Ruta èv 2,41-52 Tupu

Täpati 30 no Titema 2018.

Taramo 84

1 Na te Mënätehe i nià i te Titita. E Taramo na te tamarii a Tora. 2 E mea pöpou rahi to òe ra mau tiàhapa,  e te Fatu manahope. 3 Te hinaaro nei ta ù âau, te nounou nei, i te mau hëtere o te Fatu. Te òaòa nei ta ù âau e ta ù tino atoà i te Atua ora ra 4 Ua noaa hoì i te tefura te fare no na e i te ôpeà te ôfaaraa no na iho, ei fänauraa i to na ra pinia, ta òe ra mau fata, e te Fatu manahope, e ta ù arii, e ta ù Atua hoì 5 E ao to te feiä i pärahi i to òe ra fare E òre rätou e tuutuu i te haamaitaì ia òe Tera. 6 E ao to te feiä o òe to rätou ètaèta ra, te manaò ra rätou i te mau èà tià ra 7 Haere noa ä rätou nä te peho o Pata, e ö rä rätou i te pape pihaa i reira; e na te ua hoì e faaî i te mau âpoo ra. 8 E haere ä hoì rätou mä te ètaèta e ia noaa atu ä te ètaèta, e tae noa atu rätou atoà ra i te aro o te Atua i Tiona. 9 E te Atua manahope, e te Fatu, e faaroo mai i ta ù pure, e faaroo mai ia ù, e te Atua o Iatöpa e. Tera. 10 E te Atua to mätou päruru ra, a hiò mai na, a haapaò mai i tei Faatähinuhia e òe ra. 11 E maitaì rahi to te mahana hoê i roto i te mau hëtere no òe ra, i te mahana atoà e tautani noa atu i te tahi vähi ê E hinaaro rahi to ù i te tiaì i te ùputa i te fare o ta ù Atua, i te pärahi i te mau tiàhapa o te paieti òre ra 12 E mahana hoì e te päruru te Atua ra o te Fatu; e horoà mai te Fatu i te maitaì e te hanahana. E aore roa a ana maitaì e täpeà i te feiä haereà piò òre ra. 13 E te Fatu manahope e, e ao to te taata i tiàturi ia òe ra.

1 Tämuera 1,20-28  

20 E tö iho ra Hana, e tae aè ra i te tau mau ra, ua fänau iho ra o ia e tamäroa, maìri iho ra i to na iòa, o Tämuera, ua nä ô aè ra hoì o ia, e mea anihia o ia e au i te Fatu ra. 21 Haere atu ra taua taata ra o Êrïtana e ta na fëtii atoà i nià e hopoi i te tütia mätahiti, e tä na i èuhe ra. 22 Aita aè ra rä hana i tae; ua nä ô aè ra hoì o ia i ta na täne, Ia maìri aè na te ü i te tamaiti nei, e hopoi ai au ia na i nià i mua i te aro o te Fatu, a pärahi mau Atua ai o ia i reira. 23 Ua parau mai ra ta na täne ra Êrïtana ia na, Tei ia òe tei to òe hinaaro; a pärahi e ia haamaìrihia e òe te ü ia na; ia faatupu rä te Fatu i ta na parau. Pärahi iho ra taua vahine ra, faaòte iho ra i ta na tamaiti e maìri noa atu ra te ü. 24 E ia haamaìrihia e ana te ü ra, ua hopoi atu ra o ia ia na i nià i Tiro, e nä puaatoro oni hoì e toru, e te färaoa hoê êfa, e te hoê färii uaina, e ua hopoi atu ra ia na i te fare o te Fatu i Tiro e tamaiti âpï roa taua tamaiti ra. 25 ua täparahi iho ra rätou i te hoê puaatoro oni, e ua hopoi aè ra rätou i taua tamaiti ra ia Èri; 26 e ua nä ô atu ra o ia, E ta ù Fatu, te ora ra òe, e ta ù Fatu, o vau te vahine i tià noa i pïhaì iho ia òe ra, a pure ai au i te Fatu ra. 27 i pure hoì au i teie nei tamaiti; e ua höroà mai te Fatu i ta ù i ani atu ia na ra; 28 no reira vau i höroà atu ai ia na i te Fatu; no te Fatu ia o ia e ia hope roa o na puè mahana i te oraraa nei. Ua haamori iho ra o ia i te Fatu i reira ra.

1 Ioane 3,1-2

Te mau tamarii a te Atua

1 A hiò na i te huru o to te Metua aroha ia tätou nei, o tätou i maìrihia mai e, e tamarii na te Atua i òre ai to teie nei ao i ìte ai ia tätou, no te mea aore atoà i ìte ia na. 2 E a ù mau here e, e tamarii tätou na te Atua i teie nei, e aita ä i ìteä to tätou huru a muri atu. Ua ìte rä tätou e, ia fä mai o ia ra, e riro tätou mai ia na atoà te huru; e ìte hoì tätou ia na i to na ra huru mau.

21-24

21 E a ù mau here e, ia òre to tätou âau ia faahapa mai ia tätou ra, aore o tätou taiäraa i reira i te Atua ra. 22 E ta tätou e ani atu ia na ra, e noaa ia ia tätou, no te mea, te haapaò nei tätou i ta na parau, e te rave nei i te mau mea e mauruüru ai o ia ra. 23 Teie hoì ta na parau e faaroo tätou i te iòa o ta na Tamaiti o Ietu Metia, e e aroha tätou ia tätou iho, mai ta na hoì i poroì mai ra. 24 E tei haapaò i ta na ra parau, te àti rä ia o ia ia na, e te àtihia mai ra o ia e ana. Teie te mea i ìte ai tätou e te àti mai ra o ia ia tätou, o te Värua ta na i horoà mai ia tätou nei.  

Ruta èv 2,41-52

Te mau parau mätamua a Ietu i roto i te hiero

41 E haere ä nä metua no na ra i Ierutarëma i te ôroà ra i te Päta, aore e mätahiti i tuua. 42 E tae aè ra i te àhuru mä piti i to na mätahiti, haere atu ra rätou i Ierutarëma i te haapaòraa i te peu i taua ôroà ra. 43 E hope aè ra taua puè mahana ra, hoì mai ra räua, pärahi atu ra rä te tamaiti o Ietu i muri i Ierutarëma, aore Iotëfa e ta na metua vahine i ìte. 44 Haere mai ra räua e ruì hoê mai ra i te haereà, parau aè ra räua tei roto o ia i taua tïàa ra, ìmi atu ra räua ia na i roto i to rätou iho fëtii e i te mau taata-tupu ra. 45 E aore aè ra o ia i ìteä, hoì atu ra räua i Ierutarëma i te mäìmiraa ia na. 46 E ruì toru aè ra, ìte atu ra räua ia na i roto i te hiero ra, te pärahi ra i röpü i te mau òrometua, te faaroo atu ra e te ui atu ra ia rätou. 47 Maere anaè iho ra te feiä atoà i faaroo ia na ra, i to na ìte e ta na parau. 48 E ìte atu ra räua ia na, hitimaùe atu ra räua. Ua parau atu ra ta na metua vahine ia na E taù tamaiti, e aha òe i nä reira mai ai ia mäua? Inaha, i ìmi noa na mäua o to metua täne ia òe mä te òto. 49 Ua parau mai ra o ia ia räua E aha òrua i ìmi ai ia ù? Aita òrua i ìte, e ia haapaò vau i ta ta ù metua e tià ai ? 50 Aita rä räua i ìte i te parau ta na i parau mai ia räua ra. 51 Hoì mai ra räua e o ia atoà ra i Nätareta, faaroo atu ra ia räua; vaiiho mäite iho ra rä ta na metua vahine i taua mau mea atoà ra i roto i to na âau. 52 Tupu atu ra Ietu i te rahi e te paari, e te herehia mai e te Atua e te taata atoà.

Manaò.

Täpati hopeà teie no teie mätahiti 2018, te haamaitaì nei tätou i te Atua Nui Tumu Tahi, tei faahiti mau òre nei i to na here to na aroha i nià i te fenua e i te taata, mai te mahana e hiti mure òre noa nei, mai te ua e faarari nei i te fenua e faahaumäru nei i te  mau vao o te mau âivi, mai te miti e tähei mutu òre nei i te äau E mea pöpou rahi teie no te mau tiàhapa o te Fatu manahope. Te hinaaro nei to tätou âau, te nounou nei, i te mau maitaì e fänaòhia nei e tätou. Te òaòa nei to tätou  âau e to tätou tino i te Atua ora. Ua riro hoì  te rähu e vahi nohoraa no te taata e te mau puaa no te aru e vahi ôfaaraa no te mau manu o te reva, ei fänauraa no te mau pinia puaa, na te Fatu manahope te reira i faanaho, E ao ra to te feiä o òe to rätou ètaèta, te manaò ra rätou i te mau èà tià ra. Haere noa ä tätou nä te mau peho na te mau èà tià. E haere ä hoì tätou mä te ètaèta e ia noaa ia tätou te ètaèta, e tae noa atu tätou atoà ra i te aro o te Atua Nui Tumu Tahi.  E te Atua manahope, e te Fatu, e faaroo mai i ta mätou pure, e faaroo mai ia mätou, e te Atua e. E te Atua to mätou päruru, a hiò mai na, a haapaò mai i tei herehia e òe ra. E maitaì rahi to te mahana hoê i roto i te rähu no òe ra, i te mahana atoà e tautani noa atu i te tahi vähi ê E hinaaro rahi to mätou i te tiaì i te ùputa i te fare o to mätou Atua, i te pärahi i te mau tiàhapa o te paieti òre ra, te päruru ra te Atua o te Fatu; e horoà mai te Fatu i te maitaì e te hanahana. E aore roa a ana maitaì e täpeà i te feiä haereà piò òre ra. E te Fatu manahope e, e ao to te taata i tiàturi ia òe ra. Oia mau  te faaìteraa ia  a na taiòraa e maha nei,

-Taramo 84, 5 E ao to te feiä i pärahi i to òe ra fare E òre rätou e tuutuu i te haamaitaì ia òe.

-I Tämuera 1, 26 E ta ù Fatu, te ora ra òe, e ta ù Fatu, o vau te vahine i tià noa i pïhaì iho ia òe ra, a pure ai au i te Fatu ra.

-1 Ioane 3, 24 E tei haapaò i ta na ra parau, te àti rä ia o ia ia na, e te àtihia mai ra o ia e ana.

-Ruta èv 2, 52 Tupu atu ra Ietu i te rahi e te paari, e te herehia mai e te Atua e te taata atoà.

