Ruta èv. 6.17-26 Ua hiò.

 

Tāpati 13 no Fëpuare 2022.

Ua hiò.

Taramo 1

Tänuhia

1 E ao to te taata, aore e faaau i to na haereà i te aò a te paieti-òre, aore i taahi i te èà o te feiä rave hara ra, e aore hoì i pärahi i te pärahiraa o te feiä tähitohito ra.

2 O  tei hinaaro rä i te ture a te Fatu, e tei ta na ture to na manaòraa i te ruì e te ao.

3  E au o ia i te räau i tänuhia i te hiti ânävai ra: o tei hotu i to na ra tau mau, e o tei òre roa i mäheahea to na rau. Oia atoà tä na e rave, te maitaì ra ia.

4 Eere mai te reira te feiä paieti-òre ra: e au ia i te ota e puehu noa i te mataì ra.

5 E òre e mau ai te paieti-òre i te haaväraa, e te rave hara i te âmuiraa o te parau tià ra.

6 Te au mai ra hoì te Fatu i te haereà o te parau tià ra, âreà te haereà o te feiä paieti-òre ra, o te pohe ia.

Ieremia 17.5-8

Mataù

5 Aita òe i hämanihia e au i roto i te ôpü o to metua vahine, i ìte ai au ia òe; e aita òe i fänau, i faataahia ai òe e au ei perofeta na te mau fenua.

6 Ua parau atu ra vau, âuë e te ATUA, e te Fatu e, aore hoì au i ìte i te parau; e tamaiti iti hoì au,

7 Ua parau mai ra te Fatu ia ù, Eiaha e parau, e tamaiti iti au: o tei tonohia òe e au ra, o ta òe ia e haere; e o ta ù e faaue ia òe ra, o ta òe ia e parau,

8 Eiaha òe e mataù i to rätou mata; ei pïhaì atoà iho hoì au ia òe ei faaora ia òe, te parau mai ra te Fatu.

1 Tōrīnetia 15.12-20

Mätamua

12 Te parau-haere-hia nei te Metia e, ua tiàfaahou o ia i te poheraa ra: e aha i parau ai te hoê pae o òutou e, aore e tiàfaahouraa to tei pohe?

13 Aore e tiàfaahouraa to tei pohe ra, aore atoà te Metia i tià i nià;

14 e aore te Metia i tià i nià ra, e haavare mau ta mätou aò nei, e e haavä atoà to òutou faaroo.

15 Ua riro hoì mätou ei ìte haavare na te Atua; no te mea ua parau mätou i te Atua e, ua faatià o ia i te Metia; aita mau e faatiàhia tei pohe ra, aore ia o ia i faatià ia na.

16 Eita hoì e faatiàhia tei pohe ra, aore ia te Metia i faatiàhia.

 17 E aita hoì te Metia i faatiàhia ra, e mea faufaa òre to òutou faaroo; te vai noa na ia òutou mä ta òutou hara atoà.

18 E te feiä atoà i maìri te taòto i roto i te Metia ra, ua mou ia i reira.

19 Tei teie nei ao anaè ra ta tätou e tiaì i te Metia nei, e àti rahi to tätou i to te taata atoà.

20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra.

Ruta èv. 6.17-26

Ua hiò.

Ietu e te taata e rave rahi

(Mät 4,23-25; Mär 3,7-11)

17 Ua pou mai ra o ia i raro e rätou atoà, e faaea iho ra i te vähi päpü. Tei reira te tahi pae pipi a ana e te taata atoà e rave rahi, no Ierutarëma e no te mau vähi atoà i Iutea ra, e no te pae tähatai i Turia e Titona, i haere mai e faaroo ia na, e ia faaorahia rätou i to rätou maì;

18 e te feiä atoà i haapeàpeàhia e te värua faufau ra, faaora-atoà-hia iho ra rätou.

19 Ua tïtau mai ra taua feiä rahi atoà ra e faatiàià mai ia na, te püpü atu ra hoì te mana nä roto ia na e ora roa aè ra rätou atoà.

Te òaòa e te àti

(Mät 5,1-12)

20 Ua hiò atu ra ta na mata i ta na ra mau pipi, e ua parau atu ra: «E ao to òutou e tei haèhaa, no òutou hoì te Pätireia o te Atua ra.

21 «E ao to òutou e tei poìa i teie nei, e faaîhia hoì òutou «E ao to òutou e tei òto i teie nei, e àta hoì òutou.

22 «E ao to òutou ia riri mai te taata ia òutou, e ia faataa ê ia òutou, e ia tähito mai, e ia faaruè noa i to òutou iòa mä te faaìno, no te Tamaiti a te taata nei.

23 E òaòa i te reira mahana, e ôuòuà noa i te òaòa, ua ìte hoì òutou e e utuà rahi ta òutou tei te ao. I nä reira mai hoì to rätou hui tupuna i te mau perofeta ra.

24«E àti rä to òutou e te feiä taoà rahi, ua noaa hoì to òutou òaòaraa.

25 «E àti to òutou e te feiä i î na, E poìa hoì òutou. E àti to òutou e te feiä i àta i teie nei, E mihi hoì òutou e e òto.

26«E àti to òutou ia haamaitaì mai te taata atoà ia òutou. I nä reira hoì to rätou hui tupuna i te mau perofeta haavare ra.»

Manaò.

Mai te taata e hià ra i te räau ia noaa mai te pura auahi, mai te reira atoà te òhipa ta rätou e rave ra. Eere rä i te hiàraa mätamua e noaa mai ai te pura auahi. Te hiroà atoà ra ia tätou e, no te rahi o to tätou manaò faahapahapa e te tähitohito, e faahoì noa ai te Atua ia tätou i te haamataraa o to tätou parau, mai te tahi taata tei ihu, e tei hoì faahou, aore ra tei faahoì-faahou-hia i te vähi i hahi ai o ia, no te faatïtïàifaro mai i to na èà. Ua ìte maitaì tätou e, i teie mahana, ua ätea roa tätou i te fenua, ua ätea roa i te mau haapiiraa i arataì mai i te mau metua, e aita tätou e òhie nei i te färiiraa i te parau no te hoìraa. Te tupu nei te mau peàpeà i roto i to tätou mau ùtuafare, no te òhipa òre, te moni òre, teie mau faanahoraa no roto mai ai tera mea ta tätou e parau ra e oraraa faahiahia, vävähi te fenua no te hoo, òvere atu ra i nià i to na iho fenua.

E au rii i te tahi mau taata to tätou tei faaruè i te fenua no te haere i te ara e ìmi i te tahi oraraa hau atu i te maitaì, ia topa rätou i roto i te fifi, ia ìte i to rätou hape, ua haamä i te hoì i te vähi no reira mai rätou. No reira, haamanaò noa tätou e, aita e fifi to te hape, te òreraa rä e färii i te haamata âpï faahou, te reira te mea peàpeà. Te tamarii nei, ia paapaa te rima i te auahi, e faaea o ia i te faatoro i te rima i te vähi i mauiui ai o ia, âreà i teie ta tätou e ìte nei i teie mahana, rahi noa atu te taata i te mauiuiraa, rahi noa atoà atu to na onoöno i te haere i te reira vähi. Ia faaroo ra tätou i te mau parau taiòhia e tätou e naò ia tätou i te parau e, te höroà mai nei teie mau taiòraa i te tahi hiòraa âpï i nià i te mau tïtauraa a te Atua Nui Tumu Tahi, ia tià ia tätou ia ìte faahou i te ora e vai ra i Mäòhi Nui nei :

-Taramo 1, 3 E au o ia i te räau i tänuhia i te hiti ânävai ra: o tei hotu i to na ra tau mau, e o tei òre roa i mäheahea to na rau. Oia atoà tä na e rave, te maitaì ra ia.

