PAPA HAAMORI Mätahiti Âpï Ètärëtia Porotetani Mäòhi 2022.

 

PAPA HAAMORI

 

Pehepehe : Taperaa Mäòhi (Turo a RAAPOTO)

 

Mäòhi e, Mäòhi. E upoo tià òe i te pö ra, a tïfene ai òe i to âvae i te maru o to òe hau. O Mutu te pö, o Tïreo te ao, ua roohia te pö i te ao, ua mahuta te uri, Mäòhi e, Mäòhi, a ara, ua hiti te tau.

 

Ua manaòhia òe e, ua pohe. E rave rahi tei hinaaro i te faaora ia òe. Ua tae mai te faaroo âpï e to na mau veà. Ua peàpeà rätou rätou iho, teie feiä. E au ra e, e maitaì aè ta te tahi ora i ta te tahi.

 

Ua manaòhia òe e, ua pohe. Ua tae mai te mau tià o te tahi hau. Te manuä tamaì e te faèhau. Ua àro rätou ia òe mä te pupuhi, no to rätou hinaaro faaora ia òe.

 

Te teitei noa atu ra te mahana. Eie ä to òe mau faaora e àro nei rätou rätou iho : Tahoêraa hui raatira, Tävini hui raatira, To tätou âià, Ia Mana te nünaa, Täpura hui raatira, … E au ra e, e maitaì aè ta te tahi ora i ta te tahi.

 

Ua puru te fenua i te taèro pohe o Moruroa, no teie ä hinaaro faaora ia òe. Ua araa te ora o verä, te tape noa atu ra òe. Ua taupe to òe upoo. Aita ä òe i fiu ? Te tape ra te mahana, aita ä òe i ravaì ?

 

Mäòhi e, Mäòhi, ua àitau to òe mau faaora. Aroharoha aè i te pö ra, e färerei ia te taata i te taata. E ài huà räau òe, te ài hotu ra rätou, na to pera i haapori, e aha atu ä ia.

 

Mäòhi e, Mäòhi. Ua tape roa to òe ora. A tïfene i to âvae i teie, o Tïreo te pö a ùänei. Tei reira to òe ao, ta rätou e parau ra e pö. I reira ra, na òe ia e faaora ia rätou.

 

Aroharaa

 

E te mau tamarii a te Tumu, a färii mai i te hau o te Metua. Ei hau, ia hau to tätou âau. A pärahi anaè i roto i te manaò hoê e te hinaaro hoê, ia hanahana to na iòa nä roto ia tätou. A haapae i te mau mea atoà e faaapiapi ra ia tätou, i te ìteraa i te Atua. Ia vai mai te òaòa o te Fatu i roto ia tätou.

 

 

 

Taùraa

 

E te Atua e, i vai na òe, te vai nei òe, e e vai ä òe i roto i to òe hanahana rahi. Aita to òe tiàraa Atua, to òe moà i haafifi ia òe i te haafätata mai ia mätou. Mätou nei rä te taata nei, teie e faaätea nei ia òe. No reira e te Atua, i teie taime, te ani nei mätou ia òe, ia tomo mai i roto i te haamoriraa nei. No òe mätou i âmui mai ai i teie mahana. E to mätou Atua tei î i te here metua, te metua o to mätou òaòaraa. Mauruuru i to tätou färereiraa. Te faahaèhaa nei mätou i mua i to òe tura e to òe moà no te ani ia òe e, ia vai mai to òe here e to òe aroha i nià ia mätou nei. O òe te Fatu o ta mätou täviniraa, ia òe e òaòa ai mätou.

 

Himene

 

Fäìraa Faaroo

 

Te Atua ta tätou e tiàturi nei, te Atua ia o to tätou mau hui Tupuna, te Atua o to tätou mau metua, to tätou ia Atua i teie mahana, te Atua o te uì hou, o te Atua Rahu Nui ia. Na te mana o ta òe parau i faataa te vai i te repo marö, i fenua mai ai te fenua, i tai ai te tai, i reva ai te reva, i raì ai te raì. Ua faatupu atoà ta òe parau mana i te märamarama e türama nei i te mau mea ora atoà o ta òe i rahu. Aita ra òe i faaòhipa noa i te parau, ua rave roa atoà to òe rima, o mätou ia i taata mai ai. Ua horoà òe i te reira taata i to na iho, to na hïroà e to na reo. E te Atua Tumu Nui, o òe te Tumu o teie ao e te mau mea atoà e ora nei. E Atua Metua, inaha, te färii nei òe ia mätou ei tamarii na òe.

 

Ietu Metia te parau i riro mai ei taata, te tamaiti ôtahi a te Atua, ta te päpaì Èvaneria e parau ra e : « I aroha mai te Atua i to te ao, e ua tae roa i te horoà mai i ta na tamaiti fänau tahi, ia òre ia pohe tei faaroo ia na, ia roaa rä te ora mure òre ». O òe i tonohia mai e nati faahou i te taata i te Atua e i te fenua to mätou metua vahine faatupu ora. Nä roto ia òe, ia ìte-faahou-hia te ture o te here e te aroha.

 

Te Värua Maitaì, te rima òhipa o te Atua i roto i teie nei ao, e faaârepurepu òe i to mätou âau i te färiiraa i te huero ta te Rahu Nui e hinaaro ra e faatupu e ia faahotu mätou, ei hanahana no to na iòa Moà.

