Pae o te pō : Mahana maha 10 no Tetepa 2020 Te hinapaarae ei faaâpīraa i te oraraa.

 

Pae o te pō :

Mahana maha 10 no Tetepa 2020

 

Tumu parau :

Te hinapaarae ei faaâpīraa i te oraraa.

 

Pehepehe :

 

TE HINAPAARAE

 

E aù nūnaa iti e, no òe teie parau
Tei roto òe i te tau faaâpīhia e te Tumu Nui
A tuu te tohe i raro e, a feruri
Faaineine ia òe, ua maa te êà
Ei haereà âpī to òe i te tau hou nei.

 

Hope te tau no te ài ū, ua tae i te tau àiraa māa
Ua reva te tau àimama, enā atu te tau àitū
Ua hope te tau àihamu, eie te tau māa tumu
Ua tae i te tau e ora hope ai òe i to tiàmāraa
Tē tīaì mai ra te Tumu Nui ia òe.

 

Te hinapaarae, no òe anaè ia parau
E faaâpīraa uì teie na te Tumu Nui.
Aita atu ta òe, tomo i roto i ta na.
Mai te manu e mārere na te tāhuhu o te raì
Ia nā reira atoà òe i te ìteraa i te hau o to fenua iti.

 

Mai te pape nei e faaruè i te puna pihaa
No tē faararirari e faahaumārū i te fenua
E na te raì e faahoì faahou ia na i te puna ra
Ia nā reira atoà òe i te tahe-rii-māite-raa
E tae noa atu i te muriāvai o te tau hou nei.

 

Haamanaò, na te Tumu Nui te hinapaarae.
E tupu mau ā Ta Na, eita e mau ia tāua.
Na te mataì e arataì te toparaa o te rau
E aha ta òe e mataù ra i te faataa-ê-raa
Na te Atua Nui Tumu Tahi e arataì i to haereà âpī.

 

Taiòraa : 2 Tōrīnētia 2, 12-17

 

12  Ia ù hoì i haere i Teroa e haapii i te Èvaneria o te Metia ra, a ìriti ai te Fatu i te ôpani ia ù ra, 13 aita roa taù âau i mahu, no te mea aita taù taeaè o Tito i ìtea atu e au : poroì iho ra vau ia rātou, reva atu ra vau i Mātētōnia. 14 Ia haamaitaìhia rā te Atua, o tei faaòaòa mai ia mātou i te Metia aore e faaea, o tei faaìte haere hoì i te hauà i te ìte ia na ia mātou nei e aore e vāhi toe. 15 Ua riro hoì mātou i te Atua ei hauà noànoà no te Metia, i te feiā faaorahia e te feiā e pohe. 16 I te tahi pae rā, e hauà pohe ia mātou e tae noa atu i te pohe ; âreà i te tahi pae, e hauà ora ia mātou e tae noa atu i te ora. E o vai hoì tē au i teie nei parau ? 17 Eere hoì mātou mai te hōê pae i ânoì i te parau a te Atua ra, tē parau nei rā mātou i te parau a te Metia, no ô mai i te Atua ra, mā tē haavare òre, e i mua hoì i te aro o te Atua.

 

Manaò tātara :

 

Tē hinaaro òe e tē òre òe e hinaaro, e tupu ihoā ta te Tumu Nui. Ta te tau ia no te hinapaarae e tītau mai ra ia tātou i teie mahana. No te mea, te tau no te hinapaarae, e tupuraa te reira no te hinaaro o te Atua. E faaâpīraa uì teie Na Na e na te fenua. Te auraa, mea tano ihoā e, na te māramarama o te Parau a te Tumu Nui tātou e arataì i roto i teie haereà âpī to tātou. Tē nā ô ra te reo o Pauro : ‘O tei haapaò i ta te Vārua, e ìte o ia i te mau mea i hōroà-noa-hia mai e te Atua'. E ui na tātou, e aha ta te Tumu Nui i hōroà mai na te taata, hau roa atu, e aha ta te Tumu Nui i hōroà noa mai na i te nūnaa Māòhi. Te î o te raì, na òe te reira e te Māòhi. Te î o te reva, na òe atoà te reira e to Māòhi Nui, te fenua e te tāatoàraa o to na î, na òe atoà te reira e te Māòhi. To nià e to roto i te moana, na òe atoà te reira e te Māòhi. To roto i te hohonuraa o te moana, na òe atoà te reira e te nūnaa Māòhi. E aha anaè ā ta òe e ahoaho ra, ua hope pau roa te mau mea atoà e ora ai òe i tē hōroà-noa-hia mai e te Atua na òe. Na te Vārua ia o te Atua, oia hoì na te māramarama ia o Ta na Parau.

 

Aita o Pauro e hinaaro e na te paari o te taata e haapii i te mau taeaè i te faaroo e pārahi ra i Tōrīnētia, na te māramarama rā o te Parau a te Atua, te Vārua ia o te Atua. E tomo i roto i te Parau e na te Parau ihoā rātou e arataì. Eita te paari o te taata e haapaòhia e te Vārua, no te mea e mea maamaa hoì te reira no te Tumu Nui. Ia nā ô anaè Pauro i tē parau e : '' Tei ia mātou ra te âau o te Metia '' te auraa, tei roto atoà ia rātou i te Parau a te Atua e mauhia ra e te Metia ra Ietu. Ua tauturuhia, e ua haapiihia te rahiraa o te mau Parau a te Tumu Nui tei nā roto mai i te Metia ra ia Ietu, e ua haapaò-māite-hia te reira e Pauro.

 

Oia, ua ora mai na tātou i roto i te tau no te ôpanipaniraa e piti âvaè te māoro, no te tīnairaa ihoā i teie tāèro/tirotiro 19. Ua faaea, ua mau ta te taata òhipa i roto i teie nei ao, âreà ta te Atua tei nā roto mai i te rahu, te raì, te fenua, te moana e te mau î atoà, ua oraora faahou mai ia. Mai te peu ua faaea ta te taata, eere ia na te taata, na te Tumu Nui ia. Te auraa, e tuu i te tohe i raro, e hiò atu ai, e aha mau na te hinaaro o te Tumu Nui ia òe te Māòhi i teie nei mahana.

