Märeto 6, 30-34 Nana

 

Tāpati 18 no Tiurai 2021.

Nana.

Taramo 23.

Te fare.

1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra,  te arataì nei o ia ia ù nä pïhaì iho i te pape atatià ra. 3 E faahoì o ia i ta ù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù: to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o ta ù mau ènemi; ua faatävai òe i ta ù upoo; e te î nei ta ù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

Ieremia 23.1-6

Te nana.

1 E te mau tiaì, e tei täparahi e ua haapurara i te mau mämoe ta ù i faaàmu nei, të nä reira mai ra te Fatu 2 Te nä ô mai ra te Atua o Ìteraèra, o te Fatu, i te mau faaàmu tei faaàmu i to ù ra mau taata, ua haapurara i ta ù ra mau nana, e ua tiahi-ê-hia e òutou, e aore òutou i tiaì noa atu ia rätou; inaha, teie au a tähoo atu ia òutou i te ìno ta òutou i rave të nä reira mai ra te Fatu. 3 E haaputu mai rä vau i te toeà o ta ù nana, i te mau fenua atoà i tïahihia atu ai rätou e au ra, e faahoì mai au ia rätou i ta rätou iho ra âua, e riro rätou i te tupu e rahi noa atu ra. 4 E tuu hoì au i te tiaì i nià iho ia rätou, ei faaàmu ia rätou ra. E òre atu ra rätou e mataù faahou, e òre e horuhoru, e òre hoì rätou e nä reira-faahou-hia te parau mai ra te Fatu. 5 Te nä ô mai ra te Fatu inaha, te fätata mai ra te tau, e faatupu ai au i te tahi âmaa parau tià no Tävita, e riro hoì te hoê taata ei arii e te haapaò i te parau maitaì, e te faatupu hoì i te parau au e te parau tià i te fenua nei. 6 Ia tae i to na ra tau, e ora ia Iüta, e pärahi noa hoì Ìteraèra mä te ora; e teie hoì te iòa e maìrihia nö na: O te Fatu ta tätou parau tià ra.

Èfetia 2.13-18

Värua hoê.

13 I teie nei rä, i te Metia nei ia Ietu, o òutou o te feiä i te ätea ê i mütaa iho ra, ua haafätatahia mai ia i te toto o te Metia nei. 14 Oia hoì to tätou hau o tei faariro ia tätou ei hoê, e ua huri hoì i raro i te patu faataa ê i röpü ra. 15 Ua oti hoì i te faaòrehia te au òre i to na iho ra tino, oia te ture parau faaue no te mau ôroà ra, ia riro taua piti ra ei taata âpï hoê ia na iho, a hau atu ai ra: 16 e ei faafäite ia räua atoà i te âmuiraa hoê i te Atua, i te tätauro ra, o te au òre i faaòrehia i te reira. 17 E ua haere mai ra hoì, ua aò haere i te Parau Maitaì ra o te hau ia òutou i to te ätea ê ra, e ia rätou hoì tei fätata. 18 No na hoì tätou atoà nei e ö atu ai i te Värua hoê i te Metua ra.

Māreto 6.30-34.

Pähonoraa.

(Mät 14,13-21; Ruta èv 9,10-17; Ioane 6,1-14)

30 E putuputu mai ra te mau âpotetoro ra, ua faaìte mai ra ia Ietu i ta rätou i rave, e ta rätou i haapii ra. 31 Ua parau atu ra o ia ia rätou: A haere mai òutou anaè iho, tätou i te hoê vähi moèmoè e faaea iti noa aè. Aita hoì o rätou e taime no te tämäa i te rahi o te taata i te haereà mai e te haereraa atu. 32 Hoe huna atu ra rätou nä nià i te poti i te tahi vähi moèmoè. 33 Ua ìte rä te taata ia rätou i te fanoraa, e rave rahi hoì tei ìte e o vai rätou , e ua horo atu ra nä uta mai roto atu i te mau ôire atoà, e ua tae na mua ia rätou. 34 E tei te täpaeraa atu Ietu ra, hiò atu ra o ia i taua feiä rahi ra, aroha atu ra ia rätou, no te mea mai te nana mämoe tiaì òre ra rätou. Haapii atu ra o ia ia rätou i te parau e rave rahi.

Manaò.

Ua päpü maitaì e, ia òre ia maitaì te òhipa i faauehia i te tahi, e taui te manaò o te metua, e faaue o ia i te tahi tamarii ê atu. Te huru ta tätou e ìte pinepine nei, te òaòa ia o te tamarii tei òre i topa mai te faaueraa a te metua i nià ia na, e te faatautau o te tamarii ta te metua i faaue i te òhipa.

Areà te parauraa e, ua tuu te Atua i to na Värua i nià ia na, eere no te mea eita te Värua o te Atua e au i te tahi pae, e nä ô rä tätou e, ua märamarama maitaì o ia i te mea ta te Atua e hinaaro ra ia na, e te reira atoà te mea e arataì ra ia na i roto i te òhipa ta na e rave atu. Ia haamata tätou i te manaò e, ua î te taata i mäìtihia i te Värua o te Atua, e òhie tätou i te manaò e, te Atua iho terä e òhipa ra i roto i te reira taata. Te auraa, na teie ihoä taata e haere, to na ihoä te âvae e taahi i nià i te repo, aore ra to na iho te âvae e puta i te ôfaì, na te märamarama rä o te parau e faaòhie ia na i to na mau tuuraa âvae atoà. Eere no te mea ua mäìtihia te tahi taata no te rave i te tahi òhipa, i riro ai te mau mea atoà ei mea òhie no na, i mänina noa ai hoì to na èà, to na noa vähi hau, eiaha rä ia, to na rä vähi taa ê, te tiàturiraa ia ta te Atua i tuu i nià ia na.

