Ruta èv. 15.1-32. Moè

 

Tāpati 11 no Tetepa 2022.

Moè

Taramo 51

1 Na te Mënätehe. Taramo na Tävita.

2 I te haereà mai o te perofeta ra o Nätana ia na ra i muri aè i to na haereraa atu ia Pätetepa ra.

3 E aroha mai òe ia ù, e te Atua e, i taua hämani maitaì no òe ra, e no te rahi o to òe ra hämani maitaì: e parai òe i ta ù nei mau hara.

4 E horoi hua mai òe ia ù i to ù nei ìno, tämä hua mai ia ù i ta ù nei hara.

5 Te fäì nei hoì au i ta ù nei hara, e te vai noa nei ä to ù ìno i pïhaì iho ia ù.

6 I mua i to aro, to òe anaè ra, i hara ai au nei, e i mua i to mata i rave ai au i teie nei ìno. Ia faatiàhia hoì ta òe parau, e eiaha e faahapahia ia parauhia ra.

7 Inaha, i fänau mai au mä te hara, e i töhia vau e ta ù metua vahine mä te ìno.

8 Inaha, o te parau mau no roto ra ta òe e hinaaro. E haapii mai òe ia ù i te haapaò maitaì i te vähi moè ra.

9 E tämä mai òe ia ù i te hïtopa e ia mä roa vau, e horoi òe ia ù, e ùoùo roa aè ra vau i to te hiona.

10 E faaìte mai òe ia ù i te òaòa e te reàreà, ia òaòa te mau ivi i ôfatihia e òe ra.

11 E huna ê atu òe i to mata i ta ù nei mau hara, e parai hua i to ù nei mau ìno.

12 E faaau na òe i te âau mä i roto ia ù nei, e ta ù Atua. E faahou na hoì òe i te âau manaò tià i roto ia ù nei.

13 Eiaha e faaârue ia ù i mua i to aro nei, eiaha hoì e rave ê atu i to Värua Maitaì ia ù nei.

14 E faahoì mai òe i te òaòa i te ora na òe ra, e ia täuturuhia mai au e te âau tiàmä ra.

15 E i reira vau e haapii ai i te feiä rave hara i ta òe parau, e e haafäriuhia mai te rave parau ìno ra ia òe.

16 Ia ora vau ia òe i te hara toto ra, e te Atua e, te Atua e ora ai au nei; e na ta ù vaha e himene pii hua i to òe ra aroha.

17 E vëvete na òe, e te Fatu, i ta ù vaha, e na ta ù vaha e ârue ia òe.

18 Eere hoì i te tütia ta òe i hinaaro, àhiri o te reira, ua horoàhia ia e au, aore hoì òe e au i te tütia-täauahi.

19 O ta te Atua tütia hinaaro ra, o te âau paruparu ra ia. O te âau paruparu ra e te òto ra, e òre roa te Atua e vahavaha i te reira.

20 Ei hämani maitaì to òe ia Tiona; e patu hoì òe i te âua i Ierutarëma nei.

21 Ei reira òe e mauruüru ai i te tütia parau tià e te tütia-täauahi täatoà mau ra; ei reira te puaatoro e hopoihia ai i nià i ta òe ra fata.

Ètoto 32.7-14.

7 Ua parau mai ra te Fatu ia Möte, nä ô mai ra, A haere, a pou òe i raro: ua ìno to mau taata ta òe i arataì mai mai Àifiti mai ra.

8 Ua faaruè vave roa iho nei rätou i te èà ta ù i faaue ia rätou e e nä reira. Ua hämani rätou i te täfa faatö na rätou e ua haamori atu i te reira; e ua hopoi rätou i te tütia, e ua parau e, Teie to òe atua, e Ìteraèra, o tei arataì mai ia òe mai te fenua mai ra mai Àifiti.

9 E ua nä ô mai ra hoì te Fatu ia Möte, ua hiò vau i taua feiä nei; e inaha, e feiä ètaèta.

10 E teie nei, eiaha òe e parau mai ia ù, ia tupu noa na ta ù riri ia rätou a haapau roa atu ai au ia rätou, e o òe ta ù e faariro ei nünaa rahi.

11 Pure iho ra Möte i to na Atua i te Fatu, nä ô atu ra, E aha i tupu ai to riri, e te Fatu, i to mau taata nei, i ta òe i arataì mai mai te fenua mai ra mai Àifiti, ma te mana rahi, e ma te rima püai.

12 O te parau hoì to Àifiti e, I arataì o ia ia rätou ia roohia e te ìno, ia täparahi o ia ia rätou i nià i te mouà, e ia mou roa rätou i te ao nei. E faaruè i taua riri rahi no òe na, ruri ê aè òe i to òe manaò i te pohe no teie nei mau taata.

13 E haamanaò i to mau tävini ra ia Âperahäma, e ia Îtaata, e ia Ìteraèra, ta òe i tapu atu i to òe iho iòa, e ua parau atu ia rätou e, E faarahi au i to òutou huaai e mai te fetià o te raì ra te rahi, e taua fenua atoà ra ta ù i parau ra, e höroà ia vau no to òutou na huaai, e na rätou e pärahi e a muri noa atu.

14 Ua ruri ê aè ra te Fatu i to na manaò i te ìno ta na i parau e e hopoi i nià iho i to na ra mau taata.

1 Timoteo 1.12-17

Te hämani maitaì o te Atua

12 E te haamaitaì nei au i to tätou nei Fatu i te Metia ra ia Ietu, i tei faaètaèta mai ia ù nei, o ia i parau ia ù i te haavare òre, e ua faatöroà òrometua mai ia ù nei;

13 i tei faaìno hoì i mütaa iho, e te hämani ìno, e te haùti: i arohahia mai rä vau, no te mea i nä reira maùa noa vau no te faaroo òre.

