PAPA HAAMORI O TE TAU HINAPAARAE « Ia ora hau te nūnaa i nià i to na fenua ».

 

PAPA HAAMORI O TE TAU HINAPAARAE

 

 

« Ia ora hau te nūnaa i nià i to na fenua ».

 

Nā Parau papa :

 

I-Teie rā te faufaa ta ù e faaau atu i te ùtuāfare o Ìteraèra tē nā ô mai ra te Tumu Nui : Ia oti aè te reira ànotau, e tuu vau i taù ture i roto ia rātou, e pāpaì au i te reira i roto i to rātou âau ;  e riro vau ei Atua no rātou, e ei nūnaa hoì rātou no ù (Ieremia 24, 7).

 

II-Te pure a to tātou mau tupuna e nā ô rā e : « Ia Atua te Atua, ia fenua te fenua, ua maitaì roa ».

 

Ômuaraa :

 

E te nūnaa o Māòhi Nui nei, a fārii anaè mai tātou, i te tāpaò no te Aroha e te Here o te Tumu Nui i to tātou fārereiraa.

 

I teie matahiti, ua faaoti te âpooraa faatere, ia faaineinehia mai i te tahi papa haamori e tae noa atu i te tahi tereraa haamoriraa no tē ìriti i ta tātou matahiti Êtārētia, tei riro atoà ei matahiti âpī a te nūnaa Māòhi. Mai tē ìte atoà tātou e, e matahiti taaê mau ā teie no tātou, eiaha no te mea i faaruru mai na to teie ao i teie maì i faatupuhia e teie tirotiro 19. No terā atoà rā mea, tē riro nei teie matahiti ei taime, ei tau o ta te Tumu Nui e hōroà nei ia tātou, ia ora hope i to tātou TIÀMĀRAA. Oia to tātou tiàraa atu i mua i te Atua ma te mā.

 

Tau matahiti i teie nei, to te Tumu Nui faatomoraa mai ia tātou i roto i te tau no te hinapaarae. E parau teie no te ôpū tamarii, ia au i ta te mau tupuna Māòhi i ora mai na, mai te tau auìuì mai. E tau faufaa roa no te mea, i te reira noa tau e hoì ai te uì i te haamata-faahou-raa. E faaâpī te mau mea atoà. E motu te fētii i tāàmuhia e te taura o te toto. Aita hōê òhipa e mau i roto i teie faaâpīraa arataìhia e te Atua, e te fenua. Tē hinaaro e tē hinaaro òre o te taata, e tupuhia ihoā ta te Tumu Nui. Nō reira, aita atu e mea e anihia i te taata māoti, te tomoraa i roto i taua faaâpīraa ra.

 

Âreà te Êtārētia, e parau ia no te tahi nūnaa o tei faaroo, e tei tiàturi i te Fatu hōê. O tātou nei rā hoì te nūnaa Māòhi, e nūnaa faaroo roa i te Atua, mai to na haapārahiraa i to tātou huitupuna i roto i te uru maitaì o Māòhi Nui nei, e tae roa mai i teie mahana. Nō reira, te ìritiraa i te matahiti Êtārētia, e tano tātou e parau e, o te ùputa tomoraa te reira no te nūnaa māìtihia e te Atua, oia te nūnaa Māòhi, ia ora hope roa atu i to na Faaroo Māòhi Mau i te Atua ra. E matahiti âpī mau ā teie no te Atua e to na nūnaa.

 

1a-Te Tumu Parau :

 

Ua tāpeàhia mai te tumu parau i ferurihia e te Âpooraa Rahi Âmui i te matahiti 2019 i te Tuhaa 3 e nā ô ra e : « Ia ora hau te nūnaa i nià i to na fenua ».

 

Ia au i terā reo iti to te Tumu Nui i te perofeta Ieremia e nā ô ra e, Teie rā te faufaa ta ù e faaau atu i te ùtuāfare o Ìteraèra, tē nā ô mai ra te Tumu Nui : Ia oti aè te reira ànotau, e tuu vau i taù ture i roto ia rātou, e pāpaì au i te reira i roto i to rātou âau ;  e riro vau ei Atua no rātou, e ei nūnaa hoì rātou no ù (Ieremia 24, 7). E teie pure a to tātou mau tupuna e nā ô rā e : « Ia Atua te Atua, ia fenua te fenua, ua maitaì roa ».

 

E hinaaro tumu teie no te Atua Nui Tumu Tahi, ia ora noa to na nūnaa i roto i te Hau i nià i to na iho fenua. Tē vai ra ihoā teie Hau ta te Māòhi e parau noa ra, te oraraa peàpeà òre, tē vai atoà ra teie Hau ta te mau tupuna e parau atoà ra, e faatereraa i te tahi nūnaa i nià i te tahi fenua. Nā reira teie Hau o tē parau-atoà-hia e hupe, e tē vai atu ra teie Hau e ìtehia ra i roto i te urufau, e uruhau ta te tahi pae parauraa, oia e parauhia ra i teie mahana e, e pūrau. Rau noa atu ai rā te vāhi i reira te faaòhiparaa a te Māòhi i teie taò Hau, tē vai noa ihoā te tahi auraa tumu e faaìtehia ra, māoti, te marū, te haèhaa, e te vaimanino o te oraraa.

 

E faaitoito anaè tātou i te âpee māite i te mau parau i te mau pō tātaì tahi o te hopetoma, no tē tomoraa atu i roto i te òhipa ta te Tumu Nui e tītau mai ra ia tātou e rave, ia tupu mau ā nā roto ia tātou te ôpuaraa faaora a te Atua no to na nūnaa.

 

2a- Te papa haamori :

 

No te rahi e te rau o te mau papa haamori e oriori noa ra nā roto i te ao reva o te Êtārētia Porotetani Māòhi e, ia au i te huru o to tātou oraraa i teie mahana i nià i te tua o te fenua nei, tei haapāpū maitaì mai i te tupuraa o te tahi ārea rahi i roto ia tātou e te Atua, tātou hoì e te fenua, ua manaòhia e tāpeà mai i te tahi parau o tei taiòhia na e tātou i roto i te rururaa òrometua, e te mau rururaa tiàtono/êtarētia a tau matahiti i teie nei. Oia te parau tātarahapa a te nūnaa i te Atua. E te piti, o to tātou fāìraa i to tātou faaroo Māòhi Mau, eiaha nā roto noa i te parau, nā roto atoà i to tātou ora-roa-raa i teie tau no te hinapaarae. Te manaò tumu, ia riro aè hōê parau mau ta tātou i to tātou Atua mai teie atu nei. Ia tauturu mai te parau ia tātou i roto i teie haereà âpī no tātou.