Ia faaroo tätou na ìrava e maha nei e mau tumu parau teie e âpee ra i te tupuraa te ôpuaraa faaora a te Atua Nui Tumu Tahi tei pärahi tämau i roto i te fare o te Atua, te fare o te Atua te vahi ia mai reira mai te ora e faanaòhia nei e tätou ta na Rähu. Te päpüraa o te parau ta tätou e hiò nei, teie ia te faaìteraa i te parau no te hinaaro o te taata i te Atua tei ärataì  i nià i te parau no Ietu ua tupu e ua herehia mai e te Atua e te taata atoà. E täpura òhipa ta na i haere mai e parau i te taata te parau o te fenua ; aita o ia i haere mai e faatià i te taata i te oraraa o te Atua e te mau merahi, e faaitoito rä i te taata i te hiòraa i te parau o te fenua ta na e ora ra, no te mea i reira noa e noaa ai ia na te märamarama i te hinaaro o te Atua e ta na ôpuaraa faaora. Te haamanaò nei te fenua, te vähi ia ta te Atua i mäìti no te ìritiraa i te ùputa o te märamarama. Te auraa, te fenua, te vähi atoà ia e noaa ai i te taata te märamarama i nià i te ôpuaraa faaora a te Atua. Mea maitaì te taata ia ìte e ia färii òiòi e, te vai ra te mea e òhie o ia i te märamarama, te vai atoà ra rä te mea të òre e naeàhia i to na märamarama i te tïtau. Te mea ia ta te papaì Taramo e haamanaò mai ra ia nä ô mai o ia e 5 E ao to te feiä i pärahi i to òe ra fare E òre rätou e tuutuu i te haamaitaì ia òe. Ia ìte mai tätou, aita atu e vähi fätata roa aè te taata i te fare e i te Atua maoti rä, te fenua, oia te vähi ta na e ora ra, e te vähi no reira mai o ia. A ìte te taata e a färii e, aita atu mea hinaarohia ia na maoti rä, te ora-hope-roa-raa i to na parau ei taata, e te färiiraa e, eita to na parau e tià ia faataa-ê-hia i to te fenua i reira o ia i te haapärahiraahia e te Atua, te fenua i hii ia na. Teie ia faahitiraa parau a Tämuera, 26 E ta ù Fatu, te ora ra òe, e ta ù Fatu, o vau te vahine i tià noa i pïhaì iho ia òe ra, a pure ai au i te Fatu ra teie vahine tei te fenua nei o ia i te pureraa i roto i te fare o te Atua tei faateniteni i to na reo, tei amohia e to na reo, tei mähorahora to na parau i roto i to na iho âau. Te taù nei teie vahine, te taùraa i te Atua, te aniraa ia i te Atua. No te Atua anaè teie taò. I roto i te mea e parauhia nei e, taù, te vai atoà ra te manaò faatura. I te mea te haapaò nei o ia i te hinaaro o te Atua tei àti mai ia na, o te mea i faahiti ai o Ioane i te naòraa e 24 E tei haapaò i ta na ra parau, te àti rä ia o ia ia na, e te àtihia mai ra o ia e ana. No reira, mea tià ia tätou ia auraro, ia faatura i te hanahana o te Tämaïti i fänauhia i te fenua nei. Mea maitaì tätou ia haamanaò e, tei mua tätou, i te parau no  te tupuraa te ôpuaraa faaora a te Atua Metua te Atua hoì i hämani ia tätou, te Atua no na tätou i Mäòhi ai, e tei riro to taua mäòhiraa no tätou  ei taoà horoà na Na ia tätou nei ia tupu to na aroha e te here, i teie parauraa a Ruta Èv.  52 Tupu atu ra Ietu i te rahi e te paari, e te herehia mai e te Atua e te taata atoà.

Teraì òr. Faatura.

Ruta Èv. 1,39-45.

Täpati 23 no Titema 2018.

Tiaìraa Maha

Taramo 80.

1 Na te Mënätehe i nià i te Totanima-ètuta. Taramo na Âtafa. 2 E faaroo mai, e Të Tiaì ia Ìteraèra e O tei arataì ia Iotëfa mai te nana ra o òe o tei pärahi i nià i nä Terupi ra, a faaanaana mai. 3 I te aro o Èferaima, e o Peniamina, e o Manate ra, e faaitoito òe, e haere mai e faaora ia mätou. 4 E faahoì mai ia mätou, e te Atua, ia ànaana mai hoì to mata, ua ora iho ra ia mätou. 5  E aha te roa, e te Atua manahope, o te Fatu, i te òe ririraa i te pure a to mau taata nei. 6 Ua faaàmu òe ia rätou i te mäa òto, e ua tuu mai i te roimata na rätou e inu e ia rahi ra. 7 Ua faariro òe ia mätou ei märöraa na to mätou mau taata tupu, e te àtahia nei mätou e to mätou mau ènemi. 8 E faahoì ia mätou, e te Atua manahope, ia ànaana mai hoì to mata na, ua ora iho ra ia mätou. 9 E vine ta òe i rave mai mai Àifiti mai ra, ua faaruè hoì òe i te mau êtene, e ua tanu iho ra i te reira. 10 Ua väere òe i te fenua i taua vine ra. E ua toro to na aa, e ua api aè ra te fenua 11 ua àti te mau mouà i te maru no na, e mai te âreti teitei ta na aveave. 12 Ua toro to na âmaa i tähatai, e to na tihitihi i te pape rahi ra. 13 E aha hoì òe i haapararï ai i te âua, e ua pöfaìhia e te feiä haere atoà nei 14 Te ètuhia nei e te paha o te ururäau ra, e te àmuhia nei e te mau puaa ôviri o te aru ra. 15 E te Atua manahope e, e hoì mai, o ta mätou ia parau ia òe; e hiò mai òe i nià i te raì ia ìte, e haapaò faahou mai ä òe i taua vine nei. 16 Te räau i tänuhia e to rima àtau ra, e te âmaa ta òe i faaètaèta na òe iho. 17 Ua täpühia ia e ua tüîa i te auahi, ua pohe ia i te aò o to mata ra 18 Ei nià to rima i te taata i to rima àtau ra, ei nià i te taata i faaètaètahia e òe no òe iho ra. 19 E òre hoì mätou e täiva ia òe i reira, e faaanaanaea mai ia mätou, e na mätou e ta ù i to òe ra iòa. 20 E faahoì ia mätou, e te Atua manahope, e te Fatu e, ia ànaana mai hoì to mata na, ua ora iho ra ia mätou.

Mita 5 1-5, 1 E iti ä òe, e Peterehëma Èferäta, ia âmui atoà i roto i te mau tauatini atoà i Iüta ra, e tae mai rä te hoê ia ù nei mai roto mai ia òe ra o te riro ei tävana i Ìteraèra nei; mai tahito mai ä hoì to na haereà, mai te mätamua mai ä. 2 E teie nei, e tuu atu te Fatu ia rätou, e ia tae i te taime e fänau mai ai të fänau ra ei reira e hoì mai ai te toeà o to na mau taeaè, i te mau tamarii o Ìteraèra. 3 E tià noa o ia mä te faaàmu i ta na nana, mä te püai o te Fatu, mä te iòa teitei o to na ra Atua, o te Fatu; e tià mäite hoì rätou i te pärahiraa; e rahi hoì o ia i reira e tae noa atu i te hopeà mai o te fenua ra. 4 E riro taua taata ra o te tumu ia no te hau. Ua tae anaè mai to Atura i to rätou nei fenua, e ua taataahi anaè o ia i to tätou mau äoraì, e faatupuhia tätou i reira ei pätoì ia na nä tävana toohitu, e nä taata arii toovaù ra. 5 E pau hoì te fenua ra o Atura ia rätou i te òè, te fenua o Nimerota i te tomoraa atu: e faaorahia tätou e ana i to Atura, ia tae mai o ia i to tätou nei fenua e ua taataahi anaè o ia i to tätou nei mau ôtià.

Hepera 10,5-10, 5 No reira te Metia i nä ô ai ia na i haere mai i te ao nei ra Aita aè nei i tià ia òe te tütia e te perotefora ua faaau rä òe i te hoê tino no ù 6 i tei täauahihia ra, e te täraèhara ra, aita aè nei òe i mauruüru i te reira. 7 Ua nä ô iho ra vau Teie au, e ta ù Atua, te haere nei au e faatià i to òe hinaaro ua päpaìhia te parau no ù i roto i te ôtaro o te puta ra. 8 Ta na hoì i parau i nià aè ra e Aita aè nei i tià ia òe te tütia, e te perotefora, e tei täauahihia ra, e te täraèhara ra, e aore òe i mauruüru i te reira, i ta te ture ra i püpü. 9 E ua nä ô aè ra o ia i muri aè. Inaha, e ta ù Atua, te haere nei au e faatià i to òe hinaaro, ua faaòre ä ia o ia i tei mütaa iho ra, ia faatià o ia i te piti. 10 No taua hinaaro ra e moà ai tätou nei, i te püpüraa hoê i te tino o Ietu Metia ra.

Ruta 1, 39- 45 te upoo parau Te tere o Märia io Èritäpeta ìrava 39 Ua tià aè ra Märia i reira, haere òiòi atu ra i te hoê ôire no Iüta, i te fenua mouà ra; 40 tomo atu ra i roto i te fare o Tätäria, aroha atu ra ia Èritäpeta. 41 E tei te faarooraa mai Èritäpeta i to Märia aroharaa atu, ua ôuà iho ra te tamaiti i roto i to na ôpü; î aè ra Èritäpeta i te Värua Maitaì, 42 e ua pii hua mai ra te reo, nä ô mai ra. O òe tei hau i te maitaì i te vahine nei, e e maitaì hoì te huaai o to òe ôpü. 43 No te aha rä hoì au i ìtehia mai ai, i haere mai ai te metua vahine a ta ù Fatu ia ù nei? 44 Inaha hoì, tei te öraa mai to reo i te aroharaa mai ia ù nei i roto i ta ù tarià, ua ôuà iho nei te tamaiti i roto i ta ù ôpü i te òaòa. 45 E ao hoì to na to tei faaroo e e faatupuhia te mau mea a te Fatu i faaìte mai ia na ra.

Manaò.

