Ruta èv 6, 39-45 Feàfeà

Tāpati 3  no  Mati  2019.

ÔROÀ

Taramo 92

1 Taramo, himene, no te mahana täpati. 2 E mea tià te haamaitaì i te Fatu, e te himene ei haamaitaì i to iòa, e Tei Teitei e 3 I te faaìte i to hämani maitaì i te poìpoì, e te parau  mau na òe i te mau ahiahi atoà ra, 4 mä te mea aho hoê àhuru ra e te näpara, e mä te tïnura òto maitaì ra 5 Te faareàreà mai ra òe ia ù, e te Fatu,  i ta òe e rave ra, e òaòa vau i te òhipa a to rima. 6 Aore ä te rahi o ta òe ra òhipa, e te Fatu, e te hohonu rahi hoì o to òe ra mau manaò 7 E òre rä te taata manaò òre ra e haapaò, e te taata maamaa ra, e òre o ia e ìte i teie 8 E ia ôteo te paieti-òre mai te räau rii ra, e ia ruperupe atoà te feiä rave parau ìno ra, i ruperupe ia täpü-faaruè-roa hia ra 9 E o òe, e te Fatu, ua faateitei-roa-hia òe 10 Inaha hoì to mau ènemi, e te Fatu,  inaha to mau ènemi, e mou ia, e te feiä atoà i rave i te parau ìno ra, e haapurarahia ia. 11 O to ù nei rä tara e faateiteihia ia e òe mai te tara o te reema ra, e faatähinuhia vau i te monoì âpï. 12 E ìte ta ù mata i ta ù mau ènemi i te hiàraa e faaroo ta ù tarià i te pau o te paieti-òre i tià mai e märô mai ia ù ra. 13 E ruperupe te taata parau-tià mai te tämara ra,

e tupu ia mai te âreti i Repanona ra. 14 O tei tänuhia i roto i te fare o te Fatu ra, e ruperupe ia i roto i te mau hëtere o to tätou Atua 15 E hotu ä ia e tae noa atu i te paariraa ra, e î i te täpau, e te vai ota noa ra 16 ei faaìteraa atu e parau-tià ta te Fatu,  o ia ta ù haapüraa, e aore roa e parau-tià òre o roto ia na.

 Mäteri 10.8-14 ; 19-21

8 Tei paari te âau ra e färii mai ia te parau; âreà te maamaa paraparau noa ra, e hià noa ia. 9 Tei tià to na haereà, te haere ra ia mä te ora; o tei haapiò rä i to na haereà, e faaìtehia ia. 10  O tei àmoàmo i to na mata, ua faatupu ia i te ìno; e te maamaa paraparau noa ra, e hià ia. 11 Te vaha o te feiä parau-tià ra, e tumu ia no te ora; te täpoìhia ra rä te vaha o te paieti-òre ra e te ìno. 12 Na te riri e faatupu i te märô; âreà te aroha ra, e faaòre ia i te mau hara atoà ra. 13 Teie te vaha o te taata haapaò te ìteäraa i te parau paari; e te vai ra te papaì no te tua o te maamaa ra. 14 Te haaputu ra te feiä paari i te ìte; âreà te vaha o te maamaa ra o te pohe tä na i hopoi mai.

19-21

19 Te rahi ra te parau ra, eita e òre te hara; i parauhia ai e paari tö na to tei täpeà i to na vaha. 20 Te arero o te feiä parau-tià ra, mai te ârio tämähia ra ia; âreà te âau o te paieti-òre ra, mai te ota mau nei ia. 21 E rave rahi tei faaamuhia e te vaha o te feiä parau-tià ra; te pohe noa nei rä te maamaa i te ìte òre.

1 Torinetia 15, 54-58

54 E ua riro anaè teie nei tino tähuti noa ei tino tähuti òre, e teie nei tino pohe noa ei tino pohe òre, ua tupu ia te parau päpaìhia ra i reira Ua horomii-roa-hia te pohe i te rë i riro ra  55 E te pohe e, tei hea to òe tara E häte e, tei hea to òe rë 56 To te pohe nei tara, o te hara ia, e to te hara nei püai, o te ture ia. 57 E teie nei, ia haamaitaìhia te Atua, o tei horoà mai i te rë no tätou, no to tätou Fatu ra no Ietu Metia  58 E teie nei, e a ù mau taeaè here e, ia itoito òutou, eiaha e âueue, ia rahi ä te rave i te òhipa a te Fatu eiaha e faaea, ua ìte hoì òutou e, eere i te mea faufaa òre te òhipa a te Fatu ta òutou e rave na.

Ruta èv 6, 39-45

39 Ua parau atu ra o ia i te parapore ia rätou E tià änei i te matapö ia arataì i te matapö? E òre änei e hià âpipiti i roto i te âpoo? 40 Aore te pipi i hau i ta na ra òrometua, o te pipi rä i haapii-hua-hia ra, e riro ia i te fäito atoà i ta na òrometua. 41 E aha hoì òe i hiò ai i te papaâ  iti i roto i te mata o to taeaè, aita hoì òe i ìte i te räau rahi i roto i to òe iho mata? 42 E  aha òe e tiäì ia parau i to taeaè  E ta ù taeaè, hö mai na ù e ìriti i te papaâ iti i roto i to mata na, aore hoì òe i ìte i te räau rahi i roto i to òe iho mata? E tërä ra haavare e, E mata na i te ìriti i te räau rahi i roto i to òe iho mata, ei reira òe e ìte maitaì ai ia ìriti i te papaâ iti i roto i te mata o to taeaè.

Te reira tumu räau i to na hotu

(Mät 7,16-20; 12,33-35)

43 Eere hoì i te räau maitaì tei hotu mai i te mäa ìno; eere hoì i te räau ìno tei hotu mai i te mäa maitaì. 44  Te ìteä nei te mau räau atoà i to na iho huero mau eere hoì i to nià i te räau taratara te tute ia noaa mai, e te vine hoì eere ia to nià i te tätarämoa. 45 E tuu mai te taata maitaì i te mea maitaì no roto i te puèraa o te maitaì  ra o to na âau; e tuu mai te taata ìno i te mea ìno no roto i te puèraa o te ìno ra o to na âau  no te î hoì o te âau i parau ai te vaha.

Manaò.

I  teie mahana haamoriraa na tätou te färerei nei tätou e maha taiòraa, e faaìte ra i te huru o te taata e to na parau to na riri e to na aroha, te aru e to na tupuraa, tei  faaäuhia i nià i te tumu räau  maitaì e te ìno. E parauhia teie huru taiòraa te ànoìraa o te parau i roto i te âau, te maitaì te ìno te parau tià, te parau mau, te aroha, te riri, te hae, te hau, te haavare, e te parau mau. Te vai nei i roto i to tätou reo Mäòhi i teie huru parauraa tei moèhia e tei òre-rao e faahiti faahouhia ra, e Feàfeà, te feàfeà to te âau ia paraparauraa i roto i te ôpü ia tupu maitaì te tino ta te Atua Nui Tumu Tahi i ìpopo i to na rima faaora. I reira e tià ai i te haamaitaì i te Fatu, e te himene ei haamaitaì i to na iòa, èi faaìteraa na tätou i to na hämani maitaì i te poìpoì,  te parau  mau i te mau ahiahi atoà.  Mä te mau mauhaa ùpaùpa tei faareàreà ia tätou, e òaòa ai tätou i te òhipa a te rima a to tätou Fatu. Te rahi o te òhipa, a te Fatu, te hohonu  o to na ra mau manaò, E òre te taata manaò òre ra e haapaò, e te taata maamaa ra, e òre e ìte i te reira. Mai roto mai i teie huru faanahoraa e ôteo ai te paieti-òre e au rätou mai te räau rii ra, e ruperupe i te faatupuraa i te parau ìno o te tià ia täpühia e ia faaruèhia. Faateitei tätou i to Fatu tei faatähinu ia tätou i te monoì âpï ra. E ìte ai to tätou mata i te ruperupe o te taata parau-tià ra i roto i te nünaa o te Atua, tei tänuhia i roto i te fare o te Fatu ra, e ruperupe ia i roto i te mau fare  o to tätou Atua. Mai teie atu ra te huru no te haapotoraa o tätou mau taiòraa.

Taramo 92, 15 E hotu ä ia e tae noa atu i te paariraa ra, e î i te täpau, e te vai ota noa ra.

Materi 10,  12 Na te riri e faatupu i te märô; âreà te aroha, e faaòre ia i te mau hara atoà.

I Torinetia 15, 58 E teie nei, e a ù mau taeaè here e, ia itoito òutou, eiaha e âueue, ia rahi ä te rave i te òhipa a te Fatu eiaha e faaea, ua ìte hoì òutou e, eere i te mea faufaa òre te òhipa a te Fatu ta òutou e rave na.

Ruta èv. 6, 43 Eere hoì i te räau maitaì tei hotu mai i te mäa ìno; eere hoì i te räau ìno tei hotu mai i te mäa maitaì.