 

Te fenua e to na î, te tai e to na î, te reva e to na î, e täpaò atoà te reira no to òe here e to òe aroha hau ê e te Atua Metua ia mätou. Te riro atoà nei rätou ei tauturu ia mätou i roto i ta mätou täviniraa ia òe e te Atua.

E te Rahu Nui e, ua rau te mau tävini ta òe e tono nei no te tauturu ia mätou ia ìte i to òe here rahi ia mätou. Mea au aè ra na mätou e täpapa i te mau mea e aratö nei ia mätou i roto i te àti e te pohe.

 

E te Atua e, e mana rahi to òe, te ani nei mätou ia òe, ia rahu ta òe parau i te taata tätaì tahi ia au i to òe hinaaro, ia òre mätou ia hema haere noa, mai te tupa e vare i te mäa täporo, ia paari rä mätou i roto i te tiàturiraa ia òe, ei ora no mätou.

 

Ia òe e riro ai ta mätou täviniraa ei òaòaraa. Ua ìte mätou e, noa atu te haìhaì o to mätou reo, e faaroo mai òe i ta mätou e ani atu nei. No òe te Hau, e te Mana, e te Hanahana e a muri noa atu. Amene

 

Himene

 

Pure no te taiòraa i te parau a te Atua.

 

E te Fatu, i mua i teie parau ta mätou e taiò, a haafäriu mai i to mätou aro, ia vai matara noa te ùputa o to mätou tarià, e to mätou âau, e to mätou mänava, no te faaroo e te färiiraa i to òe reo. Amene

 

Taiòraa :

 

Pure i muri mai i te taiòraa i te parau a te Atua.

 

E te Fatu, ia riro ta òe parau ei mäa maitaì na mätou no teie nei mahana. Amene

 

Himene

 

Faaitoitoraa

 

Himene

 

Parau Faaara - Horoà

 

Pure Ärai

 

E te Atua to mätou Metua, te haamanaò tämau noa nei mätou, te papa o ta mätou täviniraa, o to mätou ia hoêraa, to mätou färiiraa i te hereraa i to mätou Mäòhiraa, e i te hereraa i to mätou fenua, te vähi e ruru ai mätou, te vähi e fänaò ai mätou i te hau, te maitaì e te ora.

 

E te Atua Nui Tumu Tahi e, ia hiti mai te hihi o te rä i nià i ta òe mau tamarii, to märamarama tei türama i to mätou mau haereà, tei haapii faahou ia mätou i te here i to mätou tauaro, here i to mätou reo Mäòhi, here i to mätou hïroà Mäòhi e te hereraa ia òe ei puna pau òre no to mätou maitaì.

 

Mätou e ora nei i Mäòhi Nui nei, ia òre roa mätou ia ätea ia òe, e ia haapae roa mätou i te tiàturiraa i te taata. Te ani nei òe ia mätou ia faaroo mätou e ia ìte i te mau täpaò o te here Metua e tähei nei i te fenua no te faaara tämau ia mätou e, aita to mätou e ora i räpae i to òe here Metua.

 

E te Atua e, ua api te raì e te fenua i to òe here, e te òaòa nei ta òe rahu i te färiiraa ia òe aita e mahana tuua, ia nä reira atoà hoì mätou i roto i ta mätou täviniraa.

 

Ia tupu roa ta òe i ôpua no te ora o to mätou nünaa Mäòhi e no to te ao. Te haamaitaì nei mätou ia òe e te Atua Metua e, no te rahi o te òaòa o ta òe e faaìte nei ia mätou. E ia òe anaè ta mätou faateniteniraa i teie mahana, ananahi e a tau a hiti noa atu. Amene

 

Himene Hopeà

 

Hamaitaìraa

 

E te nünaa mäìtihia a te Tumu, e òaòa i te Fatu. Ia ìtea to òutou marü e te taata atoà ra. Tei pihaì iho te Fatu ia tätou. Eiaha e ahoaho i te mau mea atoà, e faaìte hua rä i to tätou hinaaro i te Atua, i te aniraa atu mai te haamaitaì.

 

Ia tiaì mai te hau o te Atua tei hau ê i te ìte taata nei, i to òutou âau e to òutou manaò i roto ia Ietu Metia. Amene

 

Ruta 14, 25 - 33 Täpati 04 no Tetepa 2022

 

Täpati 04 no Tetepa 2022

 

Faaitoitoraa

 

Taiòraa : Ruta 14, 25 - 33

 

Tumu parau : Te raveraa i to na iho tatauro

 

E te nünaa o te Atua i Mäòhi Nui nei, ènä atu te hei o te here o te Atua ia tätou i teie täpati ìritiraa i te Matahiti Âpï Etärëtia 2022 – 2023.

 

E reo pinepine teie i te faaroohia i roto i te vaha o Ietu:

 

Mätaio 10, 38: Të òre e rave i to na tatauro a pee mai ai ia ù, aita o ia i au ia ù.

 

Märeto 8, 34 : Te taata i hinaaro i te pee mai ia ù, e faaruè ia ia na iho, a rave ai i to na tatauro, a pee mai ai ia ù.

 

Ruta 9, 23 : Ia hinaaro te taata i te pee mai ia ù ra, e faaruè o ia ia na iho, a rave ai i ta na tatauro i te mau mahana atoà, a pee mai ai ia ù.

 

Ruta 14, 27: Të òre e hopoi i to na iho tatauro a pee mai ai ia ù, e òre o ia e tià i te pipi na ù.

