Ioane 8.1-11 Päpaì

 

Tāpati 3 Èperera 2022.

ÔROÀ

Päpaì

Taramo 126.

1 Tire a te Moruta. I te faaòre-raa-hia e te Fatu te tïtïraa o Tiona, e au tätou i te feiä moemoeähia.

2 Î aè ra to tätou vaha i te àta i reira, e to tätou mau arero i te òaòa. Ua nä ô aè ra to roto i te êtene ra: «E òhipa rahi ta te Fatu i rave ia rätou nei»

3 E òhipa rahi ta te Fatu i rave ia mätou nei, i òaòa ai mätou nei.

4 E faahoì mai ä, e te Fatu, i to mätou ra mau tïtï, mai ta òe ä i faahoì mai i te pape tahe i àpatoà ra.

5 O tei ueue mä te roimata ra, e ôoti ia mä te òaòa.

6 O tei haere hoì e ueue i te huero mä te òto ra, e hoì faahou mai ä ia mä te òaòa, e mä te hopoi atoà mai i ta na ra mau ruru.

Ìtaia 43.16-21

16 Te nä ô mai ra te Fatu manahope ra; o tei rave i te èà nä raro i te tai ra, e te haereà na te moana rahi ra;

17 o tei arataì mai i te puaahorofenua e te taata i nià iho, te nuu, e te papaupea rahi atoà ra; taòto anaè iho ra rätou, e pohe atu ra mai te vavai ra.

18 E aha e manaòhia tei a mütaa iho ra mau parau; e tei tahito ra mau peu, eiaha e haapaòhia atu.

19 Inaha, te rave nei au i te mea âpï; e teie nei hoì e tupu ai; e òre änei òutou e haapaò i te reira? Oia ia, ei èà tià tä ù e rave i te mëtëpara: e tuu hoì au i te pape tahe na te fenua marô ra.

20 Na te mau taehae o te aru e haamaitaì mai ia ù; te mau teni, e te mau tamähine o te ione ra; no te mea ua höroà vau i te pape i te vähi päpämarô, e te pape tahe i te mëtëpara ra, ei pape nä to ù ra mau taata, i tei haapaòhia e au ra.

21 Ua haapaòhia e au teie nei mau taata nö ù iho; nä rätou e haamaitaì mai ia ù.

Firipi 3.8-14

8 Oia mau ia e mea faufaa òre atoà te mau mea atoà nei ia ù, i te maitaì rahi ra i te ìte i te Metia i ta ù Fatu ra ia Ietu: e faaruè ai au i te mau mea atoà ra, e e àua ia ia ù, ia noaa ia ù te Metia.

9 Ia riro vau ei taata no na, eiaha mä te parau tià na ù iho i te ture ra, o tei noaa mai rä i te faaroo o te Metia ra, o te parau tià a te Atua i te faaroo ra:

10 ia ìte hoì au ia na, e te püai o to na tiàfaahouraa, e te âpiti-atoà-raa atu i to na mau àti, i te faaauraa atu i to na ra pohe;

11 ia roaa noa atu ä ia ù te tiàfaahouraa mai te pohe mai ra.

Te hororaa o te taata faaroo

12 Eita vau e parau e, ua noaa ia ù e ua oti nehenehe roa to ù hororaa i teie nei, te tïtau nei rä vau, peneiaè o te noaa ia ù te mea i roohia mau ai au nei e te Metia ra e Ietu.

13 E a ù mau taeaè, aore au i manaò ia ù iho nei, e ua noaa, hoê roa a ù mea e rave nei, i te haamoèraa i te mau mea i muri ra, e te tïtauraa atu hoì i tei mua,

14 te neneì tià atu nei au i te täpaò, ia noaa te perapeio i te parauraa a te Atua no nià mai ra i te Metia nei ia Ietu.

Ioane 8.1-11

Te vahine faaturi i faatiàmähia

1 Haere atu ra Ietu i te mouà ra i Òriveta.

2 E i te poìpoì roa ra, ua hoì faahou mai ra o ia i roto i te hiero ra, e ua haere atoà mai ra te taata ia na ra, pärahi iho ra o ia i raro, e haapii atu ra ia rätou ra.

3 Ua arataì mai ra te mau päpaì parau e te mau Färitea ia na ra i te hoê vahine i roohia i te rave-raa-hia ra, ua tuu atu ra rätou ia na i röpü.

4 Ua parau mai ra rätou ia na: «E Rapi, roohia atu ra teie nei vahine te rave-mau-hia ra.

5 I parau mai hoì Möte i roto i te ture ra e, e pëhi i te reira i te ôfaì. E aha rä ta òe na parau?

6 I nä reira mai ra rätou i te rämäraa mai ia na, ia noaa ta rätou pariraa mai ia na. Ua piò iho ra Ietu i raro, ua päpaì iho ra ta na rima i te parau i nià i te repo.

7 Ua tämau mäite mai ra rätou i te uiraa mai ia na, ua tià aè ra o ia i nià, ua parau atu ra ia rätou ra: «Na te taata hara òre i roto ia òutou na e täora atu na i te ôfaì mätamua ia na.

8 Ua piò faahou iho ra o ia i raro, päpaì faahou iho ra i nià i te repo.

9 E ìte aè ra rätou i taua parau ra, faahapahia iho ra e to rätou iho âau, ua unuhi tätaìtahi noa atu ra rätou, o te taata paari tei nä mua na e tae noa atu ra i te taata hopeà, toe iho ra o Ietu anaè ra e taua vahine ra i te tià-noa-raa i röpü.

10 Ua tià aè ra Ietu i nià, e ìte atu ra aore roa e taata, maori rä o taua vahine anaè rä, ua parau atu ra o ia ia na: «E teie nei vahine, tei hea te feiä i pari mai ia òe nei? Aore roa e taata i faautuà mai ia òe na?

11 Ua parau mai ra o ia: «Aore roa, e ta ù Fatu. Ua parau atu ra Ietu ia na: «Eita atoà vau e faautuà atu ia òe. A haere, eiaha rä ia hara faahou.

Manaò.

I teie tau te ueue ra te reira i ta na huero i te mau vahi e topahia atu i te ärataìraa a te mataì, te vai puè, te ôpape, tei mau atu i nià i te mau fenua i haapaòhia. Ia topa i roto i te aru a te Atua Nui Tumu tahi, e rave te aru i ta na tuhaa i te haamaitaìraa ma te òre e uiui i te ìno e te maitaì te tupu âpitipiti nei ma te òre e faataa i te huru tupuraa o te reira e te reira räau, te reira àihere e te mau ànimara e ora ra, tei parauhia te mau ànimara taetaevao, e ta tetahi pae parauraa ànimara ôviri te fänaò nei i te  höroà a te aru. Te parau nei ia tätou te taata teie huru tupuraa òhipa ma te hiò na roto i te mata tei faataaê te tahi i te tahi tei maìti i te vahi e maitaì ai ta na mau ôpuaraa no to na oraraa. Teie mau tumu räau, mau àihere, tei matara mai, mai roto mai i te fenua te färii noa ra i teie maitaì, te vahi faahiahia, e tumu räau noa, te tumu räau, e àihere noa te àihere, e ànimara noa te ànimara, haapaò noa te reira i to na huru e to na hotu, oia hoì te huero o te tumu räau ia topa i nià i te fenua, e faaea tumu räau noa, te huero o te àihere e faaea àihere noa, hoê ätoà te pinia ânimara, tupu noa hotu noa ai i roto i te aru. Te noho òaòa noa nei te aru ma te hau, i ta te fenua faatupuraa, ia ueue te taata i ta na ueueraa, ia paì te taata ta na paìraa, ia ùtaru te taata i ta na ùtaruraa, e maitaì te huero i te mea ua faaineinehia te fenua. Te fenua ra te päpä ia te reira tei täma i te viivii o te taata, ia marae te marae e maitaì ai te haamoriraa i te Atua Nui Tumu Tahi.

