Ioane 14.1-12 Ûmerehia.

 

Tāpati  7 no  Më 2023.

Ûmerehia.

ÔROÀ

Taramo 33

1 E òaòa i te Fatu, e te feiä parau tià e e au te haamaitaì i te feiä parau tià.

2 E haamaitaì i te Fatu i te tïnura, e himene ia na i te näpara aho àhuru ra.

3 E himene ia na i te himene âpï, faaòto maitaì na mä te òaòa e te au mäite.

4 E parau tià ta te Fatu, e te haavare òre hoì ta na atoà ra mau òhipa.

5 Hinaaro o ia i te parau tià e te au, te î nei te fenua i te maitaì a te Fatu.

6 Na te parau a te Fatu i oti ai te mau raì, e to rätou atoà ra i te aho o to na vaha.

7 Ua haaputu o ia i te moana ra o te tai ei puèà, e ua vaiiho o ia i te moana i roto i te fare vairaa.

8 Ia mataù te mau fenua atoà i te Fatu; e ia höriri to te ao atoà nei ia na.

9 Ua parau hoì o ia, e oti aè ra; ua faaue o ia, e ua mau atu ra.

10 Te faaòre nei te Fatu i te âpooraa a te mau êtene, te faariro nei i tei ôpuahia e te mau taata ra ei mea faufaa òre.

11 Tei faaauhia e te Fatu ra, e tià ia i te vai-mäite-raa, e tei manaòhia e ta na âau e tae noa atu i te mau uì atoà ra.

12 E ao to te fenua, o te Fatu to rätou Atua; e te mau taata i mäìtihia e ana ei tufaa na na.

13 O te Fatu tei hiò mai nä nià mai i te raì, te hiò mai ra i te mau tamarii atoà a te taata nei.

14 Te vähi i pärahihia e ana ra, ta na ia hiòraa mai i to te ao atoà nei.

15 O ia anaè rä tei haafäito i to rätou âau, e o ia tei hiòpoà mai i ta rätou mau räveà.

16 Aore e arii i ora i te rahi o ta na nuu, aore e taata püai i ora i te rahi o te püai.

17 E mea faufaa òre te puaahorofenua ei haapüraa, aore e taata e ora i to na püai rahi.

18 Inaha, tei nià to te Fatu mata i te feiä i mataù ia na, i nià i te feiä i tiàturi i to na ra aroha,

19 e faaora ia rätou i te pohe, e ia ora hoì rätou i te oè ra.

20 Te tiaì nei to mätou värua i te Fatu; o to mätou ia tauturu, e to mätou ia päruru.

21 Te òaòa nei to mätou âau ia na; te tiàturi nei hoì mätou i to na ra iòa moà.

22 Ia vai mäite mai ä to aroha, e te Fatu, i nià ia mätou, mai ia mätou nei e tiàturi atu ia òe ra.

Òhipa 6.1-7

Te mäìti-raa-hia nä tiàtono toohitu

1 E i taua ànotau ra, i rahi te mau pipi ra, ua tupu iho ra te amuamu a te Herëni i te Hëpera, no te mea aore to rätou mau ìvi vahine i haapaòhia i te tufaraa taoà i te mau mahana atoà ra.

2 E ua haaputuputu mai ra te àhuru mä piti ra i te mau pipi atoà e rave rahi, nä ô atu ra: «Eere hoì i te mea au ia mätou ia haapae i te parau a te Atua a raverave ai i te mau àmuraamäa na.

3 E tënä na, e te mau taeaè nei, e ìmi iho na òutou i e toohitu puè taata roo maitataì, e te î i te Värua Maitaì e te paari i roto ia òutou na, o ta mätou ia e haapaò no te reira òhipa.

4 Âreà mätou, ei te pure mätou eiaha e faaea, e ei te haapii hoì i te parau.

5 Mauruüru atu ra taua feiä rahi atoà i te reira parau, e ua mäìti iho ra rätou ia Tetefano, e taata î i te Värua Maitaì e te faaroo, e Firipa, e Porohoro, e Nitanora, e Timona, e Paremena, e Nitoro, e peroteruto o ia no Ànetiohia.

6 O ta rätou ia i tuu mai i mua i te aro o te mau âpotetoro ra, e oti aè ra te pure, ua tuu iho ra i to rätou rima i nià iho ia rätou ra.

7 Tupu atu ra te parau a te Atua, e rahi roa atu ra hoì te mau pipi i Ierutarëma, e rave rahi atoà hoì to te feiä tahuà i faaroo i te parau.  

1 Pētero 2.4-9

4 O òutou hoì i te haereà mai ia na i te ôfaì ora ra, i haapae-mau-hia ä hoì e te taata, i haapaòhia rä e te Atua, e te maitaì rahi.

5 Ua patu-atoà-hia òutou, te ôfaì ora ra, ei fare värua, ei autahuà moà, ei hopoi i te tütia värua e au i te Atua ia Ietu Metia ra.

6 Tei roto hoì i te parau i päpaìhia ra e: «Inaha e haamau vau i te ôfaì tihi i Tiona, e ôfaì haapaòhia, e te maitaì rahi; e o tei tiàturi i te reira, e òre roa ia e mäheàheà.»

7 E teie nei, ia òutou i te feiä i faaroo na, e maitaì rahi ia to na; âreà i te feiä faaroo òre ra, taua ôfaì i haapaehia e te feiä patu ra, o tei riro ia ei tiàvä.

8«E ei ôfaì türoriraa, e ei papa maheaituraa.» I te feiä i turori i te parau, no te faaroo òre, i haapaòhia hoì rätou no te reira.

9 E ui mäìtihia rä òutou, e autahuà arii, e nünaa moà, e feiä hoohia; ia faaìte hua òutou i to na maitaì, tei parau ia òutou i to roto i te pöuri, ia tae i to na ra märamarama ûmerehia.

Ioane 14.1-12

To Ietu haamähanahanaraa i ta na ra mau pipi

1 Eiaha e horuhoru to òutou âau. E faaroo i te Atua, e e faaroo atoà mai hoì ia ù.

2 E rave rahi te pärahiraa mau i te fare o ta ù Metua ra, àhiri aita ra, ua parau atu ia vau ia òutou: te haere nei au e haamaitaì i te hoê vähi no òutou.

3 E ua oti anaè i te faaauhia e au te hoê vähi no òutou ra, e hoì mai au e arataì ia òutou io ù ra; ei reira atoà òutou i te vähi e pärahihia e au ra.

4 Ua ìte hoì òutou i teie nei vähi ta ù e haere nei, e ua ìte hoì òutou i te èà.

5 Ua parau mai ra Toma ia na: «E te Fatu, aita mätou i ìte i tënä na vähi ta òe e haere na. E aha hoì mätou e ìte ai i te èà?

6 Ua parau atu ra Ietu ia na: «O vau te èà, e te parau mau, e te ora. Aore roa e taata e tae i te Metua ra, maori ra ei ia ù.

7 Ahiri òutou i ìte na ia ù, ua ìte atoà òutou i ta ù Metua. E teie nei, ua ìte òutou ia na, e ua hiò hoì òutou ia na.

8 Ua parau mai ra Firipa ia na: «E te Fatu, e faaìte mai ia mätou i te Metua a tirä atu ai.

9 Ua parau atu ra Ietu ia na: «O to ù nei hoì pärahiraa roa io òutou nei e, e aore ä òe i ìte ia ù, e Firipa? O tei hiò mai ia ù ra, ua hiò ia i te Metua. E aha hoì òe i parau mai ai e: «E faaìte mai ia mätou i te Metua «?

