« Māreto 13.24-32 » Mäìtihia

 

Tāpati 14 no Novema 2021.

Mäìtihia

« Taramo 16 »

Âueue

1 Mitetäma na Tävita. E faaora ia ù, e te Atua, te tiàturi nei au ia òe. 2 Te parau nei au i te Fatu e: «O ta ù Fatu òe, aita a òe e faufaa i to ù nei maitaì.» 3 Âreà te feiä moà i te fenua nei, o te feiä maitataì rätou o ta ù e pöpou nei. 4 E faarahihia to rätou mäuiui tei rü i te hoì i muri. Ta rätou tütia-inu toto ra, e òre au e hopoi, e òre hoì ta ù vaha e faahiti noa atu i to rätou iòa. 5 O te Fatu, o ta ù ia tufaa e ta ù âuà, o òe tei haapaò mai i to ù nei terero. 6 Ua maìri aè nei to ù terero i te vähi maitaì; e te maitaì nei au i ta ù nei tufaa. 7 E haamaitaì ä vau i te Fatu o tei haapii mai ia ù ra: te aò mai ra ta ù manaò âau ia ù i te ruì. 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue. 9 I òaòa ai ta ù âau, e te òaòa nei ta ù värua; e taòto atoà ta ù tino nei mä te tiaì. 10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti. 11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

« Täniera 12.1-3 »

Parau maitaì 

1«Ia tae i te reira ra atu e tià mai ai te arii rahi ra o Mitaèra, o tei tià mai e faatià i te mau tamarii a to òe ra mau taata: ei reira te ànotau ahoaho, aita ia ahoaho mai te tupuraa mai o te fenua ra e tae roa aè nei i teie nei taime: ia tae hoì i te reira tau e ora ai to òe mau taata, te feiä atoà i päpaìhia i roto i te puta ra. 2 E rave rahi to tei taòto i raro i te repo nei e ara mai; e rave i te ora-mure-òre te tahi pae te tahi pae e rave ia i te haamä e te vahavaha mure òre. 3 E te feiä i haapii i te parau maitaì ra, e ànaana mai ia mai te ànaana o te raì ra; e o tei faafäriu i te taata e rave rahi i te parau tià ra, mai te feiä atoà ra ia e a muri noa atu.

« Hēpera 10.11-18 »

Päpaìhia

11 E tià hoì te mau tahuà atoà i te tià-noa-raa i te mau mahana atoà i te haamoriraa, e te püpü-pinepine-raa i te mau tütia hoê ä huru o të òre roa e tià ia matara te hara ra. 12 Âreà te Metia, oti aè ra ta na tütia hoê i te püpühia ei täraèhara faufaa mure òre, pärahi atu ra i te rima àtau o te Atua ra. 13 E teie nei, te tiaì ra e ia faarirohia ta na mau ènemi ei taahiraa âvae no na. 14 Ua maitaì roa hoì e a muri noa atu te feiä haamoàhia e ana, i te perotefora hoê ra. 15 O ta te Värua Maitaì atoà e faaìte mai ia tätou nei, oti aè ra hoì ta na i parau i mütaa iho ra e: 16«Te nä ô mai ra te Fatu: Teie te faufaa ta ù e faaau ia rätou i muri aè i taua ànotau ra: E tuu vau i ta ù ra mau ture i roto i to rätou âau, e e päpaìhia e au i roto i to rätou manaò.» 17 Ua nä ô atoà mai ra: «E to rätou ìno e ta rätou mau hara, e òre roa vau e haamanaò faahou atu.» 18 Ua faaòre-anaè-hia hoì te reira ra, aita atu ra e püpüraa täraèhara toe.

« Māreto 13.24-32 »

Te haereà

(Mät 24,29-31; Ruta èv 21,25-28)

24«Ia tae rä i taua ànotau ra, i muri aè i taua pohe ra, e haapöurihia ai te mahana, e e òre hoì te märama e ànaana mai: 25 e maìri mai hoì te mau fetià o te raì ra, e te mau mea mana o te raì ra, e ueuehia ia. 26 Ei reira rätou e ìte ai i te Tamaiti a te taata i te haereà mai i nä roto i te ata, mä te mana rahi e te hanahana. 27 Ei reira o ia e tono ai i ta na ra mau merahi, e haaputu mai i to na ra feiä i mäìtihia, no nä âpoo mataì e maha ra, no te hopeà mai o te raì e te fenua ra.

 Te tumu tute

(Mät 24,32-35; Ruta èv 21,29-33)

28 E teie nei, ia ìte òutou i te tahi parapore i te tute nei. E ia ôteo te ômou rii e mähora aè ra te rau, ua ìte ia òutou e ua fätata te àuhune i reira. 29 Oia atoà i teie nei, ia hiò òutou i taua mau mea nei, ua fätata ia i reira tei te pae ùputa ia, ia ìte hoì òutou. 30 Oia mau ta ù e parau atu ia òutou nei, e òre e mou teie nei uì e hope ai teie nei mau mea atoà i te tupu. 31 E mou te raì e te fenua, e òre roa rä ta ù parau e mou.

Te ànotau  

(Mät 24,36-44)

32«Âreà te reira mahana e te reira hora, e òre roa te hoê e ìte; e òre hoì te mau merahi o te raì, e òre atoà te Tamaiti, maori rä o te Metua anaè ra.

 « Manaò »

Te mau ànotau a uìuì mai ä hou te tupuraa te mau mea atoà, ua anaunau to te pö i te uripaò o te ano, aore e ù, aore e tiàrama, aore e mataì, aore e ua, ia tupu ai te pätaùtaù a te mau Nuu Atua o te pö. I te taùraa i te mau tumu e mau ra i te pöuri, i roto i te vai no te püfenua te taura pito e täamu ra i te reo, i te parau, i òto ai te maniania tei faatiàrepu i te vai i parauhia ai to te Värua tei ìriti i te ùputa o te fenua. Te maniania te paraparau, te himene, te ùuru, te òoro, ua riro anaè ia ei täpaò no te ora o te taata, âreà te òreraa te maniania, e riro ia i te faatupu i te uiui i roto i te manaò. Ia fänau te hoê tama, te mea ta te metua e tiaì, ta na ia taì, oia te maniania mätamua e paaìna mai nä roto i to na tino, no te mea na te reira maniania e faaìte mai e, te vai ra te ora i roto i te tama. Te faufaa rä o te ora, aita i faaea noa i nià i te faatupuraa i te maniania e ìtehia ai e, te vai ra te tahi mea, tei roto atoà rä i te faarooraa, oia hoì i roto i te ineineraa i te färii i te mea ta taua maniania e faaìte ra, e te pähonoraa hoì i te mea e tïtauhia mai ra. Teie te tahi mau iòa maniania ta te tarià e faaroo nei : te paaìna, te taì, te haruru, te àhehe, te vavä, te vevo, te varovaro, te pïnaì, te àtete, te maùu, te àvï, te taû, te pahö, te pooâ, te höhö, te hühö, te mü, te muhu…, e te vai atu ra. Te reo e tiaìhia ra te taata ia faaìte, ta na ia fäìraa e, te vai, te ùputa ia o te ora, te vähi e matara ai te ôpuaraa faaora a te Atua o te märamarama ia. No reira, te ìte atoà ra tätou e, te mea faufaa, eere te maniania ta te pape i faatupu, te haruru rä o te reo o te taata i te fäìraa i te faufaa o te pape i roto i te ôpuaraa faaora a te Atua. Teie te tahi mau manaò i roto i te mau taiòraa no teie mahana e tià i te tauturu i te tätou manaò :

- Taramo 16, 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue.