 

Ia rave tätou i te hoê tumu haari, mai te peu e piti àhuru taata të amo, e riro ia ei mea mämä ; no te taata hoê rä, e parau fifi roa ia te reira. I roto i teie mau parau ta Ietu, aita o ia e ani nei i te taata e tauturu ia na i te amoraa i to na tatauro, te ani nei rä o ia i te taata tätaì tahi, ia amo i to na iho tätauro.

 

Te tatauro, te räau ia i reira e haapohehia ai te feiä òhipa ìino, te feiä tei au ia rätou te utuà pohe. Teie rä mau parau ta Ietu e parau nei, eere ia no muri aè i to na tiàfaahouraa, a riro atu ai mai te tahi tïtauraa i te taata ia rave atoà i te òhipa ta na i rave mai ; e parau teie no te tau a tere noa ai o ia nä roto i te taata, i te haapiiraa ia rätou i terä vähi e i terä vähi. Teie hoì amoraa i te tatauro e parauhia nei, eere ia i te tahi räveà e ìtehia ai te feiä tino maitaì e te päutuutu, te feiä e maraa ia rätou te hopoià rarahi, eere roa atu i te reira. Eere atoà te püai taata teie e hinaarohia nei i te hiò, to na rä ineineraa i te pee ia Ietu. Aita e taime no te tämatamataraa : te täpeàraa ihoä te rima, eita e tuu faahou i raro.

(A hiò na i te mea e orahia ra e tätou i teie mahana, te roaaraa ihoä te tiàraa, te reira atoà ia faataòtoraahia e pohe noa atu. Eere mea nä reira ta Ietu, ia au i te Ruta 9, 23 : (... e amo i to na tatauro i te mau mahana atoà ...). Te uiraa paha e tano ia ui i ô nei, teie ia, E aha teie tatauro ta Ietu e parau nei.

 

Riro noa ai te tatauro, ei täpaò no te pohe, e ei mauhaa faatupu hoì i te pohe, eere te pohe ta Ietu e hinaaro nei no te feiä i färii i te pee ia na. Ia hiò hoì tätou i te mau pipi ta Ietu i mäìti, a pee noa ai rätou ia na i te mau vähi atoà ta na i haere, aita te hoê noa aè o rätou i ìtehia i te amo-haere-raa i te tatauro. Te auraa ra, eere te räau haapeà teie ta Ietu e parau nei, eere teie täpü räau ta Ietu e parau nei.

 

To tätou ia fifi i teie mahana, te piri-noa-raa tätou i nià i te taò. Inaha hoì, e peu pinepine teie i ìtehia i roto i te reo o Ietu, e rave o ia i te tahi taò, âreà to na auraa ra, tei te tahi ia vähi ê atu i ta te taò e faaìte ra. Te mea faufaa ia täpeàhia mai, eere ia te faahohoàraa ta te taata i mätau i te horoà no taua taò tatauro, te manaò rä ta Ietu e tämata ra i te faahïroà i roto i te taata e faaroo atu ra ia na. Ahiri e, e amo noa i te täpü räau i nià i te tua a haere ai nä nià i te purümu, mea òhie roa ia, e e riro atoà atu ei òhipa ârearea. Te ìte noa nei tätou i te tatauro pirü i nià i te àrapoà o te taata, ei faatautau i nià i te hiò pereòo, aore ra ei hiòraa na te taata i nià i te papaì fare pure. Teie rä ta te Fatu e ani nei, e amo, e mea teiaha roa atu ia.

 

E tämata tätou i te rave mai i te tahi mau hiòraa no te faaìte rii noa i te hohoà o te tatauro ta te Fatu e ani nei i te taata tei hinaaro i te pee ia na ia rave.

 

A tahi, te vai ra teie reo to Itaia : Te pii nei te hoê reo i te mëtëpara : A faanehenehe na i te èà o te Tumu Nui, e faatïtïàfaro na i te fenua marö i te haereà mai o to tätou Atua. E faaîhia te mau peho, e faahaèhaahia te mouà e te mau âivi, e faatïtïàifarohia te piò, e te mau vähi puupuu ra, e faarirohia ia ei vähi päpü (Itaia 40, 3-4), e reo hoì tei haamanaò-faahou-hia mai e Märeto : E reo no te hoê i te tiàororaa i te mätëpara : E haamaitaì òutou i te èà o te Tumu Nui, e faatïtïàifaro i to na haereà (Märeto 1, 3), e ia hiò tätou i te èà i ravehia mai e Ietu, e òhie tätou i te ìte e, eere te èà mänina e te puupuu òre ta Ietu i rave mai, e èà rä tei î i te mau haafifiraa e te mau haapeàpeàraa ua rau te huru.

 

Mea maitaì atoà te taata e manaò ra i te pee ia Ietu ia ìte e, aita o ia e na nià ra i te pëùe tereveta i te haere, e aita atoà hoì o ia i färiihia mai te hoê arii ra te huru. Te horoà atoà ra Ietu i teie haapäpüraa : Te taata i hinaaro ei tävini no ù, e pee mai ia ia ù, e te vähi ta ù e pärahi ra, ei reira atoà ia ta ù tävini, e ia tävini mai te taata ia ù ra, na to ù Metua ia e utuà mai ia na (Ioane 12, 26).