 

Te hinapaarae, te hitu te reira o te uì i roto i te faanahoraa ôpū tamarii a te Māòhi. Ia tae i te reira uì, e motu te taura ôpū fētii, e faaâpīraa uì to reira. E hoì te âpaparaa uì na te haamataraa mai. E no te mea na te Atua e Na na anaè te faanahoraa i te parau o te taata e to na oraraa, te hinapaarae e te mau uì atoà, e faanahoraa faaroo anaè te reira. Te auraa, te Atua, e te tāatoàraa o ta na rahu, o rātou teie e rave nei i te faaâpīraa o te uì o te taata nei. Aita te taata e anihia nei e rave i te faaâpīraa, tē ani-noa-hia nei rā ia na, ia ora i roto i te faaâpīraa i faatupuhia e te Atua Nui Tumu Tahi, e te tāatoàraa o te Rahu o ta na i hōroà mai ei faufaa ora na te taata nei.

 

Tē hinaaro òe e tē òre òe e hinaaro, eita te Atua e tīaì i ta òe faaotiraa. A tomo i roto i te faaâpīraa ta te Vārua o te Tumu Nui, oia hoì ta te māramarama o te Parau e tītau mai ra i te Māòhi ia Māòhi o ia. Te tau no te hinapaarae, o te faahoìraa ia ia òe i te haamata-roa-raa o to òe parau, oia hoì, te parau i Māòhi ai òe. Òre noa atu ai te tahi pae e fārii e, e tūàti mai ia òe, e tupu ihoā rā ta te Tumu Nui.

 

No reira, O vai hoì ta òe e mataù, tei ia òe ra hoì te Vārua/âau o te Tumu Nui.

 

Ia Atua te Atua, Ia fenua te fenua, Ia Māòhi te Māòhi, ua maitaì roa ia.

 

Pure :

 

E tārahu rahi roa ta mātou ia òe e te Tumu Nui e, o mātou i faaìno e i vahavaha i te ora ta te mau rāau o te fenua e faaìte noa nei, aore e mahana tuua, o mātou hoì i hiò i te reira ei mea maamaa ; e tārahu rahi atoà rā ta mātou ia òe, o mātou i vahavaha i te haèhaa o ta òe Tamaiti, i te òreraa e haamā i tē rave i te huru o te arii, e inaha, i haere tāvini mai o ia no tē faaìte ia mātou e, aita e ora to te taata i rāpae aè i te Faufaa ora ta òe i hō mai na mātou, o mātou hoì i òre i hinaaro i tē ìte i roto i te haèhaa o to mātou Faaora, i te teitei rahi fāito òre o to òe here ia mātou.

Ono o te pō : Mahana pae 11 no Tetepa Ia Atua-faahou-hia to te taata e tià ai.

 

Ono o te pō :

Mahana pae 11 no Tetepa

 

Tumu Parau :

Ia Atua-faahou-hia to te taata e tià ai.

 

Pehepehe :

 

FAARIRO

 

Marū roa te haùti, erā i riro atu ra
Òhipa pata pōro noa erā ua riro
E aha rā ta òe i riro ai.
E aha òe i vare noa ai ia vērā mā
Māòhi, no te Tumu mai to òe paari

Eiaha e faariro atu, to òe ia pau
A faariro mai, to òe ia âpī

Mea ôhie roa tē haapau atu
Mea rave àtā roa atu tē faahoì mai
Faariro, o to tātou ia toparaa i roto i te ère

E aha tē toe mai nei ia tāua
Paa haari, paa nono, paa tāmanu
Punu pātē, punu îtō, punu puaatoro
Eere ānei te paa tē haapae, e ài i te ìò
E aha atu ra òe i faariro ai i te punu
Ei papa no to òe oraraa.

 

Māòhi e, a ìte e a fārii
To nià i te tūaraì e te reva, na òe
To nià i te fenua e te moana, na òe
To roto i te moana e to raro roa, na òe
Na te Tumu Nui i hō mai, eiaha e faarirohia
To òe noa iho te reira ora, Ia ora na !

 

Taiòraa : 2 Tōrīnētia 3, 1-11

 

TĒ HAAMAITAÌ NEI PAURO I TO NA TŌROÀ, I TĒ TUURAA I TE ÈVANERIA RA.

 

1 E haamaitaì faahou ānei mātou ia mātou iho? E ei èpitetore haamaitaì ānei ta mātou ia mātou iho ia òutou na, mai ta te hoê paeàu ra e tià ai ? E te èpitetore haamaitaì ia mātou no ô mai ia òutou na ? 2 O òutou hoì ta mātou èpitetore, i pāpaìhia i roto i to mātou âau, ua ìtea e ua taiòhia e te taata atoà. 3 Ua faaìte-pāpū-hia hoì òutou e, o te èpitetore ia a te Metia, i òhipahia e

mātou. Aita rā i pāpaìhia i te ìnita, na te Vārua rā o te Atua ora ra ; eiaha i nià i i te papa ôfaì, ei nià rā i te papa taata ra, i te âau.

4 O te huru ia o to mātou manaò i te Atua i noaa i te Metia ra. 5 Eere rā mai te mea e, e au ia mātou iho ia manaò e, e tià te hōê mea iti ia mātou anaè iho, no ô mai rā i te Atua ra o to mātou tià ; 6 o tei faariro atoà ia mātou ei òrometua itoito i te faufaa âpī nei ; eiaha i te parau pāpaì anaè ra, i te Vārua atoà rā. E pohe hoì tei te parau pāpaì ra, e ora rā tei te Vārua. 7 E hanahana hoì to te tuuraa i te parau pohe e i ôotihia i nià i te ôfaì ra, e aita atu ra e tià i te tamarii a Ìteraèra ia hiò tāmau atu i te mata o Mōte, i te ànaàna o to na mata ; e faaòrehia rā taua ànaàna ra. 8 E òre na ānei e rahi atu te hanahana i te tuuraa mai i te parau a te Vārua ra ? 9 E hanahana hoì to te tuuraa mai i i te parau faahapa ra, e hanahana rahi atu ia to te tuuraa mai i te parau-tià ra. 10 E taua mea hanahana ra hoì, aita atu ra ia i hanahana ia faaauhia ra, no taua hanahana rahi i hau ê ra. 11 E hanahana hoì to taua mea e faaòrehia ra, e rahi atu ia te hanahana i to tē vai ā.