14 I rahi roa rä te aroha o to tätou Fatu mä te faaroo e te hinaaro i te Metia ra ia Ietu.

15 E parau mau teie, e te au hoì ia färiihia e te taata atoà, e i haere mai te Metia ra o Ietu i te ao nei e faaora i te feiä hara: e o vau hoì to rätou i hau.

16 Teie rä te mea i arohahia mai ai au, ia ìteä te faaòromaì rahi roa o Ietu Metia ia ù, i tei hau i te hara nei, ei hiò-täpaò-raa na te feiä e faaroo ia na a muri atu, e noaa atu te ora mure òre ra.

17 E teie nei, ei te Arii hau mure òre e te pohe òre, e te ìteä òre ia hiò ra, ei te Atua paari aita ä atu, ei ia na te tura, e te hanahana, e a muri noa atu. Âmene.

Ruta èv. 15.1-32.

Te parapore o te mämoe moè i ìte-faahou-hia mai

(Mät 18,12-14)

1 Ua ruru atoà mai ra te mau feiä òhi tute e te feiä rave hara e faaroo ia Ietu.

2 Ua ôhumu iho ra rä te mau Färitea e te mau päpaìparau, nä ô aè ra: Te ìte nei teie nei taata i te feiä rave hara, e te àmu atoà nei i ta rätou àmuraa.

3 Ua parau atu ra o ia ia rätou i teie nei parapore, nä ô atu ra:

Te mämoe moè.

4 O vai ia taata io òutou nei, hoê hänere a ana mämoe, ia moè rä te hoê, e òre e vaiiho i te iva àhuru e iva tiàhapa i te mëtëpara ra, a haere a ìmi ai i tei moè ra, e ia ìteä atu?

5 E ìteä atu ra ia na, amo aè ra i nià i te täpono mä te òaòa.

6 E tae mai ra o ia i te ùtuafare, ua haaputuputu mai ra i te mau tauà e te mau taata-tupu, ua nä ô atu ra ia rätou: «E òaòa atoà tätou, ua ìteä hoì ia ù ta ù mämoe i moè ra.

7 E faaìte atu hoì au ia òutou, e òaòa rahi to nià i te raì i te taata hara hoê ia tätarahapa, i te feiä parau tià e ia iva noa atu te àhururaa e iva tiàhapa të òre e au ia rätou te tätarahapa.

Te parapore o te titerama moè i ìte-faahou-hia mai

8 E o vai hoì ia vahine, hoê àhuru a ana titerama, ia moè ra te hoê, e òre e tïtià i te rämepa, a purümu ai i te fare, a mäìmi mäite ai e ia ìteä atu ia na?

9 E ìteä iho ra, ua haaputuputu mai ra i te mau tauà, e te mau taata-tupu, ua nä ô atu ra: «E òaòa atoà tätou, ua ìteä hoì ia ù te titerama i moè ia ù ra.

10 E faaìte atu vau ia òutou, o te huru ia o to te mau merahi a te Atua ra òaòa, ia tätarahapa te taata hara hoê ra.

Te parapore o te tamaiti moè i ìte-faahou-hia mai

11Ua parau atu ra hoì o ia: Toopiti a te hoê taata tamarii tamaroa.

12 Ua parau atu rä tei muri aè i te metua täne: «E ta ù metua, hö mai na i ta ù ra tufaa i te taoà nei. «Ua tufa iho ra o ia i te taoà na räua.

13 E muri iti iho ra, ua haaputu iho ra te tamaiti hopeà i ta na, haere atu ra i te fenua roa, pühura atu ra i ta na taoà i te haapaò òre.

14 E pau roa aè ra, roohia iho ra taua fenua ra i te oè rahi, e àti iho ra o ia i te poìa.

15 Ua täàti atu ra o ia i te hoê taata-tupu no taua fenua ra, o tei tono ia ia na i roto i te âua e faaàmu i te puaa. 16 E ua hiaai atu ra o ia i te pipi i àmuhia e te puaa ra ia paìa o ia; aore hoì e taata i hopoi mai i te mäa na na. 17 E iho faahou mai ra to na iho huru mau, ua nä ô aè ra: «E rave rahi to ta ù metua tävini tärahuhia e mäa rahi ta rätou e e toe te tahi pae, e te pohe nei au i te poìa.

18 E tià vau e haere i ta ù metua ra, a parau atu ai ia na:»E ta ù metua, ua hara vau i te Atua o te raì e ia òe atoà hoì,

19 e eita atu ra e au ia ù ia parauhia e, e tamaiti na òe, e faariro òe ia ù mai te hoê i te mau tävini tärahu no òe nei.

20 Ua tià aè ra o ia, haere atu ra i ta na metua ra. E tei te ätea ê ä o ia, ìte mai ra ta na metua ia na, aroha mai ra, horo mai ra, täuvahi mai ra i nià i ta na àî, hoìhoì mai ra ia na.

21 Ua parau atu ra taua tamaiti ra ia na: «E ta ù metua, ua hara vau i te Atua o te raì, e ia òe atoà hoì, eita atu ra vau e au ia parauhia e, e tamaiti na òe.»