 

I mua i teie parau e : te vähi ta ù e pärahi, ei reira atoà ta ù tävini, eiaha ia tätou e manaò òiòi noa i te pärataito, no te mea e parau teie no te taata e âpee ra ia Ietu, te taata e nä muri noa ra ia na i te mau vähi atoà ta na i haere no te faatupuraa i te hinaaro o to na Metua. No reira, eiaha atoà ia tätou e haamätau i teie peu täpaòpaò i te pärahiraa, inaha aita ä te òhipa i oti atu ra i te rave. E parau päpü teie e, mea varavara Ietu i te ìteraahia i te pärahi-noa-raa e te taòto-noa-raa. Te märamarama atoà ra ia tätou e, ua pärahi anaè Ietu, ua pö atoà. Ia haapäpü mai rä o ia e, na to na Metua e utuà i te taata i tävini ia na, ua ara atoà ia tätou e, eita e monihia ia pee anaè ia Ietu, e eiaha atoà hoì e faariro i te täviniraa ia na ei taime e tämata ai te tävini i te haaputu i te taoà na na. Ua riro noa te reira peu ei haapäpüraa mai i te tiàturi òre o te tävini i te Metua, mai to na atoà hoì tiàturi òre i te Fatu ta na e hinaaro ra e tävini.

 

Te piti, ia hiò tätou i te huru o Ietu, eita o ia e mau i te vähi hoê, aita atoà ia to na e taime no te tämäa. Te fifi ia i färereihia mai e te mau pipi a Ietu, i huhuti ai rätou i te tïtona ei mäa aè na rätou (Mätaio 12, 1). Teie te tahi reo to Ietu : Teie ta ù mäa, te haapaò i to na hinaaro to tei tono mai ia ù nei, e te faaoti i ta na òhipa (Ioane 4, 34). Te auraa no Ietu, te hohoà ta na e tuu ra i mua i te taata e hinaaro i te pee ia na, te hohoà ia o te hoê taata rave òhipa, i te faariroraa i te òhipa a te Atua mai te mea e, o ta na ia mäa e te mea hoì e horoà i te püai e te itoito ia na. Aita Ietu e faaòre nei i te mäa, ua nä mua rä te Atua i te mäa. Peneiaè tätou i te parau e, e maraa ia Ietu te mea ta na e parau nei no te mea e Tamaiti o ia na te Atua. Oia ihoä paha, i parau ai rä Ietu, no te faaìte ia i te mea ta na e tiaì ra ia nä reira atoà mai te tävini.

 

Ia haapäpü mai Ietu e, e amo te taata tätaì tahi i to na iho tatauro, te ìte ra ia tätou e, eere na Ietu e haere no tätou, na tätou iho rä e haere i ta tätou haereraa e na tätou iho e amo i to tätou iho tatauro : ta Ietu, te faaìte noa mai ia i te èà. Eere no te mea ua pohe Ietu e ora ai tätou ; no te mea rä ua pohe Ietu, i ìte ai tätou i te èà o te ora. E hape huru hape to tätou raveraa i te pohe o te Fatu ei faatautau àrapoà, ei faanehenehe ia tätou, e ei taoà faaùnaùna.

 

No te amo i teie tatauro e parauhia nei e Ietu, te ani atoà nei Ietu i te taata ia faaruè ia na iho (Mätaio 16, 24). Te mea e faaruèhia, te tahi ia mea faufaa òre, te tahi mea aita to na e parau faahou, te tahi mea të òre e ö i roto i te haapuèraa o te mau taihaa faaherehere. Te faaruèraa ia na iho, te färiiraa ia i te haapae roa i to na iho parau, oia te ìteraa i te faufaa òre ia faarahi ia na i mua i te taata, ia ìmi i te roo, te hanahana, e te âruerueraa a te taata. Te mea ta ù i faaruè e ta ù i tii faahou, aita ia i faaruèhia, e haavare faaruè noa te reira, oia hoì e haavare.

 

Haamanaò tätou e, mai te mea o Ietu to tätou Fatu, ia ìte ia tätou e, eere na tätou e arataì ia Ietu, eere o tätou te hiòraa ta Ietu e pee, na na rä e arataì ia tätou. Eere na tätou te parauraa e, terä te mea maitaì, na te huru rä ta Ietu i faaìte mai e haapii mai ia tätou i te mea maitaì ia ravehia. To tätou peàpeà rahi i teie mahana, na tätou e horoà atu ra i te fäito e au ia Ietu e i te feiä tei hinaaro i te pee ia na : ei pereue, ei àhu ùoùo, ei mea, ei mea ... aita ihoä paha e fifi i te ôomoraa i te pereue, te raveraa rä i te òhipa ta te Fatu i faaue mai e rave, te mea faufaa roa aè ia.

 

I roto i ta Ietu faaruèraa ia na iho, te mea ta na i faarahi, te haèhaa ia, te haamoèraa ia na, e te faatupuraa i te parau o te aroha. I parau ai Ietu i te täviniraa e, e tatauro, no te faaara mai ia e, aita e hanahana e noaa mai i reira. Ia rahi to tätou hanahana, eere änei e, te Atua terä e moè atu ra, e inaha, te parau noa nei tätou i te Atua i roto i te pure ta te Fatu e : no òe te Hau, e te Mana, e te Hanahana, e a muri noa atu, Amene. Oia ia, te parau ia, te oraraahia rä teie parau aita roa atu ia. No reira, a faaitoito anaè i te faatupu i te hinaaro o to tätou Fatu, a faaitoito anaè i te amoraa i to tätou iho tatauro, ia hanahana te Atua ia tätou.