 

3a- Te ôroà a te Fatu e te pure a te Fatu :

 

Aita i faaineinehia mai te tahi papa haamori no te reira i roto i teie tereraa na tātou. Te manaò tumu rā, e vaiho hope te tiàmāraa i te mau pāroita e te mau òrometua no te raveraa i te ôroà.

 

Nā reira atoà no te pure o ta Ietu i haapii i ta na mau pipi. Ia òre tātou ia manaò noa e, e pure teie no tē ôpani i te haamoriraa, tē vai tāâtoà noa ra to tātou tiàmāraa, tiâ rā atu ai.

PAPA HAAMORI

 

HIMENE

 

        E te Atua Nui Tumu Tahi e, te Tumu o te raì e te fenua, te Tumu o to mātou māòhiraa, mai te raì nei, e teitei rahi to na i to te fenua, to mātou atoà ia ātearaa ia òe e i te fenua ta òe i hōroà i te mana no tē haapii ia mātou i tē ora, e no tē arataì ia mātou ia òe ra, ia riro òe ei Atua no mātou, e o mātou te nūnaa ta òe e arataì. I mua i te reo o Ietu e parau ra e : Tei faaroo i te Tamaiti ra, e ora mure òre to na, tei òre i faaroo i te Tamaiti, ua ère ia i te ora, e tei nià te riri o te Atua ia na, tē faahaèhaa nei mātou i mua i to òe Teitei, to òe Tura, e to òe Hanahana, no te mea tē ìte nei mātou e, ua hara mātou ia òe, o mātou i òre i faatupu i to òe hinaaro, ua faariro rā i ta òe òhipa ei vāhi e maitaì ai mātou i nià i to mātou hinaaro taata, o mātou i ruri ê i to òe hanahana ei hanahana no mātou, e aore i haamanaò e, o òe te Atua, e o mātou te tāvini, no te mea no òe te Hau, e te Mana, e te Hanahana e a muri noa atu. 

 

HIMENE

 

        Tē tātarahapa nei mātou i mua i to òe moà, e tē ani haèhaa atu nei ia haamanaò òe i te mau Àito e te mau Tupuna, o rātou i tāvini mai na ia òe e i faahanahana mai na i to òe iòa moà. A ìtiri i te ùputa o to mātou âau, e a faaàraàra i to mātou mata, ia ìte mātou e ia pee i to rātou taìara, ia hanahana atoà e ia teitei to òe iòa ia mātou i teie mahana, i roto i to mātou nūnaa iti, i nià i te fenua ta òe i hō mai no mātou.

 

        Tē tātarahapa nei mātou, mātou e faaìno noa nei i te marae, tei riro no te mau Tupuna ei taura pito e tāamu i te nūnaa ia òe, e te fenua hoì ia òe e te Atua Metua. No te hara i ravehia e te Arii, riro atu ra te Pito ei vāhi hōroà pohe e te tahuà, ei àuaha i te hinaaro tià òre o te arii, ei moihaa faatupu i te riàrià, nā roto i te haavī e te hōroà i te pohe o te nūnaa, inaha to na te toto i manii i nià i te marae. Ua tārahu te mau Tahuà nā roto i te ruri-ê-raa i te tiàturiraa o te nūnaa, ua tārahu atoà rā te nūnaa o ia i tomo i roto i te reira òhipa tià òre no tē faatupu i te maitaì e te pūai o te Arii. Tē tātarahapa nei mātou, te mea to òe hanahana i faarirohia ei faatupu i te hanahana o te taata, tātarahapa atoà rā mātou, o mātou i tūruì i nià i te òhipa tià òre i ravehia e te arii, no tē faaìno i te marae, e no tē faaìno atoà ia òe, ta mātou i faariro ei Atua tāparahi taata. E te Atua Metua e, ua ìte mātou e, teitei noa atu te àre o te moana e tāpoì ia mātou, e òre ta mātou hara e mā. Aita atu mea e mā ai mātou maoti rā, i to òe aroha. Tē tārahapa nei mātou te nūnaa māòhi, mātou i haafaufaa òre i ta òe mau hōroà ia mātou, e aore i haamanaò e, ua faariro òe ia òe, ei fenua no mātou, ei faufaa ora hoì na mātou, a pāpaì roa i te reira i roto i te papa o to mātou âau, ia riro ei haapiiraa vai tāmau e, o òe e te fenua hōê ā ia, o mātou hoì e te fenua hōê ā ia. Tē tātarahapa nei mātou, mātou i ìmi i te moni i nià i te tāpaò no to òe aroha e to òe here ia mātou, mātou e pūhura noa nei i te fenua ta òe i hō mai ei vauvau no mātou e ta mātou hui tama, mai te tau a uìuì mai e a muri noa atu.

       

        Tē tātarahapa nei mātou, mātou i haafaufaa òre e i vahavaha i te reo o ta òe i hō mai no mātou, mātou i manaò e, to mātou hanahana e to mātou tura, tei te tīpeeraa ia i te reo o te nūnaa e haavī noa nei e tē haafaufaa òre noa nei ia mātou. Ua tārahu mātou ia òe, mātou i fārii e i vai iho noa ia faaìno-noa-hia na to mātou reo e te feiā tei òre i here e tei òre i tiàturi ia òe, mātou i araa i te reo faatupu pohe e i taahi i te reo faatupu ora. Faaòre mai i ta mātou tārahu e a aroha mai ia mātou e te Atua Metua e.

 

HIMENE

 

        E te Tumu Nui e, ua hāmani òe ia mātou i te repo o teie fenua, o mātou ia i māòhi ai, nā roto i to mātou fenua, tē haapii mai nei òe ia mātou i te ora. Ua haafaufaa òre rā mātou i te hīroà ta na i faauru i roto ia mātou e aore i fārii i to mātou iho Tumu, e inaha, e hōroà te reira na òe, e tāpaò no to òe aroha e to òe here ia mātou. Tāhiti ê atu i teie teòteò e haapōuri noa nei i to mātou âau, ia ìte mātou e, ia fārii hope roa i to mātou iho Tumu māòhi, to òe iòa ta mātou e faahanahana ra.