Ia au i te haapotoraa o na taiòraa e maha nei te tïtauhia ra i te taata ia haapeàpeà ia na i mua i te rahu a te Atua, no te mea o te Atua to na Fatu, e na na i faarahi i te taata i nià i te mau mea atoà. Teie mau taiòraa, te faahoì noa ra ia i nià i te mea ta te Atua i rahu. Te vähi fifi rä i te taata, e taata ihoä o ia, te taata e tano o na e tuàti, e òre atoà e tüàti. E manaò ihoä rä to te taata i mua i te mau ôpuaraa a te Atua, o ta te Atua i horoà te tiàmäraa i mua i te mau parau a te Atua. E fäito rahi ta te Atua i horoà na roto i te here e te aroha, teie ia e himenehia nei e te taata taramo E hotu ä ia e tae noa atu i te paariraa ra, e î i te täpau, e te vai ota noa ra. E tià i te taata i te haapeàpeà no te mea ia ìtehia to na hinaaro ia òre o na ia moèhia. Ta na räveà, terä e haapeàpeà ra ia na iho, no te mea te tahi ua manaò  na te tahi atu mau òhipa tei arataì ia na i roto i te ìno, na reira e ìtehia ai te vai ra o na. E manaònaòraa rahi terä, aita i mau noa i nià i te feiä paari, tei nià atoà i te feiä âpï. E peu terä i teie nei i te feiä âpï te hinaaroraa, te ìmiraa i te räveà ia ìte-atoà-hia rätou e, te vai ra rätou. Inaha, ua ravaì noa te feiä âpï i te faufaa ta na e mau ra i nià i to na tino, to na âpï, to na ièiè, to na nehenehe, to na päutuutu. Ua ìtehia e, te vai ra o na. No te aha paì i teie mahana i manaò ai te feiä âpï e, aita e ravaì terä, aita i ravaì, e tano atoà o na e puhipuhi i te àvaàva, e tano atoà o na e inu, e tano atoà o na e ori pö, ia ìtehia e, eere o na i te tamarii faahou. E au atu ra paì e, mea ìno ia faaea tamarii noa te tamarii, e te taata paari eiaha ia manaò faahou e aita to na faufaa i roto i te oraraa ta na e ora nei, e aita e taata i ìte e o vai o na. Ia faaroo tätou i teie manaò to paari i te naòraa e, 12 Na te riri e faatupu i te märô; âreà te aroha, e faaòre ia i te mau hara atoà. I teie huru parauraa te tïtau-noa-hia ra i te taata ia pärahi fatata noa i te  mau hinaaro faatupu ora ta te fenua e türama noa ra i te èà e tià  ai ia na ia ìte i te faanaho ia ûàna te maitaì ia ôtohe te ìno i mua i te ôpuaraa faaora a te Atua Nui Tumu Tahi. I te mea te paari ta to na âau i feàfeà ra e färii o ia ma te haehaa i te hinaaro faatupu ora ia òre ta na parau ia riro e paraparau na te maamaa. Tei tià ra to na haereà, i te haereraa no te taata tei märamarama i te puai o te ora, tei haaparuparu te tupuraa o te haavare faaìtehia ra. Ia ara maite ra o ia o tei àmoàmo i to na mata, ua faatupu ia i te ìno, âreà te vaha o te taata parau-tià ra, e tumu ia no te ora. Teie te pororaa a Pauro i to na  mau taeaè, 58 E teie nei, e a ù mau taeaè here e, ia itoito òutou, eiaha e âueue, ia rahi ä te rave i te òhipa a te Fatu eiaha e faaea, ua ìte hoì òutou e, eere i te mea faufaa òre te òhipa a te Fatu ta òutou e rave na. Teie Fatu i to na haereraa mai i te fenua nei, o te huru ia  o te titi teie taata àita to na e parau no na iho, to na tiàmaraa ua òre, to na turaraa taata ua  faa-òre-hia. Te faaìte-noa-mai ra te haèhaa o te Fatu i mua teie huru faanahoraa  hoê noa tïtauraa ia tupu te hinaaro o te Atua, e ia haapiihia te taata i te parau tià e te parau mau,  ma te ìte i te maitaì e te ìno, mai teie ta te Fatu e parau nei e, 43 Eere hoì i te räau maitaì tei hotu mai i te mäa ìno; eere hoì i te räau ìno tei hotu mai i te mäa maitaì.

Te faahiti nei o Ietu i te parau no te taata, e to na faanahoraa. Ma te horoà i te tahi mau faahohoàraa i nià i te rahu, èi faaìteraa i te huru o te taata, e to na mau hinaaro ia ora o ia, e aore ra ia pohe. Ta Ietu ra e hinaaro nei ia ìte te taata i te ora o ta te Atua i horoà i roto ia na. Eiaha ra tätou e maere i teie arataìraa manaò i te mea, te tahi vahi e märamaramahia ra i te parau no teie taiòraa te faahiti nei o Ietu i te parau no te taata. O vai teie huru taata ta Ietu e parau nei ? E tamata tätou i te hämani i teie taata ia au te hiòraa a Ietu, e i te heheuraa a te taiòraa, mai teie atu ra te huru.

Ärataì.

O vai teie ?

O  vai te ?                    Matapö                                                          Matapö

E hià                                                              E hià

Òrometua                                                       Pipi

Fäito                                                              Haapiihia

Papaa ïti                                                         Raau rahi

Maitaì                                                             Ìno

Raau taratara                                                  Tute

Vine                                                               Tätarämoa

Taata maitaì                                                   Puèraa maitaì

Taata ìno                                                        Puèraa ìno

Ï te àau                                                                       Parau te vaha

I mua i teie huru faanahoraa, mea maitaì ia tätou i te ìte te vai atoà ra te raau rahi i roto i to tätou mata, tei haapöuri i te türamaraa i te èà. Te vai nei te tahi piiraa, na te Atua  i to na mau tävini e i te mau taata atoà e tiàturi nei e aore e tiàturi nei. Na roto i teie òhipa, te faatoro nei te Atua i to na pue rima ora, ia tià i te mau taata atoà ia täpeà i nià iho. Tei òre i täpeà i nià iho ra ua haere noa ia rätou, na te mau vahi aita e täpaò e ìtehia. Te riro nei ia rätou mai te mau arataì matapö, te arataì te matapö. Àreà ra te rima o te Atua, e arataì o ia i roto i te vahi ora e te òaòa. O teie te tauturu e te itoito o te Atua i nià i te mau taata atoà tei faaroo i te ora, e faaìtehia ia rätou i te puai o te ture a te Atua. E teie ture e faaìte ia i te parau tià a te Atua. Na na hoì e faaìte e, te ätea ra te taata i te Atua, e na na atoà e faaìte e, te piri mai ra i pïhaìiho i te Atua. Ia òre, e topahia rätou i te riri o te Atua, te òreraa e haapaò i te ora. Te hinaaro o te Atua, eita ia te faahaparaa i te taata, horoàraa ra i to na òaòa i te fëia atoà e tävini nei ia na. Te faufaa ia i noaa ia tätou, na roto i te tiàfaahouraa o te Metia. Ua tià mau te Metia, èi arataìraa i ta na mau pipi, ta na mau òrometua ia noaa ia rätou i te faaararaa i te matapö i te ora e vai ra i roto i te Atua. Èi ìriti i te mau òhipa e haafifi ra te hiòraa i te maitaì. Ia tià ra i te mata ia hiò i te mau hotu ta te Atua e faaìte. Ia noaa i te taata na roto i te mäta äpiäpi òre, ia hiò i te huru o te Atua i nià i te tahi èi ia na iho.

43 Eere hoì i te räau maitaì tei hotu mai i te mäa ìno; eere hoì i te räau ìno tei hotu mai i te mäa maitaì.

Teraì òr. Faatura.

    

Ruta èv 6, 27-38 Enemi

Tāpati 24 no Fëpuare 2019.

Enemi

Taramo 103.

1 Na Tävita. E haamaitaì i te Fatu, e ta ù värua, e to roto ia ù nei, i to na ra iòa moà. 2 E haamaitaì i te Fatu, e ta ù värua, e eiaha te hoê maitaì a ana i horoà mai ra e haamoèhia. 3 O ia tei faaòre i ta òe atoà ra mau hapa, e o tei faaora i to òe atoà ra mau maì, 4 o tei faaora ia òe i te pohe, o tei faatoröna ia òe i te hämani maitaì e te aroha, 5 o tei faaî i to vaha i te maitaì, ia faaâpï-faahou-hia òe mai te àeto ra. 6 Te rave ra te Fatu i te parau tià e te au i te feiä atoà i hämani-ìno-hia ra. 7 Ua faaìte o ia i ta na haapaòraa ia Möte, e ta na òhipa i te tamarii a Ìteraèra.8 E aroha e te hämani maitaì to te Fatu, e òre e riri vave, te rahi ra to na aroha. 9 E òre o ia e tämau i te aò mai ia tätou e òre hoì e vaiiho märô i to na riri e a muri noa atu. 10 Aita aè nei o ia i tähoo mai ia tätou e ia fäito i ta tätou mau hara, aore hoì i faautuà mai ia tätou e ia fäito i to tätou mau ìno. 11 Mai te teiteiraa o te mau raì i nià i te fenua nei, mai te reira te rahi o to na aroha i te feiä i mataù ia na ra. 12 Mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei. 13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra. 14 Ua ìte hoì o ia i to tätou huru, te manaò ra o ia e, e repo tätou nei. 15 O te taata nei e au to na puè mahana i te àihere nei mai te tiare i roto i te aru ra to na ruperuperaa.16 Ua farara anaè te mataì nä nià iho ra, ua mou ia, e to na vähi i tupu ai ra e òre e ìte faahou ia na. 17 Âreà te aroha o te Fatu mai tahito mai ia e a muri noa atu, i te feiä i mataù ia na ra, e ta na ra parau tià i te tamarii a ta rätou ra mau tamarii, 18 i te feiä i haapaò i ta na ra faufaa, e tei haapaò i ta na ra parau e rave ra. 19 Ua haamau te Fatu i to na ra teröno i nià i te mau raì, e ua auraro te mau mea atoà nei i to na ra pätireia. 20 E haamaitaì i te Fatu, e to na ra mau merahi e, o tei hau i te püai, e ua haapaò i ta na faaueraa, i te faarooraa i ta na reo ia parau. 21 E haamaitaì i te Fatu, òutou atoà, o to na ra mau pupu, o to na ra mau tävini tei rave i to na ra hinaaro. 22 E haamaitaì i te Fatu, e ta na atoà ra mau òhipa, i te mau vähi atoà ra i to na ra hau. E haamaitaì i te Fatu, e ta ù värua e.

