Māreto 10.2-16. Hii

 

Tāpati 3 no Âtopa 2021.

ÔROÀ

Hii

Taramo 128

1 Tire a te Moruta. E ao to te taata atoà i mataù i te Fatu, o tei haapaò i to na ra mau èà. 2 E àmu òe i ta to rima i òhipa ra. E ao to òe e e manuia ta òe 3 E riro to vahine mai te vine hotu i to òe ra pae fare; e to mau tamarii, mai te ohi ôrive ia, i te haaàtiraa i ta òe ra àmuraa. 4 Inaha, i nä-reira-hia to taua taata ra maitaì, to te taata i mataù i te Fatu ra. 5 Na te Fatu òe e haamaitaì, mai ô mai i Tiona ra. E ìte hoì òe i te maitaìraa o Ierutarëma, e hope noa atu to òe ra puè mahana, 6 e ìte òe i te tamarii a to mau tamarii ra. E te hau hoì i nià ia Ìteraèra.

Tenete 2.18-24

18 Ua parau iho ra te Atua ra o te Fatu: «eere ia i te mea maitaì ia pärahi noa Âtamu o ia anaè ra; e hämani au i te tahi tauturu au nä na ra». 19 Ua hämani hoì te Atua ra o te Fatu i te mau manu âvae maha atoà o te fenua nei, i te repo fenua; e ua arataì mai ia Âtamu ra, ia ìteä ta na iòa e maìri; e ta Âtamu iòa e maìri i taua mau mea ora atoà ra, ia riro te reira ei iòa mau. 20 I maìri noa ra Âtamu i te iòa no te mau puaa atoà, e to te mau manu atoà o te reva, e to te mau manu âvae maha o te fenua nei; aita roa rä o Âtamu e tauturu au i ìteä. 21 Haamaìri iho ra te Atua ra o te Fatu i te vareà taòto rahi i nià ia Âtamu; taòto iho ra o ia, ua rave iho ra o ia i te hoê àoào no na, täàti iho ra i te ìò i taua vähi ra; 22 e taua àoào o Âtamu ta te Atua ra ta te Fatu i rave ra, hämani iho ra o ia ei vahine; e ua ärataì mai ra o ia ia na ia Âtamu ra. 23 Ua nä ô iho ra Âtamu: I teie nei, e ivi teie no to ù nei ivi, e ìò hoì no to ù nei ìò: e parauhia o ia e e vahine, no te mea, no roto o ia i te taata i te noaa-raa-mai. 24 No reira e faaruè ai te taata i ta na metua täne e ta na metua vahine, e e riro hoì räua ei hoê.

Hēpera 2.9-11

9 Te ìte nei rä tätou ia Ietu, o tei faahaèhaahia i raro ïti aè i te mau merahi, ia pohe o ia ei ono i te taata atoà no te aroha mau o te Atua ra, i te faatoröna-raa-hia i te teitei e te tura, o ia i faaòromaì i taua pohe ra. 10 E mea au hoì ia na no na te mau mea atoà nei, e na na te mau mea atoà nei i hämani, i te arataìraa i te tamarii e rave rahi i te ao ra, ia faariro o ia i te tumu o to rätou ora ei Ora nehenehe mau i to na iho pohe. 11 O te Metia hoì o tei tämä mai, e te feiä i tämähia ra, hoê ä ia Metua; e òre ai o ia e haamä ai ia parau mai ia rätou e, e taeaè,

Māreto 10.2-16.

Te faataaraa

(Mät 19,1-12; Ruta èv 16,18)

1 Ua tià aè ra o ia i nià haere atu ra i te pae Iutea, i te hiti Iörïtäna ra. Ua taìruru faahou mai ra te taata ia na ra e ua haapii faahou atu ra o ia, ia rätou o ta na ia peu mau. 2 Ua haere mai ra te mau Färitea ia na ra, ua ui mai ra ia na: «E au änei i te ture ia haapae te täne i ta na vahine? Rämä mai ra ia na. 3 Ua parau atu ra o ia, ia rätou nä ô atu ra: «E aha ta Möte parau i tuu mai ia òutou i te reira? 4 Ua parau mai ra rätou: «Ua tià ia Möte ia päpaì mätou i te parau haapae, a tuu atu ai ia na. 5 Ua parau atu ra Ietu ia rätou, nä ô atu ra: «No te marü òre o to òutou âau i päpaì mai ai Möte i te reira parau. 6 Âreà i te mätamua ra, i te hämaniraa i te mau mea atoà nei, «i hämani iho ra te Atua i te taata i te täne hoê, e te vahine hoê». 7 E «faaruè ai te täne i ta na metua täne e ta na metua vahine, a àti atu ai i ta na vahine, 8 e e riro hoì räua ei hoê. «Eere atu ra räua i te toopiti, hoê rä. 9 E teie nei, ta te Atua i täàti ra, eiaha te taata e faataa ê atu. 10 Ua ui faahou mai ra ta na mau pipi ia na i roto ä i te fare i taua parau ra. 11 Ua parau atu ra o ia ia rätou: «O të haapae i ta na vahine a faaipoipo ai i te tahi, ua faaturi ia o ia ia na. 12 E ia haapae te vahine i ta na täne a faaipoipo ai i te tahi, ua faaturi atoà o ia.

Te mau tamarii rii

(Mät 19,13-15; Ruta èv 18,15-17)

13 Ua hopoi mai ra rätou i te tamarii rii ia na ra, ia faatiàià atu o ia ia rätou; ua àvau atu ra rä ta na mau pipi i te feiä i hopoi mai. 14 Ia ìte atu rä Ietu, ìnoìno atu ra, nä ô atu ra ia rätou: «A tuu mai i te tamarii rii ia haere noa mai ia ù nei, e eiaha e täpeàhia atu; mai ia rätou hoì to te Pätireia o te Atua ra. 15 Oia mau ta ù e parau atu ia òutou nei: o të òre e färii i te Pätireia o te Atua mai te tamaiti àruàru ra, e òre roa atu o ia e ö i reira. 16 Ua rave atu ra ia rätou, ua hii iho ra, ua tuu atu ra i ta na rima i nià iho ia rätou, e ua faaora atu ra o ia ia rätou.

Manaò.

Hou te Atua a hämani ai te taata, te vai ra ihoä te haapäpüraa e, ua ôpua te Atua i te taata. Ua tupu te tahi täuàparauraa i roto i te Nuu Atua, no te hiò e aha te faaotiraa e tano ia ravehia no te taata. I mua ra i te parau o te nätura, te mea o ta tätou e parau nei i teie mahana, e nätura, i mua ra e parauhia e aru, i mua i te parau o te aru, aita e faanahoraa i ravehia mai tera i ravehia no te taata. Oia hoi, aita e âpooraa i tupu, te uiuiraa i te manaò o te Nuu Atua e aha te òhipa e tano ia ravehia, faatupu anei i te raau, e aha te huru raau, faatupu anei i te tiare, e aha te huru o te tiare, e òhipa te reira ta te Atua Nui Tumu Tahi iho i faaoti. Parau te Atua -> ua tupu. Ua tupu -> e ua haamaitaì te Atua.

Ua haapäpü te Atua te maitaì e vai ra, ua haapäpü atoà ra te Atua e horoà te reira mea i te maitaì, e faaìte mai te reira mau mea atoà ta te Atua i faatupu, i te maitaì, oia hoì, te haamaitaìraa rätou i te Atua e te haamaitaì atoàraa i te taata.

Ia hiò anaehia te òhipa ta te Atua i rave, faatupu te Atua i te märamarama, ua faataa i te pape, taa atu te pape no nià i to raro, e i raro faataa faahou i te pape, taa atu ai te moana, ìtehia ae nei te repo maro, faatupu mai nei i te mau mea no roto i te repo maro, faataa atu ra i te päpe ora no raro i te tai, ua faanaho i te mau tiàrama, ua faanaho i te mau manu i roto i te reva, -> ua î. E ora to te mau vahi atoà, to nià, to raro, to raro i te tai, e ora. I reira noa to te Atua òpuaraa i te taata. Te nahonahoraa te mau mea atoà, i reira to te Atua hinaaroraa i te taata, i faaoti ai i te parau o te taata. E tano tätou e parau, te tumu i na muri ai te taata, no te mea ia, te faaineine ra te Atua i te maa na na, e ia nahonaho anaè, i reira ò Na e haapärahi mai ai te taata. E tano ihoä e na reira.