Ia faaroo tätou i na tumu parau e maha e tià ia tauturu i ta tätou haamoriraa no teie mahana ma teie to na huru tupuraa :       

-Taramo 126, 6 O tei haere hoì e ueue i te huero mä te òto ra, e hoì faahou mai ä ia mä te òaòa, e mä te hopoi atoà mai i ta na ra mau ruru.

-Ìtaia 43, 20 Na te mau taehae o te aru e haamaitaì mai ia ù; te mau teni, e te mau tamähine o te ione ra; no te mea ua höroà vau i te pape i te vähi päpämarô, e te pape tahe i te mëtëpara ra, ei pape nä to ù ra mau taata, i tei haapaòhia e au ra.

-Firipi 3, 9 Ia riro vau ei taata no na, eiaha mä te parau tià na ù iho i te ture ra, o tei noaa mai rä i te faaroo o te Metia ra, o te parau tià a te Atua i te faaroo ra:

-Ioane 8, 8 Ua piò faahou iho ra o ia i raro, päpaì faahou iho ra i nià i te repo.

-Te piò mätamuaraa o Ietu i raro, ua päpaì iho ra ta na rima i te parau i nià i te repo, tià aè ra, hiò atu ra i te feiä e pari ra i teie vahine, Na te taata hara òre i roto ia òutou na e täora atu na i te ôfaì mätamua ia na.

-Te piti o te piòraa i nià i te fenua, päpaì faahou iho ra i nià i te repo, tià aè rae, to na reo i nià i te vahine «E teie nei vahine, tei hea te feiä i pari mai ia òe nei, Aore roa e taata i faautuà mai ia òe na, Aore roa, e ta ù Fatu. Ua parau atu ra Ietu ia na: «Eita atoà vau e faautuà atu ia òe. A haere, eiaha rä ia hara faahou.

Teie huru faatupuraa òhipa i roto i ta tätou mau taiòraa te faaìte noa mai ra te reira i te puai no te here o Ietu i te taata, te haapäpü noa ra te reira te tiàraa Tämaïti a te Taata o ta Na iho i faahiti i to na täamuraa i te fenua, ua piò, ua päpaì, to rima i nià i te repo, no te faaìte i te faufaa o te here i te taata.