-Ieremia 17, 8 Eiaha òe e mataù i to rätou mata; ei pïhaì atoà iho hoì au ia òe ei faaora ia òe, te parau mai ra te Fatu.

-1 Torinetia 15, 20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra.

-Ruta èv. 6, 20 Ua hiò atu ra ta na mata i ta na ra mau pipi, e ua parau atu ra: «E ao to òutou e tei haèhaa, no òutou hoì te Pätireia o te Atua ra. 

I te reo o teie mau ìrava te haapäpü mai nei te reira ia tätou i te parau no ta tätou hiòraa i te hohoà o Mäòhi Nui i teie mahana, naò ia i te parauraa e ua ö Mäòhi Nui i roto i te hoê faanahoraa te au ia âpeehia na roto i te mau haapiiraa no te fenua, te moana e te reva. I te mea te Atua Nui Tumu Tahi èita i te hoê Atua no te òhipa pohe no te ora ra. Te taata teie e parauhia nei e tauturu te rähu a te Atua i te mau faanahoraa ia tupu tämau te ora i roto i te taata te riro nei te mau maitaì èi tïteàmata no hiòraa i te aroha e te here mutu òre, ia Atua te Atua, ia fenua te fenua, ia taata te taata, ua maitaì roa. Taiòiò noa ai tätou i teie mau parau, te uiui noa ra paha te manaò o te tahi i te tüàtiraa o teie parau no te fenua ei tïteàmata no te ìte, i teie mau parau e faahitihia nei e Ietu : no te òaòa e te àti,

-E ao to òutou e tei haèhaa, no òutou hoì te Pätireia o te Atua ra.

-E ao to òutou e tei poìa i teie nei, e faaîhia hoì òutou

-E ao to òutou e tei òto i teie nei, e àta hoì òutou.

-E ao to òutou ia riri mai te taata ia òutou,

-E òaòa i te reira mahana, e ôuòuà noa i te òaòa,

-E àti rä to òutou e te feiä taoà rahi, ua noaa hoì to òutou òaòaraa.

-E àti to òutou e te feiä i î na, E poìa hoì òutou.

-E àti to òutou e te feiä i àta i teie nei, E mihi hoì òutou e e òto.

-E àti to òutou ia haamaitaì mai te taata atoà ia òutou.

Teie mau faahitiraa parau a Ietu mai te tïteàmata te huru e tià e tauturu i te taata i te hiòraa e te ìteraa, e tauturu atoà te fenua i te taata i te ìteraa e te färiiraa ia na iho nä mua roa, e tauturu ta na mäa ia na i te ìteraa o vai rä o ia, no te mea e tämä te fenua i te taata, e faaâpï hoì i ta na hiòraa, e ta na märamaramaraa i te oraraa, i te vähi ta te Atua i haapärahi ia na. Te mea ia ta tätou e parau nei e, te hiroà tumu, te hiroà mäòhi.

Te varovaro nei teie reo no Atua  e parau ra ia Ieremia : 5 Aita òe i hämanihia e au i roto i te ôpü o to metua vahine, i ìte ai au ia òe; e aita òe i fänau, i faataahia ai òe e au ei perofeta na te mau fenua. Te mea tei riro ei parau àro no Ieremia, ua orahia mai e to tätou mau tupuna i roto i te parau no te tänuraa i te püfenua, ia òre ia tupu faahou ia tätou teie fänau-faahou-raa ta te fenua e faaìte noa mai ra, e piri te ùputa o te pätireia, èie ä ia tätou e perehahu noa nei. I nià i teie èà hoìraa to tätou i te Atua ra, e mata na i te rave i te tïteàmata ta tätou i haapae roa, mai te hiroà òre e te färii òre e, o te tumu ia i àti noa ai to tätou mau haereà atoà, e òre ai hoì tätou e matara i roto i te oraraa. Ia hiòhia te rahiraa o te òhipa ta tätou e rave nei, no te tahi te mata, na te tahi e hiò nei no tätou ; no te tahi te manaò, e na te tahi e parau mai ra i te mea e au no tätou, te manaò tiàturi-roa-hia aè ia e tätou, e ua tae roa tätou i te färiiraa e, aita ihoä ta tätou e hiòraa, aita e parau, no te mea aita tätou. Tei parauhia mai i te mau metua, tei haapiihia ia rätou, e haere noa i reira ; ta te mau mitionare i haapii mai, e faaea noa i reira, eiaha e faaòhipa rahi i te manaò. E parau mau ihoä ia, ua ìte atoà rä tätou e, te metua, ia tae i te tau, e tuu o ia i te rima o te tamarii, e faaruè hoì te tamarii i te rima o te metua, no te mea eita te metua e tano e haere no te tamarii. Te vai ra teie taò ta tätou, àimama, no te hoê taata, ua paari, aita ä rä i faaruè i nä metua, e au atu ra e, na te metua noa ä e mama ra i ta na mäa. Ia òre te metua ia haere i te ïtiraa, nä hea te tamarii e haere ai i te rahiraa. E au tätou i teie mahana i te tamarii tei haamätauhia i te faaea naìnaì noa, tei haamataùhia i te rave i to na iho mata no te hiò i to na èà. Aita Ietu i mataù i te raveraa ite fenua ei tïteàmata no na ia parau o ia i te hotu o te fenua e : to ù tino tenä, a rave a àmu ; to ù toto tenä, a rave a inu. Ua tauturu te fenua ia Ietu i te ìteraa o vai o ia, ua horoà te fenua ia na i te märamarama i ìte ai o ia i te auraa o ta na òhipa, no reira mai hoì te püai ta na i faaòhipa no te faatupuraa i te hinaaro o te Atua, e aha ia te fenua e òre e tauturu atoà ai ia tätou i te faatupuraa i te hinaaro o te Atua. Mai ta Pauro e parau ra : 20 Ua tiàfaahou mau rä te Metia i te poheraa ra, e ua riro ei mätamua no te feiä i maìri te taòto ra, e tano atoà tätou e parau mai te täuruuru òre te manaò e : tei roto to tätou ora i te fenua, e taua ora ra, to tätou ia märamarama, te auraa, ia märamarama e ia färii tätou i te auraa o te fenua, ua ora tätou, no te mea te reira te èà, te parau mau, e te ora. Te mea ta tätou e parau nei e, te fenua, te ùputa o te raì. No reira, mai te peu ua ìtehia ia tätou te ùputa, e aha ia te mea tätou i pärahi noa ai i räpae, e tomo anaè, e hoì anaè i te Atua ra, te tiaì mai ra te Atua ia tätou.

 

Teraì or. Faatura.

 

 

Ruta èv. 5.1-11 Pee

 

Tāpati 6 no Fëpuare 2022.

ÔROÀ

Pee

Taramo 138

To rima.

1 Na Tävita. E haamaitaì au ia òe, e te Fatu, mä ta ù âau atoà nei, e himene au ei haamaitaì ia òe, i mua i te aro o te mau atua.

2 E haamori tià atu vau i to nao moà ra, a haamaitaì atu ai i to òe iòa, e te Fatu no to òe aroha e ta òe ra parau mau: ua faarahi hoì òe i ta òe parau ia hau atu i to iòa atoà ra.