10 Aore òe i faaroo e tei roto vau i te Metua, e tei roto te Metua ia ù? E te parau ta ù e parau atu ia òutou nei, eere ia i ta ù iho, e te mau òhipa nei hoì, na te Metua ia i pärahi i roto ia ù nei, i rave.

11 A faaroo mai e tei roto vau i te Metua, e tei roto te Metua ia ù; e aore ia. A faaroo mai ia ù i te mau òhipa nei.

12 Âmene, âmene, e parau atu vau ia òutou: o të faaroo mai ia ù ra, e rave atoà o ia i teie nei mau òhipa ta ù e rave nei. E e rahi atu ä ta na e rave i teie, no te mea te haere nei au i ta ù Metua ra.

13 E ta òutou e ani mä to ù ra iòa, e tià ia ia ù ia maitaì te Metua i te Tamaiti.

14 O ta òutou i ani mä to ù ra iòa, na ù ia e rave.

Manaò.

E ao no te tiàfaahouraa teie ta tätou e ûmere nei, tei ärataì i te taata i roto i te märamarama, te märamarama o te faaìte ia i te tupuraa o te ata tei paèpaèhia e te reva no te mau nuu Atua. Te ûmere to te taata faaìteraa e nünaa teie e vai ära noa nei i roto i te tau, te tau ra o te ata ia o te mau hui tupuna tei âpee i ta na mau tamarii ta te fenua e faatupu noa ra i te öhi, te öhi tei mauhia e te tumu o te fenua, tei turuhia e te mau puai o te aru, te mataì, te ua, e te ahi. Te puai e te värua o teie taò ûmere no te faatupu i te faatura, e te hau èi faaìteraa i te puai no te âmuitahiraa o te hoê nünaa èi reo hoê i roto i te hau. I reira noa e tupu ai te mau öhi âpï, te tïtauraa ia e vai ra i roto i te ûmere, e reo mäòhi teie tei faaìte ua tomo te nünaa i roto i te hau o te fenua, te fenua ra te metua vahine  faatupu ora. Ia na reira anaè te taata, te nünaa i te haere e hanahana te Atua Nui Tumu Tahi ia tätou e maitaì te oraraa vaamataèinaa, e pärahi âmui te mau taeaè, te mau tuahine no te ìmiraa i te mau raveà atoà ia tupu te hau i roto i te òhipa. Te auraa o teie mau manaò, to te Atua ia faanaho faahouraa i te oraraa o te taata i roto i te aroha e te here, èi faatupuraa i te parau tià e te parau mau i te fenua nei, te fenua i Mäòhi ai tätou. Te hinaaro mai nei te Atua ia tätou èi faatupuraa i to na hanahana, te hinaaro o te Atua no te parau tià, tei roto i teie parau te ora, e puna teie to te taata ia märamarama, tei hinaaro i te Atua ra ua ìmi ia i te Atua, tei ìmi i te Atua ra te mau ra ia i te parau mau. O teie ia nünaa i mäìtihia e te Atua, èi ôriò mata e èi pütarià no te Atua, e ôpuaraa ora ta te Atua no to na nünaa ta na i mäìti, e te hinaaro nei te Atua i to na mau tävini ia riro rätou èi ärataì i te nünaa i roto i te ora ta Na iho i hinaaro no rätou. Te hinaaro ûàna o te Atua ia rave faahou ia te Mäòhi i to na huru mau, to na reo, ta na peu, te faufaa e te mau maitaì atoà ta te Atua i höroà ia ora e èi maitaì no na. Te hinaaro atoà nei te Atua e ia rave faahou te nünaa Mäòhi i to na faaroo mau no te faatupu i te parau tià e te hanahana o te Atua. No te ûmere i te Atua Nui Tumu Tahi na roto i te faaroo mau ta te fenua e faaìte noa nei. Te auraa te fenua te ra e mau ra i te faaroo, tei roto i te fenua e hohoàhia ai tätou no te Atua, e reohia tätou no te Atua. Ua faaìte te Atua te Tumu nui ia na i te Mäòhi i te iòa no Taaroa, mai ia na i faaìte ia na ia Ìteraèra i te iòa ra o Iehova ia au i te faaìteraa a te mau veà tono, tei fafauhia i te ¨Mäòhi ra o Taaroa ia , oia te aroha e te here èi niu no te fenua, te faaìte noa mai ra te fenua, e moihaa tätou i roto i te rima no te Atua, no te faatupu i te hau i roto i te faaroo o te taata, èi hau ia tiàmä te taata faaroo i te tiàturiraa i te Atua Nui Tumu Tahi, a ûmere ia hau o Mäòhi Nui, i te faaìteraa i te haapotoraa no te mau taiòraa no teie mahana :   

-Taramo 33, 15 O ia anaè rä tei haafäito i to rätou âau, e o ia tei hiòpoà mai i ta rätou mau räveà.

-Òhipa 6, 3 E tënä na, e te mau taeaè nei, e ìmi iho na òutou e toohitu puè taata roo maitataì, e te î i te Värua Maitaì e te paari i roto ia òutou na, o ta mätou ia e haapaò no te reira òhipa.

-1 Petero 2, 9 E uì mäìtihia rä òutou, e autahuà arii, e nünaa moà, e feiä hoohia; ia faaìte hua òutou i to na maitaì, tei parau ia òutou i roto i te pöuri, ia tae i to na ra märamarama ûmerehia.

-Ioane 14, 12 Âmene, âmene, e parau atu vau ia òutou: o të faaroo mai ia ù ra, e rave atoà o ia i teie nei mau òhipa ta ù e rave nei. E e rahi atu ä ta na e rave i teie, no te mea te haere nei au i ta ù Metua ra.