I roto i te here, ua tähitihia te mau fifi atoà, eiaha no te mea ua òre te reira, aita rä to na e parau faahou. No te mea e here te Atua, te mea të òre e tupu i te taata, e tupu i te Atua. Ia ìte atoà rä tätou e, eita te parau o te here o te Atua e tano ia faataa-ê-hia i te faaroo o te taata e ta na täviniraa. Ta te taata te reira pähonoraa i te here o te Atua, te mea hoì e matara ai te mau ùputa atoà : i te vähi aita e ùputa, e riro e, te vai ra te tomoraa ; i te vähi aita e pape, e riro te reira i te puroro mai nä roto i te mato, e te pihaa mai nä raro i te fenua.  Ei tautururaa i to tätou manaò i te faahohoàraa i te huero tïnapi, e faaau tätou i te reira i te tahi huero miri, ta Ietu e haapäpü ra e, terä noa aè te rahi o to tätou faaroo, aita e mea eita e tià ia tätou i te rave, e taea noa atu i te faaöraa i te tahi tämera nä roto i te âpoo au. Te vähi taa ê rä, te mea ia e, aita te Fatu e tïtau nei i te faaroo o te tämera no te tomoraa nä roto i te âpoo au, no te mea eere te reira fifi no te tämera. I te hiòraa i te mau parau ta tätou i faahitihiti mai na, e tano ia parauhia e, na te taata noa ihoä e faaapiapi noa nei i te ùputa hoìraa i te Atua ra. Te vähi te taata i fifi roa ai, tei teie ia parau no te hoìraa ta na e hiò ra mai te tahi vähi ätea e te päpü òre to na parau, e tahi ihoä rä vähi e tano ia faaauhia i te tahi haereraa i muri, aore ra te tahi toparaa i raro ; e no te mea te vai rii ra te mataùtaù o te taata ia haere i te tahi vähi ta na i òre i mätau, manaò atu ra o ia e, mea maitaì aè te pärahi noa i te vähi tei reira o ia i te tiàraa. Te tano-mau-raa rä, eere teie i te vähi ìte-òre-hia e te taata, hau roa atu, ua ìte o ia i te èà, ua moèhia rä ia na, e aita o ia e haamanaò faahou ra. E ia parau hoì o Ietu e, A haere, eiaha rä ia hara faahou, te hinaaro noa nei o Ietu e faaìte i te èà e tiàma ai te taata i to na haereà. E au te oraraa ta tätou e ora nei i te tahi uru räau tei faaapiapi i to tätou märamarama, òre atu ai tätou e ìte i te èà e tae ai i te fare metua. Eere rä ia, i te hinaaro o te Atua, te faaruè ia tätou ia moè roa atu i roto i teie uru räau. E taoà rii atoà ihoä paha ta tätou i faatopatopa i nià i te èà o to tätou oraraa, te vai ra ta te mau metua i tuu mai no tätou e ta tätou e tämata nei i te pee, te vai ra hoì ta tätou iho e tuu nei no ta tätou mau tamarii. I te rahiraa o te taime, te hinaaro nei tätou i te tamarii ia pee i teie mau taoà rii ei räveà e fänaò ai rätou i te oraraa maitaì e te moni, ia riro rätou ei feiä ìtehia, te tura, e te mana ; e ia òre noa atu hoì ra, ia òaòa ia rätou i roto i te oraraa. No te rahi rä, te rau, e te piripiri te ôfaì i nià i te èà, eita atu ra te tamarii e ìte faahou e, te hea ôfaì të pee, faaea noa atu ra te tahi pae, ua haere hänoa te tahi pae mai te haapeàpeà òre te manaò i te vähi rätou e täpae atu ai. Ua tono roa mai te Atua Nui Tumu Tahi i te tahi taata no te tautururaa ia tätou ia òre ia hape te ôfaì e täora, o ia atoà iho të tiaì mai ra ia tätou i te fare metua. Ia ìte atoà rä tätou e, aita i taaau te èà e faahoì ia tätou i te fare metua, tano atu ai tätou e mäìti i tei au i to tätou manaò, e aita te mau ôfaì, te mau täpaò ta tätou e pee i faanahohia i roto i te aore, tei nià mau rä i te fenua i päpaì ai o Ietu i nià i te repo, i te vähi i reira to te Atua haaparahiraa ia tätou. E tano ia parauhia e, i te vähi tei reira te taata, tei reira te èà, tei reira te ôfaì, e tei reira te ùputa, oia te tomoraa. E ara atoà rä ia tätou, no te mea e rave rahi të tià mai i te parauraa e : teie te èà mau, teie te èà mau … E rave rahi të hema. Ia ìte mai tätou e, no te mea no roto mai te rahu i te Parau a te Atua, aita atu hoì ta te rahu tïtauraa maoti rä, te hanahana o te Atua e te faateniteniraa i to na iòa moà, eita ia te rahu e haavare. Te päpü atoà ra ia tätou e, eita te Tamaiti e tano e arataì i te taata nä nià i te tahi èà ê atu i ta te Metua i faaìte mai, e te mau täpaò hoì ta te Metua i tuu haere nä nià i te èà e faahoì ia tätou i te Atua ra, ta te Tamaiti atoà ia i rave, e ua tae roa atoà o ia i te parauraa e : A rave a àmu, o ta ù tino tenä ; a reva a inu, o ta ù toto tenä, no te mea o te räveà noa te reira e märamarama ai te taata, e ìte ai hoì i te èà ta te Atua i faaineine ia òhie to na hoìraa i te Atua ra, ta Ietu e parau nei e, a haere, eiaha rä ia hara faahou. Mai te peu i parau mai na tätou e, nä roto i te fenua e te Faufaa ora a te Atua ta na e mau ra, ua haafätata mai te Atua i te taata, nä roto i te Tamaiti a te taata, ua hinaaro te Atua e haapäpü faahou i te taata i to na hinaaro haafätata ia na. E tano ia parauhia e, nä roto ia Ietu, te Tamaiti a te taata, ua hinaaro te Atua e färerei roa i te taata, mata e mata, vaha e vaha, taata e taata, taata e te Atua. Nä roto ia Ietu, te ìte ra ia tätou e, e fänaò huru fänaò to tätou i te here o te Atua tei òre i hinaaro ia pohe tei faaroo i ta na Tamaiti, ia noaa rä ia na te ora mure òre. Mai te peu aita Ietu i mataù i te parauraa i te mau Päpaì parau e te mau Färitea, tei faariro ia rätou ei feiä tiaì ùputa e, e feiä haavare anaè, eiaha paha ia tätou e onoöno i te tihepu mai i te tahi feiä tiaì ùputa âpï. Mai te peu hoì nä roto i te Tamaiti a te taata, ua marua te mau patu i faataa ê noa mai na i te taata, eiaha atoà paha ia e faariro ei teòteòraa no tätou te haamauraa i te tahi mau patu âpï e ätea faahou ai te taata i te Atua. Ia tae tätou i reira, tätou iho të haafaufaa òre ra i te ôpuaraa faaora a te Atua. O tätou atoà te tahi feiä püai roa i te täpeà i te taata tei òre i auraro mai i ta tätou mau faanahoraa. I roto i ta tätou huru arataìraa i te parau o te Faaroo, e rave rahi roa te taime, aita ta te Atua e parau ia tätou, ua nä nià aè rä tätou i te Atua. E mea pinepine roa tätou i te òreraa e hinaaro ia tupu te hinaaro o te Atua, to tätou rä hinaaro ta tätou i ìmi i te räveà ia ìtehia e ia mataùhia e te taata. Ia hiòhia ta tätou mau peu e ta tätou mau faanahoraa, e tano maitaì atoà ia tätou te parau a te Fatu e nä ô ra e : Te tämöûû na òutou i te naonao, e te horomii noa na i te tämera (Mätaio 23, 24). Te auraa, mea ètaèta roa tätou i nià i te mau mea rii haapaòraa òre, te mau mea të òre e tauturu i te taata i te märamaramaraa i te hinaaro o te Atua, âreà te faatupuraa i te parau mau e te parau tià, nä reira hoì te aroha e te here, te mau mea e hanahana ai te iòa o te Atua, aita ia to tätou e manaò i reira. Eita tätou e faahiti faahou i te parau o te fenua ei ùputa no te raì, ua märamarama tätou i te reira vähi i teie nei. Te mea ta tätou e hiò mai, te parau ia o te taata e tomo nä roto i taua ùputa ra, no te mea aita e faufaa to te ùputa mai te peu aita e taata e tomo, aore ra mai te peu e haafifihia te taata ia tomo. No te aroha e te here o te Atua i te taata i tonohia mai ai Ietu. Te auraa, ua maoro roa te ùputa hoìraa i te Atua ra i te apiapi-noa-raa i te mau faatureraa e te mau faanahoraa a te taata, e tae noa atu i te huru e te hohoà o te Atua ta te mau arataì o te Faaroo i tuu i mua i te nünaa. Te ètaèta o te taata i nià i ta rätou mau faanahoraa, ua färerei atoà mai Ietu i te reira. Ua hinaaro rä o ia e haapäpü i te auraa o ta na òhipa : Eiaha e manaò e, i haere mai au e faaòre i te ture e te mau perofeta, aore au i haere mai e faaòre, e faatià rä (Mätaio 5, 17). I mua i teie taò faatià, e piti huru türamaraa e tano ia horoàhia. A tahi : ua haere mai Ietu e faahope i te parau, oia hoì e horoà i te tahi haamäramaramaraa hau atu i tei ìtehia ; a piti : ua haere mai o ia ia tupu te parau tià, oia hoì ua haere mai e faaìte i te hape, e tae noa atu i te mau vähi i rara ai ta te taata märamaramaraa i te parau a te Atua. Eiaha tätou e täora i te ôfaì i te âti Iuta, te Färitea, te Päpaì parau, e te mau Haapii ture. Te mau parau ta Ietu i parau i to na tau, te mau faahaparaa ta na i faatae i nià i te mau arataì o te Faaroo, e tano roa atoà ia parauhia no tätou i teie mahana. Noa atu ia e, a 225 mätahiti to tätou färiiraa i teie haapaòraa âpï, te reira atoà te roaraa o te tau to tätou horoàraa i te tahi hiòraa hape i nià i te Atua. Haere eiaha ia hara faahou.

 

Teraì òr. Faatura.

 

 

Ruta èv. 15.1-3 + 11-32 Iho

 

Tāpati 27 no Mäti 2022.

Iho

Taramo 34

1 E Taramo na Tävita i to na faahuru-ê-raa ia na iho i mua ia Âpïmereta, o tei tiàvaru atu ia na, e ua haere atu ra o ia.