3 I te mahana i tiàoro atu ai au ra, ua parau mai òe ia ù; e ua horoà mai i te itoito i ta ù värua.

4 E hope te mau arii atoà o te fenua nei i te haamaitaì ia òe, e te Fatu, ia ìte rätou i te parau a to vaha.

5 E himene rätou i te mau parau a te Fatu: «E hanahana rahi hoì to te Fatu.

6 Teitei noa ä te Fatu, e haapaò mai ä o ia i tei haèhaa, âreà tei teòteò, ei te ätea ê o ia e hiò mai ai.»

7 Ia haere noa vau nä roto i te àti ra, e faaànaànaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù.

8 Na te Fatu e nä reira mai ia ù, e tià to òe aroha, e te Fatu, i te vai-mäite-raa; eiaha na òe e faaruè i te òhipa a to rima.

Ìtaia 6.1-8

Teie au

Te tïtauraahia o Ìtaia

1 I te mätahiti i pohe ai te arii ra o Ûtia, hiò atu ra vau i te Fatu i te pärahiraa i nià i te teröno teitei e te teniteni; e ua î hoì te hiero i te hiti àhu roroa no na ra.

2 Te tià noa ra nä teräfi i nià aè: taìono o rätou atoà ra pererau; o e piti ra, ei täpoì ia i to na mata, o e piti ra, ei täpoì ia i ta na âvae, o e piti ra, ei maùeraa ia.

3 Ua pii iho ra rätou te tahi i te tahi, nä ô aè ra, E moà, e moà, e moà, O te Fatu manahope, ua î te fenua atoà nei i to na ra hanahana.

4 Ua turorirori iho ra nä pou i te tomoraa ra i te reo o to rätou piiraa; î aè ra hoì te hiero i te au auahi.

5 Ua nä ô aè ra hoì au, Âuë hoì au nei e ua mämü iho nei au; e taata vaha viivii hoì au, e tei rotopü hoì au i te mau taata vaha viivii atoà i te pärahiraa: ua hiò hoì ta ù mata nei i te arii, i te Fatu manahope ra.

6 Ua maùe mai ra te hoê teräfi ia ù nei; e tei ta na rima te hoê àrahu àma, i ravehia mai e ana i te faahöhoni no nià mai i te fata na.

7 Ua faatiàià mai ra i ta ù vaha, nä ô mai ra, Inaha, ua faatiàiàhia to ùtu i teie: ua faataa-ê-hia to òe piò, ua faaòrehia ta òe hara.

8 Ua faaroo atu ra vau i te reo o te Fatu, i te nä-ô-raa e, O vai ta ù e tono; o vai te haere no tätou? Ua parau atu ra vau, Inaha, teie au; o vau ta òe e tono.

1 Tōrīnetia 15.1-11

Huru

Te tiàfaahouraa o te Metia

1 E Faaìte atu rä vau ia òutou e a ù mau taeaè, i te Èvaneria ta ù i parau atu ia òutou na, ta òutou hoì i färii mai ra, e i mau ai hoì òutou na;

2 e e ora ai hoì òutou, ia täpeà mäite ä òutou i ta ù i parau atu ia òutou na, ia òre rä ia riro to òutou faaroo ei faaroo faufaa òre.

3 Ua tuu atu hoì au ia òutou i mütaa iho ra, i tei noaa na ia ù ra, e i pohe te Metia i ta tätou nei hara, mai tei te parau i päpaìhia ra;

4 e i tänuhia hoì o ia, e tiàfaahou mai ra i te ruì toru, mai tei te parau i päpaìhia ra;

5 e i ìteä o ia e Tefa, e i te àhuru mä piti i muri aè.

6 E muri aè ra hoì, i ìteä o ia e te mau taeaè e pae atoà hänere e tiàhara, hoê ä ìteraa; te ora noa nei ä te rahi o taua feiä ra, ua taòto rä te tahi pae.

7 E muri aè ra hoì, ìteä iho ra o ia e Iatöpo, e i te mau âpotetoro atoà i muri aè.

8 E te hopeà iho ra, ìteä atoà iho ra ia ù, mai te mea e e mahemo vau.

9 E iti hoì au i te mau âpotetoro atoà ra, e òre hoì au e au ia parauhia e, e âpotetoro, no te mea i hämani ìno vau i te Ètärëtia o te Atua.

10 To ù nei rä huru e vai nei, no te here ia o te Atua; e te maitaì na na i horoàhia mai ia ù nei, aore ia i riro ei mea faufaa òre: e òhipa rahi hoì ta ù i rave i ta rätou atoà ra eere rä vau, o te maitaì rä a te Atua ia ù nei ra.

11 E teie nei, o vau tei aò ra, o vau ia, o rätou ra, o rätou ia, o ta mätou ä ia aò, e o ta òutou ä ia i faaroo.

Ruta èv. 5.1-11

Te tïtau

(Mät 4,18-22; Mär 1,16-20)

1 E te tià noa ra o ia i te hoê mahana i te hiti roto i Tenetareta ra, ua neneì noa mai ra te taata atoà e rave rahi ia na ra, e faaroo i te parau a te Atua.

2 Hiò atu ra o ia i e piti puè pahï i te tïpae-noa-raa i te hiti roto, âreà te feiä ravaai, tei uta ia te uhi ra i ta rätou ùpeà.

3 Haere atu ra o ia i nià iho i te hoê i taua nä pahï ra, i ta Timona ra, ua parau atu ra ia na e tute i tai iti aè. Pärahi iho ra o ia i raro, e ua haapii mai ra i nià i te pahï i taua feiä rahi ra.

4 E oti aè ra ta na parauraa, ua parau atu ra o ia ia Timona: «Hö atu i te vähi moana, e tuu i ta òutou ùpeà i te hoê häroà.

5 Ua parau mai ra Timona ia na, nä ô mai ra: «E te Fatu, i haa noa na mätou e ao noa aè nei te ruì, e aore roa i noaa, e tuu rä vau i te ùpeà o òe i parau mai na.

6 E ia tuu iho ra rätou, ua àti aè ra ia rätou te ià e rave rahi, motumotu iho ra ta rätou ùpeà.

7 Ua täpare atu ra rätou i to rätou i nià i te hoê pahï ra, ia haere atoà mai rätou e rave. Ua haere mai ra hoì rätou, ua faaî iho ra i nä pahï e piti atoà, e ua fätata roa i te tomo.

8 E ia hiò iho ra Timona Pëtero i te reira, tïpapa iho ra o ia i raro i te pae turi o Ietu, i te nä-ô-raa atu e:

«E haere ê òe, e te Fatu, e taata hara hoì au.

9 Roohia iho ra o ia e rätou atoà i te mäere rahi mataù, i taua häroà ià i noaa ia rätou ra.

10 O Iatöpo atoà hoì e o Ioane, nä tamarii a Tepetaio ra, ua âmui atoà räua ia Timona. Ua parau mai ra Ietu ia Timona: «Eiaha e mataù, i teie nei, e taata ta òe e noaa.

11 E tae mai ra to rätou puè pahï i tähatai, faaruè anaè iho ra rätou, e ua pee mai ra ia na.

Manaò

Mau taeaè, mau tuahine, te nünaa, o te Atua Nui Tumu Tahi, te haamaitaì nei tätou ma te faahanahana i te Atua Nui Tumu Tahi, no teie mau taiòraa i faataahia èi parau faaitoito i to tätou faaroo, ia tià ia tätou i te haafatata i te tumu no te märamarama to tätou ia ora. Te ora te tiàmaraa te reira no te taata faaroo, o ta te Atua i faatiàma i te parau tià e i te parau mau, tei ärataì i roto i te hau no te maitaì. Parau täno maitaì teie no tätou e te nunaa mäòhi, i te mea o teie to tätou oraraa mai te tau e te tau e tae roa mai i teie mahana. E nunaa tätou no roto i te hau, e no raro i te moana. O to tätou teie ora i te tuuraa i to tätou tiàturiraa i roto i te faufaa no te mau tumu o te mau maitaì no te aroha e te here i horoà ia tätou te itoito.