Te taiòraa e faatumu nei i ta tätou no teie mahana, te päpaìraa ia a Ruta èvaneria, Ua tupu teie nei parau i roto i te ùtuafare no Tätäria e to na hoa vahine o Eritapeta. I roto i teie färereiraa no Maria e te ùtuafare no Tätäria mä, aita te parau no Tätäria i faarahihia i te tuatäpapa, to Eritapeta ra. Na Eritapeta iho i ìte i te òhipa moè a te Atua, na roto i to na tävini vahine ia Maria, ia ua i te ìrava 41, î aè ra Eritapeta i te Varua Maitaì, no te faaìte i te òaòa e vai ra i roto ia na, e ua pii hua atu ra to na reo i te na ò raa e, o òe tei hau i te maitaì i te vahine, nei e e maitaì hoì te huaai o to òe ôpu. No reira faatupu teie färereiraa i te òaòa, eiaha noa no Maria anaè. Ua riro atoà ra ei òaòaraa no Eritapeta. E na vahine Faaroo e te paieti Mau, no te haapurororaa i te òhipa ta te merahi i faaìte mai. Oia hoì te pororaa i te òhipa rahi e te maere ta te Atua i rave no te faaora i te taata na roto i te fänauraa o te Metia.

Ei tatararaa

Ua hinaaro o Ruta i te haapäpü i ô nei i te tuhaa faufaa i ravehia e te vahine. Te ìte nei tätou i te reira i te ômuaraa-iho-a o ta na parau maitaì, e na reira atoà oia i te pae hopeà, i te taime ihoä  ra no te tiàfaahouraa no Ietu. A hiò na ra tätou i ô nei i te faufaa o te parau no te òpuaraa faaora a te Atua, o tei heheuhia mai na roto mai i teie na vahine. I muri aè i to Eritapeta faaìteraa i te òhipa ta to na âau i faatupu, na roto i to na faateniteniraa i te aroha faaora a te Atua i rave na roto ia Maria. I teie taime ra, eita atoà e tano ia Maria ia täpeà i tera òaòa no na anaè, e mea tià atoà ia faaìte, ia huaì mai i rapae, e teie to na reo, Ua faarahi ta ù varua i te Fatu. Te vahi i reira te faatumuraa o Maria i to na manaò, ia au i te mau ìrava ìrava 46 e tae i te ìrava 55. Oia Mau, ua haamata ta na himene na roto i teie parau, ua faarahi ta ù varua i te Fatu. E aha te auraa o teie parau, FAARAHI, te vai nei teie na parau, FAA e aore ia HAA, teie te auraa, no te haapuai anei, e aore ra no te haapäutuutu i te parau i muri mai. Te parau i muri mai teie ia te RAHI. No reira, ia parau anaè-hia teie parau RAHI  e o mai te parau no te teitei, te âano, te roaraa, e te vai atu ra. Teie atu ra ia ta tätou e täpeà mai, FAARAHI, o te faateiteiraa ia e aore ra te amoraa, te faahanahanaraa i te Mau maitaì a te hoê taata.

Teie huru parauraa, ua faarahi ta ù varua i te Fatu, Te ìte ra tätou e, o te Fatu teie ta Maria e faaìte nei. E na o ia tätou i te parau e, Faarahi i te Fatu ; o te faateiteiraa ia, e aore ra o te faahotanaraa i te Fatu. O te amoraa, e te paèpaèraa i te Fatu i nià. O te mea ia ta Maria e hinaaro nei i te faaìte ia tätou. A ui ai to tätou manaò, i te na ò raa e, E  AIFAITO ANEI  TE  MEA E  VAI RA  I  ROTO I  TO  TÄTOU ÂAU , I TEIE MAHANA NO TE FAAÌTE I TE HANAHANA E AORE  RA TE TEITEI O TE FATU, IA AU MAI TA MARIA I HIMENE I TO NA RA TAU. UA ÌTE  MAU ANEI  TÄTOU, NA ROTO I TO TE FATU TAËRAA MAI I TE AO NEI, E E Ö TEIE NO Ò MAI I TE ATUA RA.

Inaha hoì, ua faaìte mai te Atua i te hohonu, te teitei, te âano no to na aroha na roto i te àiü e fänauhia mai, no te haapäpüraa i te hanahana o te Atua. E ta te Atua i faariro i te àiü ei taeaè i ropu i te Mau taeaè, e te Mau tuahine atoà. Te heheu mai nei te Atua ia tätou mai roto mai i teie àiü, aita O ia i taui noa aè i ta na parau. Ietu atoà, oia tei ora mai te taime no te fätene, e tae noa atu i te tätauro, ai ta roa atu i taui iti noa aè i to na tiàturiraa i to na Metua e tae noa atu i te taata ta to na Metua i ho mai. Ua vävähi ra i te Mau patu tei faataaê te tahi i te tahi, aore o ia i haere mai no te haava e aore no te faautuà i te taata e i to te ao nei. Ua haere mai te Metia e faaora, na roto i to na pupuraa ia na iho ei täraèhara no to te ao nei. Oia Mau, na roto i te aroha fäito òre o te Atua i to te ao nei, i himene ai o Maria i te Fatu i te na o raa e, ua faarahi ta ù varua i te Fatu, e ua òaòa ta ù âau i te Atua to ù ora. E teie reo to Eritäpeta i te piiraa e, O òe tei hau i te maitaì i te vahine nei, e e maitaì hoì te huaai o to òe ôpü.

Ei poroìraa.

Oia Mau, e te Atua, te hinaaro Mau nei to mätou âau e himene no te faahotana e faateniteni, e ia Òe ia faariro ia mätou ei Mau tävini Mau no Òe, e ia riro mätou ei Mau ìte no to Òe Here e no to Òe Aroha, e ia tià ia mätou ia ôpere no te feia atoà i ère e ia riro mätou ei Mau veà no te Hau ta Òe iho i ho mai no mätou. Ia riro ta matou täviniraa ei òaòaraa e ei hihi no to Òe here, no te mea o Òe tei here mai ia mätou na mua roa.

Teraì òr Fatura.

Itaia 52, 7-12

Mahana piti 25 no Titema 2018

Itaia 52, 7-12

7 Te nehenehe o te âvae o te veà i nià i te mouà, o tei hopoi mai i te parau maitaì ra, o tei faaìte hua mai i te parau hau ra ! o tei hopoi mai i te parau òaòa e te maitaì ra, o tei faaìte hua mai i te ora ra ! o tei parau mai ia Tiona : Tei to Atua ra te Hau ! 8 E faateitei to mau faèhau i to rätou reo ; e ûmere päatoà noa atu to rätou reo ; e hiò hoì rätou, te mata e te mata, i to Iehova faahoìraa mai ia Tiona. 9 Ia püroro noa atu te òaòa ; ia ûmere päatoà, e te mau vähi pararï i Ierutärema ! ua haamähanahana hoì Iehova i to na taata ; ua faaora o ia ia Ierutärema. 10 Ua faaìte hua Iehova i ta na rima moà i mua i te mata o te mau êtene atoà ra ; e ua ìte i te mau hopeà atoà o te fenua ra i te ora a to tätou Atua.

Ia haamaitaìhia te Atua i to tätou färereiraa i teie ôroà Fänau no ta na Tamaiti.

Ia haamaitaìhia te Atua tei faaìte noa i to na Here e to na Aroha na roto i ta na Rahu : Te fenua e to na î, te moana e to na î, te raì e to na î.

Ia haamaitaìhia te Atua tei faaìte mai i to na Here e to na Aroha na roto i ta na Parau.

Ia haamaitaìhia te Atua tei faaìte mai i to na Here e to na Aroha na roto i te mau taata e faatupu ra i te maitaì no te mäa ta rätou e tanu ra, te ià ta rätou e tautai ra, te ànimara ta rätou e faaàmu ra, te mäì o te taata ta rätou e rapaau ra, te fifi o te taata ta rätou e tatara ra, te parau maitaì ta rätou e faaìte ra e te òhipa maitaì ta rätou e rave ra.

Ta tätou parau tei roto i Itaia 52 ìrava 7 i te vähi hopeà tei nä ô e : Tei to Atua ra te Hau.

I roto i teie pene 52, te faaìte ra te perofeta i te mau àti ta Iteraèra i ora i te faaätea-raa-hiahia i to na fenua i to na àfaì-tïti-raa-hia i Aifiti, i Päpuronia e i Peretia(Irava 4 e 5). Ua ora o ia i terä àti e toru no to na taiva i te Atua te tumu o to na ora. Tei Peretia Iteraèra a faaara ai te perofeta i teie parau ia na.

E parau maitaì teie ta te perofeta e faaara ra no te mea e haere mai te Atua e faaìte ia na i to na nünaa. Tei roto te nünaa Iteraèra i te tïtïraa. Teie faaìteraa to te Atua ia na, e faaotiraa ta te Atua i rave i roto i to na tiàmäraa. Eita te Atua e haere noa mai e faaite ia na e aita e tumu. No te mea te vai ra ta te Atua ôpuaraa no to na nünaa i haere mai ai o ia e faaìte ia na.

Tei to Atua ra te Hau.

Te ìte ra tätou teie haereraa mai to te Atua no te faaìte ia na e to na Hau i to na nünaa. Te auraa, eere o te Atua noa te haereraa mai. E haere mai o ia e ta na Faatereraa. E te riro ra te reira ei parau maitaì no te mea te faaea noa ra to na nünaa i raro aè i te faatereraa a te tahi Hau. Mai te peu tei raro aè te nünaa i te faatereraa a te tahi Hau, aita o ia e ora faahou ra i nià i to na fenua. E te riro ra teie haereraa mai to te Atua e ta na Faatereraa ei parau maitaì no na.

Ua riro atoà teie haereraa mai to te Atua e ta na Faatereraa ei parau òaòa no te nünaa no te mea eita te Atua e haere noa mai e faaìte ia na e ta na Faatereraa ma te òre e rave i te tahi òhipa no to na nünaa. E tano e parau e ôpuaraa ta te Atua no to na nünaa i roto i te tïtïraa. Eere teie i te tere faaìteìte to te Atua. Eere atoà te tere faautuà. E tere faaara i to na nünaa i roto i te tïtïraa, te vai ra ta na ôpuaraa faaora no na.

Te Atua e to na Hau, e parau maitaì e e parau òaoa no te nünaa. No te mea no te nünaa te Atua i haere mai ai e faaìte ia na e ta na Faatereraa. No te mea tei raro aè te nünaa i te faatereraa a te tahi Hau, te vai ra te hinaaro o te Atua e haamau i ta na Faatereraa i te vähi ta na e hinaaro ra.

No te Atua te hinaaro, eita e roaa i terä Hau e faatere ra i te nünaa Iteraèra e haafifi i te reira noa atu te rahi o ta na mau räveà. E ìmi te Atua i te mau räveà atoà ia tiàmä to na nünaa. Eita te ôpuaraa a te Atua e mau. Ia haamaitaìhia te Atua.