2 E haamaitaì ä vau i te Fatu e òre e faaea. Ia vai tämau mäite ä te haamaitaì ia na i roto i to ù nei vaha

3 E ârue ta ù âau i te Fatu. Ia ìte mai tei pohe ra i te reira a òaòa atoà ai

4 E haamaitaì tätou i te Fatu, tätou atoà të faateitei i to na iòa.

5 Ua ìmi au i te Fatu, e ua parau mai ra o ia ia ù; e ua faaora ia ù i te mau mea ta ù i mataù ra.

6 Ua hiò atu rätou ia na, e ua haamäramaramahia mai; e aore to rätou mau mata i haamä.

7 Ua pii atu ra taua taata i pohe nei, e ua faaroo mai ra te Fatu; e ua faaora atu ra ia na i to na atoà ra mau àti.

8 Te pätia nei te merahi a te Fatu i te pühapa e àti noa aè i te feiä i mataù ia na, e ua faaora ia rätou.

9 A tämata na ia ìte i te maitaì o te Fatu. E ao to te taata i tiàturi ia na ra.

10 A mataù i te Fatu, òutou te feiä moà no na ra. Aore hoì e èreraa to te feiä i mataù ia na ra.

11 Ua ère te mau riona âpï i te mäa, e te pohe ra i te poìa; âreà tei ìmi i te Fatu ra, e òre roa e ère i te maitaì.

12 A haere mai na, e te mau tamarii na, e faaroo mai ia ù; e haapii au ia òutou ia mataù i te Fatu.

13 O vai ia taata i hinaaro i te ora, tei hinaaro ia ìte i te maitaì i to na puè mahana i te ao nei?

14 A täpeà i to arero i te ìno, e to vaha eiaha ia parau i te parau haavare.

15 E haapae i te ìno, e rave i te maitaì, e ìmi i te hau, e aruaru atu.

16 Tei te feiä parau tià ra to te Fatu mata, e tei ta rätou pure to na tarià.

17 E mata ê rä to te Fatu i te feiä i rave i te ìno ra, e ia òre roa ia manaòhia i te ao nei.

18 Te tiàoro nei te feiä parau tià e te faaroo mai ra te Fatu, e te faaora nei o ia ia rätou i to rätou mau àti atoà ra.

19 Te fätata nei te Fatu i te feiä âau paruparu ra, e te faaora nei o ia i te taata âau taiä.

20 E àti rahi to te taata parau tià ra; e faaorahia rä o ia e te Fatu i taua mau àti atoà ra.

21 Na te Fatu e tiaì i to na ra mau ivi, e òre roa te hoê e ôfatihia.

22 E pohe te paieti-òre i te ìno; e tei riri i te feiä parau tià ra, e mou ia.

23 E faaora te Fatu i te värua o to na ra mau tävini; e òre hoì te hoê e tiàturi ia na ra e faaruèhia.

Iotua 5.10-12

10 Pätia iho ra te tamarii a Ìteraèra i te pühapa i Tiratara, e ua haapaò rätou ìte pata, I te mahana hoê àhuru ma maha o te märama ra, i te ahiahi i te vähi ätea i Ierito ra.

11 E ua àmu iho ra rätou i te tïtona tahito o te fenua ra, ia poìpoì aè taua mahana pata ra, e te päne faahöpue òre, e te tïtona âpï tunu paa i taua mahana ra.

12 E àmu anaè iho ra rätou i te tïtona tahito o te fenua ra, òre aè ra te mäna ia poìpoì aè; aita atu ra hoì a te tamarii a Ìteraèra e mäna; àmu iho ra rä rätou i te mäa o taua fenua ra o Tanaana i te reira mätahiti.

2 Tōrīnetia 5.17-21

17 Tei roto anaè te taata i te Metia ra, ua riro ia ei taata âpï; ua òre te mau mea tahito ra; inaha, ua riro te mau mea atoà ei mea âpï.

18 Na te Atua rä taua mau mea atoà ra, o tei faafaite ia tätou ia na iho ia Ietu Metia nei, e ua tuu mai hoì ia mätou i te töroà faafaite nei.

19 Teie hoì taua parau ra, ei roto te Atua i te Metia i te faafäiteraa i to te ao nei ia na iho, e te huri òre atu i ta rätou hara ia rätou. E ua tuu mai hoì i te parau faafaite ra ia mätou nei.

20 E teie nei, e veà mätou na te Metia mai te mea e, te aò nei te Atua i te taata ia mätou nei; ei ono mätou i te Metia, i te aòraa atu i te taata e: «E faafaite òutou i te Atua.»

21 Ua faariro hoì o ia ia na, i tei òre i ìte i te hara ra, ei täraèhara na tätou; ia faarirohia tätou ei feiä parau tià i te aro o te Atua ia na ra.

Ruta èv. 15.1-3 + 11-32

(Mät 18,12-14)

1 Ua ruru atoà mai ra te feiä òhi tute e te feiä rave hara e faaroo ia Ietu.

2 Ua ôhumu iho ra rä te mau Färitea e te mau päpaìparau, nä ô aè ra: «Te ìte nei teie nei taata i te feiä rave hara, e te àmu atoà nei i ta rätou àmuraa.

3 Ua parau atu ra o ia ia rätou i teie nei parapore, nä ô atu ra:

11-32

Te parapore o te tamaiti moè i ìte-faahou-hia mai

11 Ua parau atu ra hoì o ia: «Toopiti a te hoê taata tamarii tamaroa.

12 Ua parau atu rä tei muri aè i te metua täne: «E ta ù metua, hö mai na i ta ù ra tufaa i te taoà nei. «Ua tufa iho ra o ia i te taoà na räua.

13 E muri ïti iho ra, ua haaputu iho ra te tamaiti hopeà i ta na, haere atu ra i te fenua roa, pühura atu ra i ta na taoà i te haapaò òre.

14 E pau roa aè ra, roohia iho ra taua fenua ra i te oè rahi, e àti iho ra o ia i te poìa.

15 Ua täàti atu ra o ia i te hoê taata-tupu no taua fenua ra, o tei tono ia ia na i roto i te âua e faaàmu i te puaa. 16 E ua hiaai atu ra o ia i te pipi i àmuhia e te puaa ra ia paìa o ia; aore hoì e taata i hopoi mai i te mäa na na. 17 E iho faahou mai ra to na iho huru mau, ua nä ô aè ra: «E rave rahi to ta ù metua tävini tärahuhia e mäa rahi ta rätou e e toe te tahi pae, e te pohe nei au i te poìa.

18 E tià vau e haere i ta ù metua ra, a parau atu ai ia na:»E ta ù metua, ua hara vau i te Atua o te raì e ia òe atoà hoì,

19 e eita atu ra e au ia ù ia parauhia e, e tamaiti na òe, e faariro òe ia ù mai te hoê i te mau tävini tärahu no òe nei.

20 Ua tià aè ra o ia, haere atu ra i ta na metua ra. E tei te ätea ê ä o ia, ìte mai ra ta na metua ia na, aroha mai ra, horo mai ra, täuvahi mai ra i nià i ta na àî, hoìhoì mai ra ia na.

21 Ua parau atu ra taua tamaiti ra ia na: «E ta ù metua, ua hara vau i te Atua o te raì, e ia òe atoà hoì, eita atu ra vau e au ia parauhia e, e tamaiti na òe.»

22 Ua parau atu ra rä te metua i te mau tävini: «A hopoi mai na i te àhu pü maitaì ra, e faaàhu mai ia na nei, e ôomo hoì i te täpeà i ta na rima, e te tämaa i ta na âvae:

23 e tii hoì i te täfa faaàmu ra e pätia, e àmu hoì tätou i te mäa, e òaòa hoì tätou;

24 o ta ù tamaiti nei hoì, i pohe na, e ua ora mai nei; i moè na, e ua ìteä mai nei. «Òaòa atu ra rätou.

25 Tei roto i te âua te tamaiti mätahiapo ra, te haere mai ra i te ùtuafare. E fätata mai ra te fare ia na faaroo mai ra i te òto vivo e te òri.

26 Ua tiàoro mai ra o ia i te hoê tävini, ua ui mai ra i taua mau mea ra.

27 Ua parau atu ra o ia ia na: «Teie mai nei to teina, e ua pätia iho nei to metua i te täfa faaàmu nei, no te mea i haere ora mai nei o ia aore e maì.»