Te haamähanahana nei o Ietu i ta na mau pipi, o rätou i pärahi i roto i te peàpeà ma te höroà i te mau manaò tauturu i to rätou faaroo. Ma te haapäpü i roto i te fare Metua e rave rahi pärahiraa, e naho no te mau taata atoà, i te mea na Ietu iho e faanaho ma te haamaitaì. Ia oti e hoì mai au e arataì ia òutou io ù ra; ei reira atoà òutou i te vähi e pärahihia ai. E faaitoito o Ietu i ta na mau pipi ma te parau e ua haapii vau ia òutou i te èà e ua ìte òutou. No Toma ua ère o ia i te ìte i teie èà. Te pähono nei o Ietu, O vau te èà, e te parau mau, e te ora. Aore roa e taata e tae i te Metua ra, maori ra ei ia ù. Ua mohimohi te faaroo o te mau pipi, i haapäpü ai o Ietu e Ahiri òutou i ìte mai ia ù, ua ìte atoà òutou i ta ù Metua. E teie nei, ua ìte òutou ia na, e ua hiò hoì òutou ia na. No Firipa E te Fatu, e faaìte mai ia mätou i te Metua a tirä atu ai. E haamanaò o Ietu ia Firipa i to na pärahiraa roa i pïhaì iho ia òutou O tei hiò mai ia ù ra, ua hiò ia i te Metua. E aha hoì òe i parau mai ai e: «E faaìte mai ia mätou i te Metua. E faaìte o Ietu i ta na mau pipi, i to na pärahi tämauraa i roto i to na Metua e te Metua i roto ia na. A faaroo mai e tei roto vau i te Metua, e tei roto te Metua ia ù; e aore ia. A faaroo mai ia ù i te mau òhipa nei. Te tïtau nei o Ietu i ta na mau pipi e i te mau taata atoà e faaroo nei i ta na mau haapiiraa, Âmene, âmene, e parau atu vau ia òutou: o të faaroo mai ia ù ra, e rave atoà o ia i teie nei mau òhipa ta ù e rave nei. E e rahi atu ä ta na e rave i teie, no te mea te haere nei au i ta ù Metua ra. E ta òutou e ani mä to ù ra iòa, e tià ia ia ù ia maitaì te Metua i te Tamaiti. O ta òutou i ani mä to ù ra iòa, na ù ia e rave. E tià ia tätou ia ûmere èi faaìteraa i te mauruüru te òhipa e höroàhia mai ra i roto ia tätou e na tätou e rave. Te faahiti nei O Ietu i te parau no te faaroo, te òhipa, e te rahi e mau taò faatupu òhipa teie tei faaìte te puòiraa i roto i te tau ia ìtehia te èà e tae ai i te fare metua. E täpeà tätou teie faanahoraa tei niuhia i nià i te fäìraa faaroo i te mea e nünaa mäìtihia tätou e te Atua, no te faatupu i te parau tià e te hanahana o te Atua. E ûmere tätou, mai te here o te Metua i ta na fänau tahi. Èere teie i te parau faatietie ia tätou iho eere roa atu. E ûmere rä e, e tiàraa taa ê e te hoê roa to tätou i mua i te Atua, e faaherehere rahi hoì to te Atua ia tätou. E poihere ia tätou i mua i te Atua, ia riro tätou èi nünaa no na, i te faatupuraa i ta na parau tià e to na mau hinaaro atoà no te hanahana o to na iòa. E àtuàtu maitaì ia tätou, e tämä i to tätou mau viivii, e haapae roa i te mau ìno ia riro tätou èi teòteòraa na te Atua. Tei here ia tätou, to tätou reo, ta tätou peu, ta tätou maa. Te fenua maitaì roa i höroàhia mai no tätou, e here atoà rä i te faufaa hau ê ta te Atua e vai iho mai i roto i te âau o te nünaa, oia te aroha e te here. No reira tätou i riro ai èi nünaa mäìtihia e te Atua e nünaa herehia, te òhipa ia e tupu i roto i te fare Metua, te fare Metua to tätou te reira nohoraa no te feiä i ìte i te mau hopoià i roto i teie reo e faahitihia nei e Ietu,  1 Eiaha e horuhoru to òutou âau. E faaroo i te Atua, e e faaroo atoà mai hoì ia ù.

 

Teraì òr. Faatura.

Ioane 10.1-10 Tiaì e te Tiàau.

 

Tāpati 30 no Èperera 2023.

Tiaì e te Tiàau.

Taramo 23.

1 Taramo na Tävita. O te Fatu to ù tiaì, e òre roa vau e ère.

2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra.

3 E faahoì o ia i ta ù värua. E arataì o ia ia ù nä te èà tïtïàifaro, no te hanahana o to na ra iòa.

4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù: to räau e te tootoo tei haamähanahana mai ia ù.

5 Ua faanahonaho òe i te tahi àmuraa mäa na ù i mua i te aro o ta ù mau ènemi; ua faatävai òe i ta ù upoo; e te î nei ta ù âuà.

6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

Òhipa 2.14+36-41.

Te aòraa a Pëtero i te mahana Penetetöte

14 Ua tià aè ra rä Pëtero, e te àhuru mä hoê atoà ra i nià, faateitei atu ra i ta na reo, ua parau atu ra ia rätou: «E te mau âti-Iüta nei, e te feiä atoà e pärahi i Ierutarëma nei, ia ìte mai òutou, a faaroo mai na òutou i ta ù nei parau.

36-42.

36 E teie nei, ia ìte atoà te fëtii o Ìteraèra e, ua faariro-mau-hia o ia e te Atua ei Fatu e ei Metia, o Ietu mau nei ä ta òutou i faatätauro nei.

37 E ìte aè ra rätou i taua parau ra, putapü atu ra to rätou âau, e ua nä ô mai ra ia Pëtero e te mau âpotetoro atoà ra:«E te mau taeaè nei, e aha mätou nei?

38 Ua parau atu ra Pëtero ia rätou: «E tätarahapa, e ia päpetitohia òutou atoà i roto i te iòa o Ietu Metia ia matara te hara, e horoàhia mai ia te Värua Maitaì ia òutou.

39 No òutou hoì tei parauhia mai ra, e no to òutou tamarii, e no te feiä atoà hoì i te ätea ê ra, ta te Fatu ta to tätou Atua e parau atu.

40 E rave rahi te parau ta na i parau atu, e aò atu ra, nä ô atu ra: «Ia ora òutou i teie nei uì märö.

41 E te feiä atoà i färii mäite i ta na ra parau, päpetitohia iho ra ia, e âmui-atoà-hia mai ra ia rätou, e toru atoà tautani i taua mahana ra.

42 Mau päpü mäite atu ra rätou i ta te mau âpotetoro i haapii ra, e te âmui-mäite-raa, e te vähiraa i te päne, e te pureraa hoì.

1 Pētero 2.20-25.

20 I papaìhia rä òutou i ta òutou iho hara, a faaòromaì ai òutou, e aha to reira haamaitaìraa? Ia pohe rä òutou mä te haapaò maitaì, a faaòromaì ai òutou, e mea au ia i te Atua.

21 I parauhia ai hoì òutou; i pohe atoà hoì te Metia iho no òutou; e ua vaiiho hoì i te haapaòraa na òutou, ia pee òutou i to na taahiraa âvae.

22 O tei òre roa i rave i te hara, e aore roa e haavare i ìteä i to na vaha.

23 O tei òre i faaìno atu, ia faaìnohia mai o ia; e ia pohe o ia ra, aore o ia i parau tähoo atu; ua püpü rä ia na iho ia na no na te manaò tià ra.

24 O tei maraa hoì ia na iho ta tätou hara i to na iho tino i nià i te tätauro, ia haapaò tätou, o tei matara mai i te hara ra, i te parau tià; no to na hoì ìravarava i ora ai òutou.

25 Mai te mämoe i haere ê ra hoì òutou; ua hoì mai rä i teie nei i te Tiaì e te Tiàau o to òutou mau värua.

Ioane 10.1-10

Te parapore o te tiaì-mämoe maitaì

1 «Âmene, âmene, e parau atu vau ia òutou, o të òre e nä te ùputa i te tomo i roto i te âua mämoe ra, o të paìùma nä te tahi èà ê ra, e èiä ia e te haru.

2 E nä te ùputa ä te tiaì-mämoe i te tomo.

3 E ìriti mai ia te tiaì-ôpani ra ia na, e e faaroo mai te mämoe i to na reo, e taò atu ä o ia i ta na iho mämoe mä te faahiti atu i te iòa, e e arataì o ia ia rätou i räpaeàu.

4 E ia arataì o ia i ta na iho mämoe i räpaeàu ra, e nä mua o ia ia rätou i te haere, e pee mai rätou ia na, ua ìte hoì rätou i to na reo.