Tei to Atua ra te Hau.

I teie mahana haamanaòraa i te fänauraa o te Tamaiti a te Atua, te faaara mai ra teie parau e e faatupu te Atua i to na Hau na roto i te haereraa mai o ta na Tamaiti.

Te Hau o te Atua, te Hau ia ta te Tamaiti e haere mai e faaìte  i te fenua nei. Ua riàrià te arii Herota i te faarooraa e te vai ra te Arii fänau âpï i roto i to na fenua. E hia tamarii ta na i haapohe no to na riàrià i teie Arii fänau âpï.

Teie Arii fänau âpï i tonohia mai e te Atua eere no te haamau i te Hau faaterehia e te taata ia au i to na hinaaro e ta na faanahoraa. No te haamau rä i te Hau o te Atua e arataìhia e te ture no te Here e te Aroha.

E te Hau arataìhia e te ture no te Here e te Aroha, te Hau ia i reira e tauàhia ai te taata e to na mau fifi. I reira e ìmihia ai te mau räveà no te haamämä i te àti o te taata. I reira e faanahohia ai te oraraa no te maitaì o te täatoà.

E Hau i reira e ìtehia ai te tupuraa o te parau tià e te parau mau i nià i te fenua. E Hau i reira te taata e ìte ai te tahi i te tahi e e tauturu ai te tahi i te tahi.

E Hau  reira te taata e ìte ai e tuhaa ta na i roto i teie Hau. E Hau i reira e faaturahia ai te Atua, te fenua e te taata.

Tei to Atua ra te Hau.

Ia haamaitaìhia te Atua no ta na Parau.

Jean, Tehaapapa a TEURURAI òrometua

FAAITOITORAA

Monire 24/12/18 ôroà,fänau

         Taiòraa Mätaio 1/1-25 E taata parau tià rä ta na täne o Iotëfa, aore i hinaaro i te faaìte hua ia na, manaò aè ra rä e haapae huna noa ia na…

Teie tätou i roto i te tau o te tiaìraa, ta te pae rahi o te mau haapaòraa i papa teie tiaìraa i nià i te fänauraa no Ietu Metia te tamaiti a te taata nei, ia au ia i ta Ietu iho piiraa ia na Tamaiti a te taata. Te vähi rä ta tätou e tütonu te manaò, tei nià ia i te tiàraa o Iotëfa, tei riro ei täne na Maria. E i mua hoì i te huru tupuraa no to räua oraraa, i mua i te aro o te âti Iuta, e hapa ìno roa ia ta Maria i rave, të riro i te taorahia i te ôfaì e ia pohe roa. No te mea rä e ôpuaraa teie na te Atua i to te ao nei, aita atu ia ta Maria, te faariroraa ia na ei àpu, ei pü fenua e ei rima päutuutu  no te tautururaa i te Atua ia tupu ta na ôpuaraa faaora.

Te huru atoà ia e ìtehia ra no Iotëfa, riro noa ai e täne na Maria, oia hoì to na hinaaroraa e âpiti i to na oraraa i to Maria, ìte noa ai o ia e ture terä e vai ra i mua ia räua, tupu noa atoà ai te mataù i roto i to na àau, te riro atoà nei rä o ia ei rima tauturu i te Atua no ta Na ôpuaraa faaora, eiaha i te âti Iuta noa, i to te ao rä. Te mea ia ta teie parau e arataì ra ia tätou, e taata parau tià rä o ia, aore i hinaaro i te faaìte hua ia na, manaò aè ra rä e haapae huna noa ia na…

Mea varavara roa teie huru te ìtehia i roto i te ao o te taata, te maraaraa i te taata te haamoè ia na ei räveà e ìtehia ai te tahi, te ìteraa e te vai atoà ra te tahi i roto i te moèmoè, i roto i te ère, i roto i te toètoè, e te ìmiraa i te räveà ia ìtehia ô na aore ra ia mämä rii o na i roto i to na oraraa ia ìte atoà o na i te òaòa e te hau. Tei mätauhia e tei reira te taata i teie tau, mea au roa na te taata ia ìtehia o na  mua i te aro o te taata, eiaha o na ia moè rii iho, fätata e peàpeà roa te taata ia òre to na parau ia ìtehia. Ia tütonu anaè rä hoì tätou i nià i te huru ta Iotëfa e faaìte mai ra, aita o ia i tiaì ia fänauhia mai te ôpuaraa faaora a te Atua i te ao nei, aita atoà o ia i tiaì i ta Ietu mau haapiiraa a faariro ai ia na ei rima tauturu i te Atua. Na roto i to na òreraa e faaìte hua ia na i mua i te aro o te taata, na roto i to na manaòraa e haapae huna noa ia na, e tuhaa rahi roa ta Iotëfa e rave ra ei faahanahanaraa i te Atua, e ei faaìteraa mai ia tätou i te mea ta te Atua e tiaì mai ra ia tätou. Haamanaò na i ta Ietu mau haapiiraa, hinaaro òe ia riro òe no mua, haere i muri, aore ra hinaaro òe ei nià aè òe i te tahi, haere i raro, oia hoì haamoè ia òe ei räveà e ìtehia ai ta te Atua ôpuaraa. I ô nei e tano ai te reo o Erïtäpeta i nià atoà ia Iotëfa, e ao hoì to na to tei faaroo, e faatupuhia te mau mea a te Fatu i faaìte mai ia na ra (Ruta 1/45)…

I mua i te huru i maraa ia Iotëfa i te rave, te òreraa e faaìte hua ia na, te haapae huna noa ia na, aita ihoä paha o na e manaò ra te tävini ra o na i te Atua, inaha no te mataù i te taata o ia i na reira ai, te mea päpü rä e tuhaa rahi roa tei maraa ia na  te rave no ta te Atua ôpuaraa faaora, te faariroraa i to na àau ei vairaa no te parau a te Atua, te faariroraa i to na àpuàpu rima ei rima tauturu i te Atua, te faariroraa i to na tapono e amo i ta te Atua ôpuaraa faaora. Tano maitaì  te manaò Mätaio i nià ia Iotëfa, e taata parau tià, oia hoì na roto to na raveraa i teie huru hinaarohia e te Atua no te taata, ua riro te reira ei parau tià na na i te Atua ra.

O tätou ihoä paha terä e tiaì ra i te mahana haamanaòraa na tätou i te fänauraa mai no Ietu, o tätou ihoä paha terä e faanaho ra i to tätou oraraa no te reira tiaìraa ta tätou, o tätou ihoä paha terä e haaputu ra i te mäa rahi e te inu no taua taiò mahana ra tei riro, òre noa atu ä tätou e haapaò roa ra, ei paèpaèraa rä na tätou i te tiaìraa a te feiä hoo taoà, te mea päpü rä, o te Atua terä e tiaì mai ra ia tätou ia haere tätou e faatià i to Na hinaaro, ia au atoà ia i te reo o te âpotetoro i te mau hëpera, inaha e taù Atua, te haere nei au e faatià i to òe hinaaro (Hëpera 10/9)… Aita Iotëfa i tiaì i te fänauraa mai no Ietu no te faatià i te hinaaro o te Atua. Te riro noa ra ia te reira itoito to Iotëfa ei tautururaa ia tätou i te haere-atoà-raa e faatupu i te hinaaro o to tätou Atua, eiaha no te mea aita tätou e rave nei i ta tätou mau òhipa i roto i te päroita tei reira tätou i te òhiparaa, aita änei rä hoì te reira i riro noa i teie mahana, i roto i te àehuehu o te oraraa, ei peu noa aita rä e tumu faahou.

Te mea päpü, aita te Atua i papa i ta Na ôpuaraa faaora i nià i to tätou taupupü, i nià rä i te rahi o to Na here e to Na aroha ia tätou, te auraa, ê na o Ia i te raveraa i ta Na tuhaa ei tautururaa ia tätou, eiaha i roto i te auraa o ta te pae rahi o te taata e tuu ra ei auraa no tiaìraa ta tätou e tiaì nei, i roto rä i te fäito hopeà o te haèhaa e ìte ai tätou e, te rahi o ta te Atua ôpuaraa faaora, mai terä ia àiü ta tätou e tiaì ra i to na fänauraa i teie pö. Aiü noa ai rä, ê atoà na o na i te raveraa i ta na tuhaa ei haapaòraa na na i te hinaaro o te Atua.

No tätou nei, tätou e parau nei e tamarii atoà tätou na te Atua, to tätou Metua terä e tiaì mai ra i ta na mau tamarii ia haere tätou e faatià i to na hinaaro. Ia roaa ia tätou i te rave mai terä ta Iotëfa i rave, i te oreraa e faaìte hua ia tätou, e te haapae huna noa ia tätou, a ìte tätou e, te Atua terä e hanahana ra ia tätou, o te Atua atoà terä e mauruuru ra ia tätou ta na mau tamarii.

Tämuera a PERE òrometua

Ruta èv 3, 10-18, Ito

Täpati 16 no Titema 2018.

Tiaìraa TORU

Ito

Tefania 3,14-18

Te faatià-faahou-raa-hia Ierutarëma 14 A himene, e te tamahine o Tiona a ûmere, e Ìteraèra ia reàreà òe e ia òaòa mä to âau atoà, e te tamahine o Ierutarëma. 15 Ua hopoi-ê-hia e te Fatu ta òe ra mau utuà, ua haafäriu o ia i to òe ra mau ènemi tei roto ia òe ra te arii o Ìteraèra, o te Fatu e òre òe e ìte faahou i te àti. 16 Ia tae i taua ànotau ra e parauhia ai Ierutarëma, Eiaha e mataù e  Tiona, Eiaha ia töàruàru to rima. 17 E püai to te Atua no òe ra, to te Fatu, i roto ia òe ra na na e faaora, na na e mauruüru ia òe mä te òaòa e faaea mäite o ia i to na aroha, e ôuàuà o ia ia òe mä te haamaitaì.18 Te feiä e òto i te mau ôroà i haapaòhia ra, ua haaputuputuhia ia e au, no roto hoì ia ia òe  te feiä i faaòromaì i te faaìno ia na ra.