 

Ia au i te mea ta tätou i mätau, no te maitaì o te òhipa i ravehia e te tahi i mauruüru ai tätou ia na. Ua parau mai na ihoä tätou e, ia taiò tätou i te parau mai teie te huru, e òiòi rii to tätou manaò i te horo i nià ia Ietu, eita atoà rä tätou e tano e huna e, i roto i te tupuraa o te òhipa, te vai ra te mea e haamanaò mai i te parau o Ietu. Ia hiò tätou i te faanahoraa o te mau ìrava, òre noa atu ai i parau-roa-hia, ia parau mai ai te Atua e, ua mauruüru roa vau ia na, e òhipa ta Ietu i rave, e no te maitaì o te òhipa i ravehia, òre noa atu ai tätou e ìte ra i te òhipa ta na i rave, inaha mea haere mai o ia ia päpetitohia o ia, i mauruüru ai te Atua ia na. I ô nei, aita te manaò i nià i te tahi òhipa i ravehia e te tävini, tei nià rä i te taata e parauhia ra e tävini no te Atua.
Ia taiò tätou i te mau parau e haapoto i na taiòraa e maha, e märamarama tätou i te mea i roto i te huru o teie taata, tei faatupu i te mauruüru o te Atua. Mai te peu i te hiòraa noa i te huru o teie taata, ua mauruüru te Atua, e aha atu ä ia ia rave o ia i te òhipa no reira te Atua i mäìti ai ia na. Te Atua rä, e piti noa mea ta na e ani nei ia tätou ia haapaò, ia faaroo,  tirä rä. No reira, eere no te faanahoraa, eere no te tiàraa, i riro ai te tahi ei tävini no te Atua, a faaroo na tätou teie mau ìrava no teie mahana :

-Taramo 23, 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

-Ieremia 23, 3 E haaputu mai rä vau i te toeà o ta ù nana, i te mau fenua atoà i tïahihia atu ai rätou e au ra, e faahoì mai au ia rätou i ta rätou iho ra âua, e riro rätou i te tupu e rahi noa atu ra.

-Efetia 2, 16 e ei faafäite ia räua atoà i te âmuiraa hoê i te Atua, i te tätauro ra, o te au òre i faaòrehia i te reira.

-Märeto 6, 34 E tei te täpaeraa atu Ietu ra, hiò atu ra o ia i taua feiä rahi ra, aroha atu ra ia rätou, no te mea mai te nana mämoe tiaì òre ra rätou. Haapii atu ra o ia ia rätou i te parau e rave rahi.

Ua hinaaro o Ietu ia haere o ia e ta na mau pipi i te hoê vahi moèmoè, ia tià ia rätou ia pärahi i roto i te hau no te òhipa i ravehia mai e rätou. Teie ôpuaraa àita i manuia, ua na nià o Ietu e ta na mau i te poti, ua täpapa te rahiraa taata na uta i te tipaeraa o Ietu e ta na mau pipi i te vahi i reira rätou e pärahi ai i roto i te hau, ua tupu te aroha i roto ia Ietu i te ìteraa i teie mau taata maite mämoe ra te huru e te tiaì òre.

No teie òhipa i tupu ua faafäite o Ietu ia Na i teie mau taata tei hinaaro ia Na, oia hoì ua faahau o Ietu ia Na i teie mau taata haapii atu ra ia rätou, i te mau parau e rave rahi. Te ìte ra tätou te huru o Ietu i roto i te hau no te faatupu i te faufaa o te parau e hinaarohia ra e faaìte ia hanahana to na Metua. Te òhipa ta Ietu e rave nei te faahoì faahouraa ia teie mau taata i roto i te ora a te Atua Nui Tumu Tahi, no te mea, te haapiiraa, terä e türama ra, e terä e tauturu ra.

No reira, mai te peu e, e hinaaro mau to tätou ia rahi faahou tätou e to tätou nünaa, terä noa te räveà ia tupu terä faafäiteraa ia tätou ia tätou iho. Tätou i to tätou fenua, ta tätou e ta tätou peu, tätou e to tätou reo. Tätou ihoä rä e to tätou Atua, ta tätou e parau nei e Atua terä no te aroha e te here. E aroha, e here te Atua, te reira atoà te mea ta tätou e faatupu.

Haamanaò rii na tätou i te mau òhipa e tupu nei i roto i to tätou fenua, to na haaviiviiraahia, to na heruraahia, i te tahi mau faanahoraa e òre e au i to na oraraa, ua purara te nünaa i nià i to na iho fenua, ua huri täèrehia te oraraa hau o te fenua e to te nünaa i Mäòhi Nui nei.  Ma te haapurara to na manaò i nià i te òhipa e òre o ia e tiàfaahou i roto i to na iho tiàmaraa èi nunaa no teie fenua.

Te auraa, te vai ra te tahi mau parau, mea ê to tätou manaò i teie mahana ia tütonu faahou, hiò faahou i te auraa, ia òre tätou ia faaea noa i roto i te peu e te rave peu-noa-raa i te tahi mau òhipa ta tätou e parau ra e, e mau òhipa tumu terä i roto i te faaroo e ua haapae tätou i te auraa o te òhipa ta tätou e rave ra. Mai te mea e hinaaro tätou ia haere tätou i te rahi, hoê noa räveà, hoì faahou tätou i raro, e haafäite faahou ia tätou, to tätou parau, to tätou fenua e i to tätou Atua.

E aha o Ietu i parau ai, e Nana tiaì òre teie, eiaha no te mea te faaäu nei o Ietu i teie mau taata i te ànimara, te ìte nei ra o Ietu i roto i teie mau taata te hoê nünaa âpï, toeà o te nunaa e ìmi ra i te faafäiteraa ia na i te hinaaro o te Atua Nui Tumu Tahi. No reira o Ietu i itoito roa ai i te haapii i teie nana tei täpapa ia rätou i te tahi pae no te roto. Te nana teie e täpapa ra i te tiaì, i te mea te ìte rätou i roto ia Ietu i te  täpaò no te aroha e te here o te Atua, ta na e faatupu mai te aroha e te here, e püai tätou i nià i te aroha e te here. Areà teie ta tätou e ora nei i teie mahana, aita, e püai to tätou i te faaau òre, ia tätou iho, to tätou iho parau, ta tätou iho peu, mea rahi, no te mea, aita tätou e hinaaro ra e färii, e inaha e horoà na te Atua i teie nünaa Mäòhi i Mäòhi Nui nei to na fenua.