5 E òre rätou e pee i te taata ê, e horo ê rätou i reira, aore hoì rätou i ìte i to te taata èê reo.

6 I parau tià atu ra Ietu ia rätou i taua parapore nei, e aita roa i ìte i te parau ta na i parau atu ia rätou ra. O Ietu te tiaì-mämoe maitaì

7 Ua parau faahou atu ra Ietu ia rätou: «Âmene, âmene, e parau atu vau ia òutou: o vau te ùputa o te âua mämoe.

8 O to mua atoà ia ù nei, e èiä ia e te haru, aita rä te mämoe i faaroo ia rätou.

9 O vau te ùputa, o të nä ô nei mai ia ù nei i te tomo ra, e ora ia, e haere rätou i roto e i räpae, e noaa hoì te mäa.

10 O te èiä anaè ta te èiä i haere mai ai, e o te täparahi hoì e ia pau roa. I haere mai nei au ia noaa to rätou ora, e ia rahi atu ä te ora.

Manaò.

E parau mau te Tiaì e te Tiàau, e na taò teie e ärataì i te âau i te vai äraraa i te mau taime atoà no te oraraa, tei turäma i te èà tià ia faanaho e ia haere i nià ma te ìte i te haafifiraa rau e vai ra. Te mea ra e tïtauhia i te taata haere to na ia âvae tei paruruhia e te tämaa tei riro èi tiàrama e tauturu i te rama ia puai noa te àma. No te haamanaò ia tätou e, o Ietu tei parau ia na e märamarama, no te faaìte i te taata i te täpaò no te Aroha e te here o te Atua i te taata, te auraa te manaò ia i parauhia ai e èvaneria, òia hoì te parau no te aroha e te here o te Atua, ta te taata ra o Ietu i faaìte, ta na ìmi i te raveà ia märamarama te taata, aita ra hoì te taata i märamarama roa, mai te reira iho ä, e ère te mea rahi te feiä i âpee ia na, mea ra tei täpeà i ta na parau te parau ia ta Na i ìmi i te raveà ia märamarama, te ra parau e naò ra e èvaneria. Ua haamata e mai na, ia òre pai tätou ia manaò e, te èvaneria ua haamata i te tau o Ietu, mai na nià ia Ietu te haamata te parau o te èvaneria ua haamata e na mai na te parau o te èvaneria, i te taime te Atua i rahu ai te raì e te fenua. Ua parau te Atua, ua tupu, ua faaìte mai te Atua mea maitaì, te reira maitaì e ora no te taata. E aha te èvaneria e parau maitaì no te aroha e te here o te Atua ia tätou, te ra mea e haaàti ra ia òutou, ia ìte mai tätou ua tupu e èvaneria, e parau maitaì no te aroha e te here o te Atua ia tätou, tera mea e faaî ra i te aru a te Atua e èvaneria e parau maitaì, òia hoì te tahi mau täpaò ta te Atua i tuu mai, ia noaa i ta tätou haamaitaìraa ia na i te mau taime atoà, e i te mau vahi atoà, te mea te ìte ra tätou eiaha, maite peu e rave tätou i te ïà, te ïà e ère no te faaî noa i te ôpu o te taata, faaòre i to na poìä e ère. Ia roaa ra ta te taata haamaitaìraa i te Atua na roto i teie ïà i reira e faufaahia ai. Te mau mea atoà e faaî nei i te fenua, e ère no te faaî noa i to tätou ôpu, ia roaa ra ta tätou àrueraa i te Atua, no to na aroha e to na here, e, e parau maitaì, e parau maitaì tera no te Aroha e te here o te Atua ia tätou, ôpanihia atu ra e tätou i roto i te puta, naò ra ia tätou te èvaneria tera ia i papaìhia e Mataio, Märeto,  Ruta, e Ioane aita ua papaì e na te Atua, te Atua tei haamata i te papaì, àhiri tätou i haapii faahou a na ra ia tätou, i te taiò i te mau faanahoraa te mau faufaa e vai ra i roto i te aru, e ìte tätou te rauraa no te mau tumu räau, te mau àihere, te mau manu, te mau rö, te mau tiare, e te huru no te mau puaa e te vai atu ra…. Eiaha ra tätou e hiò noa mea nehenehe roa e òaòa ra tätou no te tupuraa te ôpuaraa faaora a te Atua ia hiò tätou i te fenua no reira mai tätou, e parau ia tätou e, no ô nei to ù pito i te täpuraahia, e riro ia te fenua e vahi e noaa ai ia tätou i te haamaitaìraa i te Atua, ta tätou àrueraa, ta tätou faateniteniraa i to na iòa. Ua î te fenua ta te Atua haamaitaìraa i te taata, e faaî te fenua, e faaî ra i te taata tei ìte i te haamaitaì e te ârue i te Atua. Ia î te fenua i te taata haapaò i te òhipa èi faatupuraa i te maitaì ia täno te haapiiraa e au no taata, ia mä to na âau, i reira e òhie ai i te ârue e te faateniteni i te Atua, te mea ia e noaa ai te paari i te tarahapa, färii faahou te hoì i roto i tera huru to tätou, tera huru i horoàhia mai, e ère na tätou i maìti, tera te huru i vaiihohia mai a rave i tera huru, e a faaòhipa, ia noaa ta tätou haamaitaìraa, e àrueraa, faateniteniraa i te Atua, eiaha i te mahana pureraa noa. Mäite mea ua ìte tätou i te reira mea, te mau vahi atoà e haere, te mau òhipa atoà ta na e rave, e haamaò iho ä o na i to na Atua, te reira te mea e täno faahou ia tätou i te rave i teie mahana. Tätou e te feiä paari, òutou e te feiä âpï, eiaha òutou e teòteò noa i to òutou âpï, faaòhipa ra i te reira âpï, ia ìtehia te vahi âpï i roto i ta òutou haamaitaìraa i te Atua, faufaahia tätou. Te auraa ua ìte te Atua ua mau ia tätou, no reira a rave tera horoà ta te Atua ia tupu te parau tià a te Atua, ia mauruüru te Atua, ia mauruüru änaè te Atua ia rahi atu ä ta na ia ninii mai, no te mea te ora ta tätou e faanaò nei, na te Atua i ninii mai, e aha te auraa maite peu na te Atua i ninii mai, e täno atoà o na ia täpeà horo atu ai tätou i hea, no reira a rave ia rahi atu ä ta na e horoà mai. Ia faaroo tätou i te mau taiòraa no teie mahana ia au i te haapotoraa te vai nei te tahi türamaraa no te Tiaì e te Tiàau :

-Taramo 23, 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

-Òhipa 2, 41 E te feiä atoà i färii mäite i ta na ra parau, päpetitohia iho ra ia, e âmui-atoà-hia mai ra ia rätou, e toru atoà tautani i taua mahana ra.

-1 Petero 2, 25 Mai te mämoe i haere ê ra hoì òutou; ua hoì mai rä i teie nei i te Tiaì e te Tiàau o to òutou mau värua.

-Ioane 10, 9 O vau te ùputa, o të nä ô nei mai ia ù nei i te tomo ra, e ora ia, e haere rätou i roto e i räpae, e noaa hoì te mäa.

