Mätaio 14.22-33 Täpetepete

 

Tāpati 13 no Âtete 2023.

Täpetepete

Taramo 85

1 Na te Mënätehe. E Taramo na te tamarii a Tora.

2 Ua hämani maitaì mai òe, e te Fatu, i to òe ra fenua; ua faahoì mai òe i te tïtï o Iatöpa ra.

3 Ua faaòre òe i te hara a to mau taata ra, e ua täpoì òe i to rätou ìno. Tera.

4 Ua faaòre òe i to òe ra riri, e ua tïoi ê atu ra òe i te ûàna o to òe ra riri.

5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei.

6 E riri mai ä òe ia mätou, e a muri noa atu? E tämau ä òe i to riri e tae noa atu i te mau uì atoà ra?

7 Eita änei òe e faaanaanaea mai ia mätou, ia òaòa to mau taata ia òe ra?

8 E faaìte mai, e te Fatu, i to òe ra aroha, e hö mai i te ora na òe ia mätou nei.

9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra.

10 Te fätata mai ra te ora na na i te feiä i mataù ia na ra. E faatupu o ia i to na hanahana i to tätou nei fenua.

11 O te aroha e te parau mau, ua färerei ia räua; o te parau tià e te hau, ua hohoì räua.

12 E tupu mai te parau mau no roto i te fenua, e hiò mai hoì te parau tià mai te raì mai.

13 Na te Fatu hoì e horoà mai i te mea maitaì, e hotu mai ä hoì to tätou fenua.

14 E nä mua ia na te parau tià i te haere, e na te reira e faaìte mai i to na haereà.

1 Te mau Arii 19.9-13.

9 Tae atu ra o ia i reira i roto i te hoê ana, e ua taòto iho ra i reira; e inaha, ua tae mai ra te parau a te Fatu ia na, nä ô mai ra, Te aha noa na òe i ô na, e Èria?

10 Ua parau atu ra o ia, itoito noa na vau i e te Atua Täpäota i te Fatu: ua faaruè te tamarii a Ìteraèra i ta òe parau, e ua huri i ta òe fata i raro, ua täparahi i te mau perofeta na òe i te òè; e io vau nei, o vau anaè nei tei toe: e te ìmi mai nei rätou ia ù nei ia pohe.

11 Ua nä ô mai ra o ia, A haere, ei nià i te mouà tià noa ai i te aro o te Fatu. E inaha, ua haere iho ra te Fatu nä reira iho, o te mataì rahi iho ra e te ètaèta, i te haapararïraa i te mouà, e te vävähiraa i te mato i mua i te aro o te Fatu; aita rä te Fatu i roto i taua mataì ra; e mure aè ra te mataì, o te âueue fenua iho ra; aita rä te Fatu i roto i taua âueueraa fenua ra:

12 e oti aè ra te âueueraa fenua, e auahi; aita rä te Fatu i roto i taua auahi ra: e oti aè ra te auahi, e reo iti haìhaì mai ra, tei reira te Fatu.

13 E ìte aè ra Èria i taua parau nei, ua püroù o ia i to na mata i to na ra àhu, haere atu ra i räpae àu, tià noa iho ra i te tomoraa i roto i te ana ra. E inaha, te hoê reo mai ra ia na, nä ô mai ra, Te aha noa na òe i ô na, e Èria?

Röma 9.1-5

Te Atua e te nünaa ta na i mäìti

1 E parau mau hoì ta ù i te Metia, aore au i haavare, te faaìte âpipiti mai nei te Värua Maitaì e ta ù âau ia ù:

2 e e òto rahi to ù, e te mäuiui tuu òre i roto i ta ù âau.

3 E tià hoì ia ù ia ànatemahia vau e taa ê atu vau i te Metia ra, i ta ù mau taeaè, to ù ra fëtii i te haapaòraa i te tino nei.

4 I te âti-Ìteraèra ra, no rätou te faatävai ra, e te ànaana, e te faufaa ra, e te ture i horoàhia ra, e te haamoriraa, e tei parauhia mai ra.

5 No rätou hoì te feiä tupuna, e no rätou te Metia i te haapaòraa i te tino ra, o te Atua ia i nià iho i te mau mea atoà, no na te haamaitaì mure òre. Âmene.

Mätaio 14.22-33

To Ietu haereraa nä nià i te miti

(Mär 6.45-52; Rut 6.16-21)

22 I muri mai, ua faaue atu ra Ietu i ta na mau pipi e paìùma i nià i te poti e e fano nä mua ia na i te tahi pae roto, a faahoì noa ai o ia i taua tiàa rahi ra.

23 E oti aè ra te tiàa rahi i te faahoìhia, paìùma atu ra o ia i nià i te hoê mouà, i te hoê vähi moèmoè, e pure. E ruì/pö noa iho ra o ia anaè i reira.

24 Ua huru ätea hoì te poti i te fenua, e tau hänere metera i terehia. Te tiria-haere-hia ra e te mätäare, te nä mua mai ra hoì te mataì.

25 E tae aè ra i te maha o te äraraa o te ruì ra, ua haere mai ra o ia ia rätou ra i nä nià i te àre.

26 I te taime i ìte atu te mau pipi ia na i te haereraa mai nä nià i te àre, riàrià roa aè ra rätou, nä ô aè ra: «E tüpäpaù. E ua auë anaè iho ra i te mataù.

27 Ua parau atu ra rä Ietu ia rätou i reira ra, nä ô atu ra: «A faaitoito, o vau teie, eiaha e mataù.

28 Ua pähono mai ra Pëtero ia na: «E te Fatu, mai te peu e o òe tënä, a faaue mai ia haere atu vau ia òe na nä nià i te àre.

29 Ua parau atu ra Ietu: « A haere mai Tei raro noa atu ra Pëtero i te poti, haere tià atu ra ia Ietu ra nä nià i te àre.

30 Ia ìte rä o ia i te (ûàna) o te mataì, mataù iho ra, e haamata iho ra i te mure i raro, ua tuö atu ra: «E te Fatu, a faaora ia ù.

31 Ua faatoro mai ra Ietu i ta na rima i reira ra, haru mai ra ia na, nä ô mai ra: «E teie nei taata faaroo haraìni/täpetepete, e aha òe i feàa ai?

32 E ia tae räua i nià i te poti, faaea iho ra te mataì.

33 E te feiä i roto i te poti, tähopu/haamori mai ra ia i mua ia na, nä ô mai ra: «Òia mau, o te Tamaiti mau ä òe a te Atua.

Manaò.