 E tià änei ia parauhia ua ihu teie nana, te nana ihoä rä tei ìte e tei òre i mataù i te fäìraa e, ua ihu o ia, e pärahi o ia i raro, e feruri i te vähi o ia i hape ai, e e hoì i te reira vähi no te faatïtïàifaro mai i to na èà. Te nana e onoöno i te haere i mua, të òre hoì e färii i to na hape, te taata e haamä ia parauhia e, ua hape o ia, aore ra të rave i te tahi èà ê atu, te faarahi noa atu ra ia i to na fifi. Hoê ä e te feiä e manaò nei e, no te mea ua horo rätou i roto i te tahi haapaòraa ê atu, aore ra ua haapae roa i te parau o te Faaroo, ua ora ia rätou, e eita e naeàhia i te faahaparaa a te parau a te Atua. Tei roto atoà ia feiä i te hape. Eere no te mea ua taui òe i te èà, i tano ai òe i te raveraa i te reira èà, no te mea rä ua ìte òe e, te vai ra te tahi vähi i nià i te èà ta òe i rave mai të tano ia faatïtïàifarohia, e ua färii òe i te faatïtïàifaro i te reira, te reira te mea e horoà i te nana i te märamarama ta na i ère i taua taime ra. I mua i te parau o te fenua e te Faufaa ora a te Atua ta na e mau ra, to na färii òre i te fenua e te Faufaa ora a te Atua ta na e mau ra, i ô mai änei te reira färii òre e riro mai ai ei färii. E nä ô ia tätou e, te feiä të òre e au i te märamarama, e horo ihoä rätou i roto i te pöiri, no te mea ua au te reira ia rätou. To tätou mau Tupuna, ua tiàturi rätou e ua here i te fenua ta rätou i faariro ei hoa, ei tauturu ia rätou i roto i te oraraa, e ua taiò te Atua i te reira ei parau tià na rätou. I teie mahana i hiroà ai tätou e, ua ätea roa tätou i te fenua, e te neneì noa mai ra te pohe e te hepohepo ia tätou, teie ta Ietu hiòraa : hiò atu ra o ia i taua feiä rahi ra, aroha atu ra ia rätou, no te mea mai te nana mämoe tiaì òre ra rätou. Haapii atu ra o ia ia rätou i te parau e rave rahi.

Eiaha tätou e nounou i te pohe òhie, e tïtau mäite rä i te ora, aita e haamä to te hoì, inaha te tiaì mai ra te Atua ia tätou, e  o to na ia hinaaro mau, e ua tonohia mai hoì te Tamaiti no te faaìte ia tätou i te èà. Aita roa atu ia e mea e faatano ra i ta tätou mau haapahipahiraa maoti rä, te hinaaro òre i te ora. Ia ìte mai tätou, ia òre tätou ia òhie i te pee i te Fatu i roto i te faatüàtiàtiraa ta na e faaìte ra i roto ia tätou, te fenua, e te Atua Metua, e riro tätou i te hiò mai te mea e, e haereraa ê ihoä to te  Fatu, e haereraa ê to te fenua ; e parau ê ta te Fatu, e parau ê ta te fenua. O Ietu rä i hiò e : mai te nana mämoe tiaì òre ra rätou. Haapii atu ra o ia ia rätou i te parau e rave rahi. I parau ai o ia i te horoà a te fenua e : o ta ù tino tenä, o ta ù toto tenä, no te haapäpü ia e, te fenua, mai ia na atoà, te haapiiraa ia, te parau mau, e te ora.  No reira, mai te peu hoê ä te fenua e o Ietu, eere ia no te faahapa te tahi i te tahi, no te faaìte rä i te hoêraa o ta räua faaìteraa. Te päpü maitaì ra ia tätou e, tei ìte i te nana ra, ua ìte ia i te Atua, e tei ìte hoì i te Tamaiti ra, ua ìte ia i te Atua. E tano ai tätou e parau e, te Atua ta te fenua i faaìte i te mau Tupuna, e te Atua ta te Tamaiti i haere mai e faaìte, taua Atua nei ä ia, e Atua tei here i ta na rahu, e Atua tei hinaaro ia ìte te taata e, te Hau o te Atua, ta tätou e manaò nei e, tei nià i te raì, ua hohoà maitaì ia i te fenua ta tätou e tähitohito nei. Te nä ô ra te reo o te päpaì taramo : Te Tumu Nui to ù tiaì, e òre roa vau e ère. Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra. E faahoì o ia i ta ù värua, e arataì o ia ia ù nä te èà tïtïàifaro, no to na ra iòa. E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì atoà iho òe ia ù : to räau e to tootoo tei haamähanahana mai ia ù. Ua faanahonaho òe i te tahi àmuraa mäa na ù i mua i te aro o ta ù mau ènemi ; ua faatävai òe i ta ù upoo, e te î nei ta ù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

(Taramo 23, 1-6).

 

 

Teraì òr. Faatura.

 

Hinamoeùra Cross 1 L'injustice

Māreto 6.7-13. Turutootoo.

 

Tāpati 11 no Tiurai 2021.

Turutootoo.

Taramo 85

1 Na te Mënätehe. E Taramo na te tamarii a Tora. 2 Ua hämani maitaì mai òe, e te Fatu, i to òe ra fenua; ua faahoì mai òe i te tïtï o Iatöpa ra. 3 Ua faaòre òe i te hara a to mau taata ra, e ua täpoì òe i to rätou ìno. Tera. 4 Ua faaòre òe i to òe ra riri, e ua tïoi ê atu ra òe i te ûàna o to òe ra riri. 5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei. 6 E riri mai ä òe ia mätou, e a muri noa atu? E tämau ä òe i to riri e tae noa atu i te mau uì atoà ra? 7 Eita änei òe e faaanaanaea mai ia mätou, ia òaòa to mau taata ia òe ra? 8 E faaìte mai, e te Fatu, i to òe ra aroha, e hö mai i te ora na òe ia mätou nei. 9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra. 10 Te fätata mai ra te ora na Na i te feiä i mataù ia na ra. E faatupu o ia i to na hanahana i to tätou nei fenua. 11 O te aroha e te parau mau, ua färerei ia räua; o te parau tià e te hau, ua hohoì räua.12 E tupu mai te parau mau no roto i te fenua, e hiò mai hoì te parau tià mai te raì mai.13 Na te Fatu hoì e horoà mai i te mea maitaì, e hotu mai ä hoì to tätou fenua. 14 E nä mua ia na te parau tià i te haere, e na te reira e faaìte mai i to na haereà.