Ia parau o Ietu o Vau te ùputa te haapäpü noa mai ra ia na tumu e piti i te parau no te Tiaì e te Tiàau, teie huru parauraa na Ietu no te haapäpü ia te vai ra te vahi tomoraa i roto i te faanahoraa a te Atua. Te tïtauraa tei roto ia i teie reo no Ietu e parau ra e, Âmene, Âmene, oia hoì a faaroo mai e parau mau teie e tomo na roto i te ùputa no te àua mämoe. E ùputa vai matara noa teie no te faaìte i to te Atua hoo-faahou-raa mai ia tätou ua piri na teie ùputa i te taime i tuuhia ai te taata i räpae i te ô i ètene i te ôfatiraa i te ture no te ora, rave iho ra te taata te maitaì, e te ìno, te ora e te pohe. O ta Ietu ia e faaäu nei i te àua mämoe, e o Ia te ùputa, e tomo te taata i roto ma te tiàma, e haere i rapae ma te maa, no te faaìte i te türamaraa i te parau maitaì no te ora. E parau faahou o Ietu Âmene, Âmene te piti ia no taime, no te haapäpü hoê noa vahi tomoraa i roto i teie àua, te àua no te tiàmaraa, tei na nià i te patu i te tomo ra e èiä e feiä ia tei haafaufaa òre te parau no te ora, i faanahohia na roto i te Aroha e te here o te Atua Nui Tumu Tahi. I roto i ta tätou parau no teie mahana te faahitihia nei te parau no te tiaì mämoe, te tiaì ôpani e parau hoê teie no na òhipa e piti, te tumu òhipa ra e tiaì, i te faaìteraa a Ietu, te tiaì, e taata mäìtihia teie e te Atua e tävini no na, tei höroàhia te mana e faaroo te mämoe i to na reo, e ìte mai te mämoe i te reo o te tiaì, e pärahi fatata noa o ia i te reo o te Atua, ma te tütonu maite i nià i te mau hinaaro o te Atua, tei pïhaì iho ra te Atua ia na i roto i ta na òhipa e rave. Te tiaì e taata ia tei haamau päpü i to na tiàturiraa i nià i te Atua. To na Atua ra ta na ia faufaa, to na türuìraa i nià i te Atua, e ta na tïtauraa, to na atoà ia te reira òaòaraa e to na puai. Mai te Atua tei riro èi Atua mana hope, e tiàturiraa hope òre atoà to na i to na Atua. Àita te taiä e täpeà ia na, àita te fifi i faaòraì tià i mua ia na i muri, àita te faahemaraa i faaôpaì ia na, i te pae àui e i te pae àtau. Hoê noa ta na maoti, te raveraa i te òhipa ia raa te iòa o to na Atua e ia ìtehia hoì to na hanahana i roto i ta na òhipa e i roto i te täatoàraa o to na oraraa. No te here o te Atua i to na nünaa, e no to na aroha rahi i te hiòraa i te mau àti atoà ta na e faaruru ra, no reira te Atua i mäìti ai i to na mau tiaì, te mau toa, no te rave i te mau òhipa atoà e au ia ravehia no te haamänina i teie mau fifi tei riro èi herepata tei täumiumi noa i te taata i roto i te pohe. Ia ìte ra te nünaa e èita na te tiaì e faaora ua riro noa te tiaì èi mauhaa i roto i te rima metua o te Atua. No reira, na te huru fifi e faatupu mai te huru o te tiaì ta te Atua i hinaaro no te òhipa faaora ta na i manaò. Te auraa o teie manaò ra, àita te tiaì i hau atu i te tahi, àita hoì te tahi i ïti i te tahi e mau tävini anaè rätou no te Atua hoê. E nä ô tätou i te parau e, no to te Atua here i to na nünaa, i faatupu ai o Ia i te mau tiaì, âreà te mau tiaì ra, e faatià ia i te nünaa ia tupu te hinaaro o te Atua, oia hoì, ia matara te here o te Atua, e ia ninii mai o Ia i te mau maitaì atoà no roto mai i to na here metua. Ia na reira te nünaa e riro o ia èi putarià e èi ôriò mata no te Atua Nui Tumu Tahi. Oia mau te parau no te tiàau, e faanahoraa teie na te Atua i te taata tätaì tahi, te faariroraa ia na èi moihaa no te faatupuraa i te parau tià a te Atua, a riro atu ai te ao nei mai te hoê hiò hipa e faaìte mai te hohoà o te Atua e to na hanahana. Ia ìte tätou i te hoê àiü fänau âpï te parau nei tätou e tià maitaì teie àiü i to na nä metua fänau, ia riro atoà to tätou oraraa èi faaìteraa e, e tamarii tätou na te Atua. Te tiàau èita o na e täui te vahi i faanahohia no na e te Atua, èita atoà o na e tuu ia na i roto i te mäìtiraa no te faatià i to na manaò. Ia na reira o ia ua ateä i te faanahoraa i ôpuahia e te Atua no na, ua hara i mua i te aro o te Atua, e ua haavare. Te hinaaro o te Atua ia tätou ia faatupu e ia faahotu i ta na parau tià i roto i to tätou oraraa. No te ètaèta e te täiva o te taata, i tono mai ai te Atua i ta na Tamaiti here i roto i teie nei ao, te ao no te tià-faahou-raa no te faahotu-faahou-raa i te parau tià a to na Metua. Te hinaaro atoà nei rä te Atua ia faaìte te huru e te hohoà ta na i hinaaro no tätou, e hara na tätou ia faariro tätou i te parau o te Mäòhi èi peu no te tau. Eere roa atu te reira. Ia faatupu tätou i te parau no te Mäòhi, te faatupu ra ia tätou i te hinaaro o te Atua, i te mea ua hämani o ia ia tätou ia au i to na huru e i to na hohoà, ia au i ta na i hinaaro ia riro èi huru e èi hohoà no tätou. Te òhipa tumu ia a te tiaì, e te tiàau to raua tärià no te faaroo ia i te hinaaro o te Atua, te hinaaro o te Atua ra te hinaaro atoà ia o te nünaa. 25 Mai te mämoe i haere ê ra hoì òutou; ua hoì mai rä i teie nei i te Tiaì e te Tiàau o to òutou mau värua.

 

 

Teraì òr. Faatura.       

 

Ruta èv 24.13-35 Ninii.

 

Tāpati 23 no Èperera 2023.

Ninii.

Taramo 16

1 Mitetäma na Tävita. E faaoraraa ia ù, e te Atua, te tiàturi nei au ia òe.

2 Te parau nei au i te Fatu e: «O ta ù Fatu òe, aita a òe e faufaa i to ù nei maitaì.»

3 Âreà te feiä moà i te fenua nei, o te feiä maitataì rätou o ta ù e pöpou nei.

4 E faarahihia to rätou mäuiui tei rü i te hoì i muri. Ta rätou tütia-inu toto ra, e òre au e hopoi, e òre hoì ta ù vaha e faahiti noa atu i to rätou iòa.

5 O te Fatu, o ta ù ia tufaa e ta ù âuà, o òe tei haapaò mai i to ù nei terero.

6 Ua maìri aè nei to ù terero i te vähi maitaì; e te maitaì nei au i ta ù nei tufaa.

7 E haamaitaì ä vau i te Fatu o tei haapii mai ia ù ra: te aò mai ra ta ù manaò âau ia ù i te ruì.

8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue.

9 I òaòa ai ta ù âau, e te òaòa nei ta ù värua; e taòto atoà ta ù tino nei mä te tiaì.

10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti.