 

        Tē tātarahapa nei mātou, o mātou i òre i faaroo ia òe e parau ra e : A hiò i tei au ei māa, a rave a àmu, e ta Ietu hoì i tāpiti i te parauraa e : A rave a àmu, a rave a inu o ta ù tino tenā e o ta ù toto tenā. Ua rahi roa to mātou nounou i te mea o ta òe i hōroà na vētahi ê, no to mātou tāivaraa i te fenua e te vahavaharaa hoì i ta na mau hōroà. Inaha, ua ātea mātou i te fenua, ātea atoà atu ra te ora ia mātou, o mātou ia e roohia-noa-hia nei i te maì, mai tē ìte maitaì i to mātou paruparu e ta mātou rāveà òre. Aroha mai ia mātou e te Tumu Nui e, a tuu mai i te haèhaa i roto i to mātou âau, ia haamanaò mātou i te auraa o te parau no te tanuraa i te pū fenua, i ravehia mai e to mātou mau Tupuna. Faahoì faahou ia mātou i te fenua ra, e ia fānau faahou mātou ei nūnaa tei here ia òe.

 

        Tē tātarahapa nei mātou, o mātou i faariro i te fare pure ei vāhi faahanahanaraa i te taata e to na mau hinaaro tià òre, mātou i hōroà i te manaò hape i nià ia òe, hiòhia atu ai òe ei Atua haavī, te nounou moni, te nounou mana e tē vahavaha i te hīroà māòhi. Ua tārahu mātou ia òe i te mea e, aita to òe mau tāvini i ìmi faahou i te maitaì e te ora o te nūnaa. Ua faariro rā i te nūnaa ei moihaa faatupu i to rātou maitaì e te oraraa fānaò tē òre roa e roaa âhiri aita i tāvini ia òe. E tārahu na te òrometua e te tiàtono, e tārahu atoà rā na te nūnaa tei fārii i taua òhipa tià òre ra. Ua tārahu mātou i te mea, te vāhi haamoriraa ia òe tei riro ei vāhi māuiuiraa i te nūnaa.

 

        Tē tātarahapa nei mātou, mātou i haafaufaa òre e i huna i to mātou māòhiraa i mua ia òe, faahoì mai i te here o teie nūnaa ia na iho, i to na fenua e ia òe te Tumu o to mātou fenua e to mātou Ora. Tari ê atu i ta mātou hara e ta mātou tārahu tuatua rau, tāumi atu i te reira i raro i te moana hohonu, e mai te rāau e faaâpī i to na paa no tē tupu i te rahi, faaâpī atoà òe i to mātou māramarama i ta òe parau, ia riro te reira ei haapii, ei arataì e ei faaôhieraa ia mātou i te hoìraa ia òe ra e te faatupuraa i to òe hinaaro, ia hanahana to òe iòa moà i māòhi nui nei.

 

HIMENE

 

        Haamaitaì mātou ia òe e te Atua Nui Tumu Tahi, fenua no mātou, fenua māòhi no to mātou māòhiraa, reo no ta mātou faateniteniraa, te Iho tumu no to mātou ora, uruaìraa no mātou i roto i te àti e te fifi, Metua faaroo i to mātou reo tātarahapa, monoì tāvai i to mātou mau māuiui. Mai te tamarii i aòhia e to na metua, tē hoì mai nei mātou mā te âau tātarahapa no tē ani ia òe, ia haamahora mai ā òe i to òe rima metua e ia fārii ia mātou i roto i to òe here.

 

        E te Atua Metua e, mai te âara o te hinano e tāhiri i nià i te tua o te fenua, ia tītiri aè te māramarama i to na hau i roto i te reva, ia tītiri atoà mai to òe here i te hau o to òe aroha i nià ia mātou, ia î to mātou âau i to òaòa e ia pee a māhu noa ta mātou ârueraa e ta mātou faahanahanaraa i to òe iòa moà. Ia tōrīrī mai ā ta òe hāmani maitaì i nià i to òe fenua, to òe nūnaa, e ia faateniteni noa mātou i to òe iòa moà e a muri noa atu. Aroha mai ia mātou e te Tumu Nui e, aroha mai ia mātou, aroha mai i to òe nūnaa ta òe i māìti ei nūnaa no òe. Aroha mai. Amene.

   

HIMENE

 

TUMU PARAU RAHI :

Ia ora hau te nūnaa i nià i to na fenua.

Mahana mātāmua : Tāpati 6 no Tetepa 2020 Te oraraa hau o te nūnaa.

 

Mahana mātāmua :

Tāpati 6 no Tetepa 2020

 

Tumu Parau :

Te oraraa hau o te nūnaa.

 

Pehepehe :

 

‘Ahiri òe e ìte na i taù aroha ia òe.’

 

Nō ô mai to ù ora i te Tumu Nui ra.

Tē niinii mai nei te papa nià i tei au i to ù ora.

Tē faatupu noa nei ā te papa raro i to ù ora.

Tē pātuatini noa nei hoì te rahu ia ù i te ora.

Māòhi e, ia ora na i teie mahana.

 

Âhiri òe e ìte na i ta ù aroha ia òe

Eere i tē tāùtu, eere i tē tāvaha 

Na te papa rā o to ù âau Māòhi

E tāhei ia òe i te noànoà o te here Māòhi

Ia puru òe i te hau Māòhi i to oraraa nei.

 

Tē nā ô ra te paari o te mau tupuna e,

E paaìna ôtuì te Aroha i roto i te âau o te taata

Ia òre rā hoì te Aroha e fārerei i te taata

E Aroha faahou ānei te Aroha i reira

Eere ānei i te tii faanehenehehia ra ?

 

Māòhi e, teie te auraa o ta òe Aroha

Tahi : Teie to ù hinaaro ia òe

Piti : Tei roto ê na te ora ia òe

Toru : Eiaha to òe ora ia mure noa i teie nei

Māòhi e, a haere, e ora òe ia nā reira. Ia ora na. 

 

Taiòraa : Mātaio 18, 15 – 20

 

15 E ia hāmani ìno to taeaè ia òe ra, e haere, e faaìte atu ia na i ta na hapa, o ôrua anaè ra ; e i faaroo mai o ia ia òe ra, roaa iho ra to taeaè ia òe ra. 16 Ia òre rā o ia ia faaroo ia òe ra, a arataì atoà atu òe i te hōê e ia toopiti hoì, ia pāpū te mau parau atoà i te vaha o nā ìte toopiti e tootoru ra. 17 E ia òre o ia ia faaroo ia rāua, a faaìte atu i te Êtārētia ; ia òre rā o ia ia faaroo i te Êtārētia ra, ia riro noa atu o ia ia òe mai te Êtene e te terona. 18  Oia mau ta ù e parau atu ia òutou nei, o ta òutou i haamau i raro nei, e haamau-atoà-hia ia i te ao; e ta òutou i tuu i raro nei, e tuu-atoà-hia ia i te ao. 19 E parau faahou atu vau ia òutou, ia faaau e toopiti o òutou i raro nei i ta rāua e ani, e hōroàhia mai ia e taù Metua i te ao ra. 20 I te vāhi e âmui ai e toopiti e tootoru mā to ù nei iòa, tei rotopū atoà ia vau ia rātou i reira.