Àmota 7.12-15.

12 Ua parau mai ra Àmatia ia Âmota, E tërä ra hiò e, e haere, e maùe ê atu òe i te fenua ra o Iüta, a àmu ai i te mäa i reira, e ei reira a tohu ai. 13 Eiaha rä òe e tohu faahou ia Pëtera nei e vähi moà ia no te arii, e te hiero no te pätireia nei. 14 Ua parau atu ra Âmota, nä ô atu ra ia Àmatia, Eere au i te perofeta, eere atoà hoì au i te tamaiti a te perofeta; e faaàmu puaatoro hoì au, e haaputu tütämino hoì; 15 ua rave mai ra te Fatu ia ù a pee haere ai au i te nana ra, e ua parau mai ra te Fatu ia ù, A haere a tohu i to ù mau taata ia Ìteraèra.

Èfetia 1.3-14

Te hämani maitaì a te Atua mä te Metia

3 Ia haamaitaìhia te Atua te Metua o to tätou Fatu ra o Ietu Metia, o tei haamaitaì mai ia tätou nei, i te mau maitaì atoà o te Värua i te ao ra, i te Metia nei: 4 o ia i mäìti ia tätou i roto ia na hou te tumu o teie nei ao ra, ia riro tätou ei feiä moà e te hapa-òre i mua i ta na aro mä te aroha; 5 e ua haapaò ätea noa ia tätou, ia riro ei tamarii tävai na na iho ia Ietu Metia ra, i te haapaòraa i te hämani maitaì o to na iho ra âau. 6 Ia haamaitaìhia to na aroha mau hanahana ra, i riro ai tätou ia na ei feiä ìtehia mai i roto i ta na Tamaiti here ra. 7 No na i noaa ai te ora ia tätou i to na ra toto, i te hara i faaòrehia nei no te rahi o to na ra aroha mau: 8 o tei faarahi-roa-hia e ana ia tätou nei, mä te paari rahi, e te haapaò maitaì. 9 E ua faaìte mai ia tätou i te parau àro ra o to na ra hinaaro, to na ra manaò hämani maitaì i ôpuahia e ana i roto ia na iho, 10 e ia tae i te tuuraa parau i te hoperaa mau o te mau tau ra, e âmui ai o ia i te mau mea atoà i te Metia ra, to te raì, e to te ao nei, ei ia na. 11 E e tufaa hoì ta mätou i noaa ia na, o mätou i oti i te haapaò-ätea-hia i te ôpua no na no tei rave i te mau mea atoà nei, ia au i te ôpua a to na iho âau. 12 Ia riro mätou nei ei ârueraa i to na ra maitaì, o mätou o tei tiàturi i te Metia i mütaa iho ra. 13 O ta òutou atoà hoì i tiàturi, i te ìteraa aè òutou i te parau mau, i te Èvaneria ra o to òutou ora: e òutou atoà hoì i faaroo, i täpaòhia òutou e ana i te Värua Maitaì i parauhia mai ra, 14 o të faaìte ia i ta tätou tufaa e tae noa atu i te ora mau o to na ra taata i hoohia ra, ia haamaitaìhia to na hämani maitaì.

Māreto 6.7-13.

Te tono-raa-hia te tino àhuru mä piti.

(Mät 9,35; 10,5-15; Ruta èv 9,1-6)

6 vh, Haere atu ra o ia nä roto i te mau ôire rii i reira iho i te haapii haereà. 7 Ua parau atu ra o ia i te tino àhuru mä piti e haere mai ia na ra, tätaìpiti atu ra i te tonoraa ia rätou. Ua tuu atu ra i te mana ia rätou ia vï te mau värua faufau ra; 8 e ua parau atu ra ia rätou: E eiaha roa ei taoà ê e hopoihia i to rätou tere, maori rä o te räau turutootoo ra: eiaha ei pütë, eiaha ei mäa, eiaha ei moni i to rätou hätua. 9 Ei tïaa hoì ta òutou, e eiaha e piti pereue ia àhu. 10 Ua parau atoà atu ra o ia ia rätou: Ia tomo noa atu òutou i roto i te tahi fare ra, e faaea atu i reira e reva noa atu òutou. 11 I te vähi rä aore rätou i färii mai ia òutou, e aore hoì e faaroo mai ia òutou, e ueue atu i te repo o to òutou âvae ia reva òutou ra, ei täpaòraa atu ia rätou. 12 Haere atu ra rätou, aò haere atu ra i te taata ia tätarahapa. 13 E tiàvaru atu ra hoì i räpae i te värua ìno e rave rahi, e ua faaora atu ra i te maì e rave rahi, mä te faatävai ia rätou i te monoì.

 Manaò.

Te parau tià e te parau mau e faahitihia nei i roto i teie fäìraa ta te Taramo, e parau ia no te haaväraa. Eiaha rä tätou e rü noa i te faaoti i te auraa o teie parau i nià i te mea ta tätou i mätau. Mai te peu na te märamarama e faataa ra i te pö i te ao i roto i te rahu a te Atua, na te parau tià  e te parau mau atoà e faataa i teie nei i te taata. No reira, ia parau tätou e, haaväraa, eiaha tätou e manaò i te huru haaväraa mai teie ta tätou i mätau i te ìte. Te auraa o teie taò haavä, teie ia : faataa, tuu i te ärea i roto i te tahi nä taata i roto i te fifi. Te vä, e ärea to na auraa tumu ; te taò atoà teie i maìrihia i te tahi räau e ravehia no te faatano i te ärea e faataa i te tahi nïàu i te tahi i roto i te atoraa fare. Te parau atoà nei to Rapa e haere e haava i te roki, oia hoì e faateatea te huri mikaka ia tupu maitaì te vari taro.

 No reira, ia au i to te taata färii, aore ra to na färii òre te parau a te Fatu, te riro ra oia mai te òraparaa o te âvaè i tanohia i nià i te ànaana o te mahana, aore ra tei òre i tanohia : ua riro te färiiraa ei täpaò no te märamarama ; âreà te òreraa e färii, e täpaò ia no te pöiri. E hape tätou ia faariro i te märamarama ei fäitoraa taata : te vai ra te feiä märamarama, e te vai ra te feiä pöiri. Eere roa atu te reira, àita e taata pöiri ta te Atua Nui Tumu tahi i hämani, te färiiraa ia Ietu no ta na parau, te mea ia e ìtehia ai te taata i hitihia e te märamarama ; âreà te òre rä e färii i te reira märamarama, ua huritua ia taata i te märamarama.