Te ìte atoà ra rä tatou i ô nei, i roto i te parau "e aru", ta te Atua faanahoraa. Ua faanaho, ua faaineine te Atua i te oraraa o te taata, e te hohoà atoà tera ta te Atua e horoà ra i te taata no te raveà e roaa ai ia na te ora. Ua faa î te Atua na mua i te fenua, e te ineine hoperaa te mau mea atoà, i reira noa to te Atua haaparahiraa i te taata, i reira noa to te Atua faaueraa i te taata, ia fänau faarahi, faa î. Tera te tereraa no ta te Atua huru faanahoraa, o ta Na i faaoti no te taata.

Ua hiò anaè ra tatou  i teie mahana, ua taui te taata, aita te taata e pee faahou i ta te Atua faanahoraa, ta Na arataìraa.  Ua faataa ê te taata, te vai ra ihoä te mau taata i faataahia no te tanu, te vai ra te taata i faataahia no te àmu. E te feiä aita e àmu ra, te feia aita e faaàpu ra, aita i moèhia ia rätou te fänau. Haere noa te fänau i tona haereraa, haapaò noa te tanu i tona haereraa. Te mea e ìtehia, mea puai ae te taata i te fänau, e ïti aè te tanu. No reira, e rahi aè ihoä ia te hape o te taata. Ahiri te taata i haapaò ta te Atua faanahoraa, ua faaineine te Atua i te oraraa o te taata, te riro ra te fenua ei haapiiraa i te taata, e naò òe, no te mea e ôpuaraa na te Atua, e faanahoraa na te Atua, i ô e ia Na ô òe e roaa ai te ora. No te taata hape, teie ta tätou e parau nei, te vai ra te tino, te vai ra te värua, e au e, ua haere àpaapa noa te taata, areà te ôpuaraa a te Atua, hoê ia. Tanu ; ia î anaè, fänau rahi. Mai te peu, hinaaro tätou i te ìte faahou te maitaì e te hau ta te Atua i ôpua no te taata, -> ia hoì faahou tätou i nià i tera faanahoraa, i nià i tera ärataìraa ta te Atua i faanaho mai no te taata. Tamata na ra tätou i te hiò i roto i na ìrava e maha mai roto mai i na taiòraa e maha, tei faanahohia no teie mahana teie te haapotoraa.

-Taramo 128, 3 E riro to vahine mai te vine hotu i to òe ra pae fare; e to mau tamarii, mai te ohi ôrive ia, i te haaàtiraa i ta òe ra àmuraa.

-Tenete 2, 23 Ua nä ô iho ra Âtamu: I teie nei, e ivi teie no to ù nei ivi, e ìò hoì no to ù nei ìò: e parauhia o ia e e vahine, no te mea, no roto o ia i te taata i te noaa-raa-mai.

-Hepera 2, 11 O te Metia hoì o tei tämä mai, e te feiä i tämähia ra, hoê ä ia Metua; e òre ai o ia e haamä ai ia parau mai ia rätou e, e taeaè, e tuahine.

Märeto 10, 16 Ua rave atu ra ia rätou, ua hii iho ra, ua tuu atu ra i ta na rima i nià iho ia rätou, e ua faaora atu ra o ia ia rätou.

Te turäma nei teie mau ìrava i te maitaì o te Atua Nui Tumu Tahi i te taata, te tane e te vahine, i te mea tei nià te Värua o te Atua i te taata, e taua Värua ra o te fenua ia tei hii ia na i nià i te ôuma o te Atua. Te mea e täamu ra na parau e maha nei te taò no te Hii, e aha te Hii, te mauraa ia o tei poiherehia e tätou i nià i to tätou ôuma, àreà te poihere te faatupuraa ia i te here i te mau vahi atoà ia ìtehia te hau. I roto i te aru te ô a te Atua tänuraa i to na aroha e to na here, èi faaìteraa ua poihia e te Atua te taata i nià i te tumu no te ora, te ô ra te vahi ta Na iho i poihere, e aore ra ta Na i hii.

Ia hiò tätou i to tätou mau metua paari, tera te haapiiraa ta rätou e horoà ra i te tamarii, e te tamarii, te feia âpï, eita e horo òiòi noa e faaea i te vahine, e hiòhia te paari o te tahi taureàreà i nià i ta na faaàpu. Te auraa ; e ora te taata ia na, taata itoito, e ànaanatae atoà mai te vahine ia faaea. I teie mahana, aita, haapaò faaea noa, i muri e hiò atu ai, e haere ra i o vai, to ù na metua ra, aore ra, i to òe na metua ra. Ia òre anaè ra, e ìmi i te ora. I roto i te òpuaraa, tei riro te nätura ei faahohoàraa, oia hoì, te aru, ei faahohoàraa, faanaho te Atua, ua faanaho te Atua i te oraraa o te taata, ua faaineine te Atua i te oraraa o te taata.

- Te vahi e ora ai te taata, i roto i ta te Atua ôpuaraa, tei roto i te aru, tei ô te oraraa o te taata.

- To tatou àti, te haere ra tätou e ìmi i te ora i te tahi vahi ê atu o ta tätou i manaò e, penei aè tei ô te ora.

To tatou ia àti i teie mahana, no te mea, ua faaruè tatou i te mau faanahoraa o te fenua i roto i te ra manaò e. Ua hau aè i te ìmi i te ora i te hoê vahi tei òre i naeàhia e ana i te faatupu a topa atu ai i roto i te ahoaho e te peàpeà. Ua ère tätou i te ora, inaha hoi, te ora, i roto i te parau no te nätura, te parau no te aru, haamanaò faahou mai ra te Atua, ta na faanahoraa o ta na i ôpua no te taata tei hinaaro i te ora, ua hoì faahou ia i te vahi i reira to te Atua faaineineraa mai te ora no te taata.

E ua hiò anaè tätou i teie parau mai teie te huru, e haamanaò tätou i teie òhipa ta Ietu i rave i nià i te mau tamarii rii, 16 Ua rave atu ra ia rätou, ua hii iho ra, ua tuu atu ra i ta na rima i nià iho ia rätou, e ua faaora atu ra o ia ia rätou. No reira, te haapiiraa e vai ra i roto i teie ôpuaraa ta te taata i òre i märamarama, ta te Tamaiti ia i haere mai e haamanaò faahou, e ta te taata e onoöno nei ä i te haapöiri noa ia na iho, te ôpuaraa a te Atua, te hinaaroraa ia ìte te taata, e tei ô tona ora. No reira, tei tiàturi i te Atua, ua farii ia i te hoì i te vahi tei reira to te Atua faaineineraa i to na ora, tona maitai, e to na hau. Ua hii o Ietu i teie mau tamarii àruàru i nià i to na ôuma no te faaìte i to na peàpeà i te huru o ta na mau pipi tei òre i ìte i roto i teie tamarii te ànanahi o te hoê nünaa. E te huru o te mau Faritea i nià i te ture no te vahine e te tane ia faaroo tätou i te reo o Ietu i te parauraa no te tane e te vahine 11 Ua parau atu ra o ia ia rätou: «O të haapae i ta na vahine a faaipoipo ai i te tahi, ua faaturi ia o ia ia na. 12 E ia haapae te vahine i ta na täne a faaipoipo ai i te tahi, ua faaturi atoà o ia.

Te auraa no teie reo no Ietu te faaìteraa ia tätou e tei äni i te Atua ia haere mai i roto i te oraraa o te tane e te vahine te haapäpü noa mai ra te reira ta te Atua i täati ra eiaha te taata e faataaê. I mua i teie mau parau ta Ietu e faahiti ra te faaìte noa mai ra te reira ia tätou te puai o to na Aroha e to na Here i te taata nei.

Te vai atu ra änei te tahi vähi e märamarama ai tätou i te ôpuaraa a te Atua. I roto i te rahi, te hanahana, e te mana o te Atua, aita atu mea ta na i faatupu mai maoti rä, te mau mea e faaî nei i te fenua, te tai, e te raì, e ua haapäpü mai te Atua e, mea maitaì roa. Mai te peu rä terä ta te Atua i faaìte mai, no te mea ia aita atu vähi tätou färerei ai i te Atua maoti rä, i te vähi no reira to na raveraa mai ia tätou, oia te vähi i taata ai te taata, te vähi hoì e ìte ai o ia i te auraa e te tupuraa o teie parau ta te Atua e, ua hämani o ia i te taata ia au i to na huru e to na hohoà. I hiihia ai tätou e te fenua.