1 Tämuera 26, 2-23

2 Ua tià aè ra Taura, haere atu ra i raro i te mëtëpara ra i Tifa, e nä taata i mäìtihia e toru atoà tautani no Ìteraèra i te haere- atoà- raa e ìmi ia Tävita i te mëtëpara ra i Tifa. 3 Ua pätia iho ra Taura i to na pühapa i nià i te mouà ra o Hätira, i te pae èà tià i mua iho i Ietimona. Te pärahi noa ra Tävita i roto i te mëtëpara; ua ìte hoì o ia e, tei te mëtëpara mai nei Taura, te ìmi ra ia na. 4 I tono na hoì Tävita i te hiò, e ua ìte mau o ia e, ua tae mai Taura. 5 Ua tià aè ra Tävita, ua haere tià mai ra i taua vähi i pühapahia e Taura ra. Ua ìte mai ra hoì Tävita i to Taura taòtoraa e to Àpinera a Nere ra, te raatira no taua nuu ra tei roto i te utaa to Taura taòtoraa, e te mau taata atoà i to na hiti e àti noa aè. 6 Ua parau mai ra Tävita ia Âhïmereta âti-Heta ra, e ia Àpitai a Teruia, taeaè no Ioapa, nä ô atu ra, O vai te taata e tae atoà i raro i te pühapa ia Taura ra, mäua atoà? Ua parau mai ra Àpitai, e haere atoà vau. 7 Ua haere mai ra Tävita räua o Àpitai i taua nuu ra i te pö e inaha, te taòto noa ra Taura i roto i te mau tauhaa, e te pätia-noa-hia ra ta na mähae i raro i te repo, i te pae upoo ra, e te tärava noa ra hoì Àpinera e te taata atoà i to na hiti e àti noa aè. 8 Ua nä ô aè ra Àpinera ia Tävita, ua tuu mai te Atua i to ènemi i roto i to rima i teie nei mahana; teie täù parau ia òe, e tuu mai na òe, e pätia na vau ia na i te mähae e püpü noa atu i raro i te repo; e òre au e tätaìpiti i te vähiraa. 9 Ua parau atu ra Tävita ia Àpitai, eiaha o ia e taparahihia o vai ia taata e òre e hara ia âfaì i ta na rima i nià e täparahi i to te Fatu taata i faatähinuhia ra? 10 E ua parau atu ra Tävita, te ora ra te Fatu, na te Fatu o ia e täparahi, e aore ra, te vai ra to na mahana e pohe atu ai e aore ra, e haere o ia i te tamaì, pohe atu ai. 11 Ia täpeà mai hoì te Fatu ia ù ia òre au ia rave i te taata o te Fatu i faatähinuhia ra teie rä tä ù parau ia òe, a rave mai na òe i te mähae i ta na hiti upoo ra, e te hue pape, e haere täua. 12 Ua rave iho ra Tävita i te mähae e te hue pape, i te hiti âpoo o Taura ra haere noa atu ra räua, aore roa te hoê i hiò noa mai, aore i ìte, aita hoì i ara noa aè; ua roohia hoì rätou i te vareà taòto rahi no ô mai i te Fatu ra. 13 Haere atu ra Tävita i te tahi paeàu, ua tià noa mai ra i nià i te hoê âivi, tei te ätea ê, e vähi roa tei röpü ia rätou ra 14 ua tiàoro mai ra Tävita i taua nuu ra, e ia Àpinera, nä ô atu ra O vai hoì òe e pii noa mai i te arii nei? 15 Ua parau mai ra Tävita, Eere änei òe i te taata àito? O vai hoì ia taata e au ia òe i Ìteraèra na? E aha iho ra hoì òe i òre i tiaì ai i to fatu, i te arii na. 16 Eere ta òe na i te rave maitaì. Te ora ra te Fatu, e au ia òutou te pohe, no te mea, aita aè nei òutou i tiaì i to òutou fatu, i ta te Fatu taata i faatähinu ra. E teie nei, a hiò mai na i te mähae a te arii e te hue pape i vai i ta na hiti upoo ra. 17 Te ìte ra Taura i to Tävita reo, e ua nä ô atu ra, No òe änei ia reo, e ta ù tamaiti, e Tävita? Ua parau mai ra Tävita, No ù ia reo, e ta ù fatu, e te arii. 18 ua parau mai hoì Tävita, E aha òe i aùaù mai ai i to tävini, e ta ù fatu? E aha na hoì au? E aha ra to ù nei ìno? 19 E teie nei, e faaroo mai na òe, e ta ù fatu, e te arii, i te parau a to tävini nei. Na te Fatu òe i tuì mai e rave ia ù, e färii mai o ia i te tahi tütia na te taata anaè ra, ia tätarahia rätou i mua i te aro o te Fatu ua tiàvaru hoì rätou ia ù eiaha vau e pärahi i te fenua o te Fatu, i te parau mai e, E haere e haamori i te mau atua èê ra. 20 E teie nei, eiaha to ù nei toto ia tahe i raro i te repo i mua i te aro o te Fatu. E tere ìmi tütuà to te arii o Ìteraèra mai te tërä i ìmihia i nià i te mouà ra. 21 Ua parau atu ra Taura, ua hara vau; a hoì, e ta ù tamaiti e Tävita, tirärä hoì to ù hämani-ìno-raa atu ia òe no te mea ua faahereherehia vau e òe i teie nei mahana e parau maamaa hoì tä ù, e ua hapa roa vau. 22 Ua parau mai ra Tävita, nä ô mai ra, A hiò mai na i te mähae a te arii ra e faaue i te hoê tamaiti e tii mai. 23 Ia faautuà mai te Fatu i te taata atoà i tei au i te parau tià e te haapaò maitaì nä na ra i tuu noa mai hoì te Fatu ia òe i ta ù rima i teie nei mahana, aita aè ra ta ù rima i rave noa atu i ta te Fatu taata i faatähinuhia ra.

1 Torinetia 15. 45-49

45 Ua oti hoì i te päpaìhia i hämanihia te taata mätamua o Àtamu ei taata ora  âreà te Àtamu hopeà, e Värua ora ia. 46 Aita rä i nä mua te tino värua ra, o te tino taata rä, e muri aè ra, o te tino värua ia. 47 E repo te taata mätamua, no te fenua âreà te piti o te taata, o te Fatu ia, no te raì mai. 48 O to te repo nei, mai to te repo atoà ra rätou; o to te raì ra, mai to te raì atoà ra rätou. 49 E mai te hohoà o to te repo e vai noa i nià ia tätou nei, e riro atoà i nià ia tätou te hohoà o to te raì ra. 

Ruta èv 6, 27-38

Te aroharaa i te ènemi

(Mät 5,38-48; 7,12)

27 Teie rä ta ù parau ia òutou e faaroo mai na E aroha i to òutou mau ènemi, e hämani maitaì atu i te feiä i riri mai ia òutou. 28 E faaora i te feiä i tuhi mai ia òutou, e pure hoì i te feiä hämani ìno mai ia òutou. 29 O tei moto mai i to päpärià na, e färiu atoà atu i te tahi; e o tei rave mai i to àhu pü na, eiaha atoà e täpae i to pereue. 30 E horoà atu i tei ani mai ia òe ra e o tei rave i ta òe na taoà, eiaha e ani faahou atu. 31 E o ta òutou e hinaaro ia vëtahi ê ra, e nä reira atoà atu òutou ia rätou. 32 O te feiä i aroha mai ia òutou, o ta òutou ä ia e aroha atu e aha te haamaitaìraa ia òutou i reira. Te aroha atoà nei hoì te feiä rave hara i tei aroha mai ia rätou. 33 E o te feiä i hämani maitaì mai ia òutou, o ta òutou ä ia e hämani mataì atu e aha te haamaitaìraa ia òutou i reira? Te nä reira atoà nei hoì te feiä rave hara. 34 E o te feiä ta òutou e manaò e noaa ta òutou i reira, o ta òutou ä ia e horoà atu e aha te haamaitaìraa ia òutou i reira? Te horoà nei hoì te feiä rave hara i te feiä rave hara ia fäito ta rätou ia roaa mai. 35 E aroha rä òutou i to òutou mau ènemi, e hämani maitaì, e horoà, eiaha noa atu ei manaò hoo e e utuà rahi ia ta òutou. E riro hoì òutou ei tamarii na Te Teitei e hämani maitaì hoì to na i te feiä mauruüru òre e te taata ìno. 36 E aroha atoà hoì òutou mai to òutou Metua e aroha mai ra.

Eiaha e haavä ia vëtahi ê

(Mät 7,1-5)

37 Eiaha e faaìno atu, e eita òutou e faaìnohia mai; eiaha e faahapa atu, e eita òutou e faahapahia mai; e faaòre atu i te hara, e e faaòrehia mai ta òutou; 38 e horoà, e e noaa hoì ta òutou; e î te fäito, e neneìhia, e ueuehia, e manii noa atu, na te taata e ninii i roto i to òutou àhu. O taua fäito hoì ta òutou e fäito ra, o te fäito-faahouhia mai ia ta òutou.

Manaò.

Ia haapotohia e ia rave tätou i te mau manaò e faahiti ra e na taiòraa e mäha nei, e nä ô ia tätou e ia hinaaro òe ia ìtehia e, te vai ra òe, haamoè ia òe, oia hoì, a faaea i te manaò ia òe. Ua ìte maitaì te räau i teie haapiiraa e, ia òre te huero e te aa ia moè i roto i te repo, eita te räau e tupu i te rahi, e eita hoì e hotu mai i te mäa te riro atu ei ùmereraa na te taata. I rave ai te taata i te tahi òhipa, no te mea ia, na na i hinaaro, aore ra no te mea ua fati to na manaò i to te tahi pae i tämau ai te taata i te rave i te tahi òhipa, no te maitaì ia o taua òhipa ra, aore ra no te mea aita ä te reira òhipa i faaìte mai ra i te ìno. Te vähi rä i päpü, ia ìte te taata i te tupuraa o te ìno, te manaò mätamua e ö mai i roto ia na, te haereraa ia e huhuti i taua ìno ra ia òre ia haere i te rahi e ia parare roa atu. Te tahi ia mau manaò e vai nei i roto na taiòraa e maha nei. E riro rä tätou i te maere i te mau manaò e faahitihia ra i roto i te ra tau e te ra tau to na tupuraa te parau no te hara, e te ìteraa i te hara e mea ìno. Ta te taata räveà te faatanoraa ia i te òhipa ta na e rave ra, tei roto atoà te reira i te tupuraa o te òhipa tià òre. Te vähi tätou e taa ê ai i te Fatu i mua i te òhipa tià òre, te räveà ia. E òhie aè tätou i te àro, aore ra te huhuti i te ìno, âreà te Fatu, te hinaaro nei ia e horoà i te taata i te taime no te hiòraa i te auraa o te òhipa ta na e rave ra, ia riro e, na na iho e ìriti i te ìno ta na i faatupu. Te räveà ta te Fatu iho i faaòhipa, te haapii ia, no te mea o te räveà maitaì aè ia e ìte ai te feiä ìte òre, no to rätou rä färii òre i teie räveà, e riro ai te feiä ìte ei matapö, oia te feiä tei onoöno i nià i to rätou tano e tei tiàturi i to rätou paari. Èita ra e tià ia tütonu-noa-hia i nià i te ìno o te taata, eita änei tätou e riro mai te taata e tià ra i mua i te tumu räau e tei moè ia na te uru räau. Peneiaè ia faaätea rii mai tätou, aore ra ia nä nià rii tätou i te hiò i te tupuraa o te òhipa, e taa ê rii te mea e horoàhia ia tätou te ìte. Te haapotoraa ia e tïtauhia ra ia tätou i te ìteraa no teie mau parau e faahitihia ra, a faaroo mai na,

-Taramo 103, 14 Ua ìte hoì o ia i to tätou huru, te manaò ra o ia e, e repo tätou nei.

-I Tämuera 26, 21 ua hara vau; a hoì, e ta ù tamaiti e Tävita,

-I Torinetia 15, 49 E mai te hohoà o te repo e vai noa i nià ia tätou nei, e riro atoà i nià ia tätou te hohoà o te raì ra.

-Ruta èv. 6, 36 E aroha atoà hoì òutou mai to òutou Metua e aroha mai ra.