I teie mahana, no te mea aita te taata i ìte faahou i te òhipa, e no te mea mea rahi te òhipa âpï tei òre i ìtehia i mua ra, i rahi atoà ai te faaue, eiaha i te parauraa noa, te nä-murimuri-atoà-raa rä ia na no te hiòpoà e te haapii i te òhipa e rave. Te tumu rahi roa atu rä i püai roa ai te faaue, no te moni ia e àufauhia i te rave òhipa, no te hinaaro o te fatu òhipa ia hoo na ta na moni, e ia rahi te òhipa e oti.

Te feiä ra i färii hope roa i te fenua ei àpu färii i te täpaò no te aroha e te here o te Atua i te taata, ei taoà horoà na te Atua ia na, eiaha no te faatupu noa i to na hinaaro, ei tauturu rä ia na i te ìteraa e te faatupuraa i te hinaaro o te Atua, e topa te poa i to na mata, e riro te fenua i reira ei tïteàmata mau no na e òhie ai i te ìte e : Te mau haereà o Te Tumu Nui, te aroha ia e te parau mau i te feiä i haapaò i ta na parau i faaau e ta na i faaìte mai . Tei faariro i to na mäòhiraa ei mea ìno, ei mea faufaa òre, e tae noa atu i to na iòa, ua haafaufaa òre ia i te Atua, e tae noa atu i te fenua e amo ra ia na, te fenua i hii mai ia na e tei horoà mai i to na ora.

Tei maitaì i te Atua ra, ua maitaì ia. Mai te peu e hinaaro to te Atua ia tätou, te peeraa ia tätou ia na i te faatupuraa i to na hinaaro i te fenua nei, oia hoì ia faateiteihia to na iòa moà, ia haapaòhia to na hinaaro, ia faatupuhia to na hau i te fenua nei, ia faaea te taata i te nanao i to na mana, ia faaea i te haru i to na hanahana. Teie te tahi mau ìrava i faatumuhia mai roto mai i te mau taiòraa faataahia o teie mahana :

-Taramo 138, 8 Na te Fatu e nä reira mai ia ù, e tià to òe aroha, e te Fatu, i te vai-mäite-raa; eiaha na òe e faaruè i te òhipa a to rima.

-Ìtaia 6, 8 Ua faaroo atu ra vau i te reo o te Fatu, i te nä-ô-raa e, O vai ta ù e tono; o vai te haere no tätou? Ua parau atu ra vau, Inaha, teie au; o vau ta òe e tono.

-1 Tōrīnetia 15, 10 To ù nei rä huru e vai nei, no te here ia o te Atua; e te maitaì na na i horoàhia mai ia ù nei, aore ia i riro ei mea faufaa òre: e òhipa rahi hoì ta ù i rave i ta rätou atoà ra eere rä vau, o te maitaì rä a te Atua ia ù nei ra.

-Ruta èv. 5, 11 E tae mai ra to rätou puè pahï i tähatai, faaruè anaè iho ra rätou, e ua pee mai ra ia na.

I parau ai te fëia paari e, te tärava rä te äau taata ta na täutai  E ia puai noa mai te vero, ia mau te ìato o te vaa, a roohia ai e te mataì.  O te oraraa atoà ia no teie nunaa i te hiti roto no Tenetareta i te tuhaa fenua no Tarirea. Teie reira o Ietu I te tià-noa-raa, I te hiòraa i teie mau taata tei hoì mai, mai te täutai mai, ua neneì mai rä te mau taata e rave rahi ia na rä  no te  faaroo faahou I te parau o te Atua. E tià ia parauhia e, e mau taata teie, tei mauruüru ia Ietu I to rätou faarooraa ia na i roto i te Tunato. Ua hinaaro faahou rä rätou e faaroo i te mau parau maitaì i parauhia no te Atua. No te rahi o te taata, ua paùma o ia i nià i te poti o Petero, e ua faatea rii äè rä i te tïpaeraa. Pärahi iho rä, e ua haapii atu rä i teie mau taata e rave rahi. Te parau rä no te tumu haapiiraa, aita roa ia e haapäpühia rä, e tià rä ia parauhia e, te haapiiraa ta Ietu e horoà nei, te parau no te mau ture a te Atua, ia faaroo, èi ia haapaò te taata. O te reo atoà ia  no te Atua i nià ia Ìtaia i te pene 6 i te ìrava 8, o vai ta ù e tono, o vai te haere no tätou. O ia atoà ia te reo o Ietu i nià ia Petero, ia oti äè ta na haapiiraa rä.

Ho ätu i te vahi moana.

Oia hoì haere atu i te vahi moana tärere, te vahi naeà-òre-hia e te aru o te ùpeà. I reira e tuu ai hoê aè tuuraa, eiaha e tä piti, e tä toru, hoê rä taime. O Ietu teie faaue nei, te Fatu no te mau àpoo mataì, te àito o te moana, te àivänaa no te mau vahi ïà. Oia hoì, èita o ia e hiò i te àvaè, tera àvaè rä, tera ia te täutai, tera pö rä, tera ia te täutai, tera mataì rä tera ia te täutai, e aore rä tera te àpa. Teie o Ietu e faaue nei, ia Petero, Iatöpo, e o Ioane e fano i te poti i te vahi üri o te moana e tuu ai i te ùpeà, i te hoê vahi mätau-òre-hia i reira tätou e faaî ai teie ùpeà maa òre. Te reo mai rä o Petero, e te Fatu i haa noa na mätou e ua ao, aita roa te täutai i manuia. Oia hoì, ua mauà to mätou taime, to na auraa rä, tera mau taata e rave rahi i uta aita ta rätou e maa, e to rätou mau ùtuafare, teie nei e nahea?

E tuu rä vau i te ùpeà o Òe i parau mai na

Ua töpä te ùpeà i roto i te moana üri, te vahi mätau-òre-hia. E aha tei ìtehia te manuia ia o te täutai, e rave rahi mau ïà i hei i nià i te ùpeà, ua motumotu te tahi mau vahi, ua î te poti o Petero, èita te ïà e ö ua naìnaìhia. Tarape iho rä i te tahi atu poti. Na teie na poti e piti i faaìte ia tätou te manuia teie täutai. Riro atu rä taua mahana rä èi òaòaraa na te fëia ravaai

O Petero i mua teie manuia rahi, ua tïpapa o ia i te pae turi o Ietu èi faaìteraa i to na faufaa òre i mua i teie reo no Ietu. Ho atu i te vahi moana. Tupu  atu rä te fäìraa hara a Petero, e te Fatu e taata hara hoì au. Aita-ê o Petero i teie taime i te hoê taata, aita faahou to na e faufaa i mua i te oraraa ta na i mätau. Àravihi i te òhipa täutai, ìte i te faatere i te mau òhipa, faaue i te mau rave òhipa. E teie nei te ìte nei o Petero e, te vai faahou nei te tahi mau raveà tei òre i naeàhia e to na märamarama. E te parau a Ietu ia Petero e, Eiaha e mätaù e taata ta òe e noaa i teie nei. Oia hoì, e tià ia òe ia faaamu i te taata i teie nei i te maa noo mai i te Atua rä. Èita atu rä òe e haere noa i te täutai, o òe änaè, te Atua atoà i pïhaì iho  ia òe e to òe mau hoa. E te tipaeraa rätou i tähatai, faaruè-iho ra, rätou i te òhipa mätauhia e rätou, pee atu rä ia Ietu i nià i te hoê òhipa âpï mätaù-òre-ätoà-hia e rätou.

E hoa here mä.