28 Riri aè ra o ia aore aè ra i tae i roto i te fare: «haere atu ra te metua täne i räpae, täparu atu ra ia na.

29 Ua nä ô mai ra o ia i te parauraa mai i ta na metua täne: «Inaha, e rave rahi aè nei o ù mätahiti i te täviniraa ia òe nei, e aita roa aè nei au i faaroo taìàtä i ta òe parau. E aita ä òe i horoà noa mai i te hoê pinia puaaniho na ù, ia faaàmu atu vau i to ù ra tauà:

30 te hoìraa mai rä o to tamaiti na, o tei pühura i ta òe taoà na te mau vahine faaturi ra, pätia iho nei òe i te täfa faaàmu nei na na.»

31 Ua nä ô atu ra te metua ia na: «E ta ù tamaiti, e tià òe i ô nei ia ù nei, e te mau taoà atoà na ù nei, na òe ia. 32 E mea tià hoì ia tätou ia faaàmuraa mäa e ia òaòa; o to taeaè nei hoì, i pohe na, e ua ora mai nei; i moè na, e ua ìteä mai nei

Manaò.

Ia faaroo tätou i te mau parau âpï e àtutu ra e te mau hohoà e haapurorohia ra, e tià ia parauhia te ère nei tätou i te mau faanahoraa e au no teie huru tupuraa òhipa. Ua tiàtià te mau faatere mäìtihia e te mau nünaa rau noa atua ia te rau to rätou mau reo, to rätou mau hiroà, to rätou mau iho, ia faatupu i te tamaìraa, te àroraa hoê noa reo te faaroohia e tüpita te ènemi, e te tahi pae te äni ra ia i te tauturu i roto i te mau fenua e pärahi noa ra i roto i te hau. Ta rätou mau haamoriraa Atua, e ta rätou parauraa i te iòa o te Atua. E teie mau tià faatere na rätou e faaoti i te mau pohe o te taata te nünaa ta rätou e mau ra, e tei maìti ia rätou. Te vai nei te mau faatere mea na roto noa i te mau niuniu paraparau âfaìfaì no te faatupu i te parau o te hau, te tüpita noa ra te tahi pae e te pohepohe noa ra te taata, te mau tamarii, te mau àiü, teie mau pohe e paruparu te ture no te täparahiraa taata. E tätararaa ta teie mau faatere fenua no te faaìte ia i to rätou täamuraa i to rätou fenua, te auë nei ra te fenua i te horomiiraa i te toto o ta na mau tamarii, mai te mea ra ua riro te âau o teie mau faatere i roto i te mau ôpape te faataamino i to rätou mau fëruriraa i te roto i te âmahamaha, ua ö te teòteò i te vahi i reira te hau e tupu ai. Teie huru tupuraa òhipa ua faatahuahia te âparauraa e te mau faatere, ia faahiti hoì te tahi pae i te tauturu moihaa tämaì, e faahiti ra ia te tahi pae i te parau no te moni, to na auraa ua na te aore te parau faatupuraa hau. Ia faaìtehia mai te mau hohoà e puta atoà mai te mau fare pure to na auraa e mau taata pure Atua teie, e faaoti ra e, e täparahi i te taata. I mua i teie mau parau mea tià ia tätou ia faafäite ia tätou i mua i te Atua Nui Tumu tahi i te aniraa e, ia faaiho faahou te hau i roto i teie mau faatere, i te mea tävini atoà tätou no roto i te ôpuaraa faaora a te Atua. Te mau taiòraa i faanahohia no teie mahana, e mau parau ia tei faaìte i te mau raveà no te tomoraa i roto i te faanahoraa a te Atua mate hau, E ârue ma te âau atoà i te Fatu. Ia ìte mai tei pohe ra i te reira a òaòa atoà ai. E haamaitaì i te Fatu, tätou atoà të faateitei i to na iòa. I te mea ua ìmi tätou  i te Fatu, e ua parau mai ra o ia ia tätou; e ua faaora ia tätou i te mau mea ta tätou i mataù ra. Ua hiò tätou ia na, e ua haamäramaramahia mai; e aore to tätou mau mata i haamä. Ia ù i manaò ia pii taua taata ra i pohe, e ua faaroo mai te Fatu; e ua faaora ia na i to na atoà ra mau àti. Te auraa te pätia nei tätou i te pühapa i mua i te Fatu e àti noa aè i te feiä i mataù ia na, e ia faaora ia rätou. No te tämataraa ia ìte i te maitaì o te Fatu. E ao to te taata i tiàturi ia na ra, te fätata nei ra te  Fatu i te feiä âau paruparu, e te faaora nei o ia i te taata âau taiä. E àti rahi to te mau taata e faaìte ra i te parau tià ; e faaorahia rä o ia e te Fatu i taua mau àti atoà ra. Na te Fatu e tiaì i to na ra mau ivi, e òre roa te hoê e ôfatihia. E pohe te paieti-òre i te ìno; e tei riri i te feiä parau tià ra, e mou ia. A  faaroo mai na ra i te mau ìrava tumu no teie mahana.    

-Taramo 34, 23 E faaora te Fatu i te värua o to na ra mau tävini; e òre hoì te hoê e tiàturi ia na ra e faaruèhia.

-Iotua 5, 12 E àmu anaè iho ra rätou i te tïtona tahito o te fenua ra, òre aè ra te mäna ia poìpoì aè; aita atu ra hoì a te tamarii a Ìteraèra e mäna; àmu iho ra rä rätou i te mäa o taua fenua ra o Tanaana i te reira mätahiti.

-2 Torinetia 5, 20 E teie nei, e veà mätou na te Metia mai te mea e, te aò nei te Atua i te taata ia mätou nei; ei ono mätou i te Metia, i te aòraa atu i te taata e: «E faafaite òutou i te Atua.»

-Ruta èv. 15, 17 E iho faahou mai ra to na iho huru mau, ua nä ô aè ra: «E rave rahi to ta ù metua tävini tärahuhia e mäa rahi ta rätou e e toe te tahi pae, e te pohe nei au i te poìa.

Te faufaa e vai nei i roto i teie na tumu e maha to te Atua Nui Tumu Tahi faaiho-noa-raa i te parau no te anoenoe i roto i te âau taata, ia tupu tämau te faafäiteraa i te taata i mua i to na taeaè, e i te mau taata atoà. Te faaìteraa a te Parau Maitaì o teie mahana, te parapore no te Metua tane e ta na, na tamarii tamaroa e piti, teie to na tupuraa : I roto i te rururaa ua âmui atoà mai te feiä òhi tute e te feiä rave hara e faaroo ia Ietu. Te mau tià faaroo âti-Iuta e te mau päpaìparau ua ôhumu rätou te ìte nei teie taata i te feiä rave hara, e te àmu ra i ta rätou àmuraa. No te tauturu i teie mau faatere ua faatià o Ietu i te parau no te Metua tane, e ta na, na tamarii tamaroa e piti.