11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

Òhipa 2.14-33

Te aòraa a Pëtero i te mahana Penetetöte

14 Ua tià aè ra rä Pëtero, e te àhuru mä hoê atoà ra i nià, faateitei atu ra i ta na reo, ua parau atu ra ia rätou:

«E te mau âti-Iüta nei, e te feiä atoà e pärahi i Ierutarëma nei, ia ìte mai òutou, a faaroo mai na òutou i ta ù nei parau.

15 Aore hoì teie nei mau taata i taèro i ta òutou e manaò na, o te toru ä hoì teie o te hora i teie nei mahana.

16 O tei parauhia mai rä teie e Ioera perofeta ra e:

17 «Te parau mai ra te Atua: Ia tae i te mau mahana hopeà ra, e ninii atu ai au i ta ù Värua i nià iho i te taata atoà, e na to òutou mau tamarii tamaroa ra e te mau tamahine e tohu, e e ìte hoì to òutou mau taata âpï ra i te ôrama, e to òutou hoì mau taata ruhiruhiä ra, e täòtoòtoähia ia.

18 E ninii atu vau i ta ù Värua i nià iho i ta ù mau tävini täne e ta ù mau tävini vahine i te reira mau mahana,  e e tohu hoì rätou.

19 E na ù e tuu i te piri i nià i te raì, e te täpaò i raro i te fenua; te toto, e te ahi, e te ata auahi hoì.

20 E riro te mahana ei pöuri, e te märama ei toto, e tae ai i taua mahana rahi mataù a te Fatu ra.

21 E e riro hoì e, o të tiàoro i te iòa o te Fatu ra, e ora ia.»

22 E te mau taata o Ìteraèra nei, e faaroo mai òutou i teie nei parau: o Ietu o Nätareta, o te taata i tiàhia e te Atua, i rotopü ia òutou i te mau òhipa mana e te temeio, e te mau täpaò ta te Atua i rave ia na i röpü ia òutou nei, ua ìte atoà hoì òutou iho na.

23 Oia rä i tuuhia mai ia òutou i te ôpua mau e te haapaò-ätea-raa a te Atua, i noaa ai ia òutou, faatätauro iho ra, e täparahi pohe roa atu ra i te rima o te haapaò òre ra.

24 Oia hoì ta te Atua i faatià aè nei, ua matara hoì ia na te täpeà ra o te pohe, e òre roa hoì o ia e mau i te reira.

25 Te parau mai ra hoì Tävita ia na e: «Ua ìte au i te Fatu e tià i mua i ta ù mata, no te mea tei ta ù rima àtau o ia, e òre au e âueue.

26 I òaòa ai ta ù âau, e ua òaòa hoì ta ù vaha; e e taòto atoà hoì ta ù tino mä te tiaì;

27 e òre hoì òe e vaiiho i ta ù värua i häte, e òre hoì òe e tuu i to mea moà ra ia tähuti noa na.

28 E faaìte mai ia òe ia ù i te èà ora; e faaî mai ia òe ia ù i te òaòa i to mata na.»

29 E hömä, e te mau taeaè, e parau noa atu na vau ia òutou i te patereareha ra ia Tävita, e ua pohe hoì o ia e ua tänuhia, e te vai noa nei ä to na menema io tätou nei e tae roa aè nei i teie nei mahana.

30 No te mea rä e perofeta, ua ìte hoì o ia e, ua parau mai te Atua ia na mä te tapu, e faatià o ia i te Metia i to na ra huaai i te haapaòraa i te tino ra, ei pärahi i nià iho i to na ra teröno;

31 o ia rä i ìte ätea noa i te reira, i parau ai o ia i te tiàfaahouraa o te Metia ra: «E eita to na värua e vaiihohia i häte, e eita to na tino e vaiiho-noa-hia ia tähuti noa na.»

32 O taua Ietu nei ä ta te Atua i faatià aè nei i nià, o mätou atoà nei hoì te ìte.

33 E teie nei, ua faateiteihia o ia i te rima àtau o te Atua, e ua noaa mai i te Metua ra te Värua Maitaì i parauhia mai ra, ua ninii mai o ia i teie ta òutou e hiò nei, e ta òutou e faaroo nei.

1 Pētero 1.17-21

17 E te ta ù na òutou i te Metua, o tei feruri i tei au i ta te taata nei òhipa mä te haapaò òre i te huru o te taata, e pärahi i to òutou purutiaraa i ô nei mä te mataù.

18 Ua ìte hoì òutou e aore òutou i hoohia i te mea e ìno noa ra, mai te ârio e te àuro, i ta òutou parau faufaa òre i tuuhia mai e to òutou hui-metua ra;

19 i te toto taoà rä o te Metia ra, mai to te ârënio ìno òre e te maì òre.

20 o tei haapaò-ätea-hia ia hou te tumu o teie nei ao, i teie nei rä mau ànotau hopeà i faaìtehia mai ai no òutou;

21 o tei faaroo i te Atua ia na, o tei faatià ia na i te poheraa ra, e ua horoà i te mana no na, ia riro to òutou faaroo e te tiàturi i te Atua.

Ruta èv 24.13-35

Te färaa mai Ietu i nä pipi no Èmäuta

(Mär 16,12-13)

13 E inaha, rereva atu ra e toopiti o rätou i taua mahana ra i te hoê ôire iti o Èmäuta te iòa, e ono àhuru tetatia te mäoro e Ierutarëma.

14 Paraparau noa iho ra räua i taua mau mea atoà i ìteä ra.

15 E te paraparau noa ra räua, e te feruri noa ra räua räua iho, ua täàti atoà mai ra Ietu ia räua, haere atoà atu ra rätou.

16 Ua faaòrehia rä te ìte i to räua mata, aita atu ra räua i ìte ia na.

17 Ua parau mai ra o ia ia räua: «E aha tënä na parau ta òrua i paraparau noa na mä te mata huru òto?

18 Ua parau atu ra te hoê o räua ra ia na, o Tereopa te iòa, nä ô atu ra: «O òe anaè na paha te taata ê i Ierutarëma nei aore i ìte i te mau mea i tupu i reira i eie nei puè mahana?

19 Ua nä ô mai ra o ia ia räua: «E aha ia mau mea? Ua parau atu ra räua ia na: «Ia Ietu i Nätareta ra, e perofeta mana ia i te raveà, e te parau i mua i te aro o te Atua e te taata atoà hoì.

20 E to tätou mau tahuà rarahi e te mau haavä, i te tuuraa atu ia na ia faautuàhia ia pohe, e ua faatätauro hoì ia na.

21 Âreà mätou nei, manaò ia mätou e, o te taata ia e ora ai Ìteraèra nei: eere rä te reira anaè ra, o te toru hoì teie o te mahana i ravehia ai taua mea ra.

22 I hitimaùe ra mätou i e toofanu puè vahine o mätou nei, o tei haere i te poìpoì roa i te menema ra;

23 e aore aè ra i ìteä e rätou to na tino, haere mai ra, parau mai ra e: «E puè merahi tei ìteä ia rätou, o tei parau mai ia e:»Ua ora o ia.

24 Haere atu ra e toofanu puè taata o mätou i te menema ra, e roohia atu, oia mau ä ta taua mau vahine i parau mai ra: aita rä rätou i ìte ia na.