 

Manaò tātara :

 

Hou aè ra tātou e hiò mai ai i ta tātou parau, a fārii mai i te tāpaò no te aroha o te Atua ia tātou i teie mahana haamoriraa na tātou, e te ìriti-atoà-raa i te hepetoma pure no te Matahiti Etārētia, ei haamanaòraa i te mahana a rave ai tātou i te tiàmāraa no te faatereraa ia tātou iho, i te mahana mātāmua no Tetepa 1963 (01 Tetepa 1963). E mahana faaìteraa i te faatereraa o te fenua i te tiàraa âpī o te Etārētia. E mahana faaìteraa i te hau Farāni i roto i to na mahana mau. E mahana haapāpūraa na te Etārētia i te paari o to na faaroo e te faufaa no to na māìtiraahia e te Atua. Ia haamaitaìhia te Atua no te reira.

 

Te ora hau o te nūnaa. Oia ia, o vai ia nūnaa i te ao nei, eita e hinaaro ia hau noa to na oraraa i te mau mahana atoà. Ia hiòhia àti tià aè te ao nei, aita e vāhi e aita e àti huru au aè o te mau nūnaa i tē rave a te mau hau rarahi no to rātou nounou i te faufaa a terā mau nūnaa riirii e te nounou atoà i te mana faatere i teie nei ao. Te tumu ia no teie mau tamaì rahi, te oè, te haapoheraa e te tūmāraa nūnaa e tupu nei i te ao nei.

 

A òaòa tātou i te mea e, aita terā mau huru tupuraa òhipa e ìtehia nei iō tātou nei. Teie rā, eere no te mea aita te reira mau àti iō tātou e parau ai tātou e, tē ora hau noa ra tātou. Ia hiòhia te ûànaraa te tupuraa o te ìno, te pohe o to tātou nūnaa i teie taèro âtōmī, te tupuraa o te parau tià òre, te ārea rahi e vai nei i roto i te feiā moni e te feiā veve, te ûànaraa te mau ùtuāfare e ôvere nei na Papeete, te âmahamaharaa te mau ôpū fētii i mua i te faufaa tupuna, te èreraa te taata i te òhipa, te îraa to tātou fenua i te rātere, te haafaufaa-òre-raahia  to tātou turaraa nūnaa Māòhi, te maraaraa te hoo o te oraraa, te maì tirotiro 19, e tē vai atu ā. E tano ānei e parau e, tē ora hau ra te nūnaa ?

 

Mea tano paha tātou ia ui e, e aha te ôtia aore ra te faīto e tano ai tātou e parau e, te ora hau o te nūnaa ?

 

Te mea pāpū, te hau, e tupuraa te reira no te hinaaro o te Atua no to na aroha rahi i te taata : ‘Ahiri òe e ìte na i toù aroha ia òe.’ Ia hiò tātou i te fāìraa a te Tenete 1-2 : I muri aè i to te Atua rahuraa i te mau mea atoà, ua tuu atu ra te Atua i te taata i roto i te faaàpu ma te parau atu ia rāua e : A hiò tē au ei māa, a rave a àmu. Te ora hau ia ta te Atua i hinaaro no te taata. Te auraa, no tātou i teie mahana, te tupuraa, aore te fāito e tano ai tātou e parau ai e, te ora hau o te nūnaa, te mahana ia e tavevo faahou ai teie reo to te Atua : A hiò tē au ei māa, a rave a àmu. E te reira hoì reo to te Atua, ua ìte mai ia to tātou mau Tupuna i te roto i ta rātou parauraa e : E tanu òe, ia noaa atoà ta te tahi ôotiraa. Oia, e tanu òe, e tanu vau, e tanu tātou pāatoà, eere teie te parau no te rima tārere. Te auraa, te mea aita ta ù e haere atu ia vau ia òe ra ; te mea aita ta òe e haere mai ia òe ia ù ra. Te auraa, ia hotu ùmu faahou ia te fenua e tià ai, e reira noa te hau e hoì mai ai i nià i te fenua.

 

I roto i nā parau i reira te paparaahia ta tātou parau no teie mahana, te pehepehe e te faahitiraa a Mātaio 18, 15-20, e piti parau e haapāpū no te oraraa hau o te nūnaa : A tahi, ia paò te aroha i roto i te âau, eiaha ra tei te ùtu noa. E te piti, ia riro te Atua ei papa no to tātou fārereiraa : ‘I te vāhi e âmui ai e toopiti e tootoru mā to ù nei iòa, tei rotopū atoà ia vau ia rātou i reira.’ (Mātaio 18,20). I te reo o te mau Tupuna : ‘E tere pure e tae ai i ô, mai te peu e tere ê, eita te Atua e vare.’ Te auraa, te mea e anihia ra ia tātou, e tāmā ia tātou.

 

Te ora hau o te nūnaa, ia tià mā atu ia o ia i mua i te Atua. Te auraa, te taime e fārii faahou ai te nūnaa e tupuraa o ia no te hinaaro o te Atua i Māòhi Nui nei, i reira noa te hau e hoì mai ai i roto i to na oraraa. Ia au te reo o te Apotarupo 22,5 : Eita hoì e âruìhia i reira, e òre hoì e mōrīhia, e te māramarama mahana, no te mea, o te Fatu ra, o te Atua to rātou māramarama, e e hau ā to rātou e a muri noa atu.

 

Ia itoito i roto i te tāviniraa. Ia ora na.

 

Pure :

 

Mai te teatea e te noànoà hau ê o te tiare maurua to òe iòa e te Tumu Nui, to mātou Atua, to mātou haapūraa, e to mātou ora. Te Atua herehia e to mātou mau Tupuna, te tiare i putuhia e to rātou rima metua i te monoì maitaì roa ra, tei tāhiri noa te noànoà mai te vao àara o te tau a uìuì mai, te monoì i tāmarū i to rātou mau māuiui, e tei hōroà ia rātou i te ièiè o te taata tei ìte e, ua tāheia o ia e te here Atua.