Aita o Ietu i haere mai e haavä i te taata, oia hoì eere na Na e horoà i te utuà e au i te òhipa ta te taata i rave, na te taata iho rä e faahaere mai i nià ia na i te utuà e au i to na färii, aore ra to na färii òre i te märamarama ta Ietu i âfaì mai. Ta na ia e haapäpü ra ia nä ô mai o ia e : Ia faaroo mai te taata i ta ù parau, e aore i haapaò, eere o vau të faahapa ia na. Mai te parau a te Atua i tuu i te ärea i roto i te pö e te ao, te riro atoà nei Ietu, oia te parau i riro mai ei taata, mai te vä, oia te mea e tuu i te ärea i roto i te taata. Ia faaroo tätou i te haapotoraa o na taiòraa e maha nei te faaìte noa mai ra te reira i te tupuraa òhipa e tià ia haapaò, e ia rave teie ia :

-Taramo 85, 12 E tupu mai te parau mau no roto i te fenua, e hiò mai hoì te parau tià mai te raì mai.

-Àmota 7, 15 ua rave mai ra te Fatu ia ù a pee haere ai au i te nana ra, e ua parau mai ra te Fatu ia ù, A haere a tohu i to ù mau taata ia Ìteraèra.

-Èfetia 1,  6 Ia haamaitaìhia to na aroha mau, hanahana ra, i riro ai tätou ia na ei feiä ìtehia mai i roto i ta na Tamaiti here ra.

-Märeto 6, 8 e ua parau atu ra ia rätou: E eiaha roa ei taoà ê e hopoihia i to rätou tere, maori rä o te räau turutootoo ra: eiaha ei pütë, eiaha ei mäa, eiaha ei moni i to rätou hätua.

Te manaò faufaa roa i roto i teie mau ìrava te fäìraa i te tumu o te tere o Ietu i roto i te ao nei, teie ia parau no te ìte. Aita e òhipa ta te Tamaiti i rave, nä reira hoì te Atua Metua, tei òre te taata i parauhia, ta Ietu i òre i haapii, tei òre i haamäramaramahia, oia hoì tei òre o ia i ìte. Te mea ia ta Ietu i haapäpü i roto i ta tätou no teie mahana Märeto i te pene 6 i te mau ìrava 7 e faaea i te ìrava 13.

Teie ta tätou parau no teie taime haamoriraa e faateiteiraa i te Atua. Teie o Ietu e tono nei i ta na mau pipi, i roto i te mau vahi nohoraa no te taata, i nià i te èà tià e i te mau aroä, no te faaìte i te parau òaòa âpï a te Atua. Hou ra te tonoraa te vai nei te faanahoraa, eiaha te mau pipi e hopoi i te mau mea e fifi ai ta rätou faaìteraa, mauti ra. Hoê raau tootoo, èi faaìteraa e taata tere perenina teie, ma te tëpeta parautià i ta na rima, èi faaìteraa te mana e vai ra i roto i te taata horoà i te parau i te hanahana o te Atua. E te hoê tämaa täui, èi faaìteraa e, e tävini tiàma teie e faaìte nei i te parau òaòa no te patireia o te Atua, e te parau no te tätarahapa.

Eiaha èi pute, a î noa te tuuhia i roto te mau mea e faufaa òre ai te pororaa.

Eiaha èi maa, a pau noa te taime i te faaineineraa, a ïti mai te taime pororaa.

Eiaha èi moni, a manaòhia rätou e te mau taata, e fëia tapi hoo täuihaa, a fifi roa atu ai te pororaa.

Eiaha èi piti pereue, a manaòhia rätou e fëia hoo àhu, a ta fifi te faaìteraa i te mau hinaaro o te Atua.

E faanahoraa päpü teie ta te Metia, èi haapaariraa i ta na mau pipi i roto i te pororaa e te faaìteraa. Te faaära nei O ia, ia haapaò maitaì eiaha te mau mea faufaa no te ao nei ia na mua i ta te Atua, ia na mua ra ta te Atua e tià ai.

Te fare i reira òutou e tomo ai o tei faaroo mai, ma te färii poupou maitaì, e pärahi i reira, te fare ra aore e faaroo i te parau âpï òaòa, e riro ia taua òire ra mai ia Totoma e o Tomora, ia tae i te taime haaväraa.

O te piti teie no te faanahoraa a te Metia, no te tonoraa. Àreà ra te toru o te faanahoraa ia porohia ia te parau no te tätarahapa, tei òre ia tätarahapa ra, ia tätarahapa ia. Te ìte nei ia tätou i ù nei te faanahoraa a Ietu i te tonoraa i ta na mau pîpî. Ma te horoà i te hoê haapiiraa e au no te òhipa, faaìteraa, e te faaoraraa maì. E toru täpura òhipa teie ta Ietu e horoà nei i mua i ta na mau pîpî.

1-Te mau pipi i mua i te tonoraa a Ietu.

2- Ia tätarahapa, ia òre ia riro mai ä Totoma e o Tomora.

3-Te mana faaora a te taata, no te taata, o ta Atua e faatupu.

Teie te tahi mau parau tumu i roto i ta tätou nei taiòraa, o ta Ietu e hinaaro atoà nei e faaìte ia tätou, te tumu o te tonoraa a te Atua i ta na mau tävini. No te mau òhipa, ta te taata i manaò e mea faufaa, i roto i te ao nei, mea faufaa òre ia i mua i te aro o te Atua. E täpaò faaìte teie te mana faaue a te Atua, ia tomo i roto i te mau ùtuafare i to na Iòa. Ua ta toopiti o Ietu i te tonoraa i ta na mau pipi, ia poro haere na te mau aroä, e i roto i te mau ùtuafare. Toopiti rätou i te haereraa e òhipa i te täpura a te Atua, mai te vaa tauàti ra hoì te mau pipi i te tooraa i te parau a te Atua, i te mau vahi e tätarahapa ai te taata nei. Toopiti i te haereraa e faatupu i ta te Atua i faaue no te ùme mai i to te ao i rapae i te hara, no te hoì i nià i te èà no te tiàturiraa. Toopiti i te haereraa i roto i te mau ùtuafare, no te òhipa i ta te Atua mau tïtauraa i te mau ùtuafare tei tiàturi.