22 Ua parau atu ra rä te metua i te mau tävini: «A hopoi mai na i te àhu pü maitaì ra, e faaàhu mai ia na nei, e ôomo hoì i te täpeà i ta na rima, e te tämaa i ta na âvae:

23 e tii hoì i te täfa faaàmu ra e pätia, e àmu hoì tätou i te mäa, e òaòa hoì tätou;

24 o ta ù tamaiti nei hoì, i pohe na, e ua ora mai nei; i moè na, e ua ìteä mai nei. «Òaòa atu ra rätou.

25 Tei roto i te âua te tamaiti mätahiapo ra, te haere mai ra i te ùtuafare. E fätata mai ra te fare ia na faaroo mai ra i te òto vivo e te òri.

26 Ua tiàoro mai ra o ia i te hoê tävini, ua ui mai ra i taua mau mea ra.

27 Ua parau atu ra o ia ia na: «Teie mai nei to teina, e ua pätia iho nei to metua i te täfa faaàmu nei, no te mea i haere ora mai nei o ia aore e maì.»

28 Riri aè ra o ia aore aè ra i tae i roto i te fare: «haere atu ra te metua täne i räpae, täparu atu ra ia na.

29 Ua nä ô mai ra o ia i te parauraa mai i ta na metua täne: «Inaha, e rave rahi aè nei o ù mätahiti i te täviniraa ia òe nei, e aita roa aè nei au i faaroo taìàtä i ta òe parau. E aita ä òe i horoà noa mai i te hoê pinia puaaniho na ù, ia faaàmu atu vau i to ù ra tauà:

30 te hoìraa mai rä o to tamaiti na, o tei pühura i ta òe taoà na te mau vahine faaturi ra, pätia iho nei òe i te täfa faaàmu nei na na.»

31 Ua nä ô atu ra te metua ia na: «E ta ù tamaiti, e tià òe i ô nei ia ù nei, e te mau taoà atoà na ù nei, na òe ia. 32 E mea tià hoì ia tätou ia faaàmuraa mäa e ia òaòa; o to taeaè nei hoì, i pohe na, e ua ora mai nei; i moè na, e ua ìteä mai nei.

Manaò.

Te ìriti nei tätou i te mau täpura òhipa tumu a te Ètärëtia Porotetani Mäòhi i roto i te mätahiti hoê, o tätou i pure i na mahana e vaù. Teie taua mau täpura òhipa ra, i te poroì i te âpooraa rahi âmui, e te poroì i te nünaa Mäòhi.

E to te Âpooraa Rahi Âmui e, e tiàturi rahi to te Atua ia òe, i horoà ai o Ia ia òe i te tiàraa faaora i to teie nünaa Mäòhi. Ua tae i te tau, teie to òe nünaa e färiu mai ra i nià ia òe. Faahoì i te huià (tamarii o te fenua) na nià i te èà o te parau tià e tae ai o ia i te fare metua. E èà atoà teie e tupu ai terä maa parau iti ta Ietu, ta tätou i fäì ia na ei fatu no tätou, te nä ô ra o ia e, O vau te èà e te parau mau e te ora, aore roa e taata e tae i te Metua ra, maori rä ei ia ù.

Teie te reo o te Atua ia òe e te Âpooraa Rahi Âmui i teie mahana : Te tono nei au ia òe i roto i te nünaa Mäòhi. E haere òe e pätötö faahou i te àau o ta ù nünaa iti, ia tupu faahou te maa parau ra e : Te aroha e te parau mau, ua färerei räua ; te hau e te parau tià, ua hohoì räua. Aita atu ia e pähonoraa maitaì roa aè ta te Atua Nui Tumu Tahi e tiaì ra i to òe àau ia fäì, maori rä : Teie au, o vau ta òe e tono…

E te Nünaa Mäòhi e, no te rahi o te aroha e te here o to tätou Atua ia tätou, i tae roa ai o Ia i te horoà i to na täatoàraa ei vauvau terevete, e ei feafearaa na tätou ia Na i te pö e i te ao. Tämaruhia to tätou oraraa e te heeuri raurau o te maire òromaa, to Na ia here Metua, tei riro ei tähei ùnaùna e te àara hoì no tätou. To Na hoì Mehoi, ta Na ia i tuu i roto i to tätou metua vahine faatupu ora, te mea ia i tupu heeuri ai tätou i roto i to tätou oraraa. Ua î to räua àpu rima i te vaianu faaora i to tätou mau pëpë, ei faanä e ei tämarü i to tätou mau mauiui. Ta te here faatupu ora ia, tä to tätou nau Metua i horoà ei faufaa mure òre nä tätou.

E aha iho ra rä hoì tätou i riro ai ei ôvere io tätou iho. E aha iho ra rä hoì tätou i tahitahi ai i to Räua rima aupurupuru ia tätou. E aha iho ra rä hoì tätou i autä ai i te teimaha o te oraraa i teie mahana.

E parau mau e e parau tià, eere roa atu tätou i te pütii, (tamarii ôvere) e te àihamu, e tamarii poiherehia rä tätou e to tätou nau Metua. Haere mai, mai hoì anaè e àhu faahou i te hana Metua, te tiäì noa mai ra räua ia tätou. Te nä ô ra te pure a te tupuna : « Ia Atua te Atua, ia fenua te fenua, ia taata te taata, ua maitaì roa. » Te mau taiòraa no teie mahana te papa ra ia i teie mau tiàororaa, tei haapotohia i roto i na ìrava e maha nei :

-Taramo 51, 5 Te fäì nei hoì au i ta ù nei hara, e te vai noa nei ä to ù ìno i pïhaì iho ia ù.