- Täniera 12, 3 E te feiä i haapii i te parau maitaì ra, e ànaana mai ia mai te ànaana o te raì ra; e o tei faafäriu i te taata e rave rahi i te parau tià ra, mai te feiä atoà ra ia e a muri noa atu.

- Hepera 10, 16 «Te nä ô mai ra te Fatu: Teie te faufaa ta ù e faaau ia rätou i muri aè i taua ànotau ra: E tuu vau i ta ù ra mau ture i roto i to rätou âau, e e päpaìhia e au i roto i to rätou manaò.»

- Märeto 13, 27 Ei reira o ia e tono ai i ta na ra mau merahi, e haaputu mai i to na ra feiä i mäìtihia, no nä âpoo mataì e maha ra, no te hopeà mai o te raì e te fenua ra.

Teie mau ìrava i faaroohia e tätou, te faaìte-noa mai ra i te faufaa no te feiä, no te nünaa i mäìtihia e te Atua Nui Tumu Tahi, e mau taata tei haapii i te parau maitaì i te mea ua tuuhia i roto i to rätou âau te ture no te aroha e te here, e ua päpaìhia i roto i to rätou manaò, e faaroo rätou i te vava o na âpoo maitaì e maha i te hopeà o te raì e i to te fenua o rätou tei mäìtihia e tei haaputuputuhia e te mau merahi. Èita tätou e tätara te auraa o te taò e mäìti, o ta tätou ra e hiò mai to na tupuraa, e te tahi faaäuraa e tià ia faaäuhia. A hiò na tätou i te parau no te päpe e faufaa rahi teie i roto i to tätou oraraa ta tätou atoà e parau nei e vai, te ànavai ra no te faaìte ia i te puai o te pape  nä te tahi vähi teitei, e faaroohia to na haruru i te ätea ; ia tahe marü noa te pape nä nià i te ôfäfaì, te faaroohia atu ra ia to na àhehe ; e ia horo te pape nä roto i te âuri, aore ra nä roto i te òhe, te faaroohia ra ia te vavä. I roto i te vavä, te vai ra te manaò no te tahi maniania e tere, oia te maniania të òre e mau i te vähi hoê, e faaroohia rä mai te tahi vähi fätata, tere tià atu i te vähi ätea ; aore ra e faaroohia i te ätea, a nuu noa mai ai. Te huru atoà ia o tei mäìtihia e faaroohia i roto i te vahi reira te tupuraa o teie òhipa i nià i te fenua. Te mea hoì ta te parau i faatupu, ua faaroo atoàhia te reo. Aita atu paha e täpaò hau roa aè i te faahiahia ei haapäpüraa i te parau o te ora maoti rä, te faatupuraa i te tïtauraa ra i roto i te parau. Te auraa, òre-noa-atu ai e ìtehia te mäìtiraa e faaroohia ra, ua riro atoà te faaroo ei täpaò no te ora. Te reira te mea i ìtehia i roto i te faahitiraa a te Parau Maitaì, e haapöurihia te mahana, e òre te märama e ànaana mai, te mau fetià o te raì, te mau mea mana o te raì ra, e ueuehia, e ìtehia te Tamaiti a te taata i te haereà mai  mä te mana rahi e te hanahana. Teie te òhipa a te feiä i mäìtihia, ia òhipa ia òre te mau tiàrama ia puehu i te faatupuraa i te märamarama te ora ia te reira o te taata. Oia atoà te parau no te tute ia ôteo te ômou e mähora ai te rau, ua fätata te àuhune, ua tae i te pae ùputa ia, Oia mau, e òre e mou teie nei uì e hope ai teie nei mau mea atoà i te tupu. E mou te raì e te fenua, e òre roa rä ta ù parau e mou. Âreà te reira mahana e te reira hora, e òre roa te hoê e ìte; e òre hoì te mau merahi o te raì, e òre atoà te Tamaiti, maori rä o te Metua anaè ra. E mätutuhia nei te òhipa a te feiä mäìtihia ia tupu tämau te parau no te märamarama i roto i te taata e te nünaa. E mau rätou i te parau tià e te parau, e ia anoenoe noa te aroha e i roto i to rätou hinaaro. No te mea te vai nei te tahi parauraa a te Mäòhi e tarià to te mau mea atoà, oia hoì e faaroo te mau mea atoà i te parau : E tarià to te mau mea atoà, to te fenua, to te moana ; to te mataì, to te vero, to te fafatatiri, to te püahiohio, to te ureuretiàmoana, e faaroo, e tarià to te fetià, to te âvaè, to te rä, to te uira, to te tau mä te taiò, to te moana hauriuri, to te mau mautai, i faaroo anaè ia i te reo o te nuu atua. No te mea feiä mäìtihia na te aru a te Tumu Nui i haapii ia rätou, i ìte ai rätou te tupuraa no te mau ta te rahu e faaìte noa, mai te tau mai e tae roa i teie ànotau, i rahu te Atua i te raì, te fenua, e to rätou atoà ra mau faufaa, te pape anaè te mea ta te Atua i òre i rahu, no te mea o te Atua iho te pape, o ia iho te vai, o ia i vai na, e vai nei, e vai ä. Teie te parauraa a Täniera, 3 E te feiä i haapii i te parau maitaì ra, e ànaana mai ia mai te ànaana o te raì ra; e o tei faafäriu i te taata e rave rahi i te parau tià ra, mai te feiä atoà ra ia e a muri noa atu.

 

Teraì òr. Faatura.

« Māreto 12.38-44 » Tiàhapa

 

Tāpati 7 no Novema 2021.