Te täpetepete nei tätou i teie mahana i te maa òre, i te mea ua feàa to tätou fëruriraa, te täpetepete nei tätou i teie mahana i te òhipa òre, i te mea ua feàa to tätou fëruriraa, te täpetepete nei tätou i teie mahana i te hoo rahi te oraraa, i te mea ua feàa to tätou itoito. Na taò Mäòhi mau teie mai roto mai i to tätou reo, te turäma ra i te òreraa te tiàturiraa i roto i to tätou âau i te vahi raveà òre. Mai te mea mai roto mai i to tätou värua te tupuraa mai teie huru to tätou, èi tautururaa i teie huru faanahoraa, tei faatäpetepete e tei faafeàa i to tätou âau ua ineine te fenua no te faaiho-faahou i te huru mau o te taata i hämanihia e te Atua Nui Tahi. Te parau o te fenua, te parau ia no te taata tei täpaòhia e te fenua i to na hana e to na värua, e parau atoà rä no te taata ei ôpuaraa na te Atua, e ei tupuraa no to na hinaaro. E tupuraa hoì te taata no te hinaaro o te Atua, no te mea ia, na te Atua iho i hinaaro ia tupu mai tätou i nià i te fenua, i roto i te nünaa, mä to na reo, ta na peu, to na iho tumu, ta na mäa, e te faufaa ta te Atua i hinaaro ei faufaa na te reira taata. E hinaaro teie no te Atua i te taata ia ora hope roa, e ia òaòa hoì i te oraraa atu i te reira. Te mea mau atoà rä te reira e fätata ai tätou i te Atua. Te taata e manaò ra e, mea faufaa aè te parau no to na iho hinaaro tei faatäpetepete e tei faafeàa ia na, ua ère ia i te reira parau, ua haafaufaa òre hoì i te ôpuaraa a te Atua, e ua ère atoà i te ora. Nä roto i te fenua e te Faufaa ora a te Atua ta na e mau ra, ua haafätata mai te Atua i te taata, nä roto i te Tamaiti a te taata, ua hinaaro te Atua e haapäpü faahou i te taata i to na hinaaro haafätata ia na. E tano ia parauhia e, nä roto ia Ietu, te Tamaiti a te taata, ua hinaaro te Atua e färerei roa i te taata, mata e mata, vaha e vaha, taata e taata, taata e te Atua. Te òhipa mau ia e ravehia nei e te fenua, te pähono noa nei te fenua i te hinaaro o te taata no to na oraraa ia pärahi hau noa te taata i roto i te hau o te Atua Nui Tumu Tahi. Mea tià ia parauhia i to tätou haafaufaa-òre-raa i te mau horoà a te Atua : te fenua, te reo, te hiroà tumu, te mäa, te räau faaora maì, e tei hau roa atu, ua hunahia te faufaa ta te Atua i horoà mai ia tätou, oia te aroha e te here. No te mea, te vähi haamoriraa i te Atua, ua faarirohia ei vähi faahanahanaraa i te taata e to na mau hinaaro tià òre atoà. Ua faarirohia te Atua Metua ei Atua haavï, te nounou mana, te nounou moni, e te vahavaha hoì i te hiroà mäòhi. Aita te mau tävini o te Atua i ìmi faahou i te maitaì e te ora o te nünaa, ua faariro rä i te nünaa ei moihaa faatupu i to tätou maitaì e te oraraa fänaò të òre roa e roaa ia na àhiri aita i tävini i te Atua. Mea tià ia parauhia, E tärahu ia te reira na te òrometua te tiàtono tei riro ei arataì no te nünaa faaroo, e tärahu atoà na te nünaa tei färii i taua òhipa tià òre ra. Te naò nei ia te manaò i te parauraa o teie te tahi vahi i feàa ai to tätou faaroo, te faatoro noa mai ra te fenua i èà e ora ai tätou. Te vai nei te hoê tumu räau i te fenua Tähiti nei tei parauhia te Toroèà e ìtehia teie tumu räau i uta èi turämaraa i te èà o te feiä tomo maa, ia òre ia täpetepete te manaò i te tomoraa i roto i te vao, e te hoìraa i tai. Ua òre teie tumu räau i nià i te mouà, o vau iho nei aore ä vau i ìte atu ra, te parauhia ra tei uta i te mataèinaa ra no Faaone. Teie te tahi turämaraa ia au te haapotoraa no te mau taiòraa no teie mahana :

-Taramo 85, 12 E tupu mai te parau mau no roto i te fenua, e hiò mai hoì te parau tià mai te raì mai.

-1 Mau Arii 19, 13 E ìte aè ra Èria i taua parau nei, ua püroù o ia i to na mata i to na ra àhu, haere atu ra i räpae àu, tià noa iho ra i te tomoraa i roto i te ana ra. E inaha, te hoê reo mai ra ia na, nä ô mai ra, Te aha noa na òe i ô na, e Èria?

-Röma 9, 5 No rätou hoì te feiä tupuna, e no rätou te Metia i te haapaòraa i te tino ra, o te Atua ia i nià iho i te mau mea atoà, no na te haamaitaì mure òre. Âmene.

-Mätaio 14, 31 Ua faatoro mai ra Ietu i ta na rima i reira ra, haru mai ra ia na, nä ô mai ra: «E teie nei taata faaroo haraìni/täpetepete, e aha òe i feàa ai?

E haapäpüraa teie e tupu nei i roto i te taiòraa no teie mahana, i to Ietu haereraa nä nià i te miti i tupu ai teie faanahoraa na Ietu iho i parau i ta na mau pipi e paìùma i nià i te poti e fano nä mua ia na i te tahi pae roto, i te mea te faahoì ra o ia i te tiàa taata i âmui. Hou o ia a täpapa ai ta na mau pipi ua paìùma o ia i nià i te hoê mouà, i te hoê vähi moèmoè, e pure. E ruì noa iho ra i reira. Ua ätea te fauraò i te fenua, e tau hänere metera i terehia. Te tiria-haere-hia ra e te mätäare, te nä mua mai ra hoì te mataì. Ia tae aè ra i te maha o te äraraa o te ruì ra, ua nä nià mai ra o Ietu i te àre. Ia ìte ra te mau pipi ia na i te haereraa mai nä nià i te àre, riàrià roa aè ra, nä ô aè ra, E tüpäpaù. E ua auë rätou i te mataù. Te reo o Ietu e faaitoito, o vau teie, eiaha e mataù. Tei nià mai ra te reo o Pëtero, e te Fatu, mai te peu e o òe tënä, a faaue mai ia haere atu vau ia òe na nä nià i te àre. Te reo mai ra o Ietu,  A haere mai Tei raro noa atu ra Pëtero i te poti, haere tià atu ra ia Ietu ra nä nià i te àre. Ia ìte rä i te ûàna o te mataì, mataù aè ra, e haamata iho ra i te mure, ua tuö atu ra e te Fatu, a faaora ia ù. Ua òhie o Ietu i te faatoro i ta na rima i reira ra, haru mai ra ia na, nä ô mai ra E teie nei taata faaroo haraìni, e aore täpetepete, e aha òe i feàa ai. I nià i te poti, faaea iho ra te mataì. Tähopu aore ra haamori mai ra ia i mua ia na, nä ô mai ra, Òia mau, o te Tamaiti mau ä òe a te Atua. Teie mau òhipa e tupu nei, fenua, päpe, pö, e tià ia parauhia e ìte nati teie tei päpaì märamarama maitaìhia i te päpaìraa a Mätaio i te òhipa a Iesu i faanaho, i to aru âmuiraa i roto i te mätaù o te mau pipi, teie te mau tumu i parau ai te mau pipi e, o te Tamaiti mau ä òe a te Atua. I nià i te poti, i nià i te miti, i tupu ai te märamarama i roto i te mau pipi i faateitei ai roto i te Tamaiti a te Atua na roto i te haamoriraa i te taime i roromä ai te mataì, tei tuu i te mau pipi i roto i te hau. Te miti ra te èà ia te reira tei faatuàti i te mau fenua i te ärataìraa a te mau ôpape, te ta te mau âpoo mataì e turu nei ia fano maite te poti, ta te raatira e mau ra i te hoe. Teie te tahi reo Himene tei au maite i ta tätou parau no teie mahana, puta himene numera 159, àpi 169, te pehe o teie himene tei roto i te puta Ecole du dimanche, 143, je dois voyager au monde. Tei roto atoà i te Ailes de la foi numera 339, e i te youtube, https://www.youtube.com/watch?v=qZbMoDOUHoc.