Ua äni te teina i ta na tuhaa : E ta ù metua, hö mai na i ta ù ra tufaa i te taoà nei. «Ua tufa iho ra o ia i te taoà na räua, te mätahiapo atoà i roto i teie tuharaa. Ua vaiiho te teina i te ùtuafare metua ua haere i te haereraa roa, na te âanoraa, e te aoaoaraa o te fenua e tere òaòa e te î ma te haapeàpeà òre te ànanahiraa o te oraraa. Ua ü teie tamarii e piti fifi te pau ta na faufaa, e te oè o te fenua, ua ìmi i te mau raveà, te òhipa i òre i mätauhia e a na ua täàti o ia i te hoê taata-tupu no taua fenua ra, o tei tono ia na i roto i te âua e faaàmu i te puaa. No te poia ua àmu e te puaa ia paìa ra o ia. Iho faahou mai ra to na iho huru mau: «E rave rahi to ta ù metua tävini tärahuhia e mäa rahi ta rätou e toe te tahi pae, e te pohe nei au i te poìa.

Ua tià ua hoì e parau i to na  Metua : E ta ù metua, ua hara vau i te Atua o te raì e ia òe atoà hoì,

Te Metua, E tei te ätea ê ä o ia, ìte mai ra ta na metua ia na, aroha mai ra, horo mai ra, täuvahi mai ra i nià i ta na àî, hoìhoì mai ra ia na. Te mau parau i faaineinehia e teie tämaïti ua faahiti o ia i mua i to na Metua, te pähonoraa.

-A hopoi mai na i te àhu pü maitaì ra, e faaàhu mai ia na nei,

-E ôomo hoì i te täpeà i ta na rima,

-E te tämaa i ta na âvae:

-E àmu hoì tätou i te mäa, e òaòa hoì tätou

-O ta ù tamaiti nei hoì, i pohe na, e ua ora mai nei; i moè na, e ua ìteä mai nei. «Òaòa atu ra rätou.

Te auraa te òhipa i ravehia e te Metua, te faahoìraa i te tiàraa tamarii o ta na tämaïti èi fatu tumu i ta na faufaa.

Te tamaiti mätahiapo ra, ua faatupu te ìnoìno i te òhipa i faanahohia e te Metua i te hoìraa mau o to na teina.

Te Metua, E ta ù tamaiti, e tià òe i ô nei ia ù nei, e te mau taoà atoà na ù nei, na òe ia. E mea tià hoì ia tätou ia faaàmuraa mäa e ia òaòa; o to taeaè nei hoì, i pohe na, e ua ora mai nei; i moè na, e ua ìteä mai nei.

Te tià e haafaufaa i roto i teie mau parau, te tiàraa Metua oia hoì te Iho Metua, to na auraa e faatupu ora, ia ora te ùtuafare, e te vaamateìnaa.

 

Teraì òr. Faatura.

 

 

 

Ruta èv. 13.1-9 Vaiiho.

 

Tāpati 20 Mäti 2022.

Vaiiho.

Taramo 103

1 Na Tävita. E haamaitaì i te Fatu, e ta ù värua, e to roto ia ù nei, i to na ra iòa moà.

2 E haamaitaì i te Fatu, e ta ù värua, e eiaha te hoê maitaì a ana i horoà mai ra e haamoèhia.

3 O ia tei faaòre i ta òe atoà ra mau hapa, e o tei faaora i to òe atoà ra mau maì,

4 o tei faaora ia òe i te pohe, o tei faatoröna ia òe i te hämani maitaì e te aroha,

5 o tei faaî i to vaha i te maitaì, ia faaâpï-faahou-hia òe mai te àeto ra.

6 Te rave ra te Fatu i te parau tià e te au i te feiä atoà i hämani-ìno-hia ra.

7 Ua faaìte o ia i ta na haapaòraa ia Möte, e ta na òhipa i te tamarii a Ìteraèra.

8 E aroha e te hämani maitaì to te Fatu, e òre e riri vave, te rahi ra to na aroha.

9 E òre o ia e tämau i te aò mai ia tätou e òre hoì e vaiiho maro i to na riri e a muri noa atu.

10 Aita aè nei o ia i tähoo mai ia tätou e ia fäito i ta tätou mau hara, aore hoì i faautuà mai ia tätou e ia fäito i to tätou mau ìno.

11 Mai te teiteiraa o te mau raì i nià i te fenua nei, mai te reira te rahi o to na aroha i te feiä i mataù ia na ra.

12 Mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei.

13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra.

14 Ua ìte hoì o ia i to tätou huru, te manaò ra o ia e, e repo tätou nei.

15 O te taata nei e au to na puè mahana i te àihere nei: mai te tiare i roto i te aru ra to na ruperuperaa.

16 Ua farara anaè te mataì nä nià iho ra, ua mou ia, e to na vähi i tupu ai ra e òre e ìte faahou ia na.

17 Âreà te aroha o te Fatu mai tahito mai ia e a muri noa atu, i te feiä i mataù ia na ra, e ta na ra parau tià i te tamarii a ta rätou ra mau tamarii,

18 i te feiä i haapaò i ta na ra faufaa, e tei haapaò i ta na ra parau e rave ra.

19 Ua haamau te Fatu i to na ra teröno i nià i te mau raì, e ua auraro te mau mea atoà nei i to na ra pätireia.

20 E haamaitaì i te Fatu, e to na ra mau merahi e, o tei hau i te püai, e ua haapaò i ta na faaueraa, i te faarooraa i ta na reo ia parau.

21 E haamaitaì i te Fatu, òutou atoà, o to na ra mau pupu, o to na ra mau tävini tei rave i to na ra hinaaro.

22 E haamaitaì i te Fatu, e ta na atoà ra mau òhipa, i te mau vähi atoà ra i to na ra hau. E haamaitaì i te Fatu, e ta ù värua e.

Ètoto 3.1-15

1 Tiaì atu ra Möte i te nana a te metua hoovai iho, a Ietero tahuà i Mitiäna ra; e ua arataì atu ra o ia i taua nana ra i te ôtià o te mëtëpara, e tae atu ra i te mouà o te Atua ra i Hörepa.

2 Ua fä mai ra te merahi a te Fatu ia na i roto i te auahi i röpü i te hoê pü àihere; e ua hiò atu ra o ia, e inaha, te àma ra te pü àihere i te ahi, e aore taua pü àihere ra i pau.

3 Ua nä ô aè ra Möte, E haafätata na vau e hiò i teie nei ôrama rahi; i te mea i òre i àma ai teie nei pü àihere. 4 E ia hiò mai ra te Fatu e te haafätata atu ra o ia e hiò, ua pii mai ra te Atua ia na mai rotopü mai i taua pü àihere ra, nä ô mai ra, E Möte, e Möte, ua parau atu ra o ia, Teie au:

5 Ua nä ô mai ra o ia; Eiaha òe e haafätata mai i ô nei; a ìriti i to tämäa i to âvae iho ra; e vähi moà hoì tënä na vähi ta òe e tià mai na:

6 e ua nä ô mai ra o ia, O vau te Atua o to mau metua na, O te Atua o Âperahäma, e te Atua o Îtaata, e te Atua o Iatöpa. Ua püroù iho ra Möte i to na mata, i mataù hoì o ia ia hiò atu i te Atua.