Piti o te pō : Monirē 07 no Tetepa 2020 Te fenua ei metua vahine no te hau.

 

Piti o te pō :

Monirē 07 no Tetepa 2020

 

Tumu parau :

Te fenua ei metua vahine no te hau.

 

Pehepehe :

 

IA ORA, E AÙ NŪNAA ITI

 

Ua reva ê na te parau :
Tīreo te pō, e reo ia no te Atua
I te Māòhi e, ua ô vahinea te fenua
 tīrē i te moe, a ôtānehia o ia
I to rima tārere noa.

 

Ua reva atoà na te ôrero
A te mau rūàu i revareva na :
Pātia te rima i roto i te fenua
Ia hauà faahou òe
E te Māòhi i te noànoà o te ora.

 

Ta ù faaàpu, to ù ia àpu
Te àpu o to ù mau tupuna
Te àpu o to ù parau, to ù reo
Te àpu o to ù hīroà tumu
Ta ù faaàpu, te àpu ia o to ù ora

 

Māòhi, ia òre òe ia faaàpu
Ua faaea àpu òre noa òe
 tīrē i tē tiàturi i te àpu punu
E tūtae âuri te hopeà
 tīrē atoà i tē nā roto i te àpu ûrina

A pohe òe i te maì tapahi
Ia Ora e aù nūnaa iti.

Haut du formulaire

 

Taiòraa : 2 Tōrīnētia 1, 1 - 11

 

E PARAU HAAMAHANAHANA I TE FEIA FAAROO IA ROOHIA E TE ATI RA.

1 Pauro, e àpotetoro na Ietu Metia i te hinaaro o te Atua ra, e taù taeaè nei o Timoteo, i te êtārētia o te Atua i Torinetia na, e te feiā moà atoà i Ahaia atoà ra; 2 ei ia òutou te aroha mau e te hau no ô mai i te Atua i to tātou Metua ra, e no te Fatu hoì no Ietu Metia.

3 Ia haamaitaìhia te Atua, te Metua o to tātou Fatu ra o Ietu Metia, te tumu o te aroha, e o te Atua, no na anaè te māhanahana ; 4 o tei haamāhanahana mai ia mātou i to mātou mau pohe atoà nei, ia tià ia mātou ia haamāhanahana i te feiā i roohia i te pohe ra, i te māhanahana a te Atua i māhanahana ai mātou iho nei. 5 Mai to mātou hoì pohe i te Metia e rahi nei, tē rahi atoà nei to mātou māhanahana i te Metia. 6 E ia pohe mātou nei, ei māhanahana ia e ei ora no òutou, o tei tupu i te faaòromaì-māite-raa i taua mau pohe i pohe atoà ai mātou nei ; e ia haamāhanahanahia mai mātou, ei māhanahana ia e ei ora no òutou. 7 E tē pāpū nei to mātou manaò ia òutou, ua ìte mātou, e rave atoà òutou i te māhanahana, o òutou i rave atoà i te pohe nei. 8 Aita hoì mātou i hinaaro, e te mau taeaè, e ia òre òutou ia ìte i to mātou pohe a roohia mai ai mātou i Àtia ra, e i nēìa-hua-hia mātou, aita atu ra o mātou pūai, e aita roa mātou i manaò e, e ora. 9 E manaò pohe to mātou i roto ia mātou iho, ia òre mātou ia tiàturi ia mātou iho, i te Atua ra i tei faatià i tei pohe ra. 10 O tei faaora ia mātou i taua pohe rahi ra, e tē faaora noa nei ā hoì ; o ta mātou hoì e tiàturi nei e na na e faaora ia mātou. 11 O òutou hoì i te òhipa-atoà-raa i tē pure ia mātou, ia haamaitaì te taata atoà e rave rahi i te Atua ia mātou, i te maitaì i noaa ia mātou i te taata atoà e rave rahi ra.

 

 

 

Manaò tātara :

 

A fārii mai i te tāpaò no te aroha o te Atua i to tātou fārereiraa i teie ahiahi. Ta tātou tumu parau : Te fenua ei metua vahine no te hau.

 

Eere a tahi ra tātou a faaroo ai i teie parau no te fenua ei metua vahine. E parau teie, ua hau te toru àhuru matahiti i teie nei i tē pororaahia, nā roto i te mau haapiiraa a te Tomite Rautī Pīpīria a ta tātou Etārētia. Noa atu ā rā terā rahiraa parau i haapiihia, ua ìtehia to tātou tauà-òre-raa, to tātou vahavaharaa, to tātou tūàti-òre-raa i te reira mau haapiiraa e to tātou haamereraa i to tātou Māòhiraa. E na te maì tirotiro 19 i tupu i roto i teie nei ao e i te fenua, i faaàraàra i to tātou mata i te ìteraa i te faufaa o te fenua e te tanu. Aita terā huru to tātou i ātea roa i te huru o terā tamaiti i haere i te fenua roa (Ruta 15, 11-32), na te puaa i faaiho faahou i roto ia na i te oraraa hau e te maitaì o te fare metua, to na ia hoìraa.

 

Ua hiò te Māòhi i te fenua mai to na metua vahine te huru, e o na iho te tamarii. Ia vai noa mai to tātou metua vahine, eita ia tātou e ôtare, eita hoì e ôere. Ia òre to tātou metua vahine ia riro faahou ei teòteòraa no tātou, ia haamata tātou i tē hoo pātē, ia taui hoì i te reira i te tauihaa, e hanahana faahou ānei to te fenua, oia to tātou metua vahine, i reira. Mea tano tātou, nā roto i te parau o te fenua, ia ìte faahou i te auraa o te parau o te here metua, te here o te tamarii i to na metua. E auraa faahou ānei to te reira huru parau no tātou i teie mahana ?

 

Ia mutu te taura tāàmu ia tātou i te fenua, aore ra, ia tāpū tātou i te reira, e tāàmuraa faahou ānei to tātou i teie metua ; e ìte faahou ānei tātou i te faufaa o te maitaì ta na e hōroà noa mai nei ; e teie mau tamarii, e parau noa nei ia na e metua vahine no rātou, e mau taeaè e mau tuahine anaè tātou na na. I roto i te parau o te fenua, te tāatoàraa o to tātou oraraa ta tātou e faahaùti nei. Ia òre tātou ia ìte faahou i te here i to tātou fenua, e ìte ānei tātou i te auraa o te here o te Atua ta tātou i parau e, e Atua Metua, oia te Atua i rahu i te fenua tei riro ei vauvau no tātou.