 

Teraì òr. Faatura.

 

Māreto 9.38-48 Päpe

 

Tāpati 26 no Tetepa 2021

Päpe

Taramo 19

Ôrero

1 Na te Mënätehe. Taramo na Tävita. 2 Te parau hua nei te mau raì i te hanahana o te Atua. E te faaìte nei te reva i te òhipa a ta na rima. 3 Te haapii nei te tahi ao i te tahi i te parau, e te faaìte nei te tahi ruì i te tahi i te ìte. 4 Aore e ôrero, aore e parau, aore to rätou reo i ìteä. 5 Ua tae rä to rätou haruru i te mau fenua atoà, e ta rätou faaìteraa i te ôtià o teie nei ao. Ua faatià o ia i to te mahana tiàhapa i roto ia rätou, 6 o tei haere mai mai te täne âpï ra mai roto mai i to na ra piha, e mai te taata püai e òaòa ra ia horo i to na hororaa. 7 Mai te tahi pae raì to na haereà mai, e tae noa atu ra i te tahi pae i to na pouraa i raro, e aore roa te hoê mea i ère i to na mähanahana.8 Oia atoà te ture a te Fatu aita e hapa, i te haafäriuraa i te värua. Te faaìte a te Fatu e mea mau ia, e paari ai te âau o te maùa. 9 Te haapaòraa a te Fatu e mea tià ia, e òaòa ai te âau. Te aò a te Fatu e mea märamarama ia, e märamarama ai te mata nei. 10 Te mataù i te Fatu e mea viivii òre ia, e tià ia i te vai-mäite-raa. Te faaauraa a te Fatu e parau mau ia, e te mea tià anaè. 11 E taoà hinaaro-rahi-hia ia i to te àuro,  i te àuro rahi ra e te maitataì. E momona rahi ia i to te meri i te topataraa no roto i te meriterio. 12 Na te reira hoì i haapii mai i to tävini, e tei te haapaò i te reira te utuà rahi. 13 O vai hoì tei ìte i ta na iho ra mau hara?  E tämä mai òe ia ù i ta ù mau hara ìteä-òre-hia nei. 14 E täpeà mai òe i to tävini i te hara ìimi, eiaha roa te reira ia faahepo mai ia ù, ei reira vau e maitaì ai, aore aè ra te hara rahi. 15 E tiàhia mai te parau a ta ù vaha i reira, e te manaò o ta ù âau, i mua i to aro, e te Fatu, e ta ù haapüraa e ta ù ora.

Nūmera 11.25-29

Hara

25 mata na rä te tahuà i te rave i te tütia pohe hae i roto i te rima o taua vahine ra, a ueue ai i taua tütia ra i mua i te aro o te Fatu, a hopoi ai i nià i te fata ra. 26 E rave hoì te tahuà i te hoê vähi i taua tütia ra ia î ta na rima, ei manaòraa, a tütuì ai i te auahi i nià i te fata ra, a faaïnu ai i taua vahine ra i taua pape ra. 27 E ua faaïnu anaè o ia ia na i taua pape ra, ua hara mau o ia ra, ua hämani ìno o ia i ta na täne ra, e riro taua pape faaìno i ö i roto ia na ra i te maramara, e höpue hoì ta nä ôpü, e ririò hoì ta na hümaha, e e riro taua vahine ra ei faaìnoraa i roto i to na iho ra nünaa. 28 Ia òre rä taua vahine ra ia harahia, te vai hara òre noa ra, e òre o ia e ìno i reira, e tämariihia rä tä na. 29 O te ture teie no te hae, ia täiva te vahine i ta na täne ra, e harahia iho ra;

Iatöpo 5.1-6

Ôoti

1 E tënä na, e te feiä taoà rarahi na, a òto, a auë, i to òutou mau pohe rarahi e fätata mai ia òutou na. 2 Ua tähuti ta òutou taoà rahi, e ua pau to òutou àhu i te manu. 3 Ua pë ta òutou àuro, e te ârio; e riro taua pë ra ei faahapa ia òutou, e pau to òutou tino i te reira mai te pau auahi ra. Ua haaputu òutou i te taoà rahi i te mau mahana hopeà nei. 4 Inaha hoì te utuà a te feiä rave òhipa, o tei ôoti i te mau âua na òutou, e tei täpeà-ìno-hia e òutou na, te pii ra ia i te Atua ia òutou; e te faateni a te feiä ôoti ra, ua puta roa ia i roto i te tarià o te Fatu manahope ra. 5 Ua pärahi òutou i te ao nei mä te navenave e te taiàta; ua haapori òutou ia òutou iho, mai tei te mahana täparahiraa puaa ra. 6 Ua faahapa òutou, e ua täparahi pohe roa òutou i te taata parau tià ra, e aore o ia i tähoo mai ia òutou.

Māreto 9.38-48

Pape

Eere no ô mai, no tätou 

(Ruta èv 9,49-50)

38 Ua parau mai ra Ioane ia na, nä ô mai ra: «E Rapi, i hiò atu ra mätou i te hoê i te tätaì i te tëmoni i to òe iòa tei òre i pee mai ia tätou; e ua parau atu ra mätou ia na eiaha, no te mea aore o ia i pee mai ia tätou. 39 Ua parau atu ra Ietu: «Eiaha te reira e faaòrehia atu; aore roa hoì e taata e rave i te temeio i to ù nei iòa e faaìno vave mai ia ù. 40 Eere o ia i to ô mai ra, no tätou ia. 41 O të horoà noa mai hoì i te hoê âuà päpe na òutou no to ù nei iòa, no te mea no te Metia òutou, oia mau ta ù e parau atu ia òutou na, e òre roa o ia e ère i ta na utuà.

Te teimaha o te hara

(Mät 18,6-9; Ruta èv 17,1-2)

42«Âreà te faaturori i te hoê i teie nei mau taata rii i faaroo mai ia ù nei, e huru maitaì aè o ia ia täamuhia te hoê ôfaì rahi mure i nià i ta na àî e ia täorahia o ia i raro i te tai. 43 E te hapa ra òe i to rima, e täpü ê atu; e maitaì hoì òe i te rima hoê ia tae i te ao ra, i te rima piti ia tae i te pö i roto i te auahi pohe òre ra; 44 te vähi «e òre e pohe to rätou tuà, e to rätou auahi e òre e tinaihia». 45 E te hapa ra òe i to âvae, e täpü ê atu; e maitaì hoì òe ia tae piriòì i te ao, i te âvae piti ia hurihia i te pö, i roto i te auahi pohe òre ra; 46 te vähi «e òre e pohe to rätou tuà, e to rätou auahi e òre e tinaihia». 47 E te hapa ra òe i to mata, e ôhiti ê atu, e maitaì hoì òe ia tae mata hoê i te Pätireia o te Atua, i te mata piti ia hurihia i te auahi i te pö; 48 te vähi «e òre e pohe to rätou tuà, e to rätou auahi e òre e tinaihia».

Manaò.

Te maì viivii e àtutu noa nei i roto ia Mäòhi Nui ua faatiàrepu i te âau o te nünaa, e te mau täatiraa o te fenua i mua i te hoê ture te tià e haamämü i to tätou nünaa, e ua tae roa i te faaäpiäpiraa i te mau taata toroà e hinaaro nei e tauturu i te mau faatere o te oire ia òre ia î te vahi i reira to tätou nünaa e rapaauhia ai. Te hoê òhipa i ravehia e te hoê tià no te faatereraa òire, e te hoê täote no te fenua nei, ua faataupüpühia te reira teie mau faanahoraa e te taata e mau ra i te ture färani i roto i to tätou fenua, teihea te hapa ia rave te tävana no Paea no te faanaho te fare òire no te räpaau i te taata, teihea te hapa a te täote Théron no te räpaauraa i teie mau taata maì, te vai ra anei te ture e faahapa ra i te tauturu ia tupu te ora, hau roa atu ai te reira ua haere mai te mau tuäti maì e horoà i to rätou taime, ma te taime hoo òre. O te reira anei te tumu o teie faahuehueraa a teie taata e mau ra i te ture färani i roto i to tätou fenua, ua ère anei tätou i te marämarama i teie mahana, e aore ra ua rupehuhia to tätou âau i te teòteò faufaa òre. Tei î nei i te mau parau haavare i roto i te âau o te taata, no te faatioi te fëruriraa o te nünaa, i nià i te parauraa e, èita tätou e ora ia tätou iho, no te haamämü i te reo Mäòhi i te mea ua tupu te ôfï e faatäviriviri ra te ôpu o te nünaa, teie tätou e parau nei e pohe hae oia hoì e òre e tiàfaahou i te horomii i te parau mau ua apiapi roa i te haavare. A tamata na ra tätou i te ìmi i te tahi raveà i roto i na taiòraa e maha no teie mahana tei haapotohia no tätou :  

-Taramo 19, 4 Aore e ôrero, aore e parau, aore to rätou reo i ìteä.