ÔROÀ

Tiàhapa

 « Taramo 146 »

« Faatià »

1 E haamaitaì i te Fatu. A haamaitaì i te Fatu, e ta ù värua. 2 E haamaitaì au i te Fatu, òi vai aè to ù ora; e himene au i ta ù Atua, òi vai aè au nei. 3 Eiaha e tiàturi i te hui arii, e te taata atoà, aita hoì o na e ora. 4 Te reva nei hoì to na värua, te hoì nei o ia i to na ra repo, mou roa atu ra ta na i ôpua i taua mahana ra. 5 E ao to na tei te Atua o Iatöpa te tauturu ia na, e tei to na Atua, tei i te Fatu to na tiàturiraa. 6 O tei hämani i te mau raì e te fenua, te tai e te mau mea atoà i roto ra; o tei haapaò i te parau mau na na e a muri noa atu. 7 O tei faatià mai i te feiä i hämani-ìno-hia, e ua horoà mai i te mäa na tei poìa ra. O te Fatu tei tätara i tei täpeàhia ra, 8 o te Fatu tei faaàraàra i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau tià ra. 9 Te faaora nei te Fatu i te mau taata èê ra, te tauturu nei o ia i te ôtare e te vahine ìvi ra âreà te haereà o te paieti òre ra, e huri-ê-hia ia.10 E vai arii mai ä te Fatu e a muri noa atu. O to Atua, e Tiona, e tae noa atu i te mau uì atoà ra. Hareruia.

« 1 Te mau Arii 17.10-16. »

« Iti, Pau »

10 Ua tià aè ra o ia haere atu ra i Tarefate. E tae atu ra o ia i te ùputa o te ôire, inaha, e vahine ìvi te òhi haere ra i te vahie: ua pii atu ra o ia ia na, nä ô atu ra, A hopoi mai na i te hoê maa pape i roto i te färii, ia inu vau. 11 E te tii atu ra o ia i taua pape ra, ua parau atu ra o ia ia na, nä ô atu ra, Hopoi atoà mai i te tahi mäa päne i to rima na. 12 Ua parau mai ra o ia, Te ora ra to Atua o te Fatu, aita roa a ù e mäa àma, mäori rä te hoê mäa färaoa hoê rima e î tei roto i te hue, e te hoê mäa hinu i roto i te färii; e inaha, te òhi haere ai au i roto a tunu ai nä mäua o ta ù tamaiti, a àmu ai mäua, a pohe atu ai. 13 Ua parau atu ra Èria ia na, Eiaha e mataù; e haere rä òe e nä reira ta òe i parau ra: e mata na rä i te hämani i te hoê vähi iti nä ù. 14 Te nä ô mai ra hoì te Atua o Ìteraèra a te Fatu, E òre te hue färaoa e iti, e òre hoì e pau te färii hinu, e tae noa atu i te mahana e hopoi mai ai te Fatu i te ua i te fenua nei.15 Ua tii atu ra o ia, ua rave i ta Èria i parau mai ra; ua àmu iho ra o ia e o Èria, e to na atoà ùtuafare, e rave aè ra te mahana. 16 Aore hoì taua hue färaoa ra iti, aore hoì te färii hinu i pau, ta te Fatu hoì i parau mai, i te vaha o Èria ra.

« Hēpera 9.24-28 »

« Täraèhara »

24 Aita aè nei hoì te Metia i tomo i roto i nä vähi moà i hämanihia e te rima ra, i te hohoà no te vähi moà mau ra, tei te raì mau rä o ia ia faaìte o ia ia na iho i mua i te aro o te Atua no tätou, i teie nei ä. 25 Eere rä ia püpü pinepine o ia ia na iho ei tütia, mai te tahuà rahi i tomo i roto i te vähi moà i te mau mätahiti atoà, mä te toto ê ra. 26 Ahiri hoì i nä reira na, mai te mätamua mai ä o teie nei ao, ua rahi roa ia to na poheraa. Hoê roa rä o na faaìte-raa-hia mai i teie nei, i te hopeà o te mau tau nei, ia faaòre o ia i te hara i te faatütiaraa ia na iho. 27 E mai te taata nei hoì ua haapaòhia ia hoê aè poheraa, e muri aè o te haaväraa ia, 28 oia atoà te Metia, a hoê aè nei o na püpü-raa-hia ei tütia ia hopoi ê o ia i te hara ä te taata e rave rahi; e e fä mai ä o ia o te piti ia o te färaa mai, eiaha ei täraèhara, ia ora rä te feiä e tiaì ia na ra.  

« Māreto 12.38-44 »

« Te huru »

(Mät 23,1-36; Ruta èv 20,45-47)

Te faaroo ra te taata rii ia na mä te pöpou. 38 Ua parau atu ra o ia ia rätou i te haapiiraa ra: «E ara i te mau päpaìparau i hinaaro i te àhu haapereue a hahaere ai, e ia arohahia i te vähi taata, 39 e te pärahiraa maitataì i roto i te mau tunato ra, e te vähi teitei i te àmuraa mäa ra. 40 O tei rave pau roa i ta te fëtii o te mau vahine ìvi ra, e te haamäoro i te pure ei täpoì. E pohe rahi roa atu ia to rätou.

« Te horoà »

(Ruta èv 21,1-4)

41 E te pärahi ra Ietu i mua iho i te piha vairaa taoà ra, hiò atu ra i te taata i te tuuraa i te moni i roto i taua vairaa ra. E rave rahi te feiä taoà i tuu i te moni rahi i roto. 42 Ua haere mai ra te hoê vahine taoà òre, e ìvi, ua tuu mai ra i e piti repeta i roto, oia te toterane hoê ra. 43 Ua parau atu ra Ietu i ta na mau pipi, nä ô atu ra ia rätou: «Oia mau ta ù e parau atu ia òutou nei: e rahi ta teie nei vahine ìvi taoà òre i tuu i roto i te puèraa taoà nei i ta rätou atoà. 44 E tiàhapa hoì no ta rätou taoà rahi ta rätou i tuu i roto, âreà o ia ua hope roa a ana taoà rii navaì òre i te tuuhia e ana i roto.