Te taura o te ora, te taura pito, oia te Aroha o te Atua Nui Tumu Tahi te iho tumu ia e täamu i te taata i te fenua e te Atua, ua mutu i te hara i ravehia e te taata. Eita te ora o te taata e tano ia faataa-ê-hia i te Atua e te fenua. I räpae aè i te tumu o te ora, e aha te ora e noaa i te taata.

Eita e òre tätou i te parau e, aita e tüàtiraa e vai ra i roto i te hara i ravehia e te taata e ta te Atua faahaparaa i te taata i te òreraa e haapaò i ta na òhipa i rave, e te òreraa e hiò i tei ravehia e ta na rima. Nä ô ia tätou, te täparahiraa taata, e tae noa atu i te faaìnoraa i te fenua, te tahi atoà ia huru haafaufaa-òre-raa i te òhipa i ravehia e te Atua. Ia roohia te taata i te ìno, i roto i te rauraa o to na tupuraa e to na ûànaraa, e òhie roa o ia i te pari i te täuà òre e te haapaò òre o te Atua ia na. E tano roa paha  teie parau ta te Taramo haamanaò mai ra i te naòraa e,  14 Ua ìte hoì o ia i to tätou huru, te manaò ra o ia e, e repo tätou nei.

Ia haapotohia, e nä ô ia tätou e, eere te Atua i te Atua no te pohe, no te ora rä, e aita te ôpuaraa faaora a te Atua i haamauhia i nià i te pohe. I roto i te tiàturiraa o to tätou mau tupuna, ia roohia rätou i te fifi, te oè, ia ìno te fenua, no te mea ia ua hara rätou, e te räveà e hoì faahou mai ai te ora, ia tämähia ia te marae, oia te taura pito e täamu i te fenua i te Atua. Ia mä te hara a te taata, e tuu faahou mai te Atua i te ora. I teie mahana, i roto i te fifi e färereihia nei e te ao täatoà nei, eere te Atua te hororaa mätamua a te taata, eita e ö mai i te taata te manaò e, ua hara o ia i te Atua. Ia faaroo tätou i teie reo to Taura i te parauraa e, ua hara vau; a hoì, e ta ù tamaiti e Tävita, tirärä hoì to ù hämani-ìno-raa atu ia òe no te mea ua faahereherehia vau e òe i teie nei mahana e parau maamaa hoì tä ù, e ua hapa roa vau. Mai te peu e fifi, te vai ra te mau àivänaa na rätou e horoà mai i te mau tatararaa e te mau pähonoraa märamarama, e na rätou atoà hoì e faaìte mai i te mau räveà e au ia ravehia no te ärai i te fifi. No te Faaroo, te ìno ta te taata i faatupu, na na iho te reira e tatara te tätarahapa ia. Te nä ô ra te päpaìraa a Pauro  i to Torinetia 49 E mai te hohoà o te repo e vai noa i nià ia tätou nei, e riro atoà i nià ia tätou te hohoà o te raì ra.  Mea maitaì tätou ia ara, o te rara atu to tätou faaroo e te faaruè atoà atu tätou i te rahu a te Atua i roto i te rima o te mau taata hua nane nei i te faufaa ora o to tätou fenua o Mäòhi Nui. Haamanaò tätou e, ua püpü te Atua i ta na rahu i roto i te rima o te taata. Ia parau o Ietu e, 36 E aroha atoà hoì òutou mai to òutou Metua e aroha mai ra. No te mea ua ìte Ietu i te faufaa òre o te ènemi i roto i te ôpuaraa faaora a te Atua. Tei teie vahi te tïtauraahia i te taata faaroo i te ìte i ta na hopoià i roto i te oraraa vaamataèinaa i te mea e hohoà o ia no te repo e hohoà atoà o ia no te raì. Te taata ia ta te Atua e hinaaro, ei taata tei hinaaro i te Aroha a Te Tumu Nui, tei te Aroha to na manaòraa i te ruì e te ao. Teie Aroha, te ture ia a te Atua, oia te parau a te Atua tei riro ei manaòraa na te taata i hinaaro ia na i te pö e te ao.

Teraì òr. Faatura.

Ruta èv 6, 17-26. Uruaì.

Tāpati 17  no Fëpuare 2019.

Uruaì.

Taramo 1

1 E ao to te taata,  aore e faaau i to na haereà i te aò a te paieti-òre,  aore i taahi i te èà o te feiä rave hara ra,  e aore hoì i pärahi i te pärahiraa o te feiä tähitohito ra. 2 O tei hinaaro rä i te ture a te Fatu, e tei ta na ture to na manaòraa i te ruì e te ao. 3 E au o ia i te räau i tänuhia i te hiti ânävai ra o tei hotu i to na ra tau mau,  e o tei òre roa i mäheahea to na rau. Oia atoà o tä na atoà e rave ra, te maitaì ra ia. 4 Eere mai te reira te feiä paieti òre ra e au ia i te ota e puehu noa i te mataì ra. 5 E òre e mau ai te paieti-òre i te haaväraa, e te rave hara i te âmuiraa o te parau-tià ra. 6 Te au mai ra hoì te Fatu i te haereà o te parau-tià ra,  âreà te haereà o te feiä paieti-òre ra, o te pohe ia.

 Ieremia 17, 5-8

Te mea e haapeàpeà e te mea e òre e haavare, 5 Te nä ô mai ra te Fatu,  ia tätarahia, te taata e tiàturi i te taata ra,  o tei faariro i te taata ei rima tauturu ia na,  o tei täiva to na âau i te Fatu. 6 E riro hoì o ia mai te räau i te vähi papa märô e ôriorio noa ra,  aore i ìte i te maitaì ia haere mai; e tià rä i te vähi veàveà i te mëtëpara,  i te fenua miti e òre e pärahihia ra. 7 E ao to te taata i tiàturi i te Fatu,  o ta na ia uruaìraa mau o te Fatu. 8 E riro hoì o ia mai te räau i tänuhia i pïhaì iho i te pape ra, o tei faatoro i to na aa na te hiti o te pape, aita i ìte i te veàveà i te tupuraa mai te èreere tämau noa ra to na rau, e e òre e haapaò i te mätahiti ua òre ra,  eita hoì e faaea i te hotu i te mäa.

1 Torinetia 15, 12-20

To tätou tiàfaahouraa

12 Te parau-haerehia nei te Metia e, ua tiàfaahou o ia i te poheraa ra e aha i parau ai te hoê pae o òutou e, aore e tiàfaahouraa to tei pohe? 13 Aore e tiàfaahouraa to tei pohe ra, aore atoà te Metia i tià i nià; 14 e aore te Metia i tià i nià ra, e haavare mau ta mätou aò nei, e e haavä atoà to òutou faaroo. 15 Ua riro hoì mätou ei ìte haavare na te Atua; no te mea ua parau mätou i te Atua e, ua faatià o ia i te Metia; aita mau e faatiàhia tei pohe ra, aore ia o ia i faatià ia na. 16 Eita hoì e faatiàhia tei pohe ra, aore ia te Metia i faatiàhia. 17 E aita hoì te Metia i faatiàhia ra, e mea faufaa òre to òutou faaroo; te vai noa na ia òutou mä ta òutou hara atoà. 18 E te feiä atoà i maìri te taòto i roto i te Metia ra, ua mou ia i reira. 19 Tei teie nei ao anaè ra ta tätou e tiaì i te Metia nei, e àti rahi to tätou i to te taata atoà. 20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra.

Ruta èv 6, 17-26.

Ietu e te taata e rave rahi

(Mät 4,23-25; Mär 3,7-11)

17 Ua pou mai ra o ia i raro e rätou atoà, e faaea iho ra i te vähi päpü. Tei reira te tahi pae pipi a ana e te taata atoà e rave rahi, no Ierutarëma e no te mau vähi atoà i Iutea ra, e no te pae tähatai i Turia e Titona, i haere mai e faaroo ia na, e ia faaorahia rätou i to rätou maì; 18 e te feiä atoà i haapeàpeàhia e te värua faufau ra, faaora-atoà-hia iho ra rätou. 19 Ua tïtau mai ra taua feiä rahi atoà ra e faatiàià mai ia na, te püpü atu ra hoì te mana nä roto ia na e ora roa aè ra rätou atoà.

Te òaòa e te àti

(Mät 5,1-12)

20 Ua hiò atu ra ta na mata i ta na ra mau pipi, e ua parau atu ra, E ao to òutou e tei haèhaa, no òutou hoì te Pätireia o te Atua ra 21 E ao to òutou e tei poìa i teie nei, e faaîhia hoì òutou, E ao to òutou e tei òto i teie nei, e àta hoì òutou  22 E ao to òutou ia riri mai te taata ia òutou, e ia faataa ê ia òutou, e ia tähito mai, e ia faaruè noa i to òutou iòa mä te faaìno, no te Tamaiti a te taata nei. 23 E òaòa i te reira mahana, e ôuòuà noa i te òaòa, ua ìte hoì òutou e e utuà rahi ta òutou tei te ao. I nä reira mai hoì to rätou hui tupuna i te mau perofeta ra.  24 E àti rä to òutou e te feiä taoà rahi,  ua noaa hoì to òutou òaòaraa  25 E àti to òutou e te feiä i î na, E poìa hoì òutou  E àti to òutou e te feiä i àta i teie nei, E mihi hoì òutou e e òto 26 E àti to òutou ia haamaitaì mai te taata atoà ia òutou  I nä reira hoì to rätou hui tupuna i te mau perofeta haavare ra.

Manaò.

I  to tätou faarooraa na parau e maha nei,  mai roto mai i te mau taata i te mau tau taaê no te oraraa te ìtehia nei te tupuraa te mau parau,  a te Atua Nui Tumu Tahi ma te haapäpü i ta na ôpuaraa faaora i te faaroo  o te nünaa. I te mea te ora o te taata te pärahi tämauraa ia i te mau faaueraa no te aroha e te here o te parau tià ia tei turäma i te èà i te ruì e te ao. E parau teie no te ora èi haaparuparuraa i te pohe i mua i te mau faanahoraa tei òre e au i te mau taata paieti tei ìmi tämau i te maitaì. Te faaäuhia nei te taata faaroo e te päpaì Taramo i tumu räau tei tänuhia i te hiti ânävai o tei hotu i to na ra tau mau ra,  tei òre roa i mäheahea to na rau.  Te vähi ta te manaò e hinaaro nei i te hiò, eere ia te mea e faaätea ra i te taata i te Atua, te mea rä e ìte ai te taata e, eita to na parau e tano ia faataa-ê-hia i te rähu.Te fenua ra, ei fenua ia  e repo fenua hoì te taata, te vähi atoà ia te reira e roaa ai ia na te auraa o to na parau, oia te vähi e märamarama ai o ia e ìte ai hoì i te räveà e faufaahia ai to na parau. Te mea rä e ìtehia nei, te riroraa ia te tahi parau fifi òre ei parau àro. I mua i te mau mea e vai tahaa noa ra, e au ra e, tei mua te taata i te ora mute òre. No reira, ia moè i te taata to na parau, nä reira hoì te tumu o to na parau, e ìte-faahouhia änei ia na te èà o te ora, oia te èà e tae atu ai o ia i roto i te ìteraa i te Atua. Eiaha rä ia àramoinahia ia tätou e, te èà, e vähi haereraa ia, e aita e faufaa to te èà ia òre te taata ia färii i te nä reira i te haere. O te mea ia e faaìtehia nei ia au i te haapotoraa o na taiòraa e maha.