7 Ua parau mai ra te Fatu, Ua hiò päpü vau i te pohe e to ù ra mau taata i Àifiti, e ua faaroo vau i to rätou auë i ta rätou mau faaau òhipa; e ua ìte hoì au i to rätou òto;

8 e i haere mai nei au i raro nei e faaora ia rätou i te rima o to Àifiti; e e arataì ê mai hoì ia rätou i taua fenua ra i te hoê fenua maitaì, e te ätea; e fenua e pihaa noa mai te ü e te meri; i te fenua no te âti-Tanaana, e no te âti-Heta, e no te âti-Àmori, e no te âti-Periti, e no te âti-Hevi, e no te âti-Ieputi ra:

9 e teie nei, inaha, ua tae roa mai te òto o te tamarii a Ìteraèra i ô nei ia ù nei, e ua hiò vau i te hämani ìno a to Àifiti i hämani ìno mai ia rätou:

10 e haere mai òe, i tënä na, e tono vau ia òe ia Faraò ra, e na òe e arataì mai i to ù ra mau taata, te tamarii a Ìteraèra mai Àifiti mai.

11 Ua parau mai ra Möte i te Atua, O vai hoì au a tae ai au ia Faraò ra, e a arataì mai ai au i i te tamarii a Ìteraèra mai Àifiti mai?

12 Ua parau mai ra o ia, Ei pïhaì atoà iho ia vau ia òe. E teie ta òe täpaò e ua tonohia òe e au: Ua oti anaè te mau taata i te ärataìhia mai e òe mai Àifiti mai, ei nià mau i teie nei mouà òutou e haamori ai i te Atua.

13 Ua parau atu ra Möte i te Atua, Ia tae rä vau i te tamarii a Ìteraèra ra, e ia parau atu vau ia rätou e, I tonohia mai au e te Atua o to òutou mau metua ia òutou nei, ia na ô mai rä rätou ia ù e, O vai te iòa? E nä hea atu vau ia rätou?

14 Ua parau mai ra te Atua ia Möte, TE VAI NEI AU, O VAU E VAI NEI: e ua nä ô mai ä o ia, Teie ta òe e parau atu i te tamarii a Ìteraèra, Na TE VAI NEI AU vau i tono mai ia òutou nei.

15 Ua parau mai ra hoì te Atua ia Möte, E nä ô atu òe i te tamarii a Ìteraèra, Na te Fatu, te Atua no to òutou hui-metua, te Atua o Âperahäma, te Atua o Îtaata, te Atua o Iatöpa, na na vau i tono mai ia òutou nei, O to ù ia iòa e a muri noa atu, o to ù ia faaìte e tae noa atu i te mäuiui atoà ra:

1 Tōrīnetia 10.1-12

Te vai-ara-raa i te mau îtoro

1 Aore hoì au i hinaaro, e a ù mau taeaè e, ia òre òutou ia ìte e, i raro anaè aè to tätou hui-metua i te ata, e ua haere päatoà nä raro i te tai.

2 E i päpetito-anaè-hia ia Möte i roto i te ata, e i raro hoì i te tai.

3 E ua àmu rätou atoà i taua mäa täpaò hoê ra, e ua inu rätou atoà i taua pape täpaò hoê ra.

4 Ua inu hoì rätou i te pape no roto i taua mato täpaò i pee mai ia rätou ra; e taua mato ra o te Metia ia.

5 Aita rä te Atua i mauruüru i te rahi o rätou ra: pohe iho ra hoì rätou i te mëtëpara ra.

6 Ua riro hoì taua mau mea ra ei hiòraa na tätou, ia òre tätou ia nounou i te mau mea ìino ra, mai ia rätou i nounou ra.

7 Eiaha atoà òutou ei haamori îtoro, mai te hoê pae o rätou ra; oia hoì tei päpaìhia ra e: «I pärahi te mau taata i raro e àmu e e inu hoì, e tià aè ra i nià e ùpa.»

8 E eiaha atoà tätou e faaturi mai te hoê pae o rätou i faaturi ra, e pohe iho ra e piti àhuru e toru tiàhapa i te tautani i te mahana hoê ra.

9 Eiaha atoà tätou e àa atu i te Metia, mai te hoê pae o rätou i àa ra, e pohe iho ra i te ôfï.

10 E aha atoà òutou e ôhumu, mai te hoê pae o rätou i ôhumu ra, e pau iho ra i te pohe i taua täparahi ra.

11 Roohia iho ra rätou e taua mau mea ra ei hiòraa, e ei aò mai hoì ia tätou, i te feiä i roohia mai i te hopeà o te mau tau nei, i päpaìhia ai.

12 E teie nei, o tei manaò e te tià ra o ia, e ara o ia o te hià.  

Ruta èv. 13.1-9

Te tätarahapa

1 Tei reira te hoê pae taata i parau mai ia Ietu i te mau taata i Tarirea, tei ânoìhia e Pirato to rätou toto i te toto o ta rätou mau tütia ra.

2 Ua parau atu ra Ietu ia rätou, nä ô atu ra: «Te manaò na òutou e, e feiä hara rahi taua mau taata Tarirea ra i to Tarirea atoà ra, o rätou i nä-reira-hia?

3 E faaìte atu vau ia òutou: aore. Ia òre rä òutou ia tätarahapa, mai te reira atoà ia to òutou pohe.

4 E nä taata tino àhuru mä vaù i maìrihia e te fare rahi i Tiroama ra, e pohe iho ra, te manaò na òutou e, e feiä hara rahi rätou i to Ierutarëma atoà ra?

5 E faaìte atu vau ia òutou: aore. Ia òre rä òutou ia tätarahapa, mai te reira atoà ia to òutou pohe.

Te parapore o te tumu tute hotu òre

6 Ua parau atoà atu ra o ia i teie nei parapore: «E tute ta te hoê taata i tänuhia i roto i ta na ra ôvine, e haere atu ra o ia e hiò i te mäa i nià iho e aore.

7 Ua parau atu ra o ia i te faaàpu i taua ôvine ra: «Inaha, o te toru teie to ù mätahiti i te haereà mai e hiò i te mäa i teie nei tute, e aita roa: e täpü atu, E aha o ia i faaapi ai i te ô?»

8 Ua parau mai ra o ia ia na, nä ô mai ra: E ta ù fatu, e vaiiho noa aè na ia hoê aè mätahiti toe, ia ûtaruhia e au ia tuuhia te para;

9 peneiaè o te hotu, e aore ra, a täpü atu ai òe i muri aè.»

 Manaò.