-Etoto 32, 14 Ua ruri ê aè ra te Fatu i to na manaò i te ìno ta na i parau e e hopoi i nià iho i to na ra mau taata.

-1Timotheo 1, 16 Teie rä te mea i arohahia mai ai au, ia ìteä te faaòromaì rahi roa o Ietu Metia ia ù, i tei hau i te hara nei, ei hiò-täpaò-raa na te feiä e faaroo ia na a muri atu, e noaa atu te ora mure òre ra.

-Ruta èv. 15, 2 Ua ôhumu iho ra rä te mau Färitea e te mau päpaìparau, nä ô aè ra: Te ìte nei teie nei taata i te feiä rave hara, e te àmu atoà nei i ta rätou àmuraa.

O te huru mau teie no to tätou oraraa i teie mahana, e mai te tau a uìuì mai ä, te ôhumu ra, te mutamuta ra, na roto i te mata haava, ia tià i te haapupuraa i te taata ia au i to rätou huru oraraa vaamataèinaa, e te parauraa e ua ateä teie mau taata i te ôpuaraa faaora a te Atua Nui Tumu Tahi. I faatià ai o Ietu ia tätou i teie mahana i teie e toru parapore, ta Na e faaäu nei ;

1- Te mämoe moè.

2-Te parapore o te titerama moè i ìte-faahou-hia mai.

3- Te parapore o te tamaiti moè i ìte-faahou-hia mai.

Te papa nei o Ietu i ta Na faatiàraa i nià i te parau no te moè, e òhipa teie na te ôriò mata i te türamaraa i roto i te ìmi i ä ìteähia taua faufaa ra i herehia. Te moè, e parau atoà teie no te fëruriraa ta te Mehoi e tuu nei i roto i te faaòromaìraa no te âau, no te paèpaè te hau i roto i te paari.

Mai te mea atu ra ua haamauhia te ôtià o te tupuraa o teie nei ao i nià i to tätou tarià e to tätou mata. Eiaha rä e manaò e, te faahiti nei tätou i teie mau parau ei faateiaha-faahou-raa atu i te faahaparaa i mätauhia i te huri i nià i te taata, ei haamanaòraa noa rä e, o tätou atoà iho teie e panipani nei ia tätou i roto i te ôtià i haamauhia e to tätou mata, aore ra o tätou teie e fifi nei i te färiiraa e, aita to tätou parau i täôtiàhia e te mea i hiòhia e to tätou mata, aore ra te mea i faaroohia e to tätou tarià. Te auraa, eere no te mea aita vau i ìte i te tahi mea, e tano ai au e parau e, aita taua mea ra. Te faahaparaa ta tätou i mätau noa, ta tätou atoà i òhie noa i te huri i nià i te taata, mai teie ta te mau Faritea e huri nei te mau faahaparaa i nià ia Ietu i to Na âmuiraa i te mau taata rave hara, i ta rätou parauraa no te Ietu e mau taata teie no roto i te ôpuaraa faaora a te Atua Nui Tumu Tahi te türamaraa ia e vai nei i roto i na faatiàraa e toru i teie faaäuraa, no te tiaì mämoe tei here e ìmi tera hoê i moè, te vahine ìvi te tütuì i te rämepa no te ìmi i ta na titerama i moè, te metua tane tei tiaì i te hoìraa mai ta na tama, i moè na ua ìteä faahou mau mai, i pohe na ua ora faahou mai.

Ore noa atu ai e taò i faaroohia i te purororaa mai nä roto i to rätou vaha, ua ìte o Ietu i te manaò ta teie mau taata e hämani ra i roto i to rätou âau. Te ìte atoà nei tätou i te tupuraa o te òhipa mai teie te huru i roto ia tätou. Aita änei tätou i maere i te tahi mahana i te haereraa e färerei i te tahi taata, i te parauraa mai teie taata e : Te tiaì noa atu ra ihoä vau ia òe. Eiaha tätou e parau e, e mana hiòhiò tei horoàhia i te tahi, e tei òre i horoàhia i te tahi, no te mea e faufaa te reira ta te Atua i horoà i te taata atoà. Hiò na tätou i te feiä täià, aore ra te feiä e ora pinepine nei i roto i te miti : ia au i te huru haùtiraa te miti, noa atu e, tei te ätea, e ìte roa te tahi e, te vai ra te ià, e tano hoì te tahi e parau mai e, terä te ià ta na e ìte ra. Ia haere hoì nä roto i te miti, e òiòi roa te mata o te tahi i te ìte i te fee, aore ra te nohu, âreà te tahi, hänere noa atu ä te haereraa nä reira, aita ihoä e òhipa ta na e ìte. E aha te mea e tano ia parauhia. E mata maitaì aè änei to te tahi i to te tahi. Aita. Te taata rä tei faaea fätata e tei ora tämau i roto i te miti, ua horoà te miti ia na i te haapiiraa e tano atoà ai o ia e taiò i te mau mea të òre te mata o te tahi atu e ìte. Mai te reira atoà te tarià. Ia taì te manu i te pö, ua ìte roa te tahi e, e taata të haere atu ia na ra ia poìpoì aè ; âreà te tahi ra, e âhoahoa roa ia to na tarià i te reira maniania, aita rä o ia e hiroà ra e, te vai ra te tahi faaäraraa i roto i te mea i faaroohia. E tano ia parauhia e, nä roto i te fenua, te haapii noa nei te Atua i te taata i te ora. Te vähi ta te taata i hiroà, te haapiiraa ia e te ìte e noaa mai ra ia na no roto i te fenua. Te toe ra rä i te taata te haapäpüraa i te tüàtiraa e vai ra i roto i te fenua e te Atua. Tei haapaò i te haapiiraa e horoàhia ra e te fenua, e rahi te ìte e te paari e noaa ia na ; tei òre rä i haapaò, te taata vaha maniania roa aè ia e te faahapahapa, fätata e, i te vähi aita e parau, e parau noa ta na. Te tanoraa mau, aita e ôtià to te ìte, aore ra aita tätou i ìte i to na ôtià. Teie ia òhipa e tupu nei i roto i te tätou parau maitaì no teie mahana, i teie päpaìraa na Ruta èvaneria, 2 Ua ôhumu iho ra rä te mau Färitea e te mau päpaìparau, nä ô aè ra: Te ìte nei teie nei taata i te feiä rave hara, e te àmu atoà nei i ta rätou àmuraa. O teie atoà to tätou huru e te Mäòhi, eiaha ra to tätou mau manaò, e to tätou mehoi e tapitapi, e mäoa noa te ùru, e para noa te meià, e ùaa noa te tiare Maurua, ôhumu noa ai tätou. Te taata haapaò, e taata ia tei ìmi tämau i te räveà ia riro te mea i parauhia ei òhipa ; âreà te taata haapaò òre, no te mea aita i mau mai ia na te mea i parauhia, e aha o ia e manaò ai i te òhipa e rave, ta na noa i ìte, te òhipa ia e mauruüru ai o ia. Te vai nei ä te tahi auraa no te taò faaroo, taa ê rii atu i nä auraa mätamua, inaha aita te manaò i nià i te parau i tae mai i roto i te tarià ; aita atoà rä i nià i ta te taata faariroraa mai i te reira parau ei òhipa, inaha aita e òhipa ta te taata e rave, eere hoì na na e faariro mai i te reira parau ei òhipa, e tuhaa rahi rä ta na i roto i te riroraa mai, aore ra te òreraa te tahi parau e riro mai ei òhipa. Te manaò i ô nei, tei nià ia i ta te taata pähonoraa i te parau i tae ia na ra, e parau no te tiàturiraa, tei parau atoà tätou, e faaroo.