Ta toopiti atu ra i te tonoraa ia rätou ua tuu atu ra i te mana ia rätou ia vi te mau varua faufau ra.   

Teie o Ietu e tuu nei i roto i te mau pipi, te faufaaraa e te manuiraa ta te Atua òhipa. E mana teie e horoàhia nei no te òhipa, e mana faatupu i to te Atua mau hinaaro no te ora e a muri atu. Teie mana ta te taata e moemoeä noa nei ia noaa teie faufaa i te mau taata atoà, o ta te Atua i faataa no na. O ta te Atua atoà i rave na i te perofeta ra ia Àmota i te pene 7 i te mau ìrava 12 e tae i te 15. O ia tei faauehia e te Atua ia haere e tohu i to Ìteraèra, ua horoà te Atua i teie mana no te tohu ia färiu faahou mai to Ìteraèra i nià i te Atua no te maitaì, i te mea ua riro o Pëtera ei hiero moà no te patireia. E taata faaamu puaatoro o Àmota, te hinaaro nei ra te Atua ia Àmota eiaha ei faaamu puaatoro faahou, ei tiaì ra i to na nunaa, ei faaàmuraa i te maa no te fäìraa hara, no te hoìraa i te Atua ra. Teie te mana ta te Atua i horoà i roto i te perofeta. E mana tohu to Âmota, àreà to te mau pipi e mana ia, ia vï te mau värua faufau e haafifi nei te oraraa o te mau taata.

E i teie mahana, e aha te mana ta te Atua i horoà ia tätou?

Mauti ra ia, ia farerei te aroha i te parau mau, e ia hohoì te parau tià e te hau. O ia mau no reira o Âmota i faauehia ai e tohu, e te mau pipi i tonohia ai, te Ètärëtia ia päpetito i te iòa o te Metua, te Tamaiti, e te Varua Maitaì. Ia tupu te färereiraa te aroha e te parau mau, e te parau tià e te hau ia hohoì.

 

O te aroha e te parau mau ua farerei ia raua, o te parau tià e te hau ua hohoì raua. Taramo 85, 10.

 

 

Teraì òr. Faatura

 

 

 

 

 

 

Tāpati 4 no Tiurai 2021.

ÔROÀ

Maere.

Taramo 123

Te tiaìraa a tei faahaamähia

1Tire a te Moruta. Te nänä atu nei au i ta ù mata ia òe, e tei pärahi i nià i te mau raì ra. 2 Inaha, mai te mata o te mau tävini e hiò i te rima o to rätou ra mau fatu, mai te mata o te tävini vahine e hiò i te rima o ta na fatu vahine ra, oia atoà to tätou mata i te hiòraa i to tätou Atua te Atua Nui Tumu tahi ra, e ia aroha mai o ia ia tätou nei. 3 E aroha mai ia mätou, e Fatu, e aroha mai ia mätou Ua faaî-mäite-hia to mätou värua i te parau faaìno ; 4 ua faaî-mäite-hia mätou i te parau faaìno, i te tähitohito a te feiä taoà ra, i te vahavaha o te feiä teòteò hämani ìno ra.

Ètetiera 2.2-5

Tämaïti a te Taata.

2 E ua ö mai ra te värua i roto ia ù, ia na i parau mai ia ù ra, e ua faatià mai ra o ia ia ù i ta ù âvae, e ua faaroo atu ra vau ia na i tei parau mai ia ù ra. 3 E ua nä ô mai ra o ia ia ù : E te tämaïti a te taata na, te tono nei au ia òe i te tamarii a Ìteraèra i te fenua tähito mai, tei tähito mai ia ù ra: o rätou e to rätou mau metua tei faaroo taiàta mai ia ù, e tae roa aè nei i teie nei mahana. 4 Tähito noa ä rätou e te âau faaètaèta, te tono nei au ia òe ia rätou ; e na òe e parau atu ia rätou : Te nä ô mai ra te Fatu ra o Iehova : 5 E o rätou ia hinaaro i te faaroo mai, e ia òre hoì ia faaroo mai e ùtuafare tähito, mai ä rätou e ìte ä rätou e perofeta tei tae atu ia rätou ra.

2 Törïnetia 12.7-10

Paruparu.

7 E ia òre au ia teitei rahi hua i te rahi o tei faaìtehia mai ia ù ra, i tuuhia mai te hoê tara i roto i ta ù tino nei, e merahi na Tätani ei haavï mai ia ù, ia òre au ia teitei rahi hua. 8 E e toru hoì a ù aniraa atu i te Fatu i taua mea ra, ia faataa-ê-hia ia ù. 9 Ua parau mai ra rä o ia ia ù : To ù nei maitaì, a tirë ia ta òe : ei te paruparu e taa maitaì roa ai to ù püai. E i teie nei, e mea òaòa ia ia ù te ârue i to ù nei paruparu, ia vai mäite te püai o te Metia i nià ia ù nei. 10 E i teie nei, e mea tià ia ù te paruparu, e te faaìno, e te àti, e te hämani ìno, e te ahoaho i te Metia nei : ia paruparu hoì au ra, te püai ra ia vau i reira.

Märeto 6.1-6

Eita to Nätareta e faaroo ia Ietu

Mät 13.53-58; Rt Èv 4.16-30

1 Faaruè iho ra Ietu i taua vähi ra, haere atu ra i to na iho fenua, mä ta na mau pipi atoà. 2 E haapii atu ra o ia i roto i to rätou mau tunato i te täpati, ua nä ô aè ra te feiä i faaroo ia na e rave rahi mä te maere : No hea te mau räveà a teie nei taata ? E e aha teie nei paari i höroàhia mai ia na nei, i tià ai teie nei mau temeio rahi i ravehia e ana nei ? 3 Eere änei teie i te tämuta, te tamaiti a Märia ra, te taeaè o Iatöpo ra, e no Iote, e no Iuta, e no Timona ? E eere änei tei io tätou atoà nei tana mau tuahine ? Mäheaitu iho ra rätou ia na. 4 Ua parau atu ra rä Ietu ia rätou : E òre te perofeta, e òre i te haapaòhia, maori rä i to na iho ra fenua, e i to na iho ra fëtii, e i to na iho ra ùtuafare. 5 Aita atu ra i tià ia na ia rave i te temeio i reira, maori rä i vëtoofanu puè maì i faaorahia e ana i te tuuraa i ta na rima i nià ia rätou ra. 6 Maere roa atu ra o ia i to rätou faaroo òre.