 

Manaò tātara :

 

Tē nā ô ra ta tātou tumu parau no teie pō : Ia Atua-faahou-hia to te taata e tià ai. I nià noa i te huru hāmaniraa o te ìrava tātou e ìte ai, tē vai ra te tahi mea e hinaarohia ra i te taata, ia maitaì o na i roto i te roaraa o to na oraraa. E taua mea ra, o te Atua ia. Tē haapāpū atoà mai nei teie huru parauraa ia tātou e, eiaha mai te mea ua haamoè te Atua ia na. Aore ia, ua faaruèhia mai te Atua te taata nei ia ôtare noa na i roto i teie nei ao. E au ra e, ia au i te huru o te oraraa o te ao nei i teie mahana, ua patu-tua-hia e te taata i te hiti o to na oraraa. Ua haapae te taata i te Atua, ora noa ai ia au i to na manaò, to na pūai, to na māramarama, to na àravihi, e aita o mua aita o muri. No te mea, te reira te huru oraraa o ta na i faanaho, eiaha ia tātou e maere i te ôtaa, te tāhatu, te pōtaro o te fifi tuatau ta to te ao e faruru nei i teie mahana.

 

Ia âpee rii tātou i te manaò tumu o ta tātou pehepehe no teie pō, mai te mea ra e, tē faaìtehia mai nei tātou i te tahi huru tupuraa fifi o te taata ia òre te Atua e pārahi tāmau i roto i to na oraraa i te mau mahana atoà ra. E riro ê te tāatoàraa o ta na mau faufaa tumu ia vētahi ê. To nià i te raì, te reva, to nià e to roto i te fenua, e pārahi noa o ia i roto i te ère, e te ôtare hoì iō na iho ra. Aita atoà paha tātou e te nūnaa Māòhi, i māramarama roa i te tumu i riro noa ai te rahiraa o ta tātou faufaa tumu e i haru-atoà-hia ai te reira. Te mea noa rā ta tātou e ora ra i teie mahana, o to tātou ia ìteraa e, tei roto tātou i te ère e te pau hoì i te rave a to rāpae. Te auraa, eere paha i te mea tano roa no tātou teie haùti ta te tamarii e, e faariro, no te mea ua faaèrehia tātou.

 

Âreà Pauro, tē haamanò noa ra ia o ia i te nūnaa no Tōrīnētia e, e parau pāpaì te nūnaa na te Atua. Te auraa, ia hiò e ia taiò te taata i te parau o te nūnaa no Tōrīnētia, e ìte atu te taata i te Atua i roto i teie nūnaa. No tē faaìte noa mai ia tātou e, te òhipa i ravehia e Pauro i roto i teie nūnaa, o te pāpaìraa ia eiaha noa i te parau a te Atua i roto i teie nūnaa, i te neneìraa rā i te Atua iho i roto i te nūnaa. Te pāpaì-faahou-raa i te huru e te hohoà o te Atua i roto i te âau o te nūnaa. No reira, ia ìte e ia taiò te taata i te parau o te nūnaa, e ìte atu te taata i te Atua i reira. O te reira atoà te mea e anihia nei i te mau tāvini o te Atua i teie mahana i Māòhi Nui nei. Oia te haapiiraa i te Māòhi i tē ìte i te Atua i roto i to na parau. Eere ānei e, e tupuraa hanahana te Māòhi e to na parau no te hinaaro o te Atua.

 

I reira e tano roa ai te maa reo ta Ietu i parau atu i ta na mau pipi e, « o tei ìte mai ia òutou, ua ìte mai ia ia ù, e o tei ìte mai ia ù, ua ìte ia i tei tono mai ia ù » ; Mai te mea ta Pauro parauraa i to Tōrīnētia e, e parau pāpaì rātou no te Atua, âreà tātou te Māòhi, tē parau nei ia tātou i te reira, e hiòhipa tātou no te Atua.

 

I roto i teie tau no te hinapaarae ta tātou e ora atu mai teie atu nei, aita atu e mea e tano ia tātou ia rave, o to tātou ia faahaèhaaraa i raro no te ìteraa e, ua ihu tātou i te êà o te oraraa nei. Eiaha e taiā i tē tuu i te tohe i raro e tē hoì i muri i te vāhi i haamata ai tātou i tē ihu, no tē faahoì-faahou-raa ia tātou i nià i te êà i faatorohia mai te Tumu Nui e te huitupuna hoì i vaiho mai ei taìara no to tātou haereà. Ia  ora na !

 

Pure :

 

E te Tumu Nui e, mai to Vārua i faaârepurepu i te moana i tāpaòhia e te pōiri, hou òe i ìriti ai te ùputa o te māramarama e te ora, ua faaârepurepu atoà to Vārua i tonohia mai e to mātou Fatu i te âau o ta na mau pipi, hou òe i ìriti ai ia rātou i te ùputa o te māramarama i ta òe Parau, tē tiàturi nei mātou e, e faaârepurepu ā to Vārua i te moana uri paò o to mātou nei âau ètaèta, e na òe ā e ìriti ia mātou i te ùputa o te māramarama, e fārii ai mātou i tē haere atoà nā nià i te êà i vai fātata noa ai to mātou mau Tupuna ia òe, e te Tumu hōê roa o te ora.

Hitu o te pō : Mahana māa 12 no Tetepa 2020 Ia fenua-faahou-hia to te Māòhi e tià ai.

 

Hitu o te pō :

Mahana māa 12 no Tetepa 2020

 

Tumu Parau :

Ia fenua-faahou-hia to te Māòhi e tià ai.