 

Maitaì tätou i teie mätahiti âpï Mäòhi.

 

Teraì òr. Faatura.

Ruta èv. 14.25-33 Iho

 

Tāpati 4 no Tetepa 2022.

ÔROÀ

Iho

Taramo 90

1 Te pure a te taata o te Atua ra, a Möte. E te Fatu, o òe to mätou haapüraa, i tërä uì, i tërä uì.

2 Aore te mau mouà nei i fänau, e aore hoì te fenua e te ao atoà nei i hämanihia e òe ra, te vai ra òe, e te Atua, mai mua mai ä e a muri noa atu.

3 O te taata nei rä, te faariro faahou nei òe ei repo, te parau ra hoì òe: «A hoì, e te tamarii a te taata na.»

4 Ia òe rä hoì, hoê tautani noa atu i te mätahiti e au i te mahana hoê i mahemo ra, e mai te äraraa hoê i te ruì ra.

5 Te riro nei rätou ia òe mai te riro pape puè ra, e mai te vareà taòto ra rätou. I te poìpoì ra, mai te àihere e tupu ra rätou,

6 o tei ôteu e tei tupu i te poìpoì ra, e ua ahiahi anaè ra, ua täpühia e ua ôriorio atu ra.

7 Oia teie, ua pau mätou i to òe ra riri, e ua riàrià mätou i ta òe ra mäinaina.

8 Ua tuu òe i ta mätou hara i mua ia òe, e ta mätou hapa moè i roto i te märamarama o to mata ra.

9 Ua mou aè nei to mätou mau mahana i to òe ra riri, ua pau to mätou mau mätahiti mai te manaò âau e pee ra.

10 To mätou puè mahana i te oraraa nei, e hitu ia àhuru i te mätahiti, e ia tae i te vaù i te àhuru i te mätahiti i te ètaèta, e riro rä taua ètaèta ra ei rohirohi e ei taiäraa. E òre hoì e mähia motu ê atu ra, maùe atu ra mätou.

11 O vai rä tei haapaò i te püai o to òe ra riri? E ta òe ra täiroiro, mai te mataù e au ia òe ra?

12 E haapii mai ia mätou i te taiò i to mätou puè mahana, ia riro to mätou âau i te haapaò maitaì.

13 E färiu mai ia mätou e te Fatu: a hea ra ia? A faite mai òe i to mau tävini nei.

14 A haamauruüru vave mai òe ia mätou i to òe ra aroha, ia reàreà mätou e ia òaòa i to mätou nei puè mahana toe.

15 A faaòaòa mai ia mätou e ia fäito i te mau mahana i àti ai mätou ra, e te mau mätahiti i faaòromaì ai mätou i te ìno ra.

16 A faaìte mai i ta òe ra òhipa i to mau tävini nei, e to òe ra hanahana i ta rätou ra tamarii.

17 Ia vai mai ä te here o to mätou nei Atua, o te Fatu, i nià ia mätou nei, e te òhipa a to mätou nei rima, e haamau òe, oia ia, o te òhipa a to mätou rima i rave ta òe e haapäpü.  

Māteri 8.32-36

E ao to tei faaroo i te Paari

32 E tënä na, e faaroo mai ia ù, e te mau tamarii e, e ao hoì to te feiä e haapaò mai i ta ù nei parau.

33 E faaroo mai i te aò ia paari, eiaha roa e òhipa ê i te reira.

34 E ao to te taata e faaroo mai ia ù ra, o tei ara mäite i te mau mahana atoà i te mau ùputa nö ù ra, o tei tiaì mäite i nä ùputa nö ù ra.