*Taramo 1,1 E ao to te taata, aore e faaau i to na haereà i te aò a te paieti-òre,  aore i taahi i te èà o te feiä rave hara ra,  e aore hoì i pärahi i te pärahiraa o te feiä tähitohito ra.

*Ieremia 17,  7 E ao to te taata i tiàturi i te Fatu,  o ta na ia uruaìraa mau o te Fatu.

*I Torinetia 15,  20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra

*Ruta èv 6, 20 Ua hiò atu ra ta na mata i ta na ra mau pipi, e ua parau atu ra.

E tià ia parauhia te tahi parau tumu no na  parau e maha teie ia uruaì, te uruaì e parau teie no te taata  tei päpü to na tiàraa âvae i nià i te aau ia òre o ia ia fifi ia fäti te àre miti,  e parau atoà ra teie no te taata tei òre i âueue to na faaroo tei tiàtaro i  to na faaroo i te Atua Nui Tumu  Tahi. Te auraa, ua hiò anaè te mata o te tahi taata i te tahi vähi, to na atoà manaò e to na âau të uruaì i te âpeeraa ia òre aita ä o ia i au ei pipi, no te mea te haapaò noa ra o ia i to na hinaaro. No te faufaa rahi o teie parau no te uruaìraa, i pinepine atoà ai ta Ietu mau hiòraa no te faaära i te taata i te tïtauraa e vai ra i roto i teie parau. Eita e tano e faatupu i te hinaaro o te Atua mai te ara mäite ia òre to te taata ia haamoè-roa-hia, no te mea o te feiä haavare anaè të nä reira. No reira, te taata i uruaì mau i te Atua aita o ia i riro noa ei pipi, ua riro roa rä ei pipi, te auraa, ua hope roa to na parau i roto i to te pipi, e aita e tauiraa e faahuru ê i te reira uruaìraa. Te faaìteraa  ia a te Parau Maitaì no Ietu i te päpaìraa a Ruta, 20 Ua hiò atu ra ta na mata i ta na ra mau pipi, e ua parau atu ra. I roto i te  tuhaa mätamua no te èvaneria päpaìhia e Ruta 6 i te mau ìrava 17 e tae i te ìrava 19 to Ietu faaoraraa i te feiä maì e te feiä  i haapeàpeàhia e te värua faufau ra, e tae noa atu tei tïtau e faatiàià ia na,  püpü atu ra hoì te mana nä roto ia na e ora roa aè ra rätou atoà. Te piti o te tuhaa tei te mau ìrava 20 e tae i te ìrava 26,  e faahiti o Ietu i te parau no te uruaì i nià i te aroha e te here o te Atua,  20 Ua hiò atu ra ta na mata i ta na ra mau pipi, e ua parau atu ra,

E ao to òutou e tei haèhaa, no òutou hoì te Pätireia o te Atua ra

E ao to òutou e tei poìa i teie nei, e faaîhia hoì òutou,

E ao to òutou e tei òto i teie nei, e àta hoì òutou

E ao to òutou ia riri mai te taata ia òutou, no te Tamaiti a te taata nei.

E òaòa i te reira mahana, e ôuòuà noa i te òaòa, e utuà rahi ta òutou i te ao nei.

E mau taata teie tei uruaì i te mau hinaaro o te Atua, e tei ìte i te faufaa o ta rätou hopoià ta te oraraa o te ao e höroà ra  ia òaòa i te täviniraa i to na taata tupu. To rätou haèhaa ia maitaì te tupuraa o te Pätireia o te  Atua. E  poia noa rätou i te Parau a te Atua, to rätou òto ia òre te ôpuaraa faaora  a te Atua ia parare i te mau vahi  atoà, e ririhia rätou ia faaìte i te parau tià e te parau mau, ta rätou utuà, oia hoì to rätou mauruüru ia ìte to te ao nei e i te uruaì i nià i te fenua ia òre teie ia te manaò o Ietu.

E àti rä to òutou e te feiä taoà rahi,  ua noaa hoì to òutou òaòaraa 

E àti to òutou e te feiä i î na, E poìa hoì òutou  

E àti to òutou e te feiä i àta i teie nei, E mihi hoì òutou e e òto

E àti to òutou ia haamaitaì mai te taata atoà ia òutou.

Mai te òe mata piti ra teie mau parau ta Ietu e faahiti nei, tei uruaì  ra i nià i te mau hinaaro o te Atua Nui Tumu Tahi. E täpura òhipa teie ta Ietu e ìte mata nei i roto i te oraraa vaamataèinaa tei òre e au i te ôpuaraa faaora a te Atua. Ua pïtaa te  oraraa vaamataèinaa i te  faanahoraa a te taata tei ô nei ta tätou òhipa e te mau tävini no Mäòhi Nui nei.

Teraì òr. Faatura.

Ruta èv 5.1-11 Ànaanaea

Tāpati 10  no Fëpuare 2019.

Ànaanaea

Taramo 138

1 Na Tävita. E haamaitaì au ia òe, e te Fatu, mä ta ù âau atoà nei, e himene au ei haamaitaì ia òe, i mua i te aro o te mau atua. 2 E haamori tià atu vau i to nao moà ra, a haamaitaì atu ai i to òe iòa, e te Fatu no to òe aroha e ta òe ra parau mau ua faarahi hoì òe i ta òe parau ia hau atu i to iòa atoà ra. 3 I te mahana i tiàoro atu ai au ra, ua parau mai òe ia ù; e ua horoà mai i te itoito i ta ù värua. 4 E hope te mau arii atoà o te fenua nei i te haamaitaì ia òe, e te Fatu, ia ìte rätou i te parau a to vaha 5 E himene rätou i te mau parau a te Fatu E hanahana rahi hoì to te Fatu. 6 Teitei noa ä te Fatu, e haapaò mai ä o ia i tei haèhaa, âreà tei teòteò, ei te ätea ê o ia e hiò mai ai. 7 Ia haere noa vau nä roto i te àti ra, e faaànaànaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù. 8 Na te Fatu e nä reira mai ia ù, e tià to òe aroha, e te Fatu, i te vai-mäite-raa; eiaha na òe e faaruè i te òhipa a to rima.

Ìtaia 6.1-8

Te tïtauraahia o Ìtaia

1 I te mätahiti i pohe ai te arii ra o Ûtia, hiò atu ra vau i te Fatu i te pärahiraa i nià i te teröno teitei e te teniteni e ua î hoì te hiero i te hiti àhu roroa no na ra. 2 Te tià noa ra nä teräfi i nià aè  taìono o rätou atoà ra pererau  e piti ra, ei täpoì ia i to na mata, e piti ra, ei täpoì ia i ta na âvae, e piti ra, ei maùeraa ia. 3 Ua pii iho ra rätou te tahi i te tahi, nä ô aè ra, E moà, e moà, e moà, O te Fatu manahope, ua î te fenua atoà nei i to na ra hanahana. 4 Ua turorirori iho ra nä pou i te tomoraa ra i te reo o to rätou piiraa î aè ra hoì te hiero i te au auahi. 5 Ua nä ô aè ra hoì au, Âuë hoì au nei e ua mämü iho nei au e taata vaha viivii hoì au, e tei rotopü hoì au i te mau taata vaha viivii atoà i te pärahiraa ua hiò hoì ta ù mata nei i te arii, i te Fatu manahope ra.

1 Torinetia 15.1-11

Te tiàfaahouraa o te Metia

1 E Faaìte atu rä vau ia òutou e a ù mau taeaè, i te Èvaneria ta ù i parau atu ia òutou na, ta òutou hoì i färii mai ra, e i mau ai hoì òutou na; 2 e e ora ai hoì òutou, ia täpeà mäite ä òutou i ta ù i parau atu ia òutou na, ia òre rä ia riro to òutou faaroo ei faaroo faufaa òre. 3 Ua tuu atu hoì au ia òutou i mütaa iho ra, i tei noaa na ia ù ra, e i pohe te Metia i ta tätou nei hara, mai tei te parau i päpaìhia ra; 4 e i tänuhia hoì o ia, e tiàfaahou mai ra i te ruì toru, mai tei te parau i päpaìhia ra; 5 e i ìteä o ia e Tefa, e i te àhuru mä piti i muri aè. 6 E muri aè ra hoì, i ìteä o ia e te mau taeaè e pae atoà hänere e tiàhapa, hoê ä ìteraa; te ora noa nei ä te rahi o taua feiä ra, ua taòto rä te tahi pae. 7 E muri aè ra hoì, ìteä iho ra o ia e Iatöpo, e i te mau âpotetoro atoà i muri aè. 8 E te hopeà iho ra, ìteä atoà iho ra ia ù, mai te mea e e mahemo vau. 9 E iti hoì au i te mau âpotetoro atoà ra, e òre hoì au e au ia parauhia e, e âpotetoro, no te mea i hämani ìno vau i te Ètärëtia o te Atua. 10 To ù nei rä huru e vai nei, no te here ia o te Atua; e te maitaì na na i horoàhia mai ia ù nei, aore ia i riro ei mea faufaa òre: e òhipa rahi hoì ta ù i rave i ta rätou atoà ra  eere rä vau, o te maitaì rä a te Atua ia ù nei ra. 11 E teie nei, o vau tei aò ra, o vau ia, o rätou ra, o rätou ia, o ta mätou ä ia aò, e o ta òutou ä ia i faaroo.