Manaò.

Te mau reo i faaroohia e tätou i roto i teie mau taiòraa te faaìtehia nei ia  te mau hinaaro o te Atua Nui Tumu tahi, oia hoì, te mea ta te Atua e tiäì mai ra i te taata ia rave ei rāveà e tupu ai te hau i roto i te oraraa o te taata e mau ra i te Parau tià, eere ia i te parau noa, e òhipa atoà rā, e òhipa âfaro, te tano e te maitaì, tei au i te ôpuaraa a te Atua. Aita to te parau tià e parau i rāpae aè i te vāhi e orahia ra e te taata, i roto i te faatereraa e faanahohia ai to na oraraa, nā reira te feiā na rātou e mau ra i te faatereraa.

I roto i te faaineineraa aore ra i te faatäviniraa i te tāvini o te Atua, tē vai ra te tuhaa a te taata, e tano e parau e, ta na te tuhaa rahi aè, te mea ta te Atua e ta Ietu e haamanaò pinepine noa ra : Eiaha e mataù. Tē vai atoà ra rā te tuhaa a te Atua, oia te òreraa e faaruè ia na. E ia au i te reira manaò, ia paruparu te tāvini, eere no te mea e pūai aè te ènemi, no te mea rā, ua haaparuparu ê na te tāvini ia na, ua hiò ê na ia na i roto i te pau, e aita i haamanaò faahou e, no te mea na te Atua te òhipa ta na e rave ra, tei pīhaì noa ia te Atua ia na. Ua tuu ihoā paha te Atua i to na Vārua i nià i teie taata, mai te peu rā ua apiapi ê na to na âau i te mataù, nā hea ia te Vārua o te Atua e òhipa ai i roto ia na.

Te vāhi faufaa i roto i teie mau parau, te parau ia o te tāvini ta te Atua e ani nei ia tātou e hiò, te mea ia e, na te Atua iho i faatävini ia na. E te tävini ra, e taata ia tei faaineinehia no tē haere i nià i te tahua òhiparaa. Eiaha tātou e manaò e, tē vai ra te tahi faaineineraa taa ê ta te Atua e rave no to na tāvini. Teie noa te haapāpūraa ta te Atua e hōroà mai nei ia au i te haapotoraa o te mau taiòraa :

-Taramo 123, 2 Inaha, mai te mata o te mau tävini e hiò i te rima o to rätou ra mau fatu, mai te mata o te tävini vahine e hiò i te rima o ta na fatu vahine ra, oia atoà to tätou mata i te hiòraa i to tätou Atua te Atua Nui Tumu tahi ra, e ia aroha mai o ia ia tätou nei.

-Ètetiera 2, 3 E ua nä ô mai ra o ia ia ù : E te tämaïti a te taata na, te tono nei au ia òe i te tamarii a Ìteraèra i te fenua tähito mai, tei tähito mai ia ù ra: o rätou e to rätou mau metua tei faaroo taiàta mai ia ù, e tae roa aè nei i teie nei mahana.

-2 Törïnetia 12, 10 E i teie nei, e mea tià ia ù te paruparu, e te faaìno, e te àti, e te hämani ìno, e te ahoaho i te Metia nei : ia paruparu hoì au ra, te püai ra ia vau i reira.

-Märeto 6, 6 Maere roa atu ra o ia i to rätou faaroo òre.

Tatararaa

E reo maere rahi mau teie no Ietu, te òreraa te perofeta e färiihia i ö na iho, te òreraa te mau fetii e ìte atu i te mau òhipa e tupu ra no te maitaì e te ora, e te òreraa te ùtuafare e àfaro. Aita to Nätareta e färii nei i ta na iho tamarii, ua mau to rätou tiàturiraa, i te mea o Ietu mea matauhia e rätou i te hiò i te mau mahana atoà. E tamarii, tei mätau maitaìhia e te mau tamarii no to na iho òire, no rätou aita o Ietu tamarii i taa-ê-atu i te Ietu e poro nei i te patireia o te Atua, e, e haapii nei i roto i te mau tunato. O Ietu teie, te tamaiti a te tämuta, a Maria, te taeaè no Iatöpo, o Iote, o Iuta, e o Timona. E taata o Ietu mai te mau taata atoà e ta na òhipa, e mau òhipa maere anaè ia e te maere rahi.

No te mau òhipa maere i ìtehia no te mau taime mätamua e te fëia no to na òire, te ui nei rätou, nohea te mau raveà a teie nei taata ? E uiraa teie, tei faaìte i te âau arahuta o te mau taata no to na iho àià. To na àià te vahi O ia i paari ai, i te faanahoraa a to na na metua, aita rätou e ìte nei ia Ietu ei tamaiti na te Atua, aita rätou e ìte nei ia Ietu ei Metia, aita rätou e ìte nei ia Ietu ei perofeta.