35 Ua ìteä hoì au ia na ra, ua ìte ia te èà i te ora, e herehia mai hoì o ia e te Fatu.

36 O tei hara ê rä ia ù nei, ua hämani ìno ia i to na iho värua; e tei ôre atoà i hinaaro mai ia ù nei, ua hinaaro ia i te pohe.

Firemona 1,9-17

9 no te aroha rä to ù e parau mäite noa atu ai au ia òe, o Pauro taata paari hoì au, e taata no Ietu Metia i täpeàhia i te âuri fifi i teie nei.

10 Te parau mäite noa atu nei au ia òe, i ta ù tamaiti, i ta ù i fänau i ta ù täpeàraa nei, ia Ònetimo ra:

11 i te tävini faufaa òre no òe i mütaa iho ra, i teie nei rä e faufaa ia ta òe ia na, e ta ù atoà hoì;

12 o ta ù ia e faahoì atu ia òe na. E tënä na, e färii mai òe ia na o to ù ia âau mau:

13 i hinaaro hoì au i te täpeà ia na i ô nei ia ù nei, ia onohia òe ia na i te poihereraa mai ia ù, i to ù nei täpeà-raa-hia i te Èvaneria nei.

14 Aita rä vau e rave noa i tei òre i tià ia òe ra; ia riro to òe hämani maitaì no te hinaaro mau, eiaha no te tahi mea ê.

15 Peneiaè hoì i taa ê iti poto noa mai ai o ia, ia färii mai òe ia na ia pärahi mau atu.

16 Eiaha rä ei tävini, ia hau atu rä o ia i te tävini, ei taeaè here ra, ia ù nei ia, a tae atu ai hoì ia òe ra, i te Fatu nei, e te tino atoà nei hoì.

17 E tënä na, te parau na òe ia ù e e hoa, e färii mai òe ia na mai te mea e o vau iho.

Ruta èv. 14.25-33

Te peeraa ia Ietu

(Mät 10,37-38)

25 E tïàa rahi tei pee haere mai ia na, e ua färiu mai ra o ia, ua parau mai ra ia rätou:

26 O te taata e haere mai ia ù nei, e aore i haapae i ta na metua täne e te metua vahine e te vahine iho, e te tamarii, e te mau taeaè, e te mau tuahine, e ia na atoà iho, e òre roa o ia e tià i te pipi na ù.

27 E o të òre e hopoi i to na iho tätauro a pee mai ai ia ù, e òre ia e tià i te pipi na ù.

28 O vai ia taata io òutou nei ia ôpua i te fare e faatià, e òre e mata na i te pärahi i raro, a taiò ai i te taoà e oti ai, i te navaìraa ta na taoà?

29 O të haamau hoì o ia i te niu, e aore aè ra i oti ia na, o te nä ô hoì te feiä atoà i hiò ra i te tähitohitoraa ia na:

30 I tämata iho nei teie nei taata i te faatià i te fare, e aore aè nei i oti ia na.

 31 E o vai hoì ia arii ia haere e àro atu i te tahi arii, e òre e mata na i te pärahi i raro, a feruri mäite ai i te tiàraa ia na e o na tau taata hoê àhuru i te tautani, ia haafärerei atu i te tahi e haere mai e àro ia na ra, mä to na atoà ra taata e piti àhuru i te tautani?

 32 E e òre e tià ra, e vaiiho ätea i te tahi a tono atu ai o ia i te veà e ani i te hau.

33 Oia atoà hoì òutou, o tei òre i faaruè i te mau mea atoà na na ra, e òre atoà o ia e riro ei pipi na ù.

Manaò.

Te iho, te peeraa te taata i te mea ta na i faaoti, no te mea e parau teie no te tiàmaraa ia rave i te faaotiraa i mua i te tïtauraa i te hopoi, ia amo i te tätauro no te rahi ia o te òaòa, no te tahi òhipa maitaì i tupu mai i roto i to na oraraa, aore ra no te peàpeà, no te tahi fifi i tupu mai i roto i to na oraraa, no ta na räveà òre i te tatara ia na i räpae i to na mau fifi, aore ra no to na faufaa òre e te mohimohi rahi o to na oraraa i ta na hiòraa, e te täuà òre mai te taata ia na. Te hororaa rahi teie a te taata i roto i te oraraa, e ta na räveà no te faaìte e, te vai ra o ia, aore ra no te haamoè ia na. Eita te taata e hinaaro ia riro o ia mai te tumu haari i moè i roto i te uru haari, hinaaro rä o ia ia riro e, o ia te tumu ta te taata e ûmere ra no te nehenehe o to na tupu, no to na hotu, te rarahi te mäa, e te monamona te vai. Aita teie maì i faaea noa i te haari paari tei horoà i te mäa, te uto atoà teie e hinaaro nei ia faaea o ia i te hiòhia ei uto, ia ìtehia mai rä o ia no na iho, no to na nehenehe, to na ièiè, e to na püai. Ia haapotohia, eita atoà te uto e hinaaro ia moè o ia i roto i te uru uto. E feruriraa maere roa teie e te parare rahi i roto i te taata i te manaòraa e, te räveà e òre ai o ia e topa i roto i te moè, e ìtehia mai ai o ia ei taata faahiahia, te haamoèraa ia ia na i roto i te iho, aore ra te raveraa i te ìno, mai te mea ra na te ìno e amo ia na i nià, ia parau o Ietu i te hohoà o te tätauro, no te faaiho i te taata i roto i te ora. Haamanaò tätou ia Päpera e te òhipa ta te taata i rave ia òre to na iòa ia moè. E au ra ia hiòhia e, e uru päpera teie e faaî nei i to tätou fenua, te vai ra ihoä te mea rii naìnaì e àere mai ra, te vai atoà ra te mea paari e uru pü atu ra. Ia riro te iho e te peeraa mai te tahi täpaò taa ê ta te taata i rave no te faaìte e, e òhipa taa ê e te faufaa rahi tei tupu i roto i to na oraraa, aita o reira e fifi ; ia riro rä te reira ei peu tumu na te taata, oia hoì ei peu tei riro ei tumu e ei faahopeàraa no to na oraraa, e au ia taata i te raì tei täruìhia te mahana, aore ra ei räveà maitaì aè ta te taata i manaò ei faaìteraa e, te vai ra o ia, a tae hoì e. Mai te peu rä te vai nei te taata e ìmi nei i te räveà ia moè to na hiroà i roto i te peu tei faatea ia na i te ora, te vai atoà ra tei òre i manaò mai te reira, tei hinaaro rä ia äteatea noa e ia mä noa to na feruriraa, mai teie e faaìtehia nei ia au i na ìrava e maha, tei haapoto i te mau taiòraa no teie mahana:

-Taramo 90, 3 O te taata nei rä, te faariro faahou nei òe ei repo, te parau ra hoì òe: «A hoì, e te tamarii a te taata na.»

-Materi 8, 34 E ao to te taata e faaroo mai ia ù ra, o tei ara mäite i te mau mahana atoà i te mau ùputa nö ù ra, o tei tiaì mäite i nä ùputa nö ù ra.

-Firemona 1, 16 Eiaha rä ei tävini, ia hau atu rä o ia i te tävini, ei taeaè here ra, ia ù nei ia, a tae atu ai hoì ia òe ra, i te Fatu nei, e te tino atoà nei hoì.

-Ruta èv. 14, 27 E o të òre e hopoi i to na iho tätauro a pee mai ai ia ù, e òre ia e tià i te pipi na ù.

I mua i teie mau ìrava, te tuuhia nei te taata ia ìte i te fautua i ta na mau hopoià, i te tïtauraa a te Atua Nui Tumu Tahi. Ia tütonu noa tätou i nià i te ìno o te taata, eita änei tätou e riro mai te taata e tià ra i mua i te tumu räau e tei moè ia na te uru räau. Peneiaè ia faaätea rii mai tätou, aore ra ia nä nià rii tätou i te hiò i te tupuraa o te òhipa, e taa ê rii te mea e horoàhia ia tätou te ìte.

Ia faaroo tätou i te mau reo o Ietu i roto i te taiòraa Parau Maitaì e mau haapäpüraa no te here e täamu ra ia na i te mau pipi, e i te mau taata e hopoi i to na iho tätauro. Te täatoàraa o te manaò o te tahi, to na âau, to na püai, to na värua, ua riro ei räveà e vai àma noa ai to te tahi parau i roto i te âau o te tahi. Aita atu e mea mauruüru-roa-hia aè e te tahi maoti rä, ia mauruüru e ia òaòa te tahi. Aita ä te tahi i parau, ua pähonohia to na hinaaro ; aita ä i ani, ua roaa mai te mea herehia e te tahi ; aita atu ta te tahi manaònaòraa maoti rä, te mau parau e mauruüruhia mai e te tahi : te faturaa i te pehe, te himene-noa-raa mai te mea ra te püai o to na here terä e nä roto atu ra i to na reo i te maùe no te haere e faateniteni i tei herehia e ana, e au ra e, ua î e ua manii noa to na âau i te hinaaro horoà i te taoà ei täpaò no to na here : e püpä tiare änei, e poe änei, e pirü, e te mau taoà rii nehenehe atoà e òaòa noa ai te tahi. Eere ihoä paha teie te here ta te Atua e hinaaro nei ia here tätou ia na, àhiri rä teie e maraa, âuë te Atua i te mauruüru ia tätou e. To tätou mau Tupuna, ua parau rätou i te Atua e, ta rätou ia pirü, oia te taoà-here-roa-hia aè e rätou. Mai ta tätou e here nei i te vahine, e hinaaro atoà te Atua ia riro ta tätou mau haamoriraa ei taime e maere òaòa noa ai te Atua ia tätou, no te mau reo himene âpï e te navenave, te mau reo faateniteni i to na aroha mutu òre e te hope òre ta te fenua e faaìte noa ra, ia faaâpï noa atoà tätou i te parauraa ia na i to tätou here, i te haapäpüraa ia na e, ua ineine tätou i te horoà i to tätou oraraa täatoàraa, to tätou püai, to tätou manaò, to tätou värua no na, e aita atu ta tätou e feafearaa i te pö e te ao maoti rä, te tupuraa o to na hinaaro. Ia ìte tätou i te here i te vahine, ua ìte atoà tätou i te here ta te Atua e tiaì ra ia faaìte tätou ia na, eiaha te here e ìmi noa ai tätou i te räveà ia tupu to tätou manaò, ia mäha to tätou hinaaro, te here rä e api roa ai, e puru roa ai to tätou manaò, to tätou âau, to tätou värua, i te hinaaroraa ia hanahana noa to na iòa. Ia haamanaò tämau noa atoà rä tätou e, aita atu mea here-roa-hia aè e te Atua maoti rä, te parau tià e te parau mau. No reira, ua here tätou i te Atua ra, ua tauperetau noa ia te parau tià e te parau mau i nià i te fenua, i roto i te mau òhipa atoà ta tätou e rave atu.