 

E teie hepetoma pure no te matahiti Etärëtia, ta tätou e haapaò nei, o te hoê ia haamanaòraa i te tatauro i amohia mai na e to tätou mau metua, no te faatiàmäraa i ta tätou Etärëtia i te 1 no Tetepa 1963, mai roto mai i te Etärëtia Porotetani no Faräni e te Hau Faräni, noa atu ia te mau faaapiapiraa rau. O ta tätou ia e teòteò nei i teie mahana. No reira, a faaitoito anaè i te amoraa i to tätou tatauro, no te mea o tätou anaè teie e toe nei, no te tautooraa ia tupu te parau tià e te parau mau i nià i to tätou fenua.

 

Ia haamaitaìhia te Atua te Tumu o te Ora. Ia ora na.

 

(Faaravaì atu)

2 Parareipomeno 2, 1 – 17 Monirë 05 no Tetepa 2022

 

Monirë 05 no Tetepa 2022

 

Faaitoitoraa

 

Taiòraa : 2 Parareipomeno 2, 1 – 17

 

Te nünaa mäìti a te Tumu Nui, Ia ora na. Tei roto ta tätou parau i teie hepetoma i te puta Parareipomeno, mea varavara roa tätou i te taiò i teie nä puta, a tahi no te roa e te piti, no te òreraa ihoä tätou e mätau faahou i te taiò i te pïpïria. Ia hiòhia te mau parau i roto i teie nä puta Parareipomeno, e täpitiraa ia no te mau parau i roto i nä puta a Tämuera e ta Te Mau Arii.

 

E piti fare ta Toromona e ôpua ra e patu, hoê, e fare no te iòa o te Atua, e te piti to na ia aoraì. E no te faatupu i te reira ôpuaraa, mai ta tätou atoà i ìte mai, mea hinaarohia te taata, te moni e te tauihaa.

 

Ia tütonu maitaì tätou i nià i te parau, aita Toromona e patu ra i te fare no te Atua, no te mea ua ìte o na eita te Atua e ö i roto ia au i ta na fäìraa i te ìrava 5 – 6 : E Atua rahi hoì to mätou Atua i te mau atua atoà ra. O vai hoì au nei a faatià ai au i te fare no na ? inaha, te raì e te raì teitei, eita o ia ö ?

 

Te auraa, te fare ta Toromona e patu ra, e fare no te iòa ia o te Atua, e vähi i reira te nünaa e haamori ai i te Atua, e vähi i reira to na iòa e faahanahanahia ai, e vähi i reira te nünaa e färerei ai i to na Atua. Eere rä i te fare no te Atua. No reira, mea tano tätou e hiò faahou i ta tätou huru parauraa no te fare pureraa, i teie mahana. No te mea, ua mätau roa tätou i te parau e, e fare no te Atua. E mai te peu hoì, te reira ihoä, aue ia te Atua i te aroha e, hoê noa taime i te hepetoma tätou e haere mai ai e hiò ia na !

 

Manaò anaè au, mea huru piri aè te hiòraa a to tätou mau Tupuna i te manaò o te arii Toromona, no te mea, aita rätou i faariro i te marae ei vähi nohoraa no te Atua, ei vähi rä e haamori ai, e faahanahana ai, e e färerei ai rätou i to rätou Atua. E no te tupu te reira färereiraa, te vai ra ia terä tïtauraa i te nünaa, ia tämä ia na hou e tere ai i te marae. Te auraa ia no terä parau ta rätou e : ‘ Ei tere pure e tae ai i te marae. Mai te peu e, e tere ê, eita te Atua e vare.’

 

Te auraa, aita teie parau a te mau Tupuna i ätea roa i te parau ta te Atua i parau i te nünaa Iteraèra i roto i te Revitito 11, 44 : ‘O vau to òutou Atua, ia moà òutou no te mea te moà nei au.’ No reira, i mua i nä faahitiraa parau e piti, ta te Revitito e ta te mau Tupuna, te haapäpü noa mai ra te reira e, na te moà o te nünaa e haere ra i te vähi haamoriraa, e ua âmui atoà mai te Atua i te haamoriraa. O te tahi atoà ia auraa no terä reo to te Fatu e : ‘Te vähi e âmui ai, e piti, aore ra e toru no to ù iòa, tei rotopü atoà ia vau ia rätou.’ (Mätaio 18, 20)

 

Te haapiiraa e tano tätou e täpeà i ô nei, te moà, eere ia no te fare pure, aore ra no te marae, no te taata rä, e moà ai. Ia moà te taata, e moà atoà te fare pure e te marae. Tano roa atu ai te parau a Pauro e nä ô ra e : ‘E hiero to òutou tino no te Atua.’ (1 Torinetia 3, 16)

 

No reira, faaitoito anaè i te haamoàraa ia tätou, ia hanahana te Atua ia tätou mai te pape e faahoì ra i te ànaàna o te mahana i te vähi no reira mai o ia.

 

Ia tauturu mai te Atua ia tätou. Mauruuru.

 

(Faaravaì atu)

Taramo 114 Mahana piti 06 no Tetepa 2022

Mahana piti 06 no Tetepa 2022

 

Faaitoitoraa

 

Taiòraa : Taramo 114

 

E te nünaa o te Atua e, a färii mai ä i te here e te aroha o te Atua. Ia tätou i hiò mai i te parau no te paturaa fare pure i ravehia e Toromona i na pö ra, te ìte atu ra tätou, na te taata e âfaì i te Atua i roto i te fare. Areà ia hiò tätou i te himene a te Taramo i teie ahiahi, te haamanaò mai ra ia i to te Atua ora-âmui-raa e te nünaa ta na i faatiàmä mai Aifiti, e ta na i arataì nä roto i te mëtëpara, te tai, te vai, te mouà e te âivi, e tae atu ai i te fenua o te Tapu, Tanaana.