Ruta èv 5.1-11

Te tïtau-raa-hia nä pipi mätamua

(Mät 4,18-22; Mär 1,16-20)

1 E te tià noa ra o ia i te hoê mahana i te hiti roto i Tenetareta ra, ua neneì noa mai ra te taata atoà e rave rahi ia na ra, e faaroo i te parau a te Atua. 2 Hiò atu ra o ia i e piti puè pahï i te tïpae-noa-raa i te hiti roto, âreà te feiä ravaai, tei uta ia te uhi ra i ta rätou ùpeà. 3 Haere atu ra o ia i nià iho i te hoê i taua nä pahï ra, i ta Timona ra, ua parau atu ra ia na e tute i tai iti aè. Pärahi iho ra o ia i raro, e ua haapii mai ra i nià i te pahï i taua feiä rahi ra. 4 E oti aè ra ta na parauraa, ua parau atu ra o ia ia Timona Hö atu i te vähi moana, e tuu i ta òutou ùpeà i te hoê häroà. 5 Ua parau mai ra Timona ia na, nä ô mai ra E te Fatu, i haa noa na mätou e ao noa aè nei te ruì, e aore roa i noaa, e tuu rä vau i te ùpeà o òe i parau mai na. 6 E ia tuu iho ra rätou, ua àti aè ra ia rätou te ià e rave rahi, motumotu iho ra ta rätou ùpeà. 7 Ua täpare atu ra rätou i to rätou i nià i te hoê pahï ra, ia haere atoà mai rätou e rave. Ua haere mai ra hoì rätou, ua faaî iho ra i nä pahï e piti atoà, e ua fätata roa i te tomo. 8 E ia hiò iho ra Timona Pëtero i te reira, tïpapa iho ra o ia i raro i te pae turi o Ietu, i te nä-ô-raa atu e E haere ê òe, e te Fatu, e taata hara hoì au 9 Roohia iho ra o ia e rätou atoà i te mäere rahi mataù, i taua häroà ià i noaa ia rätou ra. 10 O Iatöpo atoà hoì e o Ioane, nä tamarii a Tepetaio ra, ua âmui atoà räua ia Timona. Ua parau mai ra Ietu ia Timona Eiaha e mataù, i teie nei, e taata ta òe e noaa.11 E tae mai ra to rätou puè pahï i tähatai, faaruè anaè iho ra rätou, e ua pee mai ra ia na.

Manaò.

I to tätou färereiraa i teie mau taiòraa te tupu nei te faahiahia i te faarooraa, te faahiahia te tahi ia mea hau ê i te maitaì, te tahi mea hiòhia e te mata, aore ra te tahi mea faaroohia e te tarià no te reira maitaì, ua tupu te faahinaaro i roto i te âau, oia te taime riro roa ai te manaò, te âau, e te värua o te taata i te parau, mai te mea atu ra e, aita o ia i faaroo noa, ua ö roa atoà rä i roto i te parau, e ua amohia e te reira parau. No te mea rä aita to te taata e täamuraa päpü faahou i to na fenua i teie mahana, aita to na hiroà tumu e riro faahou ra ei uruaìraa no na, no te mea aita o ia e ìte ra i te faufaa ia haapäpü faahou e, o vai mau rä o ia, e no hea mai o ia, e aita atoà hoì o ia e te ìte ra i te faufaa i te ìteraa i te reira, riro atu ra te parau a te Atua Nui Tumu Tahi ei parau e tano i te tarià tamarii. Te fifi rahi roa atu rä o te Mäòhi, to na ia tiàturi òre ia na iho, to na färii òre i to na parau, mai te mea e, e parau to na no te tau tahito, eere i te tahi parau no teie tau, e no te mea i roto i to na manaò, eita te mea tahito e te mea âpï e tano ia tuuhia i roto i te àpu hoê, te färii hoê, te mea ia o ia iho i tatahi noa ai i to na parau ei Mäòhi. Te mea tahito, e mea pohe te reira, e aita e faufaa ia faaora faahou mai i te mea pohe. Oia ia. No te ätearaa te Mäòhi i te fenua, te mea ia o ia i fifi ai i te märamaramaraa i te haapiiraa a te fenua ia täpühia te tahi räau, e pohe ihoä paha te reira räau, e räau ê rä të tupu mai i te vähi i tupuhia e te räau mätamua, e na to na pera e faaora i teie räau âpï, no te mea eita te fenua e färii i te ano e te pohe. E au ra ia hiòhia e, ua mutu te here i roto i te Mäòhi e to na fenua, te here e riro noa ai te tahi ei pütarià e ei ôriò mata no te tahi. O te mea ia e haamanaòhia mai ra ia tätou i au te haapotoraa o na taiòraa e maha nei,

-Taramo 138, 7 Ia haere noa vau nä roto i te àti ra, e faaànaànaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù.

-Ìtaia 6, 5 Ua nä ô aè ra hoì au, Âuë hoì au nei e ua mämü iho nei au e taata vaha viivii hoì au,

-1 Torinetia 15, 2 e e ora ai hoì òutou, ia täpeà mäite ä òutou i ta ù i parau atu ia òutou na, ia òre rä ia riro to òutou faaroo ei faaroo faufaa òre.

-Ruta èv. 5, 8 E ia hiò iho ra Timona Pëtero i te reira, tïpapa iho ra o ia i raro i te pae turi o Ietu, i te nä-ô-raa atu e E haere ê òe, e te Fatu, e taata hara hoì au.

I to tätou faarooraa i te haapotoraa o na taiòraa e maha nei te hinaaro nei te taata ia ànaana i mua i te aro no te Atua, teie ia taò faaànaananaea e parau puai teie tei faaìte i te ànaana, te hinuhinu, ia hanahana te Atua, ta te rahu e faaìte noa ra i te mau taime atoà. Tei turämahia e te märamarama o te parau ia tupu te ora e tïtauhia ra, ia òhie tätou i te tomo i roto i te parau ta te tärià i faaroo e ta te mata i hiò. E tano ai tätou e parau e, vai noa mai ai te ora, aita te ùputa o te maitaì i piri te ora te maitaì mätamua ia e fänaòhia nei e te taata atoà, ta na te reira faufaa tumu. Ia au i teie parauraa a te Taramo, 7 Ia haere noa vau nä roto i te àti ra, e faaànaànaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù.

I roto i te rahi o te àti ta te taata e faaruru mämü noa nei, mea maitaì o ia e haamata i te tïtau ia hoì mai te faufaa o te ora, eiaha no na noa, no ta na atoà rä mau tamarii e tià mai i muri ia na. Ia òre te uì tama ia òvere i roto i ta na iho faufaa tumu, ia reo faahouhia i roto i to na vaha èi parauraa na na ànanahi. Ia ìte mai tätou, aita e taata e maitaì mai te peu aita e tiàturiraa e paèpaè ra i to na oraraa. Aita atu hoì mea e tià faahou mai ai te nünaa maoti rä, ia haapäpü faahou o ia i to na parau, ia haapäpü faahou i to na faaroo mäòhi mau, oia hoì ia haapäpü faahou o ia i to na tiàturiraa i to na fenua, to na reo, to na hiroà, ta na mäa, e ta na räau ei räpaau i to na mau maì. Mai teie ta Ìtaia e parau nei e, 5 Ua nä ô aè ra hoì au, Âuë hoì au nei e ua mämü iho nei au e taata vaha viivii hoì au, Te mea noa ia e tau faahou mai ai te hau i nià ia tätou, te mea noa ia e ìte faahou ai tätou i te hau i roto i to tätou tino. Te here rä hoì, eere ia mai te àihere ìno, e tupu hänoa, aita e àtuàturaa, aita e pïpïraa, na na noa e tupu, taime poto òe i te òreraa e haapaò atu, èrä ua àere. Eere roa atu te reira. E räau rä teie e hinaaro i te rima ia àtuàtu noa ia na, hinaaro atoà teie räau ia paraparau-noa-hia o ia, te mea noa te reira e maitaì ai to na tupu. E räau noànoà roa ia rave-maitaìhia, e poe nehenehe hoì i nià i te taata, ia rave maitaì òe, eita teie poe e mäemäe, eita e ôriorio noa aè. A faaroo mai na ra i teie reo no Pauro i to Torinetia, 2 e e ora ai hoì òutou, ia täpeà mäite ä òutou i ta ù i parau atu ia òutou na, ia òre rä ia riro to òutou faaroo ei faaroo faufaa òre.  No reira, mai te peu e hinaaro no te Atua te faaroo o te mau nünaa, e hinaaro atoà no te Atua te faaroo mau te hiòraa a te reira mau nünaa ia na. E aha ia te mea e haamiòmiò nei i to tätou âau, e aha tätou e òre e faatura ai i te hinaaro o te Atua, e aha te mea e onoöno noa ai tätou i te ôrure i te Hau o te Atua. Aita atu e tumu i horoà ai te Atua i te reo no te mau nünaa atoà maoti rä, ia òhie te nünaa tätaì tahi, i roto i to na iho hiroà, i te märamaramaraa, te färiiraa, e te auraroraa i te hinaaro o te Atua. Ia parau mai te Atua e, no ù te mau nünaa atoà, e aha ta tätou òhipa ia haere e hiò i te parau o terä nünaa e terä nünaa, i te nä ôraa e, eiaha e haamoè i terä, eiaha e tatahi i terä. Haamanaò na tätou i te òhipa i tupu i te mahana i tonohia mai ai te Värua Maitaì i nià i te mau pipi, ua parau te reira e te reira pipi i te reo ta te Värua i horoà ia na i te parau , ua taa mai te nünaa tätaì tahi i to na reo, e aita hoê taata i tià mai no te parau e, eiaha e ìnoìno mai e hömä, eiaha òutou e parau noa i to ù anaè reo, haamanaò e, te vai atoà ra i ô nei terä nünaa, terä nünaa, e terä nünaa. Aita atu mea faufaa roa no rätou i te reira taime maoti rä, te färiiraa i te parau ta te Värua o te Atua e parau atu ra ia rätou, te reira i roto i to na reo, te reira i roto i to na reo. Te ia ta Pëtero i ìte i te haapiiraa a Ietu i te hiti no te roto no Tenetareta ia au i te päpaìraa a Ruta èvaneria, E ia hiò iho ra Timona Pëtero i te reira, tïpapa iho ra o ia i raro i te pae turi o Ietu, i te nä-ô-raa atu e E haere ê òe, e te Fatu, e taata hara hoì au. Ua ànaanaea te haapiiraa i roto ia Pëtero, i tïpapa ai i mua i te aro o Ietu ma te fäì i ta na hara ta te  parau i turäma ia märamarama i te maitaì e te ora. Te ànaanaea, te huru ia o te taata e rave i ta na òhipa mä to na âau atoà, to na manaò, e to na püai. Aita rä e taata e tano e ànaana i te hinaaro o te Atua mai te peu aita o ia i ìte i te mea ta te Atua i hinaaro mai ia na ia rave, e mai te peu aita o ia i here i te Atua. Te here te mätamua i roto i te faatupuraa i te hinaaro o te Atua, ia òre, e rave noa te taata mai ta na e ànaana ra i te parau a te Atua. I roto i te ànaanaraa i te hinaaro o te Atua, ia ara atoà tätou, o te manaò tätou i to tätou au òre, to tätou tüàti òre i te tahi mau parau e, te tüàti òre atoà ia o te Atua, e te ìmiraa i te räveà ia òre te taata ia pee i te mea tei òre i au i to tätou manaò, te faatupu ra ia tätou i te hinaaro o te Atua. Te reira huru taata, no rätou te parau ta Ietu e faahiti ra ua parau atu ra o ia ia Timona Hö atu i te vähi moana, e tuu i ta òutou ùpeà i te hoê häroà, i roto i te raveà òre a te taata e raveà ta te Atua, ia ànaana ra i te hinaaro o te Atua Nui Tumu Tahi.