 

Te tere nei au i raro nei.

1

Te tere nei au (i) raro nei

Mai te hoê vaa i tua

E te teitei nei te àre

I te mataì ûàna

 

Òaòaraa

To ù nei ora

O Ietu ia

Te pure ra o ia

I te Metua no ù.

 

2

Tei ia ù nei te âveià

E tae ai (i) te täpaeraa

O  ta Na ia Parau ora

Tei paruru i te pohe

 

Òaòaraa

3

E ia rumaruma te raì

E taiä ai to ù âau

Te na ò nei te Päirati

A faaitoito mai

Òaòaraa.

 

E au mau teie himene èi faaitoitoraa ia tätou i teie mahana, ia òre to tätou faaroo ia haraìni, e aore ia täpetepete, e aore ia feàa.

 

Teraì òr Faatura.

 

Mätaio 17.1-9 Märamarama.

 

Tāpati 6 Âtete 2023.

ÔROÀ.

Märamarama.

Taramo 97

1 O te Fatu te arii, ia ôuàuà te fenua, e te mau fenua rii e rave rahi ra, ia òaòa ia.

2 Te haaàtihia ra o ia i te mau ata e te pöuri. O te parau-tià rä e te au, o te tumu ia o to na teröno.

3 Te haere ra te auahi nä mua ia na, e te àma ra to na mau ènemi e àti noa aè.

4 Te märamarama ra te fenua i to na ra uira, te hiò ra te fenua mä te rürütaina.

5 Te tärapape ra te mau mouà mai te täpau i te aro o te Fatu, i te aro o te Fatu o te fenua atoà ra.

6 Te faaìte mai ra te mau raì i te parau-tià na na, e te ìte ra te taata atoà i to na hanahana.

7 Ia haamä te feiä atoà i haamori i te mau atua òtiòtihia ra, o tei teòteò i to rätou iho mau îtoro. E haamori ia na, e te mau atua ra.

8 Ua ìte Tiona e ua òaòa, e te fänaò nei te mau tamahine o Iüta i te parau au na òe, e te Fatu.

9 E teitei rahi to òe, e te Fatu, i te mau fenua atoà nei, tei nià ê ä òe i te mau atua atoà ra.

10 O òutou o tei hinaaro i te Fatu ra, ia riàrià òutou i te ìno, te tiaì ra o ia i te värua o to na feiä moà ra, e te faaora ra o ia ia rätou i te rima o te paieti-òre ra.

11 Ua ueuehia te märamarama na te feiä parau-tià ra, e te òaòa na te feiä i tià te âau ra.

12 E òaòa òutou, e te feiä parau-tià, i te Fatu, e e haamaitaì atu mä te haamanaò i to na ra maitaì.

Täniera 7.9-14

9 Te hiò ra vau, e haamauhia iho ra te mau teröno e ua pärahi mai ra To te mau mahana tahito ra, o tei au to na àhu i te hiona i te teatea, e te rouru o ta na upoo, mai te huruhuru mämoe maitaì ra ia: e auahi ùra to na teröno, e to na pereoo e auahi àma ia.

10 Puroro noa mai ra te auahi tärapape mai mua mai ia na: e ua tautani hoì i te tautaniraa i te täviniraa ia na ra, e ua àhuru hoì te tautaniraa i te manotini i te tiàraa i mua i ta na aro: pärahi iho ra te haaväraa, e ua heheuhia te mau puta.

11 Ua hiò iho ra vau e no te parau rahi i parauhia e taua tara ra hiò iho ra vau, e taparahihia taua mea ora ra, e pau aè ra to na pera, e tuuhia atu ra i te auahi àma ra.

12 Âreà te tahi pae i taua mau mea ora rarahi ra, ravehia aè ra to rätou mana; i haamaorohia rä to rätou aho e ia tae i te tau e te taime.

13 Hiò iho ra vau i taua ôrama i te ruì ra, e inaha, te hoê mai te Tamaiti a te taata ra i te haereà mai nä roto i te mau ata o te raì ra; e ua haafätata atu ra o ia i To te mau mahana tahito ra, e tuuhia iho ra i pïhaì iho ia na. 14 E ua höroàhia mai ra te mana, e te hinuhinu, e te pätireia nö na, ia auraro mai te taata atoà, e te mau fenua atoà, e te reo atoà ia na. To na na mana, e mana mure òre ia, e òre ia e mou, e to na pätireia, e òre ia e pau.

2 Pëtero 1.16-19

Te ìteraa i te hanahana o te Atua

16 Èere hoì ta mätou i te fäpura i faatupuhia e te paari ra, a faaìte atu ai mätou ia òutou i te mana e te haereà mai o to tätou Fatu ra o Ietu Metia, ua ìte hua rä to mätou mata i to na hanahana.

17 I noaa hoì ia na i te Atua Metua ra te haamaitaì e te faateitei, a tae mai ai ia na taua reo no roto mai i te ànaana rahi ra e: «O ta ù Tamaiti here teie, ua mauruüru roa vau ia na.»

18 Ua faaroo mätou i taua reo no te raì mai ra, ia mätou e o ia atoà i nià i te mouà moà ra.

19 Tei ia tätou atoà te parau a te mau perofeta tià rahi roa atu ra i teie nei; o te mea maitaì ia ia òutou ia haapaò i te reira, mai te rämepa e ànaana i te vähi pöuri ra, e ia tai ao, e ia hiti te fetià poìpoì i roto i to òutou na âau.

Mätaio 17.1-9

To Ietu faahuru-ê-raa-hia

(Mär 9.2-9; Rut 9.28-36)

1 E ruì ono aè ra, ua rave aè ra Ietu ia Pëtero, e ia Iatöpo, e ta na taeaè ia Ioane, e ua arataì atu ra ia rätou i nià i te hoê mouà teitei.

2 E faahuru-ê-hia iho ra o ia i mua ia rätou; ànaana aè ra ta na mata mai te mahana ra, e teatea aè ra to na àhu mai te märamarama ra.

3 E inaha, ua fä mai ra Möte räua o Èria ia rätou ra, e täuàparau anaè iho ra räua e o Ietu.

4 Ua parau atu ra Pëtero ia Ietu, nä ô atu ra: «E te Fatu, e mea maitaì ia pärahi tätou i ô nei. E ia tià ia òe ra, e faatià vau i ô nei e toru aè fare autä: no òe te tahi, no Möte te tahi, no Èria hoì e tahi.

5 E te parau noa ra o ia, e inaha, täpoìhia mai ra rätou e te hoê ata ànaana; e inaha, te hoê reo mai ra no roto i te ata, i te nä-ô-raa mai e: O ta ù Tamaiti here teie, ua mauruüru roa vau ia na. A faaroo ia na

6 E ia faaroo aè ra te mau pipi i te reira, ua tïpapa iho ra rätou i raro, mä te mataù rahi.

7 Ua haafätata mai ra Ietu i pïhaì iho, faatiàià mai ra ia rätou, nä ô mai ra: «A tià, eiaha e mataù.

8 E ia nänä aè ra i to rätou mata i nià, aore roa e taata i ìteä e rätou, mäori rä o Ietu anaè ra.

9 E tei to rätou pouraa mai mai nià i te mouà, ua faaue mai ra Ietu ia rätou: «Eiaha roa atu òutou e faaìte i te taata i ta òutou i ìte aè nei/ôrama, e tae noa atu i te taime e tiàfaahou mai ai te Tamaiti a te taata mai te pohe mai.

