei teröno ùnaùna i te ùtuafare o tö na ra metua.

Rōma 11.33-36

Te rahi hau ê o te òhipa a te Atua

33 Âuë te rahi hau ê atu o te paari e te ìte o te Atua e. E te ìmiraa òre o ta na faaauraa, e ta na mau haereà i te ìteä òre ia ìmi e. 34 O vai hoì tei ìte i te âau o te Fatu? E o vai ta na e aò atu? 35 O vai hoì tei horoà atu i te faufaa na na, e tähoo-faahou-hia mai ia o ia? 36 No na mai hoì, e na na, e no na te mau mea atoà nei. Ei ia na te haamaitaì mure òre. Âmene.

Mātaio 16.13-20

To Pëtero ìteraa i roto ia Ietu te Tamaiti a te Atua

(Mär 8.27-30; Rut 9.18-21)

13 E ia tae Ietu i te tuhaa fenua oTaitarea o Firipi, ua ui atu ra o ia i ta na mau pipi: O vai te Tamaiti a te taata nei i ta te taata parauraa? 14 Ua pähono mai ra rätou: O Ioane päpetito ta te tahi, o Èria ta te tahi pae, o Ieremia e aore ia te hoê o te mau perofeta ta te tahi. 15 Ua parau atu ra o ia ia rätou: O vai rä vau i ta òutou na parauraa? 16 Ua pähono mai ra Timona Pëtero: O te Metia òe, te Tamaiti a te Atua ora. 17 Ua parau atu ra Ietu ia na: E ao to òe, e Timona te tamaiti a Iona, eere hoì na te tino e na te toto te reira i heheu mai ia òe, na to ù Metua rä i te raì ra. 18 E parau atoà atu vau ia òe: o Pëtero òe, e ei nià iho i teie nei papa/ôfaì e patu ai au i tau Ètärëtia, e e òre roa te mana o te pohe e upootià i nià ia na. 19 E höroà atu hoì vau i te mau täviri o te Hau o te raì ia òe: e ta òe e täamu i nià i te fenua nei, e täamu-atoà-hia ia i nià i te raì; e ta òe e tätara i nià i te fenua nei, e tätara-atoà-hia ia i nià i te raì. 20 Ua aò maitaì atu ra o ia i ta na mau pipi, eiaha roa e faaìte noa atu i te taata, e o te Metia o ia.

Manaò.

Ei manaò mätamua.

I mua i teie  mau  taiòraa, te ìte  nei tätou mai teihea to te mau tävini  faaìteraa i te maitaì  o te Atua na roto i te faaroo. Te faaitoito nei te Atua i to na nunaa, ma te horoà ia rätou te täviri o to na ùtuafare. I reira rätou e ìte ai te torono ùnaùna o te arii. Teie ra, eita te mau huru  taata atoà e ö i reira, te feiä e noaa ia rätou taua täviri ra,

1) Te feia ia tei tiàturi päpü i te Atua, ma te faaòhipa i to rätou faaroo.

2) Tei faaèa fatata noa i pïhaìiho i te parau a te Atua.

3) Tei faaòhipa i ta na täreni ma te taime òre.

4) Tei òre i haapaò hoê noa pae, tei haapaò ra i te mau òhipa atoà o te faaroo.

Teie te tahi haapotoraa no taiòraa e maha no te mau i haapaòhia no teie mahana.

-Taramo 138, 8 Na te Fatu e nä reira, e tià to aroha, i te vai-mäite-raa; eiaha e faaruè i te òhipa a to rima.

-Ìtaia 22, 22 Te täviri o te ùtuafare o Tävita i nià i ta na täpono, e nä na e ìriti, e òre e ôpanihia, e nä na e ôpani, e òre roa e ìritihia.

-Roma 11, 33 Âuë te hau o te paari e te ìte o te Atua . E te ìmiraa òre o ta na faaauraa, e ta na mau haereà i te ìteä òre ia ìmi e.

-Mätaio 16, 20 Ua aò maitaì atu ra o ia i ta na mau pipi, eiaha roa e faaìte noa atu i te taata, e o te Metia o ia.