25 Ua parau mai ra o ia ia räua: «Âuë ia puè taata manaò òre e, e te faaroo taìàtä i tei hope i te parauhia mai e te mau perofeta ra e.

 26 Eere änei ia nä-reira-hia to te Metia pohe e tià ai, a reva atu ai i to na ra ao?

27 Ua faaìte mai ra o ia ia räua i te auraa i te mau parau no na iho i roto i te mau parau atoà i päpaìhia ra, mai ia Möte mai ä e tae roa aè ra i te mau perofeta atoà.

28 E fätata mai ra ia räua taua ôire haerehia e räua ra, ua faahua haere roa o ia.

29 Täpeà atu ra rä räua ia na, nä ô atu ra: «E faaea na tätou; ua huru ahiahi hoì, ua mure te mahana. Haere atu ra o ia i roto e pärahi atoà rätou.

30 E ia na i âmui atoà atu ia räua i te àmuraa mäa ra, ua rave iho ra o ia i te päne, haamaitaì atu ra i te Atua, vähi iho ra tuu atu ra ia räua ra.

31 Tuua iho ra te ìte i to räua mata, ìte atu ra räua ia na, moè roa atu ra rä o ia.

32 Ua parau iho ra räua raua iho: «Eere, e hoa, i ànaanatae to täua âau ia na i paraparau mai ia täua i te äratià ra, a faaìte mai ai ia täua i te auraa i te mau parau i päpaìhia ra?

33 Ua tïtià aè ra räua i nià i reira ra, hoì mai ra i Ierutarëma, roohia mai ra ua putuputu te tino àhuru mä hoê ra, e te tahi pae atoà o rätou ra,

34 o tei parau atu ia räua e: «Ua tià mau ä te Fatu i nià, e ua faaìte mai ia Timona.

35 Ua faaìte atoà mai ra räua i te parau ta räua i ìte i te äratià ra, e to räua ìteraa ia na i te vähiraa i te päne ra.

Manaò.

E inaha, aita te hinaaro o te Atua i taui, i teie parauraa ia riro vau ei Atua no òe, e ia riro òe ei nünaa no ù. E aha anaè atu ä teie mau ôtoheraa ta tätou e ìmi nei, te haapäpü noa mai nei te hoì i te Atua ra. Ta ù mau i ìmi, te reira të tupu ; e ta ù i ôpua ra, te reira të mau  i ta Ìtaia parauraa i te pene 14 ìrava 24. Parau mau ihoä ia, eiaha atoà rä tätou e haamoè roa i teie reo to te Atua e haamanaò mai ra e : Ia òre òutou ia faaroo, e òre òutou e haapäpühia e faahitiraa ia a Ìtaia i te pene 7 ìrava 9 . Te manaò ra te tahi e, te apiapi ra to na manaò e to na oraraa i te Atua, ua hape ia taata, no te mea te hinaaroraa i te Atua, e parau te reira no te ora, eere te parau no te pohe, e aita atu e hinaaro to te Atua maoti rä, ia ora te taata. No reira, e tauturu tätou i te Atua i te faatupuraa i to na hinaaro, e ia riro ei manaòraa tuutuu òre na tätou, ei feafearaa hoì na tätou i te pö e te ao e, tei roto tätou i te tau no te hoìraa i te Atua ra te ao no te tiàfaahouraa te tau atoà no te nuu Atua, eere teie i te tau no te ârearearaa, e tau ra no te haapäpüraa i to tätou tiàraa Here Atua, Here Fenua. Tei hinaaro i te hoì ra, ua faaineine ia, e no te tautururaa ia tätou i roto i teie faaineineraa, ia òre ia moèhia ia tätou te vähi tei reira te ora, eiaha ia àramoinahia ia tätou e, te fenua, te tïteàmata ia o te ìte i te Aroha Atua.

Te reira mau atoà rä te vähi tätou i fifi ai, no te mea ua mätau roa tätou i te faaea fätata noa i te mau vähi ìtehia e tätou, te vai noa ra i roto ia tätou te mataùtaù i te haere nä te mau vähi ìte-òre-hia e tätou, e inaha, te tanoraa mau, aita e ôtià, aita e ùputa të òre e matara i te faaroo, e tae noa atu i te ora, ia au i te mea ta Ietu e parau ra i te raatira hänere. Te vähi e hope ai ta te taata räveà, te vähi e haamata ai te mata taata i te paruparu, te vai ra te faaroo. Te täviri te reira no te mau ùputa atoà tei òre ä te manaò taata i hiroà aè nei. Te fifi no tätou i teie mahana i mua i teie parau no te faaroo, te mea ia e, e parau teie no te tarià, e parau no te maniania i tae i roto i te tarià o te tahi taata, te rave te reira maniania i te huru o te parau, oia hoì to na nä rotoraa i te reo i te tupu mai, aore ra te rave i te tahi huru ê atu. Ia parau tätou e : Ua faaroo vau, te faaìte noa ra tätou i te òhipa ta te tarià i rave no tätou. Te fäì nei tätou mai te mea e, aita e taa-ê-raa i roto i te tarià e o tätou, e ta te tarià hoì i rave, o tätou iho tei rave i taua òhipa ra. Mai te peu rä te haru noa ra te tarià i te mau maniania e haaàti noa ra i te taata, i te tahi taime, ei mea ani roa i te taata ia haapaò i te tahi mau maniania o te mäuà roa atu, no te mea te mäìti atoà nei te tarià, oia hoì te taata, i te mea ta na e täpeà, i ta na e faaruè. Ahiri te taata e täpeà nei i te täatoàraa o te mau maniania i tae i roto i te tarià, e òhipa rahi ia te taata i muri iho i te mäìtiraa i te mea faufaa, i te mea faufaa òre. Te vai atoà ra i roto i te faaroo te manaò e, te mea i tae mai i roto i te tarià, ua oti i te faarirohia e tätou ei òhipa ìtehia e te mata, tano atu ai tätou e hiò i te tüàtiraa, aore ra te tüàti-òre-raa e ìtehia ra i roto i te mea i faaroohia, e te òhipa i ravehia. Te parau atoà nei tätou i teie riroraa mai te parau ei òhipa e, faaroo. E au noa rä teie parau no te taata tei haapäpü mai e, ua tae te parau ia na ra, ta na faariroraa i te reira parau ei òhipa të taiòhia ei faaroo. Hiò na tätou i te metua ia faanaho i te òhipa na te tamarii, ia ani te metua e : Ua faaroo, no to na ia hinaaro ia haapäpü mai te tamarii e, ua tae maitaì änei te parau i roto i te tarià. Ia parau rä te metua i te tamarii e : Aita òe i faaroo i ta ù parau, no te aò ia i te tamarii i te òreraa i faariro i ta na parau ei òhipa. Nä roto i te òreraa te parau i riro mai ei òhipa, hiòhia atu ra mai te mea, ua faufaa òre atoà te mea i parauhia. Ua päpü atoà ihoä ia tätou e, e tae roa te reira haafaufaa-òre-raa i nià i te taata na na te parau, te taata hoì e tiaì ra i te tupuraa o te mea ta na i parau. Te ìte rii noa atu ra ia tätou i ta Ìtaia faahaparaa i te mau taata no to na nünaa i mua i ta rätou huru färiiraa i te parau a te Atua, aore ra to rätou òreraa e hinaaro e faatae i te parau a te Atua i nià i te vähi ta te Atua e tiaì ra ia rätou ia rave, oia hoì, ia haapaò i te òhipa a te Tumu Nui, e ia hiò i tei ravehia e ta na rima. Te auraa ra, te hinaaro ra ia te Atua ia riro ta na parau ei manaòraa tämau na te taata i te pö e te ao. Ia faahiti tätou i te parau o te taata faaroo, aore ra te taata faaroo òre, no te haamanaò ia e, te vai ra te taata haapaò, e te taata haapaò òre, aita roa atu rä e parauhia ra e, e tarià maitaì, oia hoì e tarià faaroo to te tahi, e tarià maì to te tahi. Te auraa, aita te manaò i nià i te òhieraa, aore ra te täupupuraa te parau i te ö i roto i te tarià o te tahi, aore ra te tahi, tei nià rä te manaò i ta räua haafaufaaraa, aore ra ta räua haafaufaa-òre-raa i te parau i tae ia räua ra. Teie atu ra te mau ìrava turu ia au te haapoto i te mau taiòraa i haapaòhia no teie mahana :

-Taramo 16, 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue.