Ìtaia 12

Te haamaitaìraa a te feiä faaroo i te Atua.1 Ia tae i taua mahana ra e parau ai òe e, E haamaitaì au ia òe, e te Fatu; riro noa mai hoì òe ra, ua faatioi-ê-hia ra to òe riri, e ua haamähanahana mai òe ia ù. 2 Inaha, Ua riro mai te Atua ei ora nö ù; e tiàturi au, e òre au e mataù o to ù hoì ia püai, e o to ù ia ârueraa, o te Fatu ra, o te Fatu, e ua riro mai o ia ei ora nö ù. 3 E e huti òutou i te pape mä te òaòa no te tumu o te pape ora ra 4 ei tei reira mahana òutou e parau ai e, Haamaitaì òutou i te Fatu; e tiàoro atu i to na iòa; räveà püai e faaìte òutou i te teitei o to na ra iòa. 5 E himene òutou i te Fatu, i te mau räveà maitaì hau ê nä na ra. Ua faaìte-paatoà-hia te reira fenua atoà ra. 6 E pii hua, e ûmere mä te òaòa. E tei pärahi i Tiona ra e; te rahi ra hoì Tei Moà i Ìteraèra nei i rotopü ia òe ra.

Firipi 4, 3-7

3 Te haamaitaì nei au i ta ù Atua ia mëhara atu vau ia òutou aita e faaea 4 i te mau pure atoà na ù nei ia òutou atoà na, e pure ä vau mä te òaòa aita e faaea, 5 i to òutou âmui-atoà-raa mai i te Èvaneria nei mai te mätamua mai ä e tae roa aè nei i teie nei. 6 Ua ìte mau hoì au i taua parau nei e, o tei haamata i te òhipa maitaì i roto ia òutou na, na na ia e rave e tae noa atu i te mahana o Ietu Metia ra. 7 E mea tià hoì ia ù ia nä reira i te manaò ia òutou atoà na, te vai nei hoì òutou i roto i to ù nei âau; i to ù nei täpeà-raa-hia, e ta ù nei hoì faatiàraa ia ù iho nei, e te faaitoitoraa i te Èvaneria nei, tei ia òutou atoà na ia te maitaì i horoàhia mai ia ù nei.

Ruta èv 3, 10-18,

10 Ua ui mai ra taua feiä rahi ra ia na, nä ô mai ra E aha hoì mätou nei. 11 Ua parau atu ra o ia ia rätou. E piti o na pereue ra, e horoà atu o ia i te hoê no tei ère; e e mäa ta na ra, e nä reira atoà o ia. 12 Ua haere atoà mai ra te feiä òhi tute ia päpetitohia, ua nä ô mai ra ia na E te òrometua, e aha mätou? 13 Ua parau atu ra o ia ia rätou Eiaha e tïtau atu i tei òre i haapaòhia na òutou ra. 14 Ua ui atoà mai ra te mau faèhau ia na, nä ô mai ra E aha hoì mätou nei? Ua parau atu ra o ia ia rätou Eiaha e hämani ìno i te taata atoà; eiaha e pari haavare noa; ia mauruüru hoì òutou i ta òutou utuà. 15 Te fatimaùu noa ra te taata atoà ia Ioane, te feruri anaè ra te taata i roto i to rätou âau, e e riro paha o ia i te Metia. 16 Ua parau atu ra Ioane ia rätou atoà, nä ô atu ra Te päpetito nei ä hoì au ia òutou i te pape, te haere mai na rä te tahi e mana rahi to na i to ù, e òre ia vau e au ia tätara i te täpeà i ta na tämaa na na e päpetito ia òutou i te Värua Maitaì e te auahi. 17 Tei to na rima ta na tähiri, e tämä mäite o ia i ta na papaìraa tïtona, e haaputu o ia i te tïtona i roto i ta na vairaa tïtona, âreà te ota e tütuì o ia i te reira i te auahi pohe òre. 18 E e rave rahi ä ta na aòraa atu, i te faaìteraa atu i te taata i te Parau Maitaì.

Manaò.

Pae àhuru mä hoêraa teie o te täpati no teie mätahiti 2018, o te tiaìraa toru teie. Te mau parau e faahitihia ra e na taiòraa e maha, tei faatiàfaahou ia tätou no te himene no te ûmere, ia reàreà tätou e ia òaòa mä to tätou âau atoà, i te mea te turämahia nei te tahi èà âpï e mauruüru ai tätou mä te òaòa e faaea mäite ai tätou i roto i to na aroha, e ôuàuà tätou i te haamaitaì i te Atua Nui Tumu Tahi. Te faatupuhia nei no tätou i te hoê tara faaora, tei faamanaò ia tätou i to te Atua riroraa mai èi ora no tätou e i ta na haamähanahanaraa mai ia tätou. Te auraa, e manaò  püai teie ia ateatea te ôpuaraa faaora a te Atua eiaha ia apiapi ia tätou i te mea o ta tätou e hinaaro ra, e i te mea o ta tätou e tïtau. No terä mea e, o tätou teie. O tätou e to tätou püai. O tätou e ta tätou faanahoraa. O tätou e ta tätou arataìraa. Te haamanaò noa mai ra te reira i ta tätou hopoià ia tätou i to tätou faaroo e ta tätou tiàturiraa i teie tau tiaìraa, teie ia e faamanaòhia mai ra ia tätou i te haapotoraa i ta tätou na taiòraa e maha.

-Tefania 3, 17 E püai to te Atua no òe ra, to te Fatu, i roto ia òe ra na na e faaora,

-Ìtaia 12, 3 E e huti òutou i te pape mä te òaòa no te tumu o te pape ora ra

-Firipi 4, 6 Ua ìte mau hoì au i taua parau nei e, o tei haamata i te òhipa maitaì i roto ia òutou na, na na ia e rave e tae noa atu i te mahana o Ietu Metia ra.

-Ruta èv 3, 14 E aha hoì mätou nei?

Ia au na ìrava e maha nei i te tumu hoê e ärataì ra te manaò o te itoito ia, e taò fetii teie tei âpee noa ia tätou i te taatoàraa o to tätou oraraa. Te taò tumu o te itoito e ito, te parauhia nei e ito uiraa tera ia märamarama e hoà ra i roto i te ata i muri aè i te pätiri. Aita te Atua i rahu i te pöuri, te märamarama te ùputa ia o te ora ta te mana o te Parau a te Atua i ìriti. Ia hiòhia anaè-hia te òhipa i tupu ua parau iho ä te Atua èi ia märamarama, ua märamarama iho ra i muri mai te türama ra, i te mau òhipa atoà ta te Atua i rave, ua parau te Atua ua tupu, ua hiò te Atua ua mauruüru te Atua te mea ta na i faatupu, e ua parau mea maitaì roa, ua parau, ua tupu, e te Atua iho tera e haapäpü ra e mea maitaì roa,  aita hoê taime te Atua i parau e, te vai ra te tahi mea aita i àfaro maitaì, te auraa ra te mau òhipa ta te Atua i rave, no te faaìte ia i te taata te täpaò no to na aroha e to na here mai te àma o te  huero tiàìri i roto i te pöuri. E ia faaroo tätou i teie reo to Tefania, 17 E püai to te Atua no òe ra, to te Fatu, i roto ia òe ra na na e faaora, No te mea ia parau-anaè-hia e ito e ùputa türama, e aha te ùputa te tahi vahi e na reira tätou i te ìte i te mea e vai ra i ò mai, i roto i teie ìritiraa te Atua i te ùputa o te märamarama e aha te mea ta tätou e ìte atu ra te vai ra iho ä te rahu tei faaìte mai te maitaì ta te Atua i faaineine no te taata mea täno tätou ia tütonu maitaì i nià i tera vahi te faaìte mai ra te reira te maitaì ta te Atua i faaineine no te taata e te reira mau maitaì no te faaìte ä ia i te taata to na aroha e to na here, ia haapoto-anaè-hia te mau mea atoà ta tätou e ìte nei i teie mahana te mea faaî nei i te fenua, te tai e te reva e tae noa atu to raro i te fenua tei òre tätou e ìte, no te faaìte ia i te taata i te aroha e te here o te Atua ia na. Oia mau ia au teie parauraa ta Ìtaia, 3 E e huti òutou i te päpe mä te òaòa no te tumu o te päpe ora ra. Te taata itoito e òre o ia e poìhä, i to te Atua rahuraa te raì e te fenua no te vai te parau, te päpe ua ani te Atua i te päpe ia vaiiho mai te tahi vahi taa atu ra te päpe i nià, taa mai nei te päpe i raro, tera area ta te päpe i faaruè no te pähono i te aniraa a te Atua, te vahi ia ta te Atua faataa èi tupuraa no te raì, tera päpe i raro taa atu te tahi vai mai nei te fenua tera te faanahoraa o te raì e te fenua. I te mea te päpe ta Ioane päpetito ei faaòhipa no te päpetitoraa faa-òre-raa hara. Ua ìte mau hoì au i taua parau nei e, o tei haamata i te òhipa maitaì i roto ia òutou na, na na ia e rave e tae noa atu i te mahana o Ietu Metia ra. Te òhipa maitaì no te faatupu ia i te ora e taua ora ra no faatupu ia i te märamarama i roto i te ìno, i te mea aita te Atua i faaòre i te ìno ta taata i maìti te vai noa ra te ìno e te tiaì noa ra te ìno i to na taime no te faaäpiäpi i te horoà a te Atua, eiaha tätou e manaò ua faateateahia te fenua, eiaha tätou e manaò ua tuu mai te Atua i te märamarama ua ora tätou aita hoê noa mea te taata e ora ai, ia faaea noa i roto i te maitaì te taata e paruparu te taata èita e haapaò na na noa e hitimahuta ia hoì faahou mai te ìno e faaäpiäpi. Te uiraa ia i uihia ia Ioane Päpetito, e te mau taata e rave rahi, te òhi tute, e te mau faèhau, 14 E aha hoì mätou nei? Te pähonohia nei rätou, a horoà na tei ère, eiaha e tïtau tei òre i haapaòhia, eiaha e haamani ìno, eiaha e pari haavare. I mua i teie mau parau ua  fatimaùu te mau taata atoà ia Ioane, te feruri anaè-raa i roto i to rätou âau, e riro paha o ia i te Metia. Ua parau atu ra Ioane ia rätou atoà, nä ô atu ra Te päpetito nei ä hoì au ia òutou i te pape, te haere mai na rä te tahi e mana rahi to na i to ù, e òre ia vau e au ia tätara i te täpeà i ta na tämaa na na e päpetito ia òutou i te Värua Maitaì e te auahi. Tei to na rima ta na tähiri, e tämä mäite o ia i ta na papaìraa tïtona, e haaputu o ia i te tïtona i roto i ta na vairaa tïtona, âreà te ota e tütuì o ia i te reira i te auahi pohe òre. E rave rahi ä ta na aòraa atu, i te faaìteraa atu i te taata i te Parau Maitaì. Ua haafaufaahia te mau uiraa, tei uihia ma te faahohoà i te taata faaàpu tei ôoti e tei faataa i te maa maitaì i te ìno, e täpaò teie no te itoito, ia itoito tätou e ìte tätou i te mea maitaì. E tano ai tätou e parau e, te manaò i haamätauhia i te maitaì, ua faarave ia i te taata i te maitaì ta to na âau e àtuàtu noa ra, âreà te manaò i haamätauhia i te ìno, ua faarave ia i te taata i te ìno ta to na âau e àtuàtu noa ra. E tano atoà rä tätou e parau e, te manaò të òre e au i te tahi parau, e òhie atoà o ia i te haamoè i te reira parau ia òre te reira taata ia haapeàpeà-noa-hia. I haamanaòhia ai rä te taata, no te mea ia ua ìte te Atua i hämani ia na e, teie ta na e rave nei, aita ia e au ra i ta na i ôpua no te taata. Ia ìte maitaì mai tätou, aita te Atua i horoà i te mea ìno na te taata, aita hoì o ia i hämani i te taata no te faatupu i te ìno, e aha rä i maraa ai i te taata te parauraa i te mea maitaì e, mea ìno ; e te mea ìno ra, mea maitaì ia. Te taata noa teie e manaò nei e, ta na te tuhaa ìno, e eita o ia e ora i te mea i horoàhia na na. Eere rä e, te reira anaè, ua tae roa atoà o ia i te manaòraa e, eita to na parau e tià ia faahitihia. Ia itoito tätou i teie tiaìraa toru.