Te nunaa i pärahi i uta, tei faaroo i te mau hinaaro o te Atua, e tämaa ia rätou i te ïà i noaa ia Petero mä.

Na poti tei î i te ïà, o te hohoà te reira o te ÈTÄRËTIA

Tei ïà i hei i nià i te ùpeà, e täpaò ia no te àhune o te ÈTÄRËTIA.

Oia hoì tei hei i nià i te ùpeà a te Atua, e noaa ia, ia rätou te ora mure òre.

Te vahi i motumotu te ùpeà, te puai ia te reira o te ènemi.

Tei na roto i te àpoo au rä, no te pohe mure òre ia.

E ö tätou, teihea tätou i te heiraa tei nià i te ùpeà, e aore rä ua na roto tätou i te vahi motumotu i te horo i rapae.

11 E tae mai ra to rätou puè pahï i tähatai, faaruè anaè iho ra rätou, e ua pee mai ra ia na.

E aha te pee ta te ìrava e türama ra, te vahi päpü ta te mau taiòraa e faaìte rä te vai ra te tïtauraa e te haapiiraa ia ìte i te mau hopoià e tià i te faanaho ma te tiàma i mua i te mau täpura òhipa e ôpuahia ra. Ua faaruè i te mea i òre i naeàhia i te märamarama, ua pee i te märamarama. Oia mau, te märamarama te ùputa ia o te ora ta te mana o te Parau a te Atua i ìriti. Ia hiòhia anaè tätou i te òhipa i tupu ua parau iho ä te Atua èi ia mmm, ua mmm iho ra i muri iho teie mmm te türama ra, i te mau òhipa atoà ta te Atua i rave, ua parau te Atua ua tupu, ua hiò te Atua ua mauruüru te Atua te mea ta na i faatupu, e ua parau mea maitaì roa, ua parau, ua tupu, e te Atua iho tera e haapäpü ra e mea maitaì roa,  aita hoê taime te Atua i parau e, te vai ra te tahi mea aita i àfaro maitaì, te auraa ra te mau òhipa ta te Atua i rave, no te faaìte ia i te taata te täpaò no to na aroha e to na here ia na. No te mea ia parau anaè tätou te ùputa, e aha te ùputa te tahi vahi e na reira tätou i te ìte i te mea e vai ra i ò mai, i roto i teie ìritiraa te Atua i te ùputa o te mmm e aha te mea ta tätou  e ìte atu ra te vai ra iho ä te rahu tei faaìte mai te maitaì ta te Atua i faaineine no te taata mea täno tätou ia tütonu maitaì i nià i tera vahi te faaìte mai ra te reira te maitaì ta te Atua i faaineine no te taata e te reira mau maitaì no te faaìte ä ia i te taata to na aroha e to na here, ia haapoto-anaè-hia te mau mea atoà ta tätou e ìte nei i teie mahana te mea faaî nei i te fenua, te tai e te reva e tae noa atu to raro i te fenua tei òre tätou e ìte, no te faaìte ia i te taata i te aroha e te here o te Atua ia na. Mai te peu e ua ö mai te mmm  ua faufaa òre anei te pöuri, aita no te aha te mmm tei ö mai i roto i te pöuri te haamataraa te mau mea atoà  te vai ra te pöuri no te pöuri te parau te mmm tera i tomo mai i roto i te pöuri, i teie ra tomoraa mai te mmm i roto i te pöuri aita te pöuri i faaòrehia hau roa atu na te Atua iho horoà tei iòa o te mmm e to te pöuri, e aha te auraa ua ìte e ua färii te Atua i te mmm, e ua ìte atoà ra ua färii i te pöuri, te vai ra te tahi, te vai ra te tahi, haamanaò tätou e te mmm tera i ö mai i roto i te pöuri aita te mmm i haere mai e täpoì, aita te mmm i haere mai e faaòre te vai noa ra te pöuri. Ia hiò tätou i te òhipa i tupu i to te Atua rahuraa te raì e te fenua, no te vai te parau, ta tätou e parau nei te päpe, ua ani te Atua i te päpe ia vaiiho mai te tahi vahi taa atu ra te päpe i nià, taa mai nei te päpe i raro, tera area ta te päpe i faaruè no te pähono i te aniraa a te Atua, te vahi ia ta te Atua faataa èi tupuraa no te raì, tera päpe i raro taa atu te tahi vai mai nei te fenua tera te faanahoraa o te raì e te fenua, teie nei ra te naò atu na vau e, te haamataraa no te päpe te parau, haamanaò na tätou e aha te òhipa i tupu i te hararaa te taata i te tau o Noa, e aha te òhipa ta te Atua i rave, ua faahoì faahou te Atua i te fenua i to na huru mätamua, hoì faahou te päpe i te vahi ta na i horoà e aha i ìtehia e pohe. No reira mai te peu e ö mai te mmm i roto i te pöuri, aita te Atua i faaòre i te pöuri te vai noa ra te pöuri e te tiaì noa ra te pöuri i to na taime no te rave faahou i te vahi ta na i horoà, eiaha tätou e manaò ua faateateahia te fenua, eiaha tätou e manaò ua tuu mai te Atua i te mmm ua ora tätou aita aita hoê noa mea te taata e ora ai, ia faaea noa i roto i te mmm te taata e paruparu te taata èita e haapaò na na noa e hitimahuta ia hoì faahou mai te pöuri e rave i te mea ta na i horoà, te manaò ra tätou e i teie mahana tei roto tätou i te mmm, òia tei roto i te mmm te tiaì atoà noa ra ra te pöuri. No te aha te taata te tahi tau, èita i te tau atea roa ua färii te mea ta tätou e parau ra i teie nei mahana e Parau Maitaì te parau a te Atua ua òaòa i te tomoraa i roto i te mau taata e hinaaro e haamori i te Atua e teie mahana e aha te parau rahi e faaroohia i roto i te vaha o te taata, aita te fare pure e î faahou nei, aita te taata ànaanatae faahou nei, èita te feiä âpï ànaanatae faahou i te parau a te Atua, e aha te auraa te pöuri tera e hoì mai ra aita tätou i ìte te manaò nei tätou e tei roto tätou i te mmm ua faaorahia tätou aita, te ora to te taata ia täpeàraa, to na täpeà pautuüturaa i te mmm e ära maitaì èita te pöuri e poroì mai e hoì faahou mai ò na e rave no reira te tïtauraa ia tätou i teie mahana e ère i te parau-naò-raa e ua naò mai te Atua ua mmm, èi ia mmm, ua mmm ò ia ua ö mai te mmm te vai noa ra ra te pöuri te auraa te tïtauraa ia tätou ia vai ära noa täpeà te mmm i horoàhia mai eiaha e faaruê hoê taime èita tätou e tauà, hoê taime neneva-rii-hia tei upoo tera pöuri ua hoì mai. E te pöuri, e aha te auraa o te pöuri o te pohe ia. No reira hinaaro tätou i te ora täpeà i te mmm, te auraa ia o te Pee ta te ìrava e haapäpü ra, ta Ìtaia ia e parau mai nei ia tätou i teie mahana, 8 Ua faaroo atu ra vau i te reo o te Fatu, i te nä-ô-raa e, O vai ta ù e tono; o vai te haere no tätou? Ua parau atu ra vau, Inaha, teie au; o vau ta òe e tono.   

 

Teraì òr. Faatura.

Ruta èv. 4.21-30 Haere

 

Tāpati 30 no Tënuare 2022.