Manaò.

Na mua roa ia taa ia tätou e aha te haamaitaì, te haamaitaìraa e parau, e parau tei faaìte ra i te taata i te vahi te reira te maitaì, ta te Atua e faaìte noa te vahi te reira te tupu mauraa te maitaì, teie te taata tei färii e haere e faatupu i te maitaì, ia òre òe e rave èita tera maitaì e matara ia rave. Ua faaìtehia mai ra te vai ra. Te auraa mätamua ia o te parau haamaitaì. Te piti, ia matara i te taata teie maitaì, ia roaa ia na i te mea ta te Atua i parau te horoà atu nei au, i reira te piti o te auraa e matara mai ai, òia hoì, faahoì i te reira maitaì i te Atua ra, e haamaitaì atoà te reira. Teie nei e aha te haamaitaìraa a te Atua i te taata, ia hiò tätou i tera Tenete te parau te Atua i te tane e te vahine, mea tano i tera parau ia önoönohia i teie tau, no te mea ua manaò te taata, e ôpuaraa atoà ta na no te taata. Ta na ôpuaraa èi tane, èi tane, èi vahine, èi vahine, na te taata te reira. Ta te Atua èi tane, èi vahine te haamaitaìraa ia fänau o rua, te fänau, te fänauraa e ère i te tahi òhipa mea hape noa, e aore mea ravehia, e aore e tupuraa no te tahi ôpuaraa ìno, mai teie e rahi roa nei i te tupu i roto i to tätou nünaa, e ère. E haamaitaìraa òia hoì ua parau te Atua e maitaì to roto i te fänau. I teie mahana no tera mea ua pee tätou i te feruriraa no te mau òhipa e òre e au i te maitaì i ôpuahia e te Atua, i teie huru faanahoraa, aita te fänau i riro i hiòhia mai te tahi haamaitaìraa. Ia fänau te mau metua i mua ra, e tätini, ia fänau te taata i teie mahana e taiò, eiaha ia hope te mani rima ua faaea na mua aè, mai te peu ua faaea na mua aè mea maitaì ia, e aha te parau èita e paìä, èita e noaa i te rave. Te faanahoraa a te Atua mea nahea, ua faaî te Atua i te fenua i te maitaì, e ua parau i te taata a hiò te au èi maa a rave àamu, e no te mea ua î te Atua i te maitaì, i reira noa to te Atua parauraa i te taata e fänau faarahi e ra iho te maa, e aha ia te auraa, mai te peu ua pau e faaî ia, tätou i teie mahana aita, e fänau na mua i reira e feruri atu ai, aita, e päpü iho ä ia e fifi, àhiri ra mai ta te mau metua, mai ta te Atua e faanaho ra, faaî na mua te fenua, e faaî, èita te taata e hepohepo, tera mau metua to tätou ua fifi rätou aita, aita e täote ua ora, te reira ta te Atua haamaitaìraa, te auraa èita te taata e täno e faaruè i te fenua, noo ò na i te raveraahia mai e haere ò na i ô e tii te ora ta te Atua e hinaaro, fänau, faarahi. Fänau te hämaniraa ia i te taata, e mana tera ta te Atua i horoà i te taata, te Atua tei hämani i te taata, ua horoà atoà i tera mana i te taata, ia fänau atoà i te taata ia hämani atoà i te taata, na roto ra i te fänau, na roto i te fänau. No te mea ua tae roa atoà i te taata i teie mahana, ua hinaaro atoà e hämani i te taata, e hämani i te taata te vai ra ta na raveà e ère na te Atua te reira. Ta te Atua na roto i te fänau e aha te auraa, te fänau e hotu te reira no roto mai i te tumu o te püfenua, èi faatupuraa i te fänau e ère na te paari o te taata i roto i ta na mau raveà, òia e tupu ta te taata, e oti ta te taata, taata i teie mahana e ère ra na te Atua, ta te Atua na roto i te fänau òia hoì na roto i te püfenua, fänau, faarahi, aita e fifi to te rahi, i teie mahana te rahi te fifiraa, e ua faariàriàhia tätou, ua parauhia eiaha e fänau faarahi, e faaïti ua tere mai te mau täote, no te haapiipii i te taata nahea i te faaïti.

Te ùtuafare e tamarii te faatere, ua àti ia ùtuafare e ère te metua i te ìte e aha te àveià ia rave, na na e horoà i te haapiiraa, na na e ärataì, na na e haapii, na na e horoà i te ora te tamarii e haere o na i ô e haapii atoà, tera mea e tïtauhia ra ia tätou i teie mahana. No reira ia òre tätou ia haavï-faahou i ta tätou mau tamarii, eiaha e riàrià i te aò, maite peu e tae te haavïraa, te räveà hopeà i mua ra te täìri, haamanaò noa na ia tätou, e ère anei na e täìri, te pöàra i âfaro rii ai i roto i te oraraa.