-Numera 11, 28 Ia òre rä taua vahine ra ia harahia, te vai hara òre noa ra, e òre o ia e ìno i reira, e tämariihia rä tä na.

-Iatöpo 5, 4 Inaha hoì te utuà a te feiä rave òhipa, o tei ôoti i te mau âua na òutou, e tei täpeà-ìno-hia e òutou na, te pii ra ia i te Atua ia òutou; e te faateni a te feiä ôoti ra, ua puta roa ia i roto i te tarià o te Fatu manahope ra.

-Märeto 9, 41 O të horoà noa mai hoì i te hoê âuà pape na òutou no to ù nei iòa, no te mea no te Metia òutou, oia mau ta ù e parau atu ia òutou na, e òre roa o ia e ère i ta na utuà.

Teie te parau e parauhia nei i roto Nūmera pene 11 i te mau ìrava 25 e faaea i te ìrava 29 te parau ia no te tütia pohe hae i roto i te rima o te vahine, e ueue te tahuà i nià i te tütia i mua i te aro o te Atua Nui Tumu Tahi, a hopoi ai i nià i te fata ra. E rave te tahuà i te hoê vähi i taua tütia ra ia î ta na rima, ei manaòraa, a tütuì ai i te auahi i nià i te fata ra, a faaïnu ai i taua vahine ra i taua päpe ra. E ua faaïnu anaè o ia i taua pape ra, mai te mea ua  hämani ìno o ia i ta na täne, e riro taua päpe e faaìno i roto ia na ra i te maramara, e höpue hoì ta nä ôpü, e ririò hoì ta na hümaha, ei riro taua vahine ra ei faaìnoraa i roto i to na iho ra nünaa. 28 Ia òre rä taua vahine ra ia harahia, te vai hara òre noa ra, e òre o ia e ìno i reira, e tämariihia rä tä na. O te ture teie no te hae, ia täiva te vahine i ta na täne ra, e harahia iho ra, no tätou atoà teie parau e te mau tane. Teie ia ture i papaìhia no te pätia ärai no te hae o te âau o te mau faatere ia riro èi faaheporaa tei òre roa i färiihia e te mau täatiraa o te fenua nei. Ia ära ra ia tätou ia òre tätou ia topa i roto i te ôrure hau, pärahi noa ra tätou i roto i te hau, to tätou te reira hiroà, e te iho tumu Mäòhi mau. Hoê âua vai mäòhi, hoê täpu taro, maniota, tärua, ua tähorohia te hae o te âau, no te haapärahi i roto i te hau.

Eiaha roa to tätou fenua ia riro ei vahi i reira te mau faatere fenua e faatïtï ai ia tätou na roto i te hämaniraa i te mau ture tei haafaufaa òre i to tätou tiàmaraa. No te mea te tiàmaraa o te Atua Nui Tumu Tahi, ia faahaùti  te mau faatere mäìtihia i teie tumu o te Värua o te fenua tera e haapitaataahia  ra i reira e àueue ai te fenua, ia àueue te fenua ra e huehue te nünaa. No te aha, no te mea te haamataùhia nei, te haamehamehahia nei, te faariàriàhia nei te oraraa vaamateìnaa o Mäòhi Nui. Ia faaroo tätou i te mau manaò o Iatöpo i te 5 i te mau ìrava 1 e tae i t e ìrava 6 te parau no te Ôoti Te naò nei teie mau parau, E tënä na, e te feiä taoà rarahi na, a òto, a auë, i to òutou mau pohe rarahi e fätata mai ia òutou na. Ua tähuti ta òutou taoà rahi, e ua pau to òutou àhu i te manu. 3 Ua pë ta òutou àuro, e te ârio; e riro taua pë ra ei faahapa ia òutou, e pau to òutou tino i te reira mai te pau auahi ra. Ua haaputu òutou i te taoà rahi i te mau mahana hopeà nei. 4 Inaha hoì te utuà a te feiä rave òhipa, o tei ôoti i te mau âua na òutou, e tei täpeà-ìno-hia e òutou na, te pii ra ia i te Atua ia òutou; e te faateni a te feiä ôoti ra, ua puta roa ia i roto i te tarià o te Fatu manahope ra. 5 Ua pärahi òutou i te ao nei mä te navenave e te taiàta; ua haapori òutou ia òutou iho, mai tei te mahana täparahiraa puaa ra. Ua faahapa òutou, e ua täparahi pohe roa òutou i te taata parau tià ra, e aore o ia i tähoo mai ia òutou. I mua i teie mau parau èita i te faahaparaa i te feiä taoà te faaärahia nei i teie huru oraraa e òre e au i te Atua Nui Tumu Tahi, o te mea faufaa teie i mua i te ôpuaraa faaora a te Atua Metua.

 

 

E no te mea, e fenua  te taata, e päpe te taata teie na faufaa e òre roa e tià ia faa-ê-hia  i te hinaaro o Atua. Te ìte ra ia tätou e, eita te parau o te taata e tano ia faataa-ê-hia i to te päpe.

Te vähi mätamua ia  ta te Värua o te Atua i horoà i te ora, o te päpe ia. Te faufaa hau ê o te päpe, te mea ia e, o te ìte mätamua te reira o te Atua, e ua riro hoì te haùtiraa o te päpe ta te Värua o te Atua i faaàrepurepu ei faaìteraa i te ora o te Atua no na i haùtiùti ai te mau mea atoà, ei faaìteraa i te ora i noaa ia rätou mai roto mai i te Atua. No te mea te päpe te ìte mätamua o te Atua ora, i horoà atoà ai te päpe i te ora i te mau mea atoà ta te Atua i rahu, te mea atoà rä te reira i rave ai te Atua i te päpe ei täpaò no ta na ôpuaraa faaora. No to na tiàraa ìte e te faaìte, e tano ai te päpe ia parauhia e, e tävini no te Atua. Eiaha tätou e huru ê i teie huru faahitiraa manaò, ua mätau noa tätou ia faahitihia teie taò no te taata anaè tei ö i roto i te òhipa, e tei haapaò i te faaueraa a te taata na na te òhipa ta na e rave ra. E tano rä tätou e parau e, eere no te raveraa noa te tahi taata i te òhipa a te tahi atu taata, i riro ai o ia ei tävini no taua taata ra. O Ta Ietu ia e parau nei i ta na mau pipi  41 O të horoà noa mai hoì i te hoê âuà pape na òutou no to ù nei iòa, no te mea no te Metia òutou, oia mau ta ù e parau atu ia òutou na, e òre roa o ia e ère i ta na utuà. Ua na reira anaè tätou e òre e tupu i te mau parau ta Ietu i faahiti i te pae hopeà no te taiòraa i te Parau Maitaì no teie mahana,

1-Te tuu nei o Ietu i ta na mau pipi i mua i te hoê täpura òhipa rahi no te ômuaraa i te hoê oraraa âpï no te nunaa o te Atua. Ia riro te taatoàraa ei ìte, ei faaìteraa eiaha ra ia riro ei faaòreraa ei tätaìraa, ei faaturoriraa, ia riro ra ei taeaè no te taata rii, ei tuahine no te taata rii, no te färii o tei horoà i te iòa o te Metia.

2-Tei òre i haapaò ra e topahia ia i te mau parau teimaha o ta Ietu e faahiti nei, no te ôfaì mure, te tapu-ê- raa i te vahi hapa, no te öraa i roto i te patireia o te Atua. E aha te auraa teie manaò to Ietu ? E aha ta na e hinaaro nei e faaära ? E no te aha ?  No te mea ia, ia haapaò te taata tätaì tahi, i ta na hapa, e ia ìte nahea i te fäìraa i mua i te Atua, oia hoì, e nahea i te faaìteraa i mua i te Atua, o ta Ietu ia e tïtau nei ia ìte te mau pipi i te fäì i ta rätou mau hara, e òre hoì e roaa te hara i roto i te ìteraa atu i te hoê te faatià ra i te hinaaro o te Atua i te Iòa o te Metia. E noaa mai ra te haamaitaì i te Atua e te faateni ta na òhipa i roto i te mau taata tei fäì i te iòa o te Atua.