Haere

Taramo 71

1 Te tiàturi nei au ia òe, e te Fatu, eiaha roa vau ia roohia e te haamä.

2 E faaora òe ia ù i te parau tià na òe ia ora, e färiu mai òe i to tarià, ia ora vau.

3 E pare àti òe no ù, ia horo tämau ä vau i reira. Ua faaue òe ia faaorahia vau O ta ù pare e ta ù haapüraa hoì òe.

4 E faaora òe ia ù, e ta ù Atua, i te rima o te paieti òre, i te rima o te taata parau tià òre e te hämani ìno.

5 O òe hoì to ù manaòraa, e te ATUA, ta ù Fatu; Ta ù päruru mai ta ù âpïraa mai ä.

6 I mauhia na vau e òe mai te ôpü mai ä, e o òe tei rave mai ia ù mai roto mai i te ôpü o ta ù metua vahine ra;  e tämau ä vau i te haamaitaì ia òe.

7 Ua riro vau ei maereraa na te taata atoà; o ta ù haapüraa ètaèta rä òe.

8 Ia î hoì ta ù vaha i te haamaitaì ia òe. E te faahanahana ia òe eiaha ia faaea.

9 Eiaha e täiva ia ù i te ruhiruhiäraa ra; e ia paruparu vau ra, eiaha e faaruè ia ù.

10 Te parau nei hoì ta ù mau ènemi ia ù, e te feruri nei te feiä i tïtau mai ia ù ia pohe.

11 Te parau ra rätou: «Ua faaruèhia o ia e te Atua; a aùaù, a rave, aore hoì e tià.»

12 E te Atua e, eiaha òe e faaätea ê atu ia ù, e ta ù Atua, ia peepee i te tauturu mai ia ù.

13 Te mau ènemi e tïtau mai i to ù nei pohe, ia haamä atu ia Ia mäheahea, e ia vehihia i te haamä e te ìno, tei ìmi i to ù nei pohe.

14 E tiàturi ä vau ia òe e òre e faaea, e haamaitaì ä vau ia òe nä nià iho e nä nià iho.

15 Na ta ù vaha e faaìte i te parau tià na òe, e te ora na òe, eiaha ia faaea, eita rä e tià ia ù ia taiò i te rahi.

16 E tämau ä vau i te haere i te ètaèta na te ATUA ra, o te Fatu, e faaìte au i ta òe ra parau tià, ta òe anaè ra.

17 Na òe, e ta ù Atua, i haapii mai ia ù mai to ù âpïraa mai ä, e ua faaìte au i ta òe ra mau òhipa ûmerehia e tae roa aè nei i teie nei.

18 Ia ruhiruhiä vau e ia hinahinahia ta ù upoo, e te Atua e, eiaha òe e faaruè mai ia ù; ia faaìte rä vau i to mana i teie nei uì, e to püai, i te taata atoà ia haere mai.

19 Ua teitei te parau tià na òe, e te Atua. O tei rave i teie nei mau òhipa rahi. O vai tei au ia òe, e te Atua?

20 I faaìte noa mai ä òe ia ù i te àti e rave rahi e te ahoaho, e faaànaanaea mai ä hoì òe ia ù, e ua faatià faahou mai ä òe mai raro roa i te fenua ra.

21 E riro òe i te faarahi mai ä i taua rahi no ù nei, e e haamähanahana mai ä òe ia ù e àti noa aè.

22 E haamaitaì ä vau i te parau mau na òe mä te näpara; e himene au ia òe, e ta ù Atua, mä te tïnura, e Tei Moà i Ìteraèra nei.

23 E òaòa ta ù vaha ia himene au ia òe ra, e ta ù värua i faaorahia e òe ra.

24 E parau ta ù vaha i te parau tià na òe e ruì noa atu: e riro hoì i te haamä, e riro i te mäheahea i te feiä i ìmi i to ù nei pohe.

Ieremia 1.1-19

1 Te parau a Ieremia a Hiritia ra, te hoê o te pupu tahuà i pärahi i Ànatota, i te fenua o Pëniämina ra;

2 tei parauhia mai te parau a te Fatu i te ànotau o Iötia a Âmona, e arii no Iüta, i te mätahiti hoê àhuru mä toru i te hau no na ra;

3  e i te tau hoì o Iehoiätima a Iötia ra, i te arii o Iüta, e hope roa aè ra te mätahiti hoê àhuru mä hoê i te hau o Tetetia a Iötia, e arii no Iüta, e tae roa aè ra i te hopoiraa ia Ierutarëma ei titi i te märama pae ra.

MAU ÔRAMA I NIÀ IA IÜTA

Te tïtauraahia te perofeta

4  I reira te parau a te Fatu i te taeraa mai ia ù nei, e te nä-ô-raa e,

5 Aita òe i hämanihia e au i roto i te ôpü (o to metua vahine, i ìte ai au ia òe; e aita òe i fänau,  i faataahia ai òe e au ei perofeta na te mau fenua.

6  Ua parau atu ra vau, âuë e te ATUA, e te Fatu e aore hoì au i ìte i te parau; e tamaiti iti hoì au,

7 Ua parau mai ra te Fatu ia ù, Eiaha e parau, e tamaiti iti au: o tei tonohia òe e au ra, o ta òe ia e haere;  e o ta ù e faaue ia òe ra, o ta òe ia e parau,

8 Eiaha òe e mataù i to rätou mata; ei pïhaì-atoà-iho hoì au ia òe ei faaora ia òe,  te parau mai ra te Fatu.

9 Ua faatoro mai ra te Fatu i ta na rima, ua faatiàià mai ra i ta ù vaha; e ua nä ô mai ra te Fatu ia ù, Inaha, ua tuu vau i ta ù parau i roto i te vaha.

10 Inaha, ua parau haamana atu vau ia òe i teie nei mahana i nià i te mau fenua e te mau pätireia atoà ra, ia täìhitumu e ia huru i raro, ia haapau, e ia haamou roa atu; ia patu tià i nià e ia tanu. Mau ôrama mätämua e mau heheuraa

11 Ua tae mai ra te parau a te Fatu ia ù nei, nä ô mai ra: E aha ta òe e hiò na, e Ieremia, ua parau atu ra vau, E päpua iti tetati ta ù e hiò nei.

12 Ua parau mai ra te Fatu ia ù, ua tià ta òe e hiò ra: e faatupu ètaèta hoì au i ta ù nei parau.

13 Ua tae faahou mai ra te parau a te Fatu ia ù nei, nä ô mai ra, E aha ta òe e hiò ra, e Ieremia, ua parau atu ra vau, Te ìte nei au i te hoê päni e te au i te pupûraa atu; e ua faafäriu-ê-hia te àuvaha ia nä te pae i àpatoèrau i te püpü.

14 Ua parau mai ra te Fatu ia ù: «E riro na àpatoèrau atu te ìno i te püpüraa atu i nä nià i te taata atoà o te fenua na.

15 Inaha hoì, e tiàoro atu vau i te mau fëtii atoà no te mau pätireia atoà i te pae i àpatoèrau,  te parau mai ra te Fatu. E haere anaè mai rätou, a haamau ai te taata atoà i to na teröno i te tomoraa i te mau ùputa i Ierutarëma, e i nià atoà i te mua patu e àti noa aè, e nià atoà i te mau ôire o Iüta.

16 Na ù e tuu atu i ta ù parau ia rätou, no ta rätou mau parau ìno ra; ua faaruè hoì rätou ia ù, e ua tütuì i te mea noànoà i te mau Atua èê, e ua haamori i te òhipa a to rätou rima i rave.

17  E tënä na, e tätià na òe i to tauupu, a tià, a parau atu òe ia rätou i ta ù e faaue atu ia òe na; eiaha òe e taiä i to rätou mata, o te vaiiho noa atu vau ia òe ia mäheahea ia rätou.