 

 

« Manaò. »

I teie mahana te haapeàpeà nei te mau taata atoà i te huru oraraa e tupu ra, te horo püpara nei te tahi pae ma te àveià òre, e te tahi pae te hepohepo nei te ïti e te pau o te maa, te riàrià nei te tahi mau pupu taata i te huru tupuraa no te aru e to na mau faanahoraa. Te mehameha nei te tahi pae i teie maì viivii, e te pätia, e aore ra eiaha e pätia, hämani-roa-hia te hoê ture no teie maì, tei haamataù i te taata, ia puhipuhi òe i te paka, ia tänu òe e haavahia, e faahapahia òe i te fare täpeàraa e te aufauraa i te moni. Ia òre òe e pätia i teie pätia ärai e faahapahia òe i te àufau i te moni, i teie huru faanahoraa no te haamoè i te hoê mau faanahoraa piò e tupu ra i roto i to tätou fenua, ta te mau faatere e huna nei. Te haapöhia nei to tätou mata, te faareruhia nei to tätou fëruriraa mai te mau taata tei taìhia te tiàmaraa, te faaïtihia nei to tätou tiàraa taata. Te faatitohia nei te mau rave òhipa i te mau òna, te faahuehue nei te mau òna i te faatereraa fenua Mäòhi, te pure nei te ètärëtia no teie mau òhipa e tupu nei i roto ia Mäòhi Nui e te pii i te hau. I mua i teie mau òhipa e haafifi nei i to tätou oraraa vaamataèinaa, mea tià i te taata tätaì tahi i te amo i ta na hopoià, i te mea o tätou atoà te tahi o te tumu i pitaataa ai tätou. Te tiàturi nei tätou i te Atua, aita ra tätou e tiàturi nei i te fenua te metua vahine horoà ora ia tämaa ta na mau tamarii. Te parau nei tätou i te tiàmaraa, te here nei ra tätou i te faatîtî a te herepata, maa àpi punu noa huri roa te fëruriraa, horo atu ra tätou i roto i te pohe.

I teie taime tamata na ra tätou i te hiò i te mau ìrava tei haapoto i te mau taiòraa no teie mahana, e te mau tïtauraa ta teie mau parau e faatoro ra :  

- Taramo 146, 8 o te Fatu tei faaàraàra i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau tià ra.

- I Mau Arii 17, 16 Aore hoì taua hue färaoa ra iti, aore hoì te färii hinu i pau, ta te Fatu hoì i parau mai, i te vaha o Èria ra.

- Hepera 9, 28 oia atoà te Metia, a hoê aè nei o na püpü-raa-hia ei tütia ia hopoi ê o ia i te hara ä te taata e rave rahi; e e fä mai ä o ia o te piti ia o te färaa mai, eiaha ei täraèhara, ia ora rä te feiä e tiaì ia na ra. 

- Māreto 12, 44 E tiàhapa hoì no ta rätou taoà rahi ta rätou i tuu i roto, âreà o ia ua hope roa a ana taoà rii navaì òre i te tuuhia e ana i roto.

Te tiàhapa e parau âano teie i roto i te oraraa, tei faaìte i te rahi, te taiò, te hau, te hape, e te vahi nohoraa. I roto i te värua o teie taò, te faaìte nei i te puai no te faarahi, eiaha ra no te faaïti, no te faatià tei hapa. Ia ìte te taata i to na hapa i ö mai te fëruriraa no te faatura, no te mea e tauturu te faatura i te tupuraa o te parau i roto i te ora. E naò ia te manaò i te parauraa e, o te haamataraa teie  no te maitaì, to òe ia ìteraa i te faatura i to òe hapa, ia òe iho, oia hoì to òe ìteraa ia òe ei mea faufaa i mua i to òe iho mata. Te mea ia e àma ai o te mörï maitaì, teie mörï e na roto mai i te türama te pü o te âau no te türama ia àma e ia märamarama, no te mea te mörï e nä roto ia òe i te haere i räpae, te mörï anaè te reira të òre e faareru i to òe feruriraa. Te tanoraa mau, te faatura, eere i te tahi òhipa ta ù e rave no ù iho, no te taata atoà rä ta ù i òre i hinaaro ia topa i roto i te peàpeà, nä roto i to ù huru, ta ù parau, e te òhipa ta ù e rave. E tano tätou e parau e, ia ìte òe i te faatura ia òe iho, e ìte atoà òe i te faatura i te täuaro, ia au i te manaò e, ta òe i hinaaro ia ravehia no òe, te mea atoà ia e tano òe e rave atu no te tahi. Ia òre to òe âau ia riro mai te hiò hipa i reira e puta atoà ai te parau o te tahi, hapa noa ai òe, te tano noa ra, mai ta te Taramo e haamanaò mai ra : 8 o te Fatu tei faaàraàra i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau tià ra. Te haapiiraa ia ta Ietu e horoà nei i te mau taata rii, e ua haapoupou i teie mau huru parau. O vau ihoä te haamataraa o te mau mea atoà, ia täua rä e maitaì ai te oraraa, mai te òre e haamoè e, te vai atoà ra räua, nä reira hoì o rätou. Te haapii noa mai ra te reira e, i roto i te mau òhipa atoà ta tätou e rave, te reo ihoä te täviri i te ùputa o te märamarama. E maere änei hoì tätou, inaha na te Parau i ìriti i te ùputa o te märamarama e te ora.

Te nä ô ra te tahi reo to te Atua i te faaitoitoraa ia Èria : 16 Aore hoì taua hue färaoa ra iti, aore hoì te färii hinu i pau, ta te Fatu hoì i parau mai, i te vaha o Èria ra. E nä ô ia tätou e : E haere tätou mä tenä na maa täàmu ùru iti, ma te na maa haapee ufi ta òe. I roto te fifi tei reira te nünaa i te tütava-noa-raa i teie mahana mai te taa òre i te hopeàraa o to na parau, e mai te âmaa räau i paìpaìhia e te àre miti, e tei hutihia e te ôpape, mai te reira atoà te manaò o te nünaa i te huti-hänoa-raa-hia e te feiä e manaò nei no na, e tei faaoti atoà i te mea maitaì no na.

A hiò na ra tätou te mau parau e tupu nei i roto i ta Ietu haapiiraa ia tätou i teie mahana, i te parau no te mau taata tiàraa tei au i te àhu haapereue, e te mau taata taoà, e te vahine ìvi e ta na horoà. Te manaò e vai nei i te parau a Ietu teie ia, aita te manaò o Ietu i nià i te faanehenehe o te taata tei nià ra i ta na peu e rave ra, aita te nehenehe e âpee ra i te aroha e te here. Oia atoà te parau no te taata taoà, aita i faahapa, no ta rätou ra horoà aita ra e âpee ra i te rahi o ta rätou taoà.

Âreà ra te vahine ìvi, ua horoà i te täatoà ra o ta na moni, i roto i te vairaa taoà ra, o ta Ietu i haafaufaa i roto i te horoà a teie vahine. Te tahi ra manaò tumu i roto i teie parau no te tiàhapa, te tahi ia mau arataìraa manaò e faanahohia ra no te oraraa âmui o te taata, tei ìtehia e tei färiihia e te täatoà, te mea atoà te reira e horoà i to na püai e to na mana. Te auraa, te maitaì o te tiàhapa, aita to roto i te mau faanahoraa ta na e faataa ra, tei roto rä i te mea ta na e tïtau ra, oia te oraraa maitaì, te òaòa, e te hau no te täatoà.

 

Teraì òr.Faatura.

Māreto 12.28-34 Ätea.

 

Tāpati 31 no Âtopa 2021.

Ätea.

ÔROÀ REFOROMĀTIO

Taramo 119, 97-106.