3-Tei fäì ua ìte ia i te tämaraa hara a te Atua na roto i te ahi o te Varua Moà. Ua rapaauhia ia i te miti a te Atua àraaraa noa ai te fäìraa faaroo tei horoà i te hau i roto i te taata.

Teie haapaparaa parau, no roto mai teie âpooraa ta Ietu e ta na mau pipi, o ta te Varua Moà e hinaaro nei e faaära ia tätou to te Ètärëtia. Ta te Varua ia o te Atua e pii faahou nei ia tätou e te mau maru metia ia vai ineine noa i te taime manaò-òre-hia, ua ineine ia tätou i roto i ta tätou fäìraa hara. I faahiti ai o Ietu i roto i ta tätou parau no teie mahana, te hapa o te mata, te rima, te àvae, te tuà tei òre e pau i te ahi, e te ahi no te pohe mure òre tei òre e tinaihia. E nahea  ra te tinairaa teie mau hapa riàrià mau, na roto ia i te fäìraa hara, oia mau te fäìraa hara o te faaìteraa te taata ta tätaì tahi i ta na iho hapa i mua i te Atua, ma te tiàturi päpu i ta te Atua faaòreraa hara, to na mata ei hiòraa ia na roto i te aroha, to na rima e faatupuraa ia i te hau, e to na àvae e haereraa ia no te faatupu i te färereiraa i te mau taeaè, mau tuahine rii ia raa te iòa o te Metia. Eiaha ra e ôhiti, e tapu i te vahi hapa ia äraïhia ra  te mau vahi e na reira te hapa e tupu ai.

Te täatoàraa o te î o te fenua, te päpe, te moana nui a hiva  teie e haamaitaì nei i te Atua, eiaha ia tätou e maere ia âmui Ietu i to na reo haamaitaì i to te mau mea ta te Atua i rahu, ia hanahana te iòa o to na Metua. Mai te pape, te fenua, te moana nui a hiva i tähoêhia i roto i te ôpuaraa faaora a te Metua e ta te Tamaiti, e no te mea hoì e, e fenua atoà te taata, te ìte ra ia tätou i te hinaaro o te Tamaiti ia fänau-faahou-hia te taata, oia hoì ia tomo faahou o ia i roto i te päpe, ia hoê hoì i te päpe, ei räveà e riro atoà ai o ia ei tävini no te Atua i te âmui-atoà-raa i to na reo haamaitaì i to te mau mea atoà ta te Atua i rahu ei hanahana no to na iòa moà, mai teie nei e a muri noa atu.

 

Teraì òr. Faatura.

 

 

 

Māreto 9.30-37 Pärahi.

 

Tāpati 19 no Tetepa 2021.

Pärahi.

Taramo 54

Färiu

1 Na te Mënätehe nä nià i te Netinota. Matetira. Taramo na Tävita. 2 I te haereraa atu to Tifa ra ia Taura, i te nä-ô-raa atu e: «Eere änei o Tävita tei faatäpuni ia na iho io mätou ra?» 3 E faaora mai òe ia ù, e te Atua, i to òe ra iòa, e faatià mai hoì òe ia ù i to òe ra püai. 4 E te Atua e, e faaroo mai i ta ù pure, e färiu mai to tarià i te parau a to ù nei vaha. 5 Ua tià mai hoì te mau taata èê e rave ia ù, e te tïtau mai ra te feiä hämani ìno ra ia ù ia pohe. Aore rätou i tuu i te Atua i mua ia rätou. Tera. 6 Inaha, o te Atua të tauturu mai ia ù, tei rotopü hoì te Fatu i te feiä atoà tei faatià mai ia ù. 7 E faahoì mai i to rätou ìno i nià i ta ù mau ènemi. E ia täpü-ê-hia rätou e òe, i ta òe ra parau mau. 8 E hopoi noa vau i te tütia ia òe, e haamaitaì ä vau i to òe ra iòa, e te Fatu, e maitaì hoì te reira. 9 ua faaorahia rä vau e ana i te mau àti atoà nei, e ua hiò vau i te poheraa o to ù nei mau ènemi.

Ieremia 11.18-20

Faaìte-hua-hia

18 Ua faaìte mai ra te Fatu ia ù, e ìte aè ra vau; ua faaìte mai òe ia ù i ta rätou räveà. 19 Mai te pinia mämoe rata ra vau ia ärataìhia e täparahi; aore hoì i ìte e, ua ôpua rätou e rave ia ù, i te nä-ô-raa e, e tapu tätou i te räau mä te mäa atoà i nià iho; e faataa ê atu tätou ia na i te fenua o te taata ora nei ia òre ia manaò-faahou-hia atu to na iòa. 20 O òe rä, e te Fatu manahope ra, to òe te manaò tià ra, o tei hiòpoà hua i te manaò e te âau ra, e faaìte mai òe ia ù i to riri ia rätou; ua faaìte-hua-hia e au ta ù parau ia òe ra.  

Iatöpo 3.16-18

Ua î

16 Te vai ra hoì te feìi e te märô, tei reira atoà te ârepurepu, e te mau parau ìino atoà ra. 17 Âreà te paari no nià mai ra, e mea ânoì-òre-hia ia, e te mämahu, e te marü, e te faaroo ôhie, ua î i te aroha e te hämani maitaì, e òre e faahuru ê i te taata, e òre hoì e haavare. 18 E ueuehia te parau tià mä te hau e te feiä e faatupu i te parau hau ra.

4.1-3

Te here

1 No hea te tamaì e te märô i roto ia òutou na? Eere änei no ô na no to òutou hinaaro tià òre ra, o tei tamaì noa i roto i to òutou tino na? 2 Te nounou na òutou, e aore ä i noaa; te täparahi na òutou i te taata, e te tïtau hua na, e aita i noaa ta òutou e tïtau na; te tamaì na, te àro na, e aita, no te mea aore òutou i ani. 3 Te ani ra hoì òutou, e aore a òutou i noaa, no te mea te hapa na ta òutou aniraa, ia pau i te pühurahia e òutou i to òutou hinaaro tià òre ra.

Māreto 9.30-37

Mua, Hopeà.

(Mät 17,22-23; Ruta èv 9,43-45)

30 Faaruè iho ra rätou i taua vähi ra, haere atu ra nä Tarirea. Te hinaaro ra hoì o ia e eiaha roa te taata ia ìte. 31 Te haapii ra hoì o ia i ta na mau pipi, te nä ô atu ra ia rätou: «Ua tuuhia te Tamaiti a te taata nei i te rima o te taata, e täparahi pohe roa rätou ia na; e ia oti i te täparahihia ra, e tiàfaahou ia o ia i nià i te ruì toru ra.

32 Aita rä rätou i ìte i te auraa i taua parau ra, e i mataù hoì ia ui atu ia na.

Te hau, te rahi?

(Mät 18,1-5; Ruta èv 9,46-48)

33 E tae atu ra o ia i Taperena, ua ui atu ra o ia ia rätou i roto i te fare: «E aha ta òutou i märô noa ia òutou iho i te èà tià ra? 34 Mämü noa iho ra rä rätou, i märô na hoì rätou iho i te äratià ra i to rätou e hau i te rahi. 35 Pärahi iho ra o ia i raro, ua parau atu ra i te tino àhuru mä piti ra, nä ô atu ra ia rätou: «O te taata i hinaaro e ei mua o ia, ei hopeà roa o ia e tià ai, e ei tävini no rätou atoà. 36 Ua rave atu ra o ia i te hoê tamaiti iti, ua tuu atu ra i röpü ia rätou; ua rave atu ra hoì e ua hii iho ra nä ô atu ra ia rätou: 37«O të ìte mai i te hoê tamaiti iti mai teie nei no to ù nei iòa, ua ìte mai ia ia ù; e o të ìte mai ia ù ra, eere ia o vau anaè ra ta na i ìte mai ra, o ia atoà rä o tei tono mai ia ù nei ra.

Manaò.