Teie mahana, ua ìte au i te fare haapiiraa te tamarii aita e haere faahou i te haapiiraa, ia faaroo anaè, e aha e fifi ùtuafare, e aha te auraa teie mea e fifi ùtuafare, aita e tamarii, aita e hinaaro faahou e faaroo i te parau a te metua, hinaaro te tamarii nana e faanaho i to na oraraa, e haere o na e rave i te òhipa mai ta na e hinaaro e i te taime ta na i hinaaro, aita, na metua e faatere ia na, e ère na na e faatere i te metua, no reira tera parau e fifi ùtuafare, mea haraoooo i te faaroo i teie mau parau. E ère mea na roto mai tätou i te fifi, aita e tamarii òrurehau i roto i te ùtuafare, ua ìte te tamarii te metua te faatere, te reira ta te Atua i hinaaro, haavï iho, ia mana ò rua i nià i te mau mea atoà, te naò ra te auraa o te parau e mana. Haamaitaì mai ra te Atua ia raua, te tane e te vahine, no te mea tera te tahi vahi tätou e fifi ai i teie mahana, raua te Atua tera e parau ra, haamaitaì ia raua, teie nei o raua, tera tämaïti, tera tamähine, tera tane, tera vahine, e aha tä raua parau ia raua, e paraparau paì ia raua, taata rapae tera e parau ra ia raua, e ö raua nafea raua ia paraparau ia raua, e parau raua taua, e ö mai te taua, o òe e eo vau, teie mahana, teie te tahi manaò no Pauro, te naò ra o Pauro te tane tei upoo, èita e ère mea na reira ta te Atua, o òe e ö vau, manaò vau tera te reo e haapii faahou i ta tätou feiä âpï i teie mahana, e ère te tane o na te upoo, te auraa to na te rima rahi aè, e ère o òe e o vau, aita e ôpuaraa, aita te taua i roto o òe e o vau, hinaaro taua e fänau, o òe e o vau, te ôpuaraa o òe e o vau, te auraa te vai ra te taime e haapae te tahi i to na manaò, no te mea aita e àfaro ra i to te tahi, eiaha te reira e na nià noa i to na ètaèta, te parauraa e o vau tei upoo o te ùtuafare, e aha ia te tahi maite peu e. No reira tera paha te tahi reo, te tahi taò aita e vau e parau ra i te reo, tera te tahi taò e haapii faahou i ta tätou feiä âpï i teie mahana taua, o òe e o vau, i roto i te mau òhipa atoà e i roto i te oraraa, ia hiò tätou i teie mahana e aha te fifi e ìtehia nei, teie mau taata, teie mau tane e täparahi nei i ta rätou vahine, e ère te taua, aita ua hinaaro noa te reira tane e na nià noa o na i to na manaò, ta na i faaoti mea maitaì, aita horoà na vau i tera hiòraa e tuu atoà vau i mua ia tätou, hiò na tätou i te hoê tumu tiare e täno anei i te hoê ûmoa e parau i tera mau ûmoa atoà i nià i tera tumu tiare e mea mä faaea noa òutou, na ù e ùaa no tätou, aita, maite peu hoê noa ûmoa e ùaa no te toeà, e täpu i tera tumu tiare e àfaì e faaruè. Te tanoraa mau i ù nei, e piti ûmoa e ùaa taua, e tera ùaaraa taua, no te faahanahana i te Atua, e ère no reira ia ìte atoà tätou i te haapiiraa, e mea òhie roa te parau. Ia ìte atoà ra tätou e tei ô to tätou nunaa i te fifiraa, taua, o òe e o vau, no te mea e ôpuaraa na te Atua, tera te haamaitaìraa a te Atua i te taata, ia ìte te taata i tera parau e taua, ei ia faaaano rii aè o tätou, e aha te mea e haafaufaahia i ù nei, te parau ia riro i roto i te mau mea atoà ta tätou e rave, na parau e ìriti i te ùputa, te auraa e paraparau, ia òre anaè e paraparau, èita iho ä paha te vaha e parau, te rima paha te paraparau mai  aita te rima i ìte i te paraparau, e ère na te vaha iho ä e paraparau, e haapii faahou ia tätou i te paraparau i teie mahana, manaò anaè vau tera te mea ta te Atua e hinaaro ia ìte faahou tätou, paraparau faahou tätou, ia tätou iho, paraparau i te fenua ua ìte atoà te fenua i te faaroo i te parau, ua ìte te raau i te faaroo i te parau, e pähono te raau ia parauhia, e pähono te mataì, e pähono te miti, e paraparau atoà ra i te Atua, no te mea na te parau e ìriti i te ùputa o teie nei ao, na te parau atoà ra e ärataì ia tätou i roto i te ora, maite peu e haapiiraa ta ù e hinaaro ia täpeà tätou, tera te parau, mauruüru. Ua faatumuhia teie mau manaò i nià i na taiòraa e maha no teie mahana, teie atu ra te haapotoraa :  

-Taramo 97, 11 Ua ueuehia te märamarama na te feiä parau tià ra, e te òaòa na te feiä i tià te âau ra.

-Täniera 7, 14 E ua höroàhia mai ra te mana, e te hinuhinu, e te pätireia nö na, ia auraro mai te taata atoà, e te mau fenua atoà, e te reo atoà ia na. To na na mana, e mana mure òre ia, e òre ia e mou, e to na pätireia, e òre ia e pau.

-2 Pëtero 1, 17 I noaa hoì ia na i te Atua Metua ra te haamaitaì e te faateitei, a tae mai ai ia na taua reo no roto mai i te ànaana rahi ra e: «O ta ù Tamaiti here teie, ua mauruüru roa vau ia na.»

-Mätaio 17, 2 E faahuru-ê-hia iho ra o ia i mua ia rätou; ànaana aè ra ta na mata mai te mahana ra, e teatea aè ra to na àhu mai te märamarama ra.

Tätou i âmui mai i teie mahana, e ia ora tätou i te aroha, te here o te Atua Nui Tumu Tahi, ia haamaitaìhia te Atua no teie mahana maitaì roa, ta na i hohora faahou mai i mua ia tätou, teie parau no te ànaana ta te ìrava e faahiti nei, te mata ia o te mahana, e aha te ànaana, e àma ia tei faatupuhia mai roto mai i te puai o te rä, tei parau-atoà-hia te mahana. Teie ta tätou i ìte maitaì no te mea ua ö roa teie maitaì no te mahana i roto i to tätou oraraa, ua ìte maitaì tätou i to na faanahoraa, te vahi ra ta tätou e haapaò maitaì i roto i te vahi o te ànaana, naò ia tätou i te hiò te ànaana e parauhia nei, te taata tätaìtahi ia, e ère te ànaana noa e horoà ra i te märamarama, e te reira atoà mea e hinaarohia ra ia na. Mäite peu rä e tätou tera ànaana, ia taa maitaì atoà tera mea e hinaarohia ra ia tätou, ia maitaì noa te àma, te vai ra ta tätou tuhaa, ò ia hoì te àtuàturaa, i te teatea o te àhu tei faatupu i te märamarama, èi täuàparauraa i to na maitaì, e te vahi hau-roa-atu e te faahiahia maite peu e tütonu maitaì mai tätou. E aha te òhipa e ravehia e te ànaana àhiri na e aha te òhipa e ravehia e te ànaana ia ìtehia te mau ù ta te märamarama, e faaî noa ra to na mau nehenehe, tei tütuì, e aha te auraa e tütuì e tuu i te àma te auraa, e ère, e ère no te ànaana noa te àma, te àma mea tuuhia atu, maite peu mea tuuhia atu teie àma i nià i te ànaana e aita e ùiti faufaa òre te àma, tuuhia atu te àma ia ànaana. E au teie parau ta tätou i tupu i nià i te mouà no te faahuruêraahia o Ietu i mua i te mau taata i mäìtihia, o Petero, Iatöpo, o Ioane, tei haere mai e faaìte i te hiò no te hoê rämepa tei repohia tei òhene noa te àma i roto i te hiò tei òre i tämähia. E faufaa òre ia te maa i tuuhia, tuuhia atu te àma i roto i te repo o te hiò, no reira i tià ai teie âparauraa na Ietu i te mau tià no te Faaauraa Mätamua, o Mote te parau no te Ture, o Èria te parau a te mau perofeta, èi faaäraraa te vairaa i roto i te ture e te parau, ia vai tämau noa te àma o te tiàturiraa i te parau no te tiàfaahouraa o te Metia no te oraraa hau. I tià ai teie manaò i te parauraa e, e au atoà no tätou teie parau, i parau maitaìhia tätou o tätou te tahi rämepa haamanaò tätou e, maite peu e àma tätou e ère no tätou te àma, te àma e mea tuuhia mai, ua ìte atoà ia tätou i nià i te morï, ua rau te fäito àma ia ìte ra te morï tätaìtahi tera àma ta na e mau ra, a òaòa e a mauruüru, ia òre te tahi ia parau e, e aha ra e puai aè te àma o tera aè, hinaaro vau mäiteraa aè to ù àma aita, e àma o na i tera àma na na e faaìte, no reira eiaha te taata tätaìtahi ia faaäu ia na i te àma o te tahi, àma o na i te àma i horoàhia no na ua ravaì, hiò ta na i roto i te tahi ùtuafare, hoê morï i tuuhia te àma noa atu te naìnaì o te àma o teie morï ua ravaì ra no te tuu i te hau i roto i te âau o te tamarii tirärä mea e hinaarohia ra, hoê fare e àma rahi noa te morï èita te taata e taòto, e fifi te taòtoraa o te taata, no reira. Te rämepa maite peu tätou te rämepa tätou tuhaa te vai ineine-noa-raa no te färiiraa i te àma e tuuhia mai. E te àma i tuuhia mai no te horoà ia i te märamarama, e te märamarama e ère no tätou, aita faufaa tera àma no te türama noa i te rämepa, to na àma no te haamäramarama i te ùtuafare , no te haamäramaramaraa i te taata, no te horoà i te hau i roto i te taata, hiò na tätou i te tähi taata maite peu e parauhia o na e haere e tahu i te auahi, aita ia moè-roa-hia ia tätou mea nahea i te tahu i te auahi.