18 Inaha, ua faarirohia òe e au i naùanei mai te ôire faaètaètahia ra, mai te pou âuri, e mai te patu veo, i teie atoà nei fenua; e te mau arii atoà o Iüta, e te pupu arii atoà ra; e tö na atoà ra feiä tahuà, e te mau taata atoà o te fenua na:

19 e tamaì mai hoì rätou ia òe, e òre ra e tupu; ei pïhaì-atoà-iho vau ia òe ei faaora ia òe te parau mai ra te Fatu.

1 Tōrīnetia 12.31

31 Te nounou na òutou i te mau töroà rahi ra. E faaìte atu rä vau ia òutou i te èà maitaì rahi roa ra.

13, 1-13

Te aroha

1 Parau noa ä vau i te mau parau atoà a te taata nei, e ta te mau merahi atoà ra, e aita o ù aroha, ua riro ia vau mai te veo ôoto ra, e mai te tümëparo mäniania ra.

2 Tei ia ù noa ä iho te tohu, e te ìte i te mau parau moè atoà ra, e te mau ìte atoà, e tei ia ù te mau faaroo täpaò atoà e tià ai ia hopoi ê atu i te mouà, e aore o ù aroha, aita roa a ù e faufaa.

3 E ia horoà noa ä vau i ta ù mau taoà atoà ei faaàmu i te taata rii, e ia tuu noa atu vau i ta ù tino ia tähuhia i te auahi, e aita o ù aroha, aita roa a ù e faufaa i reira.

4 E faaòromaìraa roa to te aroha, e te hämani maitaì; e òre te aroha e feìi; e òre te aroha e faarahi, e òre hoì e faaahaaha.

5 Eita e rave i te mea au òre, eita e ìmi i te maitaì no na iho, eita e riri vave, eita e manaò ìno ia vëtahi ê;

6 eita e òaòa i te parau tià òre, e òaòa rä i te parau mau;

7 e täpoì i te mau mea atoà ra, e faaroo i te mau mea atoà ra, e tiaì i te mau mea atoà ra, e haamahu i te mau mea atoà ra.

8 E òre roa te aroha e mou. Âreà te mau tohu ra, e mou ia; âreà te parau èê ra, e òre atoà ia; âreà te ìte ra, e faaòrehia ia te reira.

9 Te ìte pae tahi nei tätou, e te tohu pae tahi nei.

10 Ia tae rä i te mea tià mau ra, ei reira te mea pae tahi noa ra faaòrehia ai.

11 I ta ù tamarii-rii-raa ra, mai ta te tamarii atoà ta ù parau, e mai to te tamarii to ù ìte, e mai to te tamarii hoì to ù manaò; ia riro rä vau ei taata paari, tuu ê atu ra vau i te peu a te tamarii ra.

12 Teie nei hoì, te ìte ârehurehu nei tätou mai te mea e, i nä roto i te hiò; âreà i reira, e mata ia e e mata. I teie nei, te ìte pae tahi nei au; âreà i reira, e ìte päpü ia vau, mai ia ù atoà i ìte-päpü-hia nei.

13 E teie nei, te vai nei te faaroo, e te tiaì, e te aroha, e toru ra; o tei hau rä i taua toru nei, o te aroha ia.

Ruta èv. 4.21-30

21 Ua parau atu ra o ia ia rätou: «Teie nei parau i päpaìhia ta òutou i faaroo iho nei, ua tupu ia i teie nei mahana.

22 Ua faatià anaè iho ra rätou atoà ia na, mäere iho ra i te mau parau maitataì rahi ta na i parau mai ra, ua parau iho ra rätou: «Eere änei teie i te tamaiti a Iotëfa ra?

23 Ua parau atu ra o ia ia rätou: «E riro òutou i te faaau mai ia ù i te maa parau ra e: «E te tahuà ra, a faaora ia òe iho. Te òhipa ta òe i rave i Taperenaumi ra ta mätou i faaroo aè nei, e rave atoà i ô nei, i to òe nei fenua.»

24 Ua nä ô atu ra hoì o ia: «Âmene, e parau atu vau ia òutou: aita e perofeta i ìtehia mai i to na iho fenua mau.

25 E parau mau rä teie ta ù e parau atu ia òutou nei, e rave rahi te vahine ìvi i Ìteraèra i te ànotau ia Èria, a ôpanihia ai te raì ra, e e toru mätahiti e ono hoì märama àti päatoà aè ra taua fenua ra i te oè rahi.

26 Aore rä Èria i tonohia atu ia rätou atoà ra, maori rä i te hoê vahine ìvi i Tarepeta i Titona.

27 E rave rahi hoì te rëpera i Ìteraèra i te ànotau i te perofeta ra ia Èritaia, aita rä te hoê o rätou i faaorahia maori rä o Näamana i Turia ra.

28 Tei te faarooraa rätou i taua parau nei, riri roa aè ra to te tunato atoà,

29 ua tià aè ra rätou i nià, höpara atu ra ia na i räpae i taua ôire ra, arataì atu ra ia na i te hiti o te mouà i tiàhia i to rätou ôire ra, e faataa ia na i raro.

30 Haere ê atu ra rä o ia, nä rotopü noa atu ra ia rätou i te haere.

Manaò

Mea tià ia parauhia teie mau taiòraa e fäfereihia nei e tätou i teie mahana, te faahiti nei ia i te mau maitaì o te Atua Nui Tumu Tahi o te tià ia faahanahanahia. I te mea o te haapäpüraa teie i te huru faanahoraa o te puai o te faaroo o te mau taeaè, mau tuahine tei pärahi fatata noa i pïhaì iho i te reo tïtau ta te parau e faatupu, ia ìte i te mau maitaì ta te Atua i faataa no te taata. E au teie parau no te taata hoê, e no te nünaa, I roto i te manaò e parau hoê to te fenua e te taata, eita te tahi e tano ia faataahia i te tahi, eita atoà rä to räua parau e tano ia faataa-ê-hia i to te Atua no na i parauhia ai to te fenua e na na hoì i hämani i te taata. Teie ua haamauhia te ôtià no te vähi i reira te taata e ìte ai, i reira hoì e faaìte ai i taua maitaì ra i faaìtehia ia na. Eita e òre tätou i te maere i teie huru parauraa e, te vähi i reira te taata e ìte ai, âreà te Atua te nä ô mai ra ia e : ua ìte òe. E au teie parau i te tahi haamanaòraa i te mea ta tätou i faahiti aè nei, e ia parau hoì tätou e, haamanaò, no te tahi ia mea tei moè i te taata, te tahi mea e hinaarohia ra i te faahoì mai i roto i to na manaò. Te tumu, no te mea te manaò, te mana òhipa te reira o te taata. E tano ai tätou e parau e, te manaò i haamätauhia i te maitaì, ua faarave ia i te taata i te maitaì ta to na âau e àtuàtu noa ra ; âreà te manaò i haamätauhia i te ìno, ua faarave ia i te taata i te ìno ta to na âau e àtuàtu noa ra. E tano atoà rä tätou e parau e, te manaò të òre e au i te tahi parau, e òhie atoà o ia i te haamoè i te reira parau ia òre te reira taata ia haapeàpeà-noa-hia. E faaroo tätou i te haapotoraa o ta tätou parau no teie mahana :

-Taramo 71, 17 Na òe, e ta ù Atua, i haapii mai ia ù mai to ù âpïraa mai ä, e ua faaìte au i ta òe ra mau òhipa ûmerehia e tae roa aè nei i teie nei.

-Ieremia 1, 17  E tënä na, e tätià na òe i to tauupu, a tià, a parau atu òe ia rätou i ta ù e faaue atu ia òe na; eiaha òe e taiä i to rätou mata, o te vaiiho noa atu vau ia òe ia mäheahea ia rätou.