E Mäòhi Nui e, i mua i te mau parau e àtutu noa nei i roto i to tätou fenua te riro nei teie maì e haaviivii nei ia tätou èi matamehaì no te mau parau tämahana, te mau räveà e faaìtehia ra, ôpanipani, te paruru vaha e te ihu, e pätia, e hämani i te ture no te faautuà i te taata tei òre faatura i teie mau faanahoraa. I mua i teie mau raveà ua àmahamaha te nünaa, ua âmahamaha atoà te vahi räpaauraa, te taamino noa nei tätou e tià ia parauhia e ua pau te parau, e te raveà, e naò mai paha òutou e mea rahi te raveà, te raveà i faaòhipahia ua pau roa, i pohepohe ai te taata i teie maì e haaviivii nei ia tätou. Te vahi pau òre te raveà e te haavare òre, te fenua ia te vahi i reira te Atua Nui Tumu Tahi te haapuaìraa i to na Värua i taata ai te taata, i fenua ai te fenua, ia Atua ai te Atua. Höroà mai te Atua Nui Tumu Tahi i te taata i te töparaa tei iòa o te mau tumu räau e te mau àihere o te aru, tei iòa o te mau puaa, te mau iòa o te mau ià, e tae nao atu te mau ôpape, e te mau reva e te mau tiàrama. E mau vahi pau-òre teie no te mau raveà, e parau ai tätou e mau raveà tua tau teie na te Atua to na ia Värua, e teie Värua tei roto ia tätou te taata, e Värua faatupu ora no te ora. Ua tae tätou i teie taime i te pärahi e tuu te tohe i nià i te fenua, ma te faaroo i te Värua o te fenua ia parau mai. I te mea ua reru roa to tätou fëruriraa i te mau maniania faufaa òre, tei faaätea ia tätou i te parau no te värua faatupu ora. Te mau vahi i reira e faatupuhia ai te ora, e vahi ia i reira e faaapuhia te pohe. I to tätou taiòraa na parau e maha nei te faaìte noa mai ra te faufaa o te ora, te ora ra to te taata ia marämarama. Teie te haapotoraa no ta tätou parau no teie mahana.

-Taramo 54, 4 E te Atua e, e faaroo mai i ta ù pure, e färiu mai to tarià i te parau a to ù nei vaha.

-Ieremia 11, 20 O òe rä, e te Fatu manahope ra, to òe te manaò tià ra, o tei hiòpoà hua i te manaò e te âau ra, e faaìte mai òe ia ù i to riri ia rätou; ua faaìte-hua-hia e au ta ù parau ia òe ra.  

-Iatöpo 3, 17 Âreà te paari no nià mai ra, e mea ânoì-òre-hia ia, e te mämahu, e te marü, e te faaroo ôhie, ua î i te aroha e te hämani maitaì, e òre e faahuru ê i te taata, e òre hoì e haavare.

-Märeto 9 35 Pärahi iho ra o ia i raro, ua parau atu ra i te tino àhuru mä piti ra, nä ô atu ra ia rätou: «O te taata i hinaaro e ei mua o ia, ei hopeà roa o ia e tià ai, e ei tävini no rätou atoà.  

Ua tuu o Ietu i to na tohe i nià i te fenua no te faaìte i ta na mau pipi to na manaò peàpeà i to rätou huru i te mea ua mau to rätou fëruriraa i nià i te pohe, eiaha i nià i te tiàfaahouraa. Te ui nei o Ietu i ta na mau pipi,

E aha ta òutou i märö noa ia òutou iho i te èà tià ra? Ua mämü te mau pipi, i märô na hoì rätou iho i te äratià ra i to rätou e hau i te rahi. Te reo o Ietu «O te taata i hinaaro e ei mua o ia, ei hopeà roa o ia e tià ai, e ei tävini no rätou atoà. Ua rave aè ra i te hoê tamaiti iti, ua tuu atu ra i röpü ia rätou, ua hii iho ra nä ô atu ra ia rätou: «O të ìte mai i te hoê tamaiti iti mai teie nei no to ù nei iòa, ua ìte mai ia ia ù; e o të ìte mai ia ù ra, eere ia o vau anaè ra ta na i ìte mai ra, o ia atoà rä o tei tono mai ia ù nei ra. Te hinaaro nei o Ietu e faaìte i ta na mau pipi te papa o te ora, e hii i te ora i reira e tupu ai te maitaì, e ateä ai te pohe, ia tupu noa anaè te märöraa e fänau mai te peàpeà e te ahoaho i roto i te fëruriraa o te taata. To Ietu tuuraa i to na tohe i nià i te fenua no te faaìte ia i te paari o te Atua Nui Tumu Tahi, te faahoì nei o Ietu i te taata i roto i te faufaa o te fenua, te fenua ra te Värua ia o te Atua, e matara ai te ùputa o te ora.

To Ietu ìteraa i te fifi o ta na mau pipi i mua i te parau no te àmuraa i to na ìò e te inuraa i to na toto, te nä ô ra Ietu : No te värua te ora, aore o te tino e faufaa ; te parau ta ù i parau atu ia òutou na, e värua ia, e ora to reira ia au i te faaìteraa a Ioane i te pene 6 i te ìrava  63. Te fifi, eere te mea o Ietu i faahiti i te parau no te àmuraa i to na ìò e te inuraa i to na toto, te òreraa rä te mau pipi i ìte i te värua o te reira parau, oia to na auraa, aore ra te hinaaro o te Atua ta te reira parau e hinaaro ra i te faaite mai, inaha ua tuuhia te reira i te tahi vähi ê atu i ta te taò e faaìte ra. Areà te àmuraa taata i manaòhia e te mau pipi, aita roa te reira e au ra i te ôpuaraa faaora a te Atua.

Mai te peu teie vähi ta te Atua e arataì nei i to na taata e, eere te fenua, e hape roa te manaò e, e fenua ihoä. Te Atua Metua, mai te Tamaiti atoà, aita roa atu ia e parau mai nei ia tätou i te parau o te raì, te parau rä o te fenua. E ui ia tätou e, e aha te mea e òre ai te Atua e faaìte ia na i te mau vähi herehia e ana. Mai te peu te fenua, te taahiraa âvae ia o te Atua  i te faaìteraa a Ìtaia i te pene 66 i te ìrava 1, e aha ia o ia e òre e oriori ai nä te fenua. Inaha ua haere roa mai te Atua io na iho, aita änei tätou e peàpeà ra o te òre tätou e färerei i te Atua no te haereraa tätou e ìmi ia na i nià i te raì ta tätou i òre i ìte i to na parau e to na vairaa.

Te vähi ta tätou e täpeà mai i roto i teie rahiraa manaò ta tätou i tämata mai i te haamahorahora, teie ia : te fenua, te uruaìraa ia o te faaroo, oia te vähi te faaroo o te nünaa e türuì ai ia òre o ia ia òhu i roto i te ôpape o te mau faahemaraa o teie tau. I tano ai rä e türuì i nià i te fenua, no te mea ia ua nä reira te Fatu i to na faaâpïraa i te faaauraa i ravehia e te Atua Metua i roto ia na e te taata. No reira, eita te fenua e haavare, eita te fenua e faaruè i te taata, no te mea te rohi noa nei te fenua ia tupu te ôpuaraa faaora a te Atua. Tei tiàturi i te fenua no te horoà ora a te Atua, e ora to na i te Atua ra ; tei òre rä i tiàturi e tei haafaufaa òre i te fenua, ua ère ia i te ora no ô mai i te Atua ra. E tano ai tätou e parau e, tei ìte i te fenua, ua ìte ia i te Atua. E tano te ora e mauhia ra e te fenua ia faaauhia i te tahi rima tei mahora noa no te taata tei tiàturi i taua ora ra, e piri rä te rima o te fenua i te taata tei òre to na âau i tiàturi i to na mau maitaì. I parau ai o Iatöpo i roto i ta na rata, i te pene 3 i te ìrava, 17 Âreà te paari no nià mai ra, e mea ânoì-òre-hia ia, e te mämahu, e te marü, e te faaroo ôhie, ua î i te aroha e te hämani maitaì, e òre e faahuru ê i te taata, e òre hoì e haavare.

 No reira te tiàturi i te räau no roto mai i te fenua te ùputa ia e matara ai te ora o te nünaa, i Mäòhi Nui nei.

 

Teraì òr. Faatura.

Māreto 8.27-35 Täpeà

 

Tāpati 12 no Tetepa 2021.