Ua ìte maitaì hoì tätou e e ravehia tera mau âmaa rii naìnaì roa na mua e faaàma i te reira, o tei parau-atoà-hia i te ahi ia àma i reira e tuu mai ai te àma huru rahi rii aè, eiaha e rave i te vahie rarahi, e pohe eiaha tätou e naò e e vahie maitaì teie, tera iho ä tahuraa atu ua pohe, aita tätou e haamaitaì ra i te ahi te faaìno ra no reira mea tuu märu noa ia àma mai tuu atu te mau maa ïti, e päpü roa atu te àma, ta tätou tera tuhaa i roto i te taata e faaàma, e tuu te àma i roto i te taata noa atu e àma naìnaì, e na nià iho ä i tera àma naìnaì i te haamata, maite peu e tuu tätou i tera âmaa rahi e pohe tera auahi, faufaa òre, e ära atoà ra no te mea, te vai ra te tahi pae e manaò ra rätou e ia faauehia rätou e haere e tahu i te auahi e haere rätou i mua i tera àma naìnaì i reira e üra ai, faufaa òre ia teie auahi e hinaarohia e faaàma maite peu e tätou te üra te vai atoà ra tera hohoà taata, e ère faauehia e haere e faaàma, e here e tuu i te àma, aita e haere o na i mua i te taata i reira o na e üra ai, no te haafaufaa òre ia teie üra naìnaì. E haapiiraa rahi mau teie e vai ra i roto i te ànaana mahana, te àhu teatea, e te märamarama, tei na rotohia i te ôriò mata o te Metia i te taime i faahuruèhia o ia. Naò ia tätou o te tahi òhipa âpï teie e tupu nei i nià i teie mouà i te tahi vahi haumärü e te maitaì i te faarooraa i te reo o te Atua Nui Tumu Tahi,  O ta ù Tamaiti here teie, ua mauruüru roa vau ia na. A faaroo ia na, e reo Metua no te ùtuafare faaroo i Mäòhi Nui èi faatupu tämauraa i te ora.

 Teraì òr. Faatura.

 

Mätaio 13.44-52 Ihaiha

 

Tāpati  30 no Tiurai 2023.

Ihaiha

Taramo 119.121-136.

121 Ua faatupu vau i te parau tià e te au, eiaha e faaruè noa ia ù i te feiä hämani ìno mai.

122 Ei tauturu òe no to tävini ia maitaì o ia; eiaha te teòteò e hämani ìno mai ia ù.

123 Ua pöuri ta ù mata i te tiaìraa i te ora na òe, e i te parau o ta òe ra parau tià.

124 O ta òe e rave i to tävini nei, ia au ia i to òe ra aroha, e haapii mai hoì ia ù i ta òe ra mau ture.

125 O to tävini hoì au, e haapii mai ia ù, ia ìte au i ta òe i faaìte mai ra.

126 O te taime teie, e te Fatu, ia faatupu i te parau au ua faaòre hoì rätou i ta òe ra ture.

127 Hinaaro rahi to ù i ta òe parau i te àuro, i te àuro i mä maitaì ra.

128 E teie nei, te parau nei au i ta òe ra mau parau atoà e mea tià anaè, te riàrià nei rä vau i te mau èà haavare atoà ra.

129 E mea maerehia ta òe ra mau parau i faaìtehia mai, i haapaò ai hoì ta ù värua i te reira.

130 Tei te heheuraa o ta òe ra parau, e noaa ai te märamarama, e noaa ai hoì te ìte i te taata ìte òre ra.

131 Ua hämama vau i ta ù vaha mä te ihaiha, ua nounou hoì au i ta òe parau.

132 E haapaò mai òe ia ù, e aroha mai hoì ia ù, mai ta òe ra hoì i te feiä i hinaaro mai i to òe ra iòa.

133 E faaau na òe i ta ù haereà i ta òe ra parau, e eiaha te ìno nei ia faahepo mai i nià ia ù.

134 E faaora òe ia ù i te hämani ìno o te taata nei, ei reira vau e haapaò ai i ta òe ra mau parau.

135 E faaànaàna mai i to mata i nià i to tävini nei; e haapii mai hoì i ta òe ra mau ture.

136 Te manii pape noa nei ta ù roimata, no te mea aore te taata i haapaò i ta òe ra ture.

1 Te mau Arii 3.5-12

5 I Tipeona to te Fatu färaa mai ia Töromona i te taòto i te pö; ua parau mai ra te Atua, A ani mai i tä ù e höroà atu na òe ra.

6 Ua parau atu ra Töromona, e aroha rahi to òe i ta ù metua, i to tävini ia Tävita, o ia hoì i haapaò i te tià o ta na âau ia òe, e te parau mau, e te parau tià; e ua vaiihohia e òe teie nei maitaì rahi nö na o òe i höroà i te tahi tamaiti nö na ei pärahi i nià i to na teröno, mai tei teie nei ä mahana.

7 E teie nei, e ta ù Atua, e te Fatu, ua faariro mai òe i to tävini nei ei arii, ei mono aè i ta ù metua ia Tävita: e taata âpï hoì au; aore au i ìte maitaì i ta ù nei haapaòraa.

8 Tei röpü hoì to tävini nei i te mau taata no òe, i mäìtihia e òe ra, ei feiä rahi roa, eita e hope ia tataù, eita e tià ia taiò i te rahi.

9 E teie nei, ei âau ìte ta òe e hö mai no to tävini ra, ia tià ia parau i teie nei feiä, ia ìte au i te maitaì e te ìno: aore ra, o vai te tià ia parau i teie nei feiä rahi no òe ra?

10 Tià aè ra taua hinaaro o Töromona ra i te Fatu.

11 Ua parau atu ra te Atua ia na, no te mea i nä reira mai ta òe ani, aore òe i ani mai ia haamaorohia to òe aho; aore hoì i ani mai i te taoà rahi na òe iho; aore hoì i ani mai e ia pohe to mau ènemi; ua ani mai rä i te ìte ia ìte òe i te mea tià ra;

12 Inaha, tià ia ù to hinaaro: inaha, ua tià ia ù to hinaaro: inaha, te höroà nei au i te âau haapaò e te ìte i te parau; aita e fäito e au ai ia òe mai mütaa iho mai ä, e aita atoà e fäito e au ia òe a muri atu.

Röma 8.28-30.

28 Ua ìte hoì tätou e, te faatupu nei te mau mea atoà i te maitaì no te feiä hinaaro i te Atua, te feiä i parauhia mai i te ôpuaraa na na ra.

29 O ta na i ìte i mütaa iho ra, o ta na atoà ia i haapaò ätea noa ia faaauhia mai ta na Tamaiti ra te huru, ia riro o ia ei mätahiapo i te mau taeaè atoà e rave rahi ra.

30 E o ta na hoì i haapaò ätea noa ra, o ta na atoà ia i parau mai ra, e o ta na hoì i parau mai ra, o ta na atoà ia i faatià; e o ta na hoì i faatià ra, o ta na atoà ia i hopoi i te ao.