-Òhipa 2, 18 E ninii atu vau i ta ù Värua i nià iho i ta ù mau tävini täne e ta ù mau tävini vahine i te reira mau mahana,  e e tohu hoì rätou.

-1 Petero 1, 19 i te toto taoà rä o te Metia ra, mai to te ârënio ìno òre e te maì òre.

-Ruta Èv. 24, 32 Ua parau iho ra räua raua iho: «Eere, e hoa, i ànaanatae to täua âau ia na i paraparau mai ia täua i te äratià ra, a faaìte mai ai ia täua i te auraa i te mau parau i päpaìhia ra?

I mua i te rahiraa o te mau parau i faaroohia e tätou e tano ia tätou e faahiti, haamanaò noa na i teie mau parau i te faufaa no te tiàfaahouraa o Ietu. Teie ìmiraa i te mau raveà ia parau tämau te mau pipi i roto i te Hau no teie ao no te tiàfaahouraa. I teie parauraa a Ietu, I parau atu na vau ia òutou i te parau o te fenua nei, e aore òutou i faaroo, e aha òutou e faaroo ai ia parau atu vau ia òutou i te parau o te raì i te päpaìraa a Ioane i te pene 3 ìrava 12 ; E ia faaroo mai te taata i ta ù ra parau, e aore i haapaò, eere ia vau të faahapa ia na, aore hoì au i haere mai e faahapa i to te ao, i haere mai rä vau e faaora i to te ao  Ioane i te pene 12 ìrava 47. Ua òiòi roa i teie na pipi i te faaoti e hoì i roto i to raua òire no Èmäuta, no te mea ua tupu to raua peàpeà e te òto to raua faaroo ua paruparu i te ìteraa i te mau òhipa i tupu i nià i te Fatu. No raua ua ö to raua tiàturiraa i te Fatu i roto i te ano tei haarumaruma to raua faaroo i te ìteraa i te parau o te Fatu tei faatupu i te ora, tei ôfati i te tara o te pohe, e tei haafaufaa òre ia hate, no te niu i te parau no te ora mure òre. I nià i te èà ua täàti mai o Ietu ia raua to raua mata ua faa-òre-hia te ìte, to raua tarià te faaroo ra ia te àparau nei rätou i te mau manaò i nià i te huru no Ietu i Nätareta ta raua i tiàturi e faaora ia Ìteraèra, ua pärahi noa raua i roto i te raveà òre e te pohe. No Ietu tei tiàfaahou ua faaroo maite i te mau faatiàraa no te mau òhipa i tupu, Âuë ia puè taata manaò òre e, e te faaroo taìàtä i tei hope i te parauhia mai e te mau perofeta ra e, Eere änei ia nä-reira-hia to te Metia pohe e tià ai, a reva atu ai i to na ra ao. Ua faaìte mai ra o ia ia räua i te auraa i te mau parau no na iho i roto i te mau parau atoà i päpaìhia ra, mai ia Möte mai ä e tae roa aè ra i te mau perofeta atoà. Ia  fätata mai ra ia räua te ôire haerehia e räua ra, ua faahua haere roa o ia. Täpeà mai rä räua ia Ietu, nä ô atu ra: «E faaea na tätou; ua huru ahiahi hoì, ua mure te mahana. Haere atu ra o ia i roto e pärahi atoà rätou. E ia na i âmui atoà atu ia räua i te àmuraa mäa ra, ua rave iho ra o ia i te päne, haamaitaì atu ra i te Atua, vähi iho ra tuu atu ra ia räua ra. Tuua iho ra te ìte i to räua mata, ìte atu ra räua ia na, moè roa atu ra rä o ia. Ua parau iho ra räua raua iho: «Eere, e hoa, i ànaanatae to täua âau ia na i paraparau mai ia täua i te äratià ra, a faaìte mai ai ia täua i te auraa i te mau parau i päpaìhia ra. Ua tïtià aè ra räua i nià i reira ra, hoì mai ra i Ierutarëma, roohia mai ra ua putuputu te tino àhuru mä hoê ra, e te tahi pae atoà o rätou ra, o tei parau atu ia räua e: «Ua tià mau ä te Fatu i nià, e ua faaìte mai ia Timona. Ua faaìte atoà mai ra räua i te parau ta räua i ìte i te äratià ra, e to räua ìteraa ia na i te vähiraa i te päne ra. Ua riro te maa o te fenua èi tïteàmata no te ìteraa i te hanahana o te Atua. Eere änei no te mea te parau ra te fenua e te mau maa i te parau o te Atua, te faaìte ra hoì i te Atua, i ìte atoà ai te taata i te Atua. Nä roto i te rahu, ua naho te mau mea atoà ia òhie i te tupu te färereiraa i roto i te taata e te Atua, ei räveà faatupu i te märamarama i roto i te taata, e te òhipa hoì a te märamarama, eere änei te tautururaa i te taata i te ìteraa. No reira, mai te peu e rämepa ta òe parau, no te tauturu ia ia ù, te taata taiò, i te ìteraa ia òe. E aha ia te taata i onoöno ai i te parauraa e, aita o ia i ìte i te Atua, e no te mea aita o ia e ìte ra i te Atua, e tano ai o ia e rave i te òhipa ta na i hinaaro, mai ta na i hinaaro. E ara atoà rä tätou, o te ôpani tätou i teie rämepa i roto i te puta, e ia piri hoì te puta, pohe roa aè ra ia te märamarama o teie rämepa. Naò ia teie manaò i te parauraa e te ao no te tiàfaahouraa e ao ia tei türamahia i te rämepa no te ìte, mai te mau vahine tei ìte i te ora i te mahana mätamua no te hepetoma, mai ia Petero te ìte, e na pipi no Èmäuta. Mea hau roa atu ra e te maitaì no tätou e parau e, e rämepa ta òe parau, terä i päpaìhia i nià i te fenua, e terä i päpaìhia i roto i te Pïpïria. Aita hoì te tahi i taa ê atu i te tahi, inaha te parau ra i te parau o te Atua. i tià ai teie parauraa a te perofeta Ioera 18 E ninii atu vau i ta ù Värua i nià iho i ta ù mau tävini täne e ta ù mau tävini vahine i te reira mau mahana,  e e tohu hoì rätou.

 

Teraì òr. Faatura.