 

No te fenua te Māòhi i Māòhi ai ; no te fenua òre te Māòhi e riro ai ei hutu pāinu iō na iho. No te Atua Metua te Māòhi i fānaò ai i te ora, te hau e te mau maitaì atoà ta na i haamata i tē haapae ; no te haafaufaa òre i te Atua, te Māòhi e topa roa atu ai i roto i te ìno. Ia riro te parau o te here ei haapii, ei haamanaò ia tātou e, to tātou Metua i te raì, tē ara noa ra i nià ia tātou, e tē tīaì noa ra i to tātou reo pii ia na : E te Atua Metua e, faaora mai ia mātou ta òe mau tamarii nei, tē hoì atu nei mātou ia òe ra, ia raa to òe iòa, e ia tupu to òe hanahana i nià i te fenua nei, i mua i te aro o to te ao atoà nei.

 

E aha atu ā te mea e au ia tātou ia rave maoti, te tāvini-mau-raa i to tātou Atua nā roto i te parau tià e te haavare òre. Mai te reo ta Pauro e faahiti ra : Ia àti maīte òutou mā te âau hōê e te manaò hōê i nià i to tātou Fatu. Ia ora e ta ù nūnaa.

 

Pure :

 

Te Atua i te raì tuatinitini e, ei tāpaò no to òe here mutu òre e tē vai tāmau, ua faahei òe i te fenua ta òe i rahu ei vauvau no mātou i te hinano tūatau tei faahau i te ùuru o te moana hāuriuri. Ua faaî òe i to mātou mau fenua rii i ta òe Faufaa ora e tē ani noa nei òe ia mātou ia hiò i tei au ei māa, ia rave hoì e ia àmu no te mea o te tāpaò ia o to òe aroha e to òe here.

 

Toru o te pō : Mahana piti 08 no Tetepa 2020 Te Māòhi, ei faufaa no te fenua.

 

Toru o te pō :

Mahana piti 08 no Tetepa 2020

 

Tumu parau :

Te Māòhi, ei faufaa no te fenua.

 

Pehepehe :

 

A mau, a mau tūtūaau i to faaroo Māòhi mau.

 

E to ù nūnaa iti e, no òe te parau i mua ra
No òe faahou te parau inanahi atu ra
No òe ā te parau i teie mahana
E parauhia atu ā to òe ananahi e ananahi atu
Taua parau iti noa nei ā : Faahotu ia òe

 

Tāhōêraa, ua pūrara huàhuà roa te nūnaa Māòhi
Tāvini, ua tāvere-hānoa-noa-hia te nūnaa Māòhi
Tāpura âmui, aita ia te nūnaa e rāveà e pura mai ai
Rautahi, ua ôtahi te hotupāinu i Māòhi Nui nei
Taua parau iti noa nei ā : Haamaitaì ia òe

 

To ù nūnaa iti e, ua reva ê na te parau
E vare hānoa te tupa i te paa tāporo
Òhipa na te tāatoà, oraraa hau to òe
Te feiā âpī, ia maitaì to rātou oraraa ananahi
Taua parau iti noa nei ā : Faaora ia òe

 

E to ù nūnaa iti e, e fenua hotu ihoā to òe
E nūnaa maitaì roa òe i te mau nūnaa atoà
Âhiri òe i hinaaro, e ora noa ihoā òe ia òe iho
Mai te pāhaapiti mau ā te parau a teie feiā
E haavare noa ra ia òe mai te tau e te tau

 

E tura rahi to òe e aù nūnaa iti
E mana rahi to òe e te nūnaa Māòhi
A tātua i te paari o to mau tupuna
E a hiò i to mouà, te hanahana ia o to fenua
A mau, a mau tūtūaau i to faaroo Māòhi mau
Ia ora òe e a tau a hiti noa atu.

 

Taiòraa : 2 Tōrīnētia 1, 12-24

 

12 Teie hoì to mātou òaòaraa, te ìte o to mātou âau, e ma te rōtahi o te âau e te haavare òre i te Atua, eere to te paari o te tino, no te maitaì rā a te Atua, ta mātou haapaòraa i teie nei ao, e e rahi atu ā ia òutou. 13 Aita hoì a mātou parau èê ia pāpaì atu ia òutou na, o ta òutou ā hoì e taiò na, e ta òutou i faatià na; e tē manaò nei au e faatià ia òutou e tae noa atu i te hopeà ra : 14 ua faatià e tahi pae o òutou ia mātou nei, e o mātou hoì to òutou òaòaraa, mai ia òutou atoà hoì e riro ei òaòaraa no mātou tae i te mahana o te Fatu ra o Ietu. 15 E no taua ìte nei i hinaaro ai au i tē haere atu ia òutou na i mūtaa iho, ia tāpiti atu i to òutou maitaì ; 16 e ia nā ô na atu vau ia òutou i tē haere i Matetonia, e mai Matetonia, ia hoì mai ā ia òutou na, e ia arataìhia vau e òutou i taù tere i Iutea ra. 17 E taua ôpuaraa hoì na ù ra, e parau māmā ānei ta ù ? e te mau mea ta ù e ôpua nei, i ôpua ānei au i tei au i te tino ra, a riro ai ta ù ei òia, òia, e aore, aore ? 18 E parau mau rā ta te Atua ra, eere ia ta mātou parau i parau atu ia òutou na i te òia e te aore. 19 Aore hoì te Tamaiti a te Atua ra, o Ietu Metia, i parau-haere-hia e mātou, o vau e Tiruano e Timoteo i ô òutou na, i te òia e te aore, tei ia na rā te òia. 20 Te mau mea atoà a te Atua i parau mai, e òia anaè ia i roto ia na, e Amene hoì i roto ia na, ia maitaì te Atua ia mātou nei. 21 O te Atua hoì tei haapāpū ia mātou e ia òutou atoà i roto i te Metia ra, e o tei faatāhinu hoì ia tātou nei: 22 o ia hoì tei tāpaò mai ia tātou, e ua hōroà mai i te tārahu ra i te Vārua i roto i to tātou âau. 23 E teie nei, e parau atu vau i te Atua ei ìte i taù vārua nei, e i faaherehere au ia òutou i òre au i tae vave atu ai i Tōrīnētia na. 24 Eere rā mai te mea e, o mātou te fatu o to òutou faaroo, ei tauturu rā mātou i to òutou òaòa ; e mau faaroo hoì to òutou.