 

Pehepehe :

 

EIAHA E HAPE

Ia varevareā te mata, e mārehurehu te oraraa.
Ia âmaamaa te feruriraa, e âhurea te hīroà.
Ia paaraara te âvae, e tīoioi te haereà.
Ia tautau nā rima, e tārere te òhipa.

 

Māòhi, eere òe i te vareàmata, tē ìte ra òe.
Eere òe i te maamaa, tē hāroàroà noa ra òe.
Eere òe i te piriòì, te hahaere noa ra òe.
Aita to rima e tārere, te puta noa ra te fenua.

 

Eiaha e hape, e àito òe.
E haari e tū i nià i te papa o to fenua
E ohi no te Atua Nui Tumu Tahi ra.
E tupu òe i te rahi i te marumaru o to Atua
Ei ia òe e hotu ai Māòhi Nui i te ora

Na to Huaai, a tau a hiti noa atu.

 

Taiòraa : 2 Tōrīnētia 3, 12 – 18

 

 

12 E i teie nei, e tīaìraa to mātou mai te reira te huru, te parau pāpū hua nei mātou. 13 Eere hoì mai ia Mōte o tei pāruru i to na mata, ia òre te tamarii a Ìteraèra ia hiò pāpū, i te hopeà o taua mea e faaòrehia ra. 14 Ua haapōurihia rā to rātou âau : tē vai noa ra taua pāruru ra, e tae noa aè nei i teie nei mahana, i te taiòraa i te Faufaa Tahito. Ua faaòrehia hoì te reira i te Metia nei. 15 Tē vai noa ra te pāruru i to rātou âau, ia taiòhia Mōte ra, e tae roa aè nei i teie nei mahana. 16 Ia fāriu rā te taata i te Fatu ra, e ìriti-ê-hia ia taua pāruru ra. 17 E i teie nei, o te Fatu taua Vārua ra, e tei ia na te Vārua o te Fatu ra, tei reira te tiàmā. 18 Tē hiò atoà nei tātou i te maitaì o te Fatu mā te mata pāruru òre ra, mai te mea e, tei roto i te hiò ra, e te faahuru-ê-hia nei tātou ei hohoà hōê, mai te maitaì hōê e tae noa atu i te maitaì, i te Vārua o te Fatu ra.

 

Manaò tātara :

 

E hoa here mā e, tē faaroo noa nei tātou i teie hopetoma i teie pure ta te mau tupuna e nā ô ra e, « Ia Atua te Atua, ia fenua te fenua, ia Māòhi te Māòhi, ua maitaì roa. » E toru noa òhipa e hinaarohia ra ia tupu. A tahi, ia noaa i te taata ia faahoì mai i te Atua, ei niu, ei papa, ei pou tumu no te tāatoàraa o te oraraa o te taata. Ia faaea roa te taata i tē haafaufaa òre i te Atua, e i tē haapae roa Ia Na i rāpae àu roa mai i to na oraraa. Ia riro faahou te Atua ei ôriò mata, ei pū tarià, no te taata i te mau taime atoà. Te piti : Ia faariro faahou te taata i te fenua ei papa âueue òre no to na oraraa. Ia faariro faahou te Māòhi i te fenua ei metua vahine faatupu ora no na. E ia faahope i to na tiàturiraa e, tei roto anaè i te fenua to te Atua tanuraa i to na ora. E aita hoì to na ora i rāpae àu mai i to na fenua. Te toru : Ia noaa atoà i te taata nei te haèhaaraa o te âau no tē hoìraa i nià i to na tiàraa taata. Oia hoì e rahu na te Atua, e tamarii na te fenua. Ia òre te taata ia teòteò noa i te faainainaraa i te Atua e i te haamereraa i te fenua. Eiaha mai te mea aita ihoā e faufaa to te taata, no te mea rā, e hinaaro no te Tumu Nui ia eaea* aè te oraraa o te taata i nià i te tua o te fenua nei, aita ihoā e êà maitaì roa aè no na ia rave, māoti te ìteraa o na i tē hoì e i tē rave i to na tiàraa taata i mua i te Atua, e i mua atoà i te fenua. O te auraa ia ta teie tumu parau ta tātou no teie pō e faaìte mai nei. « Ia fenua-faahou-hia to te Māòhi e tià ai ». E parau mau roa, i nià i te huru hāmaniraa o te ìrava e ō mai ihoā te manaò e, e fatu te taata i te fenua. Ia parau anaè rā hoì tātou e, ia metua-vahine-faahou-hia to te taata, te manaò tumu, eere ia fatu te taata i to na metua vahine, ia ìte faahou rā te tamarii i te hana o to rātou metua vahine.

 

*eaea : oraora

 

Pure :

 

Aroha mai ia mātou e te Tumu Nui e. Mai ta òe i haapii mai ia mātou nā roto i te tohu a Vaitā, hōroà mai ia mātou i te òaòa, te itoito, e te pūai, i te here-faahou-raa i to mātou māòhiraa, te hereraa i te vauvau heeuri ta òe i hohora ei pārahiraa no mātou, e te hereraa hoì ia òe, te Tumu hōê roa o to mātu ora, te Atua i Vai na, e Vai nei, e Vai ā.

Vaù o te pō : Tāpati 13 no Tetepa 2020 E te nūnaa Māòhi, a ora mā te Hau.

 

Vaù o te pō :

Tāpati 13 no Tetepa 2020

 

Tumu Parau :

E te nūnaa Māòhi, a ora mā te Hau.

 

Pehepehe :

 

E TENĀ TAATA ÂPĪ E, EI HAU 

Uiui noa ai òe i nià i te aratià
O to oraraa e, o vai rā vau nei
Taamino noa ai òe i roto i te àrepu o te tau
Hurihuri noa ai to manava i te rau o te ui maere
E aha teie e àhure nei i to ù hīroà tumu.
E te taureàreà Māòhi e, ei hau.

A rere e tenā na tama Māòhi.

Na te mataì o te Hau Metua

E tū i te raì hāmama noa

E faahaumāru noa ia òe

I te tau hepohepo nei

Roo-iti-noa-hia aè òe e te taèro

Tūmā i to parau, ia mau ta òe parau mau

Na te rima haumārū o to māmā

E roromi ia òe, ia Hau to tere.