 

A taa noa atu i to te nünaa Iteraèra ìteraa i te noho-päpü-raa te Atua i rotopü ia rätou, ua ìte atoà ra te mau mea o te rahu, mai te miti, te vai, te mau mouà, te mau âivi, e te fenua. Te manaò e hiòhia atu ra i roto i teie pehe ta te Taramo, te ìte ra paì te rahu i te Atua. Te uiuiraa, e tätou i roto i te fare pure, te ìte ra änei tätou i te Atua, mai terä e ìtehia ra e te miti, te pape, te mouà, e te âivi ?

 

Te mea ta te Taramo e haapäpü ra, te ìteraa te miti i te Atua, ua maùe ; te ìteraa te pape, ua ôtohe ; te ìteraa te mau mouà, ua òuàuà mai te mämoe oni ; te ìteraa te mau âivi, ua òuauà mai te mau fanäuà mämoe âpï ra.

 

Ia hiòhia tätou i roto i ta tätou mau fare pure, mai te tii tarai faanehenehe mau ra ia to tätou huru, aore ra i roto i te fare Ia manaha, eita e haùtiùti. E inaha, të haapäpü noa mai ra te pehepehe a te Taramo i teie pö e, i mua i te Atua, aita tätou e ôpanihia e haùtiùti, e ueue e e òriòri. Mai terä paì huru to tätou ia haere i Toàtaa (Toàtä i teie mahana), aita atu ai ia te peepee e te ièiè ia himene no te faaànaànatae te mau taata mätaìtaì. Ahiri paì terä rii atoà aè paì to tätou huru i roto i ta tätou mau haamoriraa i te mau Täpati atoà, manaò anaè au, òiòi roa te Fatu i te hoì mai i te fenua nei.

 

Eere teie i te manaò faahapahapa, no te mea teie te huru i haapiihia ia tätou e te mau mitionare mai te tau mai. Mea maitaì atoà rä e, tätou e hiò i te tupuraa o te oraraa o teie tau, ua rau te mau faatïaniraa e ùme nei i ta tätou feiä âpï i te tahi atu mau haapaòraa rau, no te ìmi i te tahi huru haamoriraa e au ia rätou. Mai te mea tei roto tätou i te faaineineraa i te päroita no ànanahi, eiaha ia e haamaoro roa e ia moèmoè atu tätou e rave ai, ua taere roa ia, e riro ta tätou mau fare pureraa i teie mau tau i muri nei, e faarirohia ei mau fare faaìteìteraa i te rätere, no te mea aita e taata e haere faahou mai e haamori.

 

E manaò parauparau, e haaferuriraa ia tätou. Mauruuru.

 

(Faaravaì atu

2 Pararaipomeno 5, 1 – 14 ; Mahana toru 07 no Tetepa 2022

 

Mahana toru 07 no Tetepa 2022

 

Faaitoitoraa

 

Taiòraa :       2 Pararaipomeno 5, 1 – 14 ;

Taramo 150

 

E te nünaa o te Atua a färii mai ä i te hei no te taura mutu òre no te here o te raì tuatinitini.

 

Te nä ô ra paì te parauparau o te tahi himene ta tätou e : (Ahiri e tiàhia ia himene roa, mea au roa atu ia)

 

Arue te Fatu i nià i te toère

Arue te Fatu i te pahü e te vivo

Hareruia i te Metua

Hareruia i te Tamaiti

Hareruia i te Värua

Hareruia amene.

 

Teie reo himene, o te haapotoraa e aore ia o te huriraa ia no teie mahana i terä Taramo 150 ta tätou i taiò iho nei. Mai ta tätou ihoä i ìte i te roaraa o te tau i räterehia mai e ta tätou Etärëtia Porotetani Mäòhi, e rave rahi mau päroita tei faaòhipa i ta tätou mau ùpaùpa mäòhi i roto i te haamoriraa i te Atua, ia au i te tïtauraa a te Parau a te Atua, te Pïpïria. E te vai noa ra ä te tahi pae, aita ä ia i matara atu ra, e aha ra te tau e matara ai, aita ia vau i ìte.

 

Parau mau, eere ihoä i te mea òhie i te faaâpïraa i te tahi mau faanahoraa o tei haamauhia mai e te mau mitionare, te ôpanipaniraa i teie mau ùpaùpa ia òre roa ia faaòhipahia i roto i ta tätou mau haamoriraa. Ia faaòhipa rä i ta rätou mauhaa ùpaùpa papaâ, mai te hamonia, aita roa ia e fifi, e au atu ra paì e, eita tätou e tano e faaòhipa i ta tätou no te haamori i te Atua, ta rätou anaè te mea tano. E inaha hoì, i roto i terä âfata ùpaùpa, ua rau atoà ia te huru o te mau mauhaa ùpaùpa, mai ta tätou atoà. Te auraa, o rätou noa iho aita atoà i märamarama i te tïtauraa a te Taramo 150, 3 – 5, te haamaitaìraa i te Atua i te mau mauhaa ùpaùpa. E no te mea hoì, tei Mäòhi Nui nei tätou, e faaòhipa ia i te mau mauhaa ùpaùpa mäòhi. Ia haere tätou i te fenua papaâ, te faaòhipa ra rätou i ta rätou mau mauhaa ùpaùpa i roto i ta rätou haamoriraa. Aita ia vau e ìte i te fifi no te aha tätou eita e tano e faaòhipa i ta tätou iho mau mauhaa ùpaùpa iö tätou iho.