I teie parauraa na Ietu e hopoi iho i to na tätauro, e haapäpüraa teie i te tautururaa a te Atua Nui Tumu Tahi, tei roto i te tai, te aru, e te reva tei taa ê te tahi i te tahi, tei hoê rä i roto i te tautururaa e te arataìraa i te taata i roto i te ora, ua riro atoà te hereraa i te Atua e te fenua, ei tautururaa i te taata i te hereraa ia na iho, e te hereraa i te täuaro. Te hereraa i te Atua, te fenua, e te täuaro, te mea ia e haapäpü i te taata i roto i to na hereraa ia na iho, a riro atu ai o ia, eiaha ei vähi e hope ai te here, mai te tahi rä püahiohio, ia püai to na òhu i nià ia na iho, te mea atoà ia e püai ai to na here i te haere i te âanoraa i nià i te Atua e i nià i te täuaro. Te here, te tahi terä püai taa ê tei anihia te taata e faatupu e e faaòhipa ei räveà e tae ai o ia i te Atua ra, inaha e here te Atua, te räveà hoì e ìte atoà ai te täuaro i te huru mau o te Atua.Te fifi o te Mäòhi i teie mahana, te mea ia o ia i faatumu roa i roto i te tahi mau manaò oti noa e haaparare-noa-hia nei i te mau taime atoà, e i te mau vähi atoà e taahihia e to na âvae. Teie te tahi : ia òre te rätere ia haere mai i te fenua nei, e pohe te fenua, e topa ta na ìmiraa, e fifi roa te oraraa o te taata. Teie atoà te tahi : ia faaruèhia mai e Färani, e pohe tätou … I roto i te mau parau atoà e faahitihia nei, aita hoê aè taime i faaroohia ai te parau o te Atua. Ua tano ihoä paha teie feiä i te haaparareraa i te mea ta rätou i tiàturi, no rätou noa rä te reira tiàturiraa pohe. Mai te peu rä e hoì mai tätou i nià i ta te Atua, no te mea e püai te here, ia òre te taata ia faaòhipa i teie püai i nià i te Atua, i nià i te fenua, i nià hoì ia na iho, aita hoê mea e haùtiùti, aita hoê òhipa e nuu, eita e ìtehia te hohoà o te òaòa, te maitaì, e te hau i nià i te mata o te taata. I roto i ta te taata faanahoraa, na te moni e faahaùtiùti i te mau mea atoà ; i roto i ta te Atua, na te moni e faaìno, e e haapohe roa atu i te mau mea atoà. No reira, ia hinaaro tätou i te ora, e vai iho i te here ia haamata na i te òhipa i roto ia tätou. Aita tätou e anihia nei e faanuu i te tiàraa o te mouà ei òroi i te ava, Mai te peu te here e, o te Atua iho ia, i te mau taime atoà tätou e faatupu ai i te reira parau, te haamanaò ra tätou i te auraa o te ôpuaraa a te Atua tei riro tätou ei tupuraa: e ia here tätou i te Faufaa ora a te Atua, to na iòa moà ta tätou e faateniteni ra. No reira, ia parau tätou e : te taata, e tamarii na te fenua, te haamanaò ra tätou ia na i te mea ta te Atua e tiaì ra ia rave o ia. Mai te pape e faahoì i te ànaana o te mahana i nià i te raì i te vähi no reira mai taua märamarama ra, mai te àara hoì o te tiare e pee ra i nià i te raì ei haamaitaìraa i te Atua, te tumu o te noànoà ta na e mau ra, ia here tätou ia tätou iho i roto i to tätou mäòhiraa, te Atua, te tumu o taua mäòhiraa ra, ta tätou e faaìte ra. Te tiaì noa mai nei rä te Atua ia faaìte tätou i to tätou here i ta na mau horoà ia tätou : te fenua, te reo, te hiroà, te iho, te mäa, te räau faaora maì, e tae noa atu i te faufaa ta te Atua i horoà na òe e te Mäòhi, oia te aroha e te here. Teie te hohonuraa mau o teie parau e : e tamarii te Mäòhi na te fenua. No te mea rä, ua faaruè tätou i te horoà a te Atua, ua täiva i te täpaò o to na aroha e to na here, te mea ia tätou i fifi noa ai i teie mahana, e i haere noa ai to tätou oraraa i te ìno-roa-raa. No te mea ua märamarama rätou i te auraa o te parau e, tamarii na te fenua, na te aroha e te here i arataì e i türama i te täatoàraa o to rätou oraraa. Te hopoiraa i to na iho tätauro te färiiraa ia i te täpura òhipa a te Atua Nui Tumu Tahi. Te taata i färii hope roa i to na parau ei tamarii na te fenua, e òhie atoà ia taata i te märamarama i to na parau ei tamarii na te Atua, oia hoì ei tamarii tei färii i te rave i ta na tuhaa i te Atua ra, i nià i te fenua no reira o ia i te püraa mai i te ao nei, e tei färii hoì i te faahanahana i te Atua no ta na horoà ora, oia te fenua, te reo, te hiroà, te mäa, e te räau ei räpaau i to na mau maì, nä reira hoì te horoà a te Atua i teie nünaa, oia te aroha e te here.

 

Ia ora na i te mätahiti âpï a te Ètärëtia.

 

Teraì òr. Faatura.