« Tiàrama »

97 Te rahi roa nei to ù hinaaro i ta òe ra ture  O to ù ia manaòraa i te mau mahana atoà nei. 98 E ìte rahi to ù i te parau na òe ra, i to ta ù mau ènemi ra,  e tià hoì i te vai-mäite-raa i pïhaì iho ia ù. 99 Ì te rahi to ù i to ta ù mau òrometua atoà ra, no te mea te feruri nei au i ta òe i faaìte mai ra. 100 Ì te rahi to ù i to te feiä tahito ra,  no te mea te haapaò nei au i ta òe parau. 101 Te täpeà nei au i o ù puè âvae i te mau èà ìino atoà ra, ia haapaò vau i ta òe parau. 102 Aita vau i faaruè i ta òe ra mau faaauraa, no te mea ua haapii mai òe ia ù. 103 O te momona o ta òe nei parau i ta ù nei tämataraa e. E momona rahi ia to te reira i to te meri i to ù nei vaha.104 No ta òe ra parau i noaa ai ia ù te ìte, i òre i au ai ia ù te mau èà ìino atoà ra. 105 E rämepa ta òe parau i to ù nei âvae, e tiàrama no to ù nei mau èà. 106 Ua tapu vau, e e haapaò vau i taua tapu ra, e e haapaò vau i te mau faaauraa parau tià na òe ra.

Teuteronomi 6.2-6

« Hinaaro »

2 Ia mataù hoì òe i to Atua ra i te Fatu e ia haapaò i ta na atoà ra mau haapaòraa, e ta na mau parau, ta ù e parau atu ia òe na; o òe, e to tamaiti, e to mootua, i to òe pärahiraa i te ao nei, e ia haamaorohia hoì to òe na puè mahana. 3 E faaroo mai, e Ìteraèra, e haapaò maitaì ia rave; ia maitaì òe, e ia rahi roa òe i taua fenua tahe pape noa te ü e te meri ra, i ta te Atua no to mau metua ta te Fatu i parau mai ia òe ra. 4 E faaroo mai, e Ìteraèra e: O te Fatu to tätou Atua, hoê te Fatu: 5 e teie nei, e hinaaro atu òe i to Atua i te Fatu mä to âau atoà, e mä to värua atoà, e mä to püai atoà. 6 E teie nei mau parau ta ù e parau atu nei ia òe i teie nei mahana, ei roto i to âau e vai ai:

Hēpera 7.23-28

« Tià »

23 E rave rahi hoì to rätou i riro ei tahuà, no te mea, aore rätou i mau i te pohe. 24 Âreà o ia ra, no te mea e tià i te pärahiraa e a muri noa atu, e òre to na töroà tahuà e riro ia vëtahi ê. 25 E teie nei, e tià maitaì roa atu ia na ia faaora i te feiä e nä reira atu ia na ra i te haere i te Atua ra, e tià hoì o ia i te oraraa e a muri noa atu ei tià ia rätou. 26 O te huru ia o te tahuà rahi e au ia tätou nei, o tei maitaì roa ra, e te rave òre i te ìno, e te viivii òre, e te taa ê hoì i te feiä rave hara ra, e ia faateiteihia i nià iho i to te raì ra. 27 E òre hoì e au ia na ia nä mua i te püpü i te tütia i ta na iho hara, a püpü ai i ta te taata atoà, mai ta taua mau tahuà rarahi i te mau mahana atoà ra. Hoê roa a ana püpüraa i ta te taata atoà, ia na i püpü ia na iho ra. 28 O te taata paruparu nei hoì ta te ture e faariro ei tahuà rarahi, âreà te parau ra o te tapu, i muri aè i taua ture ra, o te Tamaiti ia ta te reira i faariro ei tahuà rahi, no na te au rahi maitaì roa, e a muri noa atu.

Māreto 12.28-34

« Te faaueraa »

(Mät 22,34-40; Ruta èv 10,25-28)

28 Ua haere mai ra te hoê päpaìparau i pïhaì iho, i faaroo na i ta rätou paraparauraa, e ìte aè ra hoì i te tià o ta na parauraa atu ia rätou, ua ui mai ra ia na: «Tei hea na te parau rahi o te ture ra? 29 Ua parau atu ra Ietu ia na: «Teie te parau rahi o te ture ra: «E faaroo mai, e Ìteraèra e,  O te Fatu to tätou Atua, hoê hoì te Fatu. 30 E e hinaaro òe i to Atua i te Fatu mä to âau atoà, e mä to värua atoà, e mä to manaò atoà, e mä to püai atoà. «O te parau teie i hau i mua. 31 E mai te reira atoà hoì te piti: «E aroha atu òe i to taata-tupu mai to aroha ia òe iho na. «Aita atu ä parau e hau i te reira. 32 Ua parau mai ra taua päpaìparau ia na ra: «Oia mau, e te Òrometua. E parau tià ta òe i parau mai nei: hoê roa hoì Atua e aita atu o ia anaè ra. 33 E të hinaaro atu ia na mä te âau atoà, e mä te ìte atoà, e mä te värua atoà, e mä te püai atoà, e te aroha i te taata-tupu mai to na aroha ia na iho ra, e rahi ia i tei hopoihia ia pau täatoà i te auahi, e te mau tütia atoà ra. 34 E ìte aè ra Ietu e, e parau tià ta na i parau mai ra, ua parau atu ra o ia ia na: «Aore òe i ätea ê atu i te Pätireia o te Atua ra. E aita roa atu e taata i ui faahou i te ui ia na mai reira mai ä.

« Manaò. »

Te mau parau e faaroohia nei e tätou i teie mahana e mau parau Toroèà, e tumu räau teie e hohoà i te tumu taofe te tiare noa te faataaê nei ia raua, te faatoro nei teie tumu räau i to na mau aa i te mau vahi i reira e tupu maitaì ai te tumu. Teie tumu räau ua varavara roa i teie mahana te parauhia ra te vai ra i Faaone, maite mea te vai nei i o tätou mea tià ia ìmihia te raveà ia àtuàtuhia. Te Toroèà ia ìtehia i roto i te vao, e aore ra te faa, no te faaìte ia i te feiä tomo maa te marämarama o te èà e haerehia rä. E èà matahataha tei òre e haafifi i te turaa âvae e tae atu ai i tähatai.