Teraì òr. Faatura.

Ruta èv 3.1-6 Òe.

Täpati 09 no Titema 2018.

Tiaìraa PITI

Òe.

Taramo 126

1 E ao to te taata, aore e faaau i to na haereà i te aò a te paieti-òre, aore i taahi i te èà o te feiä rave hara ra,  e aore hoì i pärahi i te pärahiraa o te feiä tähitohito ra. 2 O tei hinaaro rä i te ture a te Fatu, e tei ta na ture to na manaòraa i te ruì e te ao. 3 E au o ia i te räau i tänuhia i te hiti ânävai ra o tei hotu i to na ra tau mau, e o tei òre roa i mäheahea to na rau. Oia atoà o tä na atoà e rave ra, te maitaì ra ia. 4 Eere mai te reira te feiä paieti-òre ra e au ia i te ota e puehu noa i te mataì ra 5 E òre e mau ai te paieti-òre i te haaväraa, e te rave hara i te âmuiraa o te parau-tià ra. 6 Te au mai ra hoì te Fatu i te haereà o te parau-tià ra, âreà te haereà o te feiä paieti-òre ra, o te pohe ia.

Ìtaia 60.1-11

Te hinuhinu o te ètärëtia

1 A tià i nià, ia märamarama òe, ua tae mai to òe märamarama, e ua hiti mai te hanahana o te Fatu i nià ia òe. 2 Inaha, e ua àti hoì te fenua nei i te pöuri; e te mau êtene i te pöuri taòtaò e hiti mai rä te Fatu i nià ia òe, e ìteä noa mai hoì to na hanahana i nià iho ia òe ra. 3 E haere noa mai hoì te mau fenua i to òe ra märamarama e te mau arii i te ànaana o to òe ra mahana e hiti ra. 4 A nänä na i to mata i nià a hiò e àti noa aè; ua putuputu atoà mai rätou, i haere mai rätou ia òe ra; e tae mai to mau tamarii tamäroa mai te fenua roa mai; e to mau tamähine, e âfaì-tuta-hia mai ia. 5 Ei reira òe e ìte ai, e rahi roa te òaòa; e horuhoru hoì to âau, e horahorahia; ia hopoihia mai te mau taoà no te moana ia òe ra; e ia tae mai te mau taoà no te mau fenua ia òe ra. 6 E api òe i te rahi o te tämera; e te petari no Metai e no Èfa; o rätou atoà to Tepa i te haere mai mä te àuro e te rïpano i te hopoiraa mai e mä te himene i te haamaitaìraa i te Fatu. 7 E putuputu atoà mai te mau nana i Tetara ia òe e riro hoì te mau mämoe oni i Nepaiota ia òe e tae rätou i nià i ta ù fata mä te ìtehia mai; e ta ù fare ùnaùna, nä ù ä e faaùnaùna. 8 O vai ra teie e pee nei mai te ata e pee ra, e mai te tiàa ùuàiraò e maùe i to rätou mau âpoo ra. 9 E tiaì mai te mau fenua roa ia ù; e te mau pahï o Taretita i mua: i te faahororaa mau i to mau tamarii mai te vähi roa mai, e ta rätou ârio e ta rätou àuro atoà ra no te iòa o to Atua ra o te Fatu e no Tei Moà i Ìteraèra ra, ua faahanahana hoì oia ia òe. 10 E na te mau tamarii o te taata ê ra e patu i to mau âua, e ìtehia mai òe e to rätou ra hui-arii i täìri hoì au ia òe i ta ù riri nei, e aroha rä vau ia òe i taua aroha nö ù nei. 11 E vaiiho-noa-hia to òe ra mau ùputa mai te ìritihia; i te ao e te ruì atoà e òre e ôpanihia ia hopoi mai rätou i te taoà no te mau fenua ra ia òe, e ia haere mai to rätou mau arii mä te âehuehu atoà ra.

Firipi 1.3-11

3 Te haamaitaì nei au i ta ù Atua ia mëhara atu vau ia òutou aita e faaea 4 i te mau pure atoà na ù nei ia òutou atoà na, e pure ä vau mä te òaòa aita e faaea, 5 i to òutou âmui-atoà-raa mai i te Èvaneria nei mai te mätamua mai ä e tae roa aè nei i teie nei. 6 Ua ìte mau hoì au i taua parau nei e, o tei haamata i te òhipa maitaì i roto ia òutou na, na na ia e rave e tae noa atu i te mahana o Ietu Metia ra. 7 E mea tià hoì ia ù ia nä reira i te manaò ia òutou atoà na, te vai nei hoì òutou i roto i to ù nei âau; i to ù nei täpeà-raa-hia, e ta ù nei hoì faatiàraa ia ù iho nei, e te faaitoitoraa i te Èvaneria nei, tei ia òutou atoà na ia te maitaì i horoàhia mai ia ù nei. 8 O te Atua hoì të ìte ia ù, e e pöpou rahi to ù ia òutou atoà na, mä te aroha rahi o Ietu Metia ra. 9 E te pure nei au ia tupu mäite ä to òutou hinaaro e ia rahi atu ä mä te ìte e te häroàroà o te âau ra; 10 ia au atu hoì òutou i te mau mea i hau i te maitaì ra; e ia riro òutou ei feiä parau mau, e te hapa-òre, e tae noa atu i te mahana o te Metia ra; 11 ia faaîhia hoì i ta te parau-tià ra, i tei tupu ia Ietu Metia ra, e tura atu ra e haamaitaìhia atu ra te Atua.

Ruta èv 3.1-6

Te aòraa a Ioane päpetito

(Mät 3,1-12; Mär 1,1-8; Ioane 1,19-28)

1 E tae aè ra i te àhuru mä pae i te mätahiti i te hau o Taitara Tïpëria, o Ponotio Pirato te tävana i Iutea, o Herota te teterareha i Tarirea, e o ta na taeaè hoì o Firipa te teterareha i Ìturaia e i te fenua ra i Terahoniti, e o Routanio te teterareha i Àpirene, 2 o Àna e o Täiafa nä tahuà rarahi, i tae mai ai te parau a te Atua ia Ioane a Tätäria i te mëtëpara ra. 3 Haere atu ra o ia nä te mau vähi atoà i te pae i Iörïtäna ra, i te poro haereà i te päpetito tätarahapa ia faaòrehia te hara; 4 mai tei päpaìhia i roto i te puta a te perofeta ra a Ìtaia E reo no te hoê i te poro haereà i te mëtëpara ra A haamaitaì i te èà o te Fatu, e faatïtïàifaro i to na haereà 5 Ia hope te peho i te faaîhia, ia hope te mouà e te mau âivi i te haapäpühia ia faatïtïàifarohia te èà piò, e ia haamaninahia te èà puupuu. 6 Ia ìte te taata atoà i te ora a te Atua.

Manaò.

E au atu ra na taiòraa e maha nei i te parau faaära, ia ära te âau o te taata e ia ìte ma te faanaò i te mau faufaa no te Aroha e te here o te Atua Nui Tumu Tahi ta te rähu e ta te aru e faatupu noa ra ma te tuutuu òre. I te heheuraa te ôpuaraa faaora e mauhia ra i ta te Atua faaauraa i te taata, tei hinaaro i te mau faaueraa ia tupu noa te manaòraa i te Fatu, e tei ta na ture to na manaòraa i te ruì e te ao. E au ia teie mau taata i te hoê tumu räau i tänuhia i te hiti ânävai ra o tei hotu i to na ra tau mau, e o tei òre roa i mäheahea to na rau. Oia atoà o tä na e rave ra, i te maitaì. E òre o ia e puehu noa i te mataì, e uruaì ra o ia i te âmuiraa o te parau tià ra. Ia au hoì to na mau haereà i to te parau tià ra, ia atea te èà o te pohe. I te mea te vai ära noa ra o ia i mua i te mau òhipa e tupu ra ma te faaroo e te tiàturi i te faatupuraa ora a te Atua. Oia mau a faaroo mai na te mau manaò tei faatumu i ta tätou parau no teie mahana te piti o te tiaìraa.

-Taramo 126, 1 E ao to te taata, aore e faaau i to na haereà i te aò a te paieti-òre,

-Ìtaia 60, 1 A tià i nià, ia märamarama òe, ua tae mai to òe märamarama, e ua hiti mai te hanahana o te Fatu i nià ia òe.

-Firipi, 1, 11 ia faaîhia hoì i ta te parau tià ra, i tei tupu ia Ietu Metia ra, e tura atu ra e haamaitaìhia atu ra te Atua.

-Ruta èv 3. 6 Ia ìte te taata atoà i te ora a te Atua.