 

A haamanaò rii noa rā òe

I te mato Māòhi i paohia mai ai òe

Ia òre to hīroà e to iho tumu ia haruhia

E te hotu pāinu o te ài nūnaa.

Inaha, òe iti noa aè te ôriò mata

E te pū tarià o te Tumu Nui.

 

E te taureàreà Māòhi e,

Moemoe-noa-hia mai ā òe

Ferafera-noa-hia mai ā òe

E te vārua ài mānava, ài tiàturiraa

A haamanaò e, tei to pae noa iho

To uruaìraa, to tūruìraa e òre ai òe e hià

I te ûàna o te àre fati mure o te aau

Ei hau, ei hau, a tau a hiti noa atu.

 

Taiòraa : Mātaio 18, 21 - 35

 

21 Ua haere mai ra Pētero ia na ra, nā ô mai ra : E te Fatu, ia tuatāpapa taù taeaè i tē hāmani ìno mai ia ù, ia hia a ù faaòreraa atu i ta na hara ? Ia hitu ānei ?  22 Ua parau atu ra Ietu ia na : Aore au i parau atu ia òe e ia hitu, ia hitu rā àhuru i te hituraa. 23 E au hoì te pātireia o te ao ra i te hōê arii o tei manaò i tē faaau i te parau i to na ra mau tāvini. 24 E ia tāmata o ia i tē faaau, i arataìhia mai te hōê ia na ra, hōê a ana àhuru te tautani i te tārēni aore i hoona. 25 No te mea rā aita ana ei hoo mai, ua faaue atu ra ta na fatu ia hoohia o ia e ta na vahine e te mau tamarii, e ta na atoà ra taoà, a hoo mai ai. 26 Ua tīpapa iho ra taua tāvini ra i raro, tāhopu mai ra ia na, nā ô mai ra : «E taù fatu, eiaha na òe e rū ia ù, na ù e faahoì atu i te hoo ia òe na e hope roa aè !» 27 Ua aroha mai ra te fatu o taua tāvini ra ia na, faaòre mai ra i taua tārahu ra, tuu noa atu ra ia na. 28 Haere atu ra rā taua tāvini ra i rāpae àu, e ìte atu ra i te hōê taetaeaè tāvini no na, e àmutārahu na na hōê hānere moni veo. Haru atu ra i ta na àrapoà, nā ô atu ra : « E hoo mai òe i taù tārahu ia òe na ! » 29 Ua tīpapa iho ra taua taetaeaè tāvini no na ra i raro i ta na pae âvae, ua tāparu aè ra ia na, nā ô aè ra : Eiaha na òe e rū ia ù, e na ù e faahoì atu i te hoo ia òe na e hope roa aè !» 30 E aita aè ra i tià ia na ; tii atu ra rā ia na, huri atu ra i roto i te tāpeàraa, e ia hoona ia na taua tārahu ra. 31 Ìte aè ra rā te mau taetaeaè tāvini no na ra i te reira, aroha roa atu ra rātou, haere atu ra, faaìte pāpū atu ra i taua mau mea atoà ra i to rātou fatu. 32 Ua faaue atu ra ta na fatu e tii ia na, e ua nā ô atu ra : « E teie nei tāvini ìno e ! Faaòre atoà atu ra vau i taù tārahu ia òe ra, o òe i parau mai ia ù ra ; 33 eiaha òe e aroha atoà atu i to taetaeaè tāvini mai ia ù i aroha atu ia òe na ? » 34 Riri aè ra ta na fatu ia na, tuu atu ra ia na i te feiā tāpeà ra, e ia hoona roa ta na tārahu ra ia na. 35 E nā reira atoà mai taù Metua i te ao ra ia òutou atoà na, ia òre òutou ia faaòre mā te âau atoà i te hapa a to na taeaè.

 

Manaò tātara :

 

I teie mahana, e hope ai teie pureraa matahiti o te nūnaa Māòhi. To na tanoraa mau, i teie atoà mahana e haere ai tātou nā nià i te êà o te hau. Ei tere hau aè to tātou nā nià i te êà o te oraraa nei, ia au i te auraa o ta teie parau tumu e tītau mai ra ia tātou i teie hopetoma. « Ia ora hau noa te nūnaa i nià i to na fenua ». Nā hea rā ia te reira parau e tupu ai ia tātou. Nā hea te nūnaa Māòhi e ìte faahou ai i te oraraa hau i nià i to na fenua, i roto i teie tau tei àhurea te mau mea atoà.

 

Rave rii noa mai na tātou i teie parau ta Mātaio i taiòhia iho nei i mua ia tātou. Ua riro te parau no te faatupuraa i te hau e mānaònaòraa na Petero. Oia tei haere atu e  ani ia Ietu i te tahi tauturu. Eiaha mai te mea, aita o ia i ìte i te rāveà, aore rā i te êà o tē tano o ia e rave. To na noa fifi, tei nià i te fāito, oia te nūmera, tupu atu ai te faaòreraa i te hapa, ora atu ai o ia e to na tauaro i roto i te hau. Âreà Ietu, ua ìte ia o ia e ua fārii i te rāveà o tē ravehia ra e Pētero. Ta na noa i faanavaì atu o te fāito ia o ta na e hapāpū ra e, aita e fāito to te faaòreraa hapa a te tauaro ia tātou nei.

 

E tano tātou e parau e, te faahauraa, aore ia te faafāiteraa, eere ia i te tahi òhipa oti noa i te tahi noa taime, tīârā atu ai. Te auraa, ia parau anaè tātou i teie mahana e, « ia ora  hau noa te nūnaa i nià i to na fenua », o te faaitoitoraa ia i te nūnaa Māòhi i te ìmiraa i te rāveà ia òre te fenua ia riro ei tumu no te papararīraa o te mau ôpū fētii o to tātou nūnaa.