Täpeà

Taramo 116

Hopoi

1  E hinaaro rahi to ù i te Fatu, o tei faaroo mai i ta ù reo e i ta ù i ani atu. 2 No te mea ua färiu mai o ia i ta na tarià ia ù nei, e tiàoro ä vau ia na e mure noa atu to ù nei aho. 3 I haapunihia vau e te märei ra o te pohe;

i haaàtihia vau e te ahoaho o häte; i roohia vau e te àti e te mäuiui. 4 Ua tiàoro iho ra vau i te iòa o te Fatu, te pure nei au ia òe: «E te Fatu e, e faaora na òe i ta ù värua nei » 5 O te hämani maitaì e te parau tià ta te Fatu,  oia ia, ua î to tätou Atua i te aroha. 6 E tiaì mai te Fatu i te feiä haavare òre; i tuu-haèhaa-hia vau, e ua faaora o ia ia ù. 7 E hoì, e ta ù värua, i to òe ra faaearaa, ua hämani maitaì mai te Fatu ia òe. 8 Ua faaora òe i ta ù värua i te pohe, e ta ù mata i te òto, e ta ù âvae ia òre ia hià. 9 E hahaere ä vau i mua i te Fatu i te fenua o te feiä e ora nei. 10 Ua tiàturi au i te Fatu i parau ai au: «Ua rahi roa iho nei to ù pohe» 11 E ua parau hoì au i ta ù rüraa ra: «E haavare anaè to te taata atoà nei» 12 E aha rä ta ù ia hopoi atu na te Fatu, i te mau hämani maitaì no na ia ù nei? 13 E rave au i te âuà ora e hopoi i nià a tiàoro ai i te iòa o te Fatu. 14 E faatupu vau i ta ù i èuhe i te Fatu, i teie nei i mua i te aro o to na atoà ra mau taata. 15 E mea taoà i te aro o te Fatu te pohe o to na ra mau tävini moà. 16 Oia mau, e te Fatu, no te mea o vau to òe tävini, to tävini e te tamaiti a to tävini vahine. Ua matara ia òe to ù nei mau täpeà. 17 E hopoi au i te tahi tütia haamaitaì ia òe, a tiàoro ai au i te iòa o te Fatu. 18 E faatupu vau i ta ù i èuhe i te Fatu, i teie nei i mua i te aro o to na atoà ra mau taata, 19 i roto i te mau àumoa i te fare o te Fatu ra, i rotopü ia òe, e Ierutarëma e. Hareruia.

Ìtaia 50.5-9.

Haamä

5 Ua haafätata te Fatu ra o te Fatu i ta ù tarià, e aore hoì au i pätoì atu; aore hoì au i ôraì tià i muri. 6 Ua tuu noa atu vau i ta ù tua i te feiä i täìri mai; e ta ù päpärià i te feiä i hühuti i te ùmiùmi; aore hoì au i huna ê atu i te vahavaha e te tufatufa haere. 7 E tauturu mai ä te Fatu ra o te Fatu ia ù; i òre ai au i haamä ai; i haamau ai au i ta ù mata mai te ôfaì ra; ua ìte hoì au, e òre au e haamä. 8 O te tià mai ia ù nei, te fätata nei ia: o vai te märô mai ia ù? Tià atoà mai o ia mäua atoà: o vai ta ù ènemi? Tii mai o ia e rave ia ù nei. 9 Inaha, na te Fatu ra nä te Fatu e tauturu mai ä ia ù, O vai te faahapa mai ia ù nei? Inaha, E marau rätou mai te àhu nei, e pau rätou i te manumanu.  

Iatöpo 2.14-18

Te faaroo e te òhipa

14 E aha te faufaa, e a ù mau taeaè, ia parau mai te hoê e, e faaroo to na, e aore a ana e òhipa, e ora änei o ia i te faaroo? 15 Ia pohe hoì te hoê taeaè, e te hoê tuahine i te veve, e aore e mäa i te mau mahana atoà ra, 16 ia parau atu rä te hoê o òutou ia räua ra: «Ia ora na i te haereà, ia mähanahana hoì òrua, e ia paìa hoì, aita rä i horoà atu i te mea e maitaì ai te tino ra; e aha to reira faufaa? 17 Oia atoà te faaroo, aore e òhipa ra, e mea pohe ia, i te mea te vai hoê noa ra. 18 E tià noa hoì te hoê taata ia parau mai ia na e: «E faaroo to òe, e òhipa hoì ta ù. «- «A faaìte mai na òe i to òe faaroo, aore e òhipa ra, a faaìte atu ai au ia òe i to ù faaroo i ta ù nei òhipa.»

Māreto 8.27-35

Te fäìraa Pëtero ia Ietu ei Metia

(Mät 16,13-20; Ruta èv 9,18-21)

27 Haere ê atu ra Ietu e ta na mau pipi atoà i te mau ôire rii i Taitarea Firipi ra, ua ui atu ra o ia i ta na mau pipi i te èà tià, nä ô atu ra ia rätou: «O vai au nei i ta te taata nei parauraa? 28 Ua nä ô mai ra rätou: «O Ioane päpetito ta vëtahi, o Èria ta vëtahi, e o te hoê i te mau perofeta ra ta vëtahi. 29 Ua parau atu ra o ia ia rätou:

«O vai rä vau nei i ta òutou parau? Ua parau mai ra Pëtero ia na, nä ô mai ra: «O te Metia ia òe. 30 Ua aò atu ra o ia ia rätou, e eiaha roa e faaìte i te taata i taua parau no na ra.

Te faaararaa Ietu i to na pohe e to na tiàfaahouraa

(Mät 16,21-28; Ruta èv 9,22-27)

31 Ua tämata atu ra o ia i te faaìte ia rätou e: «E rave rahi to te Tamaiti a te taata pohe, e e faaruèhia e te feiä paari, e te mau tahuà rarahi, e te mau päpaìparau, e e täparahi-pohe-roa-hia, e ua ruì toru anaè e tiàfaahou ai i nià. 32 I parau faaìte hua atu ra o ia i taua parau nei. Ua rave atu ra Pëtero ia na ôpaì aè ra i te hiti, ua aò atu ra ia na. 33 Ua färiu mai ra rä o ia, ua hiò mai ra i ta na mau pipi, ua àvau mai ra ia Pëtero, nä ô mai ra:

«E haere ê òe, Tätani e, aore hoì òe i au i ta te Atua ra, o ta te taata nei rä ta òe i au. 34 Ua parau atu ra o ia i te mau taata atoà, e ta na ra mau pipi, nä ô atu ra o ia ia rätou: «Te taata i hinaaro i te pee mai ia ù, e faaruè o ia ia na iho, e rave i ta na tätauro, a pee mai ai ia ù. 35 O tei hinaaro hoì i te täpeà i to na ora, eere ia i te ora; e o tei tià ia na i te tuu i to na ora ia ù e te Èvaneria nei, e ora ia to na.

 

 

 

Manaò.

E te nünaa mäìtihia e te Atua Nui Tumu Tahi, teie o Ia e haafätata mai nei i pïhaì iho i to tätou tärià e ìte anei tätou e o te reo teie no te Atua e parau riirii mai nei ia tätou. Mai te mea  tei reira tei roto ia tätou ta Na faanahoraa no ta Na ôpuaraa faaora. E tïtauraa te reira i te taata i te faatupu i te värua parau mau e mauhia ra e ana i roto i to na âau. Ia hiti te marämarama o te parau tià èi ärataì ia na i roto i teie tau tei faaäpiäpihia to tätou oraraa, i teie maì viivii, e te mau parau tei haapitaataa i te fëruriraa o te nünaa, ma te tuu i te nünaa i roto i te ahoaho e te peàpeà e färii anei tätou i te mau faaueraa, e aore ra e tomo i roto i te pätoì. Teie huru oraraa te faaära noa mai ra ia täpiti tätou i to tätou puai ia tämau maite i te haafätata to tätou tärià i te mau hinaaro o te Atua Nui Tumu Tahi. Ia haaàti te ìno ia tätou, e tämau tätou i te ìmi i te maitaì, ia puai aè te maitaì no te haaparuparu te tupuraa te ìno. Ia ìte tätou i te ìmi i roto ia tätou no te faatupu te tiaìtururaa o te ora. To tätou tiàturiraa ia vai tämau i nià i te haamori i te Atua, te hanahana o te Atua tei turu ia tätou i te ìteraa te marämarama e âua haaàti ra ia tätou i te mea e nünaa tätou tei mäìtihia e te Atua Nui Tumu Tahi. Te höroà a te Atua ia tätou te puai no te värua no te aroha e te here. Tei roto ia tätou taua marämarama ra tei türama i te vahi pöuri o to tätou âau. Te marämarama o to tätou âau ia vai àma noa i roto i te tau mai te mau tiàrama i te pö e te ao. E i roto i te mau mätahiti ia tià ia tätou i te ìte, i te mau faufaa aore roa te Atua i täpeà i te ora i roto i te tau ua höroà hope-roa te reira na roto i te faufaa o te rähu. Te faaìte noa mai ra te òhipa a te Atua Nui Tumu Tahi i te pärahi tämauraa mai te värua, ta te âai e ärataì ra i te faatiàfaahouraa te parau o te nünaa Mäòhi i Mäòhi Nui nei. Ta tätou mau peu, to tätou hiroà, to tätou reo, e tià ia parauhia o te mori türama te reira ia tätou ia òre ia mätaù i mua i te òhipa e haataupupü ra i te mau tereraa òhipa i roto ia tätou, e te tahi pae. To tätou hinaaro tumu mau ia hitihia o Mäòhi Nui i te ànaana no te ora i pure ai tätou no teie maì viivii, ia türamahia to tätou âau i te puai faaora a te Atua Nui Tumu Tahi. Teie te parauraa o na ìrava e maha tei ìritihia mai, mai roto mai i na taiòraa e maha no teie mahana :