 

Manaò tātara :

 

Ia Nui te Aroha o te Atua no teie fārereiraa to tātou. I mua i te tumu parau ta tātou e hiò nei i teie mahana, tē haamanaò noa mai ra ia to òe faufaa rahi e te Māòhi i mua i te mata o te Atua. Ua riro òe ei ôriò mata e ei pū tarià no te Atua i te mau mahana atoà. Te fifi rā hoì i teie mahana, to òe ia tāivaraa i to Atua e te vareraa i te ora a verā mā, tei huri taère e tei âhure roa i to òe hīroà. Aita òe i mau pāpū i to òe tiàraa nūnaa māìtihia e te Atua. Ua tiàturi òe e, te ìteraa òe i te reo farāni, ua farāni ia òe ; te ìteraa òe i tē faahoro i te pereòo, ua farāni òe ; tē àmuraa òe i te māa ia te patia e te punu tāipu, ua farāni òe. Tē ôomoraa òe i te tīteà mata, ua farāni òe. A tae hoì e, tē nā ô ra paì te tahi parau paari a te Afirita : ‘Tūtau noa atu ā òe i te hōê tumu rāau i roto i te tahora pape e hia mirioni matahiti, eita ihoā o na e riro mai ei moo taehae.’ Te auraa, taui noa atu ā òe i te àpu, e Māòhi noa ihoā òe.

 

Te reo ia o Pauro i roto i ta tātou parau i teie pō, rave ìno noa mai ā te Ati-Iuta ia ù, eita ihoā to ù tiàturiraa i ta ù Fatu e taui ; e tāmau noa ā vau i tē rave i te òhipa ta te Fatu i faaue ia ù i tē rave. Te reo ia o te pehepehe e nā ô ra e, A mau, a mau tūtūaau i to faaroo Māòhi mau. Te faaroo papahia i nià i te parau no te here e te aroha. Te faufaa ta te Atua Tumu Nui i hōroà ia òe, i faufaahia òe i te fenua nei.

 

E aha anaè atu ā te mea ta òe e tītau ra ? A haamanaò e te Māòhi, ua hāmani te Atua ia òe i te repo no teie fenua, ua pūhi i te mataì no te ora e te here i roto ia òe, ia riro òe ei nūnaa ora e te here. A ara ia òe i te ôfī o te nounou e te teòteò e haamoè ra i to òe hīroà, ia hoo òe i te fenua no te mā marau noa, oia hoì te moni e te mau mea mātēria. Mai te peu no te fenua òe i Māòhi ai e no te mau maitaì ta te Atua i tuu i roto ia na i fānaò ai òe i te ora. Eiaha e haafaufaa òre i te fenua, a topa òe i roto i te àti rahi. E te Māòhi e, a haamanaò i to huaai no ananahi, a riro te reira ei hara na òe i mua i te Atua. A rohi e a faaitoito anaè tātou. Ia Atua ā te Atua, Ia fenua ā te fenua, Ia taata ā te taata, Ia mau te pito o te here, ua maitaì roa ia. Ia ora na.

 

 

 

 

Pure :

 

Ârue, haamaitaì mātou ia òe no ta òe ôpuaraa tei riro to mātou māòhiraa ei tupuraa, e ta òe i hinaaro ei huru e ei hohoà atoà aè no òe i nià i te fenua nei. Te reo māòhi ta òe i hō mai no mātou, te tāviri ia e mātara ai to mātou parau, e te êà e tae ai mātou i roto i te ìteraa i to òe hinaaro ia mātou nei. Ua faataoà òe ia mātou i te taoà tei hau roa i te maitaì i mua i to òe aro, oia oia te aroha e te here, tei riro ta òe rahu ei tupuraa hanahana roa. Ta mātou peu tumu, ta mātou ùpaùpa, e ta mātou mau pehe ta te paari o te fenua i faauru i roto ia mātou nei e tei poiherehia mai e te mau Tupuna, ta mātou ia e hinaaro nei e pūpū ei faateniteniraa i to òe iòa e te Tumu Nui.

 

Maha o te pō : Mahana toru 09 no Tetepa 2020 Te faufaa ora a te Atua i Māòhi Nui nei.

 

Maha o te pō :

Mahana toru 09 no Tetepa 2020

 

Tumu parau :

Te faufaa ora a te Atua i Māòhi Nui nei.

 

Pehepehe :

 

Hui e, hui e, hui ā.

 

Tē nā ô ra paì te parauraa e,

E tau to te mau mea atoà.

E tau to te hui àito, ei te Atua ra rātou

E tau to te hui tupuna, no te Atua hoì rātou

E hui faaroo ānaè rātou na te Tumu Nui ra

 

E tau to te hui arii, e faainaina Atua anaè ia

A puta aè âvae i nià i te fenua,

Ua moà ia fenua no te Hui Arii

Aore e ō e tae faahou ia Taaroa Nui ra

Inaha, ua moà te mau mea atoà na te Hui Arii

 

E aha atu ra to òe tau e te nūnaa.

Inaha, e tau teie no te huiraatira

Oia te mau raatira e faatere nei ia òe

Tei nià, e tei mua roa rātou, tei raro e tei muri roa òe,

E ua viriô roa òe i ta rātou āratōraa.

 

Haamanaò noa na òe i te māa ùru

Te mau o te ùru, to na ia hiàta e to na hune

Tē ìte ra ānei to mata i te hune o te ùru

E parau ānei to te ùru i rāpae àu mai i te hune

A tae ai rā hoì òe, no òe i parauhia ai to te raatira

 

Te nūnaa, tei ia òe na te mana o te hune

E manahune òe, â tīrē na i tē hōroà

I te rāau i te huiraatira ra, ia mamae noa òe

 tīrē i tē huna i to òe mana

Eere ānei e, ei ia òe ānaè na e mau ai te rahu a Taaroa.