Na teie mau faahiòraa, e faaìte ia tätou e, te vai ra te tauturu a te Atua i nià i te feia paieti, àreà ra no te feiä paieti òre te tïtauhia nei ia, ia faahaèhaa i mua i te mata parau tià o te Atua. Ia tià i te parau a te Atua ia ärataì ia rätou i roto i te haamaitaìraa mure òre. Ia òre ia tupu mai te tahi mau uiuiraa manaò tià òre. Te ìte nei o Ietu i te reira mau manaò i roto i ta na mau pipi, i ui ai o Ietu ia rätou, O  VAI  AU TE TAMAITI  NEI I TA TE TAATA NEI PARAURAA ? TE PITI NO TE UIRAA, O VAI RA VAU  NEI  I TA ÒUTOU  NA PARAURAA ?

Ia hiò maitaì änaè tätou i teie na uiraa a Ietu, tei roto ia o ia i te hoê tïtorotororaa manaò ei haapäpüraa i to na tiàraa Tämaïti na te Atua i ropu i to na nunaa. Ma te fafa  atoà  te manaò e parauhia ra no na i roto i te rahiraa taata, e i roto i ta na mau pipi iho tei âpee noa ia na i te mau taime atoà, e i te mau vahi atoà ta na e haere nei. Teie òhipa ta Ietu e rave nei no te faaâpïraa ia i te faanahoraa e orahia nei e to na nunaa ma te horoà i te hoê tiaìtururaa no te patireia o te Atua. Te tiaìtururaa o Ietu i te òhipa ta na e rave nei ia tiàturihia ia e te mau taata atoà, teie ia mau uiuiraa manaò ta na e rave nei. Eiaha  ra i roto i tera  manaò e, te paruparu nei O ia i te òhipa ta na e rave nei, eita roa ia, tei roto ra i tera manaò e, o vai tei märamarama i ta na tïtauraa i te mau taata atoà tei faaroo i ta na mau aòraa, o vai tei tiàturi i ta na mau temeio, o vai tei mahanahana i ta na mau faaoraraa maì, e o vai te taata tei ìte i roto i te òhipa ta na e faatupu nei te mau hinaaro o te Atua. Eiaha ra tätou ia manaò e te faateitei nei o Ietu ia na aita roa ia. Te uiui nei ra o Ietu mai te metua e uiui nei, ia moe ta na mau tamarii ia na.

I tupu ai te manaò e, e rave teie na uiraa na Ietu ei parau äè no tätou, e ia tià atoà ia tätou ia pähono ia Ietu mai ta na e tiaì mai nei ia tätou.

Ei manaò tatara.

Ta tätou parau tei te ìrava 13 i te vahi hopeà, e tei te ìrava 15 i te vahi hopeà, no te Mätaio pene 16. I teie na uiraa a Ietu i nià i ta na mau pipi.

Ò  VAI  AU  TE TAMAITI A  TE TAATA  NEI  I TA TE TAATA  NEI PARAURAA ? Ò VAI  RA  VAU NEI I TA ÒUTOU NA PARAURAA ?

Ua tupu teie parau ta tätou i to Ietu haereraa  i Taitarea i Firipi, teie òire tei te pae Repanona  no te fenua ra o Turia e i Titona. Teie vahi tei raro noa mai i te tupuaì mouà ra no Heremona. Na Herota Firipi piti i patu i teie òire, ma te tuu i teie iòa ia Taitarea, i teie mahana aita faahou teie òire ua òre roa, te puna pape noa tera e vai mai ra i teie mahana.

I muri ïti noa äè i te mau òhipa maere i ravehia e Ietu, te faaàmuraa temeio i te mau taata e rave rahi, (Mat:14:13-21), te haereraa na nià i te miti, (Mat14:22-33) e te faaoraraa i te tamahine e te vahine àti Tanaana,(Mat 15:21-28).