-Taramo 116, 12 E aha rä ta ù ia hopoi atu na te Fatu, i te mau hämani maitaì no na ia ù nei? -Ìtaia 50, 7 E tauturu mai ä te Fatu ra o te Fatu ia ù; i òre ai au i haamä ai; i haamau ai au i ta ù mata mai te ôfaì ra; ua ìte hoì au, e òre au e haamä.

-Iatöpo 2, 17 Oia atoà te faaroo, aore e òhipa ra, e mea pohe ia, i te mea te vai hoê noa ra.

-Märeto 8,  35 O tei hinaaro hoì i te täpeà i to na ora, eere ia i te ora; e o tei tià ia na i te tuu i to na ora ia ù e te Èvaneria nei, e ora ia to na.

Mai te peu te vai ra te hoê àveià e matara ai te mau ùputa atoà o teie nei ao, o te reo ia, o te reo ra o te parau tià ia e te parau mau noo mai i te Atua ra, o te Atua te Fatu o te reo. Te faaòhiparaa a te àveià, o te parau ia. Te mea mau te reira ta te Atua i hinaaro i te taata ia märamarama, i haafätata ai te i to na vaha i te tärià o te taata i te faaìteraa a Ìtaia pene 50 ìrava 5. Aita rä hoì te taata i märamarama i te mea ta te Atua e hinaaro ra ia na ia ìte nä roto i taua faaòhiparaa i te reo ra, aita atoà o ia i märamarama e, ua horoà mai te Atua ia na i te räveà e matara ai o ia i räpae i to na fifi, te räveà hoì e ìte ai o ia i te maitaì ta te Atua i faaherehere na na.   No te mea rä O te hämani maitaì e te parau tià ta te Fatu,  oia ia, ua î to tätou Atua i te aroha. E tiaì mai te Fatu i te feiä haavare òre; i tuu-haèhaa-hia, e ua faaora o ia. E hoì, e ta ù värua, i to òe ra faaearaa, ua hämani maitaì mai te Fatu ia òe. Ua faaora òe i ta ù värua i te pohe, e ta ù mata i te òto, e ta ù âvae ia òre ia hià. Oia hoì eita te Atua e taui, hoê ä to na huru i nanahi ra, i teie mahana, e a tau àhiti noa atu, te riro noa atoà ra ia te parau ta te Atua i parau mai ia tätou ei parau mau, oia hoì ei vähi e nä reira te taata e tae ai i roto i te ìteraa i te hinaaro o te Atua na Na te faaueraa e faaòhipa i te reo. Ia ara atoà mai rä tätou i teie vähi, te reo, te faufaa ora ia ta te Atua i horoà na te taata, aore o Ia i täpeà ua höroà ra. Te auraa, aita te taata e anihia nei e faahuru ê i te reo, e faaìno hoì i te reo, o te reru roa e te moè roa atu taua faufaa na te Atua ra. Te huru mau te reira o te Mäòhi i teie mahana i mua i to na reo, e te mea o ia i òre i taa faahou ai i te auraa o to na oraraa, e i hoo hänoa ai ia na. I teie nei rä, mai te peu te vai ra te reo, te vai atoà ra te tumu  o te reo, oia te haamataraa e te faahopeàraa o te reo. Te auraa, te riro atoà ra ia te reo ei vähi  i reira e ìtehia ai te tahi ôpuaraa e te vähi hoì e tïtauhia ra nä roto i taua ôpuaraa ra. Mai te parauraa e, e hoì tei haamanaò mai e, te vai ra te Atua, inaha, no te mea i parau te Atua, i ìtehia ai e, te vai ra te Atua, te märamarama atoà ra ia tätou e, aita te parau i faaìte noa mai i te tahi ôpuaraa, ua faaìte atoà mai rä i te Atua na na taua ôpuaraa ra, te ôpuaraa faaora. Ia nä ô rä tätou e, no te mea i parau te Atua, i ìtehia ai e, te vai ra te Atua, ua ìte atoà ia tätou e, te vai ra te taime aita te Atua i parau ; eere rä e, no roto te Atua i te parau i te püraa mai, inaha o ia iho te Parau. No reira, te parau tei faaìte mai i te Atua, te parau hoì tei ìriti i te ùputa o te märamarama, te parau atoà ia tei ìriti i te ùputa o te tau, tei riro te mahana hoê ei taiò mätamua. Te auraa ra, aita ia ta te taata e parau i nià i te tau, to na rä te parau i mau i roto i te tau, inaha no roto o ia i te ânaìraa o te mau mea ta te Atua i faatupu i te mau mahana tätaì tahi o ta na rahu, e te mau mea hoì e haamataraa to rätou, e faahopeàraa atoà to rätou. Te mea ia te taata i fatimaùu noa ai, i te hinaaroraa e, ei parau atoà aè ta na i nià i te tereraa o te tau, no te hinaaro ìte i te òhipa e tupu hou te tau mau ra. No te taere te tereraa o te tau, i tae roa ai o ia i te parauraa e, aita e òhipa âpï i raro aè i teie nei raì. Ia ìte rä hoì tätou e, no te Atua, e au te tauatini mätahiti i te mahana hoê, nä hea ia to te taata e taimehia ai i te märamaramaraa i te ôpuaraa a te Atua, e no te mea eere o ia no roto mai i te Parau, aita atu ia ta na maoti rä, te tiàturiraa i te Parau, hau roa atu mai te peu o te àveià te reira e matara ai te mau ùputa atoà o teie nei ao, na te Parau e tauturu ia tätou i mua i teie maì e haaviivii nei to tätou oraraa i teie mahana, te taupupü ia o teie maì te mau faaäraraa Parau ua àmaha te nünaa i mua i te Parau. Ia faaroo tätou i te reo o Ietu ia tätou i teie mahana te parau àfaro nei o Ia i te taata e tiàturi ra ia Na, e tei òre i tiàturi ia Na i teie reo, 35 O tei hinaaro hoì i te täpeà i to na ora, eere ia i te ora; e o tei tià ia na i te tuu i to na ora ia ù e te Èvaneria nei, e ora ia to na. Teie reo no Ietu te höroà nei i te taata i te haapäpüraa i te parau no te ora, te mea e ärataì te taata i roto i te marämarama. Eita te parau o te märamarama e tano ia faataa-ê-hia i to te parau, no te mea te märamarama, te mea ia e roaa mai i te taata i roto i te parau. No reira, te taata e tïtau i te märamarama no te faaìte e, e taata märamarama o ia, e maamaa ia taata tei òre i märamarama i te hinaaro o te Atua. E hau roa atu te reira te parau no te faaroo o te taata i mua i teie maì e faauruhia nei e tätou teie te reo o Pauro i te parauraa, 17 Oia atoà te faaroo, aore e òhipa ra, e mea pohe ia, i te mea te vai hoê noa ra.

I to tätou täpeàraa i te parau mau, i ûàna ai teie maì viivii i roto ia Mäòhi Nui, ia hunahia te parau mau te parau tià, e tupu te fifi i roto i te nünaa no te haafänau i te ahoaho, e te peàpeà. Teie te reo o Ìtaia i te parauraa ia tätou i teie mätahiti âpï Ètärëtia, 7 E tauturu mai ä te Fatu ra o te Fatu ia ù; i òre ai au i haamä ai; i haamau ai au i ta ù mata mai te ôfaì ra; ua ìte hoì au, e òre au e haamä.

 

Teraì òr. Faatura.