 

Ua ìte maitaì tātou e te nūnaa Māòhi, aita to tātou metua vahine e fifi no na iho. Aita roa atu o ia i faatupu aè nei i te peàpeà i roto ia na e o tātou. E māmā iti hau roa teie e tē ìte maitaì i ta na mau tamarii. Na tātou nei rā i vāvāhi ia na, i àitau ia na, i haaviivii ia na, e na tātou hoì i hoo roa atu ia na. Aita roa atu ra o ia i fifi i mua i ta tātou huru rave ia na. O tātou nei rā teie e fifi nei, e autā nei, e māuiui nei. O tātou teie ôtare nei, e ôvere nei i roto i te ôtaa o te oraraa mau òre. O to tātou mau ôpū fētii tei papararī roa i ta tātou iho raveraa. No reira, te faufaa o teie piiraa ta tātou ia tātou iho, ia ora hau noa tātou i nià i to tātou iho fenua.

 

Ua ìte tātou e, aita e òhipa ta te Atua i ani mai nei i te taata e rave, o tei òre o ia i nā mua i tē rave. Aita atoà e òhipa o ta na e ani mai nei ia tātou tei òre o ia e ìte e, e maraa ia tātou ia rave. Te faatupuraa i te hau, tahi atoà teie huru tumu to tāua e te Māòhi. No reira teie aniraa ta Ietu ia Pētero, e ôhie tāua i tē faatupu e i tē faariro faahou ei oraraa tumu no tātou.

 

Haamanaò noa tātou i teie reo faaitoito o te metua i nià i te tama ta te pehepehe e faatara ra, ia haere te tama ma te hau nā nià i te taìara o te oraraa nei. Te hau o te metua tāne e tae noa atu i te hau o te metua vahine. Na te reira Hau e tāhei noa i te amoamoraa e te tuutuuraa âvae o te tama, ia òre hoì o ia ia pahee noa i roto i te ôtaro fifi o te oraraa ânoì o te tau hou nei.

 

I roto i te âpaparaa o te tau ta te ôpū tamarii e haapii noa mai nei ia tātou, e au ra, ia tae tātou i te tau no te hina ua haamata te toto i te ânoì. No tē haapāpū noa mai ia tātou e, ua tupu ê na te ânoìraa o te oraraa o te nūnaa Māòhi. E te reira hoì ânoìraa, ua nā roto roa i te tāatoàraa o te mau ôrapa o to tātou nei oraraa. No reira, i teie mahana, tē faaitoito mai nei te tau no te hinapaarae i to na mau tāvini, ia faaitoito i tē amo i ta tātou tuhaa, ia au i te hinaaro o te Atua.

 

Ua tae i te tau, ia faaea tātou e te mau tāvini o te Atua, i te tāôtià i ta tātou òhipa i roto noa i te mau piha âpooraa no tē rave i te mau faaotiraa o tē òre hoì e maraa ia tātou iho i tē amo. Âreà te àti o te nūnaa, tē haere noa atu ra ia i te rahi e te teimaha. Tāmata noa na tātou i tē rave mai te huru o te raatira pupu òri Māòhi, aita teie taata e mau i nià i te tahua, tei mua, tei muri, tei rōpū, tei te àoào atoà hoì. I nā reira ai hoì o ia, no tē faaoraora e tē faaièiè i te pupu. Ia nā reira atoà tātou i te faaièièraa ia tātou iho, ia maitaì e ia hau noa to tātou haereà i roto i teie tau âpī ta tātou e haere atu nei, Ia ora na !

 

Pure :

 

Mai ta Ietu hoì, to mātou Faaora e ani ra, fārii òe ia mātou ia àti ia na, ia riro e, na te tāpau ora o ta na Parau e faaora ia mātou, e ia hotu ùmu noa to mātou māòhiraa i te māa e au i to òe hanahana. Tahitià mai ia mātou e te Fatu o te raì e te fenua, tahitià mai, mau i to mātou mau fenua rii e to mātou nūnaa i roto i to òe àpu rima metua, e a arataì ia mātou i nià i te êà o te ora.

 

No òe te Hau, e te Mana, e te Hanahana, mai teie nei e a muri noa atu.

 

Mätaio 16, 21-27 Tätauro

 

Tāpati 30 no Tetepa 2020.

Tätauro.

Taramo 63

1 E Taramo na Tävita, ia na i pärahi i te mëtëpara i Iüta ra. 2 E te Atua, o òe hoì ta ù Atua, e ìmi vave au ia òe, te poìhä nei ta ù värua ia òe. Te feàa nei ta ù tino ia òe, mai te fenua marô nei, e te poìhä, e te pape òre. 3 Ia ìte au i to òe ra mana e te hanahana mai ta ù ä hoì i ìte ia òe i te vähi moà ra, 4 e maitaì rahi tei to hämani maitaì i tei te ora. E teie nei, e haamaitaì ta ù vaha ia òe. 5 E nä reira vau i te haamaitaì ia òe i to ù nei oraraa; e hopoi au i o ù puè rima i to òe ra iòa. 6 E mäha hoì ta ù värua mai tei te töâhua e te meî ra. E haamaitaì hoì ta ù vaha ia òe mä te òaòa. 7 Ia manaò vau ia òe i nià i ta ù roì, e ia ìmi ia òe i te mau äraraa ra. 8 O òe hoì tei tauturu mai ia ù ra. E teie nei, e òaòa vau i roto i te maru o to pererau ra. 9 Te àti atu nei ta ù värua ia òe, e te mauhia nei au e to rima àtau ra. 10 O te feiä rä i tïtau mai ia ù ia pohe ra, e reva ia rätou i raro roa i te fenua ra. 11 E maìri rätou i te òè, e riro rätou ei tufaa na te ârope. 12 E òaòa rä te arii i te Atua. E te feiä atoà i tapu ia na ra, e òaòa ia E te vaha o te haavare ra, e ôpanihia ia.  