Teraì òr. Faatura.

Ruta Èv. 4, 21-30 Parau fäfau.

Tāpati 3 no Fëpuare 2019.

Parau fäfau.

ÔROÀ

Taramo 71

1 Te tiàturi nei au ia òe, e te Fatu, eiaha roa vau ia roohia e te haamä. 2 E faaora òe ia ù i te parau tià na òe ia ora, e färiu mai òe i to tarià, ia ora vau. 3 E pare àti òe no ù, ia horo tämau ä vau i reira. Ua faaue òe ia faaorahia vau O ta ù pare e ta ù haapüraa hoì òe 4 E faaora òe ia ù, e ta ù Atua, i te rima o te paieti òre, i te rima o te taata parau tià òre e te hämani ìno. 5 O òe hoì to ù manaòraa, e te ATUA, ta ù Fatu ia to ù päruru mai to ù âpïraa mai ä. 6 I mauhia na vau e òe mai te ôpü mai ä, e o òe tei rave mai ia ù mai roto mai i te ôpü o ta ù metua vahine ra e tämau ä vau i te haamaitaì ia òe. 7 Ua riro vau ei maereraa na te taata atoà; o ta ù haapüraa ètaèta rä òe. 8 Ia î hoì ta ù vaha i te haamaitaì ia òe E te faahanahana ia òe eiaha ia faaea. 9 Eiaha e täiva ia ù i te ruhiruhiäraa ra e ia paruparu vau ra, eiaha e faaruè ia ù. 10 Te parau nei hoì ta ù mau ènemi ia ù, e te feruri nei te feiä i tïtau mai ia ù ia pohe. 11 Te parau ra rätou Ua faaruèhia o ia e te Atua a aùaù, a rave, aore hoì e tià 12 E te Atua e, eiaha òe e faaätea ê atu ia ù, e ta ù Atua, ia peepee i te tauturu mai ia ù. 13 Te mau ènemi e tïtau mai i to ù nei pohe, ia haamä atu ia, Ia mäheahea, e ia vehihia i te haamä e te ìno, tei ìmi i to ù nei pohe 14 E tiàturi ä vau ia òe e òre e faaea, e haamaitaì ä vau ia òe nä nià iho e nä nià iho. 15 Na ta ù vaha e faaìte i te parau tià na òe, e te ora na òe, eiaha ia faaea, eita rä e tià ia ù ia taiò i te rahi. 16 E tämau ä vau i te haere i te ètaèta na te ATUA ra, o te Fatu, e faaìte au i ta òe ra parau tià, ta òe anaè ra. 17 Na òe, e ta ù Atua, i haapii mai ia ù mai to ù âpïraa mai ä, e ua faaìte au i ta òe ra mau òhipa ûmerehia e tae roa aè nei i teie nei. 18 Ia ruhiruhiä vau e ia hinahinahia ta ù upoo, e te Atua e, eiaha òe e faaruè mai ia ù; ia faaìte rä vau i to mana i teie nei uì, e to püai, i te taata atoà ia haere mai. 19 Ua teitei te parau tià na òe, e te Atua O tei rave i teie nei mau òhipa rahi O vai tei au ia òe, e te Atua. 20 I faaìte noa mai ä òe ia ù i te àti e rave rahi e te ahoaho, e faaanaanaea mai ä hoì òe ia ù, e ua faatià faahou mai ä òe mai raro roa i te fenua ra. 21 E riro òe i te faarahi mai ä i taua rahi no ù nei, e e haamähanahana mai ä òe ia ù e àti noa aè. 22 E haamaitaì ä vau i te parau mau na òe mä te näpara; e himene au ia òe, e ta ù Atua, mä te tïnura, e Tei Moà i Ìteraèra nei. 23 E òaòa ta ù vaha ia himene au ia òe ra, e ta ù värua i faaorahia e òe ra. 24 E parau ta ù vaha i te parau tià na òe e ruì noa atu e riro hoì i te haamä, e riro i te mäheahea, te feiä i ìmi i to ù nei pohe.

Ieremia 1, 4-19

Te tïtauraahia te perofeta, 4 I reira te parau a te Fatu i te taeraa mai ia ù nei, e te nä-ô-raa e, 5 Aita òe i hämanihia e au i roto i te ôpü o to metua vahine, i ìte ai au ia òe; e aita òe i fänau, i faataahia ai òe e au ei perofeta na te mau fenua. 6 Ua parau atu ra vau, âuë e te ATUA, e te Fatu e aore hoì au i ìte i te parau; e tämaïti ïti hoì au, 7 Ua parau mai ra te Fatu ia ù, Eiaha e parau, e tamaiti iti au o tei tonohia òe e au ra, o ta òe ia e haere; e o ta ù e faaue ia òe ra, o ta òe ia e parau, 8 Eiaha òe e mataù i to rätou mata ei pïhaì atoà iho hoì au ia òe ei faaora ia òe, te parau mai ra te Fatu. 9 Ua faatoro mai ra te Fatu i ta na rima, ua faatiàià mai ra i ta ù vaha; e ua nä ô mai ra te Fatu ia ù, Inaha, ua tuu vau i ta ù parau i roto i te vaha. 10 Inaha, ua parau haamana atu vau ia òe i teie nei mahana i nià i te mau fenua e te mau pätireia atoà ra, ia täìhitumu e ia huri i raro, ia haapau, e ia haamou roa atu; ia patu tià i nià e ia tanu. Mau ôrama mätämua e mau heheuraa 11 Ua tae mai ra te parau a te Fatu ia ù nei, nä ô mai ra E aha ta òe e hiò na, e Ieremia, ua parau atu ra vau, E päpua ïti tetati ta ù e hiò nei. 12 Ua parau mai ra te Fatu ia ù, ua tià ta òe e hiò ra e faatupu ètaèta hoì au i ta ù nei parau. 13 Ua tae faahou mai ra te parau a te Fatu ia ù nei, nä ô mai ra, E aha ta òe e hiò ra e Ieremia, ua parau atu ra vau, Te ìte nei au i te hoê päni e te au i te püpüraa atu; e ua faafäriu-ê-hia te àuvaha ia nä te pae i àpatoèrau i te püpü. 14 Ua parau mai ra te Fatu ia ù E riro na àpatoèrau atu te ìno i te püpüraa atu i nä nià i te taata atoà o te fenua na. 15 Inaha hoì, e tiàoro atu vau i te mau fëtii atoà no te mau pätireia atoà i te pae i àpatoèrau, te parau mai ra te Fatu. E haere anaè mai rätou, a haamau ai te taata atoà i to na teröno i te tomoraa i te mau ùputa i Ierutarëma, e i nià atoà i te mau patu e àti noa aè, e nià atoà i te mau ôire o Iüta. 16 Na ù e tuu atu i tä ù parau ia rätou, no ta rätou mau parau ìno ra; ua faaruè hoì rätou ia ù, e ua tütuì i te mea noànoà i te mau Atua èê, e ua haamori i te òhipa a to rätou rima i rave. 17 E tënä na, e tätià na òe i to tauupu, a tià, a parau atu òe ia rätou i ta ù e faaue atu ia òe na; eiaha òe e taiä i to rätou mata, o te vaiiho noa atu vau ia òe ia mäheahea ia rätou. 18 Inaha, ua faarirohia òe e au i naùanei mai te ôire faaètaètahia ra, mai te pou âuri, e mai te patu veo, i teie atoà nei fenua; e te mau arii atoà o Iüta, e te pupu arii atoà ra; e tö na atoà ra feiä tahuà, e te mau taata atoà o te fenua na 19 e tamaì mai hoì rätou ia òe, e òre ra e tupu; ei pïhaì atoà iho vau ia òe ei faaora ia òe  te parau mai ra te Fatu.   

1 Torinetia 12, 31

31 Te nounou na òutou i te mau toroà rahi ra. E faaìte atu rä vau ia òutou i te èà maitaì rahi roa ra.

13, 1-13

Te aroha

1 Parau noa ä vau i te mau parau atoà a te taata nei, e ta te mau merahi atoà ra, e aita o ù aroha, ua riro ia vau mai te veo ôoto ra, e mai te tümëparo mäniania ra. 2 Tei ia ù noa ä iho te tohu, e te ìte i te mau parau moè atoà ra, e te mau ìte atoà, e tei ia ù te mau faaroo täpaò atoà e tià ai ia hopoi ê atu i te mouà, e aore o ù aroha, aita roa a ù e faufaa. 3 E ia horoà noa ä vau i ta ù mau taoà atoà ei faaàmu i te taata rii, e ia tuu noa atu vau i ta ù tino ia tähuhia i te auahi, e aita o ù aroha, aita roa a ù e faufaa i reira. 4 E faaòromaìraa roa to te aroha, e te hämani maitaì; e òre te aroha e feìi; e òre te aroha e faarahi, e òre hoì e faaahaaha. 5 Eita e rave i te mea au òre, eita e ìmi i te maitaì no na iho, eita e riri vave, eita e manaò ìno ia vëtahi ê; 6 eita e òaòa i te parau tià òre, e òaòa rä i te parau mau; 7 e täpoì i te mau mea atoà ra, e faaroo i te mau mea atoà ra, e tiaì i te mau mea atoà ra, e haamahu i te mau mea atoà ra. 8 E òre roa te aroha e mou. Âreà te mau tohu ra, e mou ia; âreà te parau èê ra, e òre atoà ia âreà te ìte ra, e faaòrehia ia te reira. 9 Te ìte pae tahi nei tätou, e te tohu pae tahi nei. 10 Ia tae rä i te mea tià mau ra, ei reira te mea pae tahi noa ra faaòrehia ai. 11 I ta ù tamarii-rii-raa ra, mai ta te tamarii atoà ta ù parau, e mai to te tamarii to ù ìte, e mai to te tamarii hoì to ù manaò ia riro rä vau ei taata paari, tuu ê atu ra vau i te peu a te tamarii ra. 12 Teie nei hoì, te ìte ârehurehu nei tätou mai te mea e, i nä roto i te hiò; âreà i reira, e mata ia e e mata. I teie nei, te ìte pae tahi nei au; âreà i reira, e ìte päpü ia vau, mai ia ù atoà i ìte-päpü-hia nei. 13 E teie nei, te vai nei te faaroo, e te tiaì, e te aroha, e toru ra; o tei hau rä i taua toru nei, o te aroha ia.