Ua fifi to Nätareta ìteraa e o Ietu teie te tämaïti a te Atua, tei tonohia mai no te ora, no te hau, e no te aroha. I vai ai to rätou faaroo i nià i te tiàturi òre, e te maere rahi, oia hoì, e tämaïti o Ietu na te tämuta, eita ia o Ietu e tià ia faatupu i te mau temeio, na te mau tahuà noa te reira e rave, e aore ra, eita e tià ia Ietu ia haapii i te mea, eita O ia i te papaì parau. E maheaituraa rahi to te fenua iho ia Ietu, e ta te Atua i faatupu, te ora nei te mau maì na roto i te tuuraa rima, te täpeàraa i te hiti àhu, e tei faatià i tei pohe. Te ìte nei o Ietu i ù nei te täiroiro te tiàturiraa o to na iho nunaa. I parau ai O ia e, E òre te perofeta, e òre i te haapaòhia, maori rä i to na iho ra fenua, e i to na iho fetii, e i to na iho ra ùtuafare. O Ietu i mua i teie huru parauraa ia Na iho e ta na e tohu nei i to na pohe, e, te faamanaò atoà nei O ia te huru no te ùtuafare tahito no te nünaa Ìteraèra, i te faaroo taìäta, oia hoì te faaö àta te parau maitaì i roto i te âau. I vai tiàturi òre noa na to Ìteraèra i te mau perofeta a te Atua, ma te faaroo òre i te mau faaararaa. Noa atu ra teie huru no te nünaa o te Atua, aita te Atua e faaruè nei i ta na i ôpua, E ìteä rätou e perofeta tei tae atu ia rätou ra, ia au ia i te faaìteraa a Etetiera i te pene 2 i te ìrava 5vh. Ua mou ia perofeta e ta te Atua faaìteraa parau, ua mou ia perofeta e ta te Atua faaitoitoraa, ua mou ia perofeta e ta te Atua aòraa, ua mou ia perofeta e ta te Atua horoàraa i te ora. Aita ra ta te Atua mau ôpuaraa i mou, ua ûàna faahou ra, na roto ia Ietu, e ta na mau âpotetoro. E ìteä rätou e perofeta tei tae atu ia rätou ra.

Te tiaìtururaa ia o te Atua i ta na i tono i te ao nei, no te faaìte i te parau poupou no te tätarahapa. O Ietu perofeta i to na iho fenua, i to na iho fetii, e i to na iho ùtuafare, te riro nei ia O ia mai te mau perofeta mätamua no Ìteraèra, tei òre i haapaòhia ta te Atua i tono mai. Aita-atu-ra ia o Ietu i rave i te hoê temeio i reira, no to rätou faaroo òre, ua täpeàhia e Ietu te ora a te Atua i mua i te mata no to na iho nünaa, ua faaìtehia i te fëia tei tïtau i te ora mure òre.

Eita anei teie i te hoê parau peàpeà no Ietu, oia tei òre i haapaòhia, i to na iho fenua ? E aha ia te tïtauraa a Ietu no to na fenua, no to na fetii, e to na ùtuafare ? Te tïtau nei o Ietu, ia färiihia te aroha o te Atua ma te âau tätarahapa mau, eiaha ia ui maere faahou, e ère anei teie i te Tämaïti a te tämuta ? Ò ia, eiaha ra no Nätareta noa, no te mau vahi atoà ra, e färii nei i te parau ora a te Atua, e tei tätarahapa. E Tamaiti na te tämuta, te tämuta tei pii i te Ètärëtia i roto i te ora, te here e te aroha. Te Atua ua tämuta O ia i te ao nei, ma te horoà i to na tiàturiraa, àreà o Ietu te tämuta nei ia te haapaò-òre, ia haapaò, tei òre i färii, ia färii, tei òre i tätarahapa, ia tätarahapa.

E tamaiti na te tämuta, eiaha ra mai tei matauhia i te ìte i te mau mahana atoà i roto i to tätou oraraa, o te tämuta ra tei faatïtïàifaro te tiàturiraa ia färiu i nià i te maitaì no te oraraa poupou, ta te Atua i horoà i te mau taata e rave rahi.

E hoa here ma e,

6 Maere roa atu ra o ia i to rätou faaroo òre.

Peàpeà rahi to Ietu i roto i teie reo to na i te mea aita O ia i färiihia i roto ia ö na iho. Aita o Ietu e färiihia nei mai te hoê perofeta, te ìtehia nei ra O ia mai te hoê tämaïti no te fenua iho, eiaha mai te hoê perofeta, tei faaära i te parau a te Atua, e aore ra mai te hoê perofeta tei ärataì i te nunaa i roto i te hanahana o te Atua. I ù  nei te tïtau faahou nei o Ietu i to na fenua, to na nünaa, to na fetii, to na ùtuafare, ia färii i te parau àro no te Patireia o te Atua. I te mea O ia te tämuta no te èà o te Patireia, e O ia atoà te tämuta no te ora mure òre. Tei òre i färii i te tämuta no te faaäuraa âpï, e òre atoà  ia e färii i te tämuta o te faaäuraa mätamua.

E toru tau tumu parau ta Ietu e faahiti nei i roto i ta tätou parau no teie mahana, a tahi te fenua, a piti te fetii, a toru te ùtuafare. E mau vaehaa anaè ia teie e orahia ai, e, e nohohia ai e te mau taata i reira atoà e tupu ai te parau no te färiiraa. E aha to na huru i teie mahana ? Te färiiraa i to na fenua, te färiiraa i to na iho fetii, te färiiraa i to na iho ùtuafare. Na tumu ra rahi teie, no roto i to tätou oraraa taata teretetiano i roto i te Ètärëtia Porotetani Mäòhi e te vaamataèinaa. I te mea te fenua o te Atua tumu ia parau ai tätou i teie mahana te Tumu Nui, ia ohihia te fetii, no te patu i te hoê ùtuafare faaroo, tiàturi, färii i te parau no te aroha o te Atua. Ua maere o Ietu i to rätou faaroo-òre, e aha te maere te huru tupuraa ia  ìtehia rä i roto i te taata, ta na parau e ta na òhipa i nià i te parau tià e to na auraa tei turäma ia na.

Teie ta tätou parau no teie mahana e tauturu faahou nei i to  tätou faaroo, no te färiiraa i ta Ietu perofeta e faaìte nei ia haapaò i te fenua ia riro ei ìte, i roto i te âmuiraa fetii e te ùtuafare. Te hinaaro nei o Ietu i te haapii faahou i to na nunaa e i te Ètärëtia ia ara i roto i te färiiraa, ia färii ma te here, ia färii ma te hau, ia färii ma te haapaò e te aroha. O tei färii i ta Ietu mau òhipa maere, ua färii atoà ia i te fäìraa hara, o tei haapaò i to Ietu tiàororaa no te tätarahapa, ua färii ia i te fäìraa faaroo.

Ia itoito ia tätou i roto i to tätou oraraa, e ia haamaitaì mai te Atua i to tätou fenua, ia riro ei fenua faaroo, to tätou mau fetii ia riro, ei fetii teretetiano, e to tätou mau ùtuafare, ei ùtuafare tiàturi i ta te Atua e faatupu no te Ètärëtia i Mäòhi Nui nei.

 

Teraì òr. Faatura.