I teie tau ta tätou e ora nei mea òhie te mau haaparareraa i te mau parau âpï, mate haapäpühia e te mau hohoà no taua mau tupuraa òhipa ra, na te tahi noa maa niuniu âfaìfaì e pata e haapüroro i taua taime ra ihoä ua reva i roto i te mau vahi i reira i te haaponoraahia e mau faanahoraa faahiahia mau teie. Teie mau faanahoraa te faaìte noa mai ra ia tätou i te huru no te oraraa e tupu ra i roto i te vaamateìnaa i Mäòhi Nui nei e vitiviti taaê to teie mau mauhaa, ua ö tätou i roto i teie mau faanahoraa ia au i te mau faatïanianiraa, te turu nei tätou i teie mau faanahoraa ma te haapeàpeà òre te fëruriraa, e tià ia parauhia tei färii i teie mau faanahoraa ua hinaaro ia i te tïtau te tahi atu mau tupuraa òhipa ê atu tei òre i matauhia i te mau mahana atoà. Teie mau mauhaa haapurororaa parau âpï, te rahiraa o te feiä âpï e faaòhipa nei teie mau raveà ia au i to rätou ìte, e hämani atoà rätou i te tahi mau taò âpï i roto i te mau fare haapiiraa mai teie i roto i te reo Färani, te pronom personnel IL e te ELLE, no te faaìte i te hoêraa o teie na taò, te parauhia te IEL, e neutre teie no na pronom personnel e piti, e teie taò ua tae i roto i te fare vänaa no te fenua Färani te uiui ra e nahea, ua tuuhia ra i roto i te Petit Robert. No te aha teie huru manaò no te faaìte ia i teie huru o te feiä âpï i to rätou matara i roto i te reo ma te tiäì òre i te tahi faanahoraa mai roto mai i te mau àivänaa no te reo. Ua ìte teie feiä âpï i te faatura i te tiàraa taata i hämani ai rätou i teie taò IEL, naò ia teie manaò i te parauraa o te Aroha teie no te Atua i roto i teie feiä âpï. O teie te tahi huru faaìteraa o te tià ia faanahohia, no te haafatataraa i pïhaì iho i teie feiä âpï. Ia faaroo hoì tätou i ta tätou mau taiòraa no teie mahana, te tonohia nei te taata ia haere e faatiàmä i te taata ia ta taratara te mau faanahoraa i ôpanihia te taata i roto i te teimaha o te mau hopoià faufaa òre. E no te faatupuraa i te mau âparauraa te taata i te taata i te iòa o te Atua Nui Tumu Tahi. Teie te haapotoraa no ta tätou na taiòraa e maha no teie mahana :        

-Taramo 103, 11 Mai te teiteiraa o te mau raì i nià i te fenua nei, mai te reira te rahi o to na aroha i te feiä i mataù ia na ra.

-Etoto 3, 14 Ua parau mai ra te Atua ia Möte, TE VAI NEI AU, O VAU E VAI NEI: e ua nä ô mai ä o ia, Teie ta òe e parau atu i te tamarii a Ìteraèra, Na TE VAI NEI AU vau i tono mai ia òutou nei.

-1 Torinetia 10, 12 E teie nei, o tei manaò e te tià ra o ia, e ara o ia o te hià.

-Ruta èv. 13, 8 Ua parau mai ra o ia ia na, nä ô mai ra: E ta ù fatu, e vaiiho noa aè na ia hoê aè mätahiti toe, ia ûtaruhia e au ia tuuhia te para; 9 peneiaè o te hotu, e aore ra, a täpü atu ai òe i muri aè.»

Te parau e au no tätou i teie mahana teie ia, te parau ia no te tätarahapa, e te tute hotu òre i roto i teie na tumu parau e piti, hoê e taata, e te tahi e tumu räau e to na mäa. Te tätarahapa e parau ia no te taata i te taata, teie ia ta Ietu e hinaaro nei e haamanaò i te taata èiaha e ìmi i te hape i roto i te hara, ua täparahihia te taata i te vahi haamoriraa, ua töpahia te tahi mau taata i te patu fare. Te manaò o Ietu ia òre rätou ia tätarahapa mai te reira atoà to rätou pohe. I teie huru parauraa na Ietu, no te faaìte noa ia i te taata i ta na hopoià i te taime a tupu ai teie huru òhipa.

Te parau no te tute hotu òre, e o ia i te hoê parapore, E tute ta te hoê taata i tänu i roto i ta na  ôvine, e haere atu ra o ia e hiò i te mäa i nià iho e aore. Inaha, o te toru teie o te mätahiti i te haereà mai e hiò i te mäa i teie nei tute, e aita roa te manaò e täpü te faaapi ra teie tumu tute i te ô. E ta ù fatu, e vaiiho noa aè na ia hoê aè mätahiti toe, ia ûtaruhia e au ia tuuhia te para, peneiaè o te hotu, e aore ra, a täpü atu ai òe i muri aè.

E tià ia parauhia i roto i na parau e piti nei, te ìriti nei o Ietu i te ùputa o te fenua ia amo te taata i ta na hopoià i te hinaaro o te Atua Nui Tumu Tahi. Ia ìmi ra te taata i te mau raveà atoà i te faanaho ta na òhipa ia au te tupuraa no te Aroha te Here e te hau.

E hape huru hape to tätou e manaò nei e, aita ta tätou parau e taui nei : mea aè, e parau no te fenua ; mea aè, e parau no te fenua. Eere änei e, no te mea te pohe atu ra te hoê taata, aore ra no te mea tei nià o ia i te èà o te pohe, e rahi atoà ai te parauraa ia na i te parau o te ora, e no te mea hoì aita to te taata e parau i räpae aè i te fenua e te ôpuaraa a te Atua, e parau atu ä ia ia na i te aha.

Teie parau tahito roa ta Ietu i faahiti i te hiòraa i te mau arataì o te Faaroo i to na tau, te riro noa nei ia ei parau mau ta tätou e ìte noa nei i te tupuraa. Ua taui rii te parauraa, eere faahou te Haapii ture, te Päpaì parau, e te Färitea. E òrometua e te tiàtono te parauraa i teie nei, te peu rä, aita ia i taui. Ia tütonu to tätou manaò i nià i te mau parau a te Fatu, e ìte tätou e, eere te nünaa terä e fifi ra, no te mea ua ineine te nünaa i te tomo i te vähi e türamahia ra e te märamarama o te parau, to na rä mau arataì teie e haafifi nei ia na. Te òhipa mau atoà ia i tupu i te tau o Ietu i to na tämataraa i te ìriti i te ùputa o te ìte nä roto i ta na mau haapiiraa. Aita atu feiä i haafifi mai ia na maoti rä, te mau arataì o te Faaroo, tei hinaaro ia pärahi noa te nünaa i raro aè i ta rätou faanahoraa, e ta rätou haavïraa. Eere rä to rätou tiàraa ei arataì no te Faaroo ta Ietu e haapeàpeà ra, ta Ietu faahaparaa, te mea ia e, te feiä ta te märamarama o te Parau a te Atua i faaìte i te ùputa o te pätireia, o rätou atoà teie e faaapiapi nei i te tomoraa ; e ia òre roa atu ihoä te taata ia tomo, ua hopoi-ê-hia e rätou te täviri o te ìte, te auraa, ua hunahia e rätou, aore ra ua ruri-ê-hia e rätou te parau mau, no to rätou hinaaro ia pärahi noa te nünaa i roto i te pöiri. Aita atu e òhipa rahi ta rätou i ìte maori rä, te haamataùraa i te taata, o te märamarama rätou, e o te ora atu. Eiaha ia hape to tätou manaò, aita te mau arataì o te Faaroo e mau ra i te parau mau, ta rätou òhipa tumu e te mea e horoà i te auraa i te tiàraa ta rätou e mau ra, te arataìraa ia i te taata i roto i te parau mau, e na te märamarama ihoä o te parau e tauturu i te taata i te ìteraa i taua parau mau ra. O ta Ietu ia e parau ra e a tätarahapa, e te reo o te tävini i to na fatu, e vaiiho mai na ù e àtuàtu, oia atoà ia teie feiä âpï e hämani nei i te mau taò ia ua i to rätou tau.

 

Teraì òr. Faatura.