Mätaio 13.44-52

Te taoà e te poe

44 E au ä te Hau o te raì i te taoà hunahia i roto i te hoê âua, e ìteä iho ra e te hoê taata, huna mäite iho ra o ia, e no to na òaòa, hoo atu ra o ia i te täatoà o ta na taoà atoà, hoo mai ra i taua âua ra.

45 E au ä te Hau o te raì i te hoê taata hohoo tei ìmi i te poe maitataì:

46 e ìteä iho ra ia na te hoê poe maitaì roa ra; haere atu ra o ia hoo atu ra i te täatoà o ta na taoà, hoo mai ra i taua poe ra.

Te ùpeà

47 E au ä hoì te Hau o te raì i te ùpeà i tuuhia i raro i te tai e o tei àti/î i te ià e rave rahi te huru:

48 e àti aè ra, ua ùmehia mai ra i uta, pärahi iho ra (te feiä ravaai), haaputu iho ra i te ià maitataì i roto i te färii/àraìri, faaruè atu ra rä i te ïà ìino.

49 Oia atoà ia tae i te hopeà o teie nei ao, na te mau merahi e haere mai e faataa i te feiä ìino mai roto atu i te feiä parau tià,

50 a huri atu ai i te feiä ìino i roto i te umu auahi; tei reira te òto e te àuàuraa niho.

Püòhuraa.

51 Ua märamarama änei òutou i teie atoà nei mau parau? Ua pähono mai ra rätou: Ê.

52 Ua parau atu ra o ia ia rätou: No reira, te päpaì parau tei haapiihia i te parau o te Hau o te raì, e au ia i te fatu fare, o tei hopoi mai i te mea âpï e te mea tahito no roto i ta na ra puèraa.

Manaò.

Ihaiha :

Iha, s. anger, high displeasure.  I'. 11. to be much displeased.

Iha, te riri, te riri rahi. I'. 11. Au-òre-hia, mauruüru òre.

Ihaiha, v. n. to be panting because of oppression by heat.

Ia haùti no te mea ua haavïhia òutou na roto i te veàveà.

Te feia e farii nei, e faaìte mai, i te hauà.

Teie ia te huru faanahoraa no teie taò, i te faaìteraa a te faatoro a Tihoni DAVIES, te taò tumu e Iha, tei faaìte i te riri e te mauruüru òre, te ihaiha, tei haùti noa i te mea te haavïhia ra i te veàveà tei faatupu i te ahu o te âau, e parau-atoà-hia ia hauà e ihaiha. Te türama nei teie taò te ihaiha e haamori i te Atua Nui Tahi ma te î te vaha i te haamaitaì ma te faahanahana i te ôpuaraa e faanaòhia nei e tätou i teie ao nei. Naò noa ia teie manaò i te parauraa e, te parau ihaiha e taò e repo e aita e pape faahou to roto, e no te mea e aita e pape faahou, aita e ora na roto faahou mai ia na, e pee noa ò na i te mataì, e taoà faufaa-òre tera, aita e oraraa faahou. Oia atoà te vahie tei pau i te àma. Aita atoà e maitaì faahou i roto ia na. I mua ra, e tumu raau, ua hotu i te maa, muri mai ua àma, ua riro ei raveà tünuraa i te maa a te taata no te höroà i te ora. Ia pau ra to na maitaì, tera ia te toe, e rehu. No reira, na roto i to te taata raveraa i teie na täpaò, te repo puehu, te tahi repo tei òre e horoà faahou mai i te ora, e to na hoì raveraa i te rehu auahi, oia hoì te vahie tei pau to na maitaì, te faaìte ra te taata e, mai tera atoà ò na. I nià i te repo puehu, ua rave i te rehu auahi ta na tuhaa, hoê ä to na faufaa-òre-raa e teie na repo. E au ra, na roto i tera na täpaò, te faahoì faahouhia ra te mau mea atoà i te huru o te taata hou te parau, hou te taime o te Atua Nui Tumu Tahi i parau ai, ei märamarama  te auraa ; i te huru o te fenua hou te parau. No te mea, i roto i teie na täpaò, te faaìte atoà ra te taata e, aita ta na e raveà faahou, mai tera repo aita e pape to roto, mai tera vahie tei riro mai ei rehu, te tiaì atoà ra ò na i te parau, te parau e faaìte mai ai te Atua i te täpaò o to na aroha, te parau e ìriti i te ùputa o te ora, e ora faahou mai ai ò na. Aita atu paha e täpaò mai teie i te puai, i roto i tera faaìteraa i te haehaa o te taata e te puai o to na tiàturiraa, na roto noa i teie na täpaò no te repo puehu e te rehu auahi. Te auraa, i roto i teie faanahoraa, te hinaaro nei te Atua i te taata ani ia riro ò na, ò na aè te taata höroà i teie nei. Mai tera ta na e tiaì ra i te Atua ia höroà mai, ia ìte ò na e, te tiaì atoà ra te tahi ia horoàhia mai, e ò na iho e tiaì ra, ia haamanaò ò na e, na na e faatupu i te mea o ta te tahi e tiaì mai ra. Tei ô te taata i te tiaìraahia mai i roto i teie auraa ta te manaò e faaìte nei. Ta te Atua e höroà nei, e ia hiò maitaì-anaè-hia, te parau a te Tamaiti i atea atu i ta te Metua. Te mea ta te taata e hinaaro no na, mai te peu e haamanaò tätou i tera ture ta Ietu e haamanaò noa ra, tei parau-ê-hia mai na e te Metua, « here i te täuaro mai to òe here ia òe iho », te auraa ; aita e hereraa i te Atua tei òre i riro atoà ei faatupuraa atoà i te here i nià i te taata. Te reira te mea o ta te Atua e hinaaro nei ia haafaufaahia. Te auraa, faaruè, i te tahi taime e vaiiho rii i te faanahoraa, te mau peu i matauhia, noa atu te faufaa o te reira mau peu, no te faatupu i te mea ta te taata ani e hinaaro ra no na. Mai te peu te taata ani te ìte ra e te hinaaro ra ò na no na, e aha paì ia te huru o te feia tei òre i ìte e nahea i te ani. Mai tera rii atoà ihoä ta Tara e parau, o Tara tei paari, rüàu roa, o Tara tei àta, te haereraahia mai e parau e, e fänau òe, o Tara tei parau e, e aha e ìte faahou ia vau i te navenave, ua rüàu, e aha te mea te òre e tià i te Atua ia rave. Teie te tahi tauturu i roto i teie mau ìrava e maha no teie mahana :

-Taramo 119, 131 Ua hämama vau i ta ù vaha mä te ihaiha, ua nounou hoì au i ta òe parau.

-1 Mau Arii 3, 9 E teie nei, ei âau ìte ta òe e hö mai no to tävini ra, ia tià ia parau i teie nei feiä, ia ìte au i te maitaì e te ìno: aore ra, o vai te tià ia parau i teie nei feiä rahi no òe ra?

-Röma 8, 28 Ua ìte hoì tätou e, te faatupu nei te mau mea atoà i te maitaì no te feiä hinaaro i te Atua, te feiä i parauhia mai i te ôpuaraa na na ra. 

-Mätaio 13, 51 Ua märamarama änei òutou i teie atoà nei mau parau? Ua pähono mai ra rätou: Ê.