 

E parau pinepine atoà ia faaroohia te tahi ia parau e, ua nuu te tau i mua, e tau märamarama teie, e parau mau roa ia. Ia hiò atoà rä tätou i te mau mea ta te tau o te märamarama i haafänau mai, mea rahi aè ia te fifi, te ìno, e te àti e färereihia nei e to tätou nünaa e te mau nünaa atoà àti tià aè teie nei ao. Ua rahi aè te mataêraa, te âmahamaha, te feìi, e te hämani ìno, i te parau no te here, te tauturu, e te hoêraa. Eita e òre, te reira te poroì ta teie nä taiòraa ta tätou e tïtau mai ra ia tätou e tütonu faahou, no te hiò i te mea au i te hinaaro o te Atua, eiaha rä i te au i to tätou hinaaro taata.

 

Te nä ô ra te mau ìrava 11 – 14 o te Parareipomeno, ia rätou i âvari i te fare pureraa âpï i patuhia e te arii Toromona :

 

‘E tae mai ra te feiä tahuà i räpae àu mai i taua vähi atoà ra, ua hope hoì te feiä tahuà i ìtea i te haamoàhia, aore hoì rätou haapaò i te pupu i reira. E te mau Ati Revi, te feiä himene, no te pupu o Atafa, e to Hemana, e to Ietutuma, e ta rätou mau tamarii, e to rätou mau taeaè, mä te àhu teatea maitaì ra, e mä te tumeparo e te tinura, e te napara, i te tià-noa-raa i te pae hitià o te rä i te fata ra, e na tahuà hoê hanere e piti àhuru, ma te pü atoà i te faaòtoraa. Ua âmui aè ra te feiä faaòto pü e te feiä himene i te reo hoê, i te ârueraa e te haamaitaìraa i te Atua, e ia faateitei aè ra rätou i to reo mä te pü, e te tumeparo, e te mau mea e faaòtohia ra, i te ârueraa i te Atua, e te nä ôraa e : E maitaì hoì to na, e tià to na aroha i te vai-maite-raa. Ua î mai ra taua fare ra i te ata, te fare o te Atua. E aita atu ra te feiä tahuà e mau ia rave i te töroà i taua ata ra, ua î hoì taua fare i te hanahana o te Atua.’

 

Te märamarama ra ia tätou e, te fä tumu o te haamoriraa, ia ìtehia ia te hanahana o te Atua i roto i to na fare, ia î ta tätou mau fare pureraa i te hanahana o te Atua, eiaha rä to tätou hanahana, e to tätou manaò taata. No reira, faaitoito anaè tätou ia au i te tïtauraa atoà a te Taramo 150, 6 : ‘O tei huti i te aho ra, ia haamaitaì anaè ia i te Atua : Hareruia.’

 

Ia tiaì mai te hau o te Atua ia tätou. Mauruuru.

 

(Faaravaì atu)

 

2 Parareipomeno 6, 1 – 21 Mahana maha 08 no Tetepa 2022

 

Mahana maha 08 no Tetepa 2022

 

Faaitoitoraa

 

Taiòraa : 2 Parareipomeno 6, 1 – 21

 

E te nünaa o te Atua i Mäòhi Nui nei, Ia ora na e mauruuru ä i to tätou färereiraa i teie ahiahi i te aroha o te Atua.

 

Mai ta tätou i hiò mai i nanahi ra, ua oti te fare pure i te patuhia, e ua oti atoà i te âvarihia, e te täpaò i ìtehia, te hanahana ia o te Atua i te faaîraa i te fare pureraa, nä roto i te hoê ata pöuri. Ua hope te ôroà, i teie taime, te tià nei te arii Toromona i mua i te aro o te nünaa e mä te faahaèhaa ia na i mua i te aro o te Atua, nä roto i te tahi pure tatarahapa. Aita atu to te arii e hinaaro, ia faaroo mai te Atua i te mau pure atoà a to na nünaa, i te mau taime atoà e haere mai ai rätou e haamori ia na.

 

Te fäì atoà ra te arii i mua i te Atua, i mua i te rahi o te Atua, i te paruparu e te naìnaì o te òhipa i ravehia e rätou, i te paturaa i te hoê fare no na. Te auraa, te hinaaro noa ra te arii Toromona e, e faariro i te fare o ta na i patu no te Atua, ei vähi i reira te Atua e te taata e färerei ai, i te mau taime atoà. Te auraa, e ùputa matara noa te fare pure i patuhia no te nünaa, e haere mai e pure i te Atua i te mau taime atoà o ta rätou e hinaaro. Terä, e hiòraa e e faanahoraa Ati Iuta terä.

 

E tano atoà ihoä paha tätou e rave mai terä e faahitihia ra i roto i ta tätou taiòraa, e ìriti i te mau ùputa o ta tätou mau fare pure no te taata e haere mai e haamori e aore ia e pure i te Atua i te mau taime atoà o ta na e hinaaro, mai teie e ìtehia ra i te fare pure Tatorita i Papeete. Eere rä te reira i te peu tumu na tätou ia faaauhia i te manaò o te arii Toromona, ta na i faahiti i te ìrava 21, oia hoì ei teie nei noa vähi, ei roto noa i teie fare pure, teie noa te ùputa e faaroo mai ai te Atua i te pure a to na mau tävini e te nünaa täatoà. Ìte noa ai Toromona i te rahi o te Atua, te manaò ra ta na e parau ra, te ôpani ra ia o ia i te Atua i roto i te fare pure, e i roto anaè i te fare pure te taata e tano ai e pure i te Atua.