Ruta èv 4, 21-30

21 Ua parau atu ra o ia ia rätou. Teie nei parau i päpaìhia ta òutou i faaroo iho nei, ua tupu ia i teie nei mahana. 22 Ua faatià anaè iho ra rätou atoà ia na, mäere iho ra i te mau parau maitataì rahi ta na i parau mai ra, ua parau iho ra rätou Eere änei teie i te tamaiti a Iotëfa ra. 23 Ua parau atu ra o ia ia rätou E riro òutou i te faaau mai ia ù i te maa parau ra e, E te tahuà ra, a faaora ia òe iho. Te òhipa ta òe i rave i Taperenaumi ra ta mätou i faaroo aè nei, e rave atoà i ô nei, i to òe nei fenua. 24 Ua nä ô atu ra hoì o ia Âmene, e parau atu vau ia òutou aita e perofeta i ìtehia mai i to na iho fenua mau. 25 E parau mau rä teie ta ù e parau atu ia òutou nei, e rave rahi te vahine ìvi i Ìteraèra i te ànotau ia Èria, a ôpanihia ai te raì ra, e e toru mätahiti e ono hoì märama àti paatoà aè ra taua fenua ra i te oè rahi. 26 Aore rä Èria i tonohia atu ia rätou atoà ra, maori rä i te hoê vahine ìvi i Tarepeta i Titona. 27 E rave rahi hoì te rëpera i Ìteraèra i te ànotau i te perofeta ra ia Èritaia, aita rä te hoê o rätou i faaorahia maori rä o Näamana i Turia ra. 28 Tei te faarooraa rätou i taua parau nei, riri roa aè ra to te tunato atoà, 29 ua tià aè ra rätou i nià, höpara atu ra ia na i räpae i taua ôire ra, arataì atu ra ia na i te hiti o te mouà i tiàhia i to rätou ôire ra, e faataa ia na i raro. 30 Haere ê atu ra rä o ia, nä rotopü noa atu ra ia rätou i te haere.

Manaò.

Te mea paha e haamanaòhia ra i roto na taiòraa e maha nei maoti ra te parau no te taata e te Atua Nui Tumu tahi, te Atua Nui Tumu tahi e te parau no te taata, aita atu e hinaaro tumu to te Atua te ìteraa te taata i to na  haafatata tämauraa i te mau tïtauraa no te maitaì e te hau. I te mea te tiàturi nei o ia  i te Atua, ia òre ia roohia e te haamä. No te taata i märamarama e i färii, te ìte ra tätou i ô nei i te maitaì o te haapiiraa a te Atua i te taata, i te arataìraa ia na i roto i te ìteraa i te mea maitaì. Aita tätou e haafaufaa òre nei i te itoito e te püai o te taata, ia tae rä te taata i te ìteraa e te färiiraa i te tauturu a te Atua ei tumu rahi no te mau maitaì ta na e fänaò noa nei, e ia faariro hoì i te reira ei taìara no na, aita atu mea e tupu mai i roto i to na âau maoti rä, te mauruüru e te mehara. E hinaaro no te Atua ia ìte te taata i te òaòa, te maitaì, e te hau aita o reira e hapa. Mea maitaì te taata ia ìte e, e tuhaa ta na i roto i te noaaraa ia na, aore ra te èreraa o ia i te mau maitaì ta na e hinaaro ra. Haamanaò atoà rä tätou e, te maitaì, eere ia i te parau no te taata hoê noa, e aita hoì te reira i täôtiàhia i nià i te rahi, aore ra te ïti te taoà i noaa i te tahi taata i te haaputu. Ia nä reira tätou i te hiò, e rahi aè ihoä ia te taoà e noaa i te taata püai e te tino päutuutu, i te taata paari, te paruparu, e te räveà òre. I te reira vähi, teie ta te reo e haapii mai nei  te taata tei hope to na ìte i to na reo i nià i te taò hoê, e veve rahi riàrià to te reira taata. No te mea, te maitaì, eita e vai noa i te vähi hoê, e tere rä te reira mea nä roto i teie taura e täamu ra i te taata. Nä ô ia tätou e, te maitaì ta òe e rave, e riro te reira i te parare atu ; te ìno hoì ta òe e rave, eiaha atoà òe e maere ia parare atu. Te nä ô ra te reo o te paari, e mea maitaì e te au i te taata nei ia àmu e ia inu, ia fänaò i te maitaì o ta na òhipa atoà i te ao nei, e ia hope roa o na puè mahana i horoàhia mai e te Atua  ta na ia tufaa. Te taata atoà hoì ta te Atua i horoà i te taoà, ua horoà atoà o ia i te rave i taua mea ra, ia rave o ia i ta na tufaa e ia òaòa i ta na ra òhipa.  i mua i te Atua, mea maitaì te taata ia òaòa i te maitaì o ta na òhipa eiaha o ia ia haapeàpeàhia i te fänaòraa i te reira. Eita te parau a te Atua e mäìti i te huru o te taata, no te mea te parau tià, e parau te reira no te taata ; no na i maitaì i ta na iho òhipa maitaì, e no na hoì tei òre ä ta na òhipa i haamaitaì i to na oraraa. I mua i te Atua, aita te tahi i hau i te tahi. No reira, eita e tià i te taata i maitaì i ta na iho òhipa maitaì ia taahi e ia nä nià mai i te hiò i te taata tei òre ä i maitaì mai ; eita atoà rä e tià i te taata tei òre i maitaì, ia ìmi i te räveà faaìno, aore ra te èiä i te mea e haamaitaì ra i te taata itoito. Ia nä reira o ia, te hapa ra o ia i mua i te Atua, no te mea te àmu ra o ia i te hou o te tahi, te ìmi ra i to na maitaì i nià i te rohirohi o te tahi. Mea taa maitaì hoì te parau ta te Atua e parau ra no te taata. Ia âpee tätou i te mau manaò o na taiòraa e maha nei, aita hoê mea e täôtià ra i te tiàmäraa o te taata i te raveraa i te mea ta na i hinaaro, aita atoà hoê haamataùraa o te faaühia i nià ia na te tahi faahaparaa no te tano òre te òhipa ta na i rave. Aita hoê parau mai te reira te huru. No te faaòhie ia tätou i te märamaramaraa i te hohonuraa o te mau manaò o na taiòraa e maha nei, ia ìte tätou, te maitaì o te tahi òhipa, aita to roto i te manaò e faanaho ra i te reira òhipa, oia hoì te ôpuaraa, tei roto rä i te mea ta te reira òhipa i faatupu i roto i te oraraa o te taata. Haamanaò tätou e, te tahi mea tià, te tahi ia mea tano, te âfaro, e te maitaì. Teie te haapotoraa o na taiòraa e maha nei.

-Taramo 71, 12 E te Atua e, eiaha òe e faaätea ê atu ia ù, e ta ù Atua, ia peepee i te tauturu mai ia ù.

-Ieremia 1, 5 Aita òe i hämanihia e au i roto i te ôpü o to metua vahine, i ìte ai au ia òe; e aita òe i fänau, i faataahia ai òe e au ei perofeta na te mau fenua.

-I Torinetia 13, 13 E teie nei, te vai nei te faaroo, e te tiaì, e te aroha, e toru ra; o tei hau rä i taua toru nei, o te aroha ia.

-Ruta Èv. 4, 30 Haere ê atu ra rä o ia, nä rotopü noa atu ra ia rätou i te haere.

Te tumu e mauhia ra e na taiòraa e maha nei teie ia te Parau Fäfau a te Atua, e aha te Parau Fäfau a te Atua to te taata ia ìteraa i ta na hopoià i roto i te ôpuaraa faaora a te Atua. I haere mai ai o Ietu, no taua òhipa ra o ta na ia i parau i roto i te Tunato no Nätareta teie nei parau i päpaìhia ta òutou i faaroo iho nei, ua tupu ia i teie nei mahana. Ua färiihia ma te mäere i te mau parau maitataì rahi ta na i faahiti, ua parau iho ra rätou Eere änei teie i te tamaiti a Iotëfa ra. Ua parau atu ra o Ietu ia rätou E riro òutou i te faaau mai ia ù i te maa parau ra e, E te tahuà ra, a faaora ia òe iho. E ua hinaaro to Nätareta ia faatupu o Ietu i te temeio mai ta na i rave i Taperenaumi ta rätou i faaroo. Te reo o Ietu ia rätou, Âmene, e parau atu vau ia òutou aita e perofeta i ìtehia mai i to na iho fenua mau, faahiti iho ra o Ietu e piti òhipa i tupu i te parauraa e, e rave rahi te vahine ìvi i Ìteraèra i te ànotau ia Èria, a ôpanihia ai te raì ra, e toru mätahiti e ono hoì märama àti paatoà aè ra taua fenua ra i te oè rahi.  Aore rä Èria i tonohia atu ia rätou atoà ra, maori rä i te hoê vahine ìvi i Tarepeta i Titona. E rave rahi hoì te rëpera i Ìteraèra i te ànotau i te perofeta ra ia Èritaia, aita rä te hoê o rätou i faaorahia maori rä o Näamana i Turia ra. Tei te faarooraa rätou i taua parau nei, riri roa aè ra to te tunato atoà, ua tià aè ra rätou i nià, höpara atu ra ia na i räpae i taua ôire ra, arataì atu ra ia na i te hiti o te mouà i tiàhia i to rätou ôire ra, e faataa ia na i raro. No te parau tià e te parau mau i âehuehu te fare pure ia Ietu i te mea te ìte nei o Ietu i roto i teie mau taata, aita te oraraa vaamataèinaa i faaâpïhia te mau òhipa i te tau no te Èria e no Èritaia te tupu noa ra    30 Haere ê atu ra rä o ia, nä rotopü noa atu ra ia rätou i te haere. Te òhipa e tupu ra, te haapäpü nei o Ietu i te mau parau fäfau a to na Metua i te taata. Teie haereraa no Ietu no te vaiiho ia i te täpaò aroha e te here i nià i te mau taata tei riri ia na i te mea O ia te tumu no te Hau. Teie haereraa no Ietu no te täpapa ia i te mau vahi i reira O ia e haapii faahou ai i te taata i te hinaaro o to na Metua, aore roa te hoê taata i faatoro noa atu i te rima i nià ia na, ua haere mai te hoê Tamarii tei ìte i vahi ta na e haere ra. E faaìte te haere te itoito e te puai o te âvae e taahihia ra i nià i te fenua tei faatoro i te èà.

Teraì òr. Faatura.