Te auraa o teie manaò, te mea ia ua päpü ia tätou te vai ra te fifi o te nünaa, ta tätou e ìmi nei i te rave  no te tatara i terä fifi teie rä ua mau roa i roto i te parau ua tö te mataù i te tahi pae, ua tö te faahepo,  i mua i te mau haamehameharaa i mua i teie maì viivii, ua pärihia teie maì te tumu fifi ai te oraraa vaamataèinaa, e ua fänau te haavare e te parau tià òre. A tae hoì e, ua faaroohia te mau parau tei faatîtî i te nünaa, i mau i te mau faanahoraa i ravehia i tiàtià ai te tahi pae no te faatïtïàifaro, te parauhia ra mea ïti roa rätou. Teie huru faanahoraa aita i ätea roa i te òhipa i tupu i te 31 no Âtopa 1517,  mea na roto i te taata ra ia Maratino Rutero te tupuraa teie òhipa, ua papahia teie parau i nià i te tumu no te tiàturiraa i te Metia e ta Na mau haapiiraa, e o Ia anaè te ärai i rotopü i te taata e te Atua. Te Päpa èita ia i te tià no te Atua i te fenua nei, e èita atoà o ia e tià e höroà i te parau faatià no te tomo i roto i te patireia o te Atua, e taata ra o ia mai te mau taata atoà. Te ihu noa ra tätou i mua i te mau fifi tei faaätea ia tätou i te tumu mau ta teie tumu räau e faaìte noa mai ra i to na faufaa i te parauraa e Toroèà, hoê teie tumu räau ta te fenua e türama noa mai ra te tahi räveà ia ìtehia te hau o te âau o te nünaa. Oia atoà te parau a Vaitä, e Toroèà teie parau,  Te ìte nei au, e tei mua ia ù nei te auraa o teie nei peu maere rahi. Tenä mai te fanaù ùnaùna a te Tumu, e haere mai e hiò i teie nei uru räau i Taputapuätea nei. E riro te fenua ia rätou, e mau teie haapaòraa tahito nei. E tae mai hoì te mau manu moà o te moana i te fenua nei, e haere mai e taìhaa i ta teie räau i ùotu e haapii mai nei. No te papa teie mau manaò e maha ìrava tei ìritihia no roto i na taiòraa e maha i faataahia no teie tapati:   

- Taramo 119, 105 E rämepa ta òe parau i to ù nei âvae, e tiàrama no to ù nei mau èà.

- Teuteronomi 6, 5 e teie nei, e hinaaro atu òe i to Atua i te Fatu mä to âau atoà, e mä to värua atoà, e mä to püai atoà.

- Hepera 7, 25 E teie nei, e tià maitaì roa atu ia na ia faaora i te feiä e nä reira atu ia na ra i te haere i te Atua ra, e tià hoì o ia i te oraraa e a muri noa atu ei tià ia rätou.

- Märeto 12, 34 E ìte aè ra Ietu e, e parau tià ta na i parau mai ra, ua parau atu ra o ia ia na: «Aore òe i ätea ê atu i te Pätireia o te Atua ra. E aita roa atu e taata i ui faahou i te ui ia na mai reira mai ä.

I te tahi taime, aita e iòa ta te taata i tuu i nià i te òhipa ta na e rave ra, na te ìteraa i te òhipa e tiaìhia mai ra ia na ia rave, i haapäpü i taua färii òre no na ra. Mai te mea atu ra e, te tahi mea aita to na e iòa i mua ra, ua riro mai i teie nei ei ôtoheraa ; te auraa, e iòa to na i teie nei. Ia faaäuhia i nià i ta tätou parau no teie mahana i teie reo no Ietu e parau ra e, Aore òe i ätea ê atu i te Pätireia o te Atua ra. E nä ô ia tätou e, te feiä no rätou te parau ta Ietu e faahiti nei, no te mea ua ìte rätou i te hinaaro o te Atua. I haere mai ai tätou i roto i te haamoriraa e te himeneraa, no te mea i roto i te oraraa teie to tätou òaòaraa te tumu te reira no te hinaaro o te Atua Nui Tumu Tahi. Ua haere mai tätou no te ìteraa i te hinaaro o te Atua e haapäpü i te tahi mea i vai noa na i roto ia tätou mai te ìte òre tätou i te auraa e te iòa o taua mea ra. Ia parau o Ietu, Aore òe i ätea ê atu i te Pätireia o te Atua ra. Te ätea i roto i te reo o Ietu te faaìte mai nei te toeà no te òhipa e rave to na iòa na te taata tätaìtahi te reira e tuu ia ìtehia to na tupuraa. Ia faaroo tätou i teie aore, to na auraa tei pïhaì iho roa, aore i metera, mai ia tätou i roto i te fare pure no teie mahana, mai ia tätou i roto i te ùtuafare, mai ia tätou i te pae tähatai, mai ia tätou i roto i te fare tämaaraa. Te vahi faahiahia o teie reo no Ietu àita o na e faahapa mai ra ia ù, ia òutou, ia rätou, ia na, ia òrua, ia raua, ta na parauraa i te ture, 5 e teie nei, e hinaaro atu òe i to Atua i te Fatu mä to âau atoà, e mä to värua atoà, e mä to püai atoà, e te aroha i te taata-tupu mai to na aroha ia na iho ra, e rahi ia i tei hopoihia ia pau täatoà i te auahi, e te mau tütia atoà ra. Te haamanaò noa mai ra teie taò ätea i te tahi täuiraa tei ìtehia i roto i te tiàraa e te vairaa o taua taata ra. I mua ra, tei nià, e i teie nei, ua òaòa, i te aroha e te here o te Atua. E au ia i teie tumu räau te Toroèà, tei ìte i te faatoro i to na èà i te vahi e färerei ai i te mau taeaè, e te mau tuahine, no te faatupu i te fatata ia òre ia vai te area i roto i te ätea. A hiò na tätou i ta tätou mau himene tärava mea piripiri te taata te vaha noa te äteatea te tahi i te tahi ia tärava te mau àuri, e faaroohia ai to na navenave, a hiò na tätou i roto i te tahi mau haaputuputuraa mai te mau ârearearaa, ua tänotäno anaè te pehe te haùtiraa te âvae, e èita e maoro roa ua haùti tino, teie anei te huru ätea e parauhia nei e Ietu. Te vähi mau teie e tano ia haapäpü-maitaì-hia. Ia parauhia e, te Atua te tumu o te oraraa o te taata, aore ra e tupuraa te taata no te ôpuaraa a te Atua Nui Tumu Tahi, eere no te mea e, aita atu ta te taata maoti rä, te oraraa i to na oraraa mai tei faanahohia mai e te Atua, mai te täui òre i te tahi vähi. E noaa änei te ànaanatae i te reira huru oraraa tei òre i ìte i te manaò o te taata, e te mea e riro i te faaòaòa ia na. E tano tätou e faaäu i te taata ta te Atua i hämani i teie tumu räau te Toroèà i te mea te fenua teie e mau ra ia na.

 

Teraì òr. Faatura.

Māreto 10.46-52 « Pee »

 

Tāpati 24 Âtopa 2021.