Ieremia 20.7-9

E türaì te Fatu ia rätou i roto i te tamaì, 7 Ua faatïaniani mai òe ia ù, e te Fatu, e ua vare iho ra vau;  ua faaitoito mai òe ia ù, e o ta òe atu rä tei tupu; ua riro vau ei àtaraa i te mau mahana atoà nei; e ua tähitohitohia vau e rätou atoà e àti noa aè. 8 E ia parau anaè au ra, ia pii noa vau i te rave ûàna, e ia parau i te haru ra, ua ruri-ê-hia te parau a te Fatu ia ù ei faaìnoraa e ei tähitohitoraa, eita e faaea. 9 Ia parau rä vau ra, e òre au e parau i te reira, e òre au e parau faahou i to na ra iòa; riro atu ra taua parau ra mai te auahi àma i roto i ta ù âau ra, ua ôpanihia i roto i to ù ra mau ivi; rohirohi aè ra vau i te faaòromaì-noa-raa, e aita atu ra e tià ia mämü.

Rōma 12.1-2

Te oraraa i roto i te Metia

1 E teie nei, e a ù mau taeaè ra, te aò atu nei au ia òutou mä te aroha rahi o te Atua, e ia püpü atu òutou i to òutou mau tino ei tütia ora, e te moà, e te au hoì i te Atua ra, o te haamori au ia ia òutou. 2 E eiaha e faaau atu i teie nei ao; ei huru ê rä to òutou i te faahouraa i to òutou âau, ia ìte òutou i taua hinaaro tià o te Atua ra, e te au, e te maitaì hoì.

Mātaio 16.21-27

To Ietu faaararaa i to na Àti e to na tiàfaahouraa

(Mär 8.31-33; Rut 9.22)

21 Mai te reira mai taime, ua haamata iho ra Ietu i te faaìte i ta na mau pipi: ia haere ihoä o ia i Ierutarëma e e ia rahi ta te feiä paari, ta te mau tahuà rarahi, ta te mau päpaì parau haamauiui ia na, e e täparahi-pohe-roa-hia o ia, e e tiàfaahouhia rä ia tae i te ruì toru/toru o te mahana. 22 Ua rave mai ra Pëtero ia na, ôpaì aè ra i te hiti, e ua aò atu ra, nä ô atu ra: Ia päruru mai te Atua ia òe, e te Fatu, Eiaha roa òe ia nä-reira-hia mai. 23 Ua färiu mai ra Ietu, nä ô mai ra ia Pëtero: E haere ê atu òe, i muri mai òe ia ù, e Tätani  E türoriraa òe na ù, tënä mau manaò to òe, eere i to te Atua, no te taata rä.

Te mau tïtauraa no te peeraa ia Ietu

(Mär 8.34-9.1; Rut 9.23-27)

24 Ua parau atu ra Ietu i ta na mau pipi: Ia hinaaro te taata i te pee mai ia ù, e faaruè o ia ia na iho, a rave ai i ta na tätauro, a pee mai ai ia ù. 25 O tei hinaaro hoì i te täpeà i to na ora, e ère ia i te ora; e o tei tuu i to na ora no ù nei, e roaa ia ia na te ora. 26 E aha ta te taata nei faufaa, ia noaa noa atu ia na te täatoà o te taoà o teie nei ao, ia pohe o ia e ia ère o ia i te ora? E e aha ta te taata nei e höroà ei hoo i to na iho ora? 27 E haere mai te Tamaiti a te taata mä ta na ra mau merahi atoà, i roto i te hanahana o to na ra Metua, ei reira o ia e utuà ai i te mau taata atoà ia au i ta rätou ra òhipa.

Manaò.

Mau parau e turu nei i ta tätou parau no teie mahana haamoriraa na tätou, teie ia

-Taramo 63, 12 E òaòa rä te arii i te Atua. E te feiä atoà i tapu ia na ra, e òaòa ia E te vaha o te haavare ra, e ôpanihia ia.  

-Ieremia 20, 7 Ua faatïaniani mai òe ia ù, e te Fatu, e ua vare iho ra vau;  ua faaitoito mai òe ia ù, e o ta òe atu rä tei tupu; ua riro vau ei àtaraa i te mau mahana atoà nei; e ua tähitohitohia vau e rätou atoà e àti noa aè.

-Roma 12, 2 E eiaha e faaau atu i teie nei ao; ei huru ê rä to òutou i te ìte faahouraa i to òutou âau, ia ìte òutou i taua hinaaro tià o te Atua ra, e te au, e te maitaì hoì.

-Mätaio 16, 24 Ua parau atu ra Ietu i ta na mau pipi: Ia hinaaro te taata i te pee mai ia ù, e faaruè o ia ia na iho, a rave ai i ta na tätauro, a pee mai ai ia ù. 

Ei manaò tatara.

Teie reo o Ietu ia tätou i teie mahana i te naòraa e, Mataio 16:24  O TE  TAATA  E HINAARO  E PEE  MAI  IA Ù E  FAARUE O IA IA NA IHO, A RAVE  AI  I TA NA  TÄTAURO A PEE MAI  AI  IA  Ù.

Te parau e faahitihia ra i roto i ta tätou taiòraa, te faaìteraa ia o Ietu i te àti ta na e farerei i Ierutarëma. Hoê àti riàrià mau, e ìmihia te mau raveà atoà no te haafifi i te tereraa òhipa a te Atua. E te mau tià e faatere nei i te oraraa o te taata. E ö o Ietu i roto i teie mau faanahoraa tià òre e faaineinehia no na. Èita ra o Ietu e ôtohe i mua i teie mau òhipa, o ta na e ìte ôrama nei, noa atu  te pohe ta na e ìte ra i mua ia na, èita te reira e haaparuparu i te ora a te Atua.