E i roto i ta tätou parau no teie  hora paieti, te ui  nei o Ietu i ta na mau pipi e piti uiraa no te mea hoê hiòraa a te mau taata ia na e ta rätou e märamarama i nià i te mau òhipa ta na e rave ra i te iòa o te Atua. Te piti ra, te hiòraa ia a te mau pipi ia na e ta rätou e märamarama. E aha te auraa no teie na uiraa. Eita e òre te ìte nei o Ietu i roto i ta na mau pipi i te hoê vahi päpü òre no to rätou tiàturiraa i te òhipa ta na e rave nei  mea maitaì ihoä  ia, ia  uiui Ò ia i ta na mau pipi teihea atu ra ia rätou i te faaearaa, tei nià änei ra i te hoê fatu, tei faaora i te maì, tei faaàmu i te taata i te maa, e aore ra i te hoê fatu tei horoà i te haapiiraa nehenehe ati-ra-atu ai. Ua tano ihoä ra o Ietu i te uiraa i teie na uiraa e piti, i te mea aita ihoä te mau taata i märamarama e o vai o Ietu, te hiòraa a te mau taata, o Ietu,

O Ioane Päpetito, te taata ia i poro te parau no te tätarahapa.

O Eria te perofeta ia i àro i te mau perofeta a Paara.

O Ieremia te perofeta tei pii i te nunaa o te Atua ia hoi i nià i te ora mau.

E aore hoê o te mau perofeta.

O teie ia ta te mau taata i märamarama i roto i te taatoàraa no te  mau òhipa i faatupuhia e Ietu. Aita o Ietu i riro i roto i te tiàturiraa no te mau taata e, e Tämaïti na te Atua, tei tonohia mai, ua riro noa ra o Ietu mai te hoê o te mau perofeta, tei î i te mau hinaaro o te Atua, ua oti ätu ai.

Te manaò ra o te mau pipi tei na roto mai ia Petero, o te pähonoraa ia ta Ietu e tiaì nei, o te Metia òe te Tämaïti a te Atua ora. I nià i teie fäìraa faaroo o Ietu e haamau ai i te Ètärëtia ora a te Atua. O teie te papa no te ora mure òre, te tià ia haapaòhia e te mau taata atoà tei tiàturi i te mau òhipa maere tei ravehia e Ietu. Ua faaroo è na tätou i te piiraahia o Ietu i te Tamaiti a Tavita, ua faaroo atoà tätou i to na faahotanaraahia, to na faaìnoraahia, to na tähitohitoraahia, e to na àtaraahia i nià i te tätauro. E to Ioane Päpetito parauraa e a hiò na i te àrenio a te Atua tei hopoi-ê i te hara a to te ao. Âreà ra teie ta tätou e faaroo nei, o te faaâpïraa ia te reira i te tïtauraa i te Atua, te Metia te Tamaiti a te Atua ora. O te hoê teie haapäpüraa, o Ietu te Metia, i tiaì maorohia e te mau perofeta, ò ia te tià e ìriti i te ùputa no te ora mure òre i te mau taata tei òre i àueue te faaroo. Te riro nei o Ietu mai te hoê Metua âpï i roto i te oire no te feiä  Moà. Tei  faateiteihia e te Atua, ma te faaàhu i te àhu âpï no te hau. E te riro atoà nei O ia ei täviri no te ùtuafare no te Atua. Ia noaa te tätarahaparaa i te paieti òre, ei ia ànaana te parau tià a te Atua i roto ia rätou no te hoê tiàturiraa päpü, ia òre te Tämaïti a te Atua ia faaau haere-noa-hia, i te tahi atu mau huru taata e aore ra hohoà taata.

Ia tià ra i te taata ia ìte, te papa no te Ètärëtia a te Atua ora, tei nià ia i te Metia, eita ra tei nià ia Petero. O Petero e mauhaa noa ò ia ei faaìteraa i te mau faanahoraa a te Atua, e ei pähonoraa i te mau uiraa a Ietu. Oia atoà ia tätou e mauhaa atoà tätou no te mau òhipa a te Atua, i teie mahana  te ui atoà mai nei o Ietu ia tätou i teie na uiraa, E aha ta tätou pähonoraa ? E aha to tätou manaò ?

           

Teraì ò. Faatura.