 

O Ietu te haapäpü ra, e tià i te Atua i te faatupu i te mau mea atoà tei au i te Aroha e te Here, ia ui o Ietu ua märamarama òutou, te auraa i te mua parapore e faatiàhia te ìte nei o Ietu e mau repo puehu teie e vai nei i mua ia Na, e mau rehu auahi, te faaìte ra, te tiaì mai ra ia tiàturi te taata, i ta te e faatupu te Atua i te òhipa maere mai roto mai, i te taoà rahi, te poe, e te ùpeà. Na roto mai ihoä i te Atua te ora, mea na roto mai ihoä ia Na te hoì faahouraa mai te maitaì, te òaòa e te hau i roto i te âau o te taata tei hinaaro ia ìte mai te Atua i to na peàpeà rahi. Amui anaehia teie na täpaò no te hau e i raro faahou atu ä ia i te fäito hopeà o te haehaa, te repo e te rehu, te faaìte ra te taata e, aita atu e mea e matara ai to na fifi, aita atu e mea e ìte ai ò na i te oaoa, te maitaì e te hau, te ora, maoti ra ia parau, ia parau mai te Atua, te parau ia no te mau parapore. Te reira te mea o ta na e tiaì ra, te parau e ìriti i te ùputa o te märamarama. E parau te Atua, e ora ia. Mai te reira atoà te taata i mua i teie repo, te tiaì atoà ra i te parau, tera parau e ìriti faahou i te ùputa o te ora. No te mea, i ô mai i te repo puehu, aita e ora faahou, i ô mai i te rehu auahi, e aha anaè atu ä, aita faahou. E te reira te täpaò ta te taata i rave, ta na i tuu i nià ia na. Te auraa ; to na faufaa-òre e tera faufaa-òre to te repo puehu, tuea noa, aita atu e raveà e ìte ai i te tahi maa vahi ïti huru maitaì aè, ia parau. Te ìte ra tätou i te rahi o te auraa o teie täpaò o te repo puehu, e te rehu auahi.

Te faahohoàraa e au ia ìte i roto i na parapore e toru e faatiàhia nei e Ietu, no te ao âpï i reira te Atua e pii ai ia òe, e au ia i te taoà rahi i hunahia i roto i te àua i roto i te âau. Te taata e märamarama i te aniraa a te Atua, e au ia o ia mai te hoê taata hohoo e ìmi ra i te mau poe nehenehe teie ia te tahi tatararaa. Te taoà faufaa, o te hoê ia mea faufaa roa, noa atu e aita te reira i faataa-maitai-hia. E nehenehe e parau e, te tahi mea faufaa roa  e aore rä, te hoê taoà moni rahi. Ia parau-anaè-hia e, ua hunahia te reira, te auraa ra, ua hunahia ia. Eita te tahi mau reo e nehenehe e faaòhipa i te hoê parau faatià e e tïtau rä te reira i te hoê taata tei hunahia e aore rä, tei hunahia i roto i te faaapu. E nehenehe te parapore e faanahohia na roto i te mau raveà huru rau. E òhipa moni rahi tei hunahia i roto i te hoê àua. Ua ìte te hoê taata i te reira e aore rä, Te hoê taata tei roohia i te àti e aore rä ua ìte te hoê taata i roto i te hoê faaapu i te hoê taoà moni rahi tei hunahia i reira. Ua täpoì oia i te reira. E taa-maitaì-hia te taata mai te hoê taata rave òhipa i te mahana aita ta na e faufaa. A rave ai oia i te òhipa i roto i te àua a te tahi atu taata, ua ìteä mai ia na ma te manaò-òre-hia te hoê taoà i hunahia i reira e faaòhipahia ai i te tauàraa parau, te tahi ia manaò tumu no Ietu ia faatià parapore o ia i te parau.

I te tau o Iesu, e peu matauhia e te taata ia huna i ta rätou mau taoà faufaa aore ra ia huna i te reira i te ateä ê i te fare ta rätou e faaea ra, ia ore rätou ia èiahia e te feia èia. No reira, te vai ra te hoê mea o te taa-òiòi-hia e te feiä e faaroo ra ia Ietu. I to na faatiàraa i teie parapore, aita o Iesu e faahapa ra aore ra e faahapa ra i te mau òhipa a taua taata ra. Te faahiti nei rä o ia i te ära-maite-raa i nià i te paari e te àravihi o te taata na roto i te hooraa i ta na mau taoà atoà ia noaa mai teie taoà faufaa roa. Èere i te mea faufaa ia navaì te moni e noaa mai i te hoê taata rave òhipa i te mahana no te hoo mai i te âua. E peu matauhia te faarahiraa i roto i te mau parapore, e ua hämanihia teie mau tuhaa no te turu i te faahopeàraa e te auraa no te täatoàraa no te parau i faahitihia e Ietu. I roto i to na òaòa, ua tuuhia te reira i nià i te hoê tiàraa päpü maitaì.

Te faahohoà nei teie parapore no te Poe Taoà Rahi i te faufaa hope o te patireia o te Atua, e tae noa atu i te tïtauraa i te rü e te täviniraa no te tomoraa i roto. Te tiàturiraa e vai nei i roto i te ìmiraa i te Poe Taoà Rahi e òhipa teie na te Atua i te raveraa i teie tuhaa, èi faaìteraa e te òhipa noa nei te Värua o te Atua i roto i te taata.

Ua haafaufaa-rahi-hia te mau poe e te mau taata i te tau o Ietu, i te faaìteraa a te Àpotarupo i te pene 18 i te ìrava 21 ua âmuihia rätou i te auro, e te ârio, e te mau ôfaì maitataì ei taoà täpihooraa. Te hinaaro nei o Ietu e faaìte i te faufaa o te taata i te faaauraa i te mau taoà faufaa rahi i te ao nei, e au atoà i teie parauraa a te Materi i te pene 31 i te ìrava 10, O vai ia  taata ua ìteä ia na te vahine maitaì ra? E òre te mau poe nei e au ia na. Te haapäpü noa mai ra te reira i te faufaa rahi o te taata i mua i te ôpuaraa faaora a te Atua Nui Tumu Tahi.

Te parapore no te ùpeà e au i te patireia o te ao, Ia tae anaè mai te ao âpï a te Atua, e au ia mai te hoê ùpeà No te rave i te tahi atu faahohoàraa, te mea e tupu i roto i te patireia o te Ao ra e au ia i te òhipa i tupu a täorahia te hoê ùpeà i roto i te moana, e hohoà ia teie no te ômuaraa o teie nei ao i te matahurahuraraa i faatiàrepu ai te Atua Nui Tumu Tahi i to na Värua i nià i te ìriatai. Teie ùpeà a te Atua e mau te huru ïà atoà i nià ia tae to na tau mau ra i reira te mau Merahi a te Atua e haere mai ai e tii i te mau tamarii a te Atua, e te mau tamarii a te tiàporo ra, na te Tiàporo te reira e tii mai, te huru teie te haaväraa ia tae i taua tau ra. Te faaìte noa mai nei na parapore e toru nei, te taoà rahi i hunahia, te poe i ìmihia, te ùpeà toro, e ùputa teie no te faatupuraa i te âparauraa, te parau no te fenua, i roto i te taata, e i nià i te Moana Nui a Hiva. Ia päpaìhia teie mau parau no te faatupu te faaâpïraa, ia ìtehia te mau òhipa tahito. I ui ai o Ietu e, 51 Ua märamarama änei òutou i teie atoà nei mau parau? Ua pähono mai ra rätou: Ê.

Teraì òr. Faatura.