Ta tätou ra ìrava ua tupu ia i muri ïti noa aè i to Petero hinaaroraa e faaturori ia Ietu, no te òhipa e tupu, ia tae rätou i Ierutarëma. Te manaò o Petero eiaha rätou ia haere i reira, i te mea e hämani-ìno-hia, te Metia, e täparahi pohe-roa-hia, te reira te parau faufaa tei mau maitaì ia Petero, aita o ia i faaroo i te tahi atu mau parau ta te Metia i faahiti no te pohe e te tiàfaahouraa, ua morohi te reira i roto i te tiàturiraa no Petero. Aita atoà o Petero i hape roa i nià i teie manaò ta na e horoà nei i nià i te Metia, e aita atoà e òre e no te paruru i te Metia i faahiti ai o ia i teie manaò. Te manaò ra o Ietu i nià ia Petero, e manaò teiaha roa ia, E HAERE  Ê  ATU  ÒE, E TE NA NA  ENEMI, E TURORIRAA  ÒE  NA Ù, AORE  HOÌ  ÒE  I AU  I TA TE ATUA  RA,O TA  TE  TAATA RA  TA OE  I  AU.

Te ìte nei o Ietu ua turori  te faaroo o Petero, i mua i te mau òhipa e tupu i Ierutarëma, ua haapaò noa o ia i te parau no te pohe, aita to na tiàturiraa i nià  i te  parau  no te  tiàfaahouraa. O vai ia taata e tià e horo noa i roto  i te pohe e ìnaha, ua ìte o ia e pohe te ra äè i mua ia na. No Petero ua pöuri roa  o ia i teie parau ta Ietu, mai te mau taata e rave rahi, tei òre roa i tiàturi  i ta Ietu e haapii nei na roto i  te èvaneria ora a te Atua. No Ietu  teie  pohe e teie tiàfaahouraa  e parau ia no te ìritiraa  i te hoê ùputa âpï no te hoê  tiàturiraa, i te  mea èita tei pohe te parau hopeà, tei te mana ra no te tiàfaahouraa. Teie te manaò päpu o Ietu, i hinaaro ai o ia ia märamarama ta na mau pipi, i te òhipa ta na e faatupu nei ia mama te hopoià a te feiä tei teimaha, o teie hopoià, o te hara ia  a te feiä tei faatea-è i te Atua. I reira e ìtehia ai te faufaa òre o te feiä, tei noaa ia na te taoà atoà o teie nei ao, ia ère  o ia i te ora a te Atua, e aha ia ta na e horoà na te Atua o ia tei ère i to na ora?

Aita o Ietu e faafaufaa òre nei i to tätou oraraa, te haamaitaì nei ra ma te horoà i teie parau nehenehe roa, o te taata i hinaaro i te pee mai ia ù e faaruè ia na iho, a rave ai i ta na tätauro, a pee mai ai ia ù. Aita o Ietu e faaturori nei i te mau manaò o te taata, te ìriti nei ra o Ietu i te tahi èà âpï no te oraraa o te mau taata e ora ra i roto i te Metia. Teie reo no Ietu, te manaò mätamua tei mätauhia e tätou i te märamarama tei roto ia i tera feruriraa, faahepo òre .Te piti ra o te manaò tei roto ia i tera faanahoraa e, ia faatupuhia te paari o te Atua i roto i te mau faaueraa ta te Metia e tïtau mai nei i te mau taata atoà e faaroo nei i teie reo. Te hinaaro o ta Ietu e faahiti nei i roto i ta tätou ìrava, e reo  tïtau ia no te Fatu  ia rave te mau taata tätaìtahi i te tätauro i püpühia  i roto ia na èi faatupuraa i te ao o te Atua i te fenua nei. Èita ihoä ra i te mea òhie i te amoraa i to na iho tätauro, mea òhie äè ra  na vëtahi-ê e amo. Mai ta te Metia i amo no te mau hara  atoà  a te mau taata.

E aha ia ta te tätauro e parau mai nei? Te parau mai nei ia teie te ora o te feiä tei tiàturi  i te Atua, tei ìte i te aroha faaòreraa hara. Oia ia, o te faatïanianiraa a te Atua i to na tävini  perofeta  ia Ieremia, i te pene 20 i te ìrava 7 e tae i te ìrava 9. Ua faatïaniani mai òe ia ù e te Atua Nui Tumu Tahi, e ua vare o Ieremia, ma te faaitoito i te raveraa i te òhipa a te Atua, i roto i te hoê taime àrepurepu, e i roto i te hoê taime aita te taata e faaroo faahou nei i te parau a te Atua. E ua tae roa atoà i te taata i te faatanoraa i to na hape, i mua i te Atua, ma te faahape i te parau tià a te Atua. Tei teie  taime teimaha mau to Ieremia amoraa i to na tätauro, na roto i te faaòromaì i te huru o te nunaa tei òre i tiàturi faahou i te Atua. No te itoito ra te tiàturiraa o Ieremia i te Atua Nui Tumu Tahi i òre ai  o ia e paruparu i te amoraa i to na tätauro, i te mea to na ora tei roto ia i te Atua te vairaa. I òre ai to na tätauro e teiaha. Te ora o te feiä tei tiàturi i te Atua, e ora ia tei faatupu te marämaraa te mau òhipa atoà, eiaha te òhipa a te Atua ia riro ei hopoià, ia riro ra èi òaòaraa na te mau taata atoà, ua riro änaè ei hopoià, i reira te tätauro e teiaha ai, ua teiaha änaè, i reira te mau manaò tià òre e ö mai ai, na te reira e haaparuparu, ia paruparu änaè i reira te tätauro e pitaataa ai mai te pahï tei pë, âvivi noa atu ra i nià i te àre miti ia tere i mua. Hoê-ä-atoà ia te faaroo ia paruparu, e âvivi atoà te tätauro, e, e tae roa  to na tävevo i roto i te nunaa. Ia òre ra e mama rahi to te tätauro mai te vavai ra te huru, i te mea na te itoito e amo ra ma te âpeehia e te faaòromaì. I reira ra ua vaiiho ia taua taata faaroo ra ia na ia faaterehia o ia i te hinaaro o te Atua, i te mea ua faaruè o ia ia na iho na te ôpuaraa faaora a te Atua e faanaho ia na, no te peeraa i te Metia. Teie to na reo i te ìrava 27 E haere mai te Tamaiti a te taata mä ta na ra mau merahi atoà, i roto i te hanahana o to na ra Metua, ei reira o ia e utuà ai i te mau taata atoà ia au i ta rätou ra òhipa.

 

Teraì òr. Faatura.