-I Torinetia 13, 13 E teie nei, te vai nei te faaroo, e te tiaì, e te aroha, e toru ra; o tei hau rä i taua toru nei, o te aroha ia.

-Ruta èv. 4, 30 Haere ê atu ra rä o ia, nä rotopü noa atu ra ia rätou i te haere.

Ua haere o Ietu ma te tiàmä i mua i te mau taata tei riri i ta na huru parau, tei haamanaò i te mau òhipa i tupu i te tau o te mau perofeta. Te haere te mea te reira e itoito ai te manaò taata, i te haereraa i mua. I mua i te fifi, te tämata ra te manaò taata i te fäito i te püai, aore ra te itoito e vai ra i roto ia na no te faarururaa, aore ra no te faaüraa. Te vähi te taata e fifi ai, tei ta na ia fäitoraa i to na püai, aore ra ta na faarahiraa i te fifi e vai ra i mua ia na. E mea pinepine roa te taata i te òre e tiàturi ia na iho, aore ra te hiò i to na parau i roto i te pau. No reira, aita ä te àroraa i haamata, ua pau ê na te taata ; mea tano aè rä tätou e parau e : ua haapau ê na te taata ia na. Ietu i mua i te mau taata no Nätareta ua faaìte o Ietu i te mea tià, ia ìte rätou i te maitaì o te Atua. I roto i te pure a te Fatu, ia haapii mai Ietu ia tätou ia pure i te Atua e : Eiaha e faaruè ia mätou ia fati i mua i te ènemi, eere no te ani ia òre tätou ia tuuhia i roto i te àroraa, no te ani rä ia horoàhia mai ä te itoito ia òre tätou ia fati i mua i te mau haavare. Te mea faufaa, eere te upootiàraa, aore ra te pauraa, te òreraa rä e pätoì i te àroraa, te òreraa ihoä rä e haaparuparu i te manaò. Te manaò, te mana òhipa te reira i roto i te taata : na te âau e ôpua, na te manaò e faanaho i te tupuraa o te òhipa ta te taata e rave atu. Ia itoito te manaò, te itoito atoà ra te taata ; âreà ia paruparu te manaò, te taata atoà terä e paruparu ra. E tano tätou e faaravaì rii ä i te manaò i nià i teie parau no te haereraa mai te haèhaa ta tätou i hiò mai na. Ia parau tätou e, te haèhaa, tei raro ia, e te teitei hoì ra, tei nià ia, aita e vähi âpï ta tätou i parau tei òre tätou i ìte ê na. Te haèhaa rä, oia te tuuraa te taata i to na âau i raro, e tano ia hiòhia ei täpaò no te rahi o te hoê taata, inaha ua noaa ia na te haapae i te ìmiraa i to na iho maitaì, to na hoì hanahana, aore ra ei täpaò no to na paruparu, te mea e, no te mataù i te fifi, aore ra te ènemi, i tuu ai o ia ia na i raro, i faanaìnaì ai hoì ia na. No te mea rä e hinaaro teie no te Atua i te taata, eere ia no te haamataù i te taata, ei räveà rä e ìte ai te taata e, e here te Atua, e ua ineine o ia i te tauturu e te arataì i te taata nä nià i te èà ta na i hinaaro ia nä reira te taata i te haere. I te tahi aè pae, e tano atoà tätou e haamanaò e, te tiàturiraa ia na iho, eere ia i te teòteò e te faahua, te hoêraa to òe âau e to òe manaò i nià i te òhipa ta òe e faaineine ra i te rave. Te tanoraa mau, e faatano te taata haere i to na tuuraa âvae i nià i te vähi ta to na mata e hiò ra ; âreà te taata mataù, no te mea aita to na mata e päpü ra i te vähi e hiò, e òre atoà ai e päpü to na tuuraa âvae. E òhie ia taata i te topa, aore ra te hitimahuta noa, eiaha mai te mea te vai ara noa ra o ia, no te mea rä te moemoe noa ra o ia i te mata o te feiä e hiò mai ra ia na e tei ineine i te faahapa ia na. I reira ra, mai te peu e, ua hoê te âau e te manaò o teie taata, tei roto ia i te mataù, no te faatupu hoì i te mataù, oia hoì no te haaparuparu ia na. Ahiri teie hoêraa te âau e te manaò o te taata i faatanohia i nià i te tahi mea ta na e tïtau, ta na e ìmi i te räveà ia ìte i te tupuraa, aita e mea e täpeà ia na ia òre ia haere i mua, e püai taa ê rä të noaa ia na, e òre hoì te mataù e haaparuparu ia na. Hiò na tätou i teie nei i te pähonoraa ta Ietu i horoà i te feiä i haere atu e aniani ia na, no te hinaaro ìte änei i te ture tei hau i te rahi, aore ra no te hinaaro ìte i te räveà e noaa ai te ora mure òre, taa noa atu ai to rätou tiàraa, e päpaì parau te tahi, e haapii ture te tahi, e ìte tätou i te faufaa o teie parau no te hoêraa ta tätou i hiò mai na, e òre ai te taata e vai noa ai i te vähi hoê, no te mea te püai e noaa mai ia na, no te türaì ia ia na ia haere i mua. Te mau haereà o te Atua, te ìte-atoà-raa ia i te mea ta na i hinaaro, hau roa atu mai te peu ua faaìte ê mai na o ia i te reira. Ia hiò tätou i te manaò o te päpaì taramo, mai te mea atu ra e, te vai ra te tahi parau faaau i roto i te taata e te Atua, te haapaòraa hoì i te reira parau faaau, te mea ia e maitaì ai teie haereraa e te Atua. Mea maitaì rä te taata ia haamanaò e, ua hämani te Atua ia na i te repo fenua, te auraa, te vähi o ia e òhie ai i te färerei i te Atua, tei te tumu ia o to na parau. Te taata noa teie e vahavaha rii nei i te fenua, no to na rä ia taa òre i te auraa o te reira parau hanahana roa. Te aroha e te parau mau, eere änei e, te mau haereà ia o te Atua. A fea tätou e färii ai e, aita te Atua i faataa ê i to na parau i to te fenua, hau roa atu, te parau mau ta te fenua e mau ra, eere i ta na iho, na te Atua rä. Te märamarama noa ra tätou e, tei hinaaro i te ìte i te Atua, eita e tià ia na ia haapae i te parau o te fenua. Te mea ia tätou i parau ai e, te fenua, te ùputa ia o te raì, oia hoì te vähi te taata e ìte ai i te Atua. E ia òre hoì te taata ia färii i teie parau, nä hea o ia e färii ai i te haere mai te haèhaa e te Atua. Inaha te faaroo, o òe ia e te Atua, ia òre òe ia ìte i te Atua i roto i te fenua, aore ra ia òre òe ia färii i ta te fenua faaìteraa i te Atua, eita òe e ìte i te Atua i nià i te raì, oia hoì eita te raì e ìriti ia òe i te ùputa e ìte ai òe i te Atua. Te òhipa ta te fenua i rave noa mai na e tei òre te taata i färii, teie ä ia ta Ietu e parau nei e ta na e rave nei, e tei òre ä te taata i ineine i te färii. Ia ìte mai tätou, aita e èà täpü poto no te haere i te Atua ra. Aita te Atua i vahavaha i te fänauraa püfenua no te tono mai i ta na Tamaiti, te auraa, ia hinaaro tätou i te ìte i te Atua, ia nä roto atoà ia tätou i te fenua i te haere, mai ta te Tamaiti i faaìte mai i te èà.

 

Teraì òr. Faatura.