E mau parau ärataì ora teie e färereihia nei e tätou te ìriti i te ùputa o te aò, te aò te haapiiraa i te taata ia ìte tei turämahia i te hinaaro o te Atua ia haere na te èà o te parau tià tei paèpaèhia e te märamarama, te märamarama ra o te ora ia o te taata. E hinaaro teie no te Atua Nui Tumu Tahi i te taata maori rä e aò i roto i teie reo, aò, e räveà haafaufaa te reira i te tahi manaò, e tïtauhia ra i te taata i te ìte. Te räveà ia e vai noa mai ai te märamaramaraa o te òhipa, Te manaò ta te aò e faaìte e ora, Aita atu to te Tumu Nui hinaaro i te taata maori rä te maitaì, E nä ô ia i te parauraa e, ua fätata roa mai o ia i te taata na roto i te aòraa te faaìte noa mai ra te reira i te taata i to na tiàraa Metua, mea iti roa te mea ta te Atua e aò nei i te taata ia haapaò. Te manaò e horoàhia ra i muri mai i te aò, i reira atoà e hope ai te hinaaro o te Atua i te taata. No reira, te toeà e te rahi o te mau faanahoraa e faateiaha noa nei i te taata te paruparu ia o te faaroo i parau ai te taata Taramo i te naòraa e 1 E ao to te taata, aore e faaau i to na haereà i te aò a te paieti-òre, te turämahia ra te èà e tià i te taata ia haere na nià iho ma te faaineine faatïtïàifaro e te ära tämau i nià i te àveià i te vahi e täpae ai. E au teie parau no te taata hoê, aore ra no te hoê pupu taata, te hoê nünaa. E parau teie tei haapäpü  e ta te Atua anaè te parau tià, eere te mea parau hänoa e piiraa teie ua faaroohia mai ra, ua faaroohia mai ia ; e aita ra, tirä atoà ia. Parau âfarohia nei i nià i te taata, e nä ô paì ia tätou e  te vaha o te Atua, to tätou tarià mai te peu te parau âfaro mai ra te Atua i te taata, te tiaì atoà mai ra ia te Atua i te tahi pähonoraa âfaro ; ei pähonoraa ihoä rä. Te Atua ihoä ia te Atua, e taata hoì te taata, te faariro nei rä te Atua i te taata ei täuaro no na. I teie parauraa a Ìtaia, 1 A tià i nià, ia märamarama òe, ua tae mai to òe märamarama, e ua hiti mai te hanahana o te Fatu i nià ia òe. Te auraa, mai te peu te parau mai ra te Atua i te taata, no te haamanaò ia i te mea ta na e tiaì ra i te taata ia rave ; e tano atoà te taata e parau i te Atua, no te faaìte i te mea ta na e tiaì ra i te Atua ia rave no na. Te mea ia e parauhia ra e, aita e ture, aita e faanahoraa, aita e faaheporaa, no te mea aita te Atua e hinaaro ra i te tahi mea ia haere mai e faaapiapi i te auraa âpï ta na e hinaaro nei i te haamau i roto ia na e te taata o vau e o òe ; o òe e o vau. E no teie auraa fätata e vai ra i teie nei i roto i te Atua e te taata, e tano ai te Atua e haamanaò mai i te taata e, e ua hiti mai te hanahana o te Fatu i nià ia òe. Aita e mea toe tei òre i horoàhia i te taata ra, tei te taata ra te parau i teie nei. Ia hiò-anaè-hia, aita te Atua e nä murimuri noa nei i te taata, i te parau-noa-raa ia na i te mea e rave, i te mea të òre e rave. E tiàmäraa rahi  teie ta te Atua e hinaaro nei i te taata ia faaòhipa. Te mea ia ta Pauro e papaì nei i to Firipi 11 ia faaîhia hoì i ta te parau tià ra, i tei tupu ia Ietu Metia ra, e tura atu ra e haamaitaìhia atu ra te Atua. I roto i te mau hinaaro o te Atua i te taata, teie te mätamua  ia rave i te parau tià, e tià atoà ia parauhia te mea tià. No te tämata i te faataa i teie nä taò, ta te reo e faaìte ra i te mea te vai ra te reo, e te vai ra te parau. Te reo, te faufaa ia a te hoê nünaa, i roto rä i te faaòhiparaa, e riro mai ia te reo ei parau. Te mea ta te Atua e hinaaro nei i te taata ia tïtau, te faatupuraa ia i te parau tià. No te mea rä eere teie i te tahi parau taa e te nahonaho maitaì, i te mau taime atoà, te tiaìhia ra te taata ia faaòhipa i to na tiàmäraa, to na feruriraa, to na paari, no te rave i te mea ta na e manaò ra e, mea tià ia rave, aore ra ia parau. Te auraa, ia faaîhia te parau tià ia tura te ora a te Atua. I parau ai o Ietu e, 6 Ia ìte te taata atoà i te ora a te Atua. Ia anoenoe noa te taata i te ora a te Atua i te aroha, tei riro ei òaòaraa tämau no na, te faatupuraa i te aroha. Eere no te mea ua faauehia i rave ai o ia i te tahi òhipa, mai te taata rä të òre e tiaì ia parauhia atu e huti i te aho no te huti i te aho, mai te reira atoà te taata e anoenoe ra i te ora. E tano tätou e faaau i teie taata i te tahi räau ta te fenua i horoà i te ora, te tupu, e te hotu, nä roto rä i to na rau e to na hotu, te haamaitaì atoà ra teie räau i te fenua e haamaitaì ra i to na tupu. Te manaò hau e te faufaa ta teie taò anoenoe e faaö mai ra, teie ia manaò no te òaòa tei riro ei tumu, oia hoì ei haamataraa e ei faahopeàraa no te tupuraa o te parau o te ora. I te mea faatoro èà teie tïtauhia ra ia òe, ia ò rua, ia òutou, ia rätou, ia tätou, mau taata ia ta te Atua e parau âfaro nei. Hoê noa ta te Atua i ìte päpü, o òe. I te mau taime atoà te Atua i hinaaro ai e färerei i te taata, ua nä reira atoà mai Ietu, teie ta na parau here roa ia ìte te taata. No reira, ia ìte te taata, te faaâpï nei te Atua i te mau mea atoà, ua òre te mau faanahoraa tahito. A hoì io òe iho, i roto i ta òe iho, o òe e to òe Atua, ia manina te èà o te Fatu.

Teraì òr. Faatura.

Ruta èv 21, ­­­­­25-36. Mata

Täpati 02 no Titema 2018.

ÔROÀ

Tiaìraa HOÊ

Mata

Taramo 25

1 Taramo na Tävita. Te faaäraaraa atu nei au i ta ù värua ia òe, e te Fatu, 2 e ta ù Atua, te tiàturi nei au ia òe. Eiaha vau ia haamä, eiaha ta ù mau ènemi ia teòteò ia ù. 3 Eiaha roa tei tiàturi ia òe ra ia roohia e te haamä. O tei rave haavare noa i te hara ra, ia haamä atu ia. 4 E faaìte mai òe ia ù i to mau èà, e te Fatu, e haapii mai òe ia ù i to mau haereà.5 E faaìte mai òe ia ù i te parau mau na òe ra, e haapii mai hoì ia ù; o òe hoì te Atua o to ù ora, te tiàturi nei au ia òe i te mau mahana atoà nei. 6 E haamanaò, e te Fatu, i to aroha faaherehere ra, e to hämani maitaì i te mau mahana i maìri aè nei. 7 Eiaha òe e manaò mai i te ìno e te mau hara o ta ù âpïraa ra; manaò mai rä òe ia ù, mä to aroha atoà, no to òe hämani maitaì, e te Fatu ra. 8 Maitaì to te Fatu e te piò-òre e haapii mai ai o ia i te feiä hara i te èà tià mau. 9 E arataì o ia i te feiä âau marü mä te tià; e haapii mai o ia i te feiä âau marü i to na iho èà.10 Te mau haereà a te Fatu ra, o te aroha ia e te parau mau, i te feiä i haapaò i ta na parau i faaau e ta na i faaìte mai. 11 Rahi noa iho ä ta ù nei hara, e te Fatu, e faaòre mai ä òe i to òe ra iòa.12 O vai te taata i mataù i te Fatu. E faaìte o ia ia na i ta na èà ia hinaaro ra. 13 E pärahi te reira taata mä te maitaì, e riro te fenua i to na ra huaai. 14 Te parau moè a te Fatu ra, tei te feiä ia i mataù ia na ra; e o rätou ta na e faaìte mai i te parau faaau na na ra. 15 Te tano noa nei ä ta ù mata i te Fatu, no te mea e tià ia na ia ìriti mai i ta ù âvae i te märei ra. 16 Ìte mai ia ù, e aroha mai ia ù, e àti hoì to ù i te moèmoè. 17 Ua rahi iho nei te mäuiui o ta ù âau, e faaora òe ia ù i ta ù mau àti nei.18 E hiò mai òe i ta ù pohe e ta ù mäuiui, e faaòre mai òe i ta ù mau hara atoà nei. 19 A hiò na i ta ù mau ènemi ua rahi, e te ûàna mai ra to rätou riri ia ù. 20 Faaitoito mai òe ia ù, ia ora vau ia òe; eiaha vau ia roohia e te haamä, te tiàturi nei hoì au ia òe. 21 Ia ora vau i te parau mau e te parau tià; te tiàturi nei hoì au ia òe. 22 E te Atua e, ia ora Ìteraèra ia òe i to na atoà ra mau àti.

Ieremia 33,14-16

14 Te nä ô mai ra te Fatu  inaha, te fätata mai ra te tau e faatupu ai au i taua mea maitaì ra ta ù i faaìte i te ùtuafare o Ìteraèra, e te ùtuafare o Iüta. 15 I taua mau mahana ra, e te reira ànotau e faatupu ai au, no te huaai o Tävita, i te ohi parau tià, nä na e faatupu i te parau au e te parau tià i te fenua nei. 16 Ia tae i te reira tau e ora ai Iüta, e pärahi mai hoì Ierutarëma mä te ora; teie hoì te iòa e maìrihia nö na, o te Fatu ta tätou parau tià ra.

1 Tetaronia 3,12-4, 1-2

12 E ia faaîî mai te Fatu ia òutou i te aroha e ia manii noa ia òutou iho, e te taata atoà ra, mai ia mätou e aroha ia òutou na. 13 Ia itoito mäite to òutou âau ia na i te maitaì mä te hapa-òre i mua i te aro o te Atua, o to tätou ra Metua, ia fä mai to tätou Fatu ra o Ietu Metia, mä te feiä moà atoà no na ra.

4, 1-2

Te haereà e au i te Atua

1 Te parau maitaì atu nei ä mätou ia òutou, e te mau taeaè, e te aò atu nei ia òutou i te Fatu ra ia Ietu, e mai ta òutou i ìte aè nei ia mätou i te huru o to òutou haereà e au ai i te Atua, ia rahi atu ä to òutou nä reira. 2 Ua ìte hoì òutou i te aò ta mätou i tuu atu ia òutou, na te Fatu ra na Ietu.