 

Taiòraa : 2 Tōrīnētia 2, 1-11

 

1 I faaau rā vau i ta ù parau, e eiaha vau e haere faahou atu ia òutou na ma te òto. 2 Ia faaòto atu hoì au ia òutou ra, nā vai hoì e faaòaòa mai ia ù, ia òre tei faaòtohia atu e au ra ? 3 No reira vau i pāpaì atu ai i te parau ia òutou, e ia tae atu vau ra ia òre au ia òto i te feiā e au ia rātou ia faaòaòa mai ia ù ra ; ua ìte hoì au ia òutou atoà na, e o ta ù e òaòa ra o ta òutou atoà ia òaòa. 4 I pāpaì hoì au i te parau ia òutou ma te pohe rahi e te māuiui rahi âau, e ma te roimata rahi hoì ; eere rā e ei faaòtoraa atu ia òutou, ia ìte rā òutou i te rahi o to ù nei aroha ia òutou na. 5 E ua faatupu te hōê taata i te òto ra, eere o vau anaè ta na i faaòto ra, o te tahi pae atoà o òutou na ; eiaha hoì au ia pari pāatoà ia òutou. 6 Â tīrā na taua pohe i tuuhia atu e te taata e rave rahi i taua taata ra. 7 E i teie nei, e faaòre atu òutou i ta na hara, e e haamāhanahana atu e tià ai, o tē horomii-noa-hia taua taata ra e te òto rahi. 8 E i teie nei, teie ta ù parau ia òutou, e faaìte pāpū atu òutou i to òutou aroha ia na. 9 I pāpaì atu ai hoì au i te parau ia òutou, ia ìte au i to òutou faaroo i te mau parau atoà nei. 10 O ta òutou e faaòre i te hara ra, e faaòre atoà hoì au ; e i faaòre na vau i te hara ra, o ta ù i faaòre ra, no òutou ia i faaòre ai au i te iòa o te Metia nei ; 11 o tē noaa mai hoì ta Tātani vāhi ia tātou ; eere hoì tātou i tē ìte òre i ta na mau rāveà.

 

Manaò tātara :

 

Ia òre tātou ia ìte, te ùru, te haari, te māito, te tarao, te fenua, te moana e to rātou mau î atoà, oia hoì o Māòhi nui tāatoà, o te parau àro ia a te Atua i te Māòhi, tē riro nei ia tātou mai te hui tāvana o teie nei ao, mai te feiā paari e tē ìte i tei huna-ê-hia ia rātou, i te parau àro a te Atua. O te parau paari atoà ia ta Pauro e tāmata nei i tē tūrama i te mau taeaè i te faaroo no Tōrīnētia. Te parau paari ta te Metia ra Ietu i haapii na, i aò na, e i faaora te taata nā roto i te mana o te Parau a te Atua. Ta te feiā paari ia e tē ìte, e ta te hui tāvana o teie nei ao e vahavaha e e tāhitohito nei i te reira.

 

No te mea, no rātou, te rahiraa òhipa ta te Fatu ra Ietu i rave na, aita te reira i riro ei ôpuaraaa faaora na te Tumu Nui i te nūnaa. E aita atoà te reira i riro ei Parau na te Atua i te taata. Ua ìte hoì tātou, ta te paari o te taata e faatupu mai, e fifi ia o te taata o teie nei ao. No te mea, ua papa rātou i to rātou tiàturiraa i nià i te paari o te taata, te paari o teie nei ao.

 

Âreà te mau mea atoà ta te Tumu Nui i hō noa mai na ia tātou, tē mau atoà anaè ra rātou i te parau paari a te Atua iho no te mea, o te Atua iho te reira. Tē fifi noa rā te taata, o te òreraa ia e tiàturi i te reira. Te mea ia i ìtehia i te tau o Ietu iho. Aita te feiā paari o te Âti-Iuta, e te mau arataì faaroo o te reira tau, i fārii iti noa aè e, no ô mai te paari a te Fatu i te Atua Metua ra. Te mea ia Pauro i faahiti ai ia rātou i te huru no te paari o te Parau a te Atua o ta na iho i haapii, i aò na ia rātou. Oia hoì, aita e faataaraa i te fāito o te taata, te hui arii e te nūnaa, te manahune e te raatira, te taata rii e te taoà, te taata tiàraa e te taata aore e tiàraa, te taata rā tei fārii i tē tomo i roto i te Parau a te Atua, i reira o ia e ìte ai te parau àro, oia hoì te parau paari a te Tumu Nui.

 

Te nūnaa Māòhi, tei roto roa òe i te tau no te hinapaarae. Haamanaò noa òe i te rauère rāau ia faaruè i te âmaa. Na te puhihau ê o te mataì e arataì noa na i to na toparaa i nià i te fenua. Mai te reira atoà te parau no to tātou oraraa i roto i te tau no te hinapaarae, vaiho e na te mana e te māramarama o te parau a te Atua e amoamo, e tuutuu i to tātou mau âvae rii i te vāhi o ta na i faaoti i reira to tātou toparaa âvae e puta atu ai.

 

No reira, te faufaa ora a te Atua, mai te raì, te fenua, te moana e to rātou mau î atoà, o te parau àro e te parau paari ia a te Tumu Nui. Terā ia ta tātou e fānaò noa nei nā roto i to tātou metua vahine faatupu ora o Māòhi Nui. Te papa ia no te ora o te nūnaa Māòhi, te faufaa ora ia a te Tumu Nui i te Māòhi. Tae noa atoà atu te reo tumu, peu tumu, te hīroà tumu, te iho tumu, te tāâtoàraa o to tātou parau, Māòhi, o te faufaa ora te reira a te Tumu nui i Māòhi Nui nei. E te ora o te Māòhi, teie noa nei i ô nei, aita to rāpae, aita to te ātea ê, tei to tātou Metua vahine faaatupu ora te fenua ra o ''Māòhi Nui", te faufaa ora ia a te Tumu Nui i te Māòhi.

 

Ia Atua te Atua, Ia fenua te fenua, Ia Māòhi te Māòhi, Ua maitaì roa ia.

 

 

Pure :

 

E te Parau i ìriti i te ùputa o te māramarama e te ora, te Atua i te raì hamama noa, tē nānā atu nei to mātou mata òaòa e to mātou âau mēhara, te mea òe i faaâpī i to òe aroha e to òe here ia mātou nā roto ia Ietu Metia, te Parau i riro mai ei taata. I roto i to òe moà, to òe mana, e to òe hanahana ôtià òre, aore òe i vahavaha i te fānauraa pūfenua o te taata nei no te tonoraa mai i ta òe Tamaiti i roto ia mātou nei, e ua tae roa o ia i te parauraa ia na e Tamaiti na te taata. Mai ta òe hoì i faaìte mai i te matahurahura o teie nei ao, ua faaìte atoà o ia i te êà o te ora nā roto i te raveraa i te hotu o te fenua, i te parauraa e : A rave a àmu, o taù tino tenā ; a rave a inu, o taù toto tenā. Te ora o te taata, tei te fāriiraa ia i to òe here ta te hotu o te fenua e ta te Tamaiti e faaìte ra.