« Pee »

Taramo 126

« Haere »

1 Tire a te Moruta. I te faaòre-raa-hia e te Fatu te tïtïraa o Tiona, e au tätou i te feiä moemoeähia. 2 Î aè ra to tätou vaha i te àta i reira, e to tätou mau arero i te òaòa. Ua nä ô aè ra to roto i te êtene ra: «E òhipa rahi ta te Fatu i rave ia rätou nei » 3 E òhipa rahi ta te Fatu i rave ia mätou nei,  i òaòa ai mätou nei. 4 E faahoì mai ä, e te Fatu, i to mätou ra mau tïtï, mai ta òe ä i faahoì mai i te pape tahe i àpatoà ra. 5 O tei ueue mä te roimata ra, e ôoti ia mä te òaòa. 6 O tei haere hoì e ueue i te huero mä te òto ra, e hoì faahou mai ä ia mä te òaòa, e mä te hopoi atoà mai i ta na ra mau ruru.

Ieremia 31.7-9

« Ärataì. »

7 Ua nä ô mai ra hoì te Fatu: A hïmene mä te òaòa ia Iatöpa, a pii i rotopü i te feiä rarahi o te mau fenua ra;  e faaìte hua òutou, haamaitaì ä òutou, e nä ô e, e faaora, e te Fatu, i to òe taata, i te toeà o Ìteraèra. 8 Inaha, e arataì mai au ia rätou mai te fenua i te pae i àpatoèrau, e haaputuputu mai au ia rätou mai te mau hopeà mai o te fenua ra; o rätou, e te matapö, e te piriòì atoà ra, e te vahine hapü, e tei roohia-atoà-hia e te mauiui ra; e feiä rahi te hoì mai i ô nei. 9 Inaha, e haere mai rätou mä te òto, e mä te pure atoà ra rätou ia arataì mai au; e arataì au ia rätou i te pape rii tahe ra, i nä te èà manina, e òre ia rätou e turori i reira; ua riro hoì au ei metua no Ìteraèra, e o Èferaima, o to ù ia mätahiapo. Parau faaära hopeà: ua haamau-faahou-hia Ìteraèra

Hēpera 5.1-6.

« Fänauhia »

1O te mau tahuà rarahi atoà i mäìtihia no roto i te taata nei, ua haapaòhia ä ia na te taata, ei rave i te mau mea o te Atua ra, ei hopoi i te perotefora e te tütia täraèhara ra. 2 E tià hoì ia na ia aroha i te ìte òre, e te feiä i hapa, no te mea e àti atoà to na iho i te paruparu. 3 E no reira hoì, e püpü atoà o ia i te täraèhara i ta na iho hara, mai ta te taata atoà ra e tià ai. 4 E aore roa e taata e rave noa i teie nei tura no na iho, maori rä o tei parauhia e te Atua, mai ia Àarona ra. 5 Oia atoà hoì te Metia, eere to na i te faatura ia na iho o ia i riro ei tahuà rahi, na te Atua rä i faatura na tei parau mai ia na e: «O ta ù Tamaiti òe, i naùanei òe i fänauhia ai e au.» 6 Mai ta na atoà hoì i parau i roto i te tahi Taramo ra e: «E tahuà òe e a muri noa atu, ia au i te parau ia Merehiteteta.»

Māreto 10.46-52

« Pee. »

(Mät 20,29-34; Ruta èv 18,35-43)

46 Ua tae atu ra rätou i Ierito, e muri aè ra, ia haere ê o ia i Ierito, o ia e ta na mau pipi, e te taata atoà e rave rahi, te pärahi ra te tamaiti a Timaio, oia hoì Paretimaio matapö ra, i te pae äratià, te ani ra i te taoà. 47 E ìte aè ra o ia e, o Ietu i Nätareta ra, ua pii mai ra, nä ô mai ra: «E te Tamaiti a Tävita ra, e Ietu e, e aroha mai òe ia ù. 48 E rave rahi tei aò atu ia na ia mämü o ia, rahi roa mai ra rä to na pii: «E te Tamaiti a Tävita e, e aroha mai òe ia ù. 49 Ua tià iho ra Ietu, ua faaue atu ra e parau atu ia na. Ua parau atu ra rätou i taua taata matapö ra, nä ô atu ra ia na: «A faaitoito, a tià i nià; te parauhia mai ra òe e ana. 50 Ua haapae atu ra o ia i ta na àhu, tià aè ra i nià, haere mai ra ia Ietu ra. 51 Ua parau atu ra Ietu, nä ô atu ra ia na: «Te hinaaro na òe ia aha atu vau ia òe? Ua parau mai ra taua matapö ra ia na: «E Raponi, ia ora ta ù mata. 52 Ua parau atu ra Ietu ia na: «A haere, ua ora òe i to faaroo. Ora iho ra ta na mata i reira ra, e ua pee mai ra ia Ietu i te äratià ra.

« Manaò »

Mau parau e färereihia nei e tätou i teie mahana te türama nei i te èà e tià, ia na reira i te haere ma te faaìte òre te vahi i reira e faaèa ai. No te faaitoito i te taata ia haapaò i ta na tuhaa i roto i to na tere, e tere faatupu òhipa ia au i te mau hopoià i mua ia na. No te aroha anei, no te here anei, i te faufaa e te mau haafifiraa e tupu mai i nià i te èà, teie èà na te Atua Nui Tumu Tahi i tärai ia au i te huru o te nünaa e faanaò ra i ta Na höroà e taua höroà ra o te reo ia, te reo ra te Värua ia o te Atua i roto i t taata rau noa atu ai to na huru.

Mai ta tätou e ìte ra, ua ômuahia teie manaò e te tahi parau faatupu ora o te tahi räveà èi haafaufaaraa i te hinaaro o te tahi manaò, no te tahi tïtauraa i te pähonoraa no te tahi mea ta te taata i òre i ìte. Te räveà e vai noa mai ai te märamaramaraa o te parau, e ia faatöpahia te èà, aore ra e faatopa te tià, te mea ra e tano ai i roto i teie na taò èà e te tià. Te manaò e faatere i te faaòhiparaa o ta te ôpuaraa e tütonu ra, te faaìteraa ia e, eita te tahi òhipa e tupu, aore ra aita e mea e faaòhie i to na tupuraa, te vai ra rä te tahi räveà ; te räveà haafaufaaraa atoà te reira i te manaò ta tätou i faahiti mai na. Teie te manaò ta te èà e faaìte ra : hoê anaè, hoê noa, te reira anaè te èà i taraihia e te Atua Nui Tumu Tahi. Aita atu to te Tumu Nui hinaaro i te taata te òhipa e vai ra i nià i te èà tià, e nä ô ia tätou e, fätata aita e aniraa ta te Atua i te taata, teie anaè ra. Te faaìte noa mai ra te reira ia tätou e, mea iti roa te mea ta te Atua e ani nei i te taata ia haapaò. Te manaò i horoàhia i muri mai i te èà rä, i reira atoà e hope ai te hinaaro o te Atua i te taata. No reira, te toeà e te rahi o te mau faanahoraa e faateiaha noa nei i te taata, eere na te Atua, e aita te Atua i ìte i te reira, e manaò taata noa te reira, e eita hoì te Atua e hanahana i te reira. Ia taiò hoì tätou i te mau ìrava e haapoto nei i te mau taiòraa no teie mahana :

- Taramo 126, 6 O tei haere hoì e ueue i te huero mä te òto ra, e hoì faahou mai ä ia mä te òaòa, e mä te hopoi atoà mai i ta na ra mau ruru.