 

Te vähi taaê ia e to tätou mau Tupuna Mäòhi, eita rätou e haere pinepine i nià i te marae e haamori ai, e ia haere rätou, ei tumu päpü maitaì, no te tahi änei ôroà faatähinuraa arii, e aore ra no te tämäraa i te hara a te nünaa. I roto rä i to rätou oraraa i te mau mahana tätaì tahi, tei te Atua ia to rätou tiàturiraa no te tauturu ia rätou. Te tumu ia te mau tahuà e faahope ai i ta rätou ùpu e : E te Atua e, e huri tua mai òe ia mätou, e hoì i roto i to òe vähi moà, âreà mätou, e hoì ia i roto i te noa o to mätou oraraa.

 

Te parau e täpeà mai, mea faufaa te fare pureraa no te haamoriraa i te Atua ma te manaò hoê, te värua hoê, te âau hoê. Te mea faufaa roa atu ra, te faariroraa ia ia tätou iho ei fare i reira te Atua e noho tämau ai i te mau mahana atoà. I reira noa to tätou mau fifi e to mätou mau hepohepo no te oraraa e matara ai. Te nä ô ra te reo o Pauro e : ‘E hiero to òutou tino no te Atua.’

 

Ia Atua te Atua, ia fenua te fenua, ia taata te taata, ua maitaì roa. Ei hau tätou teie pö. Mauruuru.

 

(E tano e faaravaì atu ä)

 

2 Parareipomeno 6, 22 – 42 Mahana pae 09 no Tetepa 2022

 

 

Mahana pae 09 no Tetepa 2022

 

Faaitoitoraa

 

Taiòraa : 2 Parareipomeno 6, 22 – 42

 

E te nünaa o te Atua, Ia ora na i te färereiraa i teie ahiahi.

 

E püòiraa noa ta tätou parau no terä i nanahi ra, teie pure faahaèhaaraa a te arii Toromona i te Atua. Mea faufaa mau teie pure ta na e tuu ra i mua i te Atua, i te mea e, te faaìte päpü ra o ia i mua i te Atua e, te mau maì, te mau pohe, te paùrä, te pauraa i te tamaì, e te mau huru àti atoà ta te nünaa e färerei i roto i to rätou oraraa : No te hara ia o ta te taata i rave te tumu. Te riro nei ia teie mau parau a Toromona, ei haapäpüraa atoà ia tätou, e i mua i te mau àti rau atoà o ta tätou e faaruru nei i te mau mahana atoà o to tätou oraraa, no te rahi o ta tätou hara, to tätou taivaraa i te Atua, mai tei tohuhia e te tahuà ra o Vaitä.

 

No te hara i ravehia e te hui arii, e te taiva rahi o te nünaa i täìri ai te Atua ia na. Hoê noa mea ta te Atua e tiaì mai ra ia tätou i teie mahana, te hoìraa ia ia na ra mä te haèhaa e te tatarahapa. Mai teie ta Toromona e rave nei, te ani täparuraa ia te Atua, ia faaroo i te pure o to na mau tävini e to na nünaa, ia hoì mai rätou ia na ra.

 

Te nä ô ra te reo o te tahi Tahuà e Veà mäòhi hopeà teie no te mau motu Tuamotu mä, o Paiòre te iòa :

 

‘Mai te mea noa atu e, e òre roa atu te mata o te mau uì i muri noa aè ia ù e hiò faahou i to rätou mata i nià i te Atua o te ora, e haamure-hope-roa-hia te ao mäòhi e vai nei ä.’

 

Te nä ô atoà ra te reo o Henri a Hiro räua o Turo a Raapoto :

 

Henri a Hiro, 1980 : ‘Te haere noa atu ra te nünaa mäòhi o teie mahana i roto i te fifi, te àti, e te mauiui rahi. Hoê noa räveà no na i teie nei e hoì i te fenua ra’.

 

Turo a RAAPOTO, 1985 : ‘Ua rahi roa te fifi, te àti, te mauiui o te nünaa mäòhi o teie mahana. Hoê noa räveà no na i teie nei, e hoì i te fenua ra.’

 

Te uiraa, teie ia : I mua i te poroì a nä Toa Mäòhi e toru, e aha ia te poroì a te Hui àito o te tau hou nei, i te uì hou no ànanahi : Aita ä paha i taere roa no te hoì i teie nei, òi vaivai aè ä te Ao Mäòhi. E te Mäòhi e, àtirë i te huritua i to òe fenua, àtirë i te huritua i to òe ora, aita ä òe i ravaì i te àti rau ta òe e faaruru faufaa òre noa ra. Ua ìte òe i te èà, e ia hapehape, e maoro noa i to òe tuuraa âvae matamua.

 

E pure tätou i te Atua

 

E te Tumu Nui e, te püpü atu nei mätou i to mätou fenua, to mätou nünaa iti, i roto i to òe rima metua, a faatere òe i teie Ià e pärahihia nei e mätou, i to na vairaa mau ta òe i faaineine ätea no mätou, ia riro òe ei Atua no mätou, e o mätou te nünaa ta òe e arataì, mai teie atu nei, e a tau a hiti noa atu. Amene.

 

Ei hau, e hau, ia hau rä. Mauruuru.

 

(Faaravaì atu)