Ruta èv 21, ­­­­­25-36.

Te haereà mai o te Tamaiti a te taata

(Mät 24,29-31; Mär 13,24-37)

25 E e piri to roto i te mahana i reira, e to roto i te märama, e to roto i te mau fetià; e e àti rahi to te mau fenua i te ao nei, e te ahoaho; e te miti e te àre i te harururaa; 26 e te tärapaperaa o te âau taata i te mataù, e te manaòraa i taua mau mea e fätata i te tupu i te ao nei; e pau hoì te mau mea o te raì ra i te ueuehia. 27 Ei reira rätou e ìte ai i te Tamaiti a te taata i te haereà mai nä nià i te ata mä te mana e te hanahana rahi. 28 E ua tupu anaè teie nei mau mea, e nänä i to òutou mata i nià, e faateitei i to òutou upoo, te fätata mai ra hoì to òutou ora.

Te haapiiraa a te tumu tute

(Mät 24,32-35; Mär 13,28-31)

29 Ua parau atu ra o ia ia rätou i teie nei parapore A hiò na i te tute e te mau räau atoà 30 ia hiò òutou i te ôteoraa, te ìte noa ra òutou e, ua fätata te àuhune i reira. 31 Oia atoà teie, ia hiò òutou i taua mau mea nei i te tupuraa, ua fätata ia te Pätireia o te Atua, ia ìte hoì òutou. 32 Oia mau ta ù e parau atu ia òutou nei, e òre teie nei uì e mou e hope ai i te tupu. 33 E mou te raì e te fenua, e òre rä ta ù nei parau e mou.

Te vai-ara-raa

34 E ara rä ia òutou, o te teimaha òutou i te rahi o te mäa e te taèro, e te peàpeà o teie nei ao, a roohia mai ai òutou e taua mahana ra aore i manaòhia. 35 E roohia mai hoì to te ao atoà nei i te reira mai te märei ra. 36 E tënä na, e ara òutou, tämau mäite ä i te pure, ia au ia òutou te ora i teie nei mau mea ìino e fätata mai nei, e ia tià mäite òutou i mua i te aro o te Tamaiti a te taata nei.

Manaò.

O te tiaìraa mätamua teie, e aha te tiaì, e vahi i reira e tià ai e pärahi ai, ia vai ineine noa ia tupu te ôpuaraa i manaòhia no te haere, e no te tere i te vahi i faanahohia. I te mea e ärataìraa e feruriraa parau te vai ra i mua i te òhipa e tiaì mai ra, mai te hoê ohi âpï i te tupuraa. No faaìte ia i te parau e mauhia ra e te òhipa, tei haapii mai i te ora a te Atua Nui Tumu Tahi te tumu o te ora. Tei tiàturihia i te mau mahana atoà. Te  tiaì to na turu te tiàturi te faaòromaì, aita e haereraa i mua, tei òre i riro atoà ei haereraa i muri, eiaha te ôtoheraa te haereraa rä i te vähi tei reira te parau, te vähi no reira mai òe, tei tïtau i te ìte e te hiò ma te tütonu i nià i te faufaa tei faatupu i te ora. Ia riro te puai o te mata èi päpü i te mea e hiòhia ra. Ia hiòhia te tahi, eiaha ia moèhia ia e, terä e hiò ra, e i roto i te reira hiòraa, te vähi paruparu, te ärea e vai ra i roto i te vahi e tiàhia ra e te mea e hiòhia ra, e tauturu te reira i te ìteraa i te mea e hinaarohia ra ia ìte. Mai te fefe tei haamanaò mai i te âfaro, te teiaha tei haamanaò mai i te mämä, mai te taere tei haamanaò mai te vitiviti. Te faahiroàroà noa mai ra te reira, i roto i te tiaìraa i te hinaaro o te Atua Nui Tumu Tahi, eita te hiò e tano ia faataa-ê-hia i te faaroo, oia te mea i parauhia. Hiò noa ai te mata i  roto i te tiaìraa, na te parau e arataì ra i te ìteraa i te mea ta te Atua e hinaaro ra ia ìte. No te mea e Värua te Atua, te mea e märamaramahia, te mata te värua te âau o te taata ta te Atua e hinaaro no te tautururaa ia tupu hau noa ta na Rähu. I te mea te faamanaò noa mai ra te reo i te faufaa o te taò, e taoà ora te reo, te värua te reira o te hoê nünaa, te rämepa türama i te èà o te taata, tae atu ai o ia i roto i te ìte. Ia ìno te reo, te èà o te taata terä e mohimohi ra, parau hänoa atu ai o ia i te parau mai te taa òre i te mea ta na e parau ra, mai te haapeàpeà òre to na upoo i te ìno ta na e rave ra, no na iho nä mua roa, e no te feiä atoà e faaroo mai ra ia na. Ua ineine te reira taata i te parau i te mea e parauhia ia na e parau, aita hoê aè fifi to na i te parauraa i te maitaì, e ìno, e te ìno ra, e maitaì ia ; te parauraa i te pöuri, e märamarama, e te märamarama ra, e pöuri ia ; te parauraa hoì i te maramara, e momona, e te momona ra, e maramara ia. No te mea e taoà ora te reo, ia ö te tahi taò i roto i te tahi reo, eere te taò anaè të ö mai, te manaò atoà rä e paèpaè ra i te reira taò, oia te hiòraa a te nünaa na na te taò. A faaroo mai na i te haapotoraa o na taiòraa e maha nei te puai o te au taò. 

-Taramo 25, 15 Te tano noa nei ä ta ù mata i te Fatu.

-Ieremia 33, 15 nä na e faatupu i te parau au e te parau tià i te fenua nei.

-1 Tetaronia 3,  13 Ia itoito mäite to òutou âau ia na i te maitaì mä te hapa-òre i mua i te aro o te Atua, o to tätou ra Metua, ia fä mai to tätou Fatu ra o Ietu Metia, mä te feiä moà atoà no na ra.

-Ev. Ruta 21, 29 A hiò na i te tute e te mau räau atoà

Teie mau ìrava, eita e tià ia parau-noa-hia i roto i te parau no te raveraa i te òhipa, te vai ra te tahi mea hau atu të ìmi i roto i te auraa ta teie mau ìrava e horoà ra no te òhipa, oia te faatupuraa i te ora, te raveraa i te òhipa no te maitaì o te taata, no te tatara i te taata i räpae i te fifi, aore ra te raveraa i te òhipa ia òre te taata, te ùtuafare ia topa i roto i te fifi. Te taata e rave i ta na òhipa, eiaha te òhipa i faauehia ia na e rave, te òhipa no reira o ia i àufauhia ai, te taata rä e faatupu i te värua o te òhipa, e tiàraa faaora to na. Ia parau te Taramo e 15 Te tano noa nei ä ta ù mata i te Fatu. Oia hoì te òhipa e vai ra i roto i aru ta na e ìte ra tei àua haaàti ia na. E òhipa ihoä to roto i te parau o te aru,  te aru ra te fenua ia, ia ìte tätou i te uruaì i nià i ta tätou iho märamaramaraa i te parau o te òhipa,  ia  tüàti ta tätou märamaramaraa i teie parau ia tano noa te mata i nià i te òhipa.

Te taata faaàpu i roto i ta na òhipa ta na märamaramaraa i te värua o teie parau, aita atu e manaò e arataì ia na i roto

i ta na òhipa maoti rä, to na here i ta na òhipa, e te ìteraa i te auraa o te òhipa ta na e rave ra, oia te horoàraa i te ora, aore ra te riroraa o ia ei ora no to na ùtuafare. Aita hoê taiò e ö mai i roto i ta na raveraa i ta na òhipa, no te mea aita e hoo to te ora. Eita teie taata e taiò i te hora haamataraa e te hora faaotiraa, eita e taiò i te rahiraa mahana ta na i rave i te òhipa, eita e taiò i te rahiraa mäa ta na i tanu, eita e taiò i te rahiraa moni e roaa ia na. Hoê noa ta na i ìte, e ora to na ùtuafare i ta na òhipa. Aita i ö mai i roto i te manaò o teie taata e, e tiàraa faaora to na, o tätou teie e parau nei e, e tiàraa faaora to na, te mea atoà te reira e horoà i to na turaraa taata. Aita teie taata e ìmi ra i to na hanahana i roto i ta na òhipa, aita hoì e ìmi ra i te räveà ia faahanahanahia, aore ra ia haafetiàhia o ia, mai ta Ieremia  e parau ra no te Atua 15 nä na e faatupu i te parau au e te parau tià i te fenua nei. Te fenua e parauhia ra i roto i te ìrava e fenua e turämahia  i te parau Atua e tae noa atu i te mau motu i teie huru  parauraa  o te fenua, e nä ô ia tätou e, e fenua ta te Atua i horoà i te Mäòhi, e ture ta te hoê arii e tuu i to na nünaa, âreà te fenua, aita ta na e ture, te haapaò noa ta na i te hinaaro o te Atua. Mai ta Pauro e parau ra i te naòraa e, 13 Ia itoito mäite to òutou âau ia na i te maitaì mä te hapa-òre i mua i te aro o te Atua, o to tätou ra Metua, ia fä mai to tätou Fatu ra o Ietu Metia, mä te feiä moà atoà no na ra. Te mea atoà ia i itoito ai tätou i te maitaì, no te faatupu i te haapiiraa, ei haapäpüraa  eere te färaa mai o Ietu no te haere mai e faatere i te fenua no te tïtau ra, no te faaìteraa i te taata e te mau nünaa atoà i te parau tià a te Atua nä roto i te haapiiraa, oia hoì nä roto i te türamaraa i te taata i te hinaaro o te Atua. Na te haapiiraa e arataì i te taata i te märamarama i faatupu ai o ia i te parau tià. Aita hoê faaheporaa i te taata ia rave i te tahi òhipa, aore ra te tahi  haafifiraa ia märamarama, eita ia e tià i te taata ia òre ia rave i te mea ta te märamarama i faaìte ia na. Te auraa rii atoà ia o te mea ta Ietu e parau ra, ia nä ô mai o ia e, 29 A hiò na i te tute e te mau räau atoà. Te horoà nei o Ietu i te ìteraa i te mea e hiò, te puai ia ta te mata e tütonu nei ia òre ia vai rupehu noa te òhipa e faatupu, mai ta te hiò hipa e faahoì mai nei i to tätou hohoà te aru a te Atua to tätou te reira hiò hipa.

Teraì òr. Faatura.