- Ieremia 31, 8 Inaha, e arataì mai au ia rätou mai te fenua i te pae i àpatoèrau, e haaputuputu mai au ia rätou mai te mau hopeà mai o te fenua ra; o rätou, e te matapö, e te piriòì atoà ra, e te vahine hapü, e tei roohia-atoà-hia e te mauiui ra; e feiä rahi te hoì mai i ô nei.

- Hepera 5, 5 Oia atoà hoì te Metia, eere to na i te faatura ia na iho o ia i riro ei tahuà rahi, na te Atua rä i faatura na tei parau mai ia na e: «O ta ù Tamaiti òe, i naùanei òe i fänauhia ai e au.»

- Märeto 10, 52 Ua parau atu ra Ietu ia na: «A haere, ua ora òe i to faaroo. Ora iho ra ta na mata i reira ra, e ua pee mai ra ia Ietu i te äratià ra.

Te mau mea ta te Atua e tiaì nei i te taata ia rave ia i te hinaaro i te aroha, te vai nei i roto i to tätou reo Mäòhi te hoê taò e tià ia faaòhipa ia ìtehia te puai o te värua o te parau e « anoenoe ». Te tumu, no te huru ihoä ia o te hinaaro. Ia i te taata te mea ta na e hinaaro ra, ua hope atoà te parau o te hinaaro. Mai teie rii ta tätou e ìte nei i te taata tei poìhä, oia hoì tei hinaaro i te pape. Maoro noa te noaaraa i te taata i te inuraa i te päpe, ua òre atoà to na hinaaro päpe. E inaha, aita te hinaaro o te Atua i te taata i täôtiàhia i nià i te mea tei oti ia na i te rave, aore ra te mea tei noaa mai ia na, e tano ia parauhia e, e hinaaro tüatau to te Atua i te taata. Te tahi atoà fifi to te hinaaro, te mea ia e, ei mea faaära noa ia na, te vai ra hoì te taime e ara, te vai ra rä te taime, eita roa atu e ara; aore ra, ua ara te hinaaro, eita rä te tino e pähono, oia hoì eita te reira hinaaro e riro mai ei òhipa ìtehia to na tupuraa.

Te manaò tumu o te anoenoe, teie ia i roto i teie te tamaiti a Timaio, oia hoì Paretimaio matapö ra, i te pae äratià, te ani ra i te taoà, ua tià to reo i nià i teie èà i te piiraa e, ma te ìte , o Ietu i Nätareta teie, ua pii mai ra, nä ô mai ra: «E te Tamaiti a Tävita ra, e Ietu e, e aroha mai òe ia ù. Ua faaäpiäpi to na reo, e ua haamämühia rahi roa mai ra rä to na pii: «E te Tamaiti a Tävita e, e aroha mai òe ia ù. Ua tià o Ietu i nià i teie èà, ua faaue i ta na mau pipi e parau i taata matapö ra, teie to rätou reo: «A faaitoito, a tià i nià; te parauhia mai ra òe . Ua haapae i to na àhu, tià aè ra i nià, haere mai ra ia Ietu ra. Ua parau atu ra Ietu, nä ô atu ra ia na: «Te hinaaro na òe ia aha atu vau ia òe? Ua parau mai ra taua matapö ra ia na: «E Raponi, ia ora ta ù mata. Ua parau atu ra Ietu ia na: «A haere, ua ora òe i to faaroo. Ora iho ra ta na mata i reira ra, e ua pee mai ra ia Ietu i te äratià ra. Te puai e te faufaa o ta tätou parau no teie mahana te faaàraàraraa o Ietu i te mata o teie tämaïti i nià i te èà tià, e ua anoenoe te Aroha o Ietu i te faarooraa i te reo pii, ua monohia teie reo i te ora, e ua anoenoe ua pee teie tämaïti ia Ietu i te äratià. Te haapäpü noa mai ra ia tätou ia anoenoe te parau o te Aroha e te Here no te pee ia i te mau tïtauraa e faatupu ra i te ora e te hau. E aha te pee ta te ìrava e faaìte ra, te tahi ia mea vai tämau, te tahi mea mutu òre to na tupuraa i roto i te tau. E ravehia no te faaìte i te òaòa o te tahi taata i te hiòraa, te mätaìtaìraa, te faarooraa i te tahi mea, aore ra te àmuraa i te tahi mäa. Ua riro te raveraa i taua mea ra ei òaòaraa no na, e te mea atoà hoì te reira e faaòaòa ia na. Rave na tätou ei hiòraa, te parau o te òri, aore ra te himene. Te vai ra te taata, tei roto ê na te reira mea ia na, maoro o ia i te faarooraa i te pehe, te peeraa iho na muri e te haùtiùti-atoà-raa to na tino ; âreà te tahi atu taata ra, e marö ia te vaha i te faaueraa ia na e òri èita e pee i te pehe noa atu ia to na navenave, eita ihoä o ia e haùtiùti. Mai te reira atoà te taata tei au i te òhipa himene, fätata to na hutiraa aho e, e òtoraa himene anaè. No reira, te taata tei anoenoe i te aroha, e pee teie taata i t ora a te Atua Nui Tumu Tahi, e taata ia tei riro ei òaòaraa tämau no na, te faatupuraa i te aroha. Eere no te mea ua faauehia i rave ai o ia i te tahi òhipa, mai te taata rä të òre e tiaì ia parauhia atu e huti i te aho no te huti i te aho, mai te reira atoà te taata e anoenoe i te aroha, e pee noa o ia i te Atua. E tano tätou e faaau i teie taata i te tahi räau ta te fenua i horoà i te ora, te tupu, e te hotu, nä roto rä i to na rau e to na hotu, te haamaitaì atoà ra teie räau i te fenua e  haamaitaì ra i to na tupu. Te manaò hau e te faufaa ta teie na taò anoenoe e te pee e faaö mai ra, teie ia manaò no te òaòa e te hau tei riro ei tumu, oia hoì ei haamataraa e ei faahopeàraa no te tupuraa o te parau o te aroha.

 